ပြည်ပကုန်သွယ်မှုသတင်းများ

           ကမ္ဘောဒီးယားနိုင်ငံသည် ၂၀၂၆ ခုနှစ်၏ ပထမနှစ်လအတွင်း အမေရိကန်ဒေါ်လာ ၅.၂၃ ဘီလီယံတန်ဖိုးရှိ ကုန်ပစ္စည်းများကို ပြည်ပသို့ တင်ပို့နိုင်ခဲ့ပြီး ယခင်နှစ် အလားတူကာလထက် ၁၇.၂ ရာခိုင်နှုန်း မြင့်တက်လာခြင်းဖြစ်ကြောင်း General Department of Customs and Excise က မတ်လ ၁၀ ရက်နေ့တွင် ထုတ်ပြန်သည့် အစီရင်ခံစာအရ သိရသည်။

        အဆိုပါ အရှေ့တောင်အာရှနိုင်ငံ၏ အဓိကပို့ကုန်တင်ပို့ရာ ထိပ်သီးနိုင်ငံ ၅ ခုမှာ အမေရိကန်၊ ဗီယက်နမ်၊ ဂျပန်၊ တရုတ်နှင့် စပိန်နိုင်ငံတို့ ဖြစ်ကြသည်။ ကမ္ဘောဒီးယားနိုင်ငံ ၏ ယခုနှစ် ဇန်နဝါရီနှင့် ဖေဖော်ဝါရီလအတွင်း စုစုပေါင်း သွင်းကုန်တင်သွင်းမှုမှာ ဒေါ်လာ ၅.၈၈ ဘီလီယံ ရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၁၈ ရာခိုင်နှုန်း မြင့်တက်ခဲ့ကြောင်းလည်း အစီရင်ခံစာတွင် ဖော်ပြထားသည်။

         ဒေသတွင်း ဘက်စုံစီးပွားရေး ပူးပေါင်းဆောင်ရွက်မှု (RCEP) နှင့် တရုတ်၊ တောင်ကိုရီးယား၊ အာရပ်စော်ဘွားများပြည်ထောင်စု (UAE) တို့နှင့် ချုပ်ဆိုထားသော ကမ္ဘောဒီးယား၏ နှစ်နိုင်ငံ လွတ်လပ်သော ကုန်သွယ်မှုသဘောတူညီချက်များ (FTAs) သည် နိုင်ငံ၏ ပို့ကုန်တိုးတက်မှုကို အရှိန်အဟုန်မြှင့်တင်ပေးခဲ့ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ပြောရေးဆိုခွင့်ရှိသူ Penn Sovicheat က ပြောကြားခဲ့သည်။

         ကမ္ဘောဒီးယား နည်းပညာနှင့် သိပ္ပံတက္ကသိုလ်မှ တရုတ်-အာဆီယံ လေ့လာရေးစင်တာ ဒုတိယညွှန်ကြားရေးမှူး Thong Mengdavid ကလည်း အဆိုပါ ကုန်သွယ်ရေးစာချုပ်များကြောင့် ကမ္ဘောဒီးယား၏ ပို့ကုန်များသည် ၂၀၂၆ ခုနှစ်တစ်လျှောက်လုံးတွင် ဆက်လက်မြင့်တက်နေဖွယ်ရှိကြောင်း သုံးသပ်ပြောကြားခဲ့ကြောင်း သိရှိရပါသည်။

Source : Xinhua                                                                                

DOCA (ရန်ကုန်)

     ဗီယက်နမ်ရင်းနှီးမြှုပ်နှံသူများသည် ၂၀၂၆ ခုနှစ်၏ ပထမနှစ်လ (ဇန်နဝါရီနှင့် ဖေဖော်ဝါရီ) အတွင်း ပြည်ပစီမံကိန်းများ၌ အမေရိကန်ဒေါ်လာ ၅၄၀.၂ သန်းအထိ ရင်းနှီးမြှုပ်နှံခဲ့ကြပြီး ယင်းမှာ ယခင်နှစ် အလားတူကာလနှင့် နှိုင်းယှဉ်ပါက ၂.၃ ဆ မြင့်တက်လာခြင်းဖြစ်ကြောင်း ဘဏ္ဍာရေး ဝန်ကြီးဌာန၏ နိုင်ငံခြားရင်းနှီးမြှုပ်နှံမှုအေဂျင်စီကို ကိုးကား၍ ဗီယက်နမ်သတင်း ဌာနက မတ်လ ၈ ရက်နေ့တွင် ဖော်ပြခဲ့သည်။

        ထုတ်ပြန်ချက်အရ အဆိုပါပမာဏအနက် ဒေါ်လာ ၅၃၂.၄ သန်းကို စီမံကိန်းအသစ် ၃၆ ခုအတွက် မှတ်ပုံတင်ခဲ့ခြင်းဖြစ်ပြီး ကျန်ဒေါ်လာ ၇.၈ သန်းကို လက်ရှိလည်ပတ်နေသော စီမံကိန်း ၃ ခုတွင် ထပ်မံဖြည့်တင်းခဲ့ခြင်းဖြစ်သည်။ ယင်းမှာ ယခင်နှစ်နှင့် နှိုင်းယှဉ်ပါက စီမံကိန်း အသစ်များတွင် ၂.၃ ဆနှင့် လက်ရှိစီမံကိန်းများတွင် ၁.၅ ဆ အသီးသီး တိုးတက်လာခြင်းလည်းဖြစ်သည်။

       ရင်းနှီးမြှုပ်နှံမှုများထဲတွင် အများဆုံးပမာဏဖြစ်သော ဒေါ်လာ ၁၆၃.၈ သန်းကို လျှပ်စစ်ဓာတ် အား၊ ဓာတ်ငွေ့၊ ရေပူ၊ အခိုးအငွေ့နှင့် လေအေးပေးစနစ် ထုတ်လုပ်ဖြန့်ဖြူးရေး ကဏ္ဍများတွင် အသုံးပြုခဲ့ပြီး စုစုပေါင်းရင်းနှီးမြှုပ်နှံမှု၏ ၃၀.၃ ရာခိုင်နှုန်းရှိသည်။

          ဗီယက်နမ်ရင်းနှီးမြှုပ်နှံသူများ အများဆုံးသွားရောက်မြှုပ်နှံသည့် နိုင်ငံများမှာ လာအိုနိုင်ငံ (ဒေါ်လာ ၁၇၆.၇ သန်း) ဖြင့် ထိပ်ဆုံးမှ ရှိနေပြီး ၎င်းနောက်တွင် ကာဂျစ္စတန် (ဒေါ်လာ ၁၄၉.၉ သန်း) နှင့် အန်ဂိုလာ (ဒေါ်လာ ၃၀ သန်း) တို့က အသီးသီး ရပ်တည်နေကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

        ဘင်္ဂလားဒေ့ရှ်နိုင်ငံ၏ လောင်စာဆီလိုအပ်ချက် စိုးရိမ်ရသည့် အခြေအနေတွင် အိန္ဒိယနိုင်ငံမှ ဒီဇယ်တန်ချိန် ၅,၀၀၀ တန်နီးပါးကို ပိုက်လိုင်းမှတစ်ဆင့် ယနေ့ တင်သွင်းမည်ဖြစ်ကြောင်း သိရပါသည်။ အဆိုပါ ဒီဇယ်များသည် Parbatipur နယ်စပ်မှ တစ်ဆင့် ဘင်္ဂလားဒေ့ရှ်နိုင်ငံသို့ ဝင်ရောက်မည်ဖြစ်ကြောင်း ဘင်္ဂလားဒေ့ရှ် ရေနံကော်ပိုရေးရှင်း (BPC) ဥက္ကဋ္ဌ Muhammad Rezanur Rahman က ပြောကြားခဲ့ကြောင်း သိရပါသည်။ “ကျွန်တော်တို့ အိန္ဒိယနဲ့ သဘောတူညီချက်ရှိပါတယ်။ အဲဒီသဘောတူညီချက်အရ အိန္ဒိယက ဘင်္ဂလားဒေ့ရှ်ကို ပိုက်လိုင်းကတစ်ဆင့် တစ်နှစ်ကို ဒီဇယ်တန်ချိန် ၁၈၀,၀၀၀ ထောက်ပံ့ပေးမှာပါ။ အခုရောက်ရှိလာတဲ့ ဒီဇယ်တန်ချိန် ၅,၀၀၀ ဟာ အဲဒီသဘောတူညီချက် ရဲ့ အစိတ်အပိုင်းတစ်ခု ဖြစ်ပါတယ်” ဟု Rahman က ထပ်မံပြောကြားခဲ့ပါသည်။

          BPC ဥက္ကဋ္ဌက ဆက်လက်ပြောကြားရာတွင် “သဘောတူညီချက်အရ ခြောက်လအတွင်း အနည်းဆုံး ဒီဇယ်တန်ချိန် ၉၀,၀၀၀ တင်သွင်းရမှာ ဖြစ်ပါတယ်။ ဒီနေ့ရောက်ရှိလာတဲ့ အသုတ်ကတော့ တန်ချိန် ၅,၀၀၀ ဖြစ်ပြီး၊ လာမယ့် နှစ်လအတွင်းမှာ ခြောက်လစာအတွက် စုစုပေါင်း ဒီဇယ်ပမာဏအားလုံးကို တင်သွင်းနိုင်ဖို့ မျှော်လင့်ထားပါတယ်” ဟု ပြောကြားခဲ့ကြောင်း သိရပါသည်။

         မတ်လ ၈ ရက်နေ့တွင် ဘင်္ဂလားဒေ့ရှ်နိုင်ငံ အစိုးရသည် လောင်စာဆီ လက်ကျန် အခြေအနေကို စစ်ဆေးရန် ရှောင်တခင် စစ်ဆေးမှုများ ပြုလုပ်ခဲ့ကြောင်း စွမ်းအင်ဝန်ကြီးဌာနမှ ထုတ်ပြန်သော ထုတ်ပြန်ချက်များအရ သိရပါသည်။ “လက်ရှိ အကျပ်အတည်းဖြစ်ပေါ်နေတဲ့ အခြေအနေမှာ အကျိုးအမြတ်မရိုးသားတဲ့ ကုန်သည်တချို့ဟာ ဈေးကွက်အတွင်း ဆီပြတ်လပ်မှုအတု ဖန်တီးဖို့အတွက် လောင်စာဆီတွေကို တရားမဝင် သိုလှောင်ထားကြောင်း မီဒီယာအသီးသီးမှာ သတင်းထွက်ပေါ်နေပါတယ်” ဟု ဝန်ကြီးဌာန၏ ထုတ်ပြန်ချက်တွင် ဖော်ပြထားကြောင်း သိရပါသည်။ “ဒီပြဿနာကို ဖြေရှင်းဖို့အတွက် အစိုးရအနေနဲ့ ယာဉ်အမျိုးအစားအလိုက် လောင်စာဆီ ရောင်းချခွင့်ပမာဏကို သတ်မှတ်ထားပြီး ဖြစ်ပါတယ်။ ဒါပေမဲ့ ဓာတ်ဆီဆိုင်တချို့မှာ အစိုးရသတ်မှတ်ထားတဲ့ ပမာဏထက် ပိုမိုရောင်းချနေတာ၊ အမြတ်အစွန်း ပိုမိုရရှိဖို့အတွက် ဆီတွေကို သိုလှောင်ထားတာ၊ ပြင်ပဈေးကွက်မှာ ပြန်လည်ရောင်းချတာနဲ့ မှောင်ခိုကုန်သွယ်မှု ပြုလုပ်တာတွေကို တွေ့ရှိနေရပါတယ်” ဟုလည်း ထပ်လောင်းပြောကြားခဲ့ကြောင်း သိရှိရပါသည်။

Source: The Edge Malaysia                                               

DOCA (ရန်ကုန်)

        အရှေ့အလယ်ပိုင်း ပဋိပက္ခများကြောင့် ရေနံစိမ်းဈေးနှုန်းများ အဆမတန်မြင့်တက်လာခြင်းကြောင့် စားအုန်းဆီအခြေခံသည့် B50 အဆင့် ဇီဝဒီဇယ် (Biodiesel) ကို မဖြစ်မနေ အသုံးပြုရမည့် အစီအစဉ်အား ယခုနှစ်လယ်တွင် ပြန်လည်စတင်ရန် အင်ဒိုနီးရှားနိုင်ငံက စဉ်းစားနေကြောင်း စွမ်းအင်ဝန်ကြီးဌာန ဒုတိယဝန်ကြီး Yuliot Tanjung က ပြောကြားခဲ့ပါသည်။ ကမ္ဘာ့အကြီးဆုံး စားအုန်းဆီထုတ်လုပ်သည့် အင်ဒိုနီးရှားနိုင်ငံအနေဖြင့် အဆိုပါကိစ္စနှင့် ပတ်သက်၍ ဆုံးဖြတ်ချက် တစ်စုံတစ်ရာ မချမှတ်ရသေးကြောင်း Yuliot က ထပ်မံပြောကြားခဲ့ပါသည်။

      ဇန်နဝါရီလအတွင်းက အာဏာပိုင်များသည် နည်းပညာနှင့် ရန်ပုံငွေဆိုင်ရာ စိုးရိမ်ပူပန်မှုများကြောင့် စားအုန်းဆီ ၅၀ ရာခိုင်နှုန်းနှင့် ရိုးရိုးဒီဇယ် ၅၀ ရာခိုင်နှုန်း ရောစပ်ထားသည့် B50 အစီအစဉ်အား ယခုနှစ်အတွင်း စတင်မည့်အစီအစဉ်ကိုဖျက်သိမ်းခဲ့ပြီး B40 အဆင့်ကိုသာ ဆက်လက်အသုံးပြုရန် ဆုံးဖြတ်ခဲ့ကြကြောင်း သိရပါသည်။

         သို့ရာတွင် အီရန်နိုင်ငံအပေါ် အမေရိကန်-အစ္စရေးတို့၏ စစ်မက်ဖြစ်ပွားမှုကြောင့် ယခုအခါ အင်ဒိုနီးရှားအစိုးရအနေဖြင့် ဖြစ်နိုင်ခြေရှိသော အခြေအနေနှစ်ရပ်ကို လေ့လာသုံးသပ်နေကြောင်း Yuliot ကပြောကြားခဲ့ပါသည်။ အဆိုပါ ဦးဆောင်ကော်မတီတွင် စီးပွားရေးဆိုင်ရာ ပေါင်းစပ်ညှိနှိုင်းရေးဝန်ကြီး Airlangga Hartarto က ဦးဆောင်ပြီး ဇီဝဒီဇယ်မူဝါဒကို ဆုံးဖြတ်ပေးသည့် ဝန်ကြီးဌာနအသီးသီး ပါဝင်ကြကြောင်း သိရပါသည်။

      အင်ဒိုနီးရှားနိုင်ငံ၏ ဇီဝဒီဇယ် မဖြစ်မနေအသုံးပြုရမည့် သတ်မှတ်ချက်များသည် ကမ္ဘာ့စားအုန်းဆီဈေးနှုန်းများအပေါ် မကြာခဏ သက်ရောက်မှုရှိလေ့ရှိပါသည်။ အဆိုပါ အကြောင်းအရင်းမှာ ပြည်တွင်းသုံးစွဲမှု မြင့်တက်လာခြင်းက ပြည်ပသို့ တင်ပို့နိုင်သည့် ပမာဏကို လျော့ကျစေသောကြောင့် ဖြစ်ကြောင်း သိရပါသည်။

          မတ်လ ၉ ရက်နေ့တွင် ရေနံဈေးနှုန်းများသည် တစ်စည်လျှင် အမေရိကန်ဒေါ်လာ ၁၀၀ (ရင်းဂစ် ၃၉၆.၇၅) အထက်သို့ မြင့်တက်သွားခဲ့ပြီး အဆိုပါရေနံစိမ်းဈေးနှုန်းများ မြင့်တက်လာခြင်းကြောင့် ဇီဝဒီဇယ်ကုန်ကြမ်းများအတွက် ဝယ်လိုအားကို မြင့်တက်စေလိမ့်မည်ဟူသော မျှော်လင့်ချက်များကြောင့် စားအုန်းဆီဈေးနှုန်းများလည်း လိုက်ပါမြင့်တက်လာခဲ့ကြောင်း သိရပါသည်။

        ဘဏ္ဍာရေးဝန်ကြီး Purbaya Yudhi Sadewa က ကမ္ဘာ့ရေနံဈေးနှုန်း မြင့်တက်မှုဒဏ်ကို ခုခံနိုင်ရန်အတွက် လောင်စာဆီ ထောက်ပံ့ကြေး (Subsidies) ပမာဏကို တိုးမြှင့်ချထားပေးရန် အင်ဒိုနီးရှားနိုင်ငံက ပြင်ဆင်ထားကြောင်း ပြောကြားခဲ့ကြောင်း သိရှိရပါသည်။

Source: The Edge malaysia                                              

DOCA (ရန်ကုန်)

         ဗီယက်နမ်နိုင်ငံ၏ ဒူးရင်းသီးတင်ပို့မှုသည် ၂၀၂၆ခုနှစ်အစပိုင်းတွင် သိသိသာသာမြင့်တက်လာခဲ့ပြီးနောက်၊ ပထမသုံးလပတ်ကုန်တွင် ပို့ကုန်တန်ဖိုး အမေရိကန်ဒေါ်လာ ၁ ဘီလီယံအထိ ရောက်ရှိလာဖွယ်ရှိကြောင်း စက်မှုနှင့် ကူးသန်းရောင်းဝယ်ရေးဝန်ကြီးဌာန လက်အောက်ရှိ ဗီယက်နမ်နိုင်ငံခြားကုန်သွယ်မှု အေဂျင်စီက ပြောကြားခဲ့ပါသည်။ ဇန်နဝါရီလအတွင်း ဒူးရင်းသီးတင်ပို့မှုသည် အမေရိကန်ဒေါ်လာ ၁၁၇.၂၂ သန်းကျော်ရှိခဲ့ရာ ၂၀၂၅ ခုနှစ် အလားတူကာလနှင့် နှိုင်းယှဉ်ပါက ၂၇၅ ရာခိုင်နှုန်းခန့် တိုးတက်လာခြင်းဖြစ်ကြောင်း သိရပါသည်။ ဗီယက်နမ် အကောက်ခွန်ဌာန၏ အဆိုအရ အဆိုပါသိသိသာသာမြင့်တက်လာမှုသည် ဗီယက်နမ်နိုင်ငံ၏ စုစုပေါင်း သစ်သီးဝလံနှင့် ဟင်းသီးဟင်းရွက် တင်ပို့မှုပမာဏ၏ ၁၈ ရာခိုင်နှုန်းကျော်ရှိကြောင်း သိရပါသည်။

         ဗီယက်နမ်နိုင်ငံ၏ ရာသီမဟုတ်ဒူးရင်းသီး ထွက်ရှိမှုကာလ (နိုဝင်ဘာလမှ မတ်လအထိ) သည် နိုင်ငံအတွက် သိသာထင်ရှားသော အားသာချက်တစ်ခု ဖြစ်စေသည်။ ထိုင်းနှင့် မလေးရှား ကဲ့သို့သော အဓိကပြိုင်ဘက်နိုင်ငံများ၏ အဓိကရိတ်သိမ်းချိန် မရောက်သေးမီကာလဖြစ်သဖြင့် ဗီယက်နမ်သည် ဇန်နဝါရီလအတွင်း နိုင်ငံတကာဈေးကွက်တွင် ထိပ်တန်းနေရာ၌ ရပ်တည်နိုင်ခဲ့သည်။

         ထို့ပြင် အေးခဲဒူးရင်းသီး တင်ပို့ခွင့်ကို တရားဝင်ခွင့်ပြုချက် ရရှိခဲ့ပြီးနောက် တရုတ်ဈေးကွက်သို့ တင်ပို့မှုမှာ ပိုမိုအဆင်ပြေချောမွေ့လာခဲ့သည်။ တရုတ်နိုင်ငံမှ အသိအမှတ်ပြုထားသည့် ထုပ်ပိုးမှုလုပ်ငန်းများနှင့် ထုတ်လုပ်မှုယူနစ် ကုဒ်နံပါတ်အရေအတွက်သည် ၂၀၂၅ ခုနှစ် အလားတူကာလနှင့် နှိုင်းယှဉ်ပါက နှစ်ဆအထိ တိုးတက်လာခဲ့သည်။

       ဗီယက်နမ်နိုင်ငံသည် ၂၀၂၆ ခုနှစ်အတွက် ဒူးရင်းသီးတင်ပို့မှု ရည်မှန်းချက်ကို အမေရိကန် ဒေါ်လာ ၄ ဘီလီယံမှ ၄.၅ ဘီလီယံအထိ သတ်မှတ်ထားပြီး အဆိုပါပန်းတိုင်သို့ ရောက်ရှိရန် လက်ရှိရင်ဆိုင်နေရသော အခက်အခဲများကို ကျော်လွှားနိုင်မည့် ရေရှည်တည်တံ့သော ဖွံ့ဖြိုး တိုးတက်မှုအပေါ် အထူးအာရုံစိုက်ရန်လိုအပ်ကြောင်း ကျွမ်းကျင်သူများက ထောက်ပြကြသည်။

         တိုးတက်မှုနှုန်းကို တည်ငြိမ်စွာ ထိန်းသိမ်းနိုင်ရန်အတွက် လုပ်ငန်းရှင်များအနေဖြင့် တရုတ်နှင့် ဥရောပသမဂ္ဂ (EU) ဈေးကွက်များ၏ မဖြစ်မနေလိုအပ်ချက်များဖြစ်သော အပင်ပိုးမွှားကင်းစင်ရေးစံနှုန်းများနှင့် ပိုးသတ်ဆေးကြွင်းကျန်မှု ကန့်သတ်ချက်များကို တင်းကျပ်စွာ လိုက်နာရန် ဦးစားပေးဆောင်ရွက်ရမည်ဖြစ်သည်။

         ၂၀၂၅ ခုနှစ်တွင် ဗီယက်နမ်၏ ဒူးရင်းသီးတင်ပို့မှုတန်ဖိုးသည် ခန့်မှန်းခြေအားဖြင့် အမေရိကန်ဒေါ်လာ ၄ ဘီလီယံခန့် ရှိခဲ့ပြီး၊ ၎င်းသည် နိုင်ငံ၏ စုစုပေါင်း သစ်သီးဝလံနှင့် ဟင်းသီးဟင်းရွက် တင်ပို့မှုတန်ဖိုး၏ ၄၅ ရာခိုင်နှုန်းအထိ ရှိခဲ့ကြောင်း သိရှိရပါသည်။

Source: NationThailand                                                   

DOCA (ရန်ကုန်)