ကုန်သွယ်မှုသတင်းများ
မကွေးမြို့နယ်တွင် ဆေးဆိုင်(၂၁)ဆိုင်ဖွင့်လှစ်ရောင်းချလျက်ရှိရာ စျေးကွက်အတွင်း ဖြစ်ပေါ်လျက်ရှိသော အိမ်သုံးဆေးဝါးနှင့် အားဆေးများ၏စျေးနှုန်းများမှာ မတ်လပထမအပတ်နှင့် ဒုတိယအပတ်တို့တွင် စျေးနှုန်းအပြောင်းအလဲမရှိဘဲ စျေးနှုန်းတည်ငြိမ်လျက်ရှိပါသည်။
စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်ဦးစီးမှူးရုံး၊ စလင်းမြို့နယ် တာဝန်ခံ ဦးဆန်းလင်းမောင်(ဦးစီးမှူး)နှင့် အဖွဲ့သည် (၁၂.၃.၂၀၂၃)ရက်နေ့၊ နံနက်(၁၀:၀၀)နာရီ အချိန်တွင် ထူးပေါက်ကျေးရွာရှိ ကုလားပဲစိုက် တောင်သူများအား တွေ့ဆုံ၍ ကုလားပဲစိုက်ပျိုးထုတ်လုပ်မှုနှင့် အရောင်းအဝယ်ဖြစ်မှုအခြေအနေများကို ကွင်းဆင်းလေ့လာခဲ့ပါသည်။
ဆိပ်ဖြူမြို့ ကြက်သွန်နီအရောင်းအဝယ်ဖြစ်လျက်ရှိသော ကုန်စည်ဒိုင်သို့ မတ်လ (၁)ရက် မှ (၇)ရက်ထိ (ပထမ)ပတ်အတွင်း ကြက်သွန်နီပင်စိုက်(အသစ်)များ တစ်ရက်လျှင် ပျမ်းမျှ ကုန်ချိန်ပိဿာ(၅)သောင်းခန့်၊ (၁)ပတ်အတွင်း စုစုပေါင်း ပိဿာ(၃)သိန်းခွဲခန့် ကုန်စည်ဒိုင်သို့ ဝင်ရောက်လျက်ရှိကြောင်း သိရှိရသည်။
ပြည်တွင်းစားသုံးဆီဖူလုံရေးအတွက် နိုင်ငံတော်က နေကြာမျိုးကောင်းမျိုးသန့်များကို တိုးချဲ့စိုက်ပျိုးရန် တွန်းအားပေးဆောင်ရွက်လျက်ရှိရာ (၂၀၂၂-၂၀၂၃) ခုနှစ်တွင် မွန်ပြည်နယ်၌ နေကြာ ရေးဆင်း-၁ မျိုးများကို စိုက်ဧကစုစုပေါင်း (၆၁၃၄) ဧက စိုက်ပျိုးကြောင်းနှင့် နေကြာများကို ဒီဇင်ဘာလကုန်နှင့် ဇန်နဝါရီလဆန်းပိုင်းတွင် စပါးရိတ်သိမ်းပြီးသည့်လယ်မြေများကို ထွန်ယက်ကာစတင်စိုက်ပျိုးကြပြီး ယခု မတ်လဆန်းတွင် စတင်ရိတ်သိမ်းနေကြပြီဖြစ်ကြောင်း သိရှိရပါသည်။
မန်ကျည်းပင်များကို အခြားစားပင်သီးပင်များကဲ့သို့ ခြံဖွဲ့၍ စိုက်ပျိုးခြင်းမရှိကြသော်လည်း ကန့်ဘလူမြို့နယ်၏ နေရာအနှံ့အပြားတွင် အများအပြားအလေ့ကျပေါက်ရောက်ကြပါသည်။ ယခုအခါ မန်ကျည်းသီးမှည့်များ အရောင်းအဝယ်ဖြစ်လျက်ရှိရာ မန်ကျည်းသီးမှည့်(အစေ့မပါ)အဟောင်းတစ်ပိဿာလျှင် ကျပ်(၄၀၀၀)မှ ကျပ်(၅၀၀၀)ထိရှိပြီး မန်ကျည်းသီးမှည့်(အစေ့မပါ)အသစ်တစ်ပိဿာလျှင် ကျပ်(၃၀၀၀)မှ ကျပ်(၄၅၀၀)ထိ အရောင်းအဝယ်ဖြစ်လျက်ရှိကြောင်း သိရှိရပါသည်။
