ပြည်ပကုန်သွယ်မှုသတင်းများ

         ၂၀၂၅-၂၀၂၆ ဘဏ္ဍာနှစ် ဇူလိုင်လမှ ဖေဖော်ဝါရီလအတွင်း ပါကစ္စတန်နိုင်ငံ၏ စားသောက်ကုန် သွင်းကုန်စရိတ်သည် ယခင်နှစ်ကာလတူရှိ အမေရိကန်ဒေါ်လာ ၅.၄၁၃ ဘီလီယံ မှ ၁၈.၄၁ ရာခိုင်နှုန်း မြင့်တက်ကာ ဒေါ်လာ ၆.၄၁၀ ဘီလီယံအထိ ရောက်ရှိခဲ့ကြောင်း သိရပါသည်။ အဆိုပါ မြင့်တက်ခြင်းသည် အဓိကအားဖြင့် သကြားနှင့် စားသုံးဆီတင်သွင်းမှု ပိုမိုများပြားလာခြင်းကြောင့်ဖြစ်ကြောင်း သိရပါသည်။ ဆန့်ကျင်ဘက်အနေဖြင့် ၂၀၂၆ ဘဏ္ဍာနှစ် ပထမ ၈ လအတွင်း ကုန်ကြမ်းစားသောက်ကုန်များ ပြည်ပတင်ပို့မှုမှာ ၃၄.၃၈ ရာခိုင်နှုန်းအထိ ထိုးဆင်းသွားခဲ့ကြောင်းနှင့် ယခင်နှစ်အလားတူကာလတွင် တင်ပို့မှုမှရရှိခဲ့သော အမေရိကန် ဒေါ်လာ ၅.၁၇၃ ဘီလီယံမှ ယခုအခါ တင်ပို့မှုမှ ဝင်ငွေ အမေရိကန်ဒေါ်လာ ၃.၃၉၄ ဘီလီယံသာရရှိခဲ့ကြောင်း သိရပါသည်။ အသားတင်ပို့မှုမှလွဲ၍ ကျန်စားသောက်ကုန် အမျိုးအစားအများစုတွင် တင်ပို့မှုပမာဏ လျော့ကျသွားခဲ့ကြောင်း သိရပါသည်။ အထူးသဖြင့် ဘက်စမာတီနှင့် အခြားဆန် အမျိုးအစားများအပါအဝင် ဆန်တင်ပို့မှုတွင် အသိသာဆုံး လျော့နည်းသွားကြောင်း သိရပါသည်။

        စားသောက်ကုန်သွင်းကုန် မြင့်တက်လာခြင်းမှာ အထူးသဖြင့် ပဲမျိုးစုံအပါအဝင် ပြည်တွင်းထုတ်လုပ်မှု လိုအပ်ချက်များနှင့် ထောက်ပံ့မှု အခက်အခဲများကြောင့် ပြင်ပမှတင်သွင်းမှုအပေါ် ပိုမိုမှီခိုလာရခြင်းကြောင့်ဖြစ်ကြောင်း သိရပါသည်။ ပြည်တွင်းလိုအပ်ချက်ကို ဖြည့်ဆည်းရန်အတွက် သကြား၊ စားသုံးဆီနှင့် လက်ဖက်ခြောက်တို့ကို ပိုမိုဝယ်ယူခဲ့ရခြင်းက သွင်းကုန်စရိတ် မြင့်တက်စေသည့် အဓိကအကြောင်းရင်း ဖြစ်ကြောင်း သိရပါသည်။ ပါကစ္စတန်နိုင်ငံ စာရင်းအင်းဗျူရိုမှ ထုတ်ပြန်သည့် အချက်အလက်များအရ တင်သွင်းသည့် စားသောက်ကုန်များတွင် စားအုန်းဆီသည် ဝေစုအများဆုံးဖြစ်ပြီး၊ ၎င်းနောက်တွင် ပဲမျိုးစုံ၊ လက်ဖက်ခြောက်၊ ပဲပုပ်ဆီနှင့် သကြားတို့က အစဉ်လိုက်ရပ်တည်နေကြောင်း သိရပါသည်။ ပါကစ္စတန်နိုင်ငံသည် ၂၀၂၆ ဘဏ္ဍာနှစ် ပထမ ၈ လအတွင်း သကြားတန်ချိန် ၃၀၈,၈၈၇ တင်သွင်းခဲ့ပြီး၊ ယခင်နှစ် ကာလတူတွင် ၂၅၂၈ တန်သာ တင်သွင်းခဲ့ရာမှ ၁၂၁၁၈.၆၁ ရာခိုင်နှုန်းအထိ စံချိန်တင်မြင့်တက်လာခဲ့ခြင်းဖြစ်ကြောင်း သိရပါသည်။ တန်ဖိုးအားဖြင့်ဆိုလျှင်လည်း သကြားသွင်းကုန်သည် ယခင် နှစ်က အမေရိကန်ဒေါ်လာ ၂.၄၅၁ သန်းသာရှိရာမှ ယခုနှစ်တွင် ၇,၀၂၈.၂၅ ရာခိုင်နှုန်း မြင့်တက်ကာ အမေရိကန်ဒေါ်လာ ၁၇၄.၇၁၃ သန်းအထိ ရှိလာကြောင်း သိရပါသည်။

          ပြည်တွင်းသကြား ပြတ်လပ်မှုကို ဖြေရှင်းရန်နှင့် ဈေးကွက်ပေါက်ဈေး တည်ငြိမ်စေရန် အစိုးရက သကြားတင်သွင်းမှုကို ခွင့်ပြုပေးခဲ့ခြင်းကြောင့် ယခုကဲ့သို့ သိသိသာသာ မြင့်တက်လာခြင်းဖြစ်ကြောင်း သိရပါသည်။

       ဇူလိုင်လမှ ဖေဖော်ဝါရီလအထိ စားအုန်းဆီ တင်သွင်းမှုတန်ဖိုးမှာ ယခင်နှစ်က အမေရိကန်ဒေါ်လာ ၂.၂၅၁ ဘီလီယံ ရှိခဲ့ရာမှ ၂၁.၅၃ ရာခိုင်နှုန်းမြင့်တက်ကာ အမေရိကန် ဒေါ်လာ ၂.၇၃၄ ဘီလီယံအထိ ရှိလာခဲ့ကြောင်း သိရပါသည်။ ပမာဏအားဖြင့်ဆိုလျှင် စားအုန်းဆီတင်သွင်းမှုသည် ယခင်နှစ်ကာလတူရှိ တန်ချိန် ၂.၂၁၀ သန်းတန်မှ ၂.၅၄၁ သန်းတန်အထိ ၁၄.၉၅ ရာခိုင်နှုန်း တိုးလာခဲ့ကြောင်း သိရပါသည်။ ပဲမျိုးစုံ တင်သွင်းမှုမှာမူ ယခင် နှစ်က အမေရိကန်ဒေါ်လာ ၆၃၀.၀၁၉ သန်း ရှိခဲ့ရာမှ ၂၁.၈၉ ရာခိုင်နှုန်း လျော့ကျကာ အမေရိကန်ဒေါ်လာ ၄၉၂.၀၉၅ သန်းသာရှိတော့ကြောင်း သိရပါသည်။ ပဲပုပ်ဆီ တင်သွင်းမှုတန်ဖိုးသည်လည်း ၂၀၂၅ ဘဏ္ဍာနှစ်တွင် အ‌မေရိကန်ဒေါ်လာ ၂၀၁.၃၅၂ သန်း ရှိခဲ့ရာမှ ၄၇.၁၇ ရာခိုင်နှုန်း ထိုးဆင်းသွားပြီး အမေရိကန်ဒေါ်လာ ၁၀၆.၃၇၂ သန်းသာရှိခဲ့ကြောင်း သိရပါသည်။ အခြားသော စားသောက်ကုန်များအတွက် သွင်းကုန်စရိတ်မှာလည်း ၂၀၂၆ ဘဏ္ဍာနှစ် ပထမ ၈ လတွင် ယခင်နှစ်က အမေရိကန်ဒေါ်လာ ၁.၄၅၃ ဘီလီယံမှ ၃၈.၀၇ ရာခိုင်နှုန်း မြင့်တက်ကာ အမေရိကန်ဒေါ်လာ ၂.၀၀၆ ဘီလီယံအထိ ရှိလာခဲ့ကြောင်း သိရပါသည်။ (လက်ဖက်ခြောက်ကဲ့သို့သော) အချို့သွင်းကုန် တန်ဖိုးများမှာလည်း အမေရိကန်ဒေါ်လာ ၄၁၈.၂၅၉ သန်းမှ ၄.၇၂ ရာခိုင်နှုန်းမြင့်တက်ကာ အမေရိကန်ဒေါ်လာ ၄၃၇.၉၈၅ သန်းအထိရှိလာကြောင်း သိရှိရပါသည်။

        နို့၊ ခရင်မ်နှင့် နို့စို့ကလေးငယ်များအတွက် အာဟာရဖြည့်နို့မှုန့်များ တင်သွင်းမှုမှာ ဘတ်ဂျက်တွင် အခွန်အသစ်များ ကောက်ခံခဲ့သော်လည်း ဇူလိုင်မှ ဖေဖော်ဝါရီလအတွင်း ၃.၆၃ ရာခိုင်နှုန်း တိုးတက်လာခဲ့ပြီး၊ ယခင်နှစ်က အမေရိကန်ဒေါ်လာ ၉၁.၁၀၅ သန်းမှ အမေရိကန်ဒေါ်လာ ၉၄.၄၀၈ သန်းအထိ ရှိလာခဲ့ကြောင်း သိရှိရပါသည်။

Source: Dawn                                                                           

DOCA (ရန်ကုန်)

         ဗီယက်နမ်နိုင်ငံ၏ ဖေဖော်ဝါရီလအတွင်း မော်တော်ယာဉ်ရောင်းချရမှုသည် စုစုပေါင်း ၁၉,၂၇၈ စီးသာရှိခဲ့ပြီး ယခင်လထက် ၄၈ ရာခိုင်နှုန်း ကျဆင်းသွားကြောင်း ဗီယက်နမ် သတင်းဌာနက မတ်လ ၁၁ ရက်နေ့တွင် ဖော်ပြခဲ့သည်။

          ဗီယက်နမ်မော်တော်ယာဉ်ထုတ်လုပ်သူများအသင်း (VAMA) ၏ ထုတ်ပြန်ချက်အရ လူစီးကားရောင်းချရမှုသည် ၁၂,၃၇၆ စီးဖြင့် အများဆုံးဖြစ်သော်လည်း ဇန်နဝါရီလနှင့် နှိုင်းယှဉ်ပါက ၅၃ ရာခိုင်နှုန်း ကျဆင်းသွားခဲ့သည်။ ၎င်းနောက်တွင် လုပ်ငန်းသုံးယာဉ် ၆,၅၄၂ စီးနှင့် အထူးသုံးယာဉ် ၃၆၀ စီးတို့ အသီးသီးရောင်းချခဲ့ရသည်။

          ပြည်တွင်း၌ တပ်ဆင်ထုတ်လုပ်သည့် မော်တော်ယာဉ် ၉,၂၂၀ စီးနှင့် ပြည်ပမှ အလုံးလိုက်တင်သွင်းသည့် မော်တော်ယာဉ် ၁၀,၀၅၈ စီး ရောင်းချခဲ့ရပြီး ၎င်းတို့မှာလည်း ဇန်နဝါရီလထက် ၄၉ ရာခိုင်နှုန်းနှင့် ၄၇ ရာခိုင်နှုန်း အသီးသီး လျော့ကျသွားခြင်းဖြစ်သည်။ သို့သော်လည်း VAMA ၏ အဆိုအရ ယခုနှစ် ပထမနှစ်လအတွင်း စုစုပေါင်းရောင်းအားမှာ ၄၆,၁၅၃ စီး ရှိခဲ့သဖြင့် ယခင်နှစ် အလားတူကာလနှင့် နှိုင်းယှဉ်ပါက ၃၉ ရာခိုင်နှုန်း မြင့်တက်နေဆဲဖြစ်ကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

        အမေရိကန်သမ္မတ ဒေါ်နယ်ထရန့်က သွင်းကုန်ခွန်ကို ၁၈ ရာခိုင်နှုန်းအထိ လျှော့ချပေး မည်ဟု ကြေညာခဲ့ပြီးနောက် အမေရိကန်သို့ တင်ပို့သည့် အိန္ဒိယနိုင်ငံ၏ ရေထွက်ပစ္စည်းပို့ကုန်များသည် အရှိန်အဟုန် ပြန်လည်ကောင်းမွန်လာမည်ဖြစ်ကြောင်း သိရပါသည်။ အဆိုပါ လုပ်ဆောင်ချက်သည် အိန္ဒိယ၏ အကြီးမားဆုံး ပြည်ပစျေးကွက်တွင် ယှဉ်ပြိုင်နိုင်စွမ်းကို ပြန်လည်ရရှိစေမည်ဖြစ်ကြောင်း သိရပါသည်။

       ၂၀၂၄-၂၅ ခုနှစ်တွင် အမေရိကန်ဒေါ်လာ ၂.၇၈ ဘီလီယံတန်ဖိုးရှိ ပို့ကုန်များနှင့် အတူ အမေရိကန်ပြည်ထောင်စုသည် အိန္ဒိယရေထွက်ပစ္စည်းများအတွက် အကြီးမားဆုံးသော တင်ပို့ရာနေရာအဖြစ် ဆက်လက်တည်ရှိခဲ့သော်လည်း ၂၀၂၆ခုနှစ်တွင် ပို့ကုန်စွမ်းဆောင်ရည် အားနည်းခဲ့ပြီး ၂၀၂၅ခုနှစ် ကာလတူနှင့် နှိုင်းယှဉ်ပါက တန်ဖိုးအားဖြင့် ၆.၃ ရာခိုင်နှုန်းခန့်နှင့် ပမာဏအားဖြင့် ၁၅ ရာခိုင်နှုန်းနီးပါး ကျဆင်းခဲ့ကြောင်း သိရပါသည်။

        အဆိုပါ ကျဆင်းမှုသည် ၂၀၂၅ ခုနှစ် ဩဂုတ်လတွင် ၅၀ ရာခိုင်နှုန်းအထိ မြင့်တက်ခဲ့သော အခွန်နှုန်းထားများကြောင့်ဖြစ်ကြောင်း သိရပါသည်။ ယခုကဲ့သို့ အခွန်လျှော့ချလိုက်ခြင်းကြောင့် အိန္ဒိယနိုင်ငံသည် အီကွေဒေါ၊ အင်ဒိုနီးရှား၊ ထိုင်းနှင့် ဗီယက်နမ်ကဲ့သို့သော ပြိုင်ဘက်နိုင်ငံများနှင့် ပိုမိုထိရောက်စွာ ယှဉ်ပြိုင်လာနိုင်မည်ဖြစ်ကြောင်း သိရပါသည်။

         ပြင်ဆင်လိုက်သော သွင်းကုန်အခွန်နှုန်းထားအရ အီကွေဒေါက ၁၅ ရာခိုင်နှုန်း၊ အင်ဒိုနီးရှားနှင့် ထိုင်းတို့က ၁၉ ရာခိုင်နှုန်းနှင့် ဗီယက်နမ်က ၂၀ ရာခိုင်နှုန်း အသီးသီးရှိရာ အိန္ဒိယသည် ၁၈ ရာခိုင်နှုန်းဖြင့် အဆိုပါနိုင်ငံများနှင့် တန်းတူအခြေအနေသို့ ရောက်ရှိလာကြောင်း သိရပါသည်။ “ကုန်သွယ်ရေးသဘောတူညီချက် ရရှိသွားတာနဲ့ အခွန်နှုန်းထားကို ၁၈ ရာခိုင်နှုန်း အထိ လျှော့ချလိုက်တာကြောင့် အိန္ဒိယကနေ အမေရိကန်ကိုတင်ပို့တဲ့ ရေထွက်ပစ္စည်းပမာဏဟာ တိုးတက်လာပြီး မကြာခင်မှာ အရင်အခြေအနေကို ပြန်ရောက်လာမယ်လို့ ကျွန်တော်တို့ ယုံကြည်ပါတယ်” ဟု အိန္ဒိယ ရေထွက်ပစ္စည်း တင်ပို့သူများအသင်း (SEAI) ဥက္ကဋ္ဌ G. Pawan Kumar က ပြောကြားခဲ့ပါသည်။ “၁၈ ရာခိုင်နှုန်းမှာဆိုရင် ကျွန်တော်တို့ဟာ ယှဉ်ပြိုင်နိုင်စွမ်းရှိနေပြီဖြစ်လို့ စျေးကွက်ဝေစုကို ပြန်လည်ရယူနိုင်မှာပါ” ဟု ၎င်းက ဆက်လက်ပြောကြားခဲ့ကြောင်း သိရပါသည်။

          SEAI သည် အိန္ဒိယရေထွက်ကုန်များအပေါ် အခွန်လျှော့ချပေးနိုင်ခဲ့သည့် အမေရိကန် ပြည်ထောင်စုနှင့် ကုန်သွယ်ရေးသဘောတူညီချက် အောင်မြင်စွာရရှိခဲ့ခြင်းအတွက် ပြည်ထောင်စုအစိုးရအား ချီးကျူးဂုဏ်ပြုကြောင်း ထုတ်ပြန်ချက်တွင် ဖော်ပြထားကြောင်း သိရပါသည်။ SEAI အသင်းအနေဖြင့် အဆိုပါသဘောတူညီချက်ရရှိရန် ကြိုးပမ်းပေးခဲ့ကြသော စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ဝန်ကြီးနှင့် တာဝန်ရှိသူများ၊ ပင်လယ်စာထုတ်ကုန်များ တင်ပို့မှု ဖွံ့ဖြိုးတိုးတက်ရေး အာဏာပိုင်အဖွဲ့ (MPEDA) နှင့် ပို့ကုန်စစ်ဆေးရေးကောင်စီ (EIC) တို့၏ ကြိုးပမ်းမှုများကိုလည်း အသိအမှတ်ပြုခဲ့ကြောင်း သိရှိရပါသည်။

Source: The India Time                                                             

DOCA (ရန်ကုန်)

        ဗီယက်နမ်နိုင်ငံသည် ဖေဖော်ဝါရီလအတွင်း အမေရိကန်ဒေါ်လာ ၂၈၉.၄ သန်း တန်ဖိုး ရှိသောဆန်တန်ချိန် ၆၄၀,၀၀၀ ခန့် တင်ပို့ခဲ့ကြောင်း စိုက်ပျိုးမွေးမြူရေးနှင့် သဘာဝပတ်ဝန်းကျင် ဝန်ကြီးဌာန၏ ထုတ်ပြန်ချက်အရ သိရပါသည်။ ဗီယက်နမ်သည် ယခုနှစ် ပထမနှစ်လအတွင်း အမေရိကန်ဒေါ်လာ ၅၉၉.၃ သန်း တန်ဖိုးရှိသော ဆန်တန်ချိန် ၁.၃ သန်းတင်ပို့ခဲ့ပြီး ယခင်နှစ် တူညီသည့်ကာလနှင့် နှိုင်းယှဉ်ပါက ပမာဏတွင် ၅ ရာခိုင်နှုန်း မြင့်တက်ခဲ့သော်လည်း တန်ဖိုးတွင် ၁၁.၂ ရာခိုင်နှုန်း ကျဆင်းခဲ့ကြောင်း သိရပါသည်။ ဇန်နဝါရီလမှ ဖေဖော်ဝါရီလအထိ နှစ်လတာ ကာလအတွင်း ဆန်တင်ပို့သည့် ပျမ်းမျှဈေးနှုန်းသည် တစ်တန်လျှင် အမေရိကန်ဒေါ်လာ ၄၆၄.၁ ခန့်ရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၁၅.၄ ရာခိုင်နှုန်း ကျဆင်းခဲ့ကြောင်း သိရ ပါသည်။ ဖိလစ်ပိုင်နိုင်ငံသည် ဗီယက်နမ်၏ အကြီးဆုံးဆန်တင်ပို့သည့်စျေးကွက်အဖြစ် ဆက်လက် ရပ်တည်နေပြီး စုစုပေါင်းတင်ပို့မှု၏ ၄၇.၆ ရာခိုင်နှုန်းကို ပိုင်ဆိုင်ထားကြောင်း သိရပါသည်။ ထို့နောက် တရုတ်နိုင်ငံနှင့် ဂါနာနိုင်ငံတို့က ၁၈.၃ ရာခိုင်နှုန်းနှင့် ၈.၉ ရာခိုင်နှုန်း အသီးသီးဖြင့် ရပ်တည်နေကြောင်း သိရပါသည်။ ယခင်နှစ်တူညီသည့်ကာလနှင့် နှိုင်းယှဉ်ပါက ဖိလစ်ပိုင်နိုင်ငံသို့ ဆန်တင်ပို့မှုတန်ဖိုးသည် ၁၇.၆ ရာခိုင်နှုန်း မြင့်တက်လာခဲ့ပြီး တရုတ်နိုင်ငံသို့ တင်ပို့မှုသည် ၅.၈ ဆအထိ မြင့်တက်ခဲ့ကြောင်း သိရပါသည်။ သို့သော် ဂါနာနိုင်ငံသို့ တင်ပို့မှုမှာ ၃၁ ရာခိုင်နှုန်း ကျဆင်းခဲ့ကြောင်း သိရပါသည်။ အကြီးဆုံး ဆန်တင်ပို့သည့်စျေးကွက် ၁၅ ခုအနက် တရုတ်နိုင်ငံ သို့ တင်ပို့မှုမှာ ၅.၈ ဆအထိ မြင့်တက်လာပြီး ကြီးထွားမှုအားအကောင်းဆုံးဖြစ်ခဲ့ကာ ကို့တ်ဒီဗွား (Côte d’Ivoire) သို့ တင်ပို့မှုမှာ ၉၀.၉ ရာခိုင်နှုန်းကျဆင်းပြီး ကျဆင်းအမြင့်ဆုံးဖြစ်ခဲ့ကြောင်း သိရပါသည်။ ပို့ကုန်လုပ်ငန်းရှင်များ၏ အဆိုအရ လက်ရှိတွင် ဗီယက်နမ်၏ ၅ ရာခိုင်နှုန်း broken rice ဈေးနှုန်းသည် တစ်တန်လျှင် အမေရိကန်ဒေါ်လာ ၃၆၅ ခန့်ဖြင့် ရောင်းဝယ်နေပြီး ယခင် သီတင်းပတ်နှင့် နှိုင်းယှဉ်ပါက ပြောင်းလဲမှုမရှိသေးကြောင်း သိရပါသည်။ သို့သော် ဆောင်း–နွေ ရိတ်သိမ်းရာသီ အထွတ်အထိပ်ကာလဖြစ်လာသဖြင့် ပြည်တွင်းထောက်ပံ့မှုများ မြင့်တက်လာနေခြင်းကြောင့် ဆန်ဈေးနှုန်းများ ဆက်လက်ကျဆင်းနိုင်မည်ဟု ဝယ်ယူသူများက မျှော်လင့်နေ ကြပြီး ကုန်သွယ်ရေး လှုပ်ရှားမှုများ နှေးကွေးနေကြောင်း သိရပါသည်။ အစောပိုင်းအချက် အလက်များအရ ဖေဖော်ဝါရီလအတွင်း တောင်ပိုင်းဆိပ်ကမ်းများမှ ဆန်တန်ချိန် ၃၈၂,၀၀၀ ကျော် တင်ပို့ခဲ့ပြီး အများစုကို ဖိလစ်ပိုင်နှင့် အာဖရိကနိုင်ငံများသို့ တင်ပို့ခဲ့ကြောင်း သိရပါသည်။ အရှေ့ အလယ်ပိုင်းဒေသရှိ ပဋိပက္ခများသည် အာဖရိကသို့ ဗီယက်နမ်၏ ဆန်တင်ပို့မှုကို တိုက်ရိုက် သက်ရောက်မှုမရှိသေးသော်လည်း အာမခံကြေးနှင့် လောင်စာဈေးနှုန်းများ မြင့်တက်လာခြင်းကြောင့် သယ်ယူပို့ဆောင်ရေးစရိတ်များ သိသိသာသာ မြင့်တက်လာကြောင်း ကုန်သည်များက ပြောကြားခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          အင်ဒိုနီးရှား စိုက်ပျိုးမွေးမြူရေး ဝန်ကြီး Andi Amran Sulaiman က ကုန်သည်များအား အမဲသား၊ ကြက်သားနှင့် ကြက်ဥဈေးနှုန်းများကို အစိုးရကသတ်မှတ်ထားသည့် အမြင့်ဆုံး လက်လီဈေးနှုန်းအောက်တွင်သာထားရှိရန် သတိပေးခဲ့ပြီး ထောက်ပံ့မှုလုံလောက်နေကြောင်း ပြေကြားခဲ့ပါသည်။ ဈေးနှုန်းများတက်လာစေရန်ရည်ရွယ်၍ ကုန်ပစ္စည်းများကို သိုလှောင်ထားခြင်း (သို့မဟုတ်) ဈေးကွက်ကို လှည့်ဖြားထိန်းချုပ်ခြင်းများရှိပါက အာဏာပိုင်များက အရေးယူဆောင်ရွက်သွားမည်ဖြစ်ကြောင်းနှင့် နိုင်ငံ၏ အရေးကြီး အစားအစာကုန်ပစ္စည်းများအားလုံးကို ဈေးကွက်တည်ငြိမ်ရန်နှင့် ပြည်သူများ၏ဝယ်ယူနိုင်စွမ်းကိုကာကွယ်ရန်အတွက် အစိုးရသတ်မှတ်ထားသည့် အမြင့်ဆုံး လက်လီဈေးနှုန်းအောက်တွင်သာ ထားရှိရမည်ဖြစ်ကြောင်း Sulaiman က မတ်လ ၅ ရက်နေ့တွင် ပြောကြားခဲ့ပါသည်။ အင်ဒိုနီးရှားအစိုးရက ကြက်သား (broiler chicken meat) အတွက် အမြင့်ဆုံး လက်လီဈေးနှုန်းကို တစ်ကီလိုဂရမ်လျှင် ရူပီး ၄၀,၀၀၀ (အမေရိကန် ဒေါ်လာ ၂.၅၅ ခန့်) သတ်မှတ်ထားပြီး အမဲသားအတွက် တစ်ကီလိုဂရမ်လျှင် ရူပီး ၁၄၀,၀၀၀ နှင့် ကြက်ဥအတွက် တစ်ကီလိုဂရမ်လျှင် ရူပီး ၃၀,၀၀၀ သတ်မှတ်ထားကြောင်း သိရပါသည်။ Sulaiman က နိုင်ငံအတွင်း အမဲသား၊ ကြက်သားနှင့် ကြက်ဥရရှိနိုင်မှုမှာ လုံလောက်နေဆဲဖြစ်ကြောင်း အလေးပေးပြောကြားခဲ့ပြီး ဈေးနှုန်းမြင့်တက်လာစေရန် ရည်ရွယ်၍ ကုန်ပစ္စည်း များကို ဈေးကွက်သို့မပို့ဘဲ သိုလှောင်ထားသည်ဟု သံသယရှိသူများကို အာဏာပိုင်များက စစ်ဆေးအရေးယူရန် တိုက်တွန်းခဲ့ပါသည်။ ထိုထုတ်ပြန်ချက်သည် အင်ဒိုနီးရှား စာရင်းအင်း ဌာနက ထုတ်ပြန်သည့် အစီရင်ခံစာအပြီးတွင် ထွက်ပေါ်လာခြင်းဖြစ်ပြီး အနောက်ဂျာဗာပြည်နယ်ရှိ  Bandung မြို့အပါအဝင် ဒေသအချို့တွင် အစားအစာဈေးနှုန်းများ မြင့်တက်လာကြောင်း ဖော်ပြထားသည်ဟု သိရပါသည် Sulaiman က စိုက်ပျိုးမွေးမြူရေးဝန်ကြီးဌာန၏ စစ်ဆေးမှုများအရ ကုန်ပစ္စည်းရရှိနိုင်မှုတွင် အခက်အခဲမရှိကြောင်း၊ နွားနှင့် အမဲသားပေးပို့မှုဆိုင်ရာ အကြံပြုချက်များအားလုံးကို ဒီဇင်ဘာလကတည်းက ထုတ်ပြန်ပြီးဖြစ်ကြောင်း၊ ထို့ကြောင့် ဈေးနှုန်းများ အလွန်မြင့်တက်လာရန် အကြောင်းပြချက်မရှိကြောင်းနှင့် ဈေးနှုန်းမြင့်တက်လာသည့် လက္ခဏာများမှာ ကုန်ပစ္စည်းများဈေးကွက်သို့မရောက်မီ အလယ်အလတ်ကုန်သွယ်ရေးအဆင့်တွင် ထိန်းထားနေခြင်းကြောင့် ဖြစ်နိုင်ကြောင်း တွေ့ရှိရသည်ဟု ပြောကြားခဲ့ပါသည်။ Sulaiman က အင်ဒိုနီးရှား နိုင်ငံအနှံ့ရှိ အစိုးရ၏ Food Task Force၊ ရဲတပ်ဖွဲ့၏ အထူးမှုခင်းစုံစမ်းရေးဌာနနှင့် ဥပဒေ အာဏာပိုင်အဖွဲ့များအား တင်းကျပ်စွာ စောင့်ကြည့်စစ်ဆေးရန် တိုက်တွန်းခဲ့ကြောင်း သိရပါသည်။ စည်းကမ်းချိုးဖောက်မှုများ အတည်ပြုတွေ့ရှိပါက ကုန်ပစ္စည်းသိုလှောင်ထားသည့် ဂိုဒေါင်များကို ပိတ်သိမ်းခြင်းအပါအဝင် တင်းကျပ်စွာအရေးယူဆောင်ရွက်ရန်လည်း ၎င်းက တောင်းဆိုခဲ့ကြောင်း သိရပါသည်။ ထို့အပြင် ဈေးကွက်ဖိအားများကြား ထုတ်လုပ်မှု ဆက်လက်ထိန်းသိမ်းကာ ဈေးကွက်အသစ်များ တိုးချဲ့နေသည့် အစားအစာလုပ်ငန်းများနှင့် ပို့ကုန်လုပ်ငန်းရှင်များကိုလည်း ဝန်ကြီးကချီးကျူးပြောကြားခဲ့ပြီး ၎င်းတို့၏ ကြိုးပမ်းမှုများသည် ကုန်ပစ္စည်းရရှိနိုင်မှု တည်ငြိမ်ရေးနှင့် အစိုးရ၏ အစားအစာဖူလုံရေး မဟာဗျူဟာကို ထောက်ပံ့ပေးနေကြောင်း ပြောကြားခဲ့သည်ဟု သိရှိရပါသည်။

Antara News                                                                             

DOCA (ရန်ကုန်)