ပြည်ပကုန်သွယ်မှုသတင်းများ

      အင်ဒိုနီးရှားကုန်သွယ်ရေးဝန်ကြီးဌာနသည် ဗြိတိန်နိုင်ငံနှင့် ကုန်သွယ်ရေးနှင့် စီးပွားရေးဆက်ဆံမှုများ ပိုမိုခိုင်မာစေရန် လန်ဒန်မြို့သို့သွားရောက်၍ အင်ဒိုနီးရှား-ဗြိတိန် ဘက်စုံစီးပွားရေး ပူးပေါင်းဆောင်ရွက်မှုသဘောတူညီချက် (Indonesia-UK CEPA) နှင့် ပစိဖိတ်ဖြတ်ကျော် ဘက်စုံ နှင့် တိုးတက်သောပူးပေါင်းဆောင်ရွက်မှုသဘောတူညီချက် (CPTPP) ဆိုင်ရာကိစ္စရပ်များကို ဆွေးနွေးခဲ့ကြောင်း သိရပါသည်။ နိုင်ငံတကာကုန်သွယ်ရေးညှိနှိုင်းဆွေးနွေးမှုဌာန ညွှန်ကြားရေးမှူးချုပ် Johni Martha ဦးဆောင်သည့် အင်ဒိုနီးရှားကိုယ်စားလှယ်အဖွဲ့သည် စက်တင်ဘာ ၇ ရက်မှ ၉ ရက်အထိ လန်ဒန်မြို့၌ ဗြိတိန်အစိုးရအဖွဲ့အစည်းများနှင့် သက်ဆိုင်ရာအဖွဲ့များကို တွေ့ဆုံခဲ့ပါသည်။ အဆိုပါတွေ့ဆုံမှုများတွင် Indonesia-UK CEPA အကောင်အထည်ဖော်နိုင်ရေး မှတစ်ဆင့် နှစ်နိုင်ငံကုန်သွယ်ရေးတိုးမြှင့်ရန်ဆွေးနွေးခဲ့သကဲ့သို့ အင်ဒိုနီးရှားက CPTPP အဖွဲ့ဝင် ဖြစ်လာရေးကြိုးပမ်းမှုအပေါ် ဗြိတိန်နိုင်ငံ၏ထောက်ခံမှုကိုလည်းကျေးဇူးတင်ကြောင်း Martha က ပြောကြားခဲ့ပါသည်။ Indonesia-UK CEPA အကောင်အထည်ဖော်နိုင်ပါက ဈေးကွက်ဝင်ရောက် ခွင့်တိုးချဲ့ခြင်း၊ ထောက်ပံ့ရေးကွင်းဆက်များခိုင်မာစေခြင်း၊ စည်းမျဉ်းစည်းကမ်းဆိုင်ရာ အတားအဆီးများဖြေရှင်းခြင်းနှင့် ဝန်ဆောင်မှုကုန်သွယ်ရေး၊ ရင်းနှီးမြှုပ်နှံမှုပူးပေါင်းဆောင်ရွက်မှုများ ပိုမိုနက်ရှိုင်းစေခြင်းတို့မှတစ်ဆင့် နှစ်နိုင်ငံ၏ယှဉ်ပြိုင်နိုင်စွမ်းကိုမြှင့်တင်ပေးနိုင်မည်ဟု ကုန်သွယ်ရေးဝန်ကြီးဌာနက ခန့်မှန်းထားကြောင်း သိရပါသည်။ အင်ဒိုနီးရှားနိုင်ငံသည် ဗြိတိန်၏ဖွံ့ဖြိုးဆဲ နိုင်ငံများကုန်သွယ်ရေးအစီအစဉ် (DCTS) မှ ၂၀၂၇ ခုနှစ် ဇန်နဝါရီ ၁ ရက်တွင် ထွက်ခွာရမည် ဖြစ်သဖြင့် နှစ်နိုင်ငံအကြား ကုန်သွယ်ရေးပူးပေါင်းဆောင်ရွက်မှုခိုင်မာစေရန် ပိုမိုအရေးကြီးလာကြောင်း Martha က ပြောကြားခဲ့ပါသည်။ လက်ရှိတွင် အင်ဒိုနီးရှားနိုင်ငံသို့ ဗြိတိန်မှ တင်ပို့သည့်ကုန်ပစ္စည်းအများစုအပေါ် အများဆုံးအခွင့်အရေးရှိသောနိုင်ငံများ (MFN) အတွက် သတ်မှတ်ထားသည့် အခွန်နှုန်းထား ၆ ရာခိုင်နှုန်းမှ ၁၅ ရာခိုင်နှုန်းအထိ ကောက်ခံလျက်ရှိကြောင်း သိရ ပါသည်။ နှစ်နိုင်ငံကုန်သွယ်မှုတန်ဖိုးသည် ၂၀၂၁ ခုနှစ်တွင် အမေရိကန်ဒေါ်လာ ၂.၅၇ ဘီလီယံ ရှိရာမှ ၂၀၂၅ ခုနှစ်တွင် အမေရိကန်ဒေါ်လာ ၂.၆၆ ဘီလီယံအထိ တိုးတက်လာခဲ့ကြောင်း သိရပါသည်။ ထို့ပြင် စက်တင်ဘာ ၈ ရက်တွင် အင်ဒိုနီးရှားကုန်သွယ်ရေးဝန်ကြီးဌာနက ဗြိတိန်ကုမ္ပဏီများနှင့် သုတေသနအဖွဲ့များမှ ကိုယ်စားလှယ် ၂၀ ဦးကို တွေ့ဆုံ၍ Indonesia-UK CEPA ဖော်ဆောင်ရေးအတွက် စီးပွားရေးကဏ္ဍ၏အမြင်များကို ရယူခဲ့ကြောင်း သိရပါသည်။ စီးပွားရေးလုပ်ငန်းရှင်များ၏အကြံပြုချက်များသည် သဘောတူညီချက်အမြန်ဆုံးဖော်ဆောင်နိုင်ရေးအတွက် အရေးပါကြောင်း Martha က ပြောကြားခဲ့ပါသည်။ အင်ဒိုနီးရှားကိုယ်စားလှယ်အဖွဲ့သည် လန်ဒန် ခရီးစဉ်အတွင်း အပြည်ပြည်ဆိုင်ရာကော်ဖီအဖွဲ့ (ICO) သို့လည်း သွားရောက်ခဲ့ပြီး ကော်ဖီစိုက် တောင်သူအများစုဖြစ်သည့် အသေးစားတောင်သူများ၏ လူမှုစီးပွားဘဝဖွံ့ဖြိုးတိုးတက်ရေး၊ အရည်အသွေးမြင့် ရိုဘတ်စတာကော်ဖီအသိအမှတ်ပြုရေး၊ သဘာဝပတ်ဝန်းကျင်နှင့် သဟဇာတဖြစ်သည့် စိုက်ပျိုးရေးနှင့် ဥရောပသမဂ္ဂသစ်တောပြုန်းတီးမှုဆိုင်ရာ စည်းမျဉ်း (EUDR) တို့ကို ဆွေးနွေးခဲ့ကြကြောင်း သိရပါသည်။ ကော်ဖီစိုက်တောင်သူများ၏လူမှုစီးပွားဘဝမြှင့်တင်ရေးတွင် ICO ၏ အခန်းကဏ္ဍသည် အရေးကြီးသကဲ့သို့ ကော်ဖီအဓိကထုတ်လုပ်သည့်နိုင်ငံများအနေဖြင့်လည်း တရားမျှတပြီး ပိုမိုပါဝင်ခွင့်ရှိသော ကမ္ဘာ့ကုန်သွယ်ရေးစည်းမျဉ်းများ ဖော်ဆောင်ရေးတွင် တက်ကြွစွာပါဝင်ရန်လိုအပ်ကြောင်း Martha က ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

          အင်ဒိုနီးရှားနှင့် ကနေဒါနိုင်ငံတို့သည် အင်ဒိုနီးရှား-ကနေဒါ ဘက်စုံစီးပွားရေးပူးပေါင်း ဆောင်ရွက်မှုသဘောတူညီချက် (ICA-CEPA) ကို ၂၀၂၆ ခုနှစ် နှစ်ကုန်ပိုင်းတွင် စတင်အသက်ဝင် နိုင်ရန် အကောင်အထည်ဖော်ရေးဆိုင်ရာပြင်ဆင်မှုများကို အရှိန်မြှင့်ဆောင်ရွက်နေကြောင်း သိရ ပါသည်။ အင်ဒိုနီးရှား စီးပွားရေးရာပေါင်းစပ်ညှိနှိုင်းရေးဝန်ကြီး Airlangga Hartarto က ကနေဒါ နိုင်ငံ တိုရွန်တိုမြို့၌ကျင်းပသည့် Canada Investment Summit တွင် ကနေဒါနိုင်ငံ အပြည်ပြည် ဆိုင်ရာကုန်သွယ်ရေးဝန်ကြီး Maninder Sidhu နှင့် စက်တင်ဘာ ၁၆ ရက်က တွေ့ဆုံပြီးနောက် နှစ်နိုင်ငံအနေဖြင့် သဘောတူညီချက်ကို လက်တွေ့အကောင်အထည်ဖော်နိုင်ရန် အကောင်းမြင် ထားကြောင်း ပြောကြားခဲ့ပါသည်။ ၂၀၂၅ ခုနှစ် စက်တင်ဘာလတွင် လက်မှတ်ရေးထိုးခဲ့သည့် ICA-CEPA သည် မြောက်အမေရိကဒေသတွင် အင်ဒိုနီးရှားနိုင်ငံ၏ ပထမဆုံးဘက်စုံစီးပွားရေး ပူးပေါင်းဆောင်ရွက်မှုသဘောတူညီချက်ဖြစ်ပြီး ၂၀၃၀ ပြည့်နှစ်တွင် ကနေဒါနိုင်ငံသို့ အင်ဒိုနီးရှား ၏ပို့ကုန်တန်ဖိုး အမေရိကန်ဒေါ်လာ ၁၁.၈ ဘီလီယံအထိ ရောက်ရှိနိုင်မည်ဟု ခန့်မှန်းထားကြောင်း သိရပါသည်။ သဘောတူညီချက်အရ ကနေဒါနိုင်ငံသည် အင်ဒိုနီးရှားကုန်ပစ္စည်းများ အတွက် အခွန်စည်းကြပ်မှုလိုင်းများ၏ ၉၀ ရာခိုင်နှုန်းကျော်ကို အခွန်လျှော့ချခြင်း သို့မဟုတ် ပယ်ဖျက်ခြင်းပြုလုပ်မည်ဖြစ်ပြီး အင်ဒိုနီးရှားဘက်မှလည်း ကနေဒါကုန်ပစ္စည်းများအတွက် အခွန်စည်းကြပ်မှုလိုင်းများ၏ ၈၆ ရာခိုင်နှုန်းနီးပါးကို အခွန်လျှော့ချခြင်း သို့မဟုတ် ပယ်ဖျက်ခြင်း ပြုလုပ်မည်ဖြစ်ကြောင်း သိရပါသည်။ နှစ်နိုင်ငံကုန်သွယ်မှုသည် ၂၀၂၁ ခုနှစ်မှစ၍ နှစ်စဉ်ပျမ်းမျှ ၉.၁၃ ရာခိုင်နှုန်း တိုးတက်လာခဲ့ပြီး ၂၀၂၅ ခုနှစ် ပထမခြောက်လတွင် ကုန်သွယ်မှုတန်ဖိုး အမေရိကန်ဒေါ်လာ ၃.၁ ဘီလီယံရှိကာ ယခင်နှစ်အလားတူကာလထက် ၁၃ ရာခိုင်နှုန်း တိုးတက်ခဲ့ကြောင်း သိရပါသည်။ ICA-CEPA အောက်တွင် အစဉ်အလာကုန်ပစ္စည်းကုန်သွယ်မှုများအပြင် အရေးပါသတ္တုများကို တန်ဖိုးမြှင့်ထုတ်လုပ်ရေး၊ သန့်ရှင်းစွမ်းအင်၊ စိုက်ပျိုးရေးနှင့် အစားအသောက်ထုတ်လုပ်ရေး၊ ရေရှည်တည်တံ့သောငါးလုပ်ငန်း၊ အခြေခံအဆောက်အအုံနှင့် ဒစ်ဂျစ်တယ်ဝန်ဆောင်မှုကဏ္ဍများတွင်လည်း ပူးပေါင်းဆောင်ရွက်ရန် ရည်မှန်းထားကြောင်း သိရပါသည်။ သဘောတူညီချက်စတင်အသက်ဝင်မီ နည်းပညာပိုင်းဆိုင်ရာစိန်ခေါ်မှုများကို နှစ်နိုင်ငံ အစိုးရများက ဖြေရှင်းဆောင်ရွက်နေပြီး စံချိန်စံညွှန်းသတ်မှတ်ချက်များ၊ အလုပ်သမားရေးရာနှင့် ရေရှည်တည်တံ့ရေးဆိုင်ရာလုပ်ထုံးလုပ်နည်းများကိုက်ညီစေရေးအပြင် အသေးစား၊ အငယ်စားနှင့် အလတ်စားလုပ်ငန်းများ (MSMEs) ၏ စွမ်းဆောင်ရည်မြှင့်တင်ရေးတို့ကိုလည်း အလေးထားဆောင်ရွက်နေကြောင်း Airlangga က ပြောကြားသည်။ ICA-CEPA အကောင်အထည် ဖော်ခြင်းမှတစ်ဆင့် နှစ်နိုင်ငံစီးပွားရေးလုပ်ငန်းများအတွက် လက်တွေ့ကျသော အကျိုးကျေးဇူးများရရှိစေရန် အင်ဒိုနီးရှားနှင့် ကနေဒါတို့၏ပူးပေါင်းဆောင်ရွက်မှုကို ယခုတွေ့ဆုံမှုက ထပ်မံအတည်ပြုခဲ့ကြောင်း ၎င်းကပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)

          အင်ဒိုနီးရှားကုန်သွယ်ရေးဝန်ကြီး Budi Santoso က အင်ဒိုနီးရှား-သီရိလင်္ကာ အထူးအခွန် သက်သာခွင့်ကုန်သွယ်ရေးသဘောတူညီချက် (ISL-PTA) ဆိုင်ရာ ဆွေးနွေးမှုများကို တတိယ အကြိမ်ဆက်လက်ပြုလုပ်ရန် တိုက်တွန်းခဲ့ကြောင်း သိရပါသည်။ ဝန်ကြီး Budi သည် သီရိလင်္ကာ အလုပ်သမားဝန်ကြီးနှင့် ဒုတိယဘဏ္ဍာရေးနှင့် စီမံကိန်းဝန်ကြီး Anil Jayantha Fernando နှင့် ဂျကာတာမြို့၌ စက်တင်ဘာလ ၁၆ ရက်နေ့ကတွေ့ဆုံစဉ် နှစ်နိုင်ငံကုန်သွယ်မှုတိုးမြှင့်ရေး နည်းလမ်းများနှင့် ISL-PTA ဆွေးနွေးမှုများရှေ့ဆက်နိုင်ရေးတို့ကို ဆွေးနွေးခဲ့ကြကြောင်း သိရ ပါသည်။ အဆိုပါသဘောတူညီချက်မှတစ်ဆင့် သီရိလင်္ကာဈေးကွက်သို့ အင်ဒိုနီးရှားကုန်ပစ္စည်းများ ပိုမိုဝင်ရောက်နိုင်မည်ဖြစ်သဖြင့် တောင်အာရှဈေးကွက်အတွင်း ပို့ကုန်အခွင့်အလမ်းများ တိုးချဲ့နိုင်မည်ဟု Budi က ပြောကြားခဲ့ပါသည်။ နှစ်နိုင်ငံစလုံးအတွက် အကျိုးဖြစ်ထွန်းစေမည့် သဘောတူညီချက်တစ်ရပ်ဖြစ်လာမည်ဟုလည်း ၎င်းကမျှော်လင့်ကြောင်း ပြောကြားခဲ့ပါသည်။
        အင်ဒိုနီးရှားနှင့် သီရိလင်္ကာတို့သည် ISL-PTA ဆွေးနွေးမှုများကို ၂၀၂၄ ခုနှစ် မတ် ၁၄ ရက်တွင် စတင်ခဲ့ပြီး ပထမအကြိမ်ဆွေးနွေးပွဲကို ဧပြီ ၃ ရက်နှင့် ၄ ရက်တွင် အွန်လိုင်းမှ ကျင်းပခဲ့ကြောင်း သိရပါသည်။ ဒုတိယအကြိမ်ဆွေးနွေးပွဲကို သီရိလင်္ကာနိုင်ငံ ကိုလံဘိုမြို့၌ ဇူလိုင် ၁၅ ရက်နှင့် ၁၆ ရက်တွင်ကျင်းပခဲ့ကြောင်း သိရပါသည်။ Fernando က သီရိလင်္ကာနိုင်ငံအနေဖြင့် ဆွေးနွေးမှုလုပ်ငန်းစဉ်၏ တစ်စိတ်တစ်ပိုင်းအဖြစ် ISL-PTA ကို ပြည်တွင်း၌ပြန်လည်သုံးသပ်နေကြောင်း ပြောကြားပြီး အဆိုပါလုပ်ငန်းစဉ်ကို အမြန်ဆုံးအပြီးသတ်ကာ ပိုမိုပွင့်လင်းပြီး ခိုင်မာသည့် နှစ်နိုင်ငံကုန်သွယ်ရေးဆက်ဆံမှုများ ဖော်ဆောင်နိုင်ရန်မျှော်လင့်ကြောင်း ပြောကြားခဲ့ပါသည်။
         ထို့ပြင် သီရိလင်္ကာနိုင်ငံက ပြည်တွင်းလိုအပ်ချက်ဖြည့်ဆည်းရန် အင်ဒိုနီးရှားနိုင်ငံမှ ဓာတ်မြေဩဇာများတင်သွင်းရန် စိတ်ဝင်စားကြောင်း ဖော်ပြခဲ့ပါသည်။ ယင်းအတွက် သီရိလင်္ကာ ကိုယ်စားလှယ်အဖွဲ့အနေဖြင့် Trade Expo Indonesia (TEI) 2026 သို့ တက်ရောက်စဉ် အင်ဒိုနီးရှားဓာတ်မြေဩဇာလုပ်ငန်းရှင်များနှင့်တွေ့ဆုံ၍ ပူးပေါင်းဆောင်ရွက်နိုင်မည့် အခွင့်အလမ်းများရှာဖွေရန် Budi က အကြံပြုခဲ့‌ကြောင်း သိရပါသည်။ ၂၀၂၆ ခုနှစ် ဇန်နဝါရီလမှ ဇူလိုင်လအထိ နှစ်နိုင်ငံကုန်သွယ်မှုတန်ဖိုးမှာ အမေရိကန်ဒေါ်လာ ၂၆၆ သန်းရှိပြီး အင်ဒိုနီးရှား၏ ပို့ကုန်တန်ဖိုးမှာ ဒေါ်လာ ၂၄၄ သန်းနှင့် သွင်းကုန်တန်ဖိုးမှာ အမေရိကန်ဒေါ်လာ ၂၂ သန်းရှိကြောင်း သိရပါသည်။
        ၂၀၂၅ ခုနှစ်တွင် နှစ်နိုင်ငံကုန်သွယ်မှုတန်ဖိုးမှာ အမေရိကန်ဒေါ်လာ ၅၃၀.၂ သန်းရှိခဲ့ပြီး အင်ဒိုနီးရှား ၏ပို့ကုန်တန်ဖိုးမှာ အမေရိကန်ဒေါ်လာ ၄၇၆.၇ သန်းနှင့် သွင်းကုန်တန်ဖိုးမှာ အမေရိကန်ဒေါ်လာ ၅၃.၅ သန်းရှိခဲ့သဖြင့် အင်ဒိုနီးရှားနိုင်ငံက ကုန်သွယ်ရေးပိုငွေ အမေရိကန်ဒေါ်လာ ၄၂၃ ဒသမ ၁ သန်း ရရှိခဲ့ကြောင်း သိရပါသည်။ အင်ဒိုနီးရှား၏ သီရိလင်္ကာသို့ အဓိကတင်ပို့သည့် ကုန်ပစ္စည်းများတွင် အုန်းခြောက်၊ ခရီးသည်တင်မော်တော်ယာဉ်များ၊ သံနှင့် သံမဟုတ်သည့် သံမဏိ တစ်ပိုင်းထုတ်ကုန်များ၊ စက်မှုသုံး monocarboxylic အက်ဆစ်များ၊ အက်ဆစ်ဆီများ၊ စက်မှုသုံး fatty alcohol များနှင့် ဆေးရွက်ကြီးကုန်ကြမ်းနှင့် ဆေးရွက်ကြီးအကြွင်းအကျန်များ ပါဝင်ကြောင်း သိရပါသည်။ သီရိလင်္ကာမှ အင်ဒိုနီးရှားသို့ အဓိကတင်သွင်းသည့်ကုန်ပစ္စည်းများမှာ ချည်ထည်နှင့် ချည်မျှင်ထည်များ၊ bituminous သတ္တုများမှ ရရှိသည့် ရေနံနှင့် ဆီများ၊ ဆေးရွက်ကြီးပြုပြင်ထုတ်လုပ်သည့် စက်ပစ္စည်းများနှင့် တာယာအမျိုးမျိုးတို့ဖြစ်ကြောင်း သိရှိရပါသည်။

Antara News                                                                             

DOCA (ရန်ကုန်)

       အင်ဒိုနီးရှားနိုင်ငံခြားရေးဝန်ကြီးဌာနသည် အရေးပါသောသတ္တု (Critical Minerals) ကဏ္ဍတွင် ပူးပေါင်းဆောင်ရွက်မှုတိုးမြှင့်နိုင်ရန် လက်တင်အမေရိကနှင့် ကာရေဘီယံဒေသရှိ နိုင်ငံများနှင့် မဟာဗျူဟာမြောက်မိတ်ဖက်ဆက်ဆံရေးများထူထောင်ရေးကို တက်ကြွစွာ ဆောင်ရွက်နေကြောင်း သိရပါသည်။ ဂျကာတာမြို့၌ စက်တင်ဘာလ ၁၄ ရက်နေ့ကပြုလုပ်သည့် သတင်းစာရှင်းလင်းပွဲတွင် နိုင်ငံခြားရေးဝန်ကြီးဌာန အမေရိကန်နှင့် ဥရောပရေးရာ ညွှန်ကြား ရေးမှူးချုပ် Grata Endah Werdaningtyas က အင်ဒိုနီးရှားနှင့် လက်တင်အမေရိက၊ ကာရေဘီယံဒေသတို့သည် သဘာဝသယံဇာတအရင်းအမြစ်များ အဓိကထုတ်လုပ်တင်ပို့သည့် ဒေသများဖြစ်သည့်အတွက် ပူးပေါင်းဆောင်ရွက်နိုင်မည့် အလားအလာရှိကြောင်း ပြောကြားခဲ့ပါသည်။ လက်တင်အမေရိကနှင့် ကာရေဘီယံဒေသသည် ကမ္ဘာ့သတ္တုတူးဖော်ရေးထွက်ကုန် များ၏ ၄၀ ရာခိုင်နှုန်းကိုထုတ်လုပ်ပေးနေပြီး ကမ္ဘာ့လစ်သီယမ်ထုတ်လုပ်မှု၏ ၃၅ ရာခိုင်နှုန်း ကိုလည်းပံ့ပိုးပေးနေကြောင်း ၎င်းကဆိုပါသည်။ ထို့ပြင် ကမ္ဘာ့နီအိုဘီယမ် (Niobium) ထုတ်လုပ် မှု၏ ၉၀ ရာခိုင်နှုန်းကို အဆိုပါဒေသကထုတ်လုပ်နေပြီး ဘရာဇီးနိုင်ငံက အဓိကထုတ်လုပ်သည့် နိုင်ငံဖြစ်ကြောင်း သိရပါသည်။ နီအိုဘီယမ်ကို သံမဏိခိုင်ခံ့စေရန်နှင့် စူပါကွန်ဒတ်တာများ ထုတ်လုပ်ရာတွင်အသုံးပြုကြောင်း သိရပါသည်။ နီကယ်နှင့် ဘော့ဆိုက်ထုတ်လုပ်မှုတွင် ကမ္ဘာ့ အဆင့်မီအင်ဒိုနီးရှားအနေဖြင့် ဘရာဇီးနှင့် ချီလီကဲ့သို့ သတ္တုသယံဇာတကြွယ်ဝသည့် နိုင်ငံများနှင့် ပူးပေါင်းခြင်းဖြင့် အရေးပါသောသတ္တုများ၏ထုတ်လုပ်မှုနှင့် တန်ဖိုးမြှင့်ထုတ်လုပ်ရေးကွင်းဆက်ကို ပိုမိုခိုင်မာစေရန်ရည်ရွယ်ထားကြောင်း သိရပါသည်။ ဖွံ့ဖြိုးဆဲနိုင်ငံများသည် သဘာဝသယံ ဇာတများပေါများသော်လည်း ယခင်ကကုန်ကြမ်းများကိုသာတင်ပို့ခဲ့ရပြီး တန်ဖိုးမြင့်ထုတ်လုပ် ရေးနှင့် နည်းပညာပိုင်းဆိုင်ရာအဆင့်များကို ဖွံ့ဖြိုးပြီးနိုင်ငံများက အဓိကထိန်းချုပ်ခဲ့ကြောင်း Grata က ပြောကြားသည်။ ထို့ကြောင့် အင်ဒိုနီးရှားအနေဖြင့် မိတ်ဖက်နိုင်ငံများနှင့် ပူးပေါင်းကာ ကိုယ်ပိုင်ထောက်ပံ့ရေးကွင်းဆက်များဖော်ဆောင်ပြီး အနာဂတ်စက်မှုလုပ်ငန်းများတွင် မိမိတို့၏ အခန်းကဏ္ဍနှင့် အဆင့်အတန်းကိုမြှင့်တင်ရန်လိုအပ်ကြောင်း ၎င်းကဆက်လက်ပြောကြားခဲ့ပါသည်။ အဆိုပါပူးပေါင်းဆောင်ရွက်မှုတွင် သတ္တုကုန်ကြမ်းများကို တန်ဖိုးမြှင့်ထုတ်လုပ်ရေး၊ အလယ်အလတ်အဆင့်ထုတ်လုပ်ရေးကဏ္ဍ (midstream) တွင် ရင်းနှီးမြှုပ်နှံမှုများရရှိရေး၊ သတ္တု တူးဖော်ရေးနှင့် သန့်ရှင်းစွမ်းအင်နည်းပညာများဆိုင်ရာ နည်းပညာပူးပေါင်းဆောင်ရွက်ရေးတို့ကို အဓိကထားဆောင်ရွက်မည်ဖြစ်ကြောင်း သိရပါသည်။ ယင်းမဟာဗျူဟာကို အကောင်အထည်ဖော်ရန် အင်ဒိုနီးရှားနိုင်ငံခြားရေးဝန်ကြီးဌာနက အင်ဒိုနီးရှား-လက်တင်အမေရိကနှင့် ကာရေဘီယံ (INA-LAC) စီးပွားရေးမစ်ရှင်ကို ချီလီနိုင်ငံဆန်တီယာဂိုမြို့၌ ၂၀၂၆ ခုနှစ် အောက်တိုဘာ ၁ ရက်မှ ၂ ရက်အထိ ကျင်းပမည်ဖြစ်ကြောင်း သိရပါသည်။ အဆိုပါအစီအစဉ်တွင် စွမ်းအင်နှင့် သတ္တု တူးဖော်ရေးဆိုင်ရာ စီးပွားရေးဖိုရမ်တစ်ရပ်ကိုလည်း ထည့်သွင်းကျင်းပမည်ဖြစ်ပြီး အင်ဒိုနီးရှား ကုမ္ပဏီများက ဒေသတွင်းမိတ်ဖက်များနှင့် ပူးပေါင်းဆောင်ရွက်နိုင်မည့် စီးပွားရေးအခွင့်အလမ်းများကို တင်ပြနိုင်မည်ဖြစ်ကြောင်း သိရပါသည်။

Antara News                                                                             

DOCA (ရန်ကုန်)

        အင်ဒိုနီးရှားနိုင်ငံပိုင် စွမ်းအင်ကုမ္ပဏီ PT Pertamina သည် စွမ်းအင်ထောက်ပံ့မှုရင်းမြစ် များကွဲပြားစေရန်နှင့် နိုင်ငံ၏ စွမ်းအင်လုံခြုံရေးခိုင်မာစေရန်ရည်ရွယ်၍ တောင်အမေရိကတိုက်ရှိ ဂိုင်ယာနာနှင့် ဆူရီနမ်နိုင်ငံတို့၏ ရေနံနှင့် သဘာဝဓာတ်ငွေ့ upstream ကဏ္ဍတွင် ရင်းနှီးမြှုပ်နှံရန်အခွင့်အလမ်းများ စူးစမ်းလျက်ရှိကြောင်း အင်ဒိုနီးရှားနိုင်ငံခြားရေးဝန်ကြီးဌာနက ပြောကြားခဲ့ပါသည်။ နိုင်ငံခြားရေးဝန်ကြီးဌာန အမေရိကနှင့် ဥရောပရေးရာ ညွှန်ကြားရေးမှူးချုပ် Grata  Endah Werdaningtyas က စက်တင်ဘာလ ၁၄ ရက်နေ့ သတင်းစာရှင်းလင်းပွဲတွင် Pertamina သည် ဂိုင်ယာနာနှင့် ဆူရီနမ်တို့၏ ရေနံနှင့် သဘာဝဓာတ်ငွေ့ upstream ကဏ္ဍများ၌ ရှာဖွေရေးနှင့် ရင်းနှီးမြှုပ်နှံမှုပူးပေါင်းဆောင်ရွက်ရန် ကနဦးဆွေးနွေးမှုများ စတင်ထားပြီးဖြစ်ကြောင်း ပြောကြားခဲ့ပါသည်။ တောင်အမေရိကတိုက် မြောက်ပိုင်းကမ်းရိုးတန်းအလွန်ရှိ ပင်လယ်ပြင်ရေနံ သိုက်များသည် ကမ္ဘာ့ရေနံဈေးကွက်တွင်အရေးပါလာနေပြီး ဒေသတွင်းရေနံထုတ်လုပ်မှုသည် ၂၀၂၈ ခုနှစ်တွင် တစ်ရက်လျှင် စည် ၂၀၀,၀၀၀ အထိ ရောက်ရှိလာမည်ဟု ခန့်မှန်းထားကြောင်း သိရပါသည်။ လက်တင်အမေရိကဒေသရှိ ရေနံမြေများတွင် ရှယ်ယာပိုင်ဆိုင်ခွင့်ရယူခြင်းဖြင့် အင်ဒိုနီးရှားအနေဖြင့် ရေနံကို ရင်းမြစ်တစ်ခုတည်းအပေါ်မှီခိုနေရမှု လျှော့ချနိုင်မည်ဖြစ်သကဲ့သို့ ပထဝီနိုင်ငံရေးမတည်ငြိမ်မှုများကြောင့်ဖြစ်ပေါ်လာနိုင်သည့် ထောက်ပံ့ရေးအန္တရာယ်များကိုလည်း လျှော့ချနိုင်မည်ဖြစ်ကြောင်း Grata ကဆိုပါသည်။ အထူးသဖြင့် အမေရိကန်နှင့် အီရန်အကြား တင်းမာမှုများကြောင့် ဟော်မုဇ်ရေလက်ကြားတွင် မတည်ငြိမ်မှုများ ဆက်လက်ဖြစ်ပေါ်နေသည့် အခြေအနေ၌ ရေနံရင်းမြစ်များတွင်ရင်းနှီးမြှုပ်နှံထားခြင်းက ထိုဒေသမှ စွမ်းအင်ထောက်ပံ့မှုများကို ပိုမိုလုံခြုံစေမည်ဖြစ်ကြောင်း ၎င်းကပြောကြားခဲ့ပါသည်။ လက်တင်အမေရိကနှင့် ကာရစ်ဘီယံဒေသသို့ စီးပွားရေးအရပိုမိုတိုးချဲ့ဆောင်ရွက်ရန် အင်ဒိုနီးရှားအစိုးရ၏မူဝါဒတစ်စိတ်တစ်ပိုင်းအဖြစ် အဆိုပါစွမ်းအင်ကဏ္ဍရင်းနှီးမြှုပ်နှံမှုကို ဆောင်ရွက်ခြင်းဖြစ်ကြောင်း သိရပါသည်။ ၂၀၂၅ ခုနှစ်တွင် အင်ဒိုနီးရှားနှင့် လက်တင်အမေရိက၊ ကာရစ်ဘီယံဒေသတို့အကြား နှစ်နိုင်ငံကုန်သွယ်မှု ပမာဏသည် အမေရိကန်ဒေါ်လာ ၁၆.၁ ဘီလီယံရှိခဲ့ပြီး အင်ဒိုနီးရှား၏ ပို့ကုန် အမေရိကန်ဒေါ်လာ ၇.၆ ဘီလီယံနှင့် သွင်းကုန် အမေရိကန်ဒေါ်လာ ၈.၅ ဘီလီယံ ပါဝင်ခဲ့ကြောင်း သိရပါသည်။ သို့သော် ယင်းပမာဏမှာ အင်ဒိုနီးရှား၏ ကမ္ဘာတစ်ဝန်းစုစုပေါင်းကုန်သွယ်မှုပမာဏ၏ ၃ ရာခိုင်နှုန်းသာရှိကြောင်း သိရပါသည်။ အဆိုပါဒေသနှင့် စီးပွားရေးဆက်ဆံမှုများ ပိုမိုတိုးမြှင့်နိုင်ရန် အင်ဒိုနီးရှားနိုင်ငံခြားရေးဝန်ကြီးဌာနက အင်ဒိုနီးရှား-လက်တင်အမေရိကနှင့် ကာရစ်ဘီယံ (INA-LAC) နှစ်ပတ်လည် စီးပွားရေးမစ်ရှင်ကို ၂၀၂၆ ခုနှစ် အောက်တိုဘာ ၁ ရက်မှ ၂ ရက်အထိ ချီလီနိုင်ငံ၌ ကျင်းပသွားမည်ဖြစ်ကြောင်း သိရှိရပါသည်။

Antara News                                                                             

DOCA (ရန်ကုန်)