ပြည်ပကုန်သွယ်မှုသတင်းများ

အာဖရိကဖွံ့ဖြိုးရေးဘဏ်က မော်ရိုကိုအတွက် ယူရို ၁၅၀ သန်း ချေးငွေခွင့်ပြု

အာဖရိကဖွံ့ဖြိုးရေးဘဏ် (AfDB) သည် မော်ရိုကိုနိုင်ငံအတွက် အခြေခံအဆောက်အအုံ များ အဆင့်မြှင့်တင်ရန်နှင့် အများပြည်သူဝန်ဆောင်မှုများကို လက်လှမ်းမီမှု ပိုမိုကောင်းမွန်စေ ရန်အတွက် ယူရို ၁၅၀ သန်း (အမေရိကန်ဒေါ်လာ ၁၇၆ သန်းခန့်) ချေးငွေတစ်ရပ်ကို အတည်ပြု ခဲ့ကြောင်း မော်ရို ကိုနိုင်ငံရှိ AfDB ကိုယ်စားလှယ်က ဒီဇင်ဘာလ ၁၁ ရက်နေ့တွင် ပြောကြားခဲ့ သည်။ ကိုယ်စားလှယ်၏ ထုတ်ပြန်ချက်တစ်ခုအရ ချေးငွေကို မြောက်အာဖရိကနိုင်ငံရှိ ဒေသခံ မြူနီစီပယ်များအတွက် အခြေခံ အဆောက်အအုံနှင့် ရင်းနှီးမြှုပ်နှံမှုစီမံကိန်းများ ကို ငွေကြေးထောက်ပံ့ရန် တာဝန်ရှိသော ပြည်နယ်နှင့်တိုင်းဒေသကြီး ဖွံ့ဖြိုးတိုးတက်ရေး ဘဏ္ဍာရေးအဖွဲ့ အစည်းတစ်ခုဖြစ်သည့် မြူနီစီပယ်ပစ္စည်းရန်ပုံ ငွေအဖွဲ့မှစီမံခန့်ခွဲမည်ဖြစ်သည်။ယင်းရန်ပုံငွေကြောင့်ဒေသခံမြူနီစီပယ်များအနေဖြင့်ရေရှည်တည်တံ့သောအခြေခံအဆောက်အအုံများတွင် ရင်းနှီးမြှုပ်နှံနိုင်မည်ဖြစ်ပြီး မရှိမဖြစ်လိုအပ်သော ဝန်ဆောင်မှုများကို ရယူအသုံးပြုနိုင်မှုကို မြှင့်တင်ပေးမည်၊ ရာသီဥတုဒဏ်ခံနိုင်ရည်ကို မြှင့်တင်ပေးမည်၊ အထူးသဖြင့် ကျေးလက်ဒေသများတွင် နယ်မြေချိတ်ဆက်မှုကို မြှင့်တင်ပေးမည်ဖြစ်သည်ဟု ကြေ ညာချက်တွင် ဖြည့်စွက်ဖော်ပြထားသည်။ လမ်းနှင့် သယ်ယူပို့ဆောင်ရေး အခြေခံအဆောက်အအုံ၊ သောက်သုံးရေရရှိရေး၊ မြို့ပြပြန်လည်ပြုပြင်မွမ်းမံခြင်းနှင့် ပညာရေး၊ လူမှုယဉ်ကျေးမှု နှင့် အားကစား အဆောက်အအုံများ ဖွံ့ဖြိုးတိုးတက်ရေးတို့သည် ရန်ပုံငွေ၏ ဦးစားပေးများထဲတွင် ပါဝင်သည်။ AfDB ၏ မော်ရိုကို နိုင်ငံဆိုင်ရာ မန်နေဂျာ Achraf Hassan Tarsim က ထုတ်ပြန်ချက်တွင် ရန်ပုံငွေသည် "အမြင့်ဆုံးပတ်ဝန်းကျင်နှင့် လူမှုရေးစွမ်းဆောင်ရည် စံနှုန်းများနှင့်အညီ နယ်မြေဖွံ့ဖြိုးတိုးတက်ရေး စီမံကိန်းများ ဖြန့်ကျက်ခြင်း" ကို အားကောင်းစေမည်ဟု ပြောကြားခဲ့သည်။ AfDB ၏ အဆိုအရ ဘဏ်သည် လက်ရှိတွင် နိုင်ငံအတွင်းရှိ ကဏ္ဍအမျိုးမျိုးတွင် စီမံကိန်းပေါင်း ၁၅၀ ကျော် ကိုအကောင်အထည်ဖော်နေပြီး စုစုပေါင်း ကတိကဝတ်မှာ အမေရိကန်ဒေါ်လာ ၁၅ ဘီလီယံ ကျော် ရှိကြောင်းသိရသည်။

DOCA(ရန်ကုန်)

အိန္ဒိယနိုင်ငံရှိ အမျိုးသမီးစွန့်ဦးတီထွင်လုပ်ငန်းရှင်များအတွက် ငွေကြေးထောက်ပံ့မှု တိုးမြှင့်ရန် အမေရိကန်ဒေါ်လာ သန်း ၁၀၀ ချေးငွေ ADB အတည်ပြု

ပြည်ပကုန်သွယ်မှုသတင်းများ

အိန္ဒိယနိုင်ငံရှိ ဝင်ငွေနည်းအုပ်စုများမှ အမျိုးသမီးငွေချေးသူများအတွက် အသေးစားနှင့် အလတ်စားစီးပွားရေးလုပ်ငန်းများ (MSMEs) ၏ စီးပွားရေးချေးငွေများ တိုးမြင့်ရရှိနိုင်စေရန်အတွက် အာရှဖွံ့ဖြိုးရေးဘဏ် (ADB) သည် ဒီဇင်ဘာလ ၁၂ ရက်နေ့တွင် Five-Star Business Finance Limited (FBFL) နှင့် အမေရိကန်ဒေါ်လာ သန်း ၁၀၀ ချေးငွေ သဘော တူညီချက်တစ်ရပ်ကို လက်မှတ်ရေးထိုးခဲ့ကြောင်း ပြောကြားခဲ့သည်။ အမျိုးသမီးငွေချေးသူ များအတွက် ကုမ္ပဏီ၏ MSME ချေးငွေအစုစုကို တိုးမြှင့်ရန် ရည်ရွယ်သည့် စီမံကိန်းအတွက် ချေးငွေကို အသုံးပြုသွားမည်ဟု ဘဏ်က ပြောကြားခဲ့သည်။ ရန်ပုံငွေများကို နိုင်ငံတကာ စံနှုန်းများနှင့် ကိုက်ညီသော လူမှုရေးဘဏ္ဍာရေး မူဘောင်အောက်တွင် ဖြန့်ကျက်သွားမည် ဖြစ်ပြီး ADB နည်းပညာအကူအညီဖြင့်ပြင်ပမှအတည်ပြုသွားမည်ဖြစ်သည်။၎င်းသည် FBFL အား ၎င်း၏လုပ်ငန်းဆောင်တာများတွင် စိတ်ကြိုက်ပြင်ဆင်ထားသော ဖောက်သည်ထိတွေ့ ဆက်ဆံမှု၊ ဒစ်ဂျစ်တယ်ငွေကြေးဆိုင်ရာ အသိပညာပေးအစီအစဉ် များနှင့် အားလုံးပါဝင်သော အလုပ်ခွင်သင်တန်းများ အပါအဝင် ကျား၊မ ခွဲခြားမှုတုံ့ပြန်မှုဆိုင်ရာ အလေ့အကျင့်များကို ထည့်သွင်းရာတွင်လည်း ပံ့ပိုးပေးသွားမည်ဖြစ်သည်။ "အိန္ဒိယနိုင်ငံရှိ အမျိုးသမီး စွန့်ဦးတီထွင် လုပ်ငန်းရှင်များ၊ အထူးသဖြင့် ဝင်ငွေနည်းပါးသော ကဏ္ဍများမှ လုပ်ငန်းရှင်များသည် အာမခံပစ္စည်းမရှိခြင်း၊ တရားမဝင်ဝင်ငွေရင်းမြစ်များနှင့် ငွေကြေးဆိုင်ရာ ဗဟုသုတ အကန့်အသတ်ရှိ ခြင်းကဲ့သို့သော စနစ်တကျအတားအဆီးများနှင့် ရင်ဆိုင်နေရကြောင်း အိန္ဒိယဆိုင်ရာ ADB ၏ နိုင်ငံ ဆိုင်ရာညွှန်ကြားရေးမှူး Mio Oka က ပြောကြားခဲ့သည်။ FBFL သည် အဆင့် ၃ မြို့များ နှင့် အခြား မြို့များရှိ MSME များကို ငွေကြေးထောက်ပံ့ပြီး အမျိုးသမီးငွေချေးသူများကို ပံ့ပိုးပေးခြင်းအပါအဝင် ဝန်ဆောင်မှုနည်းပါးသော အပိုင်းများကို ဝန်ဆောင်မှုပေးရာတွင် မှတ်တမ်းကောင်းရှိသည်။ ကုမ္ပဏီသည် အိန္ဒိယနိုင်ငံတစ်ဝှမ်းရှိ ဘဏ်ခွဲပေါင်း ၇၀၀ ကျော်မှ တစ်ဆင့်လည်ပတ်နေပြီး ငွေချေးသူ ၄၀၀,၀၀၀ ကျော်ကို ဝန်ဆောင် မှုပေးလျှက်ရှိကြောင်း သိရသည်။

DOCA(ရန်ကုန်)

ပို့ကုန်မြှင့်တင်ရန် MoC မှ ကမ္ဘောဒီးယား FTA Portal ကို စတင်လိုက်ပါပြီ

ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ၁၂-၁၂-၂၀၂၅ ရက်နေ့တွင် ပိုမိုခိုင်မာသောကုန်သွယ်ရေး ကွန်ရက်များကို မြှင့်တင်ရန်နှင့် ကမ္ဘောဒီးယားပို့ကုန်များအတွက် အခွင့်အလမ်းအသစ်များ ဖန်တီးပေးရန်အတွက် ကမ္ဘောဒီးယား လွတ်လပ်သောကုန်သွယ်ရေးသဘောတူညီချက် (Cambodia FTA Portal) ကို စတင်ဖွင့်လှစ်ခဲ့သည်။ ဖွင့်ပွဲအခမ်းအနားကို စီးပွားရေးနှင့်ကူးသန်းရောင်းဝယ်ရေးဝန်ကြီး Cham Nimul၊ ကမ္ဘောဒီးယားနိုင်ငံဆိုင်ရာ သြစတြေးလျသံအမတ်ကြီး Derek Yip၊ သက်ဆိုင်ရာဝန်ကြီးဌာနများမှ ကိုယ်စားလှယ်များနှင့် အခြားသူများက တက်ရောက်ခဲ့ကြ သည်။ ဖွင့်ပွဲအခမ်းအနားတွင် Nimul က အွန်လိုင်း Portal သည် စီးပွားရေးလုပ်ငန်းရှင်များ၊ ရင်းနှီးမြှုပ်နှံသူများ၊ ပို့ကုန်လုပ်ငန်းရှင်များ၊ ထုတ်လုပ်သူများ၊ သုတေသီများနှင့် ပြည်သူလူထုအတွက် အသင့်တော်ဆုံး ဦးစားပေးကုန်သွယ်ရေးစနစ် သို့မဟုတ် FTA ကို အလွယ်တကူရှာဖွေရွေးချယ်နိုင်ရန် ကူညီပေးရန် ဒီဇိုင်းထုတ်ထားကြောင်း ပြောကြားခဲ့သည်။ အဆိုပါ ပလက်ဖောင်းသည် ကမ္ဘောဒီးယားနိုင်ငံ၏ ကမ္ဘာလုံးဆိုင်ရာယှဉ်ပြိုင်နိုင်စွမ်းကို မြှင့်တင်ရန်နှင့် အသေးစားစီးပွားရေးလုပ်ငန်းများမှ မူဝါဒချမှတ်သူများအထိ အကျိုးတူ ပါဝင်သူအားလုံးသည် ကုန်သွယ်မှုအချက်အလက်များကို အဆင်ပြေစေပြီး နောက်ဆုံးပေါ် ဝင်ရောက်ခွင့်ရရှိစေရေး သေချာစေရန်အတွက် သိသာထင်ရှားသောခြေလှမ်းတစ်ခုကို ကိုယ်စားပြုကြောင်း ထပ်လောင်းပြောကြားခဲ့သည်။ ကမ္ဘောဒီးယားနိုင်ငံဆိုင်ရာ သြစတြေးလျသံရုံး၏ အဆိုအရ အဆိုပါ Portal သည် ပို့ကုန်လုပ်ငန်းရှင်များအား ကမ္ဘောဒီးယား၏ လွတ်လပ်စွာကုန်သွယ်ရေးသဘောတူညီချက်များမှ အပြည့်အဝ အကျိုးကျေးဇူးရယူနိုင်စေပြီး ပို့ကုန်များ၊ ယှဉ်ပြိုင်နိုင်စွမ်းနှင့် ဖွံ့ဖြိုးတိုးတက်မှုကို မြှင့်တင်ပေးမည် ဖြစ်သည်။

DOCA(ရန်ကုန်)

ဒစ်ဂျစ်တယ်စီးပွားရေးကို မြှင့်တင်ရန် တရုတ်နိုင်ငံတွင် AI သင်တန်းပြီးဆုံးခဲ့သည့် ကမ္ဘောဒီးယားကိုယ်စားလှယ်အဖွဲ့

ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံ စက်မှုလုပ်ငန်း၊ သိပ္ပံ၊ နည်းပညာနှင့် ဆန်းသစ်တီထွင်မှုဝန်ကြီးဌာန (MISTI) မှ ကိုယ်စားလှယ်အဖွဲ့သည် တရုတ်နိုင်ငံတွင် နှစ်ပတ်ကြာ အထူးပြု ဉာဏ်ရည်တု (AI) သင်တန်း အစီအစဉ်ကို ပြီးမြောက်ခဲ့ပြီး နိုင်ငံ၏ စက်မှုကဏ္ဍအတွင်း အဆင့်မြင့် နည်းပညာများ ပေါင်းစပ်မှုကို အရှိန်မြှင့်တင်ရန် ရည်ရွယ်ထားသည်။ အဖွဲ့ဝင်ငါးဦးပါ ကိုယ်စားလှယ်အဖွဲ့သည် တရုတ်နိုင်ငံ၊ Nanning (နန်နင်)မြို့တွင် နိုဝင်ဘာ ၂၆ ရက်မှ ဒီဇင်ဘာ ၉ ရက်အထိ ကျင်းပခဲ့သော အာဆီယံနိုင်ငံများမှ လူငယ်စီးပွားရေးခေါင်းဆောင်များ အတွက် ဉာဏ်ရည်တုစွမ်းရည်မြှင့်တင်ရေးဆိုင်ရာ သင်တန်းသို့ တက်ရောက်ခဲ့ကြသည်။ တရုတ်နိုင်ငံ၊ ကူးသန်းရောင်းဝယ်ရေးဝန်ကြီးဌာနမှ ကြီးမှူး၍ Guangxi International Business Vocational College မှ စီစဉ်သော ဤအစီအစဉ်သည် ပြောင်းလဲနေသော ဒစ်ဂျစ်တယ်စီးပွားရေးတွင် ဗဟုသုတနှင့် လက်တွေ့ကျွမ်းကျင်မှုများကို ပေါင်းကူးပေးရန် ရည်ရွယ်ထားသည်။ MISTI အရာရှိများက ကမ္ဘောဒီးယားနိုင်ငံတွင် စက်မှုဆန်းသစ်တီထွင်မှု ကို မောင်းနှင်ရန် Ai ကို အသုံးချရာတွင် သင်တန်းသည် အဖိုးတန်သော အတွေးအမြင်များကို ပေးစွမ်းခဲ့ကြောင်း၊ နောက်မျိုးဆက် အာဆီယံစီးပွားရေးခေါင်းဆောင်များနှင့် သက်ဆိုင်ရာ အစိုးရအရာရှိများအား AI ၏ အခြေခံနှင့် အသုံးချဗဟုသုတနှစ်မျိုးလုံးကို သင်ကြားပေး ကြောင်း ၎င်းတို့က မှတ်ချက်ပြုခဲ့ကြသည်။ ထို့အပြင်၊ အစီအစဉ်သည် ဒစ်ဂျစ်တယ် ကျွမ်းကျင်မှု ကွာဟချက်များကို ပေါင်းကူးရန်၊ ဆန်းသစ်တီထွင်မှုကို မြှင့်တင်ရန်နှင့် ၎င်းတို့၏ သက်ဆိုင်ရာနိုင်ငံစီးပွားရေးနှင့် စီးပွားရေးကဏ္ဍများအတွင်း AI ပေါင်းစပ်မှုကို မောင်းနှင်နိုင်စွမ်းရှိသော ကျွမ်းကျင်ပညာရှင် အသိုက်အဝန်းတစ်ခု တည်ဆောက်ရန် ရည်ရွယ်ကြောင်း မှတ်ချက်ပြုခဲ့ကြသည်။

DOCA(ရန်ကုန်)

အစ္စတန်ဘူလ်-ဖနွမ်းပင် ခရီးစဉ်သည် ခရီးသွားများ ပိုမိုဆွဲဆောင်နိုင်မည်ဟု ခရီးသွားဝန်ကြီး ပြောကြား

ပြည်ပကုန်သွယ်မှုသတင်းများ

ကမ္ဘာလုံးဆိုင်ရာအဓိကလေကြောင်းလိုင်းတစ်ခုဖြစ်သည့် Turkish Airlines မှ ပြေးဆွဲလျက်ရှိသော အစ္စတန်ဘူလ်မှ ဖနွမ်းပင်သို့ တိုက်ရိုက်လေယာဉ်ခရီးစဉ်အသစ်သည် ကမ္ဘာတစ်ဝှမ်းမှ ခရီးသွားများကို ကမ္ဘောဒီးယားသို့ ပိုမိုဆွဲဆောင်နိုင်လိမ့်မည်ဟု မျှော်လင့်ရ ကြောင်း ကမ္ဘောဒီးယားခရီးသွားလာရေးဝန်ကြီး Huot Hak က ပြောကြားခဲ့သည်။ ဒီဇင်ဘာ ၁၁ ရက်နေ့တွင် Techo အပြည်ပြည်ဆိုင်ရာလေဆိပ်၌ ကျင်းပခဲ့သော တူရကီသမ္မတနိုင်ငံ၊ အစ္စတန်ဘူလ်နှင့် ကမ္ဘောဒီးယားနိုင်ငံ၊ ဖနွမ်းပင်အကြား ပထမဆုံးတိုက်ရိုက်လေယာဉ်ခရီးစဉ် အတွက် ကြိုဆိုပွဲအခမ်းအနားတွင် ဝန်ကြီးက မှတ်ချက်ပြုခဲ့သည်။ Huot Hak က တူရကီ သမ္မတနိုင်ငံအစိုးရ၊ တူရကီသံအမတ်ကြီး၊ တူရကီလေကြောင်းလိုင်း၊ ပြည်တွင်းနှင့် နိုင်ငံတကာခရီးသွားလုပ်ငန်းရှင်များ၊ နှစ်နိုင်ငံပြည်သူများနှင့် ခိုင်မာသောပူးပေါင်း ဆောင်ရွက်မှုများကိုလည်း ချီးကျူးဂုဏ်ပြုခဲ့သည်။ နိုင်ငံပေါင်း ၁၃၀ ရှိ နေရာပေါင်း ၃၅၀ ကျော်သို့ ပျံသန်းဝန်ဆောင်မှုပေးလျက်ရှိသော လေကြောင်းလိုင်းတစ်ခုနှင့် ချိတ်ဆက်မှု အသစ်မှတစ်ဆင့် ကမ္ဘောဒီးယား၏ ခရီးသွားလုပ်ငန်းအလားအလာနှင့် ရင်းနှီးမြှုပ်နှံမှု အခွင့်အလမ်းများကို ကမ္ဘာတစ်ဝှမ်းတွင် မြှင့်တင်ပေးမည်ဖြစ်ပြီး ခရီးသွားများနှင့် ရင်းနှီးမြှုပ်နှံသူများကို ကမ္ဘောဒီးယားသို့ ပိုမိုဆွဲဆောင်နိုင်စေမည်ဖြစ်ကြောင်း Huot Hak က ထပ်လေင်းပြောကြားခဲ့သည်။ ကမ္ဘောဒီးယားနိုင်ငံသည် ၂၀၂၅ ခုနှစ် ပထမ (၁၀) လအတွင်း နိုင်ငံတကာလေကြောင်းခရီးသည် စုစုပေါင်း ၅.၆၆ သန်း ဝင်ရောက်ခဲ့ပြီး SSCA ၏ အစီရင်ခံစာအရ သိရသည်။

DOCA(ရန်ကုန်)

ဗီယက်နမ်-ကမ္ဘောဒီးယား OCOP ပြပွဲမှ နယ်စပ်ကုန်သွယ်ရေးကို မြှင့်တင်ပေးနိုင်မယ်လို့ မျှော်လင့်ရ

ပြည်ပကုန်သွယ်မှုသတင်းများ

ဗီယက်နမ်-ကမ္ဘောဒီးယား ပြည်နယ်တစ်ခုထုတ်ကုန်တစ်ခု (OCOP) ကုန်စည်ပြပွဲကို ဗီယက်နမ်နိုင်ငံ၊ An Giang (အန်ဂျိုင်) ပြည်နယ်၊ Tinh Bien (တင်ဘီယမ်) ရပ်ကွက်တွင် ကျင်းပလျက်ရှိပြီး နှစ်နိုင်ငံမှ လုပ်ငန်းပေါင်း ၈၀ မှ ပြခန်းပေါင်း ၂၀၀ ကျော် ပါဝင်ပြသထား သည်။ ဗီယက်နမ်စက်မှုလုပ်ငန်းနှင့် ကုန်သွယ်ရေးဝန်ကြီးဌာနနှင့် အန်ဂျိုင်ပြည်နယ် ပြည်သူ့ကော်မတီတို့ ပူးပေါင်းကျင်းပသည့် တစ်ပတ်ကြာ ပြပွဲသည် စီးပွားရေးချိတ်ဆက်မှုကို မြှင့်တင်ရန်၊ ပူးပေါင်းဆောင်ရွက်မှုကို အားကောင်းစေရန်နှင့် နှစ်နိုင်ငံအကြား ကုန်သွယ်မှု ဖလှယ်မှုကို မြှင့်တင်ရန် ရည်ရွယ်ထားသည်။ ပါဝင်သော စီးပွားရေးလုပ်ငန်းများသည် ဒေသထွက် အထူး ထုတ်ကုန် ထောင်ပေါင်းများစွာ၊ OCOP အသိအမှတ်ပြု ထုတ်ကုန်များ၊ စားသုံးသူပစ္စည်းများ၊ လက်မှုပညာများနှင့် အရည်အသွေးမြင့် စိုက်ပျိုးရေးထွက်ကုန်များကို ပြသခဲ့ကြသည်။ ပွဲ၏ အထူးခြားဆုံးအချက်မှာ ကမ္ဘောဒီးယားဈေးကွက်သို့ ပို့ကုန်များ တိုးချဲ့ရန် ရှာဖွေနေသော ထိပ်တန်းအမှတ်တံဆိပ်များနှင့်အတူ ကြယ်သုံးပွင့် သို့မဟုတ် ထို့ထက်ပို၍ အဆင့်သတ် မှတ်ထားသော ဗီယက်နမ် OCOP ထုတ်ကုန်များကို ထင်ရှားစွာ ပြသထားခြင်း ဖြစ်သည်။ ပြည်နယ်ပြည်သူ့ကော်မတီ ဒုတိယဥက္ကဋ္ဌ Le Trung Ho က ဗီယက်နမ်-ကမ္ဘောဒီးယား စီးပွားရေးဆက်ဆံရေးသည် မကြာသေးမီနှစ်များအတွင်း ဖွံ့ဖြိုး တိုးတက်ခဲ့ပြီး ၂၀၁၅ ခုနှစ်တွင် အမေရိကန်ဒေါ်လာ ၃.၃ ဘီလီယံခန့်မှ ၂၀၂၄ ခုနှစ်တွင် အမေရိကန်ဒေါ်လာ ၁၀ ဘီလီယံကျော်အထိ နှစ်နိုင်ငံကုန်သွယ်မှုသည် သုံးဆကျော်မြင့်တက်လာခဲ့ကြောင်းပြောကြားခဲ့သည်။LeTrungHo၏ အဆိုအရ နယ်စပ်ဖြတ်ကျော် ကုန်သွယ်မှုသည် စီးပွားရေး၏အသက်သွေးကြောတစ်ခုအဖြစ် ဆက်လက်တည်ရှိနေကြောင်း၊ အန်ဂျိုင်နှင့် ကမ္ဘောဒီးယားပြည်နယ်များအကြား ကုန်သွယ်မှုဆက်ဆံရေးသည် ယခုနှစ် ပထမကိုးလအတွင်း အမေရိကန်ဒေါ်လာ ၉၄၀ သန်းအထိ အားကောင်းလာပြီး ပို့ကုန် အမေရိကန်ဒေါ်လာ ၅၃၁ သန်း အထိရောက်ရှိခဲ့ကြောင်း ထပ်လောင်းပြောကြားခဲ့သည်။ အဆိုပါပြပွဲသည် ဗီယက်နမ်နှင့် ကမ္ဘောဒီးယား စီးပွားရေးလုပ်ငန်းများအတွက် ၎င်းတို့၏ အမှတ်တံဆိပ်များနှင့် အထူးထုတ်ကုန်များကို ပြည်တွင်းနှင့် နိုင်ငံတကာ ဧည့်သည်များထံ တွေ့ဆုံပြီး မြှင့်တင်ရန် အခွင့်အရေးတစ်ခု ပေးဆောင်ကြောင်း Le Trung Ho က ထပ်လောင်းပြောကြားခဲ့သည်။

DOCA(ရန်ကုန်)

နယူးဇီလန်နိုင်ငံ၏ စားသောက်ကုန်ဈေးနှုန်းဖောင်းပွမှု ၄.၄ ရာခိုင်နှုန်းအထိ နှေးကွေးလာ

ပြည်ပကုန်သွယ်မှုသတင်းများ

နယူးဇီလန်နိုင်ငံ၏ ၂၀၂၅ ခုနှစ် အောက်တိုဘာလ အထိ ၁၂ တာ ကာလအတွင်း ၄.၇ ရာခိုင်နှုန်း တိုးလာပြီးနောက် ၂၀၂၅ ခုနှစ် နိုဝင်ဘာလ အထိ တစ်နှစ်တာကာလအတွင်း ၄.၄ ရာခိုင်နှုန်း မြင့်တက်လာကြောင်း နယူးဇီလန်စာရင်းအင်းဌာနက ဒီဇင်ဘာလ ၁၅ ရက်နေ့တွင် ထုတ်ပြန်ခဲ့ပါသည်။

နှစ်စဉ်ဈေးနှုန်းများ မြင့်တက်လာရခြင်းမှာ ကုန်ခြောက်ဈေးနှုန်းများ ၄.၆ ရာခိုင်နှုန်း မြင့်တက်ခဲ့ခြင်းကြောင့်ဖြစ်ပြီး အသား၊ ငါးနှင့် ကြက်များမှာ နှစ်စဉ် ၇.၇ ရာခိုင်နှုန်း တက်လာခဲ့ကြောင်း စာရင်းအင်းဌာနက ပြောကြားခဲ့သည်။ နွားနို့ လီတာတစ်ဘူး၏ ပျှမ်းမျှဈေးနှုန်းသည် နှစ်စဉ် ၁၅.၈ ရာခိုင်နှုန်းမြင့်တက်ခဲ့ပြီး အမဲသားသည် ၂၆.၇ ရာခိုင်နှုန်း မြင့်တာကာ ပေါင်မုန့်ဖြူသည် နှစ်စဉ် ၅၃.၂ ရာခိုင်နှုန်း မြင့်တက်ခဲ့ကြောင်း သိရသည်။

ပေါင်မုန့်သည် အိမ်ထောင်စုများစွာအတွက် အဓိက အစားအစာဖြစ်ပြီး ယခင်နှစ်ကထက် ပေါင်မုန့်ဖြူတစ်လုံးသည် ၇၄ ဆင့် ပို့ကုန်ကျသည်ဟု Stats NZ မှ ပြောရေးဆိုခွင့်ရှိသူ Nicola Growden က ပြောကြားခဲ့သည်။

လစဉ်အခြေခံအရ အသီးအနှံနှင့် ဟင်းသီးဟင်းရွက်များ ၄.၅ ရာခိုင်နှုန်း ကျဆင်းမှုကြောင့် နိုဝင်ဘာလတွင် စားသောက်ကုန်ဈေးနှုန်းများသည် ၀.၄ ရာခိုင်နှုန်း ကျဆင်းခဲ့ကြောင်း၊ ခရမ်းချဉ်သီးနှင့် စတော်ဘယ်ရီကဲ့သို့သော ရာသီပေါ်သီးနှံများ ဈေးတက်လာကြောင်း သိရှိရပါသည်။

Source : Xinhua

DOCA (ရန်ကုန်)

ကမ္ဘာလုံးဆိုင်ရာ ဝယ်လိုအား မြင့်တက်လာသည်နှင့် အမျှ ငရုတ်ကောင်း မဟာဗျူဟာသစ်များ ဆွေးနွေး

ပြည်ပကုန်သွယ်မှုသတင်းများ

ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် ကမ္ဘောဒီးယား ၏ ကြီးထွားလာသော ငရုတ်ကောင်းကဏ္ဍကို အားကောင်းစေရန် ရည်ရွယ် သည့် အမျိုးသားအဆင့်ငရုတ်ကောင်း မဟာဗျူဟာတစ်ရပ် ရေးဆွဲရန် တက်ကြွစွာ လုပ်ဆောင်လျက် ရှိသည်။ ဝန်ကြီးဌာန၏ အတွင်းဝန် Va Rutsan က ၁၂-၁၂-၂၀၂၅ ရက်နေ့တွင် ဖနွမ်းပင်မြို့၌ အကြီးတန်းအရာရှိများ၊ ကျွမ်းကျင်သူများ၊ ကမ္ဘောဒီးယား ငရုတ်ကောင်းအဖွဲ့ချုပ်ဝင်များနှင့် ဆက်စပ်အဖွဲ့များမှ ကိုယ်စားလှယ်များ တက်ရောက်သည့် အစည်းအဝေးကိုကြီမှူး ဆောင်ရွက်ခဲ့သည်။ အစည်းအဝေးတွင် ငရုတ်ကောင်းမူဝါဒ၏ ကနဦးမူကြမ်းကို ပြန်လည်သုံးသပ်ခြင်းနှင့် ပြုပြင်ခြင်းအပေါ် ဆွေးနွေးခဲ့ကြပြီး စက်မှုလုပ်ငန်း၏ ရေရှည်တည်တံ့ခိုင်မြဲမှုနှင့် ယှဉ်ပြိုင်နိုင်စွမ်းကို သေချာစေရန် အသေးစိတ်နှင့် ပြည့်စုံသောနည်းလမ်းများကို ဆွေးနွေးမှုများပြုလုပ်ခဲ့ကြောင်း ဝန်ကြီးဌာနမှ ၁၅-၁၂-၂၀၂၅ ရက်နေ့တွင် ထုတ်ပြန်ကြေညာခဲ့သည်။ အစည်းအဝေးတက်ရောက်လာသူများက အမျိုးသားမူဝါဒကို နိုင်ငံတကာစံနှုန်းများ၊ ဈေးကွက်ဝယ်လိုအားများနှင့် ချိန်ညှိခြင်း ၏ အရေးပါမှုနှင့် ကမ္ဘောဒီးယားတွင် သီဟိုဠ်စေ့နှင့် ငရုတ်ကောင်းအတွက် ရေရှည်တည်တံ့ ခိုင်မြဲသော၊ ယှဉ်ပြိုင်နိုင်စွမ်းနှင့် တန်ဖိုးကွင်းဆက်များ ဖွံ့ဖြိုးတိုးတက်ရေးကို ပံ့ပိုးပေးသည့် EU-ဂျာမန် CAPSAFE စီမံကိန်းတို့ကို အထူးအလေးပေးဆွေးနွေးခဲ့ကြသည်။ ၂၀၂၄ ခုနှစ်တွင် ကမ္ဘောဒီးယားနိုင်ငံ၏ ငရုတ်ကောင်းတင်ပို့မှုသည် ခိုင်မာသောတိုးတက်မှုကို မှတ်တမ်းတင်ခဲ့ပြီး ဒေါ်လာ ၃၄-၃၅ သန်းခန့်အထိ ရရှိခဲ့ကာ ၂၀၂၃ ခုနှစ်နှင့် နှိုင်းယှဉ်ပါက ၁၃၀-၁၅၀ ရာခိုင်နှုန်း တိုးလာခဲ့ကြောင်း သိရှိရပါသည်။

Source: Khmer Times

DOCA (ရန်ကုန်)

PPAP သည် ကွန်တိန်နာ ဝင်ရောက်မှု သိသာထင်ရှားသော တိုးတက်မှုကို မှတ်တမ်းတင်ခဲ့

ပြည်ပကုန်သွယ်မှုသတင်းများ

ဖနွမ်းပင် ကိုယ်ပိုင်အုပ်ချုပ်ခွင့်ရဆိပ်ကမ်း (PPAP) သည် ၂၀၂၅ ခုနှစ်၊ ဇန်နဝါရီလမှ နိုဝင်ဘာလအတွင်း ဆိပ်ကမ်း၏ စီးပွားရေးလုပ်ငန်းများ တိုးတက်လာကြောင်း အစီရင်ခံတစ်ခုထုတ်ပြန်ထားသည်။ ကမ္ဘောဒီးယား စတော့ရှယ်ယာဈေးကွက်သို့ တင်သွင်းလာခဲ့သော စာရင်းစစ်မပြုလုပ်ရသေးသည့် ဝင်ငွေအစီရင်ခံစာတွင် ဆိပ်ကမ်းမှတစ်ဆင့် ကွန်တိန်နာ တင်ပို့မှုမှာ ၂၀၂၄ ခုနှစ်ကာလတူတွင် TEU ၄၃၆,၈၃၉ ရှိခဲ့ရာမှ ၂၀၂၅ ခုနှစ်တွင် ၂၂.၈၅ ရာခိုင်နှုန်း အထိမြင့်တက်လာခဲ့ပြီး TEU ၅၃၆,၆၄၂ ရှိခဲ့ကြောင်း အစီရင်ခံစာတွင်ဖော်ပြထား သည်။ ဆိပ်ကမ်းမှတစ်ဆင့် ဖြတ်သန်းသွားလာသော ကုန်စည်နှင့် သဘာဝဓာတ်ငွေ့ လောင်စာမှာ ၂၀၂၄ ခုနှစ်၊ ပထမ ၁၁ လအတွင်း မှတ်တမ်းတင်ထားသော တန်ချိန် ၄.၃၆ သန်း မှ ၁၆ ရာခိုင်နှုန်း မြင့်တက်လာကာ တန်ချိန် ၅.၀၆ သန်း ရှိခဲ့ကြောင်း အစီရင်ခံစာတွင် ဖော်ပြထားသည်။ ၂၀၂၅ ခုနှစ်၊ နိုဝင်ဘာလတွင် ဆိပ်ကမ်းသို့ ကွန်တိန်နာ ၄၈,၃၈၃ ခု ဝင်ရောက်ခဲ့ပြီး ၂၀၂၄ ခုနှစ် နိုဝင်ဘာလထက် ၃၅.၉၅ ရာခိုင်နှုန်း မြင့်တက်လာခဲ့ကြောင်း အစီရင်ခံစာတွင် ဖြည့်စွက်ဖော်ပြထားသည်။ ၂၀၂၅ ခုနှစ်၊ ပထမ ၁၁ လအတွင်း ကမ္ဘောဒီးယားနိုင်ငံ၏ စုစုပေါင်းပို့ကုန်မှာ အမေရိကန်ဒေါ်လာ ၂၇.၃၇ ဘီလီယံခန့်ရှိပြီး ယခင်နှစ်ထက် ၁၄ ရာခိုင်နှုန်းတိုးလာကာ သွင်းကုန်မှာ အမေရိကန်ဒေါ်လာ ၃၀.၆၅ ဘီလီယံရှိပြီး ၁၈ ရာခိုင်နှုန်းတိုးလာခဲ့ကြောင်း ကမ္ဘောဒီးယားနိုင်ငံ၊ အကောက်ခွန်နှင့် ယစ်မျိုးခွန်ဦးစီးဌာန၏ အစီရင်ခံစာအရ သိရသည်။

Source: Khmer Times

DOCA (ရန်ကုန်)

အေးခဲထားသောဒူးရင်းသီးများ တရုတ်သို့ပထမဆုံးတင်ပို့ခဲ့သည့် အင်ဒိုနီးရှား

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံစိုက်ပျိုးမွေးမြူရေးကွာရန်တင်းအေဂျင်စီ (Barantin) သည် အနောက် ဂျာဗားမှ တရုတ်သို့ အေးခဲထားသောဒူးရင်းသီးတန်ချိန် ၄၈ တန်ကို ပထမဆုံးတရားဝင်တင်ပို့ခဲ့ ကြောင်း သိရပါသည်။ Barantin အကြီးအကဲ Sahat M Panggabean က အမေရိကန်ဒေါ်လာ ၃၀၅၉၇၁ တန်ဖိုးရှိသောထိုတင်ပို့မှုသည် အင်ဒိုနီးရှားနှင့် တရုတ်နိုင်ငံအကောက်ခွန်အထွေထွေ အုပ်ချုပ်ရေးဦးစီးဌာနအကြား အေးခဲထားသောဒူးရင်းသီးတင်ပို့ခွင့်ညှိနှိုင်းချက်မှတ်တမ်းလက်မှတ် ရေးထိုးပြီးနောက်ဆက်တွဲအနေဖြင့် တင်ပို့ခြင်းဖြစ်ကြောင်း ပြောကြားခဲ့ပါသည်။ အနောက် ဂျာဗားတွင် ပြုပြင်ထုတ်လုပ်ခဲ့သည့် အေးခဲထားသောဒူးရင်းသီးများကို ဂျာကာတာမြို့ရှိ Tanjung ဆိပ်ကမ်းမှ တရုတ်နိုင်ငံ၏ Qingdao ဆိပ်ကမ်းသို့ တင်ပို့ခဲ့ခြင်းဖြစ်ကြောင်း သိရပါသည်။ ယခင်က တရုတ်သို့ အင်ဒိုနီးရှား၏ ဒူးရင်းသီးတင်ပို့မှုမှာ တိုက်ရိုက်မဟုတ်ပဲ အိမ်နီးချင်းနိုင်ငံများက တရုတ်ဈေးကွက်သို့ ပြုပြင်ထုတ်လုပ်ခြင်းနှင့် ပြန်လည်ထုပ်ပိုးခြင်းတို့ဖြင့် တင်ပို့ခြင်းဖြစ်ကြောင်း သိရပါသည်။ GACC နှင့်အတူ G to G ကနဦးဆောင်ရွက်မှုသည် အင်ဒိုနီးရှားအားအေးခဲထားသောဒူးရင်းသီးများ တိုက်ရိုက်တင်ပို့နိုင်ရန် လမ်းကြောင်းဖန်တီးပေးနိုင်ခဲ့ကြောင်း သိရပါသည်။ ဇန်နဝါရီလမှ နိုဝင်ဘာလအထိတွင် အင်ဒိုနီးရှားသည် ဒူးရင်းတန်ချိန် ၁၀၁၆၂ တန်ကို များစွာသောပုံစံများဖြင့် တင်ပို့ခဲ့ကြောင်း သိရပါသည်။ ထိပ်တန်းတင်ပို့သည့် ၅ နေရာမှာ ထိုင်း (၆၀၀၃ တန်)၊ တရုတ် (၂၅၇၄ တန်)၊ မ‌လေးရှား (၁၅၃၂တန်)၊ ဟောင်ကောင် (၁၅ တန်)နှင့် ဂျာမနီ (၆ တန်) တို့ဖြစ်ကြောင်း သိရပါသည်။ အခြားနေရာများတွင် ဂျပန်၊ တရုတ်တိုင်ပေ၊ ဆော်ဒီအာရေဗီးယား၊ ချက်၊ နယ်သာလန်၊ ကနေဒါ၊ အမေရိကန်နှင့် နော်ဝေတို့ပါဝင်ကြောင်း သိရပါသည်။ တစ်ချိန်တည်းမှာပင် အင်ဒိုနီးရှားဒူးရင်းစိုက်ပျိုးသူများအသင်း၏ အတွင်းရေးမှူးချုပ် Aditya Pradewo က တရုတ်ဒူးရင်းဈေးကွက်သည် နှစ်စဉ်ခန့်မှန်း အမေရိကန်ဒေါ်လာ ၈ ဘီလီယံပတ်လည်ရှိကြောင်း၊ Bawor ၊ Super Tembaga နှင့် Namlung အစရှိသည့်အဆင့်မြင့်မျိုးကွဲများနှင့် အတူ အင်ဒိုနီးရှားသည် တရုတ်ဈေးကွက်ဝေစု၏ ၅ မှ ၁၀ ရာခိုင်နှုန်းကြားရရှိရန် ခန့်မှန်းရကြောင်းနှင့် တရုတ်သို့ တိုက်ရိုက်တင်ပို့မှုသည် ထောက်ပံ့ပို့ဆောင်‌ရေးကုန်ကျစရိတ်များကို လျော့ချနိုင်ရုံသာမက စိုက်ပျိုးရေးသမားများနှင့် ပို့ကုန်လုပ်ငန်းရှင်များအတွက် သိသာထင်ရှားသောအကျိုး‌ကျေးဇူးများ ကိုပံ့ပိုးပေးကြောင်း ပြောကြားခဲ့ပါသည်။ Pradewo ၏အဆိုအရ တရုတ်နိုင်ငံရှိ ဒူးရင်းဈေးနှုန်းများသည် ပြည်တွင်းဈေးနှုန်းများထက် ၅ ဆမှ ၇ ဆအထိ မြင့်တက်နေခြင်းကြောင့် တည်ငြိမ်သော စီးပွားရေးအခွင့်အလမ်းများကို ကမ်းလှမ်းလျက်ရှိကြောင်း သိရပါသည်။

Antara News

DOCA (ရန်ကုန်)

Languages

Main menu

ပြည်ပကုန်သွယ်မှုသတင်းများ

အာဖရိကဖွံ့ဖြိုးရေးဘဏ်က မော်ရိုကိုအတွက် ယူရို ၁၅၀ သန်း ချေးငွေခွင့်ပြု

ပို့ကုန်မြှင့်တင်ရန် MoC မှ ကမ္ဘောဒီးယား FTA Portal ကို စတင်လိုက်ပါပြီ

အစ္စတန်ဘူလ်-ဖနွမ်းပင် ခရီးစဉ်သည် ခရီးသွားများ ပိုမိုဆွဲဆောင်နိုင်မည်ဟု ခရီးသွားဝန်ကြီး ပြောကြား

ဗီယက်နမ်-ကမ္ဘောဒီးယား OCOP ပြပွဲမှ နယ်စပ်ကုန်သွယ်ရေးကို မြှင့်တင်ပေးနိုင်မယ်လို့ မျှော်လင့်ရ

နယူးဇီလန်နိုင်ငံ၏ စားသောက်ကုန်ဈေးနှုန်းဖောင်းပွမှု ၄.၄ ရာခိုင်နှုန်းအထိ နှေးကွေးလာ

ကမ္ဘာလုံးဆိုင်ရာ ဝယ်လိုအား မြင့်တက်လာသည်နှင့် အမျှ ငရုတ်ကောင်း မဟာဗျူဟာသစ်များ ဆွေးနွေး

PPAP သည် ကွန်တိန်နာ ဝင်ရောက်မှု သိသာထင်ရှားသော တိုးတက်မှုကို မှတ်တမ်းတင်ခဲ့

အေးခဲထားသောဒူးရင်းသီးများ တရုတ်သို့ပထမဆုံးတင်ပို့ခဲ့သည့် အင်ဒိုနီးရှား

Pages

You are here

ပြည်ပကုန်သွယ်မှုသတင်းများ

Pages