သတင်းနှင့် လှုပ်ရှားမှုများ

             စားသုံးသူရေးရာဦးစီးဌာန၊ ပဲခူးတိုင်းဒေသကြီး ပဲခူးခရိုင်ဦးစီးမှူးရုံးမှ ဦးစိုးဝင်း(ဒု-ကြီးကြပ်ရေးမှူး)သည် (၂၅.၄.၂၀၂၄) ရက်နေ့ နံနက်ပိုင်း (၁၀:၀၀) နာရီတွင် ပြန်ကြားရေးနှင့် ပြည်သူ့ဆက်ဆံရေးဦးစီးဌာန မြို့နယ်ဦးစီးမှူးရုံးတွင် စားသုံးသူကာကွယ်ရေးဆိုင်ရာများ Talk Show အစီအစဉ်ဖြင့် အသိပညာပေးခြင်းကို ဆောင်ရွက်ခဲ့ပါသည်။

             Talk Show အစီအစဉ်ဖြင့် အသိပညာပေးခြင်း ပြုလုပ်ရာတွင် ဦးစိုးဝင်း(ဒု-ကြီးကြပ်ရေး မှူး) သည် စားသုံးသူကာကွယ်ရေးဥပဒေတွင် ကုန်စည်များ၏ ကုန်အညွှန်းအမှတ်အသား ဖော်ပြရန် ပြဌာန်းချက်များ၊ ကုန်အညွှန်းအမှတ်အသားများ ပြည့်စုံစွာဖော်ပြထားခြင်းမရှိသော ကုန်စည်များကို ရောင်းချခြင်းမပြရန် တားမြစ်ချက်များ၊ တားမြစ်ချက်များကို ဖောက်ဖျက် ကျူးလွန်ပါက အရေးယူဆောင်ရွက်သွားမည့် ပြစ်မှု၊ ပြစ်ဒဏ်များကို လည်းကောင်း၊ ကုန်အညွှန်း အမှတ်အသား၏ အရေးကြီးပုံများ၊ စားသုံးသူများအနေဖြင့် ကုန်စည်များ ဝယ်ယူရာတွင် ကုန်အညွှန်းအမှတ်အသားများကို ဖတ်ရှုရန်၊ ကုန်အညွှန်းအမှတ်အသား ဖော်ပြချက်နှင့် အညီ လိုက်နာဆောင်ရွက်ရန်နှင့် ကုန်အညွှန်းအမှတ်အသားဖော်ပြခြင်းမရှိသော ကုန်စည်များကို ဝယ်ယူသုံးစွဲခြင်း မပြုသင့်ပုံများကို ရှင်းလင်းပြောကြားခဲ့ပါသည်။

စားသုံးသူရေးရာဦးစီးဌာန

တိုင်းရုံး

            ပဲခူးတိုင်းဒေသကြီး ပဲခူးခရိုင် သနပ္ပင်မြို့နယ် (၂၅.၄.၂၀၂၄) ရက်နေ့ နံနက် (၀၉:၀၀) နာရီ တွင် သက်ဆိုင်ရာဌာနဆိုင်ရာများဖြစ်ကြသော မြို့နယ်အထွေထွေအုပ်ချုပ်ရေးမှူးရုံး၊ မြို့နယ် ပြန်ကြားရေး နှင့် ပြည်သူ့ဆက်ဆံရေးဦးစီးဌာနနှင့် တိုင်းစားသုံးသူရေးရာဦးစီးဌာန တို့မှ တာဝန်ရှိသူများက သွားရောက်၍ ဆန်စပါးလုပ်ငန်းရှင်များနှင့် တွေ့ဆုံဆွေးနွေးမှု ပြုလုပ်ခဲ့ ပါသည်။

            အဆိုပါတွေ့ဆုံဆွေးနွေးပွဲတွင် တိုင်းဒေသကြီးစားသုံးသူရေးရာဦးစီးဌာနမှ ဦးစိုးမိုး (ဦးစီးအရာရှိ) က ဆန်/စပါးစီးပွားရေးလုပ်ငန်းရှင်များအနေဖြင့် မိမိတို့ သိုလှောင်ရုံများကို အမြန်ဆုံး မှတ်ပုံတင်ထားရှိထားနိုင်ရေးနှင့် ပတ်သက်သည့်လုပ်ငန်းဆောင်တာများ ရှင်းလင်း ပြောကြား၍ အခက်အခဲဖြစ်ပေါ်ပါက ကူညီဆောင်ရွက်ပေးမည်ဖြစ်ပါကြောင်းနှင့် ဈေးကွက် အတွင်း ရောင်းချနေသော ဆန်နှင့် ဆန်ထွက်ပစ္စည်းများ၏ ဈေးကွက်ဈေးနှုန်း အခြေအနေ၊ မြို့နယ်အလိုက် သယ်ယူခ နှုန်းထားတို့ကို လေ့လာမေးမြန်း၍ တက်ရောက်လာသည့် စီးပွား‌ရေး လုပ်ငန်းရှင်များ၏ မေးမြန်းချက်များအား ပြန်လည်ဆွေးနွေးခြင်းများ ပြုလုပ်ခဲ့ကြောင်းနှင့် အဆိုပါတွေ့ဆုံဆွေးနွေးပွဲသို့ စီးပွားရေး လုပ်ငန်းရှင် (၁၁) ဦးတက်ရောက်ကြောင်းသိရှိရပါသည်။

စားသုံးသူရေးရာဦးစီးဌာန

တိုင်းရုံး

        ဧရာဝတီတိုင်းဒေသကြီး ၊ ပုသိမ်မြို့ ၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံး ၊ အစည်းအဝေးခန်းမတွင် ဧပြီလ (၂၅) ရက်နေ့ ၊ နံနက်ပိုင်း စီးပွားရေးနှင့်ကူသန်းရောင်းဝယ်ရေးဝန်ကြီး ဌာန၊ စားသုံးသူရေးရာဦးစီးဌာန ၊ ညွှန်ကြားရေးမှူးချုပ် ဦးအောင်အောင်၊ ပြည်တွင်းကုန်သွယ်ရေး ဖွံ့ဖြိုးမှုနှင့်သုတေသနဌာနခွဲမှ ဌာနခွဲတာဝန်ခံ ဦးဟန်ဝင်းကျော် လိုက်ပါသောအဖွဲ့သည် တိုင်းဒေသကြီး ဦးစီးမှူး ဦးဇေယျာဆွေ ၊ ဒုတိုင်းဦးစီးမှူး  ဦးထွန်းထွန်း ၊ ဌာနခွဲတာဝန်ခံများနှင့် အရာထမ်း ၊ အမှုထမ်းများနှင့် တွေ့ဆုံခဲ့ပါသည်။

      ထိုသို့ တွေ့ဆုံခဲ့ပြီး တိုင်းဒေသကြီးဦးစီးမှူးမှ တိုင်းဒေသကြီးအတွင်းရှိ စားသုံးသူရေးရာ လုပ်ငန်း ဆောင်ရွက်များနှင့် ပတ်သက်၍ Power Point ဖြင့် ရှင်းလင်းဆွေးနွေးခဲ့ပြီးနောက် ဒုတိုင်းဦးစီးမှူး  ဦးထွန်းထွန်း ၊ ဌာနခွဲ တာဝန်ခံများနှင့် အရာထမ်း ၊ အမှုထမ်းများအားလုံး ညွှန်ကြားရေးမှူးချုပ် ဦးအောင်အောင်အား တစ်ဦးချင်းစီ မိတ်ဆက်ဂါရဝ ပြုခဲ့ပါသည်။

       တိုင်းဦးစီးမှူးရုံးရှိ ဝန်ထမ်းများအားလုံး ညွှန်ကြားရေးမှူးချုပ် ဦးအောင်အောင်အား ဂါရဝပြုပြီး ညွှန်ကြားရေးမှူးချုပ်၏ ဩဝါဒစကားခံယူပြီးနောက် ဝန်ထမ်းများအားနှုတ်ဆက်၍ ညွှန်ကြားရေးမှူးချုပ်နှင့် တိုင်းဒေသကြီး ၊ စားသုံးသူရေးရာဦးစီးဌာန၊ ဝန်ထမ်းများနှင့် တွေ့ဆုံပွဲအခမ်းအနား အောင်မြင်စွာ ကျင်းပနိုင်ခဲ့ပါသည်။

DOCA(Aya)

  ဧရာဝတီတိုင်းဒေသကြီး၊ ဖျာပုံခရိုင်၊ ဒေးဒရဲမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံ ဦးသိန်းမောင်သည် (၂၂-၄-၂၀၂၄)ရက်နေ့၊ နေ့လယ်(၁၃:၀၀)နာရီအချိန်တွင် မြို့နယ်ဆန်စက်လုပ်ငန်းရှင်အသင်းနှင့် မြို့နယ်စားသုံးသူရေးရာဦးစီးဌာနရုံး၌ တွေ့ဆုံဆွေးနွေးခဲ့ကြပါသည်။

         ထိုသို့ဆွေးနွေးခဲ့ရာတွင် စားသုံးသူကာကွယ်ရေးဥပဒေ (၂၀၁၉)ပါ ပြဋ္ဌာန်းချက်များအရ     စီးပွားရေးလုပ်ငန်းရှင်ဆိုသည်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်းကိုဖြစ်စေ၊ ပြည်တွင်းသို့ တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သော ကုန်စည် သို့မဟုတ် ဝန်ဆောင်မှုနှင့်ပတ်သက်၍ အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊ စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာဆက်ဆံခြင်း၊ စီးပွားရေးကျင့်ဝတ်၊ စည်းကမ်းနှင့်အညီ  ဖြောင့်မတ်မှန်ကန်စွာဆောင်ရွက်ခြင်း၊ ကုန်သွယ်မှုပြုရန်နှင့် ထုတ်လုပ်မှုပြုရန်အလို့ငှာ ကုန်စည်  သို့မဟုတ် ဝန်ဆောင်မှုစပ်လျဉ်း၍ သက်ဆိုင်ရာအစိုးရအဖွဲ့အစည်းများက သတ်မှတ်ထားသည့်   အရည်အသွေးစံသတ်မှတ်ချက်များအပေါ်အခြေခံ၍ အာမခံချက်ပေးခြင်း စသည့်အချက်များကို ရှင်းလင်းဆွေးနွေးခဲ့ကြကြောင်း သတင်းရရှိပါသည်။

DOCA(ဧရာဝတီ)

             မွန်ပြည်နယ်၊  ဘီးလင်းမြို့နယ် စားသုံးသူရေးရာဦးစီးဌာန မြို့နယ်တာဝန်ခံရုံးမှ မြို့နယ်တာဝန်ခံနှင့် ဝန်ထမ်းများသည် (၂၅.၄.၂၀၂၄) ရက်နေ့တွင် ဘီးလင်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ပြန်ကြားရေးနှင့် ပြည်သူ့ဆက်ဆံရေးဦးစီးဌာန(ဘီးလင်း)ခန်းမတွင် ဘေးအန္တရာယ်ရှိသော ကုန်စည်ကို ဈေးကွက်အတွင်းမှ ပြန်လည်သိမ်းဆည်းစေခြင်း(သို့မဟုတ်)ရောင်းချဖြန့်ဖြူးခြင်းကို တားမြစ်ခြင်းနှင့် ဘေးအန္တရာယ်ရှိသော ဝန်ဆောင်မှုကို တားမြစ်ခြင်းဆိုင်ရာ အသိပညာပေး Talk Show ဆွေးနွေးပွဲကို ကျင်းပပြုလုပ်ခဲ့ပါသည်။

             အဆိုပါဆွေးနွေးပွဲတွင် ဘီးလင်းမြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်အေးမျိုးမျိုးစံမှ “Talk Show” အစီအစဉ်ကျင်းပရခြင်း၏ ရည်ရွယ်ချက်ကို ရှင်းလင်းပြောကြားခဲ့ပြီး စားသုံးသူရေးရာဦးစီးဌာန ဘီးလင်းမြို့နယ်တာဝန်ခံမှ စားသုံးသူကာကွယ်ရေး ဥပဒေပါပြဌာန်းချက်အရ ဘေးအန္တရာယ်ရှိသော ကုန်စည်ကို ဈေးကွက် အတွင်းမှ ပြန်လည်သိမ်းဆည်းစေခြင်း (သို့မဟုတ်) ရောင်းချခြင်းကို တားမြစ်ခြင်းနှင့် ဘေးအန္တရာယ်ရှိသော ဝန်ဆောင်မှုကို တားမြစ်ခြင်းများနှင့် ပတ်သက်၍ ဆောင်ရွက်ပုံ အဆင့်ဆင့်၊ စားသုံးသူကာကွယ်ရေး ဥပဒေပုဒ်မ-၃၀၊ ၃၁၊ ၃၂၊ ၃၃၊ ၃၄ ဆိုင်ရာ သိကောင်းစရာ များ၊ ဥပဒေပုဒ်မ-၃၇၊ ၃၈၊ ၃၉ တို့အရ နစ်နာဆုံးရှုံးမှုအတွက် စီးပွားရေးလုပ်ငန်းရှင်၏ တာဝန်ယူဆောင်ရွက်ပေးရမည့် အချက်များအား အကျယ်တဝင့် ဆွေးနွေးဟောပြောခဲ့ကြောင်း သတင်းရရှိပါသည်။

နော်အေးမို့မို့(ဘီးလင်း)