ပြည်ပကုန်သွယ်မှုသတင်းများ

          အင်ဒိုနီးရှားအစိုးရသည် ဟဂ်ျ (Hajj) ဘုရားဖူးများအတွက် ပထမဆုံးအကြိမ် ဆန်တင်ပို့မှု အောင်မြင်ပြီးနောက် ဆော်ဒီအာရေဗီးယားရှိ လက်လီအရောင်းဆိုင်ကြီးများမှတစ်ဆင့် အင်ဒိုနီး ရှားဆန် စျေးကွက်ချဲ့ထွင်ရန် ရည်မှန်းထားကြောင်း သိရပါသည်။ အထူးသဖြင့် ခေတ်မီ လက်လီ ကွန်ရက်များနှင့် အင်ဒိုနီးရှား Umrah ဘုရားဖူးကဏ္ဍတို့တွင် ဝယ်လိုအား မြင့်တက်လာ နိုင်ဖွယ် ရှိကြောင်း သိရပါသည်။ နိုင်ငံပိုင် ထောက်ပံ့ပို့ဆောင်ရေးလုပ်ငန်း (Perum Bulog) ၏ ညွှန်ကြား ရေးမှူးချုပ် Ahmad Rizal Ramdhani က ဆော်ဒီအာရေဗီးယားတွင် စျေးကွက်ရှာဖွေမှု များအရ အင်ဒိုနီးရှားဆန်ကို ဟဂ်ျဘုရားဖူးများအတွက်သာမက စီးပွားဖြစ်ရောင်းချရန်နှင့် Umrah စျေး ကွက်များအတွက်ပါ စိတ်ဝင်စားမှုအားကောင်းနေကြောင်း တနင်္လာနေ့တွင် ပြောကြားခဲ့ပါ သည်။ ဆော်ဒီအာရေဗီးယားရှိ နာမည်ကြီး လက်လီကွန်ရက်များဖြစ်သော BinDawood နှင့် Lulu တို့သည် အင်ဒိုနီးရှားဆန်ကို ပြည်တွင်းလက်လီစျေးကွက်တွင် ရောင်းချရန်အတွက် ဝယ်ယူရန် စိတ်ဝင်စားကြောင်း အကြောင်းပြန်ထားသည်ဟု Ramdhani က မှတ်ချက်ပြုခဲ့ပါသည်။ ထိုသို့ စျေးကွက်အလားအလာကောင်းရခြင်းမှာ တစ်နှစ်လျှင် Umrah ဘုရားဖူးဦးရေ (၂) သန်းနီးပါး ရှိနေခြင်းနှင့် ဆော်ဒီအာရေဗီးယားတွင် နေထိုင်လျက်ရှိသော အင်ဒိုနီးရှားလူမျိုး အရေအတွက် များပြားခြင်းတို့ကြောင့် ဖြစ်ကြောင်း သိရပါသည်။ Bulog အနေဖြင့် ဆော်ဒီအာရေဗီးယားသို့ ဆန်များရောက်ရှိလာချိန်တွင် ဆိပ်ကမ်းများမှတစ်ဆင့် ဟဂ်ျဘုရားဖူးများအား ကျွေးမွေးရေး ဝန်ဆောင်မှုများနှင့် လက်လီကွန်ရက်များသို့ ဖြန့်ဖြူးပေးမည့် တင်သွင်းသူ (Importers) များကို လည်း သတ်မှတ်ပြီးစီးပြီးဖြစ်ကြောင်း သိရပါသည်။ လက်လီနှင့် Umrah စျေးကွက် တိုးချဲ့မှုကို ပထမအဆင့် ဟဂ်ျဆန်တင်ပို့မှုအပြီးတွင် အဆင့်လိုက် ဆောင်ရွက်သွားမည်ဖြစ်ပြီး ကုန်ပစ္စည်း အရည်အသွေးနှင့် စဉ်ဆက်မပြတ် ထောက်ပံ့နိုင်မှုကို အဓိကထား ဆောင်ရွက်သွားမည် ဖြစ် ကြောင်း သိရပါသည်။ ယခင်အစီအစဉ်အရ Bulog သည် အင်ဒိုနီးရှားဟဂ်ျဆန် တန်ချိန် ၂,၂၈၀ ကို ဖေဖော်ဝါရီ ၂၈ ရက်နှင့် မတ်လ ၄ ရက်နေ့တို့တွင် နှစ်သုတ်ခွဲ၍ တင်ပို့ရန် ရှိနေကြောင်း သိရပါသည်။ ၎င်းတင်ပို့မှု၏ တန်ဖိုးမှာ အင်ဒိုနီးရှားရူပီး ၁၅၀ ဘီလီယံ (အမေရိကန်ဒေါ်လာ ၈.၆ သန်းခန့်) ရှိပြီး ၎င်းသည် အင်ဒိုနီးရှားဟဂ်ျဘုရားဖူးများ၏ လိုအပ်ချက်ကို ဖြည့်ဆည်းရန် ရည်ရွယ်သည့် ပထမဆုံးသော နိုင်ငံတော်အဆင့် ဆန်တင်ပို့မှု ဖြစ်ကြောင်း သိရပါသည်။

Antara News

DOCA (ရန်ကုန်)

         ဗီယက်နမ်နိုင်ငံသည် သယ်ယူပို့ဆောင်ရေးအခြေခံအဆောက်အအုံ၊ စမတ်မြို့တော်များ၊ ပြည့်ဖြိုးမြဲစွမ်းအင်၊ AI၊ ဆီးမီးကွန်ဒတ်တာများ၊ ထောက်ပံ့ပို့ဆောင်ရေး၊ ကျန်းမာရေးစောင့်ရှောက်မှုနှင့် နည်းပညာမြင့်စိုက်ပျိုးမွေးမြူရေးတို့ ပါဝင်သည့်ပြင်သစ်နိုင်ငံ၏ ကမ္ဘာလုံးဆိုင်ရာအားသာချက်များရှိသောကဏ္ဍများတွင် အရည်အသွေးမြင့် ရင်းနှီးမြှုပ်နှံမှုများကို ပိုမို ဆွဲဆောင်နိုင်ရန် ကြိုးပမ်းမှုများကို တိုးမြှင့်ဆောင်ရွက်လျက်ရှိကြောင်း ပြင်သစ်နိုင်ငံဆိုင်ရာ ဗီယက်နမ် သံအမတ်ကြီး Trinh Duc Hai က ပြောကြားခဲ့ပါသည်။ ဖေဖော်ဝါရီ ၂၀ ရက်နေ့တွင် MEDEF International (ပြင်သစ် စီးပွားရေးလုပ်ငန်းရှင်များအသင်း၏ နိုင်ငံတကာချိတ်ဆက်ရေး ဌာန) ဒုတိယဥက္ကဋ္ဌနှင့် Artelia Group ဥက္ကဋ္ဌ Benoit Clocheret နှင့် ပြင်သစ် ကုမ္ပဏီကြီးများ၏ ကိုယ်စားလှယ်များနှင့် တွေ့ဆုံဆွေးနွေးရာတွင် သံအမတ်ကြီး Hai က ထိုကဏ္ဍများမှာ ဗီယက်နမ် နိုင်ငံ၏ ရေရှည်တည်တံ့ခိုင်မြဲသော ဖွံ့ဖြိုးတိုးတက်ရေး မဟာဗျူဟာ၏ အဓိကအခြေခံအုတ်မြစ် များဖြစ်ပြီး နှစ်နိုင်ငံစီးပွားရေးများအကြား အပြန်အလှန်ဖြည့်ဆည်းနိုင်သည့် အားသာချက်များ ရှိကြောင်းနှင့် MEDEF International မှ ယခင်နှစ် ဇွန်လတွင် အောင်မြင်စွာ ကျင်းပခဲ့သော ဗီယက်နမ်–ပြင်သစ် စီးပွားရေးဖိုရမ်အား ချီးကျူးကာ ၎င်းဖိုရမ်သည် နှစ်နိုင်ငံ စီးပွားရေးအသိုင်း အဝိုင်းအကြား မဟာဗျူဟာမြောက်ချိတ်ဆက်ပေးသူအဖြစ် MEDEF ၏ အခန်းကဏ္ဍကို ပိုမိုခိုင်မာစေခဲ့ကြောင်း ပြောကြားခဲ့ပါသည်။ Artelia ကုမ္ပဏီသည် ဗီယက်နမ်တွင် နှစ်ပေါင်း ၂၀ ကျော် လုပ်ကိုင်လာခဲ့ပြီး ဟနွိုင်းနှင့် ဟိုချီမင်းမြို့ရှိ မြေအောက်ရထားစနစ်များကဲ့သို့ အကြီးစား အခြေခံအဆောက်အအုံ စီမံကိန်းများတွင် ပါဝင်ခဲ့သည်ဟု သိရပါသည်။ Clocheret က Artelia တွင် ဗီယက်နမ်၌ ဝန်ထမ်း ၈၀၀ ခန့်ရှိပြီး ဗီယက်နမ်ကို မဟာဗျူဟာအရ အရေးပါသော စျေးကွက်အဖြစ် သတ်မှတ်ထားကြောင်း၊ ဗီယက်နမ်ကျွမ်းကျင်သူများသည် ပြည်တွင်းစီမံကိန်းများသာမက လာအို၊ ဖိလစ်ပိုင်၊ ထိုင်းနှင့် အင်ဒိုနီးရှားနိုင်ငံများရှိ လုပ်ငန်းများတွင်လည်း ပါဝင်ကူညီလျက်ရှိကာ ဗီယက်နမ်ကို ဒေသတွင်း စွမ်းရည်ထူးချွန်ရေးဗဟိုအဖြစ် တည်ဆောက်လျက်ရှိကြောင်းနှင့် Artelia သည် ဗီယက်နမ်၏ မြန်နှုန်းမြင့် မီးရထားစီမံကိန်းအစောပိုင်းအဆင့်များတွင် ပါဝင်ခွင့်ရရှိထားပြီး ဟနွိုင်းမြို့ရှိ လေဆိပ်အသစ် စီမံကိန်းအတွက် အကြံပေးနှင့် စောင့်ကြည့် ကြပ်မတ်ရေး ဝန်ဆောင်မှုများ ပံ့ပိုးပေးလျက်ရှိကြောင်းလည်း ပြောကြားခဲ့သည်။ နှစ်ဖက်သည် ဒုတိယအကြိမ် ဗီယက်နမ်–ပြင်သစ် စီးပွားရေးဖိုရမ်ကို ပြင်သစ်နိုင်ငံတွင် လာမည့် ဇွန်လလယ် ခန့်တွင် ကျင်းပနိုင်ရေး ဆောင်ရွက်သွားရန် သဘောတူခဲ့ကြကြောင်း သိရပါသည်။ MEDEF ဘက် မှ ဗီယက်နမ် ဘဏ္ဍာရေးဝန်ကြီးအပါအဝင် အဆင့်မြင့်ခေါင်းဆောင်များ ပါဝင်ရန် အကြံပြုထား ကြောင်း သိရပါသည်။ ဆွေးနွေးပွဲတွင် မြန်နှုန်းမြင့်မီးရထား၊ မြေအောက်ရထား စနစ်များ၊ လေကြောင်းပို့ဆောင်ရေး၊ ပြည့်ဖြိုးမြဲစွမ်းအင်နှင့် နျူကလီးယားစွမ်းအင်၊ အဆင့်မြင့် နည်းပညာ၊ ဆီမီကွန်ဒတ်တာများ၊ ကျန်းမာရေး၊ လေကြောင်းအာကာသ၊ ကာကွယ်ရေးနှင့် ရေကြောင်းစီးပွား ရေးကဏ္ဍများအထိ ပူးပေါင်းဆောင်ရွက်နိုင်မည့် အခွင့်အလမ်းများကို ဆွေးနွေးခဲ့ကြောင်း သိရပါ သည်။ ပြင်သစ်ဘက်မှ စီးပွားရေးလုပ်ငန်းများအနေဖြင့် ဗီယက်နမ်၏ အုပ်ချုပ်ရေးဆိုင်ရာ လုပ်ထုံးလုပ်နည်းများနှင့် ဥပဒေရေးရာ တည်ငြိမ်မှု၊ ခန့်မှန်းနိုင်မှုတို့အပေါ် စိုးရိမ်ချက်များ ရှိနေသော်လည်း အစိုးရ၏ ပြင်ဆင်ပြောင်းလဲမှုများကို အပြုသဘောဆောင်သည့် လက္ခဏာအဖြစ် လက်ခံကြောင်း ပြောကြားခဲ့ပါသည်။ သံအမတ်ကြီး Hai က ဗီယက်နမ်အစိုးရအနေဖြင့် အုပ်ချုပ်ရေး ပြုပြင်ပြောင်းလဲရေးများကို ဆက်လက်အရှိန်မြှင့်ဆောင်ရွက်ကာ ပွင့်လင်းမြင်သာမှုတိုးမြှင့်၍ ရေရှည်ရင်းနှီးမြှုပ်နှံမှုများအတွက် တည်ငြိမ်၍ ခန့်မှန်းနိုင်သော ဥပဒေ ပြင်ဆင်မှု ပတ်ဝန်းကျင်ကို ဖန်တီးပေးသွားမည်ဖြစ်ကြောင်း အတည်ပြုပြောကြားခဲ့ပါသည်။ EU–Vietnam Investment Protection Agreement (EVIPA) နှင့် ပတ်သက်၍လည်း ပြင်သစ်နိုင်ငံမှ အမြန်ဆုံး အတည်ပြုနိုင်ရေးအတွက် MEDEF International အနေဖြင့် ဆက်လက်ထောက်ခံအားပေးပေးရန် သံအမတ်ကြီးက တိုက်တွန်းခဲ့ကြောင်း သိရပါသည်။

Vietnam Plus                                                                            

DOCA (ရန်ကုန်)

         ဘော်နီယိုကျွန်း၏ ရှားပါး ဒူးရင်းနီဟု လူသိများသော ဒူးရင်းသီးသည် စနစ်တကျစိုက်ပျိုးမည်ဆိုပါက အဓိကစိုက်ပျိုးရေးလုပ်ငန်းနှင့် စီးပွားဖြစ်သီးနှံတစ်ခု ဖြစ်လာနိုင်ကြောင်း Kuamut ပြည်နယ် လွှတ်တော်အမတ် Datuk Masiung Banah က ပြောကြားခဲ့သည်။

         Durian Merah သည် ဘော်နီယိုကျွန်းတွင် မူလပေါက်ရောက်သော ထူးခြားဆန်းပြားသော အသီးတစ်မျိုးဖြစ်သည်။ Durian Merah သည် Sabah ပြည်နယ် မြောက်ပိုင်းရှိ ခရိုင်အချို့တွင် နေထိုင်သည့် Sungai လူမျိုးစုများအတွက် ‌ရှေးယခင်ကပင် ရိုးရာအစားအစာ တစ်ခုခဲ့သည်။ Durian Merah သည် Sarawak အပါအဝင် ဒေသတစ်လျှောက် ထူးခြားသီးနှံအမျိုးအစားများကို နှစ်သက်သူများအကြား လူကြိုက်များလာနေသည်။

           ကိုင်းဆက်နည်းပညာများဆိုင်ရာ သုတေသနပြုလုပ်ရန် Masiung က တောင်းဆိုခဲ့ပြီး  ရည်မှန်းချက်မှာ အသီးများကို ယဉ်ပါးအောင်ပြုလုပ်ပြီး ရာသီအလိုက် သဘာဝအပင်မှ Sabah တွင် အဓိက ခေတ်မီစိုက်ပျိုးရေးထုတ်ကုန်အဖြစ်သို့ ပြောင်းလဲရန်ဖြစ်သင့်ကြောင်း ပြောကြားခဲ့သည်။ ဒူးရင်းစိုက်ပျိုးရေးတွင် အတွေ့အကြုံများက Durian Merah ကို အဖိုးတန်ရိုးရာသီးနှံအဖြစ် မြှင့်တင်ပေးနိုင်ပြီး ခိုင်မာသော စီးပွားရေးအလားအလာရှိသည့် သီးနှံတစ်ခုအဖြစ် မြှင့်တင်ပေးနိုင်ကြောင်းလည်း ပြောကြားခဲ့သည်။

           အသီးများ ရင့်မှည့်သောအခါ မကြွေကျသောကြောင့် လက်ရှိတွင် ရိတ်သိမ်းရန် ခက်ခဲနေကြောင်း၊ ခူးဆွတ်သူများသည် ၎င်းကို ခူးဆွတ်ရန် သစ်ပင်မြင့်များတက်ရမည်ဖြစ်ကြောင်း Masiung က မီးမောင်းထိုးပြခဲ့သည်။

         Durian Merah ၏ ထူးခြားချက်မှာ မှည့်သော်လည်း မကြွေကျခြင်း၊ အသီးခူးဖို့အတွက် ကြီးပြီးမြင့်တဲ့ သစ်ပင်များကို တက်ရကြောင်း Masiung ပြောကြားခဲ့ပြီး တောက်ပသော အနီရောင်အသားသည် ပုံမှန်ဒူးရင်းသီးများနှင့် နှိုင်းယှဉ်ပါက စူးရှသောအနံ့နည်းပြီး အသားပို ခြောက်သွေ့ကာ အရသာပိုချိုမြိန်မှုနည်းကြောင်း သိရှိရပါသည်။

Source : VN Express                                                                           

DOCA (ရန်ကုန်)

          ဗီယက်နမ်နိုင်ငံ၏ တီလားပီးယားငါး (Tilapia) တင်ပို့မှုကဏ္ဍသည် ၂၀၂၆ ခုနှစ်အစပိုင်း တွင် အံ့အားသင့်ဖွယ် တိုးတက်မှုနှုန်းများကို ပြသလျက်ရှိသည်။ အထူးသဖြင့် အမေရိကန်ဈေး ကွက်အတွင်း အဓိကကျသော အခန်းကဏ္ဍမှ ပါဝင်နိုင်ခဲ့ခြင်းနှင့် အမေရိကန်နိုင်ငံ၏ ငါးလုပ်ငန်း တန်ဖိုးကွင်းဆက် မြှင့်တင်ရေး ရင်းနှီးမြှုပ်နှံမှုများကြောင့် ဗီယက်နမ်လုပ်ငန်းရှင်များ အတွက် အခွင့်အလမ်းသစ်များ ပေါ်ပေါက်လာခဲ့သည်။ ဗီယက်နမ် ပင်လယ်စာ တင်ပို့သူများနှင့် ထုတ် လုပ်သူများအသင်း (VASEP) ၏ ထုတ်ပြန်ချက်အရ ၂၀၂၅ ခုနှစ်တွင် တီလားပီးယားငါး တင်ပို့မှုမှ ဝင်ငွေ ဒေါ်လာသန်း ၅၀ ကျော် ရရှိခဲ့ပြီး၊ ယခင်နှစ်များထက် ၁၄၁ ရာခိုင်နှုန်း အထိ စံချိန်တင် မြင့်တက်ခဲ့သည်။ ယခုနှစ်တွင်လည်း ဤအရှိန်အဟုန်ကို ဆက်လက်ထိန်းထားနိုင်ရန် ကြိုးပမ်း လျက်ရှိသည်။ ဤအောင်မြင်မှု၏ အဓိကအချက်မှာ အမေရိကန်ဈေး ကွက်အတွင်း ပြိုင်ဘက် နိုင်ငံများ၏ ငါးထုတ်ကုန်များအပေါ် အမေရိကန်နိုင်ငံမှ အခွန်နှုန်းထားများ တိုးမြှင့်ကောက်ခံ လိုက်ခြင်းနှင့် ဗီယက်နမ်၏ အရည်အသွေးမြင့် ငါးမျိုးစိတ်များကို ပိုမိုလက်ခံလာခြင်းတို့ကြောင့် ဖြစ်သည်။ ၂၀၂၆ ခုနှစ် ဇန်နဝါရီလတွင် အမေရိကန်နိုင်ငံသည် ဗီယက်နမ်၏ ငါးလုပ်ငန်းကဏ္ဍကို ပံ့ပိုးကူညီမည့် ဒေါ်လာ ၁၅.၂ သန်းတန်ဖိုးရှိ ငါးလုပ်ငန်း တန်ဖိုးကွင်းဆက် မြှင့်တင်ရေးစီမံ ကိန်းကို တရားဝင် စတင်လိုက်သည်။ ဤစီမံကိန်းသည် ၅ နှစ်တာ ကာလအတွင်း ဗီယက်နမ် နိုင်ငံ၏ တီလားပီးယားငါး ထုတ်လုပ်မှုစနစ်ကို ခေတ်မီနည်း ပညာများဖြင့် မြှင့်တင်ရန်နှင့် အမေ ရိကန်၏ တင်းကျပ်သော စားသောက်ကုန် ဘေးကင်းလုံခြုံရေး စံချိန်စံညွှန်းများနှင့် ကိုက်ညီစေရန် ရည်ရွယ်သည်။ ဗီယက်နမ်အနေဖြင့် လက်ရှိရရှိထားသော အခွင့်အလမ်းကို အသုံးချကာ တရုတ်နှင့် ဘရာဇီးကဲ့သို့သော အဓိက ပြိုင်ဘက်နိုင်ငံများ၏ နေရာကို အစားထိုးနိုင်ရန် ကြိုးပမ်းလျက်ရှိသည်။ အရည်အသွေးကို ဦးစားပေးသည့် စိုက်ပျိုးမွေးမြူရေးစနစ် (Sustainable Farming) သို့ ကူးပြောင်းခြင်းသည် ၂၀၂၆ ခုနှစ်အတွင်း ဗီယက်နမ်ငါးလုပ်ငန်းကဏ္ဍ၏ အဓိက မဟာဗျူဟာ ဖြစ်လာမည်ဟု စီးပွားရေးကျွမ်းကျင် သူများက သုံးသပ်ထားသည်။ ဇန်နဝါရီလ အတွက် ဗီယက်နမ်နိုင်ငံ၏ တီလားပီးယားငါး တင်ပို့ မှုပမာဏနှင့်ပတ်သက်ပြီး တိကျသော တန်ချိန်စာရင်းကို VASEP သို့မဟုတ် အစိုးရဌာနများမှ ထုတ်ပြန်ထားခြင်း မရှိသေးသော်လည်း ၂၀၂၆ ခုနှစ်၊ ဇန်နဝါရီလတွင် ဗီယက်နမ်၏ ပင်လယ်စာ ပို့ကုန်ဝင်ငွေ စုစုပေါင်းသည် အမေရိကန်ဒေါ်လာ ၈၇၄ သန်း ရှိခဲ့ပြီး ယခင်နှစ် အလားတူ ကာလထက် ၁၃ ရာခိုင်နှုန်း တိုးတက်လာခဲ့ကြောင်း သိရှိရပါသည်။

Source : tuoitre                                                                        

DOCA(ရန်ကုန်)

              အင်ဒိုနီးရှားနှင့် မလေးရှားနိုင်ငံတို့သည် စားနပ်ရိက္ခာဖူလုံရေး၊ အစိမ်းရောင်စီးပွားရေး၊ ပြန်လည်ပြည့်ဖြိုးမြဲစွမ်းအင်နှင့် ညဏ်ရည်တု (AI) နည်းပညာသုတေသနနှင့် အဆင့်မြင့်ပညာရေး ကဏ္ဍတို့တွင် နှစ်နိုင်ငံပူးပေါင်း ဆောင်ရွက်မှု အားကောင်းစေရန် သဘောတူညီခဲ့ကြသည်။ အင်ဒိုနီးရှားနိုင်ငံ အဆင့်မြင့်ပညာရေး၊ သိပ္ပံနှင့် နည်းပညာဝန်ကြီး Brian Yuliarto သည် မလေးရှားနိုင်ငံ အဆင့်မြင့် ပညာရေးဝန်ကြီး Zambry Abdul Kadir နှင့် အင်ဒိုနီးရှားနိုင်ငံတွင် တွေ့ဆုံစဉ်အတွင်း အဆိုပါ နယ်ပယ်များတွင် ပူးပေါင်းဆောင်ရွက်နိုင်မည့် အလားအလာများ ကို ဆွေးနွေးခဲ့ကြခြင်းဖြစ်သည်။ ထိုပူးပေါင်းဆောင်ရွက်မှုသည် ကမ္ဘာလုံးဆိုင်ရာ စိန်ခေါ်မှုများအား ရင်ဆိုင်ဖြေရှင်းရာတွင် နှစ်နိုင်ငံလုံး၏ သုတေသနနဲ့ ဆန်းသစ်တီထွင်မှုများကို အားကောင်းလာစေရန်အတွက် မဟာဗျူဟာမြောက် ခြေလှမ်းတစ်ရပ်ဖြစ်ကြောင်း ဝန်ကြီး Yuliarto က ဖေဖော် ဝါရီလ ၁၇ ရက်‌နေ့တွင် ထုတ်ပြန်သည့် ကြေညာချက်တစ်ခု၌ ပြောကြားခဲ့သည်။ နှစ်နိုင်ငံမှ ပညာရှင်များ၊ သုတေသီများနှင့် တက္ကသိုလ်များအကြား ပိုမိုနီးကပ်သော ပေါင်းစပ်ညှိနှိုင်းမှုများသည် သုတေသနရလဒ်များကို ပြည်သူလူထု၏ ပြဿနာများအတွက် လက်တွေ့ကျသော ဖြေရှင်းချက်များအဖြစ် ပြောင်းလဲပေးနိုင်လိမ့်မည်ဖြစ်ကြောင်း ၎င်းက အလေးပေး ပြောဆိုခဲ့သည်။ တစ်ဖက်တွင်လည်း ဝန်ကြီး Kadir က အင်ဒိုနီးရှားနှင့် မလေးရှားတို့သည် ယခု သဘောတူထားသည့် ဦးစားပေးကဏ္ဍများတွင် အပြန်အလှန် ဖြည့်ဆည်းပေးနိုင်သည့် အားသာချက် ကိုယ်စီရှိကြ သည်ဟု ဆိုသည်။ မူအားဖြင့် နှစ်နိုင်ငံ ပူးပေါင်းဆောင်ရွက်မည့် နယ်ပယ်များအား ရှေ့ဆက်လုပ် ဆောင်ရန်အတွက် နှစ်နိုင်ငံလုံးက ပညာရှင်များပါဝင်သော လုပ်ငန်းအဖွဲ့ (working groups) များ ဖွဲ့စည်းရန် သဘောတူညီခဲ့ကြကြောင်း ၎င်းက မှတ်ချက်ပြုခဲ့သည်။ ဤ မိတ်ဖက်ဆက်ဆံရေး အောက်တွင် နှစ်နိုင်ငံအစိုးရများသည် "မလေးရှား-အင်ဒိုနီးရှား ပညာရေးဆိုင်ရာ မဟာမိတ်အဖွဲ့ (KAMI)" နှင့် ဆက်နွှယ်နေသည့် ရွေးချယ်ထားသော တက္ကသိုလ်များနှင့် သုတေသီများကို ပါဝင်စေမည်ဖြစ်သည်။ အင်ဒိုနီးရှားနိုင်ငံ အဆင့်မြင့်ပညာရေးဦးစီးဌာနသည်လည်း ပူးပေါင်းဆောင်ရွက်မည့် နယ်ပယ်နှင့် ပုံစံများကို သတ်မှတ်ရန်အတွက် မလေးရှားနိုင်ငံရှိ သက်ဆိုင်ရာ ဌာနနှင့် ပဏာမဆွေးနွေးမှုများကို စတင်လုပ်ဆောင်နေပြီဖြစ်ကြောင်း အဆိုပါထုတ်ပြန်ချက်တွင် ဖော်ပြထားသည်။ ခရီးစဉ်အတွင်း ဝန်ကြီး Kadir သည် IPB တက္ကသိုလ်သို့ သွားရောက်ခဲ့ပြီး မလေးရှား ကျောင်းသားများနှင့် တွေ့ဆုံကာ စိုက်ပျိုးရေးနှင့် စားနပ်ရိက္ခာဖူလုံရေးဆိုင်ရာ ပူးပေါင်းဆောင်ရွက်မည့် အစီအစဉ်များကို ဆွေးနွေးခဲ့ကြောင်း သိရှိရပါသည်။

Source : Antara                                                                         

DOCA(ရန်ကုန်)