၂၁.၂.၂၀၂၂ ရက်နေ့ မှ ၂၇.၂.၂၀၂၂ ရက်နေ့အထိ စားအုန်းဆီ တစ်ပိဿာကုန်ကျစရိတ် တွက်ချက်မှုစာရင်း
၂၁.၂.၂၀၂၂ ရက်နေ့ မှ ၂၇.၂.၂၀၂၂ ရက်နေ့အထိ စားအုန်းဆီ တစ်ပိဿာကုန်ကျစရိတ် တွက်ချက်မှုစာရင်းအား ပူးတွဲပါဖိုင်တွင် ကြည့်ရှုနိုင်ပါသည်-
ပြည်တွင်းကုန်သွယ်မှုသတင်း
Powered by Drupal
ကျောက်ဆည်ခရိုင်အတွင်းမြေပဲစိုက်ပျိုးထွက်ရှိမှု ကွင်းဆင်းလေ့လာ
မန္တလေးတိုင်းဒေသကြီး၊ ကျောက်ဆည်ခရိုင်သည် စပါး၊ ပဲ၊ ပြောင်းနှင့် ဆီထွက်သီးနှံများအား အဓိကစိုက်ပျိုးလျှက်ရှိပြီး ၎င်းသီးနှံများထဲမှ ဆီထွက်သီးနှံတစ်မျိုးဖြစ်သည့် ဆောင်းမြေပဲများကို စိုက်ပျိုးလျှက်ရှိရာယခင်နှစ်တွင်(၆၂၈၄)ဧကစိုက်ပျိုးနိုင်ခဲ့ပြီး ယခုနှစ်တွင် (၆၃၃၄)ဧကစိုက်ပျိုးနိုင်ခဲ့၍ ယခင်နှစ်ထက်ပိုမိုစိုက်ပျိုးနိုင်ခဲ့ကြောင်း ၊ ယခုအချိန်တွင် ကျောက်ဆည်ခရိုင်အနေဖြင့် ဆောင်းမြေပဲ (၁၂၀)ဧက ရိတ်သိမ်းလျှက်ရှိကြောင်း သက်ဆိုင်ရာဌာန၏စာရင်းများအရသိရှိရပါသည်။ ဆောင်းမြေပဲများအား စက်တင်ဘာလနှင့် အောက်တိုဘာလများတွင် စတင်စိုက်ပျိုးကြပြီး ဖေဖော်ဝါရီ လဆန်းမှစ၍ စတင်ထွက်ရှိနေပြီဖြစ်ပါသည်။ မြေပဲအားစိုက်ပျိုးရာတွင် ထယ်ရေးနက်ရမည်၊ ထွန်ရေးညက်ရမည်၊ စိုက်ခင်းမြေ ညီညာပြန်ပြူးရမည်ဖြစ်ပြီး စိုက်ကြောင်းဖော်စနစ်ဖြင့် အများဆုံးစိုက်ပျိုးကြပြီး ဘောင်ဖော်စနစ်ဖြင့်စိုက်ပျိုးလျှင် ပိုကောင်းကြောင်း ၊ မျိုးမြေပဲအား အတောင့်စိုက်ပျိုးခြင်းထက် အစေ့ချစိုက်ပျိုးပါက ပို၍ကောင်းမွန်ပြီး အခြားဒေသများတွင် ပင်ထောင်မြေပဲမျိုးများကိုလည်း စိုက်ပျိုးကြပါသည်။ မျိုးအနေဖြင့် တစ်ဧကလျှင် မျိုးတောင့်အနေဖြင့် စိုက်ပျိုးပါက(၄) တင်းခန့်နှင့် အစေ့စိုက်ပျိုးလျှင်(၁.၅)တင်းကုန်ကျကြောင်း၊ တစ်ဧကကုန်ကျစရိတ်အနေဖြင့် မျိုးစေ့၊ ထွန်ယက်ခ၊ လုပ်သားခ၊ စုစုပေါင်း(၃၀၀၀၀ဝ/-)ကျပ်ဝန်းကျင်ခန့် ကုန်ကျကြောင်း ၊ အထွက်နှုန်းအနေဖြင့် ယခင်နှစ်တွင်(၅၀)တင်းခန့်ထွက်ရှိပြီး ယခုနှစ်တွင် (၅၈)တင်းခန့် ထွက်ရှိကြောင်း ၊ အချို့ဒေသများတွင် စိုက်ပျိုးရေးဦးစီးဌာန၏ ညွှန်ကြားချက်အရ အထွက်နှုန်းကောင်းသော မြေပဲမျိုးများကိုပြောင်းလဲစိုက်ပျိုးလာသောကြောင့် တစ်ဧကလျှင် အထွက်တင်း (၁၀၀)ဝန်းကျင်ခန့် ထွက်ရှိလာကြောင်းသိရှိရပါသည်။ မြေပဲတောင့် တစ်တင်းလျှင် ယခင်နှစ် စျေးနှုန်းမှာ (၁၀၅၀ဝ/-)ကျပ် ၊ မြေပဲဆံ(၁)ပိဿာလျှင်(၂၄၀ဝ/-)ကျပ်၊မြေပဲဆီတစ်ပိဿာလျှင် (၅၈၀၀/-)ကျပ်ရှိပြီး ယခုနှစ် စျေးနှုန်း အနေဖြင့် မြေပဲတောင့်တစ်တင်းလျှင် (၁၅၀၀၀/-)ကျပ် ၊ မြေပဲဆံ(၁)ပိဿာလျှင်(၃၁၀ဝ/-)ကျပ်၊မြေပဲဆီတစ်ပိဿာလျှင်(၈၀၀ဝိ/-)ကျပ်စျေးနှုန်းရှိကြောင်း စားသုံးရန်အတွက် မြေပဲတစ်တင်း ကြိတ်ခွဲပါကမြေပဲဆီ(၇)ပိဿာနှင့် မြေပဲဖတ်(၇)ပိဿာ ထွက်ရှိကြောင်း၊ မြေပဲဖတ်(၁)ပိဿာလျှင် (၁၀၀၀/-)ကျပ်ရှိကြောင်းသိရှိရပြီး တစ်ဧက အကျိုးအမြတ်အနေဖြင့် (၅၅၀၀၀၀/-)ကျပ်ခန့်ရရှိကြောင်း မြေပဲစိုက်တောင်သူတစ်ဦး၏ ပြောကြားချက်အရသိရှိရပါသည်။ မြေပဲသီးနှံသည် ပြည်တွင်းစားသုံးမှုတွင် အရေးပါသောသီးနှံတစ်မျိုးဖြစ်သည့်အတွက် မြေပဲစိုက်တောင်သူများအနေဖြင့် အကျိုးအမြတ်ရှိသလို မြေပဲပင်စည်နှင့်မြေပဲဖတ်များအားကျွဲ၊ နွားများအတွက် အစားအစာအဖြစ် အသုံးဝင်သောကြောင့် ကျွဲ ၊ နွားများအတွက် အစာများမပူပင်ရကြောင်း၊ မြေပဲစိုက်ပျိုးခြင်းသည် တောင်သူများ တွက်ချေကိုက်သည့် သီးနှံဖြစ်သည့်အတွက် ပိုမိုစိုက်ပျိုးသင့်ပါကြောင်း အကြံပြုရေးသားလိုက်ရပါသည်။
DOCA(မန္တလေး)
နနွင်းစိုက်ပျိုးမှုနှင့်စျေးကွက်အခြေအနေကွင်းဆင်းလေ့လာ
မန္တလေးတိုင်းဒေသကြီး ၊ ကျောက်ဆည်ခရိုင်အတွင်းရှိ တောင်သူများအနေဖြင့် စပါးကို အဓိက ထားစိုက်ပျိုးကြသော်လည်း စားဖိုဆောင်သီးနှံတစ်မျိုးဖြစ်သော နနွင်းသီးနှံကို ယာမြေများတွင် အများဆုံး စိုက်ပျိုးကြပါသည် ။ ကျောက်ဆည်ခရိုင်တွင် ၂၀၂၀ - ၂၀၂၁ ဘဏ္ဍာနှစ်တွင် နနွင်းစိုက် ဧက(၂၅၃၁)ဧက စိုက်ပျိုးနိုင်ခဲ့ပြီး၊ ၂၀၂၁-၂၀၂၂ခုနှစ်တွင်(၂၅၁၈)ဧကစိုက်ပျိုးထားကြောင်း သက်ဆိုင်ရာဌာန၏စာရင်းများအရ သိရှိရပါသည် ။ ယခင်နှစ်ထက် နည်းငယ်လျော့နည်း စိုက်ပျိုးသည်မှာ သွင်းအားစုများ စျေးနှုန်းမြင့်တက်လာမှုကြောင့် နနွင်းစိုက်ဧကများ လျော့နည်း လာကြောင်း သိရှိရပါသည်။ နနွင်းသီးနှံသည် ဧပြီ ၊ မေလများတွင် စိုက်ပျိုးကြပြီး သဲနုန်းမြေကို ပိုမိုနှစ်သက်ပြီး အခြားသီးနှံများကဲသို့မြေပြင်ပြီးဘောင်ဖြင့်စိုက်ပျိုးရကြောင်း ၊ စိုက်ပျိုးပြီး(၄)လ အကြာတွင် အဖူးအပွင့်များစတင်ဖူးပွင့်ကြောင်း၊ နနွင်းဖူးများကိုစျေးကွက်တွင်ရောင်းချပါက မိသားစုအပိုဝင်ငွေများရရှိသည့်အပြင် နှမ်းသီးနှံနှင့် တိုင်ထောင်တစ်လပဲများကိုလည်း သီးညှပ်အဖြစ်စိုက်ပျိုးကြကြောင်း ၊ နနွင်းကို ဇန်နဝါရီလ နှင့် ဖေဖော်ဝါရီလများတွင် စတင်တူးဖော်ပြီး (၁)ဧက ကုန်ကျစရိတ်အနေဖြင့် (၁၀၀၀၀၀၀/-)ကျပ်ဝန်းကျင်ကုန်ကျကြောင်း ၊ စိုက်ပျိုးရာတွင် မျိုးအနေဖြင့် နနွင်းဂေါင်း သို့မဟုတ် နနွင်းတက်များကိုသာ စိုက်ပျိုးကြကြောင်း ၊ နနွင်းဂေါင်းဖြင့် စိုက်ပျိုးလျှင်(၁)ဧက(၁၀၀)တင်း ကုန်ကျကြီး၊နနွင်းတက်ဖြင့် စိုက်ပျိုးလျှင်(၁)ဧကလျှင်(၅၀)တင်း ကုန်ကျကြောင်း ၊နနွင်းမျိုးစျေးနှုန်းအနေဖြင့် နနွင်းဂေါင်းတင်း(၁၀၀)လျှင် (၄၀၀၀၀၀/-)ကျပ်၊ နနွင်းတက် တင်း(၅၀)လျှင်(၃၀၀၀၀၀/-) ကျပ်ပေးရကြောင်း ၊ အထွက်နှုန်းအနေဖြင့် (၁)ဧကလျှင် နနွင်းတက်အစိုလှည်း(၁၂)စီးခန့်ထွက်ရှိကြောင်း၊ ၎င်းနနွင်းတက်အစိုများအားပြုတ်ပြီး အခြောက်လှန်းပါက နနွင်းတက်(၇၀၀-၈၀၀)ပိဿာ ခန့်ထွက်ရှိကြောင်းသိရှိရပါသည်။ စျေးနှုန်းအနေဖြင့် နနွင်းတက်အစိုလှည်း(၁)စီးလျှင် ယခင်နှစ်တွင် (၁၀၀၀၀၀/-)ကျပ် ၊ ယခုနှစ်တွင် (၁၅၀၀၀၀/-)ကျပ် ၊ နနွင်းတက် အခြောက်(၁)ပိဿာလျှင် ယခင်နှစ်တွင်(၂၀၀၀/-)ကျပ် ၊ ယခုနှစ်တွင် (၂၅၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေပြီး နနွင်းတက်(၁)ပိဿာ ကြိတ်လျှင် နနွင်းမှုန့်(၁)ပိဿာရရှိပြီး ကြိတ်ခအနေဖြင့်(၆၀၀)ကျပ် ပေးရကြောင်း၊ နနွင်းမှုန့် (၁)ပိဿာစျေးနှုန်းမှာ(၅၀၀၀/-)ကျပ်စျေးရှိကြောင်း ၊ တောင်သူများအနေဖြင့် ယခင်နှစ်ထက် စျေးနှုန်းပိုမိုရရှိခဲ့ပြီး (၁)ဧကအကျိုးအမြတ်အနေဖြင့် (၇၅၀၀၀၀/-)ကျပ်ခန့် ရရှိကြောင်း တောင်သူတစ်ဦး၏ပြောပြချက်အရ သိရှိရပါသည်။
DOCA(မန္တလေး)
မြစ်သားကြက်သွန်နီကြော်လုပ်ငန်းကို ကွင်းဆင်းလေ့လာ
မန္တလေးတိုင်းဒေသကြီး၊ ကျောက်ဆည်ခရိုင်တွင် ကျောက်ဆည်၊ စဉ့်ကိုင်၊ မြစ်သား၊ တံတားဦး မြို့နယ်ဟူ၍(၄)မြို့နယ်ရှိသည့်အနက် မြစ်သားမြို့နယ်သည် ကြက်သွန်သီးနှံအား အများဆုံးစိုက်ပျိုးကြပြီး စျေးကွက်အတွင်းတွင် မြစ်သားဒေသမှထွက်ရှိသော ကြက်သွန်များမှာ အခြားဒေသမှထွက်ရှိသောကြက်သွန်များထက် စားသုံးသူများမှပို၍ ကြိုက်နှစ်သက်သောကြောင့် စျေးကွက်အတွင်းတွင် မြစ်သားကြက်သွန်ဟူ၍ အများဆုံးအရောင်းအဝယ်ဖြစ်လျှက်ရှိပါသည်။ မြစ်သားမြို့တွင် ကြက်သွန်သီးနှံအား ပုဂ္ဂလိကပွဲရုံများ၌ အရောင်းအဝယ်ပြုလုပ်လျှက်ရှိသလို အချို့စီးပွားရေးလုပ်ငန်းရှင်များမှာလည်း ကြက်သွန်အားတန်ဖိုးမြှင့်ထုတ်ကုန် တစ်ခုအနေဖြင့် ကြက်သွန်နီကြော်လုပ်ငန်းများအားလုပ်ကိုင်လျှက်ရှိရာ မြစ်သားမြို့နယ်၌ ကြက်သွန်နီကြော်လုပ်ငန်းရှင်(၃)ဦးရှိသည့်အနက်မှ ကျောက်ဆည်ခရိုင် ၊ စားသုံးသူရေးရာဦးစီးဌာနမှ မြစ်သားမြို့နယ်၊ ရွာသစ်ကျေးရွာရှိ အရသာချို ကြက်သွန်ကြော်လုပ်ငန်းအားကွင်းဆင်း မေးမြန်း ခဲ့ပါသည်။ ၄င်းလုပ်ငန်းအား လွန်ခဲ့သော(၅)နှစ်ခန့်မှစ၍ စတင်လုပ်ကိုင်ရောင်းချလျှက်ရှိပြီး ကြက်သွန်ကြော်ရာတွင် အသုံးပြုသည့် ကြက်သွန်နီအား သီးနှံပေါ်ချိန်တွင် တောင်သူများထံမှ တိုက်ရိုက်ဝယ်ယူသလို ရာသီချိန်မဟုတ်ပါက ပွဲရုံများ၌ဝယ်ယူ၍ကြော်ရကြောင်း၊ ယခုပေါက်စျေးအနေဖြင့်(၁)ပိဿာလျှင်(၅၀၀-၅၅၀)ကျပ်ပေးရကြောင်း၊ တစ်နေ့လျှင်ကြက်သွန်နီ(၁၀၀၀)ပိဿာအထိ ကြော်ရကြောင်း၊ ကြက်သွန်နီကြော်လုပ်ငန်း လုပ်ကိုင်ရာတွင် အကြော်ဆရာ(၁၂)ဦးရှိပြီး လူတစ်ဦး(၁)လလျှင် ပုတ်ပြတ်အနေဖြင့် (၁၇၀၀၀၀/-)ကျပ်ပေးရကြောင်း၊ ကြက်သွန်နီကြော်လုပ်ငန်း၌ တစ်ရက်လျှင် လုပ်သားဦးရေ(၅၀)ခန့် အထိအသုံးပြုရပြီး တစ်ဦးလျှင် ကြက်သွန်(၂၅) ပိဿာခန့် အခွံခွာ/ခြစ်ပြီးစီးကြောင်း၊ အခွံခွာ/ခြစ်(၁)ပိဿာလျှင်(၂၀၀/-)ကျပ်ပေးရကြောင်း၊ လုပ်သားတစ်ဦးအနေဖြင့် တစ်နေ့လျှင်ဝင်ငွေ(၅၀၀၀/-)ကျပ်ရရှိပြီး အနီးနားဝန်းကျင်မှ လုပ်သားများအား အလုပ်အကိုင်ပေးနိုင်ကြောင်း ၊ ကြက်သွန်နီအား ကြော်ရာတွင် အခြောက်လှန်း၍ ကြော်ခြင်းမဟုတ်ဘဲ နေဖြင့်ထန့်အောင်လှန်းပြီးကြော်ခြင်းဖြစ်ကြောင်း၊ အချို့မှာအစိုကြော်ကြောင်း၊ အစိုကြော်လျှင် ဆီပိုမိုကုန်ကျပြီး အခြားပစ္စည်းများ ပါဝင်ကြော်ခြင်းမျိုးမဟုတ်ဘဲ ကြက်သွန်နီကုန်ကြမ်းတစ်မျိုးဖြင့်သာ ကြော်၍ရောင်းချပါသည်။ကြော်ပြီး ကြက်သွန်ကြော်ထုတ်များအား အမြို့မြို့အနယ်နယ်သို့ တင်ပို့ရောင်းချလျက်ရှိပြီး ကြက်သွန်နီကြော် (၁)ပိဿာ တစ်ထုပ်လျှင်(၈၀၀၀/-)ကျပ်၊ (၅၀)ကျပ်သားတစ်ထုပ်လျှင် (၄၀၀၀/-)ကျပ် ၊ (၂၅)ကျပ်သား တစ်ထုပ်လျှင် (၂၀၀၀/-)ကျပ်ဖြစ်ပြီး ဖောက်သည်စျေးအနေဖြင့်(၁)ပိဿာအထုပ် (၁၀)ထုပ်အထက်မှာယူပါက(၁)ပိဿာထုပ်(၁)ထုပ်လျှင်(၆၀၀၀/-)ကျပ်ဖြင့် ရောင်းချပေးကြောင်း ၊ အရသာချို ကြက်သွန်နီကြော်လုပ်ငန်းပိုင်ရှင်၏ ပြောကြားချက်အရသိရှိရပါသည်။ အရသာရှိပြီး ကြွပ်ရွမွှေးကြိုင်နေသော ကြက်သွန်နီကြော်များကို အလှူ ၊ မင်္ဂလာဆောင်ပွဲများ ၊ ဆွမ်းကပ် ၊ ကထိန်ပွဲများတွင် ဒံပေါက်ချက်ခြင်း၊ငါးခြောက်ကြော်ခြင်း၊ ငရုတ်သီးကြော်ခြင်းနှင့် အသုပ်စုံတို့တွင် လိုအပ်သလိုထည့်၍ စားသုံးကြပါသည်။ ကြက်သွန်နီကြော်အား မည်သည့်ဓါတုပစ္စည်းမှ အရောအနှောမပါဝင်ဘဲ ကြက်သွန်နီ သီးသန့်ကြော်ထားပြီး သန့်ရှင်းလတ်ဆတ်၍ အသင့်စားသုံးနိုင်သောကြောင့် သုံးစွဲသူများအနေဖြင့် အလွယ်တကူဝယ်ယူစားသုံးနိုင်သလို လုပ်ငန်းရှင်များအနေဖြင့်လည်း ကြက်သွန်သီးနှံအား ဒေသတန်ဖိုးမြှင့်ထုတ်ကုန်အဖြစ် ထုတ်လုပ်ရောင်းချပါက ပိုမိုအဆင်ပြေမည်ဖြစ်ကြောင်း ရေးသားတင်ပြအပ်ပါသည်။
DOCA(မန္တလေး)
စက်သုံးဆီများ အထူးဈေးနှုန်းဖြင့် ရောင်းချမှုအား ကွင်းဆင်းစစ်ဆေးခြင်းနှင့် အသိပညာပေးခြင်း ဆောင်ရွက်
မန္တလေးတိုင်းဒေသကြီးအတွင်း စက်သုံးဆီများအား သက်သာသောဈေးနှုန်းဖြင့် ပြန်လည်ရောင်းချရေး ဈေးကွက်စောင့်ကြည့်စစ်ဆေးကြပ်မတ်ရေးအဖွဲ့အနေဖြင့် ၁၆.၂.၂၀၂၂ နေ့တွင် ဗဟိုဘဏ်မှ ရောင်းချပေးသည့် ငွေလဲနှုန်းနှင့်ညီမျှသည့် သက်သာသောဈေးနှုန်းဖြင့် ပြန်လည်ဖြန့်ဖြူးရောင်းချလျက်ရှိသော မန္တလေးခရိုင်အတွင်းရှိ စက်သုံးဆီအရောင်းဆိုင်များအား ကွင်းဆင်းစစ်ဆေးဆောင်ရွက်လျက်ရှိရာ စက်သုံးဆီအရောင်းဆိုင်များအနေနှင့် အထူးဈေးနှုန်းရောင်းချနေကြောင်း ဗီနိုင်းကပ်၍ ဒီဇယ်(၁)လီတာလျင် ၁၅၉၄ ကျပ်၊ ပရီမီယမ်ဒီဇယ် (၁)လီတာလျင် ၁၆၀၂ ကျပ်ဖြင့် ရောင်းချလျက်ရှိရာ အချင်အတွယ်မှန်ကန်မှုကြောင်း စစ်ဆေးတွေ့ရှိခဲ့သည်ဟု သိရပါသည်။
ဆက်လက်၍ စက်သုံးဆီအရောင်းဆိုင်များအား ကွင်းဆင်းစစ်ဆေးမှုအပြီး စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးမှ တာဝန်ရှိသူများသည် စက်သုံးဆီအရောင်းဆိုင်မန်နေဂျာ/တာဝန်ခံနှင့် အရောင်းဝန်ထမ်းများအား စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်များ လိုက်နာရမည့် ဆောင်ရန်/ရှောင်ရန်များ၊ စားသုံးသူအခွင့်အရေး၊ ကုန်အညွှန်းအမှတ်အသား ဖော်ပြရမည့်ကိစ္စရပ်များ၊ တားမြစ်ချက်များ၊ ပြစ်မှု/ပြစ်ဒဏ်များနှင့် အရေးဆိုတိုင်ကြားနိုင်သည့်အခြေအနေများအား ရှင်းလင်းဟောပြောဆွေးနွေးခဲ့ပြီး စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်း သတင်းရရှိပါသည်။
DOCA(မန္တလေး)
မန္တလေးမြို့တွင်း မြေပဲဆံနှင့် မြေပဲဆီဈေးကွက်အခြေအနေ
မန္တလေးဈေးကွက်သို့ စစ်ကိုင်းတိုင်းဒေသကြီး ရွှေဘို၊ မြင်းမူနယ်မှ မြေပဲဆံအသစ်များ ဝင်ရောက်မှုရှိပြီး အညာဒေသ မကွေးနှင့် ရေနံချောင်းနယ်တို့မှလည်း အညာဆီဆံများ ဝင်ရောက်လျက်ရှိပါသည်။ အဆိုပါ မြေပဲလုံးဆံများကို ဒေသတွင်းရောင်းဝယ်သူများအနေနှင့် မန္တလေးမှတဆင့် တရုတ်ဝယ်လက်များမှ အဝယ်ရှိသလို ရန်ကုန်သို့လည်း တင်ပို့မှုရှိကြောင်းနှင့် မန္တလေးမြို့တွင်းရှိ ဆီစက်များမှလည်း စက်ကြိတ်များကောင်းမွန်သဖြင့် ဆီကြိတ်ခွဲမှုရှိကာ အဝယ်လိုက်ကြောင်း သိရပါသည်။မန္တလေးဈေးကွက်တွင် လက်တလောဈေးနှုန်းအနေနှင့် မြေပဲလုံးဆံ(နီ)သစ် တစ်ပိဿာ ၃၀၅၀ ကျပ်၊ S1 လုံးဆံ တစ်ပိဿာ ၃၂၀၀ ကျပ်၊ အနီဆီဆံ တစ်ပိဿာ ၂၇၀၀ ကျပ် ရှိပြီး ယခင်လတူဈေးနှုန်းမှာ မြေပဲလုံးဆံ(နီ)သစ် တစ်ပိဿာ ၃၁၅၀ ကျပ်၊ S1 လုံးဆံ တစ်ပိဿာ ၃၁၅၀ ကျပ်၊ အနီဆီဆံ တစ်ပိဿာ ၂၇၀၀ ကျပ် ဈေးနှုန်းများနှင့် အရောင်းအဝယ်ဖြစ်ခဲ့သည့်အတွက် အနီလုံးဆံအနေနှင့် တစ်ပိဿာ ၁၀၀ ကျပ်၊ S1 လုံးဆံ တစ်ပိဿာ ၅၀ ကျပ်၊ အနီဆီဆံ အနေနှင့် ဈေးငြိမ်နေသည်ကို တွေ့ရပါသည်။ မြေပဲဆီဈေးအနေနှင့် တစ်ပိဿာ ၆၅၀၀-၇၀၀၀ ကျပ်ဈေးရှိကြောင်း သိရသည်။
DOCA(မန္တလေး)
မန္တလေးတိုင်းဒေသကြီး၌သက်သာသောဈေးနှုန်းဖြင့် စားအုန်းဆီများ ရောင်းချပေးလျက်ရှိ
စားအုန်းဆီ ဈေးနှုန်းများ မြင့်မားနေခြင်းကြောင့် အဓိကသုံးစွဲနေရသည့် ဒေသတွင်းရှိ တစ်နိုင်တစ်ပိုင် မိသားစုလုပ်ငန်းများ၊ SME လုပ်ငန်းငယ်များနှင့် စားသုံးသူပြည်သူများ ဈေးကြီးမြင့်စွာ ဝယ်ယူသုံးစွဲနေရသည့်အတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်း၍ ဗဟိုဘဏ်မှ ရည်ညွှန်းငွေလဲနှုန်းဖြင့် ဝယ်ယူ၍ တိုက်ရိုက်ရောင်းချသည့် စားအုန်းဆီများကို လုပ်ငန်းရှင်များ၊ ပြည်သူများ သက်သာသောဈေးနှုန်းဖြင့် ဝယ်ယူရောင်းချနိုင်ရေး ဆောင်ရွက်လျက်ရှိပါသည်။
စားသုံးသူရေးရာဦးစီးဌာန၊ မန္တလေးတိုင်းဒေသကြီးမှ စားအုန်းဆီများအား တိုင်းဒေသကြီးအတွင်းရှိ မန္တလေးခရိုင်၊ မိတ္ထီလာခရိုင်၊ မြင်းခြံခရိုင်နှင့် ညောင်ဦးခရိုင်တို့တွင် ပထမအကြိမ်အဖြစ် ဆီကိုယ်စားလှယ် (၇၄)ဦးအား (၄၇၁၅)ပေပါ ခွဲဝေရရှိမှုအပေါ်တွင် သတ်မှတ်ရောင်းဈေး တစ်ပိဿာလျှင် ၃၉၀၀ ကျပ်နှုန်းဖြင့်ရောင်းချပေးခဲ့ပါသည်။ ဒုတိယအကြိမ်အဖြစ် အဆိုပါ (၄)ခရိုင်တွင် ဆီကိုယ်စားလှယ် (၆၁)ဦးအား ခွဲဝေရရှိပေပါ (၁၂၀၀)တွင် တစ်ပိဿာ ၄၄၅၀ ကျပ် နှုန်းဖြင့်လည်းကောင်း၊ တတိယအကြိမ်အဖြစ် ခွဲဝေရရှိပေပါ (၁၁၀၀)တွင် ဆီကိုယ်စားလှယ် (၅၉)ဦးမှ တစ်ပိဿာလျှင် ၄၅၀၀ ကျပ်နှုန်းဖြင့်လည်းကောင်း ဈေးများ၊ရပ်ကွက်အတွင်းရှိ ဆိုင်များတွင် ရောင်းချပေးခဲ့ကြောင်း သိရပါသည်။ ဆက်လက်၍ စတုတ္ထအကြိမ်အဖြစ် ခွဲဝေရရှိသည့် ပေပါ(၅၅၀)ကိုလည်း အဆိုပါခရိုင်များတွင် ဖေဖော်ဝါရီလ စတုတ္ထပတ်မှစတင်၍ ရောင်းချသွားမည်ဖြစ်ကြောင်း သိရသည်။အဆိုပါ စားအုန်းဆီအရောင်းဆိုင်များသို့ မန္တလေးတိုင်းဒေသကြီး အစိုးရအဖွဲ့ရုံးမှ ဖွဲ့စည်းပေးထားသည့် ဈေးကွက်စောင့်ကြည့်စစ်ဆေးကြပ်မတ်ရေးအဖွဲ့များဖြင့် သတ်မှတ်ဈေးနှုန်းများ ရောင်းချပေးစေရေး၊ အရည်အသွေးပြည့်မီမှုရှိစေရေးနှင့် စနစ်တကျ ရောင်းချပေးစေရေးတို့ကို ကွင်းဆင်းစစ်ဆေးလျက်ရှိကြောင်း သိရသည်။
DOCA(မန္တလေး)
မန္တလေးတိုင်းဒေသကြီးမှ အခြားတိုင်းဒေသကြီး/ပြည်နယ်များသို့ ကြက်သွန်နီများ တင်ပို့နေမှုအခြေအနေ
မန္တလေးတိုင်းဒေသကြီးအတွင်း မိုးကြက်သွန်နီ စိုက်ပျိုးသော မြင်းခြံဈေးကွက်သို့ ကြက်သွန်နီဝင်ရောက်မှုမှာ (၁၀.၂.၂၀၂၂ မှ ၁၆.၂.၂၀၂၂ထိ)တစ်ရက်ပျမ်းမျှပိဿာချိန် (၁၂၀၀၀၀) ဝန်းကျင် ဝင်ရောက်မှုရှိပါသည်။ တစ်ပတ်အတွင်း ရန်ကုန်သို့ (၁၂)ဘီးကား (၅)စီး၊ တန်ချိန် (၈၅) တန်ကို တစ်ပိဿာကားသယ်ယူခ ၉၀ ကျပ်ဖြင့် လည်းကောင်း၊ နေပြည်တော်သို့ (၆)ဘီးကား (၂)စီး၊ ကုန်ချိန်(၁၆)တန်ကို တစ်ပိဿာကားသယ်ခ ၉၅ ကျပ်ဖြင့် လည်းကောင်း၊ မော်လမြိုင်သို့ (၁၂)ဘီးကား (၃၀)စီး၊ ကုန်ချိန် (၅၁၀) တန်ကို ကားသယ်ယူခ တစ်ပိဿာလျှင် ၁၁၀ ကျပ်ဖြင့် လည်းကောင်း၊ စစ်တွေသို့ (၁၂)ဘီးကား (၇)စီး၊ ကုန်ချိန်(၁၁၉) တန်ကို တစ်ပိဿာကားသယ်ယူခ ၁၃၀ ကျပ်ဖြင့် လည်းကောင်း၊ မြဝတီသို့ (၁၂)ဘီကား (၁၈)စီး၊ ကုန်ချိန် ၃၀၆ တန်ကို တစ်ပိဿာ ကားသယ်ယူခ ၁၅၀ ကျပ်ဖြင့်လည်းကောင်း တင်ပို့ခဲ့ပါသည်။ ဈေးနှုန်းအနေနှင့် လက္ကားဈေး တစ်ပိဿာလျှင် ၃၅၀ ကျပ်မှ ၆၀၀ ကျပ်ဈေးရှိပြီး၊ ယခင်တစ်ပတ်နှင့်နှိုင်းယှဉ်ပါက ပစ္စည်းအရည်အသွေးပေါ် မူတည်၍ ဈေးအနည်ငယ်ကျဆင်းပါသည်။ လက်လီဈေးတစ်ပိဿာလျှင် ၅၀၀ ကျပ်မှ ၈၀၀ ကျပ်ဈေးရှိပါသည်။
တစ်ပတ်အတွင်း ရန်ကုန်၊ မြဝတီမြို့များသို့ ကျောက်ဆည်မှ တွဲကား(၄)စီး၊ (၁၂)ဘီးကား (၄)စီး၊ မြစ်သားမှတွဲကား(၃)စီး၊ (၁၂)ဘီးကား (၂)စီးတင်ပို့ခဲ့ပါသည်။ ကုန်တင်ခနှုန်းထားအနေဖြင့် ရန်ကုန်သို့တစ်ပိဿာ ၈၀ ကျပ်၊ မြဝတီသို့ ၁၂၀ ကျပ်ဈေးရှိပါသည်။ တောင်သူရောင်းဈေးနှုန်းမှာ တစ်ပိဿာလျှင် ၅၀၀/-၅၅၀/-ကျပ်၊ မြို့ပေါ်လက္ကားဈေးတစ်ပိဿာလျှင် ၄၀၀ ကျပ်မှ ၆၀၀ ကျပ်၊ လက်လီဈေးတစ်ပိဿာလျှင် ၅၀၀/-မှ၈၀၀/-ကျပ်ဈေးရှိပါသည်။
မိတ္ထီလာမှ တစ်ပတ်အတွင်း ရန်ကုန်သို့ (၁၂)ဘီးကား (၃)စီး၊ ကုန်ချိန် (၄၈)တန်ကို ကားသယ်ယူခတစ်ပိဿာလျှင် ၉၀ ကျပ်၊ မြဝတီသို့ တွဲကား(၇)စီး၊ ကုန်ချိန် ၁၇၅ တန်ကို ကားသယ်ယူခတစ်ပိဿာလျှင် ၁၀၀ ကျပ်၊ မူဆယ်သို့(၁၂)ဘီး (၄)စီး၊ ကုန်ချိန် ၆၄ တန် ကားသယ်ခတစ်ပိဿာလျှင် ၁၂၀ ကျပ်ဖြင့် တင်ပို့ခဲ့ပါသည်။ တစ်ပိဿာလက္ကားဈေးအနေဖြင့် ၅၅၀ ကျပ်မှ ၆၀၀ ကျပ်ဈေးရှိပါသည်။ မန္တလေးဈေးကွက်သို့ မိုးကြက်သွန်အသစ်များ မြင်းခြံ၊မြစ်သား၊ရွှေဘိုတို့မှ ဝင်ရောက်လျက် ရှိပါသည်။ လက္ကားဈေးတစ်ပိဿာလျှင် မြစ်သားစမှာ ၅၀၀ ကျပ်မှ ၉၀၀ ကျပ်၊ မြင်းခြံ၊ရွှေဘိုစမှာ ၄၀၀ ကျပ်မှ ၆၅၀ ကျပ်ဈေးရှိပြီး၊ လက်လီဈေးမှာ ၆၀၀ ကျပ်မှ ၁၀၀၀ ကျပ်ရှိပါသည်။
DOCA(မန္တလေး)
ရခိုင်ပြည်နယ် ဖရဲစိုက်ပျိုးမှုနှင့် ဈေးကွက်အခြေအနေ ကွင်းဆင်းလေ့လာ
ရခိုင်ပြည်နယ်သည် မိုးရေချိန်လက်မ ၁၅၀နှင့်အထက်ရှိပြီး တောတောင်ထူထပ်ကာ မြစ်ချောင်းပေါများခြင်းကြောင့် မိုးရာသီတွင် တောင်ကျရေပြင်းကာ ရေကြီးရေလျှံဖြစ်မှုကြောင့် မြေနုန်းကျွန်းပေါ် မြေနေရာပေါများခြင်းကြောင့် ရေခံ၊ မြေခံကောင်းပြီး ရာသီဥတုမျှတခြင်းကြောင်း မိုးသီးနှံနှင့် ဆောင်းသီးနှံများ စိုက်ပျိုးဖြစ်ထွန်းသောဒေသဖြစ်သောကြောင်း ပြည်တွင်းစားသုံးမှုဖူလုံ သည့်အပြင် ပြည်ပပို့ကုန်အဖြစ် ဆန်စပါးနှင့်မတ်ပဲကို အဓိကတင်ပို့လျှက်ရှိပါရာ ယခုအခါ ၎င်းသီးနှံ များအပြင် တောင်သူများအနေဖြင့် ဆောင်းရာသီတွင် လုပ်ကွက်နည်း ကုန်ကျစရိတ်သက်သာပြီး တွက်ခြေကိုက်သီးနှံဖြစ်သည့် ဖရဲသီးနှံကိုတစ်နှစ်ထက်တစ်နှစ် တိုးချဲ့စိုက်ပျိုးလာခြင်း ဖြစ်ကြောင်း လေ့လာသိရှိရပါသည်။
စစ်တွေခရိုင်နှင့် မြောက်ဦးခရိုင်ရှိ ရေချိုရရှိသည့် စစ်တွေမြို့နယ် ဂျောဘူဂျာ၊ ကျက်တောပြင်၊ ဘောဒူဖ၊ အောင်တိုင်၊ ဗေဒါ ၊ ဒါးပိုင်၊ အောင်မင်္ဂလာကျေးရွာများ ၊ ရသေ့တောင်မြို့နယ် အောင်မ၊ အငူမော်၊ ကုန်တန်း၊ မကျည်းချောင်း၊ ကုလားချောင်း၊ မဟာမြိုင်၊ လောင်းချောင်း၊ အောင်စစ် ကျေးရွာများ၊ ပေါက်တောမြို့နယ် ဆင်တက်မော်၊ ပြိုင်တောင်၊ မြင့်ဂါ၊ မင်းဘာ၊ ကြိမ်ခွေမော်၊ နတ်တောင်ပြင်၊ ကျောက်ဆိပ်ကျေးရွာများတွင် စိုက်ပျိုးကြခြင်း၊ ယခင်နှစ်နှင့်ယခုနှစ် အလားတူ (၃)မြို့နယ်၌ ဖရဲစိုက်ဧက (၇၈၉)ဧက စိုက်ပျိုးကြောင်း သက်ဆိုင်ရာဌာနမှ သိရှိရပါသည်။ မြောက်ဦး ခရိုင်ရှိ ကျောက်တော်၊ မြောက်ဦးနှင့် မင်းပြားမြို့နယ်များတွင်လည်း ဖရဲအများအပြားစိုက်ပျိုးကြောင်း လေ့လာသိရှိရပါသည်။
ဖရဲမျိုးစေ့ကို တရုတ်နိုင်ငံနှင့် ထိုင်းနိုင်ငံမှတင်သွင်းပြီး ရန်ကုန်မှတဆင့် ကျောက်တော်မြို့နယ်မှ ဝယ်ယူရရှိပြီး ဖရဲစိုက်တောင်သူ ဒေါ်မေသန်း(အောင်မကျေးရွာ)၏ ပြောကြားချက်အရ ဖရဲ ၈၈၅ မျိုးစေ့(၅၀၀)စေ့ပါ တစ်ထုပ်လျှင် (၃၂၅၀၀)ကျပ်၊ ဖိုးတီ မျိုးစေ့ (၅၀၀)စေ့ပါ တစ်ထုပ်လျှင် (၁၅၀၀၀)ကျပ် နှင့် မျှားနီမျိုးစေ့(၅၀၀)စေ့ပါ တစ်ထုပ်လျှင် (၁၅၀၀၀)ကျပ် နှုန်းပေးဝယ်ရကြောင်း၊ ဖရဲကို တန်ဆောင် မုန်းလဆန်းမှ တပိုတွဲလဆန်းထိ စိုက်ပျိုးကာ တပိုးတွဲလဆန်းမှ တပေါင်းလပြည့်/ လကုန်နေ့ထိ ဆွတ်ခူးရရှိကြောင်း ဖရဲစိုက်ပျိုးရာတွင် မြေကျင်း(၃)ပေပတ်လည် အနက် (၂)ပေ ကျင်း တူး မြေဆွ၊ မြေဆွေးထည့်၊ ပေါင်းတင်၊ ရေလောင်း၊ ပိုးသတ် ဆေးဖျန်း၊ သဘာဝမြေဩဇာ ဓါတ်မြေဩဇာနှင့် ရွက်ဖြန်းအားဆေးများ ကျွေးကာ ဂရုတစိုက်စိုက်ပျိုး ရခြင်းဖြစ်ကြောင်း၊ ဖရဲတစ်ဧက စိုက်ပျိုး/ဆွတ်ခူး တင်ပို့ရောင်းချသည်ထိ ကုန်ကျစရိတ်မှာ (၉၀၀၀၀၀) ကျပ်ခန့် ကုန်ကျကြောင်း လေ့လာသိရှိရပါသည်။
ကျေးလက်ဒေသရှိ ဖရဲစိုက်တောင်သူများမှာ တပိုင်တနိုင်အနေဖြင့် (၀.၂၅)ဧက မှ (၀.၇၅)ဧက ထိသာ စိုက်ပျိုးကြောင်း၊ ဖရဲသီးထွက် တစ်ဧကလျှင် ပယ်သီးငယ်များဖယ်၍ အလတ်/အကြီး (၁၅၀၀)လုံးခန့် ဆွတ်ခူးရရှိပြီး ပျမ်းမျှဖရဲသီးတစ်လုံး လက်ကား (၁၀၀၀)ကျပ်နှင့် လက်လီ(၁၅၀၀/ ၂၀၀၀)ကျပ် ထိ ရှိ၍ ဖရဲသီးတစ်ဧကမှ အကျိုးအမြတ်(၆၀၀၀၀၀)ကျပ်မှ (၁၆၅၀၀၀၀)ကျပ်ထိ ရရှိကြောင်း၊ ဖရဲစိုက်တောင်သူ ဦးမောင်လှ (ဂျောဘူဂျာကျေးရွာ) ၏ ပြောကြားချက်အရ သိရှိရပါသည်။ စစ်တွေခရိုင် စစ်တွေမြို့နယ်မှ ဖရဲစိုက်တောင်သူများအနေဖြင့် ထွက်ရှိဖရဲသီးများကို စစ်တွေမြို့ပေါ်နှင့် ပုဏ္ဏားကျွန်းမြို့နယ်သို့ လည်းကောင်း၊ ရသေ့တောင်မြို့နယ်မှ ထွက်ရှိဖရဲသီး ရသေ့တောင်မြို့ပေါ်နှင့် ဘူးသီးတောင်၊ မောင်တောမြို့နယ်များသို့လည်းကောင်း၊ ပေါက်တောမြို့နယ်မှ ထွက်ရှိဖရဲသီးများအား ပေါက်တောမြို့ပေါ်နှင့် မြေပုံ ၊ စစ်တွေမြို့နယ်များသို့လည်းကောင်း တင်ပို့ရောင်းချခြင်းဖြစ်ပြီး စစ်တွေ-ရန်ကုန် အဝေးပြေးကားလမ်းမကြီး ဘေးတွင်လည်းဖရဲသီးများကို စင်ထိုးကာ ရောင်းချကြကြောင်း သိရှိရပါသည်။
ဖရဲသီးနှံမှာ စိုက်ပျိုးရလွယ်ကူပြီး စိုက်ပျိုးစရိတ်သက်သာကာ သီးထွက်ကောင်း၍ တောင်သူများ အကျိုးအမြတ်ရရှိသဖြင့် နှစ်စဉ်တိုးချဲ့စိုက်ပျိုးလျှက်ရှိသော သီးနှံဖြစ်သည့်အတွက် တနိုင်တပိုင်မှ စီးပွားဖြစ်တိုးချဲစိုက်ပျိုးကာ ထွက်ရှိဖရဲသီးအား ဒေသတွင်း စားသုံးခြင်းနှင့် ပြည်တွင်းသာမက ပြည်ပပို့ကုန်သီးနှံအဖြစ်တင်ပို့နိုင်ရေး တောင်သူများနှင့် လုပ်ငန်းရှင်များအနေဖြင့် အကျိုးတူပူးပေါင်းကာ တွင်ကျယ်စွာ စိုက်ပျိုးသင့်ပါကြောင်း လေ့လာတင်ပြ လိုက်ရပါသည်။
DOCA(ရခိုင်)
စက်သုံးဆီအရောင်းဆိုင်အား ကွင်းဆင်းစစ်ဆေး
စားသုံးသူရေးရာဦးစီးဌာန တောင်ငူခရိုင်ဦးစီးမှူးဦးမျိုးအောင်သည် အုတ်တွင်းမြို့နယ် ဈေးကွက်စောင့်ကြည့်စစ်ဆေးကြပ်မတ်ရေးအဖွဲ့ဝင် ဌာနဆိုင်ရာများမှ တာဝန်ရှိသူများ၊ အုတ်တွင်း မြို့နယ်တာဝန်ခံတို့နှင့်အတူ ဖေဖော်ဝါရီလ ၁၇ ရက်နေ့ နံနက်ပိုင်းက အုတ်တွင်းမြို့နယ်၊ ဘန့်ဘွေးကုန်းကျေးရွာရှိ Max စက်သုံးဆီအရောင်းဆိုင်သို့ ကွင်းဆင်းကြည့်ရှုစစ်ဆေးရာ ဆိုင်တာဝန်ခံ ဦးစိုးပိုင်က Diesel နှင့် Premium Disel စက်သုံးဆီများအား အထူးဈေးနှုန်းဖြင့် ရောင်းချနေမှုအခြေအနေများကို ရှင်းလင်းတင်ပြပါသည်။
ခရိုင်ဦးစီးမှူးက စက်သုံးဆီများ၏ ဈေးနှုန်းနှင့် အခြင်အတွယ်မှန်ကန်ရေးတို့ကို စစ်ဆေးကြည့်ရှုပြီး စက်သုံးဆီဈေးနှုန်း မြှင့်တက်မှုမရှိစေရေးနှင့် ဈေးနှုန်းတည်ငြိမ်မှုရှိစေရေးအတွက် စည်းကမ်းသတ်မှတ်ချက်များနှင့်အညီ ရောင်းချကြရန်၊ စားသုံးသူများ စိတ်ကျေနပ်မှုရရှိစေရေးအတွက် ဝန်ဆောင်မှုပေးရန် ဆိုင်တာဝန်ခံနှင့် ဆွေးနွေး၍ အကြံပြုမှာကြားခဲ့ပါသည်။
မြန်မာနိုင်ငံတော်ဗဟိုဘဏ်မှ ရည်ညွှန်းငွေလဲလှယ်နှုန်းဖြင့် ရောင်းချပေးသည့် နိုင်ငံခြားငွေရရှိသော စက်သုံးဆီကုမ္ပဏီများမှ Max Energy စက်သုံးဆီကုမ္ပဏီသည် ၎င်းပိုင် Max စက်သုံးဆီ အရောင်းဆိုင်များတွင် Diesel နှင့် Premium Disel စက်သုံးဆီများအား အထူးဈေးနှုန်းဖြင့် ရောင်းချ လျှက်ရှိရာ အုတ်တွင်းမြို့နယ်၊ ဘန့်ဘွေးကုန်းကျေးရွာ၊ ရန်ကုန်-မန္တလေးလမ်းဘေးရှိ Max စက်သုံးဆီအရောင်းဆိုင်တွင် ဖေဖော်ဝါရီလ ၈ ရက်နေ့မှစတင်၍ အထူးဈေးနှုန်းဖြင့် ရောင်းချကြောင်း သတင်းရရှိပါသည်။
DOCA(ပဲခူး)
Pages
