ကုန်သွယ်မှုသတင်းများ
စစ်ကိုင်းတိုင်းဒေသကြီး၊ ကန့်ဘလူခရိုင်နေရာအနှံ့အပြားတွင် ဇီးပင်(အချဉ်မျိုး)များအလေ့ ကျပေါက်ရောက်ကြကြောင်း၊ ဇီးပင်(အချဉ်မျိုး)များသည် အခြားသီးပင်များကဲ့သို့ စိုက်ပျိုးရန်မလိုဘဲ ယာတောများ၌လည်းကောင်း၊ လယ်တောများ၌လည်းကောင်း၊ ရှင်သန်ကြီးထွားကြကြောင်း၊ ဇီးသီး (အချဉ်မျိုး)သည် ဒီဇင်ဘာလကုန်ပိုင်းမှစ၍ အသီးများခူးဆွတ်၍ ရောင်းချကြကြောင်းသိရသည်။
မကွေးတိုင်းဒေသကြီး၊ မကွေးမြို့၊ သိင်္ဂါရပ်ကွက်တွင် ချင်းပေါက်ထုတ်လုပ်ဖြန့်ဖြူးရောင်းချသည့် လုပ်ငန်းရှင် (၄)ဦးရှိပြီး ကုန်ကြမ်းအတွက် အဓိကလိုအပ်သော ချင်းတက်ကို ရှမ်းပြည်နယ်၊ အောင်ပန်းမြို့မှ (၁)ပိဿာလျှင် ကျပ်(၃၅၀၀)ဖြင့် အဓိကဝယ်ယူရကြောင်း သိရသည်။
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများဖြစ်သည့် စပါး၊ ပဲမျိုးစုံနှင့်ဆီထွက်သီးနှံတို့ကို အဓိကစိုက်ပျိုးကြပြီး ရာသီစာသီးနှံများနှင့် စားဖိုဆောင်သီးနှံများကိုလည်း စိုက်ပျိုးကြသည်။
မကွေးတိုင်းဒေသကြီး၊ မကွေးခရိုင်၊ မကွေးဈေးကွက်သို့ မြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက် စသည့်ကျေးရွာများနှင့် စလင်း၊ ဆင်ဖြူကျွန်း၊ မင်းဘူး၊ မြို့သစ်၊ နတ်မောက်မြို့တို့မှထွက်ရှိသော ပဲတီစိမ်း၊ ပဲနောက်၊ ကုလားပဲ၊ ပဲကြီး၊ စားတော်ပဲ၊ မတ်ပဲနှင့် အခြားပဲမျိုးစုံများ ဝင်ရောက်ရောင်းဝယ်ဖောက်ကားလျက်ရှိပါသည်။
စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် အညာဒေသထွက် ရာသီစာထန်းမြစ်များ စတင်ရောင်းချနေကြောင်း၊ ထန်းမြစ်များကို ကန့်ဘလူမြို့နယ်၊ နတ်ပေးကျေးရွာနှင့် အခြားသောကျေးရွာများမှ ပေါ်ဦးပေါ်ဖျားထန်းမြစ်များကို ကန့်ဘလူမြို့မဈေးတွင်ရောင်းချကြောင်း သိရသည်။
