ကုန်ဈေးနှုန်းမြင့်တက်မှုကြောင့် စားသုံးသူပြည်သူများ ဝန်ထုပ်ဝန်ပိုးမဖြစ်စေရေးနှင့် ဖြစ်သင့်ဖြစ်ထိုက်သည့် ဈေးနှုန်းအတိုင်း ဝယ်ယူရရှိနိုင်ရေးအတွက် ရောင်းသူမှ ဝယ်သူသို့ တိုက်ရိုက်ရောင်းချခြင်းဖြင့် ကရင်ပြည်နယ်အတွင်း ကုန်ဈေးနှုန်းတည်ငြိမ်ရေးနှင့် ကျဆင်းနိုင်စေရန် ကရင်ပြည်နယ်ကုန်ဈေးနှုန်း တည်ငြိမ်ရေးနှင့် ကျဆင်းရေးကော်မတီမှ ဘားအံမြို့ အမှတ်(၃)ရပ်ကွက် ကမ်းနားလမ်းအခွန်လွတ်ဈေးအား ၁၄.၁၀.၂၀၂၃ ရက်နေ့မှစ၍ အပတ်စဉ် စနေနေ့၌ ဖွင့်လှစ်ရောင်းချ ပေးလျက်ရှိကြောင်း သိရသည်။
ဖွင့်လှစ်ရောင်းချပေးလျက်ရှိသော အခွန်လွတ်ဈေးတွင် ကိုယ်တိုင်စိုက်ပျိုး ထုတ်လုပ်သူများနှင့် အသား/ငါးအရောင်းဒိုင်များ စည်ပင်သာယာမှသတ်မှတ်ဈေးနှုန်းဖြင့်ရောင်းချရာတွင် ဝက်သား ၁ပိဿာ၁၂၀၀၀ကျပ်၊ အမဲသား၁ပိဿာ၁၄၀၀၀ကျပ်၊ဆိတ်သား၁ပိဿ၁၇၀၀၀ကျပ်၊ ကြက်သား (အိမ်ကြက်)၁၂၀၀၀ကျပ်၊ ကြက်သား(မွေးမြူရေး) ၁၀၀၀၀ကျပ်၊ မွေးမြူရေးငါးကြင်း ၁ပိဿာ ၈၀၀၀ကျပ်၊ ချောင်းငါးကြင်း၁ပိဿာ၁၂၀၀၀ကျပ်၊ ငါးတန် ၁ပိဿာ၆၀၀၀ကျပ်၊ ပလာတူး၁ပိဿာ ၆၀၀၀ကျပ်၊ ဘဲဥ၁လုံး၃၀၀ကျပ်၊ကြက်ဥ၁လုံး၂၅၀ကျပ်၊ကန်စွန်းရွက်၁စည်း ၂၀၀ကျပ်၊ ချဉ်ပေါင်ရွက် ၁စည်း ၂၀၀ကျပ်၊ ဂေါ်ဖီထုပ် ၁ထုပ် ၅၀၀ကျပ်၊ခရမ်းချဉ်သီး ၁ပိဿာ ၁၀၀၀ကျပ်၊ စားသုံးဆီ ၁ပိဿာ ၄၉၅၀ကျပ်နှင့် ဧည့်မထ/မနှောသုခဆန် ၁ပြည် ၂၇၀၀ကျပ်စသည့်ဖြင့် စားသုံးသူပြည်သူများထံ ဈေးနှုန်းချိုသာစွာဖြင့် တိုက်ရိုက် ရောင်းချပေးလျက်ရှိကြောင်း သိရသည်။
အဆိုပါအခွန်လွတ်ဈေးများ ဖွင့်လှစ်ရောင်းချပေးခြင်းဖြင့် ကိုယ်တိုင်စိုက်ပျိုးထုတ်လုပ်သူများအနေဖြင့် ဝယ်သူများထံသို့ ကြားပွဲစားမခံဘဲ တိုက်ရိုက်ရောင်းချနိုင်သောကြောင့် သီးနှံ၊ အသား/ငါး ထုတ်လုပ်ရောင်းချမှုအပေါ် အမြတ်အစွန်းပိုမိုရရှိနိုင်မည်ဖြစ်ပြီး စားသုံးသူပြည်သူများအနေဖြင့်လည်း ဈေးနှုန်းသက်သာစွာဖြင့် တိုက်ရိုက်ဝယ်ယူနိုင်သောကြောင့် နေ့စဉ်စားသောက်ရေးအတွက် ကုန်ကျစရိတ်အပေါ်ကာမိကာ ကုန်ဈေးနှုန်းအဆမတန်ကြီးမြင့်မှုကြောင့် လှုမှုစီးပွားဘဝ ရိုက်ခတ်မှု လျော့နည်းသက်သာလာမည်ဖြစ်ကြောင်း သိရသည်။အဆိုပါကမ်းနားလမ်း အခွန်လွတ်ဈေးအား ပြည်နယ်အစိုးရအဖွဲ့၏ လမ်းညွှန်မှုဖြင့် (၁၄.၁၀.၂၀၂၃)ရက်နေ့ နံနက်(၀၆:၀၀)နာရီတွင် စတင်ဖွင့်လှစ်ခဲ့၍ ကမ်းနားလမ်းအခွန်လွတ်ဈေးကို ပြည်နယ်အစိုးအရအဖွဲ့၊ ဆက်စပ်ဌာနအဖွဲ့များ၊ စားသုံးသူရေးရာဦးစီးဌာနနှင့်ပြည်သူလူထုတို့မှ ဝယ်ယူအားပေး ကြည့်ရှု့ခဲ့ကြောင်း သတင်းရရှိပါသည်။
DOCA(ကရင်)