သတင်းနှင့် လှုပ်ရှားမှုများ

 မွန်ပြည်နယ်၊ ကျိုက်ထိုမြို့နယ်၊ စားသုံးသူရေးရာဦးစီးဌာနမှ ဝန်ထမ်းများသည် ပြန်ကြား‌ရေးနှင့်ပြည်သူ့ဆက်ဆံရေးဦးစီးဌာန ဝန်ထမ်းများနှင့် ပူးပေါင်း၍  ကျိုက်ထိုမြို့နယ် တွင် ကလေးအသုံးအဆောင်ပစ္စည်းများအား စျေးကွက်စောင့်ကြည့်စစ်ဆေးခြင်းလုပ်ငန်းကို ၂၆.၄.၂၀၂၄ ရက်နေ့တွင် မြိုနယ်အတွင်း ကွင်းဆင်းစစ်‌ဆေး ဆောင်ရွက်ခဲ့ကြောင်း သိရှိရသည်။

အဆိုပါကွင်းဆင်းစစ်ဆေးဆောင်ရွက်ရာတွင် စားသုံးသူရေးရာဦးစီးဌာနမှ ၀န်ထမ်းများ နှင့် ပူး‌ပေါင်းအဖွဲ့သည် ကျိုက်ထိုမြို့နယ်အတွင်း၌ ကလေးအသုံးအဆောင်ပစ္စည်းများ ရောင်းချလျက်ရှိသော စတိုးဆိုင်များအား စျေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ရာ ကုန်ညွှန်းအမှတ်အသားဖော်ပြချက်များနှင့် ကိုက်ညီမှုရှိ/မရှိ၊ ဘေးအန္တရာယ် ဖြစ်နိုင်ချေရှိ/မရှိ၊ ကလေးကစားစရာကုန်ပစ္စည်းတစ်မျိူးခြင်းအလိုက် ဘေးအန္တရာယ်ဖြစ်နိုင်မှု အခြေအနေ၊ ကုန်ညွှန်းအမှတ်အသားမပြည့်စုံမှုနှင့် ကြိုတင်သတိပေးထားခြင်းမရှိသော ကုန်စည်များအား ရောင်းချခြင်းမပြုရန် အသိပညာပေးပြောကြားခဲ့ကြောင်း သိရှိရပါသည်။

ဇော်ဦး(ကျိုက်ထို)

     စားသုံးသူရေးရာဦးစီးဌာန၊ မြစ်ကြီးနားခရိုင်ရုံးမှ ဦးဘောမ်ဇုန်း (ရုံးအုပ်) သည် (၂၄-၄-၂၀၂၄) ရက်နေ့တွင် ဝိုင်းမော်မြို့နယ်၊ လပြည့်ဝန်းလူမှုကူညီရေးအဖွဲ့အသင်းသား/ အသင်းသူများအား စားသုံးသူကာကွယ်ရေးအသိပညာပေးဟောပြောပွဲဆောင်ရွက်ခဲ့ပါသည်။

     ထိုသို့ဟောပြောရာတွင် ဦးဘောမ်ဇုံး(ရုံးအုပ်)က ၂၀၁၉ စားသုံးသူကာကွယ်ရေးဥပဒေပါ စားသုံးသူကာကွယ်ရေး၏ အဓိပ္ပါယ်ဖွင့်ဆိုချက်၊ စားသုံးသူ၏ အဓိပ္ပါယ်ဖွင့်ဆိုချက်၊ စားသုံးသူ၏ အခွင့်အရေး(၈)ချက်နှင့် တာဝန်(၄)ချက်၊ ကုန်စည်/ဝန်ဆောင်မှုနှင့်စပ်လျဥ်း၍ အာမခံချက်ပေးခြင်းအပေါ် စားသုံးသူကတောင်းဆိုနိုင်သောအခွင့်အရေး၊ ကုန်အညွှန်းအမှတ်အသားဖော်ပြခြင်းနှင့်စပ်လျဥ်း၍ သိသာထင်ရှားစွာဖော်ပြရမည့်အချက်များ၊ ကုန်ပစ္စည်းအမှတ်တံဆိပ်မှန်ကန်ရေးအတွက် ကုန်အမှတ်တံဆိပ်မူပိုင်ခွင့်ဥပ‌‌‌ဒေနှင့်စပ်လျဥ်းသော ထုတ်ပြန်ထားသည့်အကြောင်းအရာများနှင့် အမှတ်တံဆိပ်လျှောက်ထားရာတွင် လိုအပ်သောအချက်အလက်များ၊ အီလက်ထရောနစ်အငွေ့ရှူစက်နှင့်ပတ်သက်၍ သိကောင်းစရာများ၊ အွန်လိုင်းတွင်ဈေးဝယ်ရာတွင် သတိထားရမည့်အချက်တို့ကို အသိပညာပေးဟောပြောခဲ့ကြောင်းသိရှိရပါသည်။

DOCA(ကချင်)

      ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ခရိုင်ဦးစီးမှူး ဦးအောင်ကျော်ဦးသည် (၂၄-၄-၂၀၂၄) ရက်နေ့၊ နေ့လယ် (၁၅:၀၀) နာရီအချိန်တွင် ဗန်းမော်ခရိုင်ဦးစီးမှူးရုံး၌  ဆန်၊ ပဲ၊ ပြောင်း၊ ပွဲရုံလုပ်ငန်းရှင် (၂)ဦးနှင့်တွေ့ဆုံဆွေးနွေးခဲ့ပါသည်။

     ထိုသို့ဆွေးနွေးရာတွင် ခရိုင်ဦးစီးမှူး ဦးအောင်ကျော်ဦးက စားသုံးသူကာကွယ်ရေးဥပဒေပေါ်ပေါက်လာပုံ၊ မိမိဌာန၏ ယခုလက်ရှိဆောင်ရွက်နေသောလုပ်ငန်းများ၊ ၂၀၁၉ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ အဓိပ္ပါယ်ဖွင့်ဆိုချက်၊ ကုန်စည်/ ဝန်ဆောင်မှု၏ အဓိပ္ပါယ်ဖွင့်ဆိုချက်၊ စီးပွားရေးလုပ်ငန်းရှင်၏တာဝန်များ၊ တားမြစ်ချက်များ၊ ပြစ်မှုပြစ်ဒဏ်များအကြောင်းတို့ကို အကျယ်တဝင့်ရှင်းလင်းပြောကြားဆွေးနွေးခဲ့ပါသည်။ ထို့နောက် ဆန်၊ ပဲ၊ ပြောင်း၊ ပွဲရုံ လုပ်ငန်းရှင်များ၏ သိလိုသည်များကို ခရိုင်ဦးစီးမှူးက ပြန်လည်ဖြေကြားရှင်းလင်းခဲ့ပါကြောင်း သတင်းရရှိပါသည်။

DOCA(ကချင်)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊  မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူးတို့၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ် တာဝန်ခံ ဦးဇော်နေလင်းနှင့် ဝန်ထမ်းသည် (၂၄.၄.၂၀၂၄)ရက်နေ့၊ နံနက်(၀၉:၀၀)နာရီ အချိန်တွင် ဆိပ်ဖြူမြို့၊ အနောက်ပိုင်းရပ်ကွက်၊ အခြေခံပညာအထက်တန်းကျောင်း၊ နဝရတ်ခန်းမ၌ ဖွင့်လှစ်သည့် အခြေပြု ကင်းထောက်သင်တန်းသို့ သွားရောက်၍ စားသုံးသူကာကွယ်ရေး အသိပညာပေး ဟောပြောပွဲ ကျင်းပ ပြုလုပ်ခဲ့ရာ ဆရာ၊ ဆရာမ(၄)ဦး၊ သင်တန်းသား၊ သင်တန်းသူ (၂၂)ဦး၊ စုစုပေါင်း (၂၆)ဦး တက်ရာက်ခဲ့ပါသည်။

     အဆိုပါအသိပညာပေးဟောပြောပွဲတွင် ဆိပ်ဖြူမြို့နယ် တာဝန်ခံ ဦးဇော်နေလင်းက စားသုံး သူကာကွယ်ရေးဥပဒေပါ စားသုံးသူများ၏ အခွင့်အရေးများ၊ စားသုံးသူများမှ လိုက်နာရမည့်တာဝန်များ၊ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များနှင့် စားသုံးသူကာကွယ်ရေးဥပဒေပါ ရည်ရွယ်ချက်များ၊ ယခုဌာနမှ ဆောင်ရွက်သည့်လုပ်ငန်းများအကြောင်းကို ကျယ်တဝင့်ရှင်းလင်းဆွေးနွေး ခဲ့ပါသည်။

      ဆက်လက်၍ ဒုတိယဦးစီးမှူး ဒေါ်တင်မာရီက ဓါတုဆိုးဆေး၊ တာရှည်ခံဆေးနှင့် ပိုးသတ်ဆေး အန္တရာယ်များအကြောင်းနှင့် စားသုံးသူကာကွယ်ရေးဥပဒေ (၂၀၁၉)၊  အခန်း(၁၈)၊ ပုဒ်မ- ၄၁အရ ကုန်စည် များတွင် ကုန်အညွှန်းအမှတ်အသားများပြည့်စုံစွာ ဖော်ပြထားရှိသည့် ကုန်ပစ္စည်းများကိုသာ ရောင်းချရန်နှင့် အသင့်စားမုန့်အမျိုးမျိုးတွင် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်းဆည်းမှုအညွှန်းနှင့် ဓာတ်မတည့်ကြောင်း ဖော်ပြချက်တို့ကို မြန်မာဘာသာဖြင့် ဖော်ပြရမည့်အပြင် ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲတို့ကို ကြည့်ရှု့ပြီး ရွေးချယ်ဝယ်ယူ စားသုံးသင့်ကြောင်း အသိပညာပေးဟောပြော ရှင်းလင်းဆွေးနွေးခဲ့ပြီး မြို့နယ်တာဝန်ခံနှင့် ဝန်ထမ်းက ဆရာ၊ ဆရာမများနှင့် သင်တန်းသား၊ သင်တန်းသူများအား စားသုံးသူ ကာကွယ်ရေးဆိုင်ရာ အသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုနှင့် ပခုက္ကူခရိုင်ဦးစီးမှူး၏ကြီးကြပ်မှုဖြင့် ဆိပ်ဖြူမြို့နယ် တာဝန်ခံ ဦးဇော်နေလင်းနှင့် ဒုတိယဦးစီးမှူး ဒေါ်တင်မာရီတို့သည် စားသုံးသူများဘေးကင်းလုံခြုံမှု ရှိစေရေးနှင့် ထုတ်ကုန်များလုံးခြုံ စိတ်ချရမှုရှိစေရေးအတွက် (၂၃.၄.၂၀၂၄)ရက်နေ့၊ နံနက်(၁၀:၀၀) အချိန်တွင် ဆိပ်ဖြူမြို့၊ အနောက်ပိုင်း ရပ်ကွက်ရှိ ဆီထွက်သီးနှံ မြေပဲ၊ နှမ်း ကြိတ်ခွဲထုတ်လုပ် ရောင်းချဖြန့်ဖြူး လျက်ရှိသော“ဓနပြည့်”နှင့် “စိန်သံမဏိ”ဆီစက်များသို့ ရောက်ရှိပြီး စားသုံးဆီများ ကြိတ်ခွဲထုတ်လုပ်ရောင်းချဖြန့်ဖြူးလျက်ရှိသော ဆီစက်လုပ်ငန်းရှင်များနှင့်တွေ့ဆုံ၍ အသိပညာပေး ဆွေးနွေးခဲ့ပါသည်။

      ဆိပ်ဖြူမြို့နယ်တာဝန်ခံ ဦးဇော်နေလင်းက စားသုံးဆီများ ကြိတ်ခွဲထုတ်လုပ်ရောင်းချခြင်းနှင့် ပတ်သက်၍ စားသုံးသူကာကွယ်ရေး(၂၀၁၉)ပါ စီးပွားရေးလုပ်ငန်းရှင်များ၏ တာဝန်များ၊ ကုန်စည် (သို့မဟုတ်)ဝန်ဆောင်မှုနှင့် စပ်လျဉ်း၍ စားသုံးသူများ ဘေးကင်းလုံခြုံစိတ်ချရမှုရှိစေရေးအတွက် စားသုံးဆီ ထုတ်လုပ်ရောင်းဝယ်ရေးလုပ်ငန်းရှင်များမှ ဆီဆိုင်များ ကြိတ်ခွဲထုတ်လုပ်ရာတွင် သန့်ရှင်းသပ်ရပ်စွာဖြင့် ကြိတ်ခွဲထုတ်လုပ်ဆောင်ရွက်ရေး အသိပညာပေးပြောကြားခဲ့ပြီး ပဲဆီ၊ နှမ်းဆီများ၊ ဆီအမျိုးအစားအလိုက် စားသုံးသူများမြင်သာအောင် ကုန်အညွှန်းအမှတ်အသားပြည့်စုံစွာ ရေးသားဖော် ပြပြီးရောင်းချသွားရန်နှင့် အချိန်အတွယ်မှန်ကန်စေရေးနှင့် စားသုံးသူများ ဝယ်ယူသုံးစွဲရာတွင် နစ်နာမှုမရှိစေရေး အသိပညာပေး ဆွေးနွေးဆောင်ရွက်ပြီး စားသုံးသူကာကွယ်ရေးဥပဒေပါ စားသုံးသူအခွင့်အရေးနှင့်တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် (၂/၂၀၁၉)နှင့် အညီ ပြည့်စုံစွာဖော်ပြလာစေရေးနှင့် မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊ ထားသိုသိမ်ဆည်းမှုအညွှန်းတို့ကို ထည့်သွင်းဖော်ပြရမည်ဖြစ်ပြီး ကုန်အညွှန်းအမှတ်အသား ပြည့်စုံခြင်းမရှိသော စားသုံးဆီများ ဈေးကွက်အတွင်းရောင်းချသည်ကို စစ်ဆေးတွေ့ရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်း အသိပညာပေးဆွေးနွေးပြီး စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)