အုတ်တွင်းမြို့နယ်၊ ဥယျာဉ်တော်ကျေးရွာသည် တံမြက်စည်း အကြမ်းနှင့် အချောများ ကို မိသားစုတပိုင်တနိုင်လုပ်ငန်းအဖြစ် အသက်မွေးဝမ်းကြောင်းပြုလုပ်ကြသူများ များပြားလှပါသည်။ ဥယျာဥ်တော်ကျေးရွာမှ ထွက်သော တံမြက်စည်းများမှ လက်ရာသေသပ် ကောင်းမွန်ပြီး ခိုင်ခံ့သောကြောင့် ဒေသအတွင်းတွင် ရောင်းအားကောင်းလျက်ရှိပါသည်။
တံမြက်စည်းအချောအတွက် ကုန်ကြမ်းအနေဖြင့် ကြိမ်နှင့် တံမြက်စည်းတံအား အသုံးပြုရပြီး တံမြက်စည်းအကြမ်းအနေဖြင့် အုန်းလက်၊ ဝါး နှင့် အနားကွပ်ရန်အတွက် ကြိမ်ကို အသုံးပြုရပါသည်။ တံမြက်စည်းအချောအတွက် တံမြက်စည်းတံအား ၁ ပိဿာလျှင် ၄၅၀၀ ကျပ်၊ ကြိမ်တစ်ထုပ်လျှင် ၈၀၀၀ ကျပ်ဖြင့် ဝယ်ယူရကြောင်း သိရှိရပါသည်။
ဥယျာဉ်တော်ကျေးရွာမှထွက်သော တံမြက်စည်းများအား ဒေသတွင်း အုတ်တွင်း မြို့နယ်နှင့် အနီးပတ်ဝန်းကျင်ရှိ တောင်ငူ၊ ဖြူး နှင့် ကျောက်တံခါးမြို့နယ်များသို့ ဖြန့်ဖြူးရောင်းချပါသည်။ တံမြက်စည်းဈေးနှုန်းအနေဖြင့် ယခင်က တံမြက်စည်း အချောနှင့် အကြမ်း တစ်ချောင်း ၃၀၀၀ ကျပ်မှ ယခုအခါတွင် တစ်ချောင်းလျှင် ၃၅၀၀ ကျပ်ဖြင့် ဈေးနှုန်းအနည်းငယ် မြင့်တက်သွားကြောင်း သိရှိရပါသည်။
DOCA(ပဲခူး)