သတင်းနှင့် လှုပ်ရှားမှုများ

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံသူရေးရာဦးစီးဌာန၊ ကျွန်းလှမြို့နယ်တာဝန်ခံရုံးအနေဖြင့်  စားသုံးသူပြည်သူများဘေးအန္တရာယ်ကင်းရှင်းစေရေးနှင့် ထုတ်ကုန်များလုံခြုံစိတ်ချရမှုရှိစေရေးအတွက် အစဉ်ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိရာ ၂၀၂၄ခုနှစ်၊ ဧပြီလ(၂)ရက်နေ့၊ နံနက် (၀၈း၀၀)နာရီအချိန်တွင် ကျွန်းလှမြို့၊ သစ်ရာမြိုင်ဈေးတိုက်တန်းရှိ ကုန်မျိုးစုံရောင်းဝယ်ရေးဆိုင်များအား မြို့နယ်အထွေထွေအုပ်ချုပ်ရေးဦစီးဌာနမှ ဒု-ဦးစီးမှူး ဒေါ်ယွန်းမီမီထွန်း၊ ကျွန်းလှမြို့နယ်ရဲတပ်ဖွဲ့မှ ဒု-ရဲအုပ်သော်တာလမင်းနှင့် ဝန်ထမ်းများ၊ မြို့နယ်စည်ပင်သာယာရေးအဖွဲ့မှ ဒု-ဦးစီးမှူး ဦးမင်းကျော့မောင်၊ စားသုံးသူရေးရာဦးစီးဌာန၊  ကျွန်းလှမြို့နယ်တာဝန်ခံ ဒေါ်ဝေဝေအောင်တို့ပူးပေါင်းကာ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ကြောင်းသိရှိရပါသည်။

     ထိုသို့ဈေးကွက်စောင့်ကြည့်စစ်ဆေးခြင်းဆောင်ရွက်ရာ လူသုံးကုန်နှင့်ကုန်မျိုးစုံရောင်းဝယ်ရေးဆိုင်များရှိ ရောင်းချနေသောကုန်ပစ္စည်းများ၌ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ကုန်စည်အုပ်စုအလိုက် မြန်မာဘာသာဖြင့် ကုန်အညွှန်းအမှတ်အသားဖော်ပြရမည့် အသေးစိတ်စိစစ်ချက်များအတိုင်း ပြည့်စုံစွာထည့်သွင်ဖော်ပြထားခြင်းရှိ/မရှိကိုစစ်ဆေးခဲ့ပြီး ဆိုင်ရှင်များအား ဥပဒေပါ စီးပွားရေးလုပ်ငန်းရှင်၏တာဝန်များ၊ လိုက်နာရမည့်အချက်များအကြောင်းနှင့် ကုန်အညွှန်းအမှတ်အသားပြည့်စုံမှုမရှိသော ကုန်စည်များကိုတင်သွင်းရောင်းချခြင်းမပြုရန်ပြောကြားခဲ့ပြီးနောက် ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး ဦးစီးမှူး၏လမ်းညွှန်ချက်၊ ကန့်ဘလူခရိုင်ဦးစီးမှူး၏ ကြီးကြပ်မှုတို့ဖြင့် ကျွန်းလှမြို့နယ်တာဝန်ခံ ဒေါ်ဝေဝေအောင်သည် စားသုံးသူပြည်သူများကို စားသုံးသူအခွင့်အရေးနှင့်အကျိုးစီးပွားကာကွယ်ရန်၊ ဘေးအန္တရာယ်ကင်းရှင်းစေရေး၊ ကျန်းမာရေး၊ ထုတ်ကုန်များလုံခြုံစိတ်ချရမှုရှိစေရေးတို့အတွက် (၂-၄-၂၀၂၄)ရက်နေ့၊ နံနက် (၀၉း၃၀) နာရီအချိန်တွင်  ကျွန်းလှမြို့နယ်စည်ပင်သာယာရေးအဖွဲ့ဝန်ထမ်းများနှင့် အလုပ်သမားများအား စားသုံးသူအကာအကွယ်ပေးရေးအသိပညာပေးဟောပြောပွဲကျင်းပပြုလုပ်ပေးခဲ့ပါသည်။

      အဆိုပါအသိပညာပေးဟောပြောပွဲတွင် မြို့နယ်စည်ပင်သာယာရေးအဖွဲ့မှ အမှုဆောင်အရာရှိ ဦးစိုးထိုက်က ကြိုဆိုနှုတ်ခွန်းဆက်စကားပြောကြားခဲ့ပြီးနောက် မြို့နယ်တာဝန်ခံက  စားသုံးသူများအနေဖြင့် စားသုံးသူအခွင့်အရေး(၈)ချက်၊ စားသုံးသူများလိုက်နာဆောင်ရွက်ရမည့်တာဝန်(၄)ချက်၊ စားသုံးသူအကာကွယ်ပေးရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ကုန်စည်အမျိုးအစားအလိုက် သတ်မှတ်ချက်နှင့်အညီ မြန်မာဘာသာဖြင့် သိသာထင်ရှားစွာဖော်ပြရမည့် အသေးစိတ်စိစစ်ချက်များကို ပြည့်စုံစွာထည့်သွင်းဖော်ပြ၍  ထုတ်လုပ်ဖြန့်ဖြူးသည့် ကုန်ပစ္စည်းများကိုသာဝယ်ယူစားသောက်အသုံးပြုတတ်ရန်နှင့် စားသုံးသူနစ်နာဆုံးရှုံးမှုရှိလျှင် တိုင်ကြားနိုင်ကြောင်း၊ တိုင်ကြားနိုင်သည့် နေရာများဖြစ်သည့် မိမိတို့စားသုံးသူရေးရာဦးစီးဌာန၊ ခရိုင်ဦးစီးမှူးရုံးရှိ စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC) တွင်လည်းကောင်း၊ Facebook Page ဖြစ်သော DOCA Myanmar Page တွင်လည်းကောင်း၊  မိမိတို့ဌာန၏ Website ဖြစ်သည့် www. doca. gov. mm တွင်လည်းကောင်း တိုင်ကြားနိုင်ပြီး စားသုံးသူကိစ္စရပ်များစုံစမ်းမေးမြန်းရန်အတွက် Call Center No. (1535) အား ရုံးချိန်အတွင်း ဖွင့်လှစ်ထားရှိကြောင်း၊ စားသုံးသူမိဘပြည်သူများအနေဖြင့်လည်း စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များအကြောင်းကိုသိရှိလိုပါက Website တွင် ဝင်ရောက်လေ့လာနိုင်ကြောင်းနှင့် စားအုန်းဆီ၏ ကျန်းမာရေးအကျိုးပြုပုံများအကြောင်းကို မြို့နယ်စည်ပင်သာယာရေးအဖွဲ့အမှုဆောင်အရာရှိဝန်ထမ်းများနှင့် အလုပ်သမားများစုစုပေါင်း (၁၈)ဦးတို့အား အကျယ်တဝင့်ရှင်းလင်းပြောကြားခဲ့ပြီး (၂/၂၀၁၉) ညွန်ကြားချက်ပါ စားသုံးသူအသိပညာပေးလက်ကမ်းစာစောင်များဖြန့်ဝေပေးခဲ့ကြောင်း သတင်းရရှိခဲ့ပါသည်။

DOCA(စစ်ကိုင်း)       

     ပဲခူးတိုင်းဒေသကြီး၊ နတ်တလင်းခရိုင်၊  ဇီးကုန်းမြို့နယ်၊ အထွေထွေအုပ်ချုပ်ရေးဦးစီးခန်းမ၌ (၂၆-၃-၂၀၂၄) ရက်နေ့၊ နေ့လယ် (၁၃:၃၀) နာရီအချိန်၌ MSMEs လုပ်ငန်းများတိုးတက်စေရေး လုပ်ငန်းဆောင်ရွက်မှုလွယ်ကူအဆင်ပြေစေနိုင်ရေး လိုအပ်သည်များ ထောက်ပံ့ကူညီဆောင်ရွက်နိုင်ရေးတို့အတွက် MSMEs စားသောက်ကုန်ထုတ်လုပ်သော လုပ်ငန်းရှင်များနှင့်တွေ့ဆုံဆွေးနွေးပွဲသို့ မြို့နယ်စီမံအုပ်ချုပ်ရေးဥက္ကဋ္ဌနှင့်အဖွဲ့၊ စည်ပင်သာယာရေးအဖွဲ့၊ စားသုံးသူရေးရာဦးစီးဌာန၊ ပြန်ကြားရေးနှင့်ပြည်သူဆက်ဆံရေးဦးစီးဌာနမှ တာဝန်ရှိသူများ၊  စားသောက်ကုန်ထုတ်လုပ်သော လုပ်ငန်းရှင်(၂၃)ဦးတက်ရောက်ခဲ့ကြပါသည်။

     အဆိုပါဆွေးနွေးပွဲတွင် မြို့နယ်စီမံအုပ်ချုပ်ရေးဥက္ကဋ္ဌ ဦးမျိုးသက်အောင်က MSMEs လုပ်ငန်းများဖွံ့ဖြိုးတိုးတက်စေရေးအတွက် စားသောက်ကုန်ထုတ်လုပ်ဖြန့်ဖြူးရောင်းချနေသော လုပ်ငန်းရှင်များ အနေဖြင့် လုပ်ငန်းတိုးချဲ့နိုင်မှုနှင့် ဈေးကွက်အရည်အသွေးစွန့်ဦးတီထွင်လိုမှုတို့နှင့်  အသေးစား၊ အငယ်စား၊ အလတ်စား လုပ်ငန်းအသီးသီးတို့မှ ဒေသတွင်းထုတ်လုပ်မှုမှသည် ဈေးကွက်ဝင် ပြည်ပအထိ ထိုးဖောက်နေရာယူနိုင်ရေးနှင့် တိုးချဲ့နိုင်စေရေး တိုက်တွန်းအကြံပြု၍  နိုင်ငံတဝန်း စိုက်ပျိုးရေး၊ မွေးမြူရေးအပြင် အခန်းကဏ္ဍသည်လည်း ဖွံ့ဖြိုးတိုးတက်ရန်လိုအပ်သည်ဖြစ်၍ လုပ်ငန်းများလုပ်ကိုင်ရာတွင် သက်ဆိုင်ရာဌာနများမှ သတ်မှတ်ထားသည့် အထောက်အထားများရရှိရန်၊ အခက်အခဲကိစ္စများအားလည်း လွယ်ကူစွာရဖြေရှင်းနိုင်ရေး အဓိကကျသည့် ငွေကြေးရင်းနှီးမှုခိုင်လုံသည့် လုပ်ငန်းများအတွက် ကူညီဆောင်ရွက်ပေးမည်ဖြစ်ကြောင်းဆွေးနွေးခဲ့ပြီး ဆက်လက်၍ စားသုံးသူရေးရာဦးစီးဌာနမှ မြို့နယ်တာဝန်ခံက စားသောက်ကုန်လုပ်ငန်းရှင်များအား မိမိတို့ထုတ်ကုန်များအလိုက် ထုတ်ကုန်လုံခြုံစိတ်ချရမှုသတင်းအချက်အလက်၊ ကုန်ညွှန်းအမှတ်အသားများပြည့်စုံပြီး အရည်အသွေးပြည့်မီသည့် ပါကင်ထုပ်ပိုးမှုစနစ်များဖြင့် လုပ်ငန်းတိုးချဲ့ဆောင်ရွက်ရာတွင် ဈေးကွက်ရောက်ရှိမည့်အခြေအနေ၊ အခြားတိုင်း၊ ခရိုင်မြို့နယ်များမှ ထုတ်ကုန်များ၏ နမူနာနည်းပညာများကိုဆွေးနွေးပေးခဲ့ပြီး လုပ်ငန်းရှင်၏ ထုတ်ကုန်များထုတ်လုပ်ရာတွင် အခြားသက်ဆိုင်ရာဌာနများ၏ ကူညီမှုများလိုအပ်ပါက ချိတ်ဆက်ကူညီပေးမည်ဖြစ်ကြောင်း ဆွေးနွေးပေးခဲ့ပါသည်။

     ထို့နောက် တက်ရောက်လာသော လုပ်ငန်းရှင်များက လုပ်ငန်းဆောင်ရွက်မှုနှင့် အခက်အခဲလိုအပ်ချက်များ၊ လုပ်ငန်းတိုးချဲ့လိုမှုတို့အား ပြန်လည်ဆွေးနွေးခဲ့ကြကြောင်းသိရှိရပါသည်။

DOCA(ပဲခူး)

      ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် သက်ဆိုင်ရာဌာနများနှင့် ရပ်ကွက်ကျေးရွာအုပ်စု၊ အုပ်ချုပ်ရေးမှူးများနှင့် လုပ်ငန်းညှိနှိုင်းအစည်းအဝေးကို မတ်လ (၂၆)ရက်နေ့၊ နံနက်(၁၀:၀၀)နာရီအချိန်တွင် တောင်ပိုင်းရပ်ကွက်၊ မြို့နယ်အထွေထွေ အုပ်ချုပ်ရေးဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ကြောင်း သိရှိရပါသည်။

      အဆိုပါ အစည်းအဝေးတွင် မြို့နယ်စီမံအုပ်ချုပ်ရေးအဖွဲ့ဥက္ကဌ ဦးကျော်ဒေဝက မကြာမီ သင်္ကြန်ပွဲ စည်ကား သိုက်မြိုက်စွာကျင်းပနိုင်ရေးကြိုတင်ပြင်ဆင်ရန် လယ်ယာမြေအခြားနည်း အသုံးပြုမှုများရှိပါက တားမြစ်ဆောင်ရွက်သွားရန်နှင့် မြို့နယ်လယ်ယာမြေစီမံခန့်ခွဲမှု အဖွဲ့သို့ တင်ပြရန်၊ မျိုးစေ့ချကိရိယာ (Seeder)များအသုံးပြု၍ သီးထပ်သီးနှံများစိုက်ပျိုးရရှိပါက ရရှိ လာမည့်အကျိုးကျေးဇူးများအား တောင်သူများသိရှိအောင် ရှင်းလင်းပြောကြားရန် ပွင့်လင်း ရာသီရောက်ရှိလာပြီဖြစ်သည့်အတွက် မီးဘေးလုံခြုံရေးသတိပြုဆောင်ရွက်ရန် ပြောကြားခဲ့ကြောင်း သိရှိရပြီး ဆက်လက်၍ စီမံအုပ်ချုပ်ရေးအဖွဲ့ အဖွဲ့ဝင်(၁) ဒုတိယဗိုလ်မှူးကြီးသန့်ဇင်က ကျေးရွာလုံခြုံရေး၊ လူပုဂ္ဂိုလ်လုံခြုံရေးအထူးဂရုပြရန်၊ မိမိတို့၏ ကျေးရွာများအတွင်း ဧည့်စိမ်း၊ လူစိမ်းများရောက်ရှိလာပါက သတင်းပို့တင်ပြသွားရန်၊ မိမိတို့၏ ကျေးရွာ/ရပ်ကွက်အတွင်း ရေကင်း၊ မီးကင်းလုံခြုံရေးဆောင်ရွက်မှုများနှင့်ပတ်သက်၍ လုံခြုံရေးပေါ့ဆမှု မဖြစ်ပွားစေရေး အထူးဂရုပြုဆောင်ရွက်သွားရန်၊ ဧည့်စာရင်းစစ်ဆေးရာတွင် ပြည်သူ့လုံခြုံရေး အဖွဲ့များဖြင့် ပေါင်းစပ်ဆောင်ရွက်ရန်၊ ပြည်သူ့စစ်မှုထမ်းဆင့်ခေါ်ရေးဆိုင်ရာကိစ္စရပ်များနှင့် စပ်လျဉ်း၍ အကြောင်းအရာများအား မိမိတို့အနေဖြင့် အသေးစိတ်သိရှိနိုင်ရန် ကြိုးစားဆောင်ရွက်ပြီး အခြားသူများကိုလည်း ကျိုးကြောင်းခိုင်လုံစွာရှင်းပြနိုင်ရန်တို့ကို ပြောကြား ခဲ့ကြောင်း သိရှိရပါသည်။ ထို့နောက် တက်ရောက်လာကြသော ရပ်ကွက်ကျေးရွာ အုပ်ချုပ်ရေးမှူးများက သိရှိလိုသည့်အချက်များကို မေးမြန်ရာ တာဝန်ရှိသူက ပြန်လည်ရှင်းလင်းဖြေကြားခဲ့ကြောင်း သိရှိရပါသည်။

DOCA(ရန်ကုန်)

      ရန်ကုန်းတိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ်တွင် ဘိလပ်မြေအမျိုးအစားအမျိုးမျိုးတို့အား ဝယ်ယူသုံးစွဲရာတွင် ဈေးကွက်အတွင်းပစ္စည်းပြတ်လပ်မှုမရှိစေရေးနှင့် ဈေးနှုန်း အဆမတန်မြှင့်တင် ရောင်းချခြင်းများ မပြုလုပ်ကြရန် ရည်ရွယ်၍ အိမ်ဆောက်ပစ္စည်းအမျိုးမျိုး ဖြန့်ဖြူးရောင်းချလျက်ရှိသော ကုန်အမာဆိုင်ကြီးများသို့ မတ်လ(၃၁)ရက်နေ့၊ နံနက် (၁၀:၀၀)နာရီ အချိန်တွင် ဆိုင်ပိုင်ရှင်လုပ်ငန်းရှင်များအား သွားရောက်တွေ့ဆုံပြီး ဈေးကွက်အတွင်း ကွင်းဆင်း စစ်ဆေးခဲ့ကြောင်း သိရှိရပါသည်။

     အဆိုပါ ဈေးကွက်အတွင်း ကွင်းဆင်းစစ်ဆေးခဲ့ရာတွင် ရန်ကုန်တောင်ပိုင်းခရိုင်ဦးစီးမှူးရုံး၏ ညွန်ကြားချက်အရ စားသုံးသူရေးရာဦးစီးဌာန မြို့နယ်တာဝန်ခံနှင့်ဝန်ထမ်းများသည် ကွမ်းခြံကုန်းမြို့နယ်အတွင်းရှိ အိမ်ဆောက်ပစ္စည်းအမျိုးမျိုးဖြန့်ဖြူးရောင်းချလျက်ရှိသော အမှတ် (၇၂)၊ ရတနာပုံ (၁)လမ်း၊ ဈေးပိုင်ရပ်ကွက်ရှိ ဒေါ်ခင်မာဝေဆိုင်၊ အမှတ်(၅၉)၊ ဗဟိုဈေးလမ်း၊ ဈေးပိုင်ရပ်ကွက်ရှိ ဦးရဲမြင့်+ဒေါ်စန်းရီဆိုင်နှင့် အမှတ်(၂၇၈၂)၊ စိတ္တသုခလမ်း၊ တောင်ဘက်ပိုင်ရပ်ကွက်၊ ဒေါ်အေးကြည် ကုန်အမာဆိုင်ကြီးများတွင် ဖြန့်ဖြူးရောင်းချပေးလျက်ရှိသော Alpha ဘိလပ်မြေ၊ ကြံနှစ်ကောင် ဘိလပ်မြေ၊ Apache ဘိလပ်မြေအမျိုးအစားများကိုသာ လှိုင်လှိုင်ဖြန့်ဖြူးရောင်းချ ပေးလျက်ရှိကြောင်း တွေ့ရှိခဲ့ရပြီး (ဘားအံ)မြိုင်ကလေးထုတ် နာရီအမှတ်တံဆိပ်ဘိလပ်မြေအမျိုးအစားများအား ဝယ်ယူဖြန့်ဖြူးရောင်းချများ မတွေ့ရှိရဘဲ ဆက်လက်၍တာဝန်ရှိသူများက လုပ်ငန်းရှင်များအား ယခုရောင်းချပေးလျက်ရှိသော ဘိလပ်မြေအမျိုးအစားများ ပစ္စည်းပြတ်လပ်နိုင်မှု ရှိ/မရှိ မေးမြန်း ခဲ့ရာတွင် ကွမ်းခြံကုန်းမြို့နယ်အနေဖြင့် ဒေသဖွံ့ဖြိုးမှုဆိုင်ရာလုပ်ငန်းများအတွက် ဘိလပ်မြေ ပြတ်လပ်မှုမရှိနိုင်ပါကြောင်း ဖြေကြားခဲ့သဖြင့် ဘိလပ်မြေလက်ကျန်အိတ်များအား စစ်ဆေးရေတွက် ခဲ့ပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)