မိုးဦးကျကာလများတွင် အင်ဥမှာ ရာသီစာတစ်ခုဖြစ်သော ဟင်းစာတစ်မျိုးဖြစ်ပါသည်။ အင်ဥသည် မိုးဦးကျကာလများတွင် ကြွေကျနေသော အင်ရွက်များမှ မိုးရေနှင့်ထိတွေ့သောအခါ ဖြစ်ပေါ်လာသော မြေဆွေးများမှ ပေါက်လာသော မြေအောင်းမှို အမျိုးအစားတစ်မျိုးဖြစ်ပါသည်။
စစ်ကိုင်းတိုင်းဒေသကြီး၊ မုံရွာမြို့တွင် အင်ဥများကို ကသာမြို့၊ ကောလင်းမြို့၊ ကလေးမြို့၊ မင်းကင်းမြို့များမှ ဝင်ရောက်လျှက်ရှိပြီး မုံရွာမြို့ပေါ်ရှိ သီရိရတနာဈေး၊ ညောင်တပင်ဈေးနှင့် ကန်သာယာဈေးများတွင် မိုးရာသီ၌ အင်ဥများရောင်းချလေ့ရှိပါသည်။ ပေါ်ဦးပေါ်ဖျား အင်ဥဈေး နှုန်းမှာ တစ်ပိဿာလျှင် ငွေကျပ် ၈၀၀၀၀-၁၀၀၀၀ဝ နှုန်းဖြင့် အရောင်းအဝယ်ဖြစ်ခဲ့ကြောင်းသိရပြီး ၂၀၂၃ခုနှစ်၊ ဇွန်လ(ပထမပတ်)တွင် တစ်ပိဿာလျှင် ငွေကျပ် ၄၀၀၀၀-၆၀၀၀၀ နှုန်းဖြင့် ရောင်းချလျက်ရှိကြောင်း သိရသည်။
အင်ဥတွင် Protein ၊ Amino acid ၊ Calcium Antioxidants ၊ Vitamin – B ၊ Vitamin – D ၊ Potassium ၊ Copper နှင့် Selenium တို့ ကြွယ်ဝစွာ ပါဝင်ပါသည်။ ထို့ပြင် Fiber နှင့် Iron ဓါတ်လည်း ပါဝင်ကြပါသည်။ အင်ဥသည် တစ်နှစ်ပတ်လုံးတွင် တစ်ကြိမ်တည်းသာ တွေ့ရှိရပြီး ရက်အတိအကျမသိနိုင်ဘဲ ယေဘုယျအားဖြင့် မိုးမှန်စပြုချိန်တွင် တွေ့ရလေ့ရှိကြောင်း သိရပါသည်။ အင်ဥ ပေါ်ဦးပေါ်ဖျားချိန်တွင် ဈေးအလွန်ကောင်းပြီး ရာသီစာအဖြစ် စားသုံးသူများနှစ်ခြိုက်စွာ ဝယ်ယူစားသုံးမှုများကြောင်း သိရသည်။
DOCA(စစ်ကိုင်း)