စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးနှင့် ပခုက္ကူခရိုင်ဦးစီးမှူးတို့၏လမ်းညွှန်မှုဖြင့် စားသုံးသူပြည်သူများသက်ရှည်ကျန်းမာစွာနေထိုင်နိုင်ရန်နှင့် ဘေးအန္တရာယ်ကင်းရှင်းစေရန်ရည်ရွယ်၍ ပခုက္ကူခရိုင်ဦးစီးမှူးရုံးမှ ဦးစီးမှူး ဒေါ်ကြည်ကြည်စိုးနှင့် ဝန်ထမ်းများသည် (၂၂-၆-၂၀၂၃) ရက်နေ့၊ နံနက် (၁၀:၀၀) နာရီအချိန်တွင် ပခုက္ကူမြို့၊ IEA ကိုယ်ပိုင်မူလတန်းကျောင်း၌ စားသုံးသူကာကွယ်ရေးအသိပညာပေးဟောပြောပွဲကျင်းပပြုလုပ်ခဲ့ရာ ဆရာ/ဆရာမ(၇)ဦးနှင့် ကျောင်းသား/ကျောင်းသူ(၃၈)ဦးတို့တက်ရာက်ခဲ့ကြပါသည်။
အဆိုပါအသိပညာပေးဟောပြောပွဲတွင် ကျောင်းအုပ်ဆရာမကြီးက အဖွင့်အမှာစကားပြောကြားခဲ့ပြီးနောက် ဦးစီးမှူး ဒေါ်ကြည်ကြည်စိုးက စားသုံးသူရေးရာဦးစီးဌာနဖြစ်ပေါ်လာပုံသမိုင်းကြောင်း၊ ဌာန၏ရည်မှန်းချက်၊ မျှော်မှန်းချက်များအကြောင်းတို့ကိုရှင်းလင်းဆွေးနွေးခဲ့ခြင်း၊ ဌာနခွဲစာရေး ဒေါ်ဝါဝါကြည်က စားသုံးသူများအနေဖြင့် နစ်နာဆုံးရှုံးမှုများမဖြစ်ပေါ်စေရန် ရရှိရမည့်စားသုံးသူအခွင့်အရေးနှင့် လိုက်နာရမည့်တာဝန်များကိုသိရှိနားလည်စေရန် ရှင်းလင်းဆွေးနွေးခဲ့ခြင်း၊ ဒု-ဦးစီးမှူး ဒေါ်ပပရွှေကလည်း ကုန်စည်များကိုဝယ်ယူသုံးစွဲရာတွင် လုံခြုံစိတ်ချရမှုရှိစေရေးအတွက် ကုန်စည်ပေါ်တွင် ကုန်အညွှန်းအမှတ်အသားဖော်ပြချက်(၈)ချက်သည်လည်း အရေးပါကြောင်းနှင့် စားသုံးသူနစ်နာဆုံးရှုံးမှုများရှိပါက မည်သူများကတိုင်ကြားနိုင်သည်ကို အသေးစိတ်ရှင်းလင်းဆွေးနွေးခဲ့ခြင်းတို့ဆောင်ရွက်ခဲ့ပါသည်။
ဆက်လက်၍ ဦးစီးမှူး ဒေါ်ကြည်ကြည်စိုးက စားသုံးသူများတို့သည် အခွင့်အရေးနှင့် လိုက်နာရမည့်တာဝန်များကိုသိရှိကြပြီး စားသုံးသူများနစ်နာဆုံးရှုံးမှုများဖြစ်ပေါ်ပါက တိုင်ကြားနိုင်သည့်နေရာများအကြောင်း၊ စားသုံးသူနစ်နာမှုများအတွက် "စားသုံးသူသတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ" (CICC) ဖွင့်လှစ်ထားကြောင်း၊ DOCA Myanmar Mobile Application Facebook စာမျက်နှာနှင့် Consumer Call Center No. (1535) သို့ ဖုန်းဖြင့်ဆက်သွယ်တိုင်ကြားနိုင်ကြောင်း ရှင်းလင်းဆွေးနွေးခဲ့ကာ ကျောင်းသား/ကျောင်းသူတို့ကို အသိပညာပေးဟောပြောပွဲနှင့်ပတ်သက်သည့် မေးခွန်းများမေးမြန်းခြင်းနှင့် ဆုချီးမြှင့်ခြင်းများပြုလုပ်ပေးခဲ့ပြီးနောက် စားသုံးသူကာကွယ်ရေးဆိုင်ရာ အသိပညာပေးလက်ကမ်းစာစောင်များဖြန့်ဝေပေးခဲ့ပါသည်။
DOCA(မကွေး)