ပြည်ပကုန်သွယ်မှုသတင်းများ

         မေလအတွင်း နဂါးမောက်သီး အမျိုးအစားအချို့မှာ တစ်ကီလိုဂရမ်လျှင် ဗီယက်နမ်ဒေါင် ၃,၀၀၀ မှ ၅,၀၀၀ အထိ စံချိန်တင် လျော့ကျခဲ့ပြီးနောက် ယခုအခါ နဂါးမောက်သီး စျေးနှုန်းမှာ ၁၄,၀၀၀ မှ ၂၀,၀၀၀ အထိ ပြန်လည်မြင့်တက်လာခဲ့သဖြင့် တောင်သူများ အမြတ်အစွန်း ရရှိနေပြီ ဖြစ်သည်။

        စျေးကွက်အတွင်း လေ့လာစုံစမ်းချက်များအရ လက်လီနှင့် စိုက်ပျိုးရေး စျေးကွက်နှစ်ခုလုံးတွင် နဂါးမောက်သီး စျေးနှုန်းများမှာ မကြာသေးမီက ပြန်လည်မြင့်တက်လာကြောင်း သိရသည်။ သစ်သီးဆိုင်များတွင် အဆင့် (၁) အနီရောင် နဂါးမောက်သီးကို တစ်ကီလိုဂရမ်လျှင် ဗီယက်နမ်ဒေါင် ၃၅,၀၀၀ မှ ၄၀,၀၀၀ ဖြင့် ရောင်းချနေပြီး အဖြူရောင် နဂါးမောက်သီးမှာမူ ၂၀,၀၀၀ မှ ၂၅,၀၀၀ ဝန်းကျင်ရှိရာ မေလအတွင်း အနိမ့်ဆုံး စျေးနှုန်းများနှင့် ယှဉ်ပါက နှစ်ဆနီးပါး မြင့်တက်လာခြင်းဖြစ်ကြောင်း သိရသည်။

       ပင်မစိုက်ပျိုးရာ ဒေသတစ်ခုဖြစ်သည့် Binh Thuan တွင် အဆင့် (၁) အဖြူရောင် နဂါးမောက်သီးကို တစ်ကီလိုဂရမ်လျှင် ဗီယက်နမ်ဒေါင် ၁၄,၀၀၀ မှ ၁၅,၀၀၀ ဖြင့် ဝယ်ယူနေပြီး အနီရောင် နဂါးမောက်သီးမှာ ၁၉,၀၀၀ မှ ၂၀,၀၀၀ အထိ ရရှိနေသည်။ အရင်းအောက် လျှော့ရောင်းခဲ့ရသည့် လပေါင်းများစွာ ကြုံတွေ့ခဲ့ရပြီးနောက် ယခုစျေးနှုန်းများကြောင့် တစ်ကီလိုဂရမ်လျှင် ဗီယက်နမ်ဒေါင် ၃,၀၀၀ မှ ၄,၀၀၀ ဝန်းကျင် အမြတ်ရရှိနေပြီဖြစ်ကြောင်း တောင်သူများစွာက ပြောကြားကြောင်း သိရသည်။

      Binh Thuan ဒေသမှ နဂါးမောက်သီး ကုန်သည်တစ်ဦးဖြစ်သူ Mr. Xuan ၏ အဆိုအရ မကြာသေးမီက မိုးဆက်တိုက်ရွာသွန်းမှုကြောင့် ထွက်ရှိမှုပမာဏမှာ လွန်ခဲ့သည့်နှစ် ကာလတူထက် ၁၀ ရာခိုင်နှုန်းခန့် လျော့ကျသွားကြောင်း သိရသည်။ တစ်ဖက်တွင်မူ သီးနှံများအတွက် ဝယ်လိုအားမှာ တည်ငြိမ်နေပြီး စိုက်ပျိုးထုတ်လုပ်မှု နည်းပါးသည့် အချိန်နှင့်လည်း ကြုံကြိုက်နေသဖြင့် ရောင်းလိုအား အဆမတန်လျော့နည်းကာ လပေါင်းများစွာ စျေးကျဆင်းခဲ့ပြီးနောက် စျေးနှုန်းများပြန်လည်မြင့်တက်လာခြင်းဖြစ်ကြောင်း သိဲရသည်။

       ပြည်ပပို့ကုန် စျေးကွက်များမှ ဝယ်လိုအားမှာ အားကောင်းနေဆဲဖြစ်သော်လည်း မိုးဆက်တိုက်ရွာသွန်းမှုက အသီး၏ အရည်အသွေးကို ထိခိုက်စေကာ ငြင်းပယ်ခံရသည့် ရာခိုင်နှုန်းကို မြင့်တက်စေပြီး စံချိန်စံညွှန်းမီသည့် ပို့ကုန်ပမာဏကို လျော့နည်းစေကြောင်း သိရသည်။

          အကောက်ခွန်ဆိုင်ရာ ဒေတာများအရ ၂၀၂၆ ခုနှစ် ပထမ ၆ လအတွင်း နဂါးမောက်သီး ပြည်ပတင်ပို့မှုမှာ အမေရိကန်ဒေါင် ၂၈၀ မီလီယံ ရှိခဲ့ပြီး လွန်ခဲ့သည့်နှစ် ကာလတူထက် ၃ ရာခိုင်နှုန်း နီးပါး လျော့နည်းသွားခဲ့သည်။ ပို့ကုန်တန်ဖိုး လျော့ကျသွားရခြင်းမှာ ကာလရှည် စျေးနှုန်းကျဆင်းမှုကြောင့် တောင်သူများ စိုက်ပျိုးမှုနှင့် ပြုစုပျိုးထောင်မှု လျှော့ချခဲ့၍ ထွက်နှုန်းနည်းသွားကာ ရောင်းလိုအား လျော့ကျခဲ့ခြင်းဖြစ်သည်။ ထို့အပြင် မကောင်းမွန်သော ရာသီဥတု အခြေအနေများကြောင့်လည်း ပို့ကုန်စံချိန်မီသည့် အသီးရာခိုင်နှုန်း နည်းပါးသွားပြီး ပြည်ပသို့တင်ပို့သည့် ကုန်စည်ပမာဏကို ထိခိုက်စေခဲ့ကြောင်း သိရှိရပါသည်။

Source : VN Express                                                                           

DOCA (ရန်ကုန်)

           အော်ဒါအသစ်များရရှိမှု အားကောင်းလာခြင်းကြောင့် ဇူလိုင်လအတွင်း ထိုင်းနိုင်ငံ၏ ထုတ်လုပ်မှုပမာဏသည် ၂၀၂၆ ခုနှစ်အတွင်း အမြင့်ဆုံးအဆင့်သို့ မြင့်တက်ခဲ့ပြီး ထုတ်လုပ်မှုကဏ္ဍ တိုးတက်မှုလည်း ဆက်လက်အရှိန်ရလာခဲ့ကြောင်း သြဂုတ်လ ၃ ရက်နေ့တွင် ထုတ်ပြန်သည့် စာရင်းဇယားများအရ သိရသည်။

         S&P Global ၏ ထုတ်ပြန်ချက်အရ အရှေ့တောင်အာရှနိုင်ငံတစ်ခုဖြစ်သည့် ထိုင်းနိုင်ငံ၏ ထုတ်လုပ်မှုကဏ္ဍ ဝယ်ယူရေးမန်နေဂျာများညွှန်းကိန်း (PMI) သည် ဇွန်လတွင် ၅၃.၆ ရှိခဲ့ရာမှ ဇူလိုင်လတွင် ၅၄.၂ သို့ ရောက်ရှိခဲ့ပြီး လွန်ခဲ့သည့် ဒီဇင်ဘာလနောက်ပိုင်း အမြန်ဆုံးနှုန်းထားသို့ ရောက်ရှိလာခဲ့ရာ လုပ်ငန်းလည်ပတ်မှု အခြေအနေများ ယေဘုယျအားဖြင့် တိုးတက်ကောင်းမွန်လာသည်ကို ညွှန်ပြနေသည်။

          PMI ညွှန်းကိန်း ၅၀ ထက်ကျော်လွန်ပါက ကုန်စည်ထုတ်လုပ်သည့်ကဏ္ဍ တိုးတက်မှုကို ညွှန်ပြပြီး ၅၀ အောက်ရောက်ရှိပါက ဆုတ်ယုတ်မှုကို ဖော်ပြသည်။ လေးလတာကာလအတွင်း အမြန်ဆုံးနှုန်းထားဖြင့် အော်ဒါအသစ်များ တိုးတက်ဝင်ရောက်လာခြင်းက ထိုင်းထုတ်လုပ်သူများ ကြုံတွေ့နေရသည့် အခြေခံဝယ်လိုအား အခြေအနေများ ဘက်ပေါင်းစုံမှ ကောင်းမွန်လာသည်ကို ညွှန်ပြနေသည်။ စာရင်းဇယားကောက်ယူခဲ့သည့် ကုမ္ပဏီများက ဝယ်ယူသူပိုမိုများပြားလာခြင်းနှင့် အော်ဒါအမှာစာပမာဏ ပိုမိုကြီးမားလာခြင်းတို့ကို သတင်းပို့ခဲ့ကြကြောင်း S&P Global က ထုတ်ပြန်ချက်တွင် ပြောကြားခဲ့သည်။

           S&P Global Market Intelligence ၏ စီးပွားရေးဆိုင်ရာ တွဲဖက်ဒါရိုက်တာ Phil Smith က ကုန်ကြမ်းနှင့် အထွေထွေကုန်ကျစရိတ်များ ပြောင်းလဲမှုမရှိသလောက် နည်းပါးသော်လည်း ထွက်ရှိလာသည့် ကုန်စည်စျေးနှုန်းများမှာ လေးလဆက်တိုက် မြင့်တက်ခဲ့သည်။ ကောင်းမွန်သော ဝယ်လိုအားအခြေအနေများကြောင့် လုပ်ငန်းများအနေဖြင့် အမြတ်ရာခိုင်နှုန်းကို မြှင့်တင်နိုင်ခဲ့ကြောင်း သိရှိရပါသည်။

Source : Xinhua                                                                                   

DOCA (ရန်ကုန်)

       အင်ဒိုနီးရှားကုန်သည်များနှင့် စက်မှုလက်မှုလုပ်ငန်းရှင်များအသင်း (Kadin) သည် မဟာဗျူဟာမြောက် ပူးပေါင်းဆောင်ရွက်မှုများမှတစ်ဆင့် စိုက်ပျိုးရေးထွက်ကုန်များနှင့် အသေးစား၊ အငယ်စားနှင့် အလတ်စားစီးပွားရေးလုပ်ငန်းများ (MSME) ၏ ထုတ်ကုန်များကို ဂျပန်နိုင်ငံသို့ ပိုမိုတင်ပို့နိုင်ရေး ကြိုးပမ်းဆောင်ရွက်လျက်ရှိကြောင်း သိရပါသည်။ Kadin ၏ စိုက်ပျိုးရေးကဏ္ဍ ဆိုင်ရာဒုတိယဥက္ကဋ္ဌ Devi Erna Rachmawati က ဂျပန်နိုင်ငံသည် အရည်အသွေးမြင့်ပြီး သဘာဝပတ်ဝန်းကျင်နှင့် လိုက်လျောညီထွေဖြစ်သော စိုက်ပျိုးရေးထွက်ကုန်များအပေါ် ဝယ်လိုအားမြင့်မားနေသဖြင့် အလွန်အရေးပါသည့် ဈေးကွက်တစ်ခုအဖြစ် ဆက်လက်တည်ရှိနေကြောင်း ပြောကြားခဲ့ပါသည်။ အဆိုပါအခွင့်အလမ်းကို အပြည့်အဝအသုံးချနိုင်ရန် Kadin ၏ နှစ်နိုင်ငံ ဆက်ဆံရေးကော်မတီသည် တိုကျိုမြို့တော် အသေးစားနှင့် အလတ်စားစီးပွားရေးလုပ်ငန်း အထောက်အပံ့ပေးရေးဗဟိုဌာနနှင့် ဂျပန်စီးပွားရေးမိတ်ဖက်များနှင့် ဇူလိုင် ၃၁ ရက်တွင် တိုကျိုမြို့၌ တွေ့ဆုံဆွေးနွေးခဲ့ကြောင်း ဩဂုတ် ၃ ရက်တွင် ထုတ်ပြန်သည့် ကြေညာချက်၌ ဖော်ပြထားပါသည်။ Rachmawati က အဆိုပါတိုကျိုဆွေးနွေးပွဲသည် အင်ဒိုနီးရှားလုပ်ငန်းရှင်များ ဂျပန်ဈေးကွက်သို့ဝင်ရောက်နိုင်ရေးအတွက် ထုတ်ကုန်အရည်အသွေးမြှင့်တင်ခြင်း၊ သတ်မှတ်စံချိန်စံညွှန်းများနှင့် ကိုက်ညီစေရေး၊ လိုအပ်သည့်အသိအမှတ်ပြုလက်မှတ်များရရှိရေး၊ စီးပွားရေးမိတ်ဖက်များနှင့် ချိတ်ဆက်ပေးရေး၊ ဖြန့်ဖြူးရေးကွန်ရက်များ အားကောင်းလာစေရေးတို့ကို ပူးပေါင်းဆောင်ရွက်ပေးမည့် စင်မြင့်တစ်ခုဖြစ်ကြောင်း ပြောကြားသည်။ ထိုပူးပေါင်းဆောင်ရွက်မှုသည် အင်ဒိုနီးရှား Kadin အနေနှင့် နိုင်ငံ့ပို့ကုန်မြှင့်တင်ရေးအတွက် လက်တွေ့ကျကျ ကတိကဝတ်ပြုဆောင်ရွက်နေသည်ကို ထင်ဟပ်စေကြောင်း၊ အရည်အသွေးမြှင့်တင်ရေး၊ ဆန်းသစ်တီထွင်မှုနှင့် ရေရှည်တည်တံ့သည့် စီးပွားရေးမိတ်ဖက်ပူးပေါင်းဆောင်ရွက်မှုများမှတစ်ဆင့် အင်ဒိုနီးရှား MSME နှင့် စိုက်ပျိုးရေးထွက်ကုန်များ ဂျပန်ဈေးကွက်တွင် ယှဉ်ပြိုင်နိုင်စွမ်း ရှိလာစေရန်ရည်ရွယ်ကြောင်း ၎င်းက ပြောကြားခဲ့ပါသည်။ Kadin အဖွဲ့ဝင် စိုက်ပျိုးရေးလုပ်ငန်းများအနေဖြင့် ကနဦးအဆင့်တွင် တန်ဖိုးမြင့်စိုက်ပျိုးရေးထွက်ကုန်များဖြစ်သည့် Tempeh၊ Cocopeat စိုက်ပျိုးမြေကြားခံပစ္စည်းဖြင့် စိုက်ပျိုးထားသော ဥယျာဉ်ခြံထွက်ကုန်များနှင့် ရေရှည်တည်တံ့သော စိုက်ပျိုးရေးကို အထောက်အကူပြုသည့် အော်ဂဲနစ်မြေဩဇာတို့ကို ဦးစားပေးတင်ပို့သွားမည်ဖြစ်ကြောင်း သိရပါသည်။ ယခုပူးပေါင်းဆောင်ရွက်မှုသည် ကုန်သွယ်ရေးတိုးချဲ့ခြင်းအပြင် ရင်းနှီးမြှုပ်နှံမှု အခွင့်အလမ်းများ ဖန်တီးပေးခြင်း၊ နည်းပညာလွှဲပြောင်းပေးခြင်း၊ ကုန်ကြမ်းအခြေပြု ထုတ်လုပ်မှုကဏ္ဍ ဖွံ့ဖြိုးတိုးတက်စေခြင်းနှင့် အင်ဒိုနီးရှား MSME များ ကမ္ဘာ့ဈေးကွက် စံချိန်စံညွှန်းများနှင့် ကိုက်ညီစေရန် စွမ်းဆောင်ရည်မြှင့်တင်ရေး အစီအစဉ်များ အကောင်အထည်ဖော်နိုင်ရေးတို့အတွက်လည်း အထောက်အကူပြုမည်ဟု မျှော်လင့်ထားကြောင်း သိရပါသည်။ အဆိုပါ မိတ်ဖက်ပူးပေါင်းဆောင်ရွက်မှုသည် နိုင်ငံတကာကုန်သွယ်မှုတိုးချဲ့ခြင်း၊ MSME များ အားကောင်းလာစေခြင်းနှင့် စိုက်ပျိုးရေးကဏ္ဍကို ခေတ်မီဖွံ့ဖြိုးတိုးတက်စေခြင်း တို့မှတစ်ဆင့် နိုင်ငံ၏စီးပွားရေးဖွံ့ဖြိုးတိုးတက်မှုနှင့် ကမ္ဘာ့ဈေးကွက်ယှဉ်ပြိုင်နိုင်စွမ်း မြှင့်တင်ရေးကို Kadin က အခိုင်အမာထောက်ခံဆောင်ရွက်နေကြောင်း ပြသနေသည်ဟု ၎င်းက ပြောကြားခဲ့ပါသည်။ ထို့ပြင် တိုကျိုမြို့တော် အသေးစားနှင့် အလတ်စားစီးပွားရေးလုပ်ငန်း အထောက်အပံ့ပေးရေးဗဟိုဌာနနှင့် ပိုမိုခိုင်မာသော ပူးပေါင်းဆောင်ရွက်မှုများမှတစ်ဆင့် အင်ဒိုနီးရှား စွန့်ဦးတီထွင်လုပ်ငန်းရှင်များ ပိုမိုများပြားစွာ ဂျပန်ဈေးကွက်သို့ ဝင်ရောက်နိုင်မည်ဟု မျှော်လင့်ကြောင်း ပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)

       အင်ဒိုနီးရှားနိုင်ငံ East Nusa Tenggara ပြည်နယ် East Sumba ခရိုင်၌ အကောင်အထည် ဖော်နေသည့် အမျိုးသားမဟာဗျူဟာစီမံကိန်းဖြစ်သော Waingapu ပေါင်းစည်းပုစွန်မွေးမြူရေး စီမံကိန်းသည် အလုပ်အကိုင် ၇,၀၀၀ ခန့် ဖန်တီးပေးနိုင်ပြီး နှစ်စဉ် ပုစွန်တန်ချိန် ၅၂,၀၀၀ ခန့် ထုတ်လုပ်နိုင်မည်ဟု အင်ဒိုနီးရှားအစိုးရက ခန့်မှန်းထားကြောင်း သိရပါသည်။ အစားအသောက် ရေးရာညှိနှိုင်းရေးဝန်ကြီး Zulkifli Hasan က ပေါင်းစည်းပုစွန်မွေးမြူရေးဇုန် ဖွံ့ဖြိုးတိုးတက်ရေးသည် နိုင်ငံ၏စားနပ်ရိက္ခာဖူလုံရေးကို မြှင့်တင်ပေးရုံသာမက အင်ဒိုနီးရှားအရှေ့ပိုင်းဒေသရှိ ပြည်သူများအတွက် စီးပွားရေးအခွင့်အလမ်းသစ်များ ဖန်တီးပေးရန်ရည်ရွယ်သည့် အစိုးရ၏ ကြိုးပမ်းမှုတစ်ရပ်ဖြစ်ကြောင်း ဇူလိုင်လ ၃၁ ရက်နေ့တွင် ထုတ်ပြန်သည့်ကြေညာချက်၌ ဖော်ပြခဲ့ပါသည်။ ဧရိယာ ဟက်တာ ၂,၁၅၀ ကျယ်ဝန်းသည့် အဆိုပါပုစွန်မွေးမြူရေးဇုန်သည် အစာနှင့် မျိုးပုစွန်ဖြန့်ဖြူးရေး၊ ပုစွန်မွေးမြူရေးနှင့် ပြုပြင်ထုတ်လုပ်ရေးလုပ်ငန်းစဉ်တစ်လျှောက် အလုပ်အကိုင် ၇,၀၀၀ ခန့် ဖန်တီးပေးနိုင်မည်ဖြစ်ကြောင်း သိရပါသည်။ ထို့ပြင် ဒေသခံလုပ်သား ၃,၀၀၀ ခန့် ခန့်အပ်ရန် လက်ရှိတွင် စတင်ဆောင်ရွက်နေပြီး ရွေးချယ်ခံရသူများအား စီမံကိန်းကို ထိရောက်စွာလည်ပတ်နိုင်စေရန် သင်တန်းများပို့ချပေးသွားမည်ဖြစ်ကြောင်းလည်း သိရပါသည်။ Waingapu စီမံကိန်းသည် နှစ်စဉ်ထုတ်လုပ်မှုတန်ဖိုး အင်ဒိုနီးရှားရူပီး လေးထရီလီယံ (အမေရိကန်ဒေါ်လာ ၂၂၁.၄၃ သန်းခန့်) ဖန်တီးပေးနိုင်မည်ဖြစ်ပြီး အစိုးရက ဖွံ့ဖြိုးတိုးတက်ရေး ရင်းနှီးမြှုပ်နှံမှုအဖြစ် ရူပီး ၇.၂ ထရီလီယံ (အမေရိကန်ဒေါ်လာ ၃၉၈.၅၈ သန်းခန့်) ထည့်ဝင်ထားကြောင်း သိရပါသည်။ အဆိုပါပေါင်းစည်းမွေးမြူရေးဇုန်တွင် ပုစွန်မွေးကန်များ၊ စွန့်ပစ်ရေ သန့်စင်ရေးစနစ်များ၊ ရေလှောင်ကန်များနှင့် စိမ်းလန်းစိုပြည်ရေးဧရိယာများပါဝင်မည်ဖြစ်ကြောင်း သိရပါသည်။ Hasan က အစိုးရအနေဖြင့် ပုစွန်မွေးကန်များ၊ လမ်းပန်းဆက်သွယ်ရေး၊ ရေသွင်း မြောင်းများနှင့် လိုအပ်သည့်အထောက်အကူပြုအဆောက်အအုံများကို အမြန်ဆုံးအကောင်အထည်ဖော်နေပြီး ထုတ်လုပ်မှုလုပ်ငန်းများကို အမြန်ဆုံးစတင်နိုင်ရေး ဆောင်ရွက်လျက်ရှိကြောင်း ပြောကြားခဲ့ပါသည်။ ထို့အပြင် အစားအသောက်ရေးရာညှိနှိုင်းရေးဝန်ကြီးဌာနသည် သက်ဆိုင်ရာ အဖွဲ့အစည်းများနှင့် ပူးပေါင်းကာ စည်းမျဉ်းစည်းကမ်းဆိုင်ရာ လိုအပ်ချက်များ ပြည့်မီစေရေးနှင့် လုပ်ငန်းလည်ပတ်မှုဆိုင်ရာ အခက်အခဲများကို ဖြေရှင်းလျက်ရှိပြီး စီမံကိန်းကို ၂၀၂၈ ခုနှစ်တွင် စတင်လည်ပတ်နိုင်ရန် ရည်မှန်းထားကြောင်း သိရပါသည်။ Hasan က အဆိုပါအမျိုးသား မဟာဗျူဟာစီမံကိန်းသည် နိုင်ငံ၏ ပုစွန်ထုတ်လုပ်မှုကိုတိုးမြှင့်ပေးခြင်း၊ ရေလုပ်ငန်းကဏ္ဍ ဖွံ့ဖြိုးတိုးတက်စေခြင်းနှင့် East Sumba ဒေသခံများ၏ လူနေမှုဘဝ တိုးတက်ကောင်းမွန်လာစေရေးအတွက် အရေးပါသည့် စီမံကိန်းတစ်ရပ်ဖြစ်ကြောင်း အလေးပေး ပြောကြားခဲ့ပါသည်။ ထို့ပြင် Waingapu ပေါင်းစည်းပုစွန်မွေးမြူရေးစီမံကိန်းသည် ထုတ်လုပ်မှုနှင့် ပြုပြင်ထုတ်လုပ်ရေး အခြေခံအဆောက်အအုံများကို ပြည့်စုံစွာပံ့ပိုးပေးခြင်းဖြင့် ပုစွန်ထောက်ပံ့ရေးကွင်းဆက်ကို ပိုမိုထိရောက်စေကာ နိုင်ငံတကာဈေးကွက်သို့ ဝင်ရောက်နိုင်မှုကိုလည်း ပိုမိုချဲ့ထွင်ပေးနိုင်မည်ဟု မျှော်လင့်ကြောင်း ၎င်းက ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

          ကရင်ပြည်နယ်သည် မြန်မာနိုင်ငံ၏ အရှေ့တောင်ပိုင်းတွင် တည်ရှိပြီး စိုက်ပျိုးရေးနှင့် မွေးမြူရေးကို အဓိကအခြေခံသည့် ပြည်နယ်တစ်ခုဖြစ်သည်။ ပြည်နယ်အတွင်း ကော်ဖီ၊ရော်ဘာ၊ ပျားရည်၊သီဟိုဠ်စေ့၊ငရုတ်၊နနွင်း၊ဒူးရင်းသီး၊ငှက်ပျော်သီးနှင့် အခြားဒေသထွက် စိုက်ပျိုးရေးထွက်ကုန် အများအပြား ထွက်ရှိလျက်ရှိပြီး ပြည်တွင်းစားသုံးမှုအပြင် ပြည်ပဈေးကွက်များတွင်လည်း ဝယ်လို အားရှိသည့် ထုတ်ကုန်များဖြစ်ကြသည်။

          ကရင်ပြည်နယ်သည် ထိုင်းနိုင်ငံနှင့်နယ်နမိတ်ချင်းထိစပ်လျက်ရှိပြီး နယ်စပ်ကုန်သွယ်ရေး တွင် အရေးပါသောဒေသတစ်ခုဖြစ်သည်။ အထူးသဖြင့် မြဝတီနယ်စပ်ကုန်သွယ်ရေးလမ်းကြောင်းမှ တစ်ဆင့် စိုက်ပျိုးရေးထွက်ကုန်များနှင့် တန်ဖိုးမြှင့်ထုတ်ကုန်များကို အိမ်နီးချင်းနိုင်ငံများသို့ တင်ပို့နိုင် သည့်အခွင့်အလမ်းကောင်းများရှိနေသည်။ ထို့ကြောင့်ဒေသထွက်ကုန်များ၏ အရည်အသွေးမြှင့်တင်ခြင်း၊ စံချိန်စံညွှန်းနှင့်ကိုက်ညီသော ထုပ်ပိုးမှုများဆောင်ရွက်ခြင်း၊ အမှတ်တံဆိပ်တည်ဆောက်ခြင်းနှင့် ဈေးကွက်လိုအပ်ချက်အတိုင်း ထုပ်လုပ်နိုင်ခြင်းတို့သည် ကုန်သွယ်မှုမြင့်တင်ရေးအတွက် အရေးကြီးသော အချက်များဖြစ်လာသည်။ လက်ရှိတွင် စားသုံးသူများသည် အရည်အသွေးကောင်း မွန်ပြီးဘေးကင်းလုံခြုံသော စားသောက်ကုန်များကို ပိုမိုရွှေးချယ်ဝယ်ယူလာကြသဖြင့် ထုတ်လုပ်သူ များအနေဖြင့် ကုန်ပစ္စည်းများ၏အရည်အသွေးကို ထိန်းသိမ်းရန်၊ သန့်ရှင်းသပ်ရပ်သော ထုပ်ပိုးမှုများ အသုံးပြုရန်နှင့် ကုန်ပစ္စည်းဆိုင်ရာအချက်အလက်များကို ပြည့်စုံစွာဖော်ပြထားသည့် တံဆိပ်ကပ် ခြင်းများကို ဆောင်ရွက်ရန်လိုအပ်လာသည်။ ထိုသို့ဆောင်ရွက်ခြင်းဖြင့် စားသုံးသူများ၏ယုံကြည်မှု ကိုရရှိစေပြီး ဈေးကွက်ယှဉ်ပြိုင်နိုင်စွမ်းကိုလည်း မြှင့်တင်နိုင်မည်ဖြစ်သည်။

          ထို့ပြင် ဒစ်ဂျစ်တယ်နည်းပညာဖွံ့ဖြိုးတိုးတက်လာမှုနှင့်အတူ အွန်လိုင်းဈေးကွက်များ၊ လူမှု ကွန်ရက်များနှင့် အီလက်ထရောနစ်ကုန်သွယ်မှု(E-Commerce) ပလပ်ဖောင်းများကို အသုံးပြု၍ ဒေသထွက်ကုန်များကို ပိုမိုကျယ်ပြန့်သောဈေးကွက်သို့ ရောင်းချနိုင်သည့်အခွင့်အလမ်းများလည်း ပေါ်ပေါက်လာလျက်ရှိသည်။ ထုတ်လုပ်သူများအနေဖြင့် ဈေးကွက်သတင်းအချက်အလက်များကို စဉ်ဆက်မပြတ် လေ့လာအသုံးချခြင်းနှင့် စားသုံးသူများ၏လိုအပ်ချက်များအလိုက် ထုတ်ကုန်များကို ဖန်တီးထုပ်လုပ်နိုင်ပါက ရေရှည်တည်တံ့သော စီးပွားရေးဖွံ့ဖြိုးတိုးတက်မှုကို အထောက်အကူပြုနိုင်မည် ဖြစ်သည်။

          ထို့ကြောင့် ကရင်ပြည်နယ်ဒေသထွက်ကုန်များ၏ကုန်သွယ်မှုမြင့်တင်ရေးအတွက် အရည် အသွေးစံချိန်စံညွှန်းများနှင့်အညီထုတ်လုပ်ရေး၊ တန်ဖိုးမြှင့်ထုတ်လုပ်ရေး၊ ဈေးကွက်ချဲ့ထွင်းရေး၊ အမှတ်တံဆိပ်ဖွံ့ဖြိုးရေးနှင့် ထုတ်လုပ်သူ၊ကုန်သည်၊MSMEလုပ်ငန်းရှင်များအကြားပူးပေါင်ဆောင် ရွက်မှုများကိုပိုမိုအားကောင်းစွာဆောင်ရွက်သင့်သည်။ ယင်းလုပ်ငန်းစဉ်များအောင်မြင်စွာ အကောင် အထည်ဖော်နိုင်ပါက ကရင်ပြည်နယ်၏ဒေသထွက်ကုန်များသည် ပြည်တွင်းဈေးကွက်သာမက ပြည်ပဈေးကွက်များတွင်ပါယှဉ်ပြိုင်နိုင်စွမ်း မြင့်မားလာမည်ဖြစ်ပြီး ဒေသခံတောင်သူများ၊ ထုတ်လုပ် သူများနှင့် MSMEလုပ်ငန်းရှင်များ၏ ဝင်ငွေတိုးတက်လာကာ ဒေသစီးပွားရေးဖွံ့ဖြိုးတိုးတက်မှုကိုများ စွာအထောက်အကူပြုနိုင်မည်ဖြစ်ပါသည်။

DOCA(ကရင်)