စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုနှင့် ပခုက္ကူခရိုင်ဦးစီးမှူး၏ ကြီးကြပ်မှုဖြင့် (၁၄.၈.၂၀၂၃)ရက်နေ့၊ နံနက်(၀၉:၀၀)နာရီအချိန်တွင် ပခုက္ကူမြို့၊ အမှတ်(၁၅)ရပ်ကွက်ရှိ အမှတ်(၄) အခြေခံပညာအထက်တန်းကျောင်း၌ အသိပညာပေး ဟောပြောပွဲပြုလုပ်ခဲ့ရာ ကျောင်းသား၊ ကျောင်းသူ (၆၅) ဦး၊ ဆရာ၊ ဆရာမ(၅)ဦးနှင့် စုစုပေါင်း (၇၀) ဦးတို့ တက်ရောက်ခဲ့ကြပါသည်။
ဟောပြောပွဲတွင် ကျောင်းအုပ်ဆရာမကြီးက ကြိုဆိုနှုတ်ခွန်းဆက်စကားပြောကြားခဲ့ပြီး ဦးစီးမှူးဦးမြတ်မင်းက ဌာန၏ လုပ်ငန်းဆောင်ရွက်ချက်များ၊ ဦးစီးဌာန၏ ဆောင်ပုဒ်၊ မျှော်မှန်းချက်၊ ရည်မှန်းချက်များ၊ ဦးစီးဌာန၏ဆောင်ပုဒ်ဖြစ်သော စားသုံးသူအခွင့်အရေး ဦးစားပေးရန်မှာ အလွန်အရေးကြီးသောကြောင့် ယခုလိုအသိပညာပေးရခြင်းဖြစ်ကြောင်း၊ အခြေခံလိုအပ်ချက်များအပေါ် စိတ်ကျေနပ်မှုရရှိခွင့်မှာ အရေးကြီးကြောင်း၊ မိမိတို့သည် ယခုလို ကျောင်းသား၊ ကျောင်းသူများအား အသိပညာပေးခြင်းသာမက လုပ်ငန်းရှင်များထံသို့ ကုန်အညွှန်းအမှတ်အသားများတွင် ထည့်သွင်း ရမည့်အချက်များပြည့်စုံစွာ ပါဝင်နိုင်ရေးအတွက်လည်းဌာနမှ သွားရောက် အသိပညာပေးဆောင်ရွက်လျက်ရှိကြောင်း သို့မှသာ ကုန်ပစ္စည်းများတွင် ထည့်သွင်းရမည့်အချက်များ ပါဝင်လာပြီး စားသုံးသူများအတွက် လုံခြုံစိတ်ချရသည့်ကုန်ပစ္စည်းများ ထုတ်လုပ်နိုင်ပြီး စားသုံးသူ ကျောင်းသား၊ ကျောင်းသူများနှင့် မိဘပြည်သူများ ဘေးအန္တရာယ်ကင်းရှင်းစွာ စားသုံးနိုင်မည်ဖြစ်ကြောင်း ရှင်းလင်းဆွေးနွေး ခဲ့ပါသည်။
ဆက်လက်၍ ဒုတိယဦးစီးမှူး ဒေါ်လှိုင်ဥမ္မာဦးက စားသုံးသူကာကွယ်ရေးဥပဒေ အခန်း (၉) ပါ စားသုံးသူများရရှိသည့်အခွင့်အရေး(၈)ချက်နှင့် စားသုံးသူများလိုက်နာရမည့်တာဝန်များအား အကျယ် တဝင့် ရှင်းလင်းပြီး မိမိတို့ရရှိမည့် အခွင့်အရေးများကို အပြည့်အဝရရှိရန်နှင့် စားသုံးသူများ လိုက်နာရ မည့်တာဝန်များကိုလည်း တိတိကျကျလိုက်နာဆောင်ရွက်ရန် လိုအပ်ကြောင်း၊ အငယ်တန်းစာရေး ဒေါ်ခိုင်ဇင်ကျော်က စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသား များတွင်ထည့်သွင်းဖော်ပြရမည့် အချက်များအား ကျောင်းသား၊ ကျောင်းသူများနှင့် ဆရာ၊ ဆရာမများအား ရှင်းလင်းလွယ်ကူစွာ သိသာစေရန် နမူနာပစ္စည်းများ ပြသ၍ ကျယ်ကျယ်ပြန့်ပြန့် ရှင်းလင်းခဲ့ပြီး ကုန်အညွှန်းအမှတ်အသားများပြည့်စုံမှသာလျှင် သုံးစွဲစေလိုကြောင်း အသေးစိတ် ရှင်းလင်းဆွေးနွေးခဲ့ပါသည်။ ဦးစီးမှူး ဦးမြတ်မင်းက မိဘပြည်သူများ အခွင့်အရေးများ ကိုသိရှိပြီး နစ်နာ ဆုံးရှုံးမှုရှိခဲ့လျှင် တိုင်ကြားနိုင်ရန် စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက် ရေးစင်တာ “CICC” ရုံးများ ဖွင့်လှစ်ထားရှိပြီး တိုင်ကြားနိုင်ကြောင်း၊ DOCA Website ၊ Facebookစာမျက်နှာ (DOCA Myanmar Application)၊ Consumer Call Center (1535) တွင်လည်း တိုင်ကြားနိုင်ပြီဖြစ်ကြောင်း ကျယ်ကျယ်ပြန့်ပြန့် ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေခဲ့ပါသည်။
DOCA(မကွေး)