ပြည်ပကုန်သွယ်မှုသတင်းများ

           အင်ဒိုနီးရှားနိုင်ငံ Bangka Belitung Islands Province ရှိ Animal, Fish, and Plant Quarantine Agency သည် ဒေသ၏အဓိကပို့ကုန်ဖြစ်သော Muntok အဖြူရောင်ငရုတ်ကောင်းကို တောင်သူများဆက်လက်စိုက်ပျိုးပြီးဖွံ့ဖြိုးစေရန်ရည်ရွယ်၍ ထုတ်ကုန်တင်ပို့မှုကြီးကြပ်စစ်ဆေး ရေးလုပ်ငန်းများကို ပိုမိုအားကောင်းစေရန် ဆောင်ရွက်လျက်ရှိကြောင်း သိရပါသည်။ Bangka Belitung Islands Quarantine Agency အကြီးအကဲ Herwintarti က ဇူလိုင် ၁၉ ရက်တွင် ထုတ်ပြန်သည့်ကြေညာချက်၌ နိုင်ငံတကာဈေးကွက်တွင် အဖြူရောင်ငရုတ်ကောင်းအပေါ် ဝယ်လိုအား ဆက်လက်အားကောင်းနေကြောင်း ပြောကြားခဲ့ပါသည်။ Quarantine Agency သည် Bangka Belitung Islands ပြည်နယ်အစိုးရနှင့် ပူးပေါင်း၍ Go Export Program မှ တစ်ဆင့် အဖြူရောင်ငရုတ်ကောင်းတင်ပို့မှုကို ပိုမိုအားပေးဆောင်ရွက်လျက်ရှိပြီး တောင်သူများ၏ စိုက်ပျိုးထုတ်လုပ်လိုစိတ်ကို ဆက်လက်မြှင့်တင်ပေးလျက်ရှိကြောင်း သိရပါသည်။ Herwintarti က အဖြူရောင်ငရုတ်ကောင်း၏ ပို့ကုန်အလားအလာမှာ အလွန်မြင့်မားနေဆဲဖြစ်ပြီး ထုတ်လုပ်မှုပမာဏနှင့် အရည်အသွေးကိုမြှင့်တင်နိုင်ရန် ၎င်းသီးနှံကို ပြည်နယ်အစိုးရ၏ ဦးစားပေးအစီအစဉ်များအနက်တစ်ခုအဖြစ် ဆက်လက်ထိန်းသိမ်းသွားလိုကြောင်း ပြောကြားခဲ့ပါသည်။ Best Trust (Barantin Electronic System for Transaction and Utility Service Technology) ၏ အချက်အလက်များအရ ၂၀၂၅ ခုနှစ်အတွင်း Bangka Belitung မှ အဖြူရောင် ငရုတ်ကောင်း တန်ချိန် ၁,၃၇၀ ခန့်အား အကြိမ်ရေ ၁၈၄ ကြိမ် တင်ပို့ခဲ့ပြီး စုစုပေါင်းတန်ဖိုးမှာ အင်ဒိုနီးရှားရူပီး ဘီလီယံ ၁၈၀ (အမေရိကန်ဒေါ်လာ ၉.၇ သန်းခန့်) ရှိခဲ့ကြောင်း သိရပါသည်။ ပြည်တွင်းသို့ ဖြန့်ဖြူးရောင်းချမှုမှာလည်း တန်ချိန် ၆,၃၂၃ တန်ကို အကြိမ်ရေ ၃၀၈ ကြိမ် ဖြန့်ဖြူး ခဲ့ပြီး စုစုပေါင်းတန်ဖိုးမှာ အင်ဒိုနီးရှားရူပီး ၅၃၅.၈၉ ဘီလီယံ (အမေရိကန်ဒေါ်လာ ၂၈.၈ သန်းခန့်) ရှိခဲ့ကြောင်း သိရပါသည်။ Bangka Belitung မှ အဖြူရောင်ငရုတ်ကောင်း၏ အဓိကပို့ကုန် ဈေးကွက်များမှာ ဗီယက်နမ်၊ စင်ကာပူ၊ ဂျပန်၊ မလေးရှားနှင့် ထိုင်ဝမ်တို့ဖြစ်ကြောင်း သိရပါသည်။ တစ်ဖက်တွင် Bangka Belitung Islands Agriculture and Food Security Agency (DPKP) အကြီးအကဲ Kurniawan က ပြည်နယ်အစိုးရသည် ပို့ကုန်သီးနှံဖြစ်သော ငရုတ်ကောင်းထုတ်လုပ်မှု တိုးမြှင့်နိုင်ရေးအတွက် တောင်သူလယ်သမားများ၏ ငရုတ်ကောင်းစိုက်ခင်းများ ဖွံ့ဖြိုးတိုးတက်ရေးကို ဆက်လက်ဆောင်ရွက်လျက်ရှိကြောင်း ပြောကြားခဲ့ပါသည်။ ပြည်နယ်စိုက်ပျိုးရေးဆိုင်ရာ အချက်အလက်များအရ ၂၀၂၅ ခုနှစ်တွင် အဖြူရောင်ငရုတ်ကောင်း ထုတ်လုပ်မှုမှာ တန်ချိန် ၉,၆၄၆.၉၆ ရှိခဲ့ပြီး Bangka District တွင် ၁,၁၉၈.၆၈ တန်၊ Belitung District တွင် ၃,၈၃၁.၈၂ တန်၊ West Bangka District တွင် ၁၁၅.၉၁ တန်နှင့် Bangka Belitung တွင် ၁၁၅.၉၁ တန် ထွက်ရှိခဲ့ကြောင်း သိရပါသည်။ ထို့ပြင် Central Bangka District တွင် ၁၆၁.၃၆ တန်၊ South Bangka District တွင် ၃,၃၃၁.၄၅ တန်နှင့် East Belitung District တွင် ၁,၀၀၇.၇၃ တန် ထွက်ရှိခဲ့ကြောင်း သိရပါသည်။ နှိုင်းယှဉ်ကြည့်ပါက ၂၀၂၄ ခုနှစ်တွင် အဖြူရောင်ငရုတ်ကောင်း ထုတ်လုပ်မှုမှာ စုစုပေါင်း တန်ချိန် ၁၂,၀၀၈.၆၆ ရှိခဲ့ပြီး Bangka District တွင် ၈၇၈.၇၈ တန်၊ Belitung District တွင် ၄,၃၂၁.၈၆ တန်၊ West Bangka District တွင် ၁,၅၀၂.၇၀ တန်၊ Central Bangka District တွင် ၂၂၅.၆၀ တန်၊ South Bangka District တွင် ၃,၈၉၃.၀၆ တန်နှင့် East Belitung District တွင် ၁,၁၈၆.၆၆ တန် ထွက်ရှိခဲ့ကြောင်း ဖော်ပြထားပါသည်။ Kurniawan က အဖြူရောင်ငရုတ်ကောင်း ထုတ်လုပ်မှုကျဆင်းရခြင်း၏ အဓိကအကြောင်းရင်းမှာ စိုက်ခင်းမြေ များကို ဆီအုန်းစိုက်ခင်းများနှင့် အခြားအသုံးပြုမှုများသို့ ပြောင်းလဲအသုံးပြုလာခြင်းကြောင့် စိုက်ပျိုးဧရိယာ လျော့နည်းလာခြင်းဖြစ်ကြောင်း ပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)

         အင်ဒိုနီးရှားနှင့် ဆွစ်ဇာလန်နိုင်ငံတို့သည် သတ္တုနှင့် သတ္တုထွက်ပစ္စည်းကဏ္ဍပူးပေါင်း ဆောင်ရွက်ရေးဆိုင်ရာ နားလည်မှုစာချွန်လွှာ (MoU) ကို လက်မှတ်ရေးထိုးခဲ့ကြပြီး သဘာဝသယံဇာတများကို တန်ဖိုးမြှင့်ထုတ်လုပ်ရေး (Downstream) လုပ်ငန်းများ တိုးမြှင့်ဆောင်ရွက်နေသည့် အင်ဒိုနီးရှားနိုင်ငံ၏ ရင်းနှီးမြှုပ်နှံမှုနှင့် စက်မှုလုပ်ငန်းဆိုင်ရာပူးပေါင်းဆောင်ရွက်မှုကို ပိုမိုခိုင်မာစေခဲ့ကြောင်း သိရပါသည်။ ရင်းနှီးမြှုပ်နှံမှုနှင့် တန်ဖိုးမြှင့်ထုတ်လုပ်ရေးဝန်ကြီး Rosan Roeslani က အဆိုပါသဘောတူညီချက်သည် ၂၀၂၆ ခုနှစ် ဇွန် ၂၃ ရက်က ဆွစ်ဇာလန်နိုင်ငံ ဘေဆယ်မြို့တွင် ကျင်းပသည့် Swissmem Industry Day 2026 အခမ်းအနားအတွင်း ဆွစ်ဇာလန်သမ္မတ Guy Parmelin က စတင်လက်မှတ်ရေးထိုးခဲ့သည့်လုပ်ငန်းစဉ်ကို အပြီးသတ်နိုင်ခဲ့ခြင်းဖြစ်ကြောင်း ပြောကြားခဲ့ပါသည်။ Rosan က ထိုသဘောတူညီချက်သည် နှစ်နိုင်ငံဆက်ဆံရေးကို ပိုမိုခိုင်မာစေသည့် အရေးပါသောမှတ်တိုင်တစ်ရပ်ဖြစ်ပြီး ရေရှည်တည်တံ့ခိုင်မြဲသော တန်ဖိုးမြှင့် ထုတ်လုပ်ရေးဆိုင်ရာ ရင်းနှီးမြှုပ်နှံမှုများနှင့် အင်ဒိုနီးရှားနိုင်ငံ၏စက်မှုကဏ္ဍ ပြောင်းလဲဖွံ့ဖြိုး တိုးတက်ရေးကို အထောက်အကူပြုမည်ဖြစ်ကြောင်း ပြောကြားခဲ့ပါသည်။ ၎င်းက အင်ဒိုနီးရှားနိုင်ငံ၏ ပေါများကြွယ်ဝသည့်သတ္တုသယံဇာတများကို ပြည်တွင်း၌ တန်ဖိုးမြှင့်ထုတ်လုပ်ခြင်းအားဖြင့် တန်ဖိုးမြင့်ထုတ်ကုန်များ ဖန်တီးနိုင်မည်ဖြစ်သကဲ့သို့ အရည်အသွေးမြင့် အလုပ်အကိုင် များ ဖန်တီးပေးနိုင်ပြီး စက်မှုကဏ္ဍယှဉ်ပြိုင်နိုင်စွမ်းကိုလည်း မြှင့်တင်ပေးနိုင်မည်ဖြစ်ကြောင်း၊ ဆွစ်ဇာလန်နိုင်ငံသည် နည်းပညာ၊ ဆန်းသစ်တီထွင်မှု၊ ငွေကြေးထောက်ပံ့မှု၊ ထောက်ပံ့ပို့ဆောင်ရေးနှင့် ကမ္ဘာ့ဈေးကွက်ဝင်ရောက်နိုင်မှုတို့တွင် ကျွမ်းကျင်မှုများရှိသဖြင့် နှစ်နိုင်ငံအတွက် အကျိုးဖြစ်ထွန်းစေမည်ဖြစ်ကြောင်း၊ ထိုပူးပေါင်းဆောင်ရွက်မှုသည် သဘာဝသယံဇာတများကို ပြည်တွင်း၌ တန်ဖိုးမြှင့်ထုတ်လုပ်ခြင်းဖြင့် စီးပွားရေးဖွဲ့စည်းပုံပြောင်းလဲတိုးတက်စေရန် အင်ဒိုနီးရှား အစိုးရ၏မဟာဗျူဟာကို အထောက်အပံ့ပေးမည်ဖြစ်ကြောင်းနှင့် အစိုးရအနေဖြင့် လျှပ်စစ်မော်တော်ယာဉ်ဘက်ထရီများ၊ ပြန်လည်ပြည့်ဖြိုးမြဲစွမ်းအင်နှင့် အစိမ်းရောင်စက်မှုလုပ်ငန်းများအတွက် အဆင့်မြင့်သတ္တုသန့်စင်ခြင်းနှင့် ကုန်ထုတ်လုပ်မှုများကို ဦးစားပေးဆောင်ရွက်ကာ မဟာဗျူဟာကျသောသတ္တုများ၏ တန်ဖိုးမြှင့်ထုတ်လုပ်ရေးကို အရှိန်မြှင့်ဆောင်ရွက်လျက်ရှိကြောင်းလည်း ပြောကြားခဲ့ပါသည်။ အင်ဒိုနီးရှား၊ တီမောလက်စတီနှင့် အာဆီယံဆိုင်ရာ ဆွစ်ဇာလန်သံအမတ်ကြီး Olivier Zehnder က ထိုသဘောတူညီချက်သည် သတ္တုနှင့် သတ္တုထွက်ပစ္စည်းကဏ္ဍတွင် နှစ်နိုင်ငံ အပြန်အလှန်အားဖြည့်ပူးပေါင်းဆောင်ရွက်နိုင်ရန် ပိုမိုခိုင်မာသော အခြေခံအုတ်မြစ်တစ်ရပ်ကို တည်ဆောက်ပေးမည်ဖြစ်ကြောင်းနှင့် ယခုနှစ်သည် အင်ဒိုနီးရှားနှင့် ဆွစ်ဇာလန်နိုင်ငံတို့ သံတမန်ဆက်ဆံရေးထူထောင်ခဲ့သည့် (၇၅) နှစ်မြောက် အထိမ်းအမှတ်နှစ်နှင့်လည်း တိုက်ဆိုင်နေပြီး ထိုပူးပေါင်းဆောင်ရွက်မှုမှတစ်ဆင့် နှစ်နိုင်ငံစီးပွားရေးဆက်ဆံမှု ပိုမို တိုးတက်လာကာ ရေရှည်အကျိုးကျေးဇူးများရရှိစေမည်ဟုမျှော်လင့်ကြောင်း ပြောကြားခဲ့ပါသည်။ အဆိုပါပူးပေါင်းဆောင်ရွက်ရေးမူဘောင်တွင် ရင်းနှီးမြှုပ်နှံမှုမြှင့်တင်ရေး၊ ရေရှည်တည်တံ့သော သတ္တုနှင့် သတ္တုထွက်ပစ္စည်း ထောက်ပံ့ရေးကွင်းဆက် ဖွံ့ဖြိုးတိုးတက်ရေး၊ နည်းပညာနှင့် အသိပညာလွှဲပြောင်းရေး၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးနှင့် ပတ်ဝန်းကျင်၊ လူမှုရေးနှင့် ကော်ပိုရိတ်အုပ်ချုပ်မှု (ESG) စံနှုန်းများ အကောင်အထည်ဖော်ရေးတို့ ပါဝင်ကြောင်း သိရပါသည်။ ထို့အပြင် သန့်စင်သောနည်းပညာဖွံ့ဖြိုးတိုးတက်ရေး၊ တန်ဖိုးမြှင့်ထုတ်လုပ်ရေး စက်မှုလုပ်ငန်းများ၏ အုပ်ချုပ်မှုစနစ်အားကောင်းစေရေးနှင့် စီးပွားရေးကိုယ်စားလှယ်အဖွဲ့များ အပြန်အလှန် စေလွှတ်ရေး၊ ဆွေးနွေးပွဲများ၊ ပြပွဲများ၊ လေ့ကျင့်ရေးအစီအစဉ်များနှင့် စီးပွားရေးချိတ်ဆက်မှု အစီအစဉ်များကိုလည်း ထည့်သွင်းဆောင်ရွက်သွားမည်ဖြစ်ကြောင်း သိရပါသည်။ ၂၀၂၁ ခုနှစ်မှ ၂၀၂၆ ခုနှစ် ပထမသုံးလပတ်အထိ ဆွစ်ဇာလန်နိုင်ငံ၏ အင်ဒိုနီးရှားနိုင်ငံအတွင်း ရင်းနှီးမြှုပ်နှံမှု ပမာဏမှာ အမေရိကန်ဒေါ်လာ ၁.၃၃ ဘီလီယံခန့်ရှိခဲ့ပြီး အစားအသောက်၊ သယ်ယူပို့ဆောင်ရေးနှင့် သိုလှောင်ရေး၊ ဆက်သွယ်ရေးနှင့် ဓာတုနှင့် ဆေးဝါးထုတ်လုပ်ရေးကဏ္ဍများတွင် အများဆုံး ရင်းနှီးမြှုပ်နှံခဲ့ကြောင်း သိရပါသည်။ ထို့ပြင် အင်ဒိုနီးရှား–ဥရောပလွတ်လပ်သော ကုန်သွယ်ရေး အသင်း (EFTA) ဘက်စုံစီးပွားရေး မိတ်ဖက်သဘောတူညီချက် (IE-CEPA) အောက်တွင်လည်း နှစ်နိုင်ငံ၏ စီးပွားရေးပူးပေါင်း ဆောင်ရွက်မှု ပိုမိုအားကောင်းလာခဲ့ပြီး ထိုသဘောတူညီချက်သည် စီးပွားရေးလုပ်ငန်းများအတွက် ယုံကြည်စိတ်ချရမှုမြှင့်တင်ပေးကာ ရင်းနှီးမြှုပ်နှံမှုများကို ပိုမို လွယ်ကူချောမွေ့စေရန် ရည်ရွယ်ထားကြောင်း သိရှိရပါသည်။

Antara News                                                                             

DOCA (ရန်ကုန်)

          အင်ဒိုနီးရှားနိုင်ငံ၏ ၂၀၂၆ ခုနှစ် ပထမနှစ်ဝက်အတွင်း အကောင်အထည်ဖော်နိုင်ခဲ့သည့် ရင်းနှီးမြှုပ်နှံမှုတန်ဖိုးမှာ ရူပီး ၁,၀၁၀.၆ ထရီလီယံ (အမေရိကန်ဒေါ်လာ ၅၆.၁ ဘီလီယံ) ရှိခဲ့ပြီး ယခင်နှစ်တူညီသည့်ကာလထက် ၇.၂ ရာခိုင်နှုန်း တိုးတက်လာကာ ယခုနှစ်အတွက် သတ်မှတ် ထားသည့် ရင်းနှီးမြှုပ်နှံမှုရည်မှန်းချက်၏ ထက်ဝက်နီးပါးကိုပြည့်မီခဲ့သည့်အပြင် အလုပ်အကိုင် ၁.၄၄ သန်း ဖန်တီးပေးနိုင်ခဲ့ကြောင်း ရင်းနှီးမြှုပ်နှံမှုနှင့် တန်ဖိုးမြှင့်ထုတ်လုပ်ရေးဝန်ကြီး Rosan Roeslani က ပြောကြားခဲ့ပါသည်။ ဇူလိုင် ၁၇ ရက်က ထုတ်ပြန်သည့် သတင်းထုတ်ပြန် ချက်အရ အဆိုပါရင်းနှီးမြှုပ်နှံမှုတန်ဖိုးသည် အစိုးရက ၂၀၂၆ ခုနှစ်အတွက် သတ်မှတ်ထားသည့် ရင်းနှီးမြှုပ်နှံမှုရည်မှန်းချက် ရူပီး ၂,၀၄၁.၃ ထရီလီယံ၏ ၄၉.၅ ရာခိုင်နှုန်းနှင့် ညီမျှကြောင်း သိရ ပါသည်။ ဝန်ကြီး Rosan Roeslani က ပထမနှစ်ဝက်အတွင်း ရရှိခဲ့သည့် ရလဒ်များကြောင့် အင်ဒိုနီးရှားအနေဖြင့် ယခုနှစ်အတွက်ချမှတ်ထားသည့် ရင်းနှီးမြှုပ်နှံမှုရည်မှန်းချက်ကို ပြည့်မီနိုင်မည့်လမ်းကြောင်းပေါ်တွင် ဆက်လက်ရပ်တည်နေကြောင်း ပြောကြားခဲ့ပါသည်။ အဆိုပါ ရင်းနှီးမြှုပ်နှံမှုများကြောင့် အလုပ်အကိုင် ၁.၄၄ သန်း ဖန်တီးပေးနိုင်ခဲ့ပြီး ၂၀၂၅ ခုနှစ် ပထမ နှစ်ဝက်နှင့် နှိုင်းယှဉ်ပါက ၁၅ ရာခိုင်နှုန်း တိုးတက်လာခဲ့ကြောင်း သိရပါသည်။ အင်ဒိုနီးရှားနိုင်ငံတွင် တိုက်ရိုက်ရင်းနှီးမြှုပ်နှံလိုသည့် ရင်းနှီးမြှုပ်နှံသူများ၏ကတိကဝတ်သည် ၂၀၂၆ ခုနှစ် အတွက် သတ်မှတ်ထားသည့် ရည်မှန်းချက်နှင့်အညီ ဆက်လက်တည်ရှိနေကြောင်း ၎င်းက ပြောကြားခဲ့ပါသည်။ ဂျာဗားကျွန်းပြင်ပဒေသများသို့ ဝင်ရောက်လာသည့် ရင်းနှီးမြှုပ်နှံမှုပမာဏသည် ဂျာဗားကျွန်းအတွင်းဝင်ရောက်လာသည့်ပမာဏထက် အနည်းငယ်ပိုမိုများပြားခဲ့ပြီး ဒေသအလိုက် ဖွံ့ဖြိုးတိုးတက်မှုကိုမျှတစေရန် အစိုးရ၏မူဝါဒကို အထောက်အကူပြုခဲ့ကြောင်း သိရပါသည်။ ဂျာဗားကျွန်းတွင် ရင်းနှီးမြှုပ်နှံမှုတန်ဖိုး ရူပီး ၅၀၂.၈ ထရီလီယံ ရရှိခဲ့ပြီး စုစုပေါင်း၏ ၄၉.၈ ရာခိုင်နှုန်းရှိခဲ့ကြောင်း သိရပါသည်။ ဂျာဗားကျွန်းပြင်ပဒေသများတွင်မူ ရူပီး ၅၀၇.၈ ထရီလီယံ ရရှိခဲ့ပြီး စုစုပေါင်း၏ ၅၀.၂ ရာခိုင်နှုန်းရှိခဲ့ကြောင်း သိရပါသည်။ ၂၀၂၆ ခုနှစ် ဇန်နဝါရီမှ ဇွန်လအထိ ကာလအတွင်း ပြည်တွင်းတိုက်ရိုက်ရင်းနှီးမြှုပ်နှံမှုနှင့် နိုင်ငံခြားတိုက်ရိုက်ရင်းနှီး မြှုပ်နှံမှုတို့မှာလည်း မျှတစွာဆက်လက်ရှိနေခဲ့ကြောင်း ဝန်ကြီးကပြောကြားခဲ့ပါသည်။ ပြည်တွင်း တိုက်ရိုက် ရင်းနှီးမြှုပ်နှံမှုမှာ ရူပီး ၅၀၂.၉ ထရီလီယံရှိပြီး စုစုပေါင်း၏ ၄၉.၈ ရာခိုင်နှုန်းရှိကာ နိုင်ငံခြား တိုက်ရိုက်ရင်းနှီးမြှုပ်နှံမှုမှာ ရူပီး ၅၀၇.၆ ထရီလီယံရှိပြီး စုစုပေါင်း၏ ၅၀.၂ ရာခိုင်နှုန်းရှိခဲ့ကြောင်း သိရပါသည်။ နိုင်ငံခြားရင်းနှီးမြှုပ်နှံမှုအများဆုံးပြုလုပ်သည့်နိုင်ငံမှာ စင်ကာပူဖြစ်ပြီး အမေရိကန် ဒေါ်လာ ၈.၈ ဘီလီယံ ရင်းနှီးမြှုပ်နှံခဲ့ကြောင်း သိရပါသည်။ ထို့နောက် ဟောင်ကောင်က အမေရိကန်ဒေါ်လာ ၇.၆ ဘီလီယံ၊ တရုတ်နိုင်ငံက အမေရိကန်ဒေါ်လာ ၃.၉ ဘီလီယံ၊ ဂျပန်နိုင်ငံက အမေရိကန်ဒေါ်လာ ၁.၉ ဘီလီယံနှင့် အမေရိကန်နိုင်ငံက အမေရိကန်ဒေါ်လာ ၁.၇ ဘီလီယံ အသီးသီး ရင်းနှီးမြှုပ်နှံခဲ့ကြကြောင်း သိရပါသည်။ အဆိုပါနိုင်ငံနှင့်ဒေသငါးခုမှ ရင်းနှီးမြှုပ်နှံမှု သည် ၂၀၂၆ ခုနှစ် ပထမနှစ်ဝက်အတွင်း အင်ဒိုနီးရှားနိုင်ငံသို့ ဝင်ရောက်လာသည့် နိုင်ငံခြား တိုက်ရိုက်ရင်းနှီးမြှုပ်နှံမှု စုစုပေါင်း၏ ၇၇.၈ ရာခိုင်နှုန်းခန့် ရှိခဲ့ကြောင်း သိရပါသည်။ ဝန်ကြီးက ကမ္ဘာ့နိုင်ငံရေးနှင့် စီးပွားရေးမရေရာမှုများဆက်လက်ဖြစ်ပေါ်နေသော်လည်း အင်ဒိုနီးရှားနိုင်ငံ အပေါ် ရင်းနှီးမြှုပ်နှံသူများ၏ယုံကြည်မှုမှာ ခိုင်မာနေဆဲဖြစ်သည်ကို အဆိုပါ ကိန်းဂဏန်းများက ဖော်ပြနေကြောင်း ပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)

        ကမ္ဘောဒီးယားနှင့် ဘရာဇီးနိုင်ငံတို့သည် စီးပွားရေးဆိုင်ရာ အလားအလာများကို အမြင့်ဆုံးအထိ မြှင့်တင်နိုင်ရန်အတွက် နှစ်နိုင်ငံလွတ်လပ်သောကုန်သွယ်မှု သဘောတူညီချက်များ (FTAs) နှင့် ဝင်ငွေခွန်နှစ်ထပ်မံစည်းကြပ်မှု ရှောင်လွှဲရေးသဘောတူညီချက်များ (DTAs) ရေးထိုးနိုင်မည့် ဖြစ်မြောက်နိုင်ခြေကို လေ့လာရန်နှင့် ရင်းနှီးမြှုပ်နှံမှုမြှင့်တင်ရေးနှင့် အပြန်အလှန် ကာကွယ်ပေးရေးဆိုင်ရာ သဘောတူညီချက်များကို ပြင်ဆင်ရန် ဆန္ဒရှိကြောင်း ဖော်ပြခဲ့ကြကြောင်း သိရပါသည်။

          အဆိုပါ ဆွေးနွေးမှုများကို ဒုတိယဝန်ကြီးချုပ်နှင့် စီးပွားရေးနှင့်ဘဏ္ဍာရေးဝန်ကြီး Aun Pornmoniroth နှင့် ကမ္ဘောဒီးယားနိုင်ငံဆိုင်ရာ ဘရာဇီးသံအမတ်ကြီး Vivian Loss Sanmartin တို့အကြား ဖနွမ်းပင်မြို့တွင် ဇူလိုင် ၁၅ ရက်က ပြုလုပ်ခဲ့သည့် စီစဉ်ထားသော တွေ့ဆုံမှုနှင့် လုပ်ငန်းခွင်ဆွေးနွေးပွဲအတွင်း ပြောကြားခဲ့ခြင်းဖြစ်ကြောင်း သိရပါသည်။

         တွေ့ဆုံမှုအတွင်း ဒုတိယဝန်ကြီးချုပ်က အထူးသဖြင့် ၂၀၂၄ ခုနှစ်တွင် ဖနွမ်းပင်မြို့၌ ဘရာဇီးသံရုံး စတင်တည်ထောင်ခဲ့ပြီးနောက်ပိုင်း နှစ်နိုင်ငံဆက်ဆံရေး ဖွံ့ဖြိုးတိုးတက်လာမှုကို မြင့်မားစွာ တန်ဖိုးထားချီးကျူးခဲ့ကြောင်း သိရပါသည်။ မကြာသေးမီနှစ်များအတွင်း နှစ်နိုင်ငံအကြား ကုန်သွယ်မှုပမာဏမှာ သိသိသာသာ မြင့်တက်လာခဲ့ပါသည်။ ၂၀၂၅ ခုနှစ်တွင် နှစ်နိုင်ငံကုန်သွယ်မှုသည် အမေရိကန်ဒေါ်လာ ၁၈၆ သန်းခန့်အထိ ရှိခဲ့ပြီး ၂၀၂၄ ခုနှစ်နှင့် နှိုင်းယှဉ်ပါက ၈၁ ရာခိုင်နှုန်းကျော် တိုးတက်မှုနှုန်း ရှိခဲ့သည်။ သံအမတ်ကြီး ဆန်မာတင်ကလည်း နှစ်ဦးနှစ်ဖက် စီးပွားရေးအကျိုးအမြတ်များအတွက် ရင်းနှီးမြှုပ်နှံမှု၊ စီးပွားရေးချိတ်ဆက်မှုများနှင့် ပုဂ္ဂလိကကဏ္ဍ ပူးပေါင်းပါဝင်မှုများကို မြှင့်တင်ခြင်းဖြင့် ကမ္ဘောဒီးယားနိုင်ငံနှင့် ပူးပေါင်းဆောင်ရွက်မှုကို ပိုမိုခိုင်မာအောင်နှင့် တိုးချဲ့သွားရန် ဘရာဇီးအစိုးရ၏ ခိုင်မာသော ကတိကဝတ်ကို ထပ်လောင်းအတည်ပြုခဲ့ကြောင်း သိရပါသည်။ နှစ်ဖက်စလုံးက စိုက်ပျိုးရေး၊ စွမ်းအင်နှင့် ဘဏ္ဍာရေးနည်းပညာ (FinTech) တို့အပါအဝင် ရေတိုရေရှည် ပူးပေါင်းဆောင်ရွက်မှုအတွက် အဓိက အလားအလာရှိသော ကဏ္ဍအချို့ကို ဖော်ထုတ်ခဲ့ကြ ကြောင်း သိရပါသည်။

           Pornmoniroth ကဘရာဇီးအစိုးရနှင့် ပြည်သူများကို အထူးကျေးဇူးတင်ရှိကြောင်း ဖော်ပြခဲ့ပြီး၊ နှစ်နိုင်ငံပြည်သူများထံသို့ သာယာဝပြောမှုများ ဆောင်ကြဉ်းပေးနိုင်ရန်အတွက် နှစ်နိုင်ငံအကြား ဆက်ဆံရေးသည် ဆက်လက်၍ ပိုမိုနက်ရှိုင်းလာလိမ့်မည်ဖြစ်ကြောင်း ခိုင်မာသောယုံကြည်မှုကို ထုတ်ဖော်ပြောကြားခဲ့ကြောင်း သိရှိရပါသည်။

Source: Khmertimes                                                                  

DOCA (ရန်ကုန်)

        အင်ဒိုနီးရှားနိုင်ငံသည် ဂျာဗားအရှေ့ပိုင်းမှ သရက်သီး ပြည်ပတင်ပို့မှုကို မြှင့်တင်ရန် ကြိုးပမ်းနေပြီး၊ ဂျပန်နိုင်ငံကို ဦးစားပေး ပို့ကုန်စျေးကွက်အဖြစ် သတ်မှတ်လိုက်ကြောင်း သိရပါသည်။ အင်ဒိုနီးရှားနိုင်ငံ ရွှေ့ပြောင်းအခြေစိုက်နေထိုင်ရေးဆိုင်ရာဝန်ကြီး Muhammad Iftitah Sulaiman Suryanagara က ဂျပန်နိုင်ငံတွင် အရည်အသွေးမြင့် ပရီမီယံသစ်သီးဝလံများအတွက် ဝယ်လိုအားအားကောင်းလျက်ရှိပြီး၊ ကုန်စည်အခြေပြု စီးပွားရေးဇုန်များ ဖော်ဆောင်ခြင်းက လုပ်ငန်းကဏ္ဍအတွင်း ကြုံတွေ့နေရသည့် နည်းပညာပိုင်းဆိုင်ရာ ကုန်သွယ်မှု အတားအဆီးများကို ဖြေရှင်းကျော်လွှားနိုင်ရန် အထောက်အကူပြုလိမ့်မည်ဟု ပြောကြားခဲ့ ကြောင်း သိရပါသည်။ သစ်သီးဖျက်ပိုး ကဲ့သို့သော စိန်ခေါ်မှုများသည် ဈေးကွက်ဝင်ရောက်ရေးအတွက် အတားအဆီးများ ဖြစ်စေနိုင်သော်လည်း၊ ယင်းအတားအဆီးများကို ကျော်လွှားနိုင်ပါက စိုက်ပျိုးထုတ်လုပ်သူများအတွက် ပိုမိုမြင့်မားသော တန်ဖိုးများကို ဖန်တီးပေးနိုင်လိမ့် မည်ဟု ဝန်ကြီးကပြောကြားခဲ့ကြောင်း သိရပါသည်။

       ဂျာဗားအရှေ့ပိုင်း၊ Pasuruan ခရိုင်မှ ထွက်ရှိသော ထောပတ်သရက်သီးများနှင့် Probolinggo ခရိုင်မှ ထွက်ရှိသော အရုမာနစ်သရက်သီးများသည် ထိပ်တန်းဥယျာဉ်ခြံသီးနှံ ပို့ကုန်များဖြစ်လာနိုင်သည့် အလားအလာရှိကြောင်း သိရပါသည်။ အဆိုပါဒေသများမှ ထွက်ရှိသော သစ်သီးဝလံများကို အမေရိကန်၊ တရုတ်နှင့် သြစတြေးလျနိုင်ငံ သံအမတ်ကြီးများထံ ပုံမှန်ဂါရဝပြု လက်ဆောင်ပေးအပ်လေ့ရှိပြီး ကောင်းမွန်သော တုံ့ပြန်မှုများ ရရှိထားကြောင်းလည်း ဝန်ကြီးက ပြောကြားခဲ့ပါသည်။

       အဆိုပါ ပြည်ပတင်ပို့မှု အားကောင်းလာစေရန်အတွက် ရွှေ့ပြောင်းအခြေစိုက်နေထိုင်ရေး ဝန်ကြီးဌာနသည် အခြားသော အစိုးရအေဂျင်စီများနှင့် ပူးပေါင်းကာ စိုက်ပျိုးထုတ်လုပ်ခြင်း၊ ပြုပြင်မွမ်းမံခြင်းမှသည် ဈေးကွက်ရှာဖွေခြင်းနှင့် ပြည်ပတင်ပို့ခြင်းအထိ တန်ဖိုးကွင်းဆက် တစ်ခုလုံးကို အားကောင်းစေမည့် ကုန်စည်အခြေပြုဒေသများ ဖော်ဆောင်ရန် ပြင်ဆင်နေကြောင်း သိရပါသည်။

        ဒေသတစ်ခုချင်းစီကို သရက်သီး၊ ဒူးရင်းသီး၊ အုန်းသီး သို့မဟုတ် အခြားသော စိုက်ပျိုးရေးထွက်ကုန်များဖြစ်စေ ၎င်းတို့၏ နှိုင်းယှဉ်ချက်အရ သာလွန်ကောင်းမွန်သည့် အားသာချက်များအပေါ်မူတည်၍ ဖွံ့ဖြိုးတိုးတက်အောင် ဆောင်ရွက်သွားမည်ဖြစ်ကြောင်း Suryanagara က အလေးပေးပြောကြားခဲ့ကြောင်း သိရပါသည်။

Source: Fruitnet.com                                                                 

DOCA (ရန်ကုန်)