စားသုံးသူရေးရာဦးစီးဌာန၊ မကွေးတိုင်းဒေသကြီး၊ သရက်ခရိုင်ဦးစီးမှူးရုံးမှ ဒုခရိုင်ဦးစီးမှူး ဦးအုန်းမြင့် ဦးဆောင်သောဝန်ထမ်းများသည် တိုင်းဒေသကြီးဦးစီးမှူးနှင့် ခရိုင်ဦးစီးမှူးတို့၏ လမ်းညွှန်မှုဖြင့် ဒေသတွင်းထုတ်ကုန်ပစ္စည်းများ ဈေးကွက်အတွင်းရောင်းချဖြန့်ဖြူးရာတွင် အဆင့်မီ၍ အရည်အသွေးကောင်းမွန်ပြီး တွင်ကျယ်စွာရောင်းဝယ်ဖောက်ကားနိုင်ရေးနှင့် ဘေးအန္တရာယ် ကင်းရှင်းသည့်ကုန်စည်များ ထုတ်လုပ်ဖြန့်ဖြူးရောင်း ချနိုင်စေရန်အတွက် (၃-၇-၂၀၂၃)ရက်နေ့၊ နံနက် (၁၀:၀၀)နာရီအချိန်တွင် သရက်မြို့ပေါ်ရှိ ပဲကြော်၊ ပဲလှော်၊ မလိုင်လုံး၊ ကိတ်မုန့် အစားအသောက်များထုတ်လုပ်ရောင်းချနေသော လုပ်ငန်းရှင်များကို မြို့မစည်ပင်သာယာဈေးရှိ ဈေးကော်မတီရုံး၌ ဖိတ်ကြား၍ ကုန်အညွှန်းအမှတ်အသားများပြည့်စုံမှန်ကန်စွာ ထည့်သွင်းထုတ်လုပ်နိုင်ရေး အသိပညာပေး ရှင်းလင်းဆွေးနွေးခဲ့ပါသည်။
အဆိုပါဆွေးနွေးပွဲတွင် ဒု-ခရိုင်ဦးစီးမှူး ဦးအုန်းမြင့်က မြန်မာနိုင်ငံစားသုံးသူရေးရာကော်မတီ၏ ညွှန်ကြားချက်အမှတ်(၂/၂၀၁၉)အရ မြန်မာဘာသာဖြင့် မဖြစ်မနေဖော်ပြပါရှိရမည့် အချက်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားများတွင် ဖော်ပြပါရှိရမည့်အချက်များ၊ ကုန်အညွှန်းအမှတ်အသားပြည့်စုံစွာ ထည့်သွင်းထုတ်လုပ်နိုင်ခြင်းဖြင့် မိမိတို့၏ ကုန်စည် အရည်အသွေးများ မြင့်မားလာမည်ဖြစ်ပြီး စားသုံးသူများ၏ယုံကြည်စိတ်ချမှုရရှိကာ သုံးစွဲမှု ပိုမိုရရှိလာနိုင်မည်ဖြစ်ပါကြောင်းနှင့် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြည့်စုံ မှန်ကန်မှု ရှိ/မရှိကို မိမိတို့ဌာနသို့ တင်ပြစိစစ်လျှောက်ထားနိုင်ပါကြောင်း အသိပညာပေး ရှင်းလင်း ဆွေးနွေးခဲ့ကြောင်း သိရှိရပါသည်။
DOCA(မကွေး)