ပြည်တွင်းကုန်သွယ်မှုသတင်းများ
မကွေးတိုင်းဒေသကြီး၊ မကွေးခရိုင်၊ တောင်တွင်းကြီးကုန်စည်ဒိုင်နှင့် ပွဲရုံများတွင် သီးနှံမျိုးစုံ ဝင်ရောက်ကာ အရောင်းအဝယ်ဖြစ်လျက်ရှိပါသည်။
တောင်ငူမြို့တွင် တပိုင်တနိုင်မှိုစိုက်ပျိုးသူများရှိပါသည်။ အိမ်၌နေရင်း အိမ်တွင်းစီးပွားအဖြစ်လည်း ခြံထဲတွင်စိုက်ပျိုးကြပါသည်။ မှိုစိုက်ပျိုးရာတွင် ပေါင်လုပ်၍ စိုက်ပျိုးရပါသည်။ ပေါင်တစ်ပေါင်လျှင် မှိုထုပ် ၅ထုပ်စိုက်ပျိုးရပါသည်။
ပခုက္ကူမြို့သည်စပါးစိုက်ဧကနည်းပြီး ဆန်လိုဒေသဖြစ်သောကြောင့် အခြားတိုင်းဒေသကြီးများနှင့်မြို့နယ်များမှ ဆန်တင်သွင်းရပါသည်။ ဧရာဝတီတိုင်းဒေသကြီးရှိ ပုသိမ်၊ မြောင်းမြမြို့များမှ ရေလမ်းကြောင်းဖြင့်လည်းကောင်း၊ ရွှေဘို၊ ဆင်ဖြူကျွန်း၊ စလင်းဒေသများမှ ကုန်းလမ်းကြောင်းဖြင့်လည်းကောင်း နေ့စဉ်ဝင်ရောက်လျက်ရှိပါသည်။
ပခုက္ကူမြို့၌ ၂၀၂၃ခုနှစ်၊ အောက်တိုဘာလ(ဒုတိယပတ်)တွင် ဘိလပ်မြေဈေးကွက်မှာ မိုးတွင်း ကာလဖြစ်သောကြောင့် အရောင်းအဝယ်အနည်းငယ်အေးနေပြီး ကြံနှစ်ကောင်ဘိလပ်မြေ တစ်အိတ်လျှင် ကျပ်(၈၇၀၀)၊ အယ်လဖာဘိလပ်မြေ တစ်အိတ်လျှင် ကျပ်(၈၇၀၀)ဖြင့် အရောင်းအဝယ်ဖြစ်ကြောင်း သိရသည်။
တောင်ငူမြို့သို့ အညာဒေသမှထွက်သော ဩဇာသီးများဝင်ရောက်လျက်ရှိရာ ပေါ်ဦးပေါ်စ၌ တစ်လုံးလျှင် ၁၀၀၀ကျပ်မှ ၁၅၀၀ကျပ်အထိပေးရပါသည်။ ယခုအခါတွင် တောင်ငူဒေသမှ ဩဇာသီးများပေါ်လာပြီဖြစ်သဖြင့် တစ်လုံးလျှင် ၅၀၀ကျပ်၊ သုံးလုံးယူလျှင် ၁၀၀၀ကျပ်ဖြင့် ဈေးကျသွားပြီဖြစ်ကာ ပေါများစွာစားသုံးနိုင်ကြပြီဖြစ်ပါသည်။
