သတင်းနှင့် လှုပ်ရှားမှုများ

နေပြည်တော်၊ စက်တင်ဘာ ၁၂ ၂၀၂၀ ပြည့်နှစ်၊ စက်တင်ဘာလ ၁၂ ရက်နေ့၊ (၁၀:၀၀)နာရီ အချိန်တွင် ရုံးအမှတ်(၅၂)၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စုပေါင်းအစည်းအဝေး ခန်းမ၌ Zoom Application ဖြင့် ကျင်းပပြုလုပ်သော စားသုံးသူရေးရာဦးစီးဌာန၏ လုပ်ငန်းညှိနှိုင်း အစည်းအဝေးသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသန်းမြင့် တက်ရောက်အမှာစကားပြောသည်။

 ပြည်ထောင်စုဝန်ကြီးကအမှာစကားပြောကြားရာတွင် COVID-19 ကြောင့် မိမိတို့၏ လုပ်ငန်းများဆောင်ရွက်ရာတွင် ကျန်းမာရေးနှင့်အားကစားဝန်ကြီးဌာန၏ ညွှန်ကြားချက်နှင့်အညီ လိုက်နာဆောင်ရွက်ရမှာဖြစ်သည့်အပြင် တစ်ဦးချင်းအနေနဲ့လည်းလိုက်နာဆောင်ရွက်ရမှာဖြစ်ကြောင်း၊ မလိုအပ်ဘဲအပြင်မထွက်ရန်လိုအပ်ကြောင်း၊ တာဝန်အရထွက်ရပါကလည်း ကျန်းမာရေး နှင့် အားကစားဝန်ကြီးဌာနလမ်းညွှန်ချက်များနှင့် အညီလိုက်နာဆောင်ရွက်ရန်ဖြစ်ကြောင်း၊ စားသုံးသူရေးရာဦးစီးဌာနအနေဖြင့် မိမိဌာန၏ လုပ်ငန်းတာဝန်များအပြင် တိုင်းဒေသကြီးအစိုးရအဖွဲ့များ၏ လုပ်ငန်းများတွင်လည်းပူးပေါင်းဆောင်ရွက်ပေးသွားရန်ဖြစ်ကြောင်း၊ COVID-19 ရောဂါ ကူးစက်မှုနှုန်းမြင့်မားလာတဲ့အတွက် လူဝင်/ထွက်မှုအား ကန့်သတ်တားဆီးမှုများရှိသည့်အတွက် ကုန်ပစ္စည်းပြတ်လပ်မှု၊ ကုန်ဈေးနှုန်းကြီးမြင့်မှုများဖြစ်လာနိုင်ကြောင်း၊ စားသုံးသူရေးရာဦးစီးဌာန အနေနှင့် အခြေခံစားသောက်ကုန်များ၊ ဆေးဝါးနှင့်ကျန်းမာရေးသုံးပစ္စည်းများအား ဖြစ်သင့်သည့် ဈေးထက်မြင့်တက်ရောင်းချမှုများကိုလည်း စစ်ဆေးဆောင်ရွက်ရမှာဖြစ်ကြောင်းနှင့် စစ်ဆေးဆောင်ရွက်ရာတွင် သက်ဆိုင်ရာဌာနများနှင့် ပူးပေါင်းဆေင်ရွက်သွားရမှာဖြစ်ကြောင်း၊

ဝန်ကြီးဌာနအနေဖြင့် အရေးပေါ်ရိက္ခာ၊ ဆန်နှင့်ဆီ ဝယ်ယူသိုလှောင်ခြင်းလုပ်ငန်းများကို ဆောင်ရွက်ခဲ့ကြောင်း၊ ဝန်ထမ်းများအနေဖြင့် ဌာန၏လုပ်ငန်းတာဝန်များအပြင် တိုင်းဒေသကြီး/ ပြည်နယ်အစိုးရအဖွဲ့များ၏ လုပ်ငန်းများတွင်ပူးပေါင်းဆောင်ရွက်ရာတွင် ကျန်းမာရေးနှင့်အားကစားဝန်ကြီးဌာန၏ လမ်းညွှန်ချက်များနှင့်အညီလိုက်နာဆောင်ရွက်ရန်လိုအပ်ပါကြောင်း၊

ရုံးချုပ်အနေနဲ့လည်းလုပ်ငန်းများကိုပုံမှန်ဆောင်ရွက်လျက်ရှိကြောင်း၊ ဆွေးနွေးပွဲများကို Online မှ ဆောင်ရွက်လျက်ရှိကြောင်း၊ Online မှ ညှိနှိုင်းဆောင်ရွက်မှု့များသည် COVID-19 ကပေးတဲ့ New Normal အခြေအနေဖြစ်ပါကြောင်း၊ လုပ်ငန်းများကို New Normal အရ အရှိန် အဟုန်မပျက်ဆောင်ရွက်ရမှာဖြစ်ကြောင်းလမ်းညွှန်မှာကြားခဲ့ပါသည်။

ယင်းနောက် ဒုတိယဝန်ကြီးက စားသုံးသူအကာအကွယ်ပေးရေးလုပ်ငန်းများ၊ စားသုံးသူ သက်သာချောင်ချိရေးလုပ်ငန်းများ၊ အရေးပေါ်ရိက္ခာဆန်နှင့် ဆီသိုလှောင်မှုအခြေအနေများ၊ တောင်သူ လယ်သမားအခွင့်အရေးကာကွယ်ရေးနှင့် အကျိုးစီးပွားမြှင့်တင်ရေးဥပဒေအရ လယ်ယာထွက်ကုန် စီမံခန့်ခွဲရေးအဖွဲ့မှ ဆန်စပါးဝယ်ယူသိုလှောင်မှုအခြေအနေများ၊ ကုန်အညွှန်းအမှတ်အသားနှင့် ပတ် သက်ဆောင်ရွက်ရမည့်ကိစ္စရပ်များ၊ ပြည်တွင်းကုန်သွယ်မှုအတွက် ဆောင်ရွက်ရမည့်ကိစ္စရပ်များ၊ ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်းအဖွဲ့များ၊ ကဏ္ဍအလိုက်ဇုန်များ၊ အစုအဖွဲ့များ ဖွဲ့စည်းဆောင်ရွက်သည့်လုပ်ငန်းများ၊ COVID-19 အလွန်တွင် ဆောင်ရွက်ရမည့် လုပ်ငန်းများနှင့် ပတ်သက်၍ ရှင်းလင်းဆွေးနွေးခဲ့ပါသည်။

ထို့နောက် တိုင်းဒေသကြီး/ ပြည်နယ်ဦးစီးမှူးများက မိမိတို့တိုင်းဒေသကြီး/ ပြည်နယ်များတွင် လုပ်ငန်းများဆောင်ရွက်နေမှုများအား အသီးသီးရှင်းလင်းတင်ပြကြပြီး တင်ပြချက်များအပေါ် စားသုံးသူရေးရာဦးစီးဌာန၊ ညွှန်ကြားရေးမှူးချုပ် ဦးမြင့်လွင်မှ ပြန်လည်ဖြည့်စွက်ရှင်းလင်းတင်ပြသည်။

ထို့နောက် ရှင်းလင်းတင်ပြမှုများအပေါ် ဒုတိယဝန်ကြီးက ထပ်မံဖြည့်စွက်ရှင်းလင်းပြီး ပြည်ထောင်စုဝန်ကြီးက နိဂုံးချုပ်စကားပြောကြားကာ အခမ်းအနားကို ရုပ်သိမ်းလိုက်ကြောင်း သတင်းရရှိပါသည်။

ITQM(DOCA)

          စားသုံးသူရေးရာဦးစီးဌာန၏ www.doca.gov.mm Wesite တွင်ပါဝင်သော စားသုံးသူတိုင်ကြားမှုလက်ခံဆောင်ရွက်ရေးစနစ် (consumer complaint system) အသစ်အား ၂၀၂၀ ပြည့်နှစ် စက်တင်ဘာလ ၁ရက်နေ့ မှစတင်၍ အသုံးပြုလျှက် ရှိပါသည်။ အဆိုပါစနစ်တွင် တိုင်ကြားသူများအနေဖြင့် မိမိတို့၏တိုင်ကြားမှုအပေါ် အရေးယူဆောင်ရွက်နေမှုအခြေအနေများအား အွန်လိုင်းအသုံးပြု၍ website မှတဆင့် စောင့်ကြည့်နိုင်မည်ဖြစ်ပါသည်။

ပြည်သူများအနေဖြင့် အဆိုပါစနစ်အသုံးပြုခြင်းနှင့်ပတ်သက်၍ အသေးစိတ်သိရှိလိုပါက အောက်ဖော်ပြပါ pdf ဖိုင်တွင် လေ့လာနိုင်ပါကြောင်း လေးစားစွာ အသိပေးအပ်ပါသည်-

ITQM

         ၂၀၂၀ခုနှစ်၊ သြဂုတ်လ (၂၅)ရက်နေ့တွင် ကယားပြည်နယ်၊ စားသုံးသူရေးရာဦးစီးဌာနမှ တာဝန်ရှိသူများသည် လွိုင်ကော်မြို့ပေါ်ရှိ ဆေးဆိုင်များတွင် COVID-19 ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြုပစ္စည်းများ၊ ဆေးဝါးများအား ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း ရှိ/မရှိကို မြို့နယ် ကုန်ဈေးနှုန်းထိန်းချုပ်ရေးလုပ်ငန်းကော်မတီနှင့်ပူးပေါင်း၍ ဈေးကွက်ကွင်းဆင်းစစ်ဆေးမှုများ ပြုလုပ်ခဲ့ပါသည်။

         ကွင်းဆင်းစစ်ဆေးရာတွင် Covid ကာလအတွင်း အဖျားပျောက်ဆေး၊ အကိုက်အခဲပျောက်ဆေး၊ အားဆေးများ၊ Covid-19 ကာကွယ်၊ ထိန်းချုပ်၊ ကုသရေးဆိုင်ရာ ကျန်းမာရေးအထောက်အကူပြုပစ္စည်းများဖြစ်သည့် Mask ၊ Hand Gel အမျိုးမျိုးကို ဝယ်လိုအား များပြားမှုမရှိသေးသဖြင့် ပုံမှန်သာရောင်းချနေရပြီး ပစ္စည်းပြတ်လပ်မှု အခြေအနေများမရှိသေးကြောင်း၊ Mask နှင့် Hand Gel များမှာ အမျိုးအစားအလိုက် ဈေးနှုန်းအနည်း ငယ်သာကွာဟမှုရှိ၍ ဝယ်ရင်းဈေးနှင့်အနည်းငယ်ကွာ ပြီးရောင်းချလျက်ရှိကြောင်း၊ ဆေးဝါးများကိုလည်း လက်ရှိကာလပုံမှန်ဈေးနှုန်းများဖြင့်သာ ရောင်းချနေကြောင်း၊ ဈေးနှုန်းအဆမတန်မြှင့်တင်ရောင်းချခြင်း မရှိကြောင်း တွေ့ရှိခဲ့ရပြီး စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ  ထုတ်ပြန်ထားသော  ကုန်စည်များအပေါ် တားမြစ်မိန့်ထုတ်ပြန်ခြင်း  အမိန့်ကြော်ငြာ စာအမှတ်( ၂၁/၂၀၂၀ )အား လုပ်ငန်းရှင်များ သိရှိလိုက်နာဆောင်ရွက်ကြရန် အသိပေးဆောင်ရွက်ခဲ့ကြောင်း သတင်းရရှိပါသည်။

ကယားပြည်နယ်

စားသုံးသူရေးရာဦးစီးဌာန

            မွန်ပြည်နယ်၊ ကျိုက်မရောမြို့နယ်၊ စားသုံးသူရေးရာဦးစီးဌာန၊ စည်ပင်သာယာရေးအဖွဲ့နှင့် ကျန်းမာရေးဦးစီးဌာန တို့ပါဝင်သည့် ပူးပေါင်းအဖွဲ့သည် ကျိုက်မရောမြို့နယ်တွင် ဈေးကွက်အတွင်းရှိ ပြည်တွင်းပြည်ပမှ တင်သွင်းလာသော သနပ်ခါးအမည်ခံ အလှကုန်များအား မြန်မာဘာသာဖြင့် ပူးတွဲဖော်ပြရာ၌ စားသုံးသူ ကာကွယ်ရေးဥပဒေပြဌာန်းချက်နှင့် ကိုက်ညီမှု ရှိ/မရှိ ၂၂.၈.၂၀၂၀ ရက်နေ့က ကျိုက်မရောမြို့မဈေးကြီးနှင့် ရပ်ကွက်အတွင်းရှိ စတိုးဆိုင်များ၊ အလှကုန်ဆိုင်များသို့ သွားရောက်စစ်ဆေးခဲ့ကြကြောင်း သိရှိရသည်။

     ထိုသို့ ကွင်းဆင်းစစ်ဆေးရာ၌ ပြည်တွင်းပြည်ပမှ တင်သွင်းလာသည့် သနပ်ခါးအမည်ခံ အလှကုန်ပစ္စည်းများ၌ ၁၀ ဂရမ်အထက် အလှကုန်များအား မြန်မာဘာသာဖြင့် ဖော်ပြရာ၌ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြချက်နှင့် ကိုက်ညီမှု ရှိ/မရှိ ဌာနဆိုင်ရာပူးပေါင်းအဖွဲ့ဖြင့် စစ်ဆေးခြင်းဖြစ်ပြီး အလှကုန်များမှာ ကုန်အညွှန်းအမှတ်အသားဖော်ပြချက်နှင့် ကိုက်ညီမှုမရှိသော သနပ်ခါးအမည်ခံအလှကုန်များ မတွေ့ရှိကြောင်း သိရှိရပြီး မြန်မာဘာသာဖြင့် ကုန်အညွှန်းအမှတ်အသား ဖော်ပြချက်မပါရှိသော အလှကုန်ပစ္စည်းများကို ရောင်းချခြင်းမပြုရေး အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန

    တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဝန်ထမ်း များသည် ၂၀၂၀ ပြည့်နှစ် သြဂုတ် ၂၅ ရက်နေ့တွင် တိုင်းဒေသကြီးအစားအသောက်နှင့် ဆေးဝါးကွပ်ကဲရေးဦးစီးဌာန၊ မြို့နယ်ကျန်းမာရေး၊ မြို့နယ်စည်ပင်သာယာရေး၊ မြို့နယ်အထွေထွေအုပ်ချုပ်ရေးတို့နှင့် ပူးပေါင်း၍ ထားဝယ်မြို့ပေါ်ရှိ ကုန်စုံဆိုင်များ၊ Shopping Center များတွင် စျေးကွက်စောင့်ကြည့် စစ်ဆေးခဲ့ပါသည်။

     ထိုသို့ စျေးကွက်စောင့်ကြည့်စစ်ဆေးရာတွင် ကုန်စုံဆိုင်များ၊ Shopping Center များ၌ စားသောက်ကုန်များတွင် အမှတ်တံဆိပ်များအား ကုန်အညွှန်းအမှတ်အသားပြဌာန်းချက်များ နှင့်ကိုက်ညီမှု ရှိ/မရှိ စစ်ဆေးခဲ့ပါသည်။ ထို့နောက် သနပ်ခါးအမည်ခံအလှကုန်ပစ္စည်းများ၌ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မြန်မာနိုင်ငံစားသုံးသူကော်မရှင်က ထုတ်ပြန်ထားသော အမိန့်ကြေငြာစာအမှတ် (၂/၂၀၁၉) ညွှန်ကြားချက်နှင့်အညီ ကုန်အညွှန်းအမှတ်အသားများတွင် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်းတို့ပါဝင်ခြင်း ရှိ/မရှိ စစ်ဆေးဆောင်ရွက်ခဲ့ကြောင်းသတင်းရရှိပါသည်။

တနင်္သာရီတိုင်းဒေသကြီး

စားသုံးသူရေးရာဦးစီးဌာန