![](http://www.doca.gov.mm/sites/default/files/styles/consumer_inner_image__847x424_/public/122_2.png?itok=UpzJ5ovv)
ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့်ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန၏ကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့ နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏ ကြက်သွန်နီလက်ကျန်အခြေအနေတို့ကို အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀)ရုံအား မေးမြန်း ချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေတို့ကို နေ့စဉ် စုံစမ်းလျက်ရှိပါသည်။ ၂၀၂၃ခုနှစ်၊ စက်တင်ဘာလ (၂၃) ရက်နေ့မှ စက်တင်ဘာလ(၂၉) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီဝင်ရောက်ရာဒေသများဖြစ်သည့် ဆိတ်ဖြူ၊ မုံရွာဒေသတို့မှ ကြက်သွန်နီ(၆၁၈၀၀၀) ပိဿာဝင်ရောက်ခဲ့ပြီး (၆၀)ရာခိုင်နှုန်းခန့် ပြန်လည်စီးထွက်မှုရှိကြောင်း ကုန်စည်ဒိုင်သတင်းအရသိရှိရသည်။ ဆိတ်ဖြူကြက်သွန်နီ (အသစ်) အချောတစ်ပိဿာလျှင် ကျပ်၂၅၀၀၊ အသန့်တစ်ပိဿာလျှင် ကျပ်၂၉၀၀၊ အကြီးတစ်ပိဿာလျှင် ကျပ်၃၀၀၀၊ ရှယ်တစ်ပိဿာလျှင် ကျပ်၃၁၀၀ရှိကြောင်းနှင့် မုံရွာကြက်သွန်နီ(အသစ်) အချောတစ်ပိဿာလျှင် ၂၄၀၀၊ အသန့်တစ်ပိဿာလျှင် ကျပ်၂၈၅၀၊ အကြီးတစ်ပိဿာလျှင် ကျပ်၂၉၅၀၊ ရှယ်တစ်ပိဿာလျှင် ကျပ်၃၁၀၀ စသည်ဖြင့် ဈေးနှုန်းအသီးသီးရှိကြောင်း စုံစမ်းသိရှိရပါသည်။
DOCA(ရန်ကုန်)