ပဲခူးတိုင်းဒေသကြီး ၊ သာယာဝတီခရိုင် ၊ သာယာဝတီမြို့ အထွေထွေအုပ်ချုပ်ရေးဦးစီးဌာန အစည်းအဝေး ခန်းမ၌ (၂၄.၈.၂၀၂၃) ရက်နေ့ ၊ နေ့လယ် (၁၅ : ၀၀) နာရီအချိန်တွင် ခရိုင်စီမံ အုပ်ချုပ်ရေးအဖွဲ့ ဥက္ကဌ ဦးစန်းဝင်း ၊ စားသုံးသူရေးရာဦးစီးဌာန ၊ သာယာဝတီခရိုင်ဦးစီးမှူး ဦးသန်းစိုးနှင့် မြန်မာနိုင်ငံ ဆန်စက်လုပ်ငန်းရှင်များအသင်း (ပဲခူးအနောက်ပိုင်း) ဥက္ကဌ ဦးခင်မောင်ချိုတို့မှ ဦးဆောင်၍ သာယာဝတီခရိုင်အတွင်း မြို့နယ် (၆) မြို့နယ်မှ ဆန်စက်လုပ်ငန်းရှင် (၂၉)ဦး ပူးပေါင်း၍ ဆန်ဈေးနှုန်းတည်ငြိမ်ကျဆင်းရေးအတွက် လုပ်ငန်းညှိနှိုင်း အစည်းအဝေး ကျင်းပခဲ့ပါသည်။
ဥက္ကဌ ဦးစန်းဝင်းမှ သာယာဝတီခရိုင်အတွင်း အခြေခံလူတန်းစားများကို သက်သာသော ဈေးနှုန်းဖြင့် ရောင်းချပေးနိုင်ရေးအတွက် ကြိုးစားဆောင်ရွက်နေပါကြောင်း ၊ လုပ်ငန်းရှင်များ အနေဖြင့် မြို့နယ်များ၌ ဆန်တစ်ပြည်လျှင် (၂၅၀၀) ကျပ်ဖြင့် ရောင်းချပေးစေလိုကြောင်း ၊ ဆန်စက်လုပ်ငန်းရှင်များအနေဖြင့် ကူညီဝိုင်းဝန်း ပူးပေါင်းဆောင်ရွက်လိုကြောင်း ပြောကြားခဲ့ပါသည်။ ဆက်လက်၍ ကောက်စောစပါးမပေါ်သေးခင် ကြားကာလအတွင်း ဆန်ဈေးနှုန်း တည်ငြိမ်ကျဆင်းရေးကို ဆက်လက်ထိန်းသိမ်းဆောင်ရွက်နိုင်ရန် မြို့နယ် (၅)မြို့နယ်ရှိ ဆန်စက်လုပ်ငန်းရှင်များမှ ၎င်းတို့မြို့နယ်အတွင်း သင့်တင့်သော ဈေးနှုန်းဖြင့် ရောင်းချပေးနိုင်ရန်အတွက် တစ်မြို့နယ်လျှင် ဆန်အိတ် (၅၀၀)အိတ်အား သိုလှောင်ထားရှိမည်ဖြစ်ကြောင်း မိုးညိုမြို့နယ်အတွက် လိုအပ်သော ဆန်အိတ် (၃၅၀)အိတ်အား အခြားမြို့နယ်များမှ ကူညီရောင်းချပေးမည်ဖြစ်သည်ကို ဆွေးနွေး ခဲ့ကြကြောင်း သိရှိရပါသည်။
DOCA(ပဲခူး)