အင်ဒိုနီးရှားနိုင်ငံ၌ အစိုးရ၏ အရန်ဆန်ထားရှိမှုသည် ၂ဝ၂၃ ခုနှစ် ခရစ် စမတ်ကာလနှင့် ၂ဝ၂၄ ခုနှစ် နှစ်သစ်ကူးရုံးပိတ်ရက်များအတွင်း ပြည်သူများ၏ လိုအပ်မည့်ပမာဏကို ပြည့်မီ လုံလောက်မှုရှိကြောင်း နိုင်ငံပိုင်ထောက်ပံ့ပို့ဆောင်ရေးအေဂျင်စီဖြစ်သော ဘူးလော့ (Bulog) အဖွဲ့ က ပြောကြားခဲ့ပါသည်။
၁၅-၁၂-၂၀၂၃ ရက်နေ့၌ သတင်းစာရှင်းလင်းပွဲ ပြုလုပ်ရာတွင် ဘူးလော့အဖွဲ့၏ ပြည်သူ့ ဆက်ဆံရေးနှင့် အဖွဲ့အစည်းဆိုင်ရာ မန်နေဂျာဖြစ်သူ Tomi Wijaya က ၎င်းတို့၏ သိုလှောင်ရုံများတွင် ဆန်သိုလှောင်ထားရှိမှုမှာ တန်ချိန် ၁.၄ သန်းရှိကြောင်း၊ ကာလရှည် ရုံးပိတ်ရက်ကာလများ အတွင်း ဆန်ဖူလုံမှုရှိစေရန် ပြည်ပမှတင်သွင်းရရှိလာသည့် ဆန်များကိုလည်း ထပ်မံထည့်သွင်း သွားမည်ဖြစ်ကြောင်း၊ ပြည်သူများအတွက် ဆန်ဈေးနှုန်းတည်ငြိမ်စေရန် ထိန်းသိမ်းဆောင်ရွက်မှု အနေဖြင့် ဆန်တန်ချိန် ၁.၄ သန်းကို ကူညီထောက်ပံ့ဖြန့်ဖြူးရေးအတွက် အသုံးပြုမည်ဖြစ်ပြီး ၂ဝ၂၄ ခုနှစ်တိုင်အောင် ဆောင်ရွက်သွားမည်ဖြစ်ကြောင်း၊ အစိုးရက ဆန်တန်ချိန် ၁.၅ သန်း တင် သွင်းရန် လုပ်ကိုင်ခွင့်ပြုထားသည့်အနက်မှ တန်ချိန် ၁ သန်းအတွက် ဆန်ထွက်ရှိမှုမြင့်မားသည့် ထိုင်း၊ ဗီယက်နမ်၊ ပါကစ္စတန်၊ မြန်မာနှင့် ကမ္ဘောဒီးယားနိုင်ငံများနှင့် စာချုပ်များ ချုပ်ဆိုထားပြီး ဖြစ်ကြောင်း၊ ထို့အပြင် အိန္ဒိယနှင့် အခြားနိုင်ငံများထံမှလည်း ဆန်တင်သွင်းနိုင်မည့် အခွင့်အလမ်းများကို လေ့လာဆောင်ရွက်မည်ဖြစ်ကြောင်း ပြောကြားခဲ့ပါသည်။
အင်ဒိုနီးရှား အမျိုးသားစားနပ်ရိက္ခာအေဂျင်စီသည် ပြည်တွင်း၌ ဆန်ဈေးနှုန်းများ မြင့်တက်မှုအပေါ် လက်ဦးမှုရယူပြင်ဆင်မှုအဖြစ် စားနပ်ရိက္ခာ ကူညီပံ့ပိုးဖြန့်ဖြူးမှု အစီအစဉ်နှင့် ဈေးနှုန်းသက်သာစွာ ရောင်းချခြင်းဖြင့် စားနပ်ရိက္ခာထောက်ပံ့မှုနှင့် ဈေးနှုန်းတည်ငြိမ်ရေး ဖော်ဆောင်မှု အစီအစဉ်တို့ကို ဘူးလော့အဖွဲ့သို့ တာဝန်ပေးဆောင်ရွက်စေခဲ့ကြောင်း၊ ၂၀၂၃ ခုနှစ်အတွင်း ဘူးလော့အဖွဲ့သည် စုစုပေါင်း ဆန်တန်ချိန် ၁.၄ သန်းကို ထောက်ပံ့မှုအဖြစ် ဖြန့်ဖြူးပေးခဲ့ကြောင်း အစိုးရအနေဖြင့် ၂ဝ၂၄ ခုနှစ် မတ်လအထိ ဆန်ထောက်ပံ့ဖြန့်ဖြူးမှု အစီအစဉ်ကို ဆောင်ရွက်သွားမည်ဟု သမ္မတ Joko Widodo က ၁၄-၁၂-၂၀၂၃ နေ့တွင် ပြောကြားခဲ့ကြောင်း သိရှိရပါသည်။
Source: Antara News, 15 Dec 2023(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)