![](http://www.doca.gov.mm/sites/default/files/styles/consumer_inner_image__847x424_/public/စငခ_0.jpg?itok=s8wjiNeQ)
ရခိုင်ပြည်နယ် စစ်တွေခရိုင် စားသုံးသူရေးရာဦးစီးဌာနအနေဖြင့် စားသုံးဆီဖူလုံရေး၊ ပြည်တွင်း၌ ဆီထွက်သီးနှံများ တိုးမြှင့်စိုက်ပျိုးထုတ်လုပ်နိုင်ရေးနှင့် အလုပ်အကိုင်အခွင့် အလမ်းများ တိုးပွားလာစေရေးတို့အတွက် စစ်တွေခရိုင်ဦးစီးမှူးဦးဆောင်သည့် ပူးပေါင်းအဖွဲ့ဖြင့် (၁၂-၁၁-၂၀၂၁)ရက်နေ့တွင် စစ်တွေမြို့ ဆီစက်လုပ်ငန်းရှင်များနှင့် တွေ့ဆုံ၍ အသိပညာပေးဆွေးနွေးမှုများ ပြုလုပ်ခဲ့ပါသည်။
တွေ့ဆုံမေးမြန်းမှုများအရ စစ်တွေမြို့ပေါ်ရှိ စက်မှုမှတ်ပုံတင် ဆီစက်လုပ်ငန်းရှင်(၆)ဦး အနက် စားသုံးဆီစက်လုပ်ငန်းရှင် ဒေါ်စောသိန်းအေးဆီစက်မှာ “ဖူးပွင့်စုံ” ကုန်အညွှန်းအမှတ် တံဆိပ်ဖြင့် မြေပဲဆီ၊ မုန်ညှင်းဆီနှင့် နှမ်းဆီများကြိတ်ခွဲထုတ်လုပ်ပြီး လက်လီ/လက်ကား ဖြန့်ချီ ရောင်းချလျက်ရှိပြီး စက်မှုမှတ်ပုံတင်လျှေက်ထားဆဲ “ရခိုင်သားချေ” ကုန်အညွှန်း အမှတ် တံဆိပ်ဖြင့် လျှပ်စစ်မော်တာသုံး ဗီယက်နမ်ထုတ် ဆီကြိတ်ခွဲစက်ငယ်ဖြင့် မြေပဲဆီနှင့် နေကြာဆီ များ ကြိတ်ခွဲထုတ်လုပ်ရောင်းချလျက်ရှိပါသည်။
စစ်တွေမြို့ပေါ်တွင် အခြားရပ်တန့်ထားသော ဆီစက်(၅)ခုမှာ နှစ်စဉ်စက်မှုမှတ်ပုံတင် လိုင်စင်ပြုလုပ်လျက်ရှိသော်လည်း စက်လည်ပတ်မှုရပ်တန့်နေရခြင်းမှာ ဒေသတွင်းကုန်ကြမ်းထုတ်လုပ်မှုအားနည်းခြင်းကြောင့် ကုန်ကြမ်းဈေးနှုန်းမြှင့်တက်ခြင်း၊ မကွေးတိုင်းဒေသကြီးမှ မြေပဲ တောင့်/ မြေပဲဆံများ မှာယူကြိတ်ခွဲရာ မြေပဲသိုလှောင်သူများမှာ မြေပဲများအား အချိန်ကြာမြင့်စွာ သိုလှောင်ထားမှုကြောင့် ဆီကြိတ်ခွဲရာတွင် အနံ့အသက်မကောင်းခြင်း၊ အရည်အသွေး အရောင်အဆင်း စံချိန်စံနှုန်းပြည့်မီမှုမရှိခြင်းကြောင့် မှာယူကြိတ်ခွဲမှုမပြုဘဲ ၊ စက်လည်ပတ်မှု ရပ်တန့်ထားကြကြောင်းနှင့် စက်လည်ပတ်မှု ရပ်တန့်ထားသည့် အချို့သော ဆီစက်ပိုင်ရှင်များအနေဖြင့် မြောက်ဦးခရိုင်၊ ကျောက်တော်မြို့နယ်မှ မြေပဲဆီများမှာယူကာ ကုန်အညွှန်းအမှတ်တံဆိပ်မပါဘဲ တစ်လီတာဘူးများဖြင့် ဈေးကွက်အတွင်း ဖြည့်တင်း ရောင်းချနေမှုများ ရှိကြောင်းလည်း သိရှိရပါသည်။
COVID-19 ကပ်ရောဂါ အခြေအနေများနှင့် မြေပဲ၊ နှမ်း၊မုန်ညှင်းစိုက်ပျိုးရာတွင် လုပ်သားအင်အားရှားပါးခြင်းတို့ကြောင့် ကုန်ကြမ်းထွက်ရှိမှုနည်းပါးလျက်ရှိကာ ဆီဈေးနှုန်းများအနေဖြင့် ယခုလက်ရှိ ပေါက်ဈေးနှုန်းမှာ မြေပဲဆီနှင့် မုန်ညှင်းဆီ တစ်ပိဿာလျှင် ကျပ် ၉၀၀၀ မှ ကျပ် ၁၀၀၀၀ ထိနှင့် နှမ်းဆီတစ်ပိဿာလျှင် ကျပ် ၁၀၀၀၀ မှ ကျပ် ၁၂၀၀၀ ထိ ဈေးနှုန်း မြှင့်တက်လာကြောင်း၊ ဈေးကွက်အတွင်းရောင်းချနေသော ဟင်းသီးဟင်းရွက်ဆီနှင့် နိုင်ငံခြားမှ တင်သွင်းသည့် စားအုန်းဆီများကိုသာ စားသုံးသူအများစု ဝယ်ယူစားသုံး နေကြခြင်းကြောင့် မြေပဲဆီစစ်စစ် ကြိတ်ခွဲထုတ်လုပ်ရောင်းချသော ဆီစက်လုက်ငန်းရှင်များအနေဖြင့် ဈေးကွက်အတွင်း ရောင်းချရမှုမှာ ယခင်နှစ်များထက် တစ်နှစ်ထက်တစ်နှစ် ရောင်းအား ကျဆင်းမှုများရှိပြီး တွက်ခြေကိုက်မှု သိသိသာသာလျော့နည်းလာခြင်းတို့ကြောင့် ယခု ကဲ့သို့ ဆီစက်များအား ရပ်တန့်ထားရခြင်း ဖြစ်ကြောင်း ဆီစက်လုပ်ငန်းရှင်များထံမှ ကြားသိခဲ့ရပါသည်။
စားသုံးသူရေးရာဦးစီးဌာန(ရခိုင်)