ပြည်ပကုန်သွယ်မှုသတင်းများ

     အိန္ဒိယ၏ သံမဏိနှင့်ကုန်သွယ်ရေးဝန်ကြီးဌာနများသည် တရုတ်သွင်းကုန်များ အထူးသဖြင့် ဈေးသက်သာသော တရုတ်ကုန်ပစ္စည်းများ တင်သွင်းမှုမြင့်တက်လာခြင်းအတွက် ဆွေးနွေးမှုများပြုလုပ်နေကြကြောင်း ထိပ်တန်းထုတ်လုပ်သူများထံမှ စည်းကြပ်ခွန်များတိုးမြှင့်ကောက်ခံရန်တောင်းဆိုချိန်တွင် အဆိုပါကိစ္စနှင့်ပတ်သက်၍ တိုက်ရိုက်သိရှိသော အစိုးရအရင်းမြစ်တစ်ခုက ၆-၇-၂၀၂၄ ရက်နေ့ (စနေနေ့)တွင်ပြောကြားခဲ့သည်။

       အိန္ဒိယသည် မတ်လ၌ကုန်ဆုံးခဲ့သောဘဏ္ဍာနှစ်တွင် အသားတင်စတီးလ်တင်သွင်းသူအဖြစ်သို့ပြောင်းလဲခဲ့ပြီး ၎င်း၏အချောထည်တင်သွင်းမှုမှာ ဧပြီလနှင့်မေလတွင် (၅)နှစ်တာ အမြင့်ဆုံးစတီးလ်တင်သွင်းမှုလမ်းကြောင်းအတိုင်း ဆက်လက်ရှိနေကြောင်း ယာယီအစိုးရ၏ အချက်အလက်များအရသိရသည်။

        အိန္ဒိယသည် ဧပြီလမှ မေလအတွင်း သံမဏိအချောထည်တန်ချိန် ၁.၁သန်းတင်သွင်းခဲ့ပြီး ယခင်နှစ်ထက် ၁၉.၈ရာခိုင်နှုန်းတိုးလာခဲ့သည်။ သံမဏိဝန်ကြီးဌာနသည် သွင်းကုန်များမြင့်တက်လာမှုနှင့်စပ်လျဉ်း၍ ကူးသန်းရောင်းဝယ်‌ရေးဝန်ကြီးဌာနကိုစုံစမ်းစစ်ဆေးရန် ကြိုးပမ်းခဲ့သည်ဟု အဆိုပါသတင်းအရင်းအမြစ်များကပြောကြားခဲ့ပြီး ဆွေးနွေးမှုများကို လူသိရှင်ကြားထုတ်‌ဖော်ပြောဆိုရန် ငြင်းဆိုခဲ့သည်။

         တရုတ်နိုင်ငံသည် မကြာသေးမီလများအတွင်း အာရှ၏တတိယအကြီးဆုံး စီးပွားရေးနိုင်ငံများသို့ သံမဏိတင်ပို့မှုထိပ်တန်းအဖြစ် ဆက်လက်တည်ရှိနေသဖြင့် အိန္ဒိယသည် ဈေးပေါသော တရုတ်သွင်းကုန်များကိုစောင့်ကြည့်နေကြောင်း သတင်းအရင်းမြစ်များကဆိုသည်။

          တာတာစတီးလ်ကဲ့သို့သော အိန္ဒိယသံမဏိထုတ်လုပ်သူကြီးများက တရုတ်သွင်းကုန်များကို စိုးရိမ်စရာအဖြစ် အလံပြထားသည်။

      အိန္ဒိယ၏သွင်းကုန်များ သိသိသာသာမြင့်တက်လာမှုကြောင့် စိုးရိမ်နေသော သံမဏိစက်ရုံများသည် အစိုးရ၏စွက်ဖက်မှုနှင့် သွင်းကုန်ခွန်များမြင့်မားရန် အကြိမ်ကြိမ်တောင်းဆိုခဲ့သည်။ သို့သော်လည်း ဖက်ဒရယ်သံမဏိဝန်ကြီးဌာနသည် ထိုတောင်းဆိုချက်များကိုငြင်းဆိုခဲ့သည်။

         Arcelor Mittal Nippon Steel India မှ အကြီးတန်းအမှုဆောင် အရာရှိတစ်ဦးက အစိုးရသည် သွင်းကုန်များတိုးလာခြင်းကြောင့် သံမဏိအပေါ်  အခြေခံအကောက်ခွန်ကို ၇.၅%မှ ၁၂.၅ %သို့တိုးမြှင့်ရန် စဉ်းစားသင့်သည်ဟုပြောကြားခဲ့သည်။

Source: economictimes

DOCA(ရန်ကုန်)

      ကမ္ဘောဒီးယားနိုင်ငံသည် ဇူလိုင်လ ၈ရက်နေ့မှ ၁၀ရက်နေ့အထိကျင်းပမည့် ဒုတိယအကြိမ်မြောက် ပြင်သစ်-ကမ္ဘောဒီးယား စီးပွားရေးဖိုရမ်အတွက် အရှိန်မြှင့်တင်နေပြီး ကမ္ဘောဒီးယားသည် ပြင်သစ်ပိုင်စီးပွားရေးလုပ်ငန်းများနှင့်အတူ အောင်မြင်သည့်ဇာတ်လမ်းများရှိခဲ့ကြောင်းသိရပါသည်။ စီးပွားရေးနယ်ပယ်အတွင်းမှ ထင်ရှားသောပြင်သစ်လုပ်ငန်းများသည် ကမ္ဘောဒီးယားနိုင်ငံစီးပွားရေး၏ အကန့်အသတ်ကင်းမဲ့သော အလားအလာများကို မီးမောင်းထိုးလျက်ရှိပါသည်။ လာမည့်အခမ်းအနားသည် ၂၀၂၄ခုနှစ်၊ မတ်လ ၂၈ရက်နေ့ကကျင်းပခဲ့သော ကမ္ဘောဒီးယားကုန်အမှတ်တံဆိပ်ဖိုရမ်၏ နောက်ဆက်အဖြစ် ကျင်းပခြင်းဖြစ်ကြောင်းသိရပါသည်။ ပြင်သစ်-ကမ္ဘောဒီးယားစီးပွားရေးလုပ်ငန်းရှင်များအသင်း (CCIFC) နှင့်အတူ ပြင်သစ်နိုင်ငံ ပြည်ပကုန်သွယ်ရေးအကြံပေး၊ ကမ္ဘောဒီးယားကော်မတီ(CCEF)နှင့် ကမ္ဘောဒီးယားစီးပွားရေးလုပ်ငန်းရှင်များအသင်း(CCC)တို့က ပူးပေါင်းကျင်းပမည့်အခမ်းအနားကို ကမ္ဘောဒီးယားနိုင်ငံဆိုင်ရာ ပြင်သစ်သံရုံး၊ MEDEF International နှင့် Combodian Oknha Association က ပံ့ပိုးကူညီသွားမည်ဟုသိရပါသည်။ လွန်ခဲ့သည့်နှစ်တွင် နှစ်နိုင်ငံကြားကုန်သွယ်ရေးပမာဏမှာ ယူရို ၁.၃၆၃ဘီလီယံရှိခဲ့ပြီး ပြင်သစ်သည် ဂျာမနီပြီးနောက် ဒုတိယအကြီးမားဆုံး ဥရောပကုန်သွယ်ရေးမိတ်ဖက်နိုင်ငံဖြစ်ကြောင်းသိရပါသည်။ ပြင်သစ်နိုင်ငံက အဓိကအားဖြင့် စိုက်ပျိုးမွေးမြူရေးထွက်အစားအစာများ၊ ဆေးဝါးများ၊ သတ္တုထုတ်ကုန်များကို ကမ္ဘောဒီးယားနိုင်ငံသို့တင်ပို့ခဲ့ပြီး အထည်အလိပ်များ၊ စိုက်ပျိုးမွေးမြူရေးထွက် အစားအစာများနှင့် စက်ဘီးများ ပြန်လည်တင်သွင်းခဲ့ကြောင်းသိရပါသည်။ ပြင်သစ်လုပ်ငန်းများသည် လေယာဉ်ကွင်းများ၊ သယ်ယူပို့ဆောင်ရေး၊ ဆက်သွယ်ရေးနှင့်စွမ်းအင်တို့ပါဝင်သည့် အရေးပါသော အခြေခံအဆောက်အဦစီမံကိန်းများတွင် ပါဝင်လျက်ရှိကြောင်းသိရပါသည်။ အဆိုပါစီမံကိန်းများသည် တိုင်းပြည်၏ အခြေခံအဆောက်အဦများကို တိုးတက်စေရုံသာမက စီးပွားရေးဖွံ့ဖြိုးတိုးတက်မှုအတွက် အရေးပါသည့်ချိတ်ဆက်ရေးနှင့် စီးပွားရေးလုပ်ငန်းလည်ပတ်မှုများကို ချောမွေ့စေမည်ဟုသိရပါသည်။ ပြင်သစ်နိုင်ငံ၏ VINCJ အုပ်စုသည် ၁၉၉၅ခုနှစ်မှစတင်၍ အမေရိကန်ဒေါ်လာ တစ်ဘီလီယံခန့်ရင်းနှီးမြှုပ်နှံထားသည့် လေယာဉ်ကွင်းများမှာ ကမ္ဘောဒီးယားနိုင်ငံ၏ ခရီးသွားကဏ္ဍဖွံ့ဖြိုးတိုးတက်ရေးနှင့် စီးပွားရေးဖွံ့ဖြိုးတိုးတက်မှုတို့ကို မြှင့်တင်ပေးနိုင်စေခဲ့ကြောင်းသိရပါသည်။ ထို့ပြင် Total၊ Accor or Bollore’ စသည့်ကုမ္ပဏီများသည် စွမ်းအင်ထောက်ပံ့ပို့ဆောင်ရေး စသည့်အဓိကနယ်ပယ်များကို နိုင်ငံတကာအဆင့်အတန်းမီစေရေးနှင့် ပြည်တွင်းမှ အတတ်ပညာရှင်များဖွံ့ဖြိုးတိုးတက်စေရေးတို့တွင် ပူးပေါင်းပါဝင်လျက်ရှိပါသည်။ Decathlan၊  BRED Bank နှင့် Vinci တို့ကဲ့သို့သော ကုမ္ပဏီများသည် လက်လီရောင်းချခြင်း၊ ဘဏ်လုပ်ငန်းနှင့် အခြေခံအဆောက်အဦကဏ္ဍတို့တွင်  အဓိကအာရုံစိုက်ပူးပေါင်းပါဝင်နေကြောင်းသိရပါသည်။ ပြင်သစ်နိုင်ငံသည် ကမ္ဘောဒီးယားကုန်ပစ္စည်းများတင်သွင်းခြင်းနှင့် ပြင်သစ်ထုတ်ကုန်များတင်ပို့ခြင်းတို့ဖြင့် ကမ္ဘောဒီးယား၏အရေးပါဆုံး ကုန်သွယ်‌ရေးမိတ်ဖက်နိုင်ငံများအနက် တစ်ခုဖြစ်ကြောင်းသိရပါသည်။

Source: Khmer Times

DOCA(ရန်ကုန်)

      ယခုနှစ်၏ ပထမ(၆)လတာကာလတွင် ဗီယက်နမ်နှင့်တရုတ်အကြား အပြန်အလှန်ကုန်သွယ်မှုပမာဏမှာ အမေရိကန်ဒေါ်လာ ၁၀၀ဘီလီယံနီးပါးထိရောက်ရှိခဲ့ကြောင်းသိရပါသည်။ ဗီယက်နမ်နိုင်ငံစက်မှုနှင့် ကုန်သွယ်ရေးဝန်ကြီးဌာနအဆိုအရ ကမ္ဘာလုံးဆိုင်ရာစီးပွားရေးခက်ခဲမှုများနှင့် ပထဝီနိုင်ငံရေးပဋိပက္ခများရှိနေဆဲဖြစ်သော်လည်း နှစ်နိုင်ငံကြား အပြန်အလှန်ကုန်သွယ်ရေးသည် အထင်ကြီးစရာ ပြန်လည်နာလန်ထူလာကြောင်းသိရပါသည်။ တရုတ်နိုင်ငံသည် ဗီယက်နမ်နိုင်ငံ၏ ကမ္ဘာပေါ်တွင် အကြီးဆုံးကုန်သွယ်ရေးမိတ်ဖက်၊ အကြီးဆုံးတင်သွင်းရာဈေးကွက်နှင့် ဒုတိယအကြီးဆုံး တင်ပို့ရာဈေးကွက်ဖြစ်ကြောင်းသိရပါသည်။ ဗီယက်နမ်နိုင်ငံအထွေထွေစာရင်းအင်းရုံး၏ နောက်ဆုံးဖော်ပြချက်အရ ယခုနှစ်၏ ပထမနှစ်ဝက်တွင် ဗီယက်နမ်နိုင်ငံ၏ တရုတ်နိုင်ငံသို့တင်ပို့မှုမှာ အမေရိကန်ဒေါ်လာ ၂၇.၈ဘီလီယံ ရောက်ရှိခဲ့ပြီး လွန်ခဲ့သည့်နှစ်၏ တူညီသည့်ကာလထက် ၅.၃ရာခိုင်နှုန်းပိုခဲ့ကြောင်းသိရပါသည်။ ဗီယက်နမ်သည် တရုတ်နိုင်ငံထံမှ အမေရိကန်ဒေါ်လာ ၆၇ဘီလီယံတန်ဖိုးရှိသည့် ကုန်ပစ္စည်းများကိုတင်သွင်းခဲ့ရာ လွန်ခဲ့သည့်နှစ်၏ တူညီသည့်ကာလထက် ၃၄.၇ရာခိုင်နှုန်းမြင့်တက်ခဲ့ကြောင်းသိရပါသည်။ ဗီယက်နမ်နိုင်ငံသည် တရုတ်နိုင်ငံနှင့် ကုန်သွယ်ရေးလိုငွေ အမေရိကန်ဒေါ်လာ ၃၉.၂ဘီလီယံရှိကြောင်းသိရပါ သည်။

      အာဆီယံ-တရုတ် လွတ်လပ်စွာကုန်သွယ်ရေးဧရိယာ(ACFTA)နှင့် ဒေသတွင်းစဉ်ဆက်မပြတ်စီးပွားရေးပူးပေါင်းမှု(ACEP) အစရှိသည့် ကုန်သွယ်‌ရေးသဘောတူညီမှုများကြောင့် နှစ်နိုင်ငံအကြား ကုန်သွယ်မှုမြှင့်တင်ရန် သိသာသည့်အလားအလာများရှိကြောင်းသိရပါသည်။ ဘေဂျင်းမြို့ရှိ ဗီယက်နမ်ကုန်သွယ်ရေးရုံးကလည်း တရုတ်နိုင်ငံ၏ စီးပွားရေးသည် အပေါင်းလက္ခဏာဆောင်သည့် ပြန်လည်နာလန်ထူလာကြောင်းပြောကြားခဲ့ပါသည်။ တရုတ်အစိုးရကလည်း ဈေးကွက်အတွင်းတင်ပို့ထားသည့် အရည်အသွေးပြည့်မီသည့် ထုတ်ကုန်များအတွက် အထောက်အပံ့ပေးသော အခြေအနေများဖန်တီးပေးမည့် တင်သွင်းမှု-တင်ပို့မှုစီမံခန့်ခွဲမှုမူဝါဒများကို ထုတ်ပြန်နေလျက်ရှိကြောင်းသိရပါသည်။ ကုန်သွယ်ရေးရုံးကလည်း ဗီယက်နမ်နိုင်ငံသည် တရုတ်နိုင်ငံသို့တင်ပို့မှုမြှင့်တင်ရန်အတွက် များစွာသော အခွင့်အလမ်းများရှိနေကြောင်းထောက်ပြခဲ့ပါသည်။ တရုတ်လုပ်ငန်းများသည် ဗီယက်နမ်နိုင်ငံထံမှ ထုတ်ကုန်များ၊ ပြုပြင်ပြောင်းလဲထားသော ထုတ်ကုန်များနှင့် ဒူးရင်း၊ ဖရဲသီး၊ ငှက်ပျောသီး အစရှိသော အသီးများပါဝင်သည့် စိုက်ပျိုးရေးထုတ်ကုန်များကိုတင်သွင်းရန် စိတ်ဝင်စားနေကြောင်းသိရပါသည်။ ထို့ပြင် အေးခဲထားသော ဒူးရင်းနှင့် လတ်ဆတ်သောအုန်းသီးများကို တရားဝင်တင်ပို့ရန် ညှိနှိုင်းမှုများပြည့်စုံသွားပြီဖြစ်သောကြောင့် အေးခဲထားသော စိုက်ပျိုးရေးထုတ်ကုန်များပါက တရုတ်နိုင်ငံသို့ တရားဝင်တင်ပို့နေပြီဟုသိရပါသည်။

Source: Vietnam plus

DOCA(ရန်ကုန်)

       ဗီယက်နမ်နိုင်ငံစိုက်ပျိုးရေးနှင့် ကျေးလက်ဒေသဖွံ့ဖြိုးရေး ဒုတိယဝန်ကြီး Phung Due Tien က ယခုနှစ်တွင် ဗီယက်နမ်နိုင်ငံ၏ လယ်ယာ-သစ်တော-‌ရေထွက်ကုန်တင်ပို့မှုသည် ရည်မှန်းချက်ဖြစ်သည့် အမေရိကန်ဒေါ်လာ (၅၅-၅၆) ဘီလီယံကိုရောက်ရှိနိုင်ကြောင်း ပြောကြားခဲ့ပါသည်။ ယခုနှစ် ပထမနှစ်ဝက်တာကာလ၏ တင်ပို့မှုရလဒ်များသည် ရည်မှန်းချက်ပြည့်မီရန်အတွက် အခြေခံအုတ်မြစ်ကို ဖန်တီးနိုင်ခဲ့ကြောင်းသိရပါသည်။

       ယခုနှစ်၏ ပထမ(၆)လတာကာလတွင် လယ်ယာ-သစ်‌တော-ရေထွက်ကုန်တင်ပို့မှုစုစုပေါင်းသည် အမေရိကန်ဒေါ်လာ ၂၉.၂ဘီလီယံရှိခဲ့ပြီး လွန်ခဲ့သည့်နှစ်၏ တူညီသည့်ကာလထက် ၁၉ရာခိုင်နှုန်းမြင့်တက်လာကြောင်းသိရပါသည်။ လယ်ယာထွက်ကုန်များတင်ပို့မှုသည် အမေရိကန်ဒေါ်လာ ၁၅.၇၆ရာခိုင်နှုန်း(၂၄.၄ရာခိုင်နှုန်းမြင့်တက်)၊ အဓိကသစ်တောထွက်ကုန်များတင်ပို့မှုသည် အမေရိကန်ဒေါ်လာ ၇.၉၅ဘီလီယံ(၂၁.၂ရာခိုင်နှုန်းမြင့်တက်)၊ ရေထွက်ကုန်တင်ပို့မှုသည် အမေရိကန်ဒေါ်လာ ၄.၃၆ဘီလီယံ(၄.၉ရာခိုင်နှုန်းမြင့်တက်)၊ စိုက်ပျိုးမွေးမြူမှုထုတ်ကုန်များတင်ပို့မှုသည် အမေရိကန်ဒေါ်လာ ၂၄၀သန်း(၃.၈ ရာခိုင်နှုန်းမြင့်တက်) အသီးသီးရှိခဲ့ကြောင်းသိရပါသည်။

      ကော်ဖီ၊ ရော်ဘာ၊ ဆန်၊ သစ်သီးများနှင့် ဟင်းသီးဟင်းရွက်များ၊ သီဟိုဠ်စေ့၊ ပုစွန်နှင့် သစ်ထွက်ကုန်များတင်ပို့မှုမှ အမေရိကန်ဒေါ်လာ ၁ဘီလီယံကျော် အသီးသီးစီရရှိခဲ့ကြောင်းသိရပါသည်။ ဗီယက်နမ်သည် ယခုနှစ် ပထမ(၆)လတာကာလတွင် အမေရိကန်ဒေါ်လာ ၂.၉၈ဘီလီယံတန်ဖိုးရှိသည့် ဆန်တန်ချိန် ၄.၆၈သန်း၊ အမေရိကန်ဒေါ်လာ ၁.၉၂ဘီလီယံတန်ဖိုးရှိသည့် သီဟိုဠ်စေ့တန်ချိန်၃၅၀၀၀၀နှင့် အမေရိကန်ဒေါ်လာ ၃.၂၂ဘီလီယံတန်ဖိုးရှိသည့် ကော်ဖီတန်ချိန် ၉၀၂၀၀၀တင်ပို့ခဲ့ကြောင်းသိရပါသည်။

      ယခုနှစ် ပထမနှစ်ဝက်တွင် စိုက်ပျိုးရေးနှင့်ကျေးလက်ဒေသဖွံ့ဖြိုးရေးဝန်ကြီးဌာနသည် ၂၀၂၃ခုနှစ်ကုန်ပိုင်းတွင် ခွင့်ပြုချက်ရရှိခဲ့သည့် တရုတ်၊ အမေရိကန်၊ ဂျပန်နှင့် ဥရောပသမဂ္ဂတို့ပါဝင်သည့် အဓိကဈေးကွက်များသို့ လယ်ယာ-သစ်တော-ရေထွက်ကုန်များ တင်ပို့မှုမြှင့်တင်ရန်စီမံကိန်းများကို အကောင်အထည်ဖော်ရန် အာရုံစိုက်ခဲ့ကြောင်းသိရပါသည်။ အဆိုပါကြိုးပမ်းအားထုတ်မှုများကျေးဇူးကြောင့် တင်ပို့မှုတန်ဖိုးဆက်လက်မြင့်တက်ခဲ့ပြီး ကုန်သွယ်ရေးပိုငွေ အမေရိကန်ဒေါ်လာ ၈.၂၂ဘီလီယံရရှိခဲ့ကာ လွန်ခဲ့သည့်နှစ်၏ တူညီသည့်ကာလထက် ၆၂.၄ရာခိုင်နှုန်းမြင့်တက်ခဲ့ကြောင်းသိရပါသည်။

         အမြင့်ဆုံးကုန်သွယ်ရေးပိုငွေပြခဲ့သည့် အမျိုးအစား(၅)ခုမှာ သစ်နှင့်သစ်‌တောထုတ်ကုန်များ(အမေရိကန်ဒေါ်လာ ၆.၁၆ဘီလီယံ)၊ ကော်ဖီ(အမေရိကန်ဒေါ်လာ ၃.၁၄ဘီလီယံ)၊ ဟင်းသီးဟင်းရွက်နှင့်သစ်သီးများ(အမေရိကန်ဒေါ်လာ ၂.၄ဘီလီယံ)၊ ဆန်(အမေရိကန်ဒေါ်လာ ၂.၃၁ဘီလီယံ)နှင့် ပုစွန်(အမေရိကန်ဒေါ်လာ ၁.၄၃ဘီလီယံ)တို့ဖြစ်ကြောင်းသိရပါသည်။

Source: Vietnam plus

DOCA(ရန်ကုန်)

      ၂၀၂၄ ခုနှစ်၊ ပထမ(၅)လတာကာလတွင် ထိုင်းနိုင်ငံသည် ဘတ် ၉၄.၆ဘီလီယံ (အမေရိကန်ဒေါ်လာ ၂.၆ဘီလီယံ) တန်ဖိုးရှိသည့် ဆန်တန်ချိန် ၄.၀၆သန်းတင်ပို့ခဲ့ပြီး လွန်ခဲ့သည့်နှစ်၏ တူညီသည့်ကာလထက် ၁၆.၅ရာခိုင်နှုန်းမြင့်တက်ခဲ့ကြောင်း ထိုင်းနိုင်ငံဆန်တင်ပို့သူများအသင်း(TREA) ဥက္ကဋ္ဌ Charoen Laothamatas က ပြောကြားခဲ့ပါသည်။ သို့သော် မေလတွင် ဆန်ဖြူနှင့်ပေါင်းဆန်မှာယူမှုလျော့ကျခဲ့ခြင်းကြောင့် ထိုင်းနိုင်ငံ၏ဆန်တင်ပို့မှုမှာ ၆၅၉၅၆၆တန်ဖြင့် ၂၉.၃ရာခိုင်နှုန်းလျော့ကျခဲ့ကြောင်းသိရပါသည်။ ထိုင်းနိုင်ငံ၏ အဓိကဆန်ဖြူတင်ပို့သည့် ဈေးကွက်များမှာ ဖိလစ်ပိုင်၊ အင်ဒိုနီးရှား၊ အီရတ်၊ ဂျပန်၊ အန်ဂိုလာ၊ မလေးရှား၊ ကင်မရွန်းနှင့် မိုဇမ်ဘစ်တို့ဖြစ်ပြီး ပေါင်းဆန်အတွက် အဓိကဈေးကွက်များမှာ တောင်အာဖရိကနှင့် ဘီနင်တို့ဖြစ်ကြောင်းသိရပါသည်။ Thai Hom Mali ဆန်မွှေးအတွက် အဓိကဈေးကွက်များမှာ အမေရိကန်၊ ဟောင်ကောင်၊ ကနေဒါ၊ စင်္ကာပူ၊ တရုတ်နှင့် ဩစတြေးလျတို့ဖြစ်ကြောင်းသိရပါသည်။ Charoen က ထိုင်းဆန်ဈေးနှုန်းများမှာ အိန္ဒိယ၊ ဗီယက်နမ်နှင့် ပါကစ္စတန်တို့မှထုတ်လုပ်သည့် ဆန်ဈေးနှုန်းများထက် အများအပြားမြင့်မားနေပြီး ထိုသို့ ဈေးနှုန်းကွာဟမှုကြောင့် ဖိလစ်ပိုင်နှင့် အင်ဒိုနီးရှားတို့မှာ ဗီယက်နမ်နိုင်ငံမှ တင်သွင်းမှုတိုးမြင့်လာကြောင်းပြောကြားခဲ့ပါသည်။ အိန္ဒိယနိုင်ငံသည် ၂၀၂၄ခုနှစ်၏ ပထမ(၅)လတွင် ဆန်တန်ချိန် ၇.၂၀သန်းဖြင့် ကမ္ဘာ့အကြီးဆုံး ဆန်တင်ပို့သည့်နိုင်ငံအဖြစ်ရပ်တည်နေပြီး ထိုင်းနိုင်ငံက တန်ချိန်  ၄.၀၆သန်း၊ ဗီယက်နမ်က တန်ချိန် ၄.၀၃သန်း၊ ပါကစ္စတန်က တန်ချိန် ၃.၀၂သန်းနှင့် အမေရိကန်က တန်ချိန် ၁.၅သန်း အသီးသီးတင်ပို့ခဲ့ကြကြောင်းသိရပါသည်။ ၂၀၂၄ခုနှစ်၏ ပထမ(၅)လတွင် ထိုင်းဆန်တင်သွင်းသည့် ထိပ်ဆုံး(၅)နိုင်ငံမှာ အင်ဒိုနီးရှားက တန်ချိန်၉၁၄၇၆၀၊ အီရတ်က တန်ချိန်၃၆၃၄၃၈၊ အမေရိကန်က တန်ချိန်၃၄၄၈၇၃၊ ဖိလစ်ပိုင်က တန်ချိန်၂၈၀၅၂၂နှင့် တောင်အာဖရိကက တန်ချိန်၂၂၉၃၆၉တို့ဖြစ်ကြောင်းသိရပါသည်။

Source: Vietnam plus

DOCA(ရန်ကုန်)