သတင်းနှင့် လှုပ်ရှားမှုများ

     မွန်ပြည်နယ်၊  သထုံခရိုင်၊ စားသုံးသူရေးရာဦးစီးဌာနမှ ၀န်ထမ်းများသည် ၂၄.၄.၂၀၂၄ ရက်နေ့တွင် သထုံမြို့နယ် စည်ပင်သာယာရေးအဖွဲ့မှ သထုံမြို့မစျေးတာ၀န်ခံနှင့် ပူးပေါင်း၍ သထုံမြို့မစျေးအတွင်း၌ ရောင်းချလျက်ရှိသော စတိုးဆိုင်များတွင် ကလေးအသုံးအဆောင်ပစ္စည်းများအား စျေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

     ထိုသို့ ကွင်းဆင်းခဲ့ရာတွင် သထုံမြို့မဈေးအတွင်း ရောင်းချလျက်ရှိသော စတိုးဆိုင်များရှိ ကလေးအသုံးအဆောင်ပစ္စည်းများတွင် စားသုံးသူကာကွယ်ရေး ဥပဒေတွင် ပြဌာန်းထားသည့် ကုန်ညွှန်းအမှတ်အသားဖော်ပြချက်များနှင့် ကိုက်ညီမှု ရှိ/မရှိနှင့် ဘေးအန္တရာယ်ဖြစ်နိုင်ချေရှိ/မရှိ စစ်ဆေးခဲ့ပြီး ကုန်ညွှန်းအမှတ်အသားဖော်ပြချက်များနှင့် ကိုက်ညီမှုရှိကြောင်း တွေ့ရှိရသည်။ ဆိုင်ရှင်များအားလည်း ကလေးကစားစရာ ကုန်ပစ္စည်းတစ်မျိူးခြင်းအလိုက် ဘေးအန္တရာယ် ဖြစ်နိုင်မှုအခြေအနေရှိသော ကုန်ပစ္စည်းများ၊ ကုန်အညွှန်းအမှတ်အသား ပြည့်စုံမှုမရှိခြင်းနှင့် ကြိုတင်သတိပေးထားခြင်းမရှိသော ကုန်စည်များအားရောင်းချခြင်းမပြုရန် အသိပညာပေး ပြောကြားခဲ့ကြောင်း သိရှိရပါသည်။

DOCA(မွန်)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ပေးရေးဥပဒေအရ ကုန်စည်(သို့)ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူနစ်နာဆုံးရှုံးမှုများအပေါ် တိုင်ကြားလာ၍သော်လည်းကောင်း၊ စားသုံးသူများဘေးအန္တရာယ်ရှိသည်ဟု ထင်မြင်ယူဆရသောကုန်စည် (သို့) ဝန်ဆောင်မှုနှင့်စပ်လျဉ်း၍သော်လည်းကောင်း  စုံစမ်းစစ်ဆေးမှုများပြုလုပ်၍ စားသုံးသူကာကွယ်ရေးဥပဒေနှင့်အညီ ဖြေရှင်းဆောင်ရွက်ပေးလျက်ရှိပါသည်။

     စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူး၏ လမ်းညွှန်ချက်ဖြင့် စစ်ဆေးရေးအရာရှိဦးဆောင်သော ဈေးကွက်စောင့်ကြည့်စစ်ဆေးရေးအဖွဲ့သည် အထွေထွေအုပ်ချုပ်ရေးဦးစီးဌာန၊ ခရိုင်အစားအသောက်နှင့်ဆေးဝါးကွပ်ကဲရေးဦးစီးဌာန၊ မြို့နယ်ပြည်သူ့ကျန်းမာရေး၊ မြို့နယ်စည်ပင်သာယာရေးအဖွဲ့နှင့် မြန်မာနိုင်ငံရဲတပ်ဖွဲ့တို့ပူးပေါင်း၍ ၂၀၂၄ခုနှစ်၊ ဧပြီလ (၂၄)ရက်နေ့ ၊ နံနက် (၁၀း၀၀) နာရီအချိန်တွင် မိတ္ထီလာမြို့နယ်ရှိ ဆေးဆိုင်(၁၁)ဆိုင်သို့သွားရောက်ကာ ဈေးကွက်စောင့်ကြည့်စစ်ဆေးခဲ့ကြပါသည်။

         အဆိုပါ ဆေးဝါးရောင်းချခွင့်လိုင်စင် (အသစ်)  လျှောက်ထားသော ဆေးဆိုင်များ၌ စစ်ဆေးရာတွင် ဆေးဝါးထားသိုမှု၊ ဖြန့်ဖြူးရောင်းချစနစ်များ၊ စံမညီဆေးဝါးများ၊ သက်တမ်းကုန်ဆေးဝါးများ၊ စပ်ဆေးများရောင်းချခြင်းရှိ/မရှိနှင့် သတ်မှတ်ချက်များကိုက်ညီမှုရှိ/မရှိ အခြေနေများအားစစ်ဆေးခဲ့ကြောင်း သတင်းရရှိပါသည်။

DOCA(မန္တလေး)

      ဧရာဝတီတိုင်းဒေသကြီး၊ ဖျာပုံခရိုင်‌၊ ဘိုကလေးမြို့နယ်၊ စားသုံးသူရေးရာဦးစီးဌာနမှ မြို့နယ်တာဝန်ခံနှင့်ဝန်ထမ်းတို့သည် မြို့နယ်စည်ပင်သာယာရေးအဖွဲ့နှင့်အတူပူးပေါင်း၍    ၂၀၂၄ခုနှစ်၊ ဧပြီလ(၂၂)ရက်နေ့၊ နံနက်(၁၁:၀၀)နာရီအချိန်တွင် ဘိလပ်မြေဈေးနှုန်းနှင့်    ပစ္စည်းလက်ကျန်အခြေအနေများအား ဈေးကွက်အတွင်း ကွင်းဆင်းစစ်ဆေးခဲ့ကြပါသည်။

      အဆိုပါကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာနမှ မြို့နယ်တာဝန်ခံသည်     ဘိုကလေးမြို့နယ်အတွင်းရှိ ဘိလပ်မြေရောင်းချလျက်ရှိသော လုပ်ငန်းရှင်များနှင့်တွေ့ဆုံကာ ဘိလပ်မြေများကို ဈေးကွက်အတွင်းရောင်းချခြင်းရှိ/မရှိ မေးမြန်းစုံစမ်းခဲ့ရာ ဘိုကလေးမြို့နယ်အနေ ဖြင့် Alpha ဘိလပ်မြေ၊ Yojin ဘိလပ်မြေ၊ AAA တံဆိပ် ဘိလပ်မြေကိုသာ လှိုင်လှိုင်သုံးစွဲသဖြင့် မိမိတို့၏ဆိုင်တွင် ၎င်းဘိလပ်မြေအမျိုးအစားများကို ဝယ်ယူဖြန့်ဖြူးရောင်းချပေးလျက်ရှိကြောင်း၊ အခြားဘိလပ်မြေအမျိုးအစားများကို ဘိုကလေးဈေးကွက်အတွင်း ဝယ်ယူဖြန့်ဖြူးရောင်းချခြင်းမရှိသဖြင့် ယခုအချိန်တွင် ဈေးကွက်အတွင်း ပစ္စည်းပြတ်လပ်မှုမရှိကြောင်းနှင့် ဈေးနှုန်းအဆမတန်မြှင့်တင်ရောင်းချခြင်းများမရှိကြောင်း  ပြန်လည်ပြောကြားခဲ့သည်ဟု သတင်းရရှိပါသည်။

DOCA(ဧရာဝတီ)

               ပဲခူးတိုင်းဒေသကြီးအစိုးရအဖွဲ့မှ ကြီးမှူးကျင်းပသည့် ဈေးရောင်းပွဲတော်များတွင် ကုန်ပစ္စည်းများရောင်းချသည့် တောင်ငူမြို့နယ်မှ MSMEs လုပ်ငန်းရှင်များနှင့် တွေ့ဆုံပွဲကို (၂၃.၄.၂၀၂၄)ရက်နေ့ မွန်းလွဲပိုင်းက တောင်ငူမြို့နယ်အထွေထွေအုပ်ချုပ်ရေးဦးစီးဌာနတွင် ကျင်းပ ပြုလုပ်ရာ စားသုံးသူရေးရာဦးစီးဌာန၊ တောင်ငူမြို့နယ်တာဝန်ခံ ဦးမြင့်သူ တက်ရောက်၍ MSMEs ထုတ်ကုန်ပစ္စည်းများ ဈေးကွက်ရှာဖွေဖော်ထုတ်ရေးနှင့် ပတ်သက်၍ ရှင်းလင်း ဆွေးနွေး ခဲ့ပါသည်။

              ရှေးဦးစွာ မြို့နယ်စီမံအုပ်ချုပ်ရေးအဖွဲ့ဥက္ကဌ ဦးဉာဏ်လင်းအောင်က အဖွင့်အမှာ စကား ပြောကြားပြီး စားသုံးသူရေးရာဦးစီးဌာန၊ မြို့နယ်တာဝန်ခံက စားသုံးသူရေးရာဦးစီးဌာန သည် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအောက်ရှိ ဦးစီးဌာနဖြစ်သည်နှင့်အညီ MSMEs ထုတ်ကုန်ပစ္စည်းများ ဈေးကွက်ရှာဖွေရေးကို ကူညီဆောင်ရွက်ပေးလျက်ရှိပါကြောင်း၊ ဈေးရောင်းပွဲတော်များတွင် သွားရောက်ရောင်းချခြင်းဖြင့် မိမိတို့၏ ထုတ်ကုန်ပစ္စည်းများ တခြား ဒေသများမှ သိရှိမည်ဖြစ်ပါကြောင်း၊ ဈေးကွက်သို့ ထိုးဖောက်ဝင်ရောက်နိုင်ရေးအတွက် ထုတ်ကုန်အရည်အသွေးမှီရုံဖြင့် မလုံလောက်ပါကြောင်း၊ သေသပ်လှပစွာထုတ်ပိုးရန်နှင့် ပြည့်စုံ မှန်ကန်သည့် ကုန်အညွှန်းအမှတ်အသားများ ဖော်ပြရန်လည်း လိုအပ်ပါကြောင်း ရှင်းလင်း ပြောကြားပါသည်။

              ထို့နောက်တက်ရောက်လာသည့်  လုပ်ငန်းရှင်များ၏ မေးမြန်းချက်များကို မြို့နယ်စီမံ အုပ်ချုပ်ရေးအဖွဲ့ဥက္ကဌနှင့် စားသုံးသူရေးရာဦးစီးဌာန၊ မြို့နယ်တာဝန်ခံတို့က ရှင်းလင်း ပြောကြား ခဲ့ကြောင်းနှင့် တွေ့ဆုံဆွေးနွေးပွဲသို့ ‌တောင်ငူမြို့နယ်မှ MSMEs လုပ်ငန်းရှင် (၈) ဦး တက်ရောက် ကြောင်း သိရပါသည်။

 စားသုံးသူရေးရာဦးစီးဌာန

 တောင်ငူခရိုင်

             စားသုံးသူရေးရာဦးစီးဌာန၊ ပဲခူးတိုင်းဒေသကြီး ပဲခူးခရိုင်ဦးစီးမှူးရုံးမှ ဦးစိုးဝင်း(ဒု-ကြီးကြပ်ရေးမှူး)သည် (၂၅.၄.၂၀၂၄) ရက်နေ့ နံနက်ပိုင်း (၁၀:၀၀) နာရီတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးမှူးရုံးတွင် စားသုံးသူကာကွယ်ရေးဆိုင်ရာများ Talk Show အစီအစဉ်ဖြင့် အသိပညာပေးခြင်းကို ဆောင်ရွက်ခဲ့ပါသည်။

             Talk Show အစီအစဉ်ဖြင့် အသိပညာပေးခြင်း ပြုလုပ်ရာတွင် ဦးစိုးဝင်း(ဒု-ကြီးကြပ်ရေး မှူး) သည် စားသုံးသူကာကွယ်ရေးဥပဒေတွင် ကုန်စည်များ၏ ကုန်အညွှန်းအမှတ်အသား ဖော်ပြရန် ပြဌာန်းချက်များ၊ ကုန်အညွှန်းအမှတ်အသားများ ပြည့်စုံစွာဖော်ပြထားခြင်းမရှိသော ကုန်စည်များကို ရောင်းချခြင်းမပြရန် တားမြစ်ချက်များ၊ တားမြစ်ချက်များကို ဖောက်ဖျက် ကျူးလွန်ပါက အရေးယူဆောင်ရွက်သွားမည့် ပြစ်မှု၊ ပြစ်ဒဏ်များကို လည်းကောင်း၊ ကုန်အညွှန်း အမှတ်အသား၏ အရေးကြီးပုံများ၊ စားသုံးသူများအနေဖြင့် ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဖတ်ရှုရန်၊ ကုန်အညွှန်းအမှတ်အသား ဖော်ပြချက်နှင့် အညီ လိုက်နာဆောင်ရွက်ရန်နှင့် ကုန်အညွှန်းအမှတ်အသားဖော်ပြခြင်းမရှိသော ကုန်စည်များကို ဝယ်ယူသုံးစွဲခြင်း မပြုသင့်ပုံများကို ရှင်းလင်းပြောကြားခဲ့ပါသည်။

စားသုံးသူရေးရာဦးစီးဌာန

တိုင်းရုံး