သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ တနင်္သာရီတိုင်းဒေသကြီးဦးစီးမှူးသည် ၂၀၂၄ခုနှစ်၊ မေလ (၉)ရက်နေ့တွင် ဆီလုပ်ငန်းနှင့်ဆီကုန်သည်များအသင်းနှင့်တွေ့ဆုံ၍  ကမ်းနားလမ်း၊ ဆိပ်ငယ်ရပ်ရှိ မြိတ်ခရိုင်၊ စားသုံးသူရေးရာဦးစီးဌာန၏ အစည်းအဝေးခန်းမတွင် စားအုန်းဆီ တင်သွင်းသိုလှောင်ဖြန့်ဖြူးထုတ်ယူရောင်းချလျက်ရှိသော စားအုန်းဆီများနှင့်ပတ်သက်၍ သတ်မှတ်ရည်ညွှန်းဈေးအတိုင်းရောင်းချရန်၊ ဈေးကစားရန် ရည်ရွယ်၍ သိုလှောင်ခြင်းမပြုရန်နှင့် မသမာသည့် လုပ်ဆောင်မှုများမဖြစ်စေရေး ကျင်းပဆောင်ရွက်ခဲ့ကြောင်းသိရှိရပါသည်။

      ထိုသို့တွေ့ဆုံဆွေးနွေးရာတွင် တိုင်းဒေသကြီးဦးစီးမှူး ဦးစိုးဦး (ဒုတိယညွှန်ကြားရေးမှူး)က အဖွင့်အမှာစကားပြောကြားခဲ့ပြီး စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် ကမ္ဘာ့ဈေးနှုန်းဖြစ်ပေါ်ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် စားအုန်းဆီဈေးနှုန်းများဖြစ်ပေါ်စေရေး ထိန်းကျောင်းဆောင်ရွက်လျက်ရှိကြောင်း၊ စားသုံးသူပြည်သူများထံ လက်ဝယ်ရောက်ရှိစေရေးအတွက် ဈေးကားများဖြင့် ရောင်းချခဲ့ပြီးဖြစ်ကြောင်း၊ ဆီဖူလုံမှုရရှိစေရေးအတွက် ဆီခွဲတမ်းများ ပိုမိုရရှိအောင်ဆောင်ရွက်လျက်ရှိကြောင်း၊ ဘူးသွပ်ဆီများကို တင်သွင်းသိုလှောင်ဖြန့်ဖြူးရောင်းချပါက ကုန်အညွှန်းအမှတ်အသားများပါရှိရမည်ဖြစ်ကြောင်း ဆွေးနွေးပြောကြားခဲ့ပါသည်။

       ဆက်လက်၍ ပြည်တွင်းဈေးကွက်အတွင်း စားအုန်းဆီများကို ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်း၊ မသမာသည့်လုပ်ဆောင်မှုများပြုလုပ်ပါက အရေးကြီးကုန်စည်နှင့် ဝန်ဆောင်မှုဥပဒေအရ ထိရောက်စွာအရေးယူခံရမည်ဖြစ်ကြောင်း၊ စက်မှုကုန်ကြမ်းလုပ်ငန်းများအတွက် စားအုန်းဆီဝယ်ယူသုံးစွဲလိုပါက လျှောက်လွှာတင်၍ ဝယ်ယူနိုင်ကြောင်းပြောကြားခဲ့ပြီး ဘေးအန္တရာယ်ကင်းရှင်းပြီး စံချိန်/စံညွှန်းနှင့်ကိုက်ညီသည့် စားသုံးဆီများကိုသာ ရောင်းချရန်ပြောကြားခဲ့ကြောင်း သတင်းရရှိခဲ့ပါသည်။

DOCA(တနင်္သာရီ)

      ကချင်ပြည်နယ်၊ စားသုံးသူရေးရာဦးစီးဌာန၊ မြစ်ကြီးနားခရိုင်ဦးစီးမှူးရုံးအနေဖြင့် ဆန်ဈေးနှုန်း များ ဈေးနှုန်းမြှင့်တင်ရောင်းချခြင်းအလို့ငှာ သိုလှောင်ခြင်း၊ ဖြန့်ဖြူးရောင်းချခြင်းများ ရှိ/မရှိကို ၈.၅.၂၀၂၄ ရက်နေ့တွင် မြစ်ကြီးနားမြို့ အောင်နန်းရပ်ကွက်၊ မြို့မရပ်ကွက်နှင့် စည်ပင်သာယာဈေးရှိ ဆန်အရောင်းဆိုင်များအား စားသုံးသူရေးရာဦးစီးဌာန၊ အထွေထွေအုပ်ချုပ်ရေးဦးစီးဌာန၊ စည်ပင်သာယာရေးအဖွဲ့နှင့် ဆန်ကုန်သည်အသင်းမှ တာဝန်ရှိသူများနှင့် ပူးပေါင်း၍ ကွင်းဆင်းစစ်ဆေးခဲ့ပါသည်။

    ထိုသို့ကွင်းဆင်းဆောင်ရွက်ခဲ့ရာတွင် မြစ်ကြီးနားခရိုင်ဦးစီးမှူးမှ ဆန်ဆိုင်ပိုင်ရှင်များအား ဈေးကွက် အတွင်း ဆန်များအား ဈေးနှုန်းမြှင့်တင်ရောင်းချမှုမရှိစေရေး၊ ဈေးကွက်လိုအပ်ချက်အပေါ် မူတည်၍ ဆန်များအား သိုလှောင်ပြီး ဈေးကစားမှု မပြုလုပ်ရန် ဆွေးနွေးပြောကြားခဲ့ပါသည်။ ဆန်တစ်အိတ်ဈေးနှုန်း များအနေဖြင့်ဆင်း-၃(ရိုးရိုး) ၇၀၀၀၀ ကျပ်၊ ဆင်း-၃(ရှယ်) ၈၅၀၀၀ ကျပ်၊ ငွေတိုး(ရိုးရိုး)၈၀၀၀၀ ကျပ်၊ ငွေတိုး(ရှယ်) ၉၀၀၀၀ ကျပ်၊ မှော်ဘီ(ရှယ်) ၉၅၀၀၀ ကျပ် ၊ရွှေဘိုပေါ်ဆန်း(ရှယ်) ၁၅၀၀၀၀ ကျပ်၊ လုံးသွယ်မွှေး(ရှယ်) ၁၂၅၀၀၀ ကျပ်၊ စောရှုပ်(ရှယ်) ၁၂၀၀၀၀ ကျပ်၊ ဧရာမင်း(ရှယ်) ၁၃၀၀၀၀ ကျပ်ဖြင့် ဈေးကွက်အတွင်းဖြန့်ဖြူးရောင်းချလျက်ရှိပြီး ဈေးနှုန်းမြှင့်တင်ရောင်းချခြင်း အလို့ငှာ သိုလှောင်ခြင်း၊ ဖြန့်ဖြူးရောင်းချခြင်းများမရှိဘဲ ဖြစ်သင့်ဖြစ်ထိုက်သည့် ဈေးနှုန်းအမြတ်ဖြင့်သာ ရောင်းချလျက်ရှိပါသည်။ ဒေသထွက်ဆန်များဖြစ်သည့် ဆင်း-၃၊ ငွေတိုး၊ လုံးသွယ်မွှေး၊ စောရှုပ် ဆန်များအား မြစ်ကြီးနား၊ မိုးကောင်း၊ မိုးညှင်းမြို့နယ်များမှ ဝယ်ယူရောင်းချပြီး မှော်ဘီ၊ ရွှေဘိုပေါ်ဆန်း၊ ဧရာမင်း ဆန်များအား ရွှေဘို၊ အင်းတော်မြို့များမှ လိုအပ်မှုရှိမှသာ ဝယ်ယူပြီး ပြန်လည်ရောင်းချကြောင်း စိစစ်တွေ့ရှိရပါသည်။ ဆန်သိုလှောင်မှုအနေဖြင့် သီးခြားဂိုဒေါင်များဖြင့် သိုလှောင်မှုမရှိဘဲ ဆန်ဆိုင်နှင့်နေအိမ်များတွင်သာ အိတ်လုံးရေ(၃၀၀) မှ (၅၀၀)ကြား သိုလှောင်ထားရှိကြောင်း စိစစ်တွေ့ရှိရပါသည်။

DOCA(ကချင်)

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊  လပွတ္တာမြို့နယ်တာဝန်ခံ ဦးမြင့်ဌေးသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍  (၇-၅-၂၀၂၄) ရက်နေ့၊ နံနက် (၁၀း၀၀) နာရီအချိန်တွင် လပွတ္တာမြို့၊ အမှတ် (၆) ရပ်ကွက်၊ ရွေးနဒီဈေးအတွင်းရှိ  ကုန်မျိုးစုံနှင့် စားသုံးဆီအရောင်းဆိုင်များ ဈေးနှုန်းမြှင့်တင်ရောင်းချမှုရှိ/ မရှိ ဈေးကွက်စောင့်ကြည့်စစ်ဆေးခဲ့ပါသည်။

       ထိုသို့ကွင်းဆင်းစစ်ဆေးမှုများဆောင်ရွက်ရာတွင် မြို့နယ်တာဝန်ခံ ဦးမြင့်ဌေးက လပွတ္တာမြို့၊ အမှတ်(၆)ရပ်ကွက်၊ ရွေးနဒီဈေးအတွင်းရှိ ကုန်မျိုးစုံနှင့် စားသုံးဆီအရောင်းဆိုင်များမှ ဈေးဆိုင်ပိုင်ရှင်များအား စားအုန်းဆီများကို သတ်မှတ်ထားသည့် ရည်ညွှန်းဈေးထက် ပိုမို၍ရောင်းချခြင်းမပြုရန်၊ ဈေးနှုန်းဆိုင်းဘုတ်များကို စားသုံးသူများသိသာထင်ရှားအောင် ချိတ်ဆွဲပြီးရောင်းချကြရန်  ဆိုင်ရှင်များအား အသိynmပေးဆောင်ရွက်ခဲ့ပါသည်။ စားအုန်းဆီများအား သတ်မှတ်ရည်ညွှန်းဈေးထက် ဈေးနှုန်းမြှင့်တင်ရောင်းချခြင်းကိုစိစစ်တွေ့ရှိပါက အရေးကြီးကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်းနှင့် သတ်မှတ်ထားသည့် ဥပဒေညွှန်ကြားချက်များအား လိုက်နာဆောင်ရွက်ကြရန်လိုအပ်ကြောင်း အသိပေးဆွေးနွေးခဲ့မှုကိုသိရှိရပါသည်။

DOCA(ဧရာဝတီ)

      စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ သာပေါင်းမြို့နယ်၊  မြို့နယ်တာဝန်ခံသည် စားသုံးသူဘေးအန္တရာယ်ကင်းရှင်းစွာဝယ်ယူသုံးစွဲနိုင်ရေးရည်ရွယ်၍ ၂၀၂၄ခုနှစ်၊ မေလ (၂)ရက်နေ့၊  နေ့လယ် (၁၃:၀၀) နာရီအချိန်တွင် သာပေါင်းမြို့နယ်၊ အသေးစားဆီစက်လုပ်ငန်းရှင်များနှင့်တွေ့ဆုံ၍  လုပ်ငန်းရှင်အသိပညာပေးဆွေးနွေးမှုများပြုလုပ်ာခဲ့ပါသည်။

    ထိုသို့ဟောပြောရာတွင် စားသုံးသူရေးရာဦးစီးဌာန၊ ပုသိမ်ခရိုင်၊ သာပေါင်းမြို့နယ်တာဝန်ခံက ထုတ်ကုန်လုံခြုံစိတ်ချရမှုရှိစေရေး၊ ကုန်စည်များအရည်အသွေးကောင်းမွန်ရေးနှင့် သင့်တင့်မျှတသောဈေးနှုန်းနှင့် ဈေးကွက်ရရှိရေးတို့ကို  ဆွေးနွေးဆောင်ရွက်ခဲ့ကြောင်းသိရှိရပါသည်။

DOCA(ဧရာဝတီ)

   စားသုံးသူရေးရာဦးစီးဌာန၊ ဧရာဝတီတိုင်းဒေသကြီး၊ ပုသိမ်ခရိုင်၊ ကျုံပျော်မြို့နယ်၊ ပုသိမ်ခရိုင်ဦးစီးမှူးနှင့် ကျုံပျော်မြို့နယ်တာဝန်ခံသည် စားသုံးသူဘေးအန္တရာယ်ကင်းရှင်းစွာဝယ်ယူသုံးစွဲနိုင်ရေးရည်ရွယ်၍ ၂၀၂၄ခုနှစ်၊ ဧပြီလ (၂)ရက်နေ့၊  နေ့လယ် (၁၂:၃၀) နာရီအချိန်တွင် ကျုံပျော်မြို့နယ်၊ ရေကြည်မြို့နယ်၊ ကျောင်းကုန်းမြို့နယ်များ၏ ဆီထုတ်ကိုယ်စားလှယ်များနှင့်တွေ့ဆုံ၍ လုပ်ငန်းရှင်အသိပညာပေးဟောပြောဆွေးနွေးခဲ့ပါသည်။

       ထိုသို့ဟောပြောရာတွင် စားသုံးသူရေးရာဦးစီးဌာန၊ ပုသိမ်ခရိုင်ဦးစီးမှူးက ဆီထုတ်ကိုယ်စားလှယ်များအား စားအုန်းဆီများဖြန့်ဖြူးရာ၌ ဌာနမှထုတ်ပြန်ထားသော အသိပေးကြေငြာချက်များကို လိုက်နာဆောင်ရွက်ခြင်းမရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရှိစေရန် အသိပညာပေးဟောပြောဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)