ပဲခူးတိုင်းဒေသကြီး၊ ပြည်ခရိုင်၊ မှော်ဇာအုပ်စု၊ စျေးရပ်ကျေးရွာသို့ ပြည်မြို့နယ် တာဝန်ခံ နှင့်အဖွဲ့သည် (၁၃.၁.၂၀၂၂) ရက်နေ့ နံနက် (၉:၀၀)နာရီတွင် အောင်မြင်ဖြစ်ထွန်းနေသော ဟင်းသီး ဟင်းရွက်စိုက်ခင်းများနှင့် တင်ပို့ရောင်းချသည့် နေရာများသို့ ကွင်းဆင်းလေ့လာခဲ့ပါသည်။
ထိုသို့ကွင်းဆင်းလေ့လာရာတွင် မှော်ဇာကျေးရွာအုပ်စု၊ စျေးရပ်ကျေးရွာရှိ ဟင်းသီးဟင်းရွက် အဝယ်ဒိုင်ပိုင်ရှင် ဒေါ်စုနိုင်ထွေး၏ ပြောကြားချက်အရ မှော်ဇာအုပ်စုတွင် ကျေးရွာခွဲ (၁၅)ရွာရှိပြီး ဟင်းသီးဟင်းရွက် စိုက်ပျိုးထုတ်လုပ်သည့် ကျေးရွာ (၅)ရွာရှိရာ ရာသီအလိုက်ဟင်းသီးဟင်းရွက်များအပြင် မုန်လာဥ၊ ကြက်သွန်နီ၊ သခွားသီး၊ ပြောင်းဖူးနှင့် ဒေါနပန်းများကိုလည်း စိုက်ပျိုးကြောင်းသိရှိရပါကြောင်း၊ စိုက်ပျိုးထွက်ရှိသည့် ရာသီအလိုက် ဟင်းသီးဟင်းရွက်များကို မှော်ဇာအုပ်စုရှိ ဟင်းသီးဟင်းရွက် အဝယ်ဒိုင် (၆)ခုသို့ သွားရောက်ရောင်းချကြပါသည်။ ဟင်းသီးဟင်းရွက်အဝယ်ဒိုင်များမှာ ဟင်းသီး ဟင်းရွက်စိုက်ပျိုးသော တောင်သူများထံမှ အခင်းပြတ်ဝယ်ယူခြင်းဖြင့်လည်းကောင်း၊ မျိုး၊ စိုက် စရိတ် ကြိုတင်ငွေပေးခြင်းဖြင့်းလည်းကောင်း၊ ပွဲစားများထံမှလည်းကောင်း ဒိုင်အရောက်လာ ရောက် ရောင်းချကြသည့် တောင်သူများထံမှလည်းကောင်း သီးနှံပေါက်စျေးအလိုက်ဝယ်ယူ၍ သီရိမင်္ဂလာစျေးနှင့် ဒညင်းကုန်းစျေးများသို့ တင်ပို့ရောင်းချကြောင်း လေ့လာသိရှိရပါသည်။
ဟင်းသီးဟင်းရွက်စျေးနှုန်းများမှာ မုန်လာဥ(၅)လုံးပါ တစ်တွဲလျှင် (၂၅၀)ကျပ်၊ ပြောင်းဖူး တစ်ဖူးလျှင် (၁၅၀-၂၀၀)ကျပ်၊ ကြက်သွန်နီတစ်ပိဿာလျှင် (၅၀၀)ကျပ် နှင့် သခွားသီး တစ်လုံးလျှင် (၁၀၀)ကျပ်ဖြင့်ရောင်းချလျှက်ရှိပါသည်။ ဟင်းသီးဟင်းရွက်သည် စားသုံးသူများ၏ နေ့စဉ်ဝယ်ယူ ချက်ပြုတ်စားသောက်သည့် သီးနှံများဖြစ်သဖြင့် ဟင်းသီးဟင်းရွက်စိုက်တောင်သူများအနေဖြင့် နေ့စဉ်ဝင်ငွေလည်းရ၊ စားသုံးသူများမှာလည်း ရာသီစာသီးနှံမျာကို ၁၂လရာသီ သုံးစွဲနိုင်မည်ဖြစ် ကြောင်းသိရှိရပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)