![](http://www.doca.gov.mm/sites/default/files/styles/consumer_inner_image__847x424_/public/စပါး_2.jpg?itok=9TDE3jgN)
ဖျာပုံခရိုင် စားသုံးသူရေးရာဦးစီးဌာနမှ ခရိုင်ဦးစီးမှူးနှင့် မြို့နယ်တာဝန်ခံတို့သည် ၂၀၂၁ ခုနှစ်၊ ဒီဇင်ဘာလ(၂၃)ရက်နေ့လည်(၁၃:၀၀)နာရီတွင် ဖျာပုံမြို့နယ် အောက်ကွင်းကျေးရွာနှင့် မှော်ဘီကျေးရွာ များသို့ကွင်းဆင်းခဲ့ကြရာ ကောက်ညှင်းစပါးရိတ်သိမ်းနေမှုကို တွေ့ရှိသဖြင့် ဈေးနှုန်း၊ ဈေးကွက်အခြေ အနေများကိုမေးမြန်းရာ-
“ ကျွန်တော်မှာလယ်(၅၀)ဧကရှိပါတယ် ၊ အားလုံးစိုက်ခင်းတွေပါ ၊ ကောက်ညှင်း( ၃၀ )ဧက၊ ပေါ်ဆန်းရင်(၂၀)ဧကစိုက်ပါတယ်။ ကောက်ညှင်းတစ်ဧကကို (၅၀)တင်းခန့်ထွက်ပြီး တစ်ဧက ကုန်စရိတ်သုံးသိန်းကျပ်နီးပါးခန့်ရှိပါတယ်။ အခုလက်ရှိကွင်းပေါက်ဈေးကတော့ပေါင်(၅၀)ကိုက် တင်း(၁၀၀)ကို ကျပ်ကိုးသိန်း၊ ဆန်စက်အရောက်ဈေးကတော့ ကျပ်ကိုးသိန်းနှစ်သောင်းပါ၊ အစိုဓာတ်(၁၅/၁၆)မှတ်ပေါ့၊ မနှစ်ကအခုချိန်ပေါက်ဈေးဆိုရင်ကျပ်ခြောက်သိန်းလောက်ပဲရှိပါတယ်။ ဒီနှစ်ကောက်ညှင်းဈေးကွက်အနေနဲ့ ရန်ကုန်အဝယ်လိုက်သလိုဈေးလည်းရပါတယ်၊ ဈေးတက် ဖို့ရှိလားဆိုတော့ နှစ်စဉ်ဖေဖော်ဝါရီလကုန်၊ မတ်လထဲမှာဈေးတက်နေကြပါ ၊ လယ်သမားကြီးတွေကဒီအချိန်မှာ ထုတ်မရောင်းပဲလှောင်ထားကြတယ်။ နွေစပါးပေါ်ချိန်လောက်ဆို ထုတ်ရောင်းလေ့ရှိပါတယ်၊မနှစ်ကနောက်ဆုံးဈေးက ကျပ်ဆယ်သိန်းလောက်ဖြစ်သွားတာဆိုတော့ ဒီနှစ်မှာတစ်ဆယ့်သုံးသိန်း၊ တစ်ဆယ့်လေးသိန်းဈေးလောက်ဖြစ်သွားနိုင်တယ်လို့ ခန့်မှန်းရတာပဲ၊ ကောက်ညှင်းသန့်လေဈေးပိုရလေပါပဲ”လို့မှော်ဘီကျေးရွာမှ တောင်သူဦးသန်းလွင်က ပြောသည်။ ဖျာပုံမြို့နယ်တွင် ၂၀၂၀-၂၀၂၁ ခုနှစ် မိုးရာသီကောက်ညှင်းစိုက်ဧက(၁၅၀၂၆)ဧကစိုက်ပျိုးပြီး ၂၀၂၁-၂၀၂၂ခုနှစ်တွင် စိုက်ဧက( ၁၁၀၅၆ )ဧကစိုက်ပျိုးသဖြင့် ယခင်နှစ်ထက်ကောက်ညှင်းစိုက် ဧက( ၃၉၇၀ )ဧကလျော့နည်းစိုက်ပျိုးလျက်ရှိကာယခုနှစ် ကောက်ညှင်းစိုက်တောင်သူများမှာ ယခင်နှစ်ထက်ဈေးပိုမိုရရှိကြောင်းသိရသည်။
စားသုံးသူရေးရာဦးစီးဌာန
ဧရာဝတီတိုင်းဒေသကြီး