စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးရုံးသည် စားသုံးသူပြည်သူများ စားသုံးသူကာကွယ်ရေးဆိုင်ရာ အသိပညာဗဟုသုတများ ရရှိစေရန်ရည်ရွယ်၍ စားသုံးသူကာကွယ်ရေးဆိုင်ရာ အသိပညာပေး ဟောပြောပွဲများကို ကျင်းပလျက်ရှိရာ ဩဂုတ်လ ၂၉ ရက်နေ့ နံနက်ပိုင်းက တောင်ငူခရိုင်၊ အုတ်တွင်းမြို့ အခြေခံပညာအထက်တန်းကျောင်းတွင် ကျောင်းသားကျောင်းသူများအား စားသုံးသူ ကာကွယ်ရေးဆိုင်ရာများကို အသိပညာပေးဟောပြောခဲ့ပါသည်။
ဟောပြောပွဲတွင် အုတ်တွင်းမြို့နယ်တာဝန်ခံ ဒေါ်အေးအေးခိုင်က စားသုံးသူရေးရာဦးစီး ဌာနပေါ်ပေါက်လာပုံ၊ ဦးစီးဌာန၏ မျှော်မှန်းချက်နှင့်ရည်မှန်းချက်များ၊ စားသုံးသူ၏အခွင့်အရေးနှင့် တာဝန်များ၊ စားသုံးသူကာကွယ်ရေးဥပဒေတွင် ကုန်စည်များ၌ ကုန်အညွှန်းအမှတ်အသားများ ဖော်ပြရန် ပြဌာန်းထားရှိမှု၊ ကုန်အညွှန်းအမှတ်အသား၏ အရေးကြီးပုံများကို ဟောပြောခဲ့ပါသည်။
ဆက်လက်၍ ခရိုင်ဦးစီးမှူးရုံးမှ ဌာနခွဲတာဝန်ခံ ဦးစီးမှူး ဦးစောသန်းထိုက်ကျော်က စားသုံးသူနစ်နာဆုံးရှုံမှု မဖြစ်စေရေးအတွက် ဦးစီးဌာနမှ ဈေးကွက်စောင့်ကြည့်စစ်ဆေးဆောင်ရွက်လျက်ရှိမှုများ၊ စားသုံးသူနစ်နာဆုံးရှုံးမှုဖြစ်လာပါက တိုင်ကြားနိုင်ခြင်းများနှင့် စားသုံးသူတိုင်ကြားမှု အပေါ် ဦးစီးဌာနက ဖြေရှင်းဆောင်ရွက်ပေးသည့် အကြောင်းအရာများကို ဟောပြောခဲ့ပါသည်။
ဟောပြောပွဲသို့ ကျောင်းသားကျောင်းသူ ၁၈၀ ဦး တက်ရောက်ကြောင်းနှင့် ဟောပြောပွဲအပြီးတွင် စစ်ဆေးရေးမှူးများဖြစ်ကြသော ခရိုင်ဦးစီးမှူးရုံးမှ ဌာနခွဲတာဝန်ခံနှင့် မြို့နယ်တာဝန်ခံတို့သည် ကျောင်းမုန့်ဈေးတန်းတွင်ရောင်းချလျက်ရှိသော အသင့်စားမုန့်များနှင့် အချိုရည်များတွင် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်နှင့်အညီ ကုန်အညွှန်းအမှတ်အသားများကို မြန်မာဘာသာဖြင့် ဖော်ပြထားခြင်း ရှိ/မရှိကို စောင့်ကြည့်စစ်ဆေးခဲ့ကြောင်း သိရပါသည်။
DOCA(ပဲခူး)