ပြည်ပကုန်သွယ်မှုသတင်းများ

    အင်ဒိုနီးရှားနိုင်ငံ ဆက်သွယ်ရေးနှင့် ဒစ်ဂျစ်တယ်ရေးရာဝန်ကြီးဌာနနှင့် စက်မှုဝန်ကြီးဌာန တို့သည် စက်မှုကဏ္ဍတွင် AI နည်းပညာအသုံးပြုခြင်းနှင့် ဒစ်ဂျစ်တယ်အသွင်ကူးပြောင်းမှု အရှိန် မြှင့်တင်ခြင်းမှတစ်ဆင့် စီးပွားရေးကြီးထွားနှုန်း ၈ ရာခိုင်နှုန်းရရှိရန် အစိုးရ၏ရည်မှန်းချက်၏ တစ်စိတ်တစ်ပိုင်းအနေဖြင့် အတူတကွလုပ်ကိုင်လျက်ရှိကြောင်း သိရပါသည်။ ဆက်သွယ်ရေးနှင့် ဒစ်ဂျစ်တယ်ရေးရာ ဒုတိယဝန်ကြီး Nezar Patri က ဝန်ကြီးဌာန ၂ ခုကြား ထိုအားကောင်းသော ပူးပေါင်းဆောင်ရွက်မှုသည် အင်ဒိုနီးရှား၏ AI လုပ်ငန်းနယ်ပယ်အတွက် အခြေခံအဆောက်အအုံ တည်ထောင်ရန်ဖြစ်ကြောင်း ပြောကြားခဲ့ပါသည်။ ‌Batam တွင်ကျင်းပပြုလုပ်ခဲ့သည့် AI လုပ်ငန်း ဖွံ့ဖြိုးတိုးတက်ရေးအပေါ်ဆွေးနွေးပွဲတွင် Patri က ဆီမီးကွန်ဒတ်တာများသည် AI ဖွံ့ဖြိုးတိုးတက်ရေးအတွက် အရေးပါသည့်အတွက် ဦးစားပေးဆောင်ရွက်ရမည်ဖြစ်ကြောင်း ပြောကြားခဲ့ပါသည်။ ၂၀၃၀ ပြည့်နှစ်တွင် ဒစ်ဂျစ်တယ်ကျွမ်းကျင်သူ ၁၂ သန်းထုတ်လုပ်မည့်ရည်မှန်းချက်၏ တစ်စိတ် တစ်ပိုင်းအနေဖြင့် ဆက်သွယ်‌ရေးနှင့် ဒစ်ဂျစ်တယ်ရေးရာဝန်ကြီးဌာနသည် လုပ်ငန်းနယ်ပယ် မိတ်ဖက်များနှင့်ပူးပေါင်း၍ ဒစ်ဂျစ်တယ်ကျွမ်းကျင်မှုဖွံ့ဖြိုးတိုးတက်ရေးပရိုဂရမ်များကို ဆောင်ရွက်လျက်ရှိကြောင်း သိရပါသည်။ ဆွေးနွေးပွဲတွင် စက်မှု ဒုတိယဝန်ကြီး Faisol Riza က တက္ကသိုလ်ကျောင်းများနှင့် လုပ်ငန်းနယ်ပယ်မှကျွမ်းကျင်သူများနှင့် ညှိနှိုင်းဆွေးနွေး၍ AI ဖွံ့ဖြိုး တိုးတက်ရေးအတွက် ကျယ်ပြန့်သောလမ်းပြမြေပုံဖန်တီးရန်လိုအပ်ကြောင်းနှင့် ထိုလမ်းပြမြေပုံ သည် ၎င်းတို့အားရှေ့သို့ဆက်လှမ်းနိုင်ရန် ထိန်းကျောင်းပေးနိုင်မည်ဟု ပြောကြားခဲ့ပါသည်။

Antara News                                                                             

DOCA (ရန်ကုန်)

   အင်ဒိုနီးရှားသမ္မတ Prabowo Subianto က စိုက်ပျိုးရေးဆိုင်ရာ ဆန်းသစ်တီထွင်မှု၊ ခေတ်နှင့်အညီကျင့်သုံးမှုနှင့် နည်းပညာတို့ကိုလေ့လာရန်အတွက် ကျွမ်းကျင်ပညာရှင်များပါဝင် သောအုပ်စုကို ဘရာဇီးသို့စေလွှတ်ရန် စီစဉ်ထားကြောင်း ကြေညာခဲ့ပါသည်။ Prabowo က ဘရာဇီးသမ္မတ Lula နှင့် ဝန်ကြီးများသည် လေ့လာရန်အတွက်နည်းစနစ်အဖွဲ့စေလွှတ်မည့် ၎င်း၏ တောင်းဆိုချက်ကို ခွင့်ပြုခဲ့ကြောင်း ဘရာဇီးသမ္မတနန်းတော်တွင် ဇူလိုင်လ ၉ ရက်နေ့က ကျင်းပခဲ့သည့် သတင်းစာရှင်းလင်းပွဲတွင် ပြောကြားခဲ့ပါသည်။ Prabowo က ဘရာဇီးသည် ဘိုင်အိုလောင်စာသုံးစွဲမှုနှင့် ထုတ်လုပ်မှုတို့ပါဝင်သည့် စိုက်ပျိုးရေးဆိုင်ရာဖွံ့ဖြိုး တိုးတက်မှုတွင် ကမ္ဘာ့ဦးဆောင်သူဖြစ်ကြောင်း၊ အင်ဒိုနီးရှားသည် ဘရာဇီး၏အတွေ့အကြုံမှ သင်ယူခြင်းအားဖြင့်ကြီးမားသောအကျိုးကျေးဇူးရရှိနိုင်ကြောင်း ပြောကြားခဲ့ပါသည်။ နှစ်နိုင်ငံသည် စိုက်ပျိုးရေးနည်းပညာတွင် ပူးတွဲသုတေသနပြုလုပ်ရန်အတွက် အခွင့်အလမ်းများကို ရှာဖွေ လျှက်ရှိကြောင်း သိရပါသည်။ Prabowo က အစားအစာဖူလုံရေးနှင့် ကိုယ်တိုင်ထုတ်လုပ်ဖူလုံရေးသည် နိုင်ငံ၏ဦးစားပေးဖြစ်ကြောင်းနှင့် အင်ဒိုနီးရှားသည်ကလေးများနှင့် ကိုယ်ဝန်ဆောင် အမျိုးသမီးများအတွက် အခမဲ့အစားအစာပရိုဂရမ်ပါဝင်သည့် များစွာသောဘရာဇီးပရိုဂရမ်များကို စိတ်ဝင်စားလျက်ရှိကြောင်း ပြောကြားခဲ့ပါသည်။ အင်ဒိုနီးရှားအစိုးရသည် ယခုနှစ် ကုန်မှစ၍ တစ်ရက်လျှင်အစားအစာ ၈၂.၉ သန်းပံ့ပိုးပေးရန်ရည်ရွယ်ထားထားကြောင်း သိရပါသည်။ စိုက်ပျိုးရေးကဏ္ဍအပြင် Prabowo ကစွမ်းအင်အသွင်ကူးပြောင်းမှုကဏ္ဍအပေါ် အမြင်ကိုဝေမျှခဲ့ ပြီး နိုင်ငံသည် လာမည့်ဆယ်စုနှစ်အတွင်း ၁၀၀ ရာခိုင်နှုန်း ပြည့်ဖြိုးမြဲစွမ်းအင်အသုံးပြုရန် ပြင်ဆင်လျက်ရှိကြောင်း ပြောကြားခဲ့ပါသည်။

Antara News                                                                             

DOCA (ရန်ကုန်)

     ၂၀၂၅ ခုနှစ် ဇွန်လတွင် ဗီယက်နမ်မော်တော်ကားထုတ်လုပ်သူများအသင်း (VAMA) ၏ စုစုပေါင်းကားရောင်းချရမှုအရေအတွက်မှာ အစီးရေ ၃၁၉၇၇ စီး ရောက်ရှိခဲ့ပြီး မေလထက် ၉ ရာခိုင်နှုန်းမြင့်တက်ခဲ့ကာ ၂၀၂၄ ခုနှစ် ဇွန်လနှင့်နှိုင်းယှဉ်ပါက ၂၀ ရာခိုင်နှုန်းမြင့်တက်ခဲ့ကြောင်း သိရပါသည်။ Passenger car များမှာ အစီးရေ ၂၂၉၃၄ စီးဖြင့် အများဆုံးရောင်းချခဲ့ရပြီး မေလ ထက် ၁၄ ရာခိုင်နှုန်းမြင့်တက်ခဲ့ကြောင်း သိရပါသည်။ တစ်ချိန်တည်းမှာပင် commercial ‌မော်တော်ကားရောင်းချရမှုမှာ အစီးရေ ၈၇၈၂ စီး( ၂ ရာခိုင်နှုန်းကျဆင်း) နှင့် specialized မော်တော်ကားများရောင်းချရမှုမှာ အစီးရေ ၂၆၁ စီးဖြင့် ၂၃ ရာခိုင်နှုန်းမြင့်တက်ခဲ့ကြောင်း သိရပါ သည်။ ပြည်တွင်း၌ ထုတ်လုပ်တပ်ဆင်သည့်ကားရောင်းချရမှုမှာ ၁၄၃၅၅ စီးဖြင့် မေလထက် ၄ ရာခိုင်နှုန်းမြင့်တက်ခဲ့ပြီး တင်သွင်းလာသည့်ကားရောင်းချရမှုမှာ အစီးရေ ၁၇၆၂၂ စီးဖြင့် ၁၄ ရာခိုင်နှုန်းမြင့်တက်ခဲ့ကြောင်း သိရပါသည်။ ၂၀၂၅ ခုနှစ်၏ပထမ ၆ လတွင် စုစုပေါင်းကား ရောင်းချရမှုမှာ အစီးရေ ၁၆၃၀၂၁ စီးဖြင့် ၂၀၂၄ ခုနှစ်တူညီသည့်ကာလထက် ၂၁ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုစုစုပေါင်းပမာဏထဲမှ passenger ကားများရောင်းချရမှုမှာ ၂၀၂၄ ခုနှစ် ပထမ ၆ လနှင့်နှိုင်းယှဉ်ပါက  ၁၈ ရာခိုင်နှုန်း၊ commercial ကားများရောင်းချရမှုမှာ ၂၈ ရာခိုင်နှုန်းနှင့် specialized ကားများ ရောင်းချရမှုမှာ ၂၈ ရာခိုင်နှုန်းမြင့်တက်ခဲ့ကြောင်း သိရပါ သည်။ ယခုနှစ် ပထမ ၆ လတာကာလ ပြည်တွင်း၌ထုတ်လုပ်တပ်ဆင်သည့်ကားရောင်းချရမှုမှာ အစီးရေ ၇၇၁၁၉ စီးဖြင့် ၁၃ ရာခိုင်နှုန်းနှင့် တင်သွင်းသည့်ကားရောင်းချရမှုမှာ အစီးရေ ၈၅၀၉၂ စီးဖြင့် ၂၉ ရာခိုင်နှုန်း မြင့်တက်ခဲ့ကြောင်း သိရပါသည်။

Vietnam Plus                                                                            

DOCA (ရန်ကုန်)

    ဗီယက်နမ်နှင့် ပါကစ္စတန်တို့သည် ကနဦးဆောင်ရွက်မှုအသစ်များကိုအဆင့်မြှင့်တင်ရန်နှင့် စဉ်ဆက်မပြတ်ကုန်သွယ်ရေးကြီးထွားရန်အတွက် ၎င်းတို့၏ကတိကဝတ်ပြုမှုကို ဇူလိုင်လ ၁၁ ရက်နေ့ကဟနွိုင်းတွင်ကျင်းပခဲ့သည့် ၅ ကြိမ်မြောက် ဗီယက်နမ်-ပါကစ္စတန် ကုန်သွယ်ရေး ပူးတွဲ ဆပ်ကော်မတီ အစည်းအဝေးတွင်ထပ်မံအတည်ပြုခဲ့ပါသည်။ ထိုအစည်းအဝေးကိုဗီယက်နမ်နိုင်ငံ စက်မှုနှင့် ကုန်သွယ်ရေး ဒုတိယဝန်ကြီး Phan Thi Thang နှင့် ပါကစ္စတန်စီးပွားကူးသန်းဝန်ကြီး ဌာန၏ အတွင်‌ရေးမှူး Nasir Hamid တို့ကပူးတွဲဥက္ကဌအနေဖြင့် ကျင်းပခဲ့ခြင်းဖြစ်ကြောင်း သိရ ပါသည်။ Thang က ပူးတွဲဆပ်ကော်မတီသည် ပြသနာများကိုဖြေရှင်းရန်၊ ကနဦးပူးပေါင်း ဆောင်ရွက်မှုများအားကောင်းရန်နှင့် အနာဂတ်တွင်နှစ်နိုင်ငံကုန်သွယ်ရေး အမေရိကန်ဒေါ်လာ ၁၀ ဘီလီယံထိရောက်ရှိရန် အတွက်ဥပဒေမူဘောင်ထူထောင်ရန် ထိရောက်သောစင်မြင့်တစ်ခု ဖြစ်ကြောင်း ပြောကြားခဲ့ပါသည်။ အစည်းအဝေးကျင်းပရသည့်အဓိကအကြောင်းအရင်းမှာ အကောက်ခွန်များလျှော့ချခြင်း၊ ဈေးကွက်လမ်းကြောင်းလွယ်ကူချောမွေ့စေခြင်း နှင့် အနာဂတ်တွင်လွတ်လပ်သောကုန်သွယ်ရေးသဘောတူညီချက်ရရှိရန်အတွက် အခြေခံအုတ်မြစ် တည်‌ထောင်ရန် Preferential Trade Agreement အပေါ်ဆွေးနွေးမှုများ အရှိန်မြှင့်တင်ရန် ဖြစ်ကြောင်း သိရပါသည်။ နှစ်ဖက်စလုံးသည် စီးပွားရေးကိုယ်စားလှယ်အဖွဲ့များအပြန်အလှန် စေလွှတ်ခြင်းနှင့် ပူးတွဲကုန်စည်ပြပွဲများကျင်းပခြင်းတို့ပါဝင်သော ကုန်သွယ်မှုမြှင့်တင်ရေး ကြိုးပမ်းဆောင်ရွက်မှုများနှင့်ပတ်သတ်၍ မှတ်ချက်ပြုပြောကြားခဲ့ပါသည်။ ဗီယက်နမ်က ပါကစ္စတန်ကို နည်းစနစ်အတားအဆီးများဖယ်ရှားရန်၊ အုပ်ချုပ်မှုလုပ်ငန်းစဉ်များ လွယ်ကူရိုးရှင်း ရန်နှင့် Pangasius ငါး ( ဗီယက်နမ်ငါးတန်)၊ ငရုတ်ကောင်းနှင့် လက်ဖက်အစရှိသည့် ဗီယက်နမ် ကုန်ပစ္စည်းများအပေါ် သွင်းကုန်အကောက်ခွန်များ လျှော့ချပေးရန်တောင်းဆိုခဲ့ကြောင်း သိရပါသည်။ နှစ်နိုင်ငံသည် ဟာလာအသိအမှတ်ပြုခြင်းနှင့်ပတ်သတ်၍ နည်းစနစ်ပိုင်း ပူးပေါင်း ဆောင်ရွက်မှုတိုးမြှင့်ရန်သဘောတူညီခဲ့ကြကြောင်း သိရပါသည်။ Hamid ကသက်ဆိုင်ရာ အာဏာပိုင်များနှင့် စီးပွားရေးအသိုက်အဝန်းကြား တက်ကြွစွာစေ့စပ်ဆောင်ရွက်မှုနှင့်အတူ ဗီယက်နမ်-ပါကစ္စတန်ကုန်သွယ်ရေးချိတ်ဆက်မှုသည် ဘက်ပေါင်းစုံဖွံ့ဖြိုးတိုးတက်လျှက်ရှိပြီး နှစ်နိုင်ငံလုံးမှ ခေါင်းဆောင်များနှင့် ပြည်သူများမျှော်လင့်ချက်များနှင့် ပြည့်မီလျှက်ရှိကြောင်း ပြောကြားခဲ့ပါသည်။ ၂၀၂၄ ခုနှစ်တွင် နှစ်နိုင်ငံအပြန်အလှန်ကုန်သွယ်ရေးသည် အမေရိကန် ဒေါ်လာ သန်း ၈၅၀ ထိရောက်ရှိခဲ့ပြီး ၂၀၂၃ ခုနှစ်ကထက် ၂၀.၅ ရာခိုင်နှုန်းမြင့်တက်ခဲ့ကြောင်း သိရပါသည်။

Vietnam Plus                                                                  

DOCA (ရန်ကုန်)

    ၂၀၂၅ ခုနှစ်မေလတွင် အင်ဒိုနီးရှားနိုင်ငံ၏ နိုင်ငံခြားအကြွေးများသည် အမေရိကန် ဒေါ်လာ ၄၃၅ ဘီလီယံခန့် စံချိန်တင်ခဲ့ပြီး နှစ်စဥ် ၆.၈ ရာခိုင်နှုန်းမြင့်တက်လာခဲ့ကြောင်း ဇူလိုင်လ ၁၄ ရက်နေ့တွင် ထုတ်ပြန်သော အင်ဒိုနီးရှားနိုင်ငံဗဟိုဘဏ်၏ ထုတ်ပြန်ချက်များအရ သိရပါသည်။ အဆိုပါမြင့်တက်မှုသည် နိုင်ငံခြားအကြွေးပြည်ပကဏ္ဍတွင် ကျဆင်းလာမှုများကြောင့်ဖြစ်ကြောင်း အင်ဒိုနီးရှားနိုင်ငံ ဆက်သွယ်ရေးဌာန၏ ညွှန်ကြားရေးမှုး Ramdan Denny Prakoso ၏ ပြောကြား ချက်အရ သိရပါသည်။ ဇူလိုင်လအတွင်း အစိုးရ၏ နိုင်ငံခြားအကြွေး များသည် အမေရိကန်ဒေါ်လာ ၂၀၉.၆ ဘီလီယံခန့်ရှိပြီး နှစ်စဥ် ၉.၈ ရာခိုင်နှုန်းတိုးတက်လာကာ ဧပြီလ နှစ်စဥ်တိုးတက်မှုထက် ၁၀.၄ ရာခိုင်နှုန်းလျော့နည်းခဲ့ကြောင်း သိရပါသည်။ ပြည်တွင်း ငွေချေးစာချုပ်များအတွင်းသို့ နိုင်ငံ ခြား အရင်းအနှီးများ စီးဝင်လာသည့်ကြားမှ နိုင်ငံတကာအချုပ်အခြာအာဏာပိုင် ငွေချေးစာချုပ် များ၏ သက်တမ်းရင့်ပေးချေမှု လမ်းကြောင်းသည် အင်ဒိုနီးရှား၏ စီးပွားရေး အလားအလာအပေါ် ကမ္ဘာလုံးဆိုင်ရာ ရင်းနှီး မြှုပ်နှံသူများ၏ ယုံကြည်မှုကို ထင်ဟပ်စေကြောင်း Ramdan ကပြောကြားခဲ့ပါသည်။ ထို့အပြင် Ramdan က အင်ဒိုနီးရှားနိုင်ငံ၏ နိုင်ငံအကြွေးတည်ဆောက်ပုံသည် ကောင်းမွန်လျက်ရှိပြီး ယင်းအကြွေးသည် နိုင်ငံ၏ ပြည်တွင်းထုတ်ကုန်နှင့် နှိုင်းယှဥ်လျှင် ၃၀.၆ ရာခိုင်နှုန်းခန့်ရှိပြီး ‌ရေရှည်အကြွေးသည် ၈၄.၆ ရာခိုင်နှုန်းခန့်ရှိကြောင်း အထူးလေးပေးပြောကြားခဲ့ပါသည်။

Source: Xinhua                                                                                

DOCA(ရန်ကုန်)