သတင်းနှင့် လှုပ်ရှားမှုများ

၂၄.၁၁.၂၀၂၁ ရက်နေ့ နံနက် (၉:၀၀)နာရီအချိန် တွင် ဆောက်လုပ်ရေးဝန်ကြီးဌာန၊ တံတားဦးစီးဌာန တံတားအထူးအဖွဲ့ (၁၄)မှ တာဝန်ယူ တည်ဆောက်ခဲ့သော ထီလုံ-တာပေါင်-ပတ-နဘူး-ကော့ကရိတ်လမ်းပေါ်ရှိ “ ပတတံတားအား ” ကရင်ပြည်နယ်ဝန်ကြီးချုပ် ဦးစောမြင့်ဦး၊ လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး မျိုးမင်းနောင်၊ လမ်းပန်းဆက်သွယ်ရေးဝန်ကြီး ရဲမှူးကြီးခင်ဇော်၊ စီးပွားရေးရာဝန်ကြီး ဦးစောခင်မောင်မြင့်၊ KNU/KNLA(PC) ဥက္ကဌ ဦးစောထော့လေးနှင့် ဒုဥက္ကဌ ဒေါက်တာနော်ကပေါ်ထူး၊ နယ်ခြားစောင့်တပ်များ၊ ဗဟိုအကြံပေးနှင့်ကွပ်ကဲရေးအဖွဲ့ အမှတ် (၂) တပ်နယ်မှူး ဒုတိယဗိုလ်မှူးကြီး စောကြာအင်း၊ KNU (ကရင်အမျိုးသားအစည်း အရုံး)နဘူးဥက္ကဌ ပဒိုတာစော ဆောက်လုပ်ရေးဝန်ကြီးဌာနတံတားဦးစီးဌာနမှ ညွှန်ကြားရေးမှူး တို့မှ ပတတံတားအား ဖဲကြိုးဖြတ်ဖွင့်လှစ်ပေးခဲ့ပါသည်။ ဆက်လက်ပြီး ဝန်ကြီးချုပ်မှ တံတား ကမ္ပည်းမော်ကွန်းကျောက်စာတိုင်အား စက်ခလုပ်နှိပ်၍ ဖွင့်လှစ်ပြီး အမွှေးနံသာရေများ ပက်ဖျန်းပေးခဲ့ကြပါသည်။ ဆက်လက်၍ ဝန်ကြီးချုပ်နှင့်အဖွဲ့သည် တံတားတစ်လျှောက် ကြည့်ရှုစစ်ဆေးပြီး တက်ရောက်လာသည့် ကရင်တိုင်းရင်းသားလူငယ်များအား ချီးမြှင့်ငွေများ ပေးအပ်ခဲ့ကြောင်း သတင်းရရှိပါသည်။
စားသုံးသူရေးရာဦးစီးဌာန(ကရင်ပြည်နယ်)

မကွေးတိုင်းဒေသကြီး၊ ပခုက္ကူခရိုင်အတွင်းရှိ ဆိပ်ဖြူမြို့နယ်သည် ကြက်သွန်နီ အဓိက စိုက်ပျိုးထုတ်လုပ်သည့် မြို့နယ်ဖြစ်ပြီး နှစ်စဉ် ကြက်သွန်နီစိုက်ဧက (၆၀၂၄)ခန့် စိုက်ပျိုးပါသည်။ ဆိပ်ဖြူမြို့နယ်၏လူဦးရေမှာ (၁၁၃၇၈၅)ဦးဖြစ်ပြီး မြို့နယ်လူဦးရေ၏ ၈၀ % မှာ ကြက်သွန်နီကို အားထားပြီး စိုက်ပျိုးထုတ်လုပ်ကြသော တောင်သူများဖြစ်ပါသည်။ ကြက်သွန်နီအပြင် အခြားသီးနှံများ စိုက်ပျိုးသော်လည်း အလွန်နည်းပါးပါသည်။
နှစ်စဉ်ကြက်သွန်နီစိုက်ပျိုးရာတွင် ဆောင်းကြက်သွန်(ပင်စိုက်)နှင့် မိုးကြက်သွန်(ဥစိုက်)ဟူ၍ နှစ်မျိုးရှိပြီး ဆောင်းကြက်သွန်(ပင်စိုက်)ကို အဓိကထား စိုက်ပျိုးထုတ်လုပ်ရောင်းဝယ်လျက်ရှိပြီး ယခုအချိန် ကာလအတွင်း ဆိပ်ဖြူကြက်သွန်နီကုန်စည်ဒိုင်တွင် နေ့စဉ်ကုန်ချိန်အဝင် ပျမ်းမျှပိဿာ (၅၀၀၀၀) ခန့် အဝင်ရှိပါသည်။ ကြက်သွန်နီတစ် ပိဿာလျှင် ဆိပ်ဖြူကုန်စည်ဒိုင်ပြတ်ဈေးသည် တစ်ပိဿာလျှင် ထိပ်စ (၃၂၅)ကျပ်၊ အလတ်စ(၂၅၀) ကျပ်၊ အနိမ့်စ(၁၀၀)ကျပ်ဖြစ်ပြီး ယခင်နှစ် ကုန်စည်ဒိုင်ပြတ်ဈေးသည် တစ်ပိဿာလျှင် ထိပ်စ(၄၃၀) ကျပ်၊ အလတ်စ(၃၉၀) ကျပ်၊ အနိမ့်စ(၁၅၀) ကျပ်ဈေးနှုန်းဖြစ်ပါ၍ စိုက်ပျိုးထုတ်လုပ်တောင်သူများအနေဖြင့် ဈေးနှုန်းများ နှစ်နှစ်ဆက်တိုက် အရှုံးပေါ်မှုများနှင့် ရင်ဆိုင် ကြုံတွေ့နေရပါကြောင်း သိရှိရပါသည်။
ဈေးနှုန်းများပြန်လည်မြင့်တက်လာမည်လားဟူသော မျှော်လင့်ချက်များဖြင့် မိမိတို့စိုက်ပျိုး ထားသော ကြက်သွန်နီဆောင်းစိုက်(ပင်စိုက်)သည် သက်တမ်းကုန်ဆုံးချိန် နီးနေပြီဖြစ်သော်လည်း အကုန်မရောင်းသေးဘဲ ဖြေးဖြေးချင်းထုတ်ရောင်းနေသောကြောင့် တောင်သူလက်ကျန်များစွာရှိနေ သေးကြောင်း၊ ကျန်ရှိနေသေးသော ကြက်သွန်နီများမှာလည်း (ဥ)ပုပ်ခြင်း၊ အညှောင့်များထွက်ခြင်း၊ အခွံကွာအရေလန်ဖြစ်ခြင်းများဖြစ်ပြီး မိမိတို့စိုက်ပျိုးထားသော မူလအထွက်နှုန်းထက် သုံးပုံတစ်ပုံ သာ ကျန်ရှိပြီး အလေအလွင့်ဆုံးရှုံးမှုများစွာရှိနေပါကြောင်း၊ ယခုနှစ်၌ ကြက်သွန်နီရောင်းဝယ် ဖောက်ကားမှုပြုလုပ်ရာတွင် မိမိတို့ပြည်တွင်း၌ ကိုဗစ် ၁၉ ရောဂါကူးစက်ဖြစ်ပွားနေမှုကြောင့် သယ်ယူပို့ဆောင်ရေး အခက်အခဲများနှင့်ကြုံတွေ့ရခြင်း၊ ဒေသတွင်းဈေးကွက်များ၌ ကြက်သွန် ဝယ် လိုအား ကျဆင်းနေခြင်းတို့ကြောင့် အရောင်းအဝယ်မဖြစ်ဘဲ ကြက်သွန်နီဈေးနှုန်းများ ကျဆင်း၍ စိုက်ပျိုးတောင်သူများ အရှုံးပေါ်မှုများစွာဖြင့် ရင်ဆိုင်ကြုံတွေ့နေရကြောင်း ကြက်သွန်စိုက်ပျိုး တောင်သူများထံမှ သိရှိရပါသည်။ ယခုနှစ်ကြက်သွန်စိုက်တောင်သူများအနေဖြင့် စိုက်ပျိုးထုတ်လုပ် ရာတွင် အလုပ်သမားရှားပါးခြင်း၊ လုပ်ခဈေးနှုန်းများအဆမတန်ကြီးနေခြင်း၊ သွင်းအားစုအမျိုးမျိုး ဈေးကြီးခြင်း၊ ထုတ်လုပ်မှုကုန်ကျစရိတ်ကြီးမြင့်ခြင်းတို့ကြောင့် နှစ်နှစ်ဆက်တိုက်အရှုံးပေါ်မှုများ ကြုံတွေ့နေရပါသဖြင့် ယခင်နှစ် မိုးစိုက်(ဥစိုက်)ကြက်သွန်နီများ စိုက်ပျိုးချိန်တွင် နှစ်စဉ်ဧက (၂၀၀၀)ခန့်စိုက်ပျိုးခဲ့သော်လည်း ယခုနှစ်တွင် ကြက်သွန်နီဧက (၁၀၀၀)ခန့်သာ လျော့နည်းစိုက်ပျိုး လာနိုင်ကြောင်း တောင်သူများ၊ ကုန်သည်ပွဲစားများမှတစ်ဆင့် သိရှိရပါသည်။
ယခုအချိန်တွင် မကွေးတိုင်းဒေသကြီးအတွင်း ဆိပ်ဖြူမြို့တွင် ကြက်သွန်နီလက်ကျန် ပိဿာ ချိန်သိန်း(၄၀) ခန့်ကျန်ရှိနေသေးကြောင်းနှင့် စိုက်ပျိုးထုတ်လုပ်သော တောင်သူများအနေဖြင့် လုပ်အားခ နှင့် သွင်းအားစုဈေးနှုန်းကြီးမြင့်မှုတို့ကြောင့် စိုက်ပျိုးစရိတ်မကာမိဘဲ အရှုံးပေါ်လာပါက ကြက်သွန်စိုက်ပျိုးတောင်သူများအနေဖြင့် စိုက်ပျိုးမည့် ဧကရာခိုင်နှုန်းလျော့နည်းလာနိုင်ကြောင်း၊ ရောင်းဝယ်ဖောက်ကားသူကုန်သည်၊ စိုက်ပျိုးထုတ်လုပ်သူတောင်သူများမှတစ်ဆင့် လေ့လာသိရှိရပါသည်။
စားသုံးသူရေးရာဦးစီးဌာန(မကွေးတိုင်းဒေသကြီး)

၂၀၂၁-၂၀၂၂ ခုနှစ်၊ မိုးစပါး စံပြစိုက်ခင်း စံကွက်ရိတ်သိမ်းခြင်း အခမ်းအနားကို ပဲခူးတိုင်းဒေသကြီး၊ သာယာဝတီခရိုင် ၊ ဇီးကုန်း မြို့နယ်၊ လယ်မအုပ်စု ၊ လယ်မကျေးရွာ ၊ စိုက်ကွင်းအမှတ် (၃၈၁) ၊ မှော်ဘီ-၃ မျိုးစပါး မျိုးစေ့ထုတ် စိုက်ခင်း (၆) ဧကရှိသော တောင်သူ ဦးလှသိန်း၏ မိုးစပါး စံကွက်၌ ၁၇.၁၁.၂၀၂၁ ရက်နေ့တွင် ကျင်းပပြုလုပ်ခဲ့ရာ မြို့နယ် စီမံအုပ်ချုပ်ရေး ကောင်စီဥက္ကဌ နှင့်အဖွဲ့ဝင်များ၊ မြို့နယ် လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန၊ မြို့နယ် မြေစာရင်းဦးစီးဌာန ၊ မြို့နယ် စိုက်ပျိုးရေးဦးစီးဌာန ၊ တောင်သူများနှင့်အတူ စားသုံးသူရေးရာ ဦးစီးဌာန ၊ဇီးကုန်း မြို့နယ် တာဝန်ခံမှ ပူးပေါင်းပါဝင် တက်‌ရောက်ခဲ့ပါသည်။
မိုးစပါးသွင်းအားစုအနေဖြင့် မှော်ဘီ-၃ မျိုးစပါး ၁တင်းခွဲအိတ် တစ်အိတ်လျှင် ၂၀၀၀ဝိ / ပုလဲမြေဆီ တစ်အိတ်လျှင် ၆၅၀၀ဝိ/ ၁၅ ပတ်လည် မြေဆီတစ်အိတ်လျှင် ၅၅၀၀ဝိ/ စျေးနှုန်းဖြင့် ဝယ်ယူသုံးစွဲရပြီး ရိတ်သိမ်းထွက်ရှိသော အစိုဓာတ်၂၀ % ရှိ မှော်ဘီ -၃ စပါး ၅၀ ပေါင် စျေးနှုန်း ၆၀၀၀၀၀ ကျပ် ( ၄၆ပေါင် စျေးနှုန်း = ၅၅၂၀၀ဝိ) ရရှိ၍ မျိုးစပါးထုတ်လုပ်ရန်အတွက် အဓိကထားစိုက်ပျိုးပြီး တစ်ဧကလျှင် ပျှမ်းမျှ အထွက်နှုန်း (၁၁၀) တင်းခန့် ထွက်ရှိသော အရည်အသွေးကောင်းစပါးမျိုးဖြစ်ပြီး ရောင်းချရာတွင်လည်း မျိုးစပါးအဖြစ်ရောင်းချရသဖြင့် စျေးကောင်းရရှိကြောင်းသတင်းရရှိပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

(၂၅.၁၁.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။

(၂၃.၁၁.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။