ပြည်ပကုန်သွယ်မှုသတင်းများ

    အိန္ဒိယနိုင်ငံတွင် အခွန်စုံစမ်းစစ်ဆေးရေးညွှန်ကြားမှုဦးစီးဌာန (DRI) သည် Jawaharlal Nehru Port Trust (JNPT), Mundra နှင့် Kandla ဆိပ်ကမ်း ၃ ခုမှ ပြည်ပသို့ အော်ဂဲနစ်ဆန်အဖြစ် ဖော်ပြတင်ပို့မည့် ကုန်သေတ္တာအလုံး ၄၀၀ ကျော်ကို ဖမ်းဆီးထိန်းသိမ်းခဲ့သည်ဟု Hindu Business Line သတင်းဌာနက ဩဂုတ်လ ၁၉ ရက်နေ့၌ ဖော်ပြခဲ့သည်။

     ကုန်သည်အသိုင်းအဝိုင်း၏ ပြောဆိုမှုများအရ အော်ဂဲနစ်ဆန်မဟုတ်သော ဆန်ဖြူများနှင့် ပေါင်းဆန်များကို အော်ဂဲနစ်ဆန်အဖြစ် အယောင်ဆောင်၍ တင်ပို့ခြင်းများ ရှိနေခဲ့သဖြင့် ၂၀၂၄-၂၅ ဘဏ္ဍာနှစ်၌ ဧပြီလမှ ဇူလိုင်လအတွင်း အိန္ဒိယ၏ အော်ဂဲနစ်ဆန်တင်ပို့မှုပမာဏသည် တန်ချိန် ၁၄၆၅၈၅ တန်အထိ ရောက်ရှိခဲ့ကြောင်း၊ ၎င်းပမာဏသည် ယခင်ဘဏ္ဍာနှစ် တစ်နှစ်လုံး၌ တင်ပို့ နိုင်ခဲ့သော အော်ဂဲနစ်ဆန် စုစုပေါင်းပမာဏ ၁၀၇၇၂၇ တန်ထက် များစွာပိုမိုကျော်လွန်ခဲ့ကြောင်း သိရှိရသည်။

     အဆိုပါ ၄ လအတွင်းတင်ပို့ခဲ့သော ဆန်ပမာဏအနက် ဆန်ဖြူ ၁၂၇၁၂၀ တန်နှင့် ဆန်ကွဲ တန် ၈၀၀၀ ခန့်တို့သည် အိန္ဒိယအစိုးရ၏ ၂၀၂၃ ခုနှစ် ဇူလိုင်လမှ စတင်၍ ဘာစမာတီမဟုတ်သော ဆန်ဖြူနှင့် ဆန်ကွဲတင်ပို့မှုအား တားမြစ်ပိတ်ပင်ချက်ကို ဖောက်ဖျက်ကျူးလွန်မှု ဖြစ်ပေါ်ခဲ့သည်။ မသမာမှုပြုလုပ်သော ကုန်တင်ပို့သူအချို့သည် ပေါင်းဆန်တင်ပို့မှုအပေါ် စည်းကြပ်သည့်အခွန် ၂၀ ရာခိုင်နှုန်းကို ရှောင်တိမ်းရန် လုပ်ဆောင်ခဲ့ကြသည်။ အစီရင်ခံတင်ပြချက်များအရ ထိုသို့ အခွန် ရှောင်တိမ်းမှု တန်ဖိုးမှာ ၂၀၂၃ ခုနှစ် အောက်တိုဘာလမှ ၂၀၂၄ ခုနှစ် ဇူလိုင်လအတွင်း ရူပီးငွေ ကုဋေ ၁၆၀ ကျော်ရှိကြောင်း သိရသည်။

   အမည်မဖော်လိုသော ကုန်သည်အချို့က DRI ဌာနသည် JNPT ဆိပ်ကမ်းတစ်ခုတည်းမှပင် ကုန်သေတ္တာ ၂၀၀ ကျော်ကို ဖမ်းဆီးခဲ့ကြောင်း၊ စာရင်းများအရ အော်ဂဲနစ်ဆန်အဖြစ် ဗီယက်နမ် နိုင်ငံသို့ ၂၂၁၂၆ တန်နှင့် ကင်ညာနိုင်ငံသို့ ၁၆၅၄၇ တန် တင်ပို့ခဲ့ရာတွင် တန်ချိန် ၂၀၀၀ ခန့်သာ အဆိုပါဆန်အမျိုးအစား စာရင်းဖြင့် ဗီယက်နမ်ဆိပ်ကမ်းသို့ ရောက်ရှိခဲ့ပြီး ကင်ညာဆိပ်ကမ်းတွင်မူ အော်ဂဲနစ်မဟုတ်သော ဆန်များအနေဖြင့်သာ စာရင်းဝင်ခဲ့ကြောင်း၊ ဗီယက်နမ်သို့ အော်ဂဲနစ်ဆန် အဖြစ် တင်ပို့သောဆန်များအား လမ်းကြောင်းပြောင်းလဲခြင်း သို့မဟုတ် သက်ဆိုင်ရာဆိပ်ကမ်း၌ အမျိုးအမည်ပြောင်းလဲ ကြေညာခြင်းကို လုပ်ဆောင်ခဲ့ ဖွယ်ရှိကြောင်း၊ အိန္ဒိယအကောက်ခွန်ဌာန သည် သာမန်ဆန်များအား အော်ဂဲနစ်ဆန်အဖြစ် ဖော်ပြတင်ပို့သည့် ကိစ္စရပ်နှင့်ပတ်သက်၍ MV Della ကုန်တင်သင်္ဘောကို ဆိပ်ကမ်းမှထွက်ခွာခြင်းအား တားဆီးခဲ့ကြောင်း ပြောဆိုကြသည်။

    အဆိုပါဆန်ကုန်သွယ်မှုများကို ဗီယက်နမ်သို့ တစ်တန်လျှင် ၄၉၁ ဒေါ်လာနှုန်းနှင့် ကင်ညာ သို့ ၄၇၅ ဒေါ်လာနှုန်းတို့ဖြင့် ပါကစ္စတန်နှင့် မြန်မာ တို့ကဲ့သို့သော ပြိုင်ဘက်နိုင်ငံများက အော်ဂဲနစ် မဟုတ်သောဆန်အတွက် ကမ်းလှမ်းသည့်နှုန်းထားအဆင့်များဖြင့် တင်ပို့ခဲ့ခြင်းဖြစ်သည်။ ယခင် ဘဏ္ဍာနှစ်၌ ကမ္ဘာ့ဆန်ပြတ်လပ်မှုကြောင့် အော်ဂဲနစ်မဟုတ်သောဆန်ဖြူ တစ်တန်လျှင် ဒေါ်လာ ၅၀၀ ခန့်ရှိနေချိန်တွင် ဗီယက်နမ်သည် အိန္ဒိယမှ အော်ဂဲနစ်ဆန် ၃၄၁၅၂ တန်ကို ပျမ်းမျှ တစ်တန် လျှင် ၄၆၆ ဒေါ်လာနှုန်းခန့်ဖြင့် ဝယ်ယူခဲ့ကြောင်း၊ ကင်ညာနိုင်ငံကမူ ၎င်းဘဏ္ဍာနှစ်၌ မည်သည့် အော်ဂဲနစ်ဆန်ကိုမျှ တင်သွင်းခြင်းမရှိခဲ့ကြောင်း စာရင်းအချက်အလက်များအရ သိရသည်။  ဗဟို အစိုးရအနေဖြင့် ၎င်းအချက်များအပေါ် စုံစမ်းစစ်ဆေးမှုပြုရန် လိုအပ်မည်ဟု ကုန်သည်အသိုင်းအဝိုင်းက ပြောဆိုထားသည်။

    အယောင်ဆောင်တင်ပို့သည့် ဆန်များအနက် အချို့မှာ အော်ဂဲနစ်စိုက်ပျိုးရေးကို အပြည့် အဝ လုပ်ကိုင်လျက်ရှိသော ဆစ်ကင်းပြည်နယ်မှ စိုက်ပျိုးထွက်ရှိမှုအဖြစ် တင်ပို့ခဲ့ခြင်းဖြစ်သည်ဟု အိန္ဒိယတောင်ပိုင်းဒေသအခြေစိုက် ပို့ကုန်လုပ်ငန်းရှင်တစ်ဦးက ပြောကြားခဲ့သည်။ ကုန်သည်များ၏ ပြောဆိုမှုအရ ကူးသန်းရောင်းဝယ်ရေးဝန်ကြီးဌာနမှ အရာရှိများသည် အဆိုပါဆန်များကို အော်ဂဲနစ်ထုတ်ကုန်အဖြစ် တင်ပို့ရန် အသိအမှတ်ပြုလက်မှတ်များ ထုတ်ပေးခဲ့သော ဆစ်ကင်းနှင့် ရာဂျပ်စတန် ပြည်နယ်တို့မှ အသိအမှတ်ပြုလက်မှတ်ထုတ်ပေးရေး အဖွဲ့အစည်း ၂ ခုကို မေးမြန်း စုံစမ်းရန်အတွက် ဆင့်ခေါ်ထားကြောင်း သိရသည်။

    အိန္ဒိယတောင်ပိုင်းဒေသမှ အခြားကုန်သည်တစ်ဦးကလည်း အဆိုပါ ဆန်တင်ပို့မှုများအား တစ်နပ်စားဉာဏ်ဖြင့် အမြတ်ရရှိရေးလုပ်ကိုင်သူများက ဆောင်ရွက်ခဲ့ခြင်းဖြစ်ကြောင်း၊ အော်ဂဲနစ် မဟုတ်သော ဆန်ဖြူအား အော်ဂဲနစ်ဆန်အဖြစ် တင်ပို့ရေး လာရောက်စည်းရုံးမှုများရှိသော်လည်း ၎င်းတို့အနေဖြင့် ငြင်းဆန်ခဲ့ကြကြောင်း ပြောဆိုခဲ့သည်။ သတင်းအရင်းအမြစ်များ၏ အဆိုအရ အော်ဂဲနစ်ဆန်အဖြစ် အယောင်ဆောင်တင်ပို့ရန် စာရွက်စာတမ်းများပြုလုပ်မှုမှာ ဘီဟာနှင့် ဩဒိသျှ ပြည်နယ်များမှ စတင်ခဲ့သည်ဟု ကနဦးအချက်အလက်များက ဖော်ပြလျက်ရှိသည်။

   အဆိုပါ သင်္ဘောတင်ပို့မှုများအတွက် အကောက်ခွန်ဌာနအနေဖြင့် လယ်ယာကွက်ကုန်နှင့် ပြုပြင်ပြီး အစားအစာ ပြည်ပတင်ပို့မှု ဖွံ့ဖြိုးတိုးတက်ရေးအာဏာပိုင်အဖွဲ့ (APEDA) ၏ ယာယီ လုပ်ငန်းဆောင်ရွက်ခွင့် အသိအမှတ်ပြုလက်မှတ် (Provisional Transaction Certificates) နှင့် ကိုက်ညီမှု ရှိ/မရှိ မည်ကဲ့သို့ စစ်ဆေးခွင့်ပြုခဲ့သည်ကို ကုန်သည်အချို့က မေးခွန်းထုတ်လျက်ရှိပြီး အချို့ကမူ APEDA မှ ခွင့်ပြုသည့် တန်ချိန်ပမာဏ အများအပြားကို အကောက်ခွန်အရာရှိများ အနေဖြင့် စစ်ဆေးနိုင်စွမ်းမရှိကြောင်း၊ ၎င်းတို့သည် APEDA ၏ TRACENET ခြေရာခံစနစ်သို့ ဝင် ရောက်နိုင်ခွင့်မရှိကြောင်း၊ ဗဟိုအစိုးရအနေဖြင့် ယခုကဲ့သို့ တရားမဝင်တင်ပို့ခြင်းများကို ကာကွယ် တားဆီးနိုင်ရန်အတွက် TRACENET စနစ်နှင့် အကောက်ခွန်ဌာန၏ ICEGATE အချက်အလက် မှတ်ပုံတင်စနစ်တို့အကြား ချိတ်ဆက်လုပ်ကိုင်နိုင်ရေး စီမံဆောင်ရွက်သင့်ကြောင်း ပြောဆိုလျက် ရှိကြသည်။

    အိန္ဒိယနိုင်ငံမှ အော်ဂဲနစ်ဆန်တင်ပို့မှုနှင့် ပတ်သက်၍ မကောင်းမွန်သည့် သတင်းများ ထွက်ပေါ်လျက်ရှိသည်ဟု Hindu Business Line သတင်းဌာနက ရေးသားဖော်ပြခဲ့ပြီးနောက် DRI နှင့် APEDA တို့အပါအဝင် အစိုးရအာဏာပိုင်များသည် စစ်ဆေးအရေးယူမှုကို ချက်ချင်းလုပ်ဆောင်ခဲ့ကြကြောင်း၊ ဗီယက်နမ်နှင့် ကင်ညာတို့မှ ပေးပို့လာသည့် အသေးစိတ်အချက်အလက်များအရ အရေးယူရန် လုံလောက်သော ကနဦး သက်သေအထောက်အထားများရှိနေကြောင်း ကုန်သည်များက ပြောဆိုခဲ့ကြသည်။

    အိန္ဒိယနိုင်ငံ၌ ကာလရှည်ကြာစွာ ခြောက်သွေ့မှုနှင့် မိုးရေချိန်နည်းပါးမှုတို့ကြောင့် သီးနှံအဓိကစိုက်ပျိုးရာ ဒေသများစွာတွင် ထုတ်လုပ်မှုအပေါ် ထိခိုက်သက်ရောက်မှုများ ဖြစ်ပေါ်ခဲ့ရာ အစိုးရသည် ၂၀၂၂ ခုနှစ် စက်တင်ဘာလမှ စတင်၍ ပြည်ပသို့ ဆန်တင်ပို့ခြင်းကို ဖြတ်တောက်လျှော့ချခြင်းများ ဆောင်ရွက်ခဲ့ခြင်းဖြစ်ကြောင်း Hindu Business Line သတင်းဌာနက ဖော်ပြထားသည်။

Source: The Hindu Business Line, 19 Aug 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ထိုင်းနိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ထိုင်းနိုင်ငံမွေးမြူရေး ထုတ်ကုန်များနှင့်သစ်သီးများ တရုတ်နိုင်ငံတွင် ဈေးကွက်တိုးချဲ့ရန်နှင့် အရှေ့ပိုင်းစီးပွားရေး စင်္ကြန်ရှိ အသစ်ပေါ်ထွက်လာသော စက်မှုနယ်ပယ်များတွင် တရုတ်နိုင်ငံ၏ ရင်းနှီးမြှုပ်နှံမှုများကို ကြိုဆိုရန်ရည်ရွယ်၍ နှစ်နိုင်ငံကြား ကုန်သွယ်ရေးပူးပေါင်းဆောင်ရွက်ရန်အတွက် ဆွေးနွေးမှုများ ပြုလုပ်ခဲ့ကြောင်း သိရပါသည်။ ထိုင်းနိုင်ငံစီးပွားကူးသန်းဝန်ကြီးဌာန ဒုတိယဝန်ကြီး Suchart Chomklin က ၎င်းကို ထိုင်းနိုင်ငံစီးပွားကူးသန်းဝန်ကြီး Phumtham Wechayachai က တရုတ်နိုင်ငံစီးပွားကူးသန်းဝန်ကြီးဌာန ဒုတိယဝန်ကြီး Li Fei နှင့် ပူးတွဲဥက္ကဌအနေနှင့် ကျင်းပမည့် တတိယအကြိမ်မြောက် တရုတ်နိုင်ငံနှင့် ထိုင်းနိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု ဆပ်ကော်မတီအစည်းအဝေးကို တက်ရောက်ရန် ခန့်အပ်ခဲ့ခြင်းဖြစ်ကြောင်း သိရပါသည်။ အစည်းအဝေးသည် စိုက်ပျိုးရေးထုတ်လုပ်ရန်များတွင် အပြန်အလှန်ကုန်သွယ်မှု ပူးပေါင်းဆောင်ရွက်ရေးနှင့် တရုတ်နိုင်ငံတွင် ထိုင်းကုန်ပစ္စည်းများ၏ ယှဉ်ပြိုင်နိုင်စွမ်းကို မြှင့်တင်ရန် ရည်ရွယ်ကြောင်း သိရပါသည်။ ထိုင်းနိုင်ငံဘက်ကမူ ထိုင်းမွေးမြူရေးထုတ်ကုန်များနှင့် သစ်သီး များ တရုတ်နိုင်ငံသို့တင်ပို့ရာတွင် အဆင်ပြေချောမွေ့စေရေးအတွက် တရုတ်အဏာပိုင်များကို တောင်းဆိုခဲ့ကြောင်း သိရပါသည်။ Mr. Suchartm တရုတ်ရင်းနှီးမြှုပ်နှံသူများအား EV၊ သန့်စင် သော စွမ်းအင်၊ ဒစ်ဂျစ်တယ်စီးပွားရေး၊ AI၊ အာကာသသိပ္ပံနှင့် နည်းပညာတို့ပါဝင်သည့် ပေါ်ထွက်လာသောစက်မှု နယ်ပယ်တို့တွင် လာရောက်ရင်းနှီးမြှုပ်နှံရန် တောင်းဆိုခဲ့ကြောင်း သိရပါသည်။ တရုတ်နိုင်ငံသည် ထိုင်းနိုင်ငံ၏ ထိပ်ဆုံးကုန်သွယ်ဖက်နိုင်ငံအဖြစ်် ၁၁ နှစ် ဆက်တိုက် ရပ်တည်ခဲ့ကြောင်း သိရပါသည်။ ၂၀၂၃ ခုနှစ်တွင် ထိုင်းနိုင်ငံသည် တရုတ်နိုင်ငံနှင့် ကုန်သွယ်မှုတန်ဖိုး အမေရိကန်ဒေါ်လာ ၁၀၅ ဘီလီယံရှိခဲ့ပြီး ယခုနှစ် ပထမ ၅လတာ ကာလတွင် ကုန်သွယ်မှုပမာဏ အမေရိကန်ဒေါ်လာ ၄၅.၇ ဘီလီယံရှိကာ လွန်ခဲ့သည့်နှစ် တူညီသည့် ကာလထက် ၄.၂၄ % တိုးတက်လာကြောင်းသိရပါသည်။ ထိုင်းနိုင်ငံ၏ တရုတ်သို့ အဓိကပို့ကုန်များတွင် လတ်ဆက်သော သစ်သီးများ၊ ပလတ်စတစ်ကော်စေ့များ၊ ကွန်ပျူတာနှင့် အစိတ်အပိုင်းများ၊ ရာဘာထုတ်ကုန်များနှင့် ပီလောပီနံထုတ်ကုန်များ ပါဝင်ကြောင်း သိရပါသည်။ တရုတ်နိုင်ငံထံမှ အဓိက ပြန်လည်တင်သွင်းသည့် ကုန်ပစ္စည်းများတွင် စက်ပစ္စည်း၊ လျှပ်စစ်ပစ္စည်းများနှင့် အစိတ်အပိုင်းများ၊ ဓာတုပစ္စည်းများ၊ စတီးလ်နှင့် စတီးလ်ထုတ်ကုန်မားနှင့် ကားပစ္စည်း အစိတ်အပိုင်းများ ပါဝင်ကြောင်း သိရပါသည်။

Source: Bangkok Post

DOCA(ရန်ကုန်)

      ကမ္ဘောဒီယားနိုင်ငံသည် ၂၀၂၄ ခုနှစ်၏ ပထမ ၇ လတွင် သီဟိုဠ်စေ့အစိမ်း တန်ချိန်ပေါင်း ၈၃၀၀၀၀ ထုတ်လုပ်မှုနှင့်အတူ ကမ္ဘာ့ဒုတိယအကြီးဆုံးသီဟိုဠ်စေ့အစိမ်း ထုတ်လုပ်သူ ဖြစ်လာကြောင်း ကမ္ဘောဒီးယားနိုင်ငံ သီဟိုဠ်စေ့အသင်း (CAC)၏ အစီရင်ခံစာအရ သိရပါသည်။ CAC က ဗီယက်နမ်နိုင်ငံသို့ တင်ပို့မှုသည် သိသာစွာမြင့်တက်ခဲ့ပြီး စုစုပေါင်း အမေရိကန်ဒေါ်လာ ၁.၀၉၂ ဘီလီယံတန်ဖိုးရှိသည့် သီဟိုဠ်စေ့ တန်ချိန် ၇၈၀၀၀၀ တင်ပို့ခဲ့ကြောင်း သိရပါသည်။ ၎င်းသည် တင်ပို့မှုပမာဏအားဖြင့် ၃၆.၇ % မြင့်တက်ခဲ့ပြီး တန်ဖိုးအားဖြင့် ၂၈.၁ % မြင့်တက်ခဲ့ခြင်း ဖြစ်ကြောင်း သိရပါသည်။ CAC၏ ဥက္ကဌဖြစ်သူ Uon Silot က ယခုလိုမြင့်တက်လာမှုသည် မတော်တဆမဟုတ်ကြောင်း ၊ အဘယ်ကြောင့်ဆိုသော် CAC သည် မေလမှစ၍ သီဟိုဠ်စိုက်ခင်းများကို အယ်နီနိုရာသီဥတုဖြစ်စဉ်နှင့် ချိန်ညှိမှုကြောင့် သိသာစွာ မြင့်တက်ခဲ့ခြင်းဖြစ်ကြောင်းနှင့် စိုက်ပျိုးသည့်ဧရိယာသည်လည်း အနည်းငယ်မြင့်တက်ခဲ့ကြောင်း ပြောကြားခဲ့ပါသည်။ ၂၀၂၃ ခုနှစ်၊ စက်တင်ဘာလတွင် CACသည် ကမ္ဘောဒီးယားနိုင်ငံ၊ အယ်နီနိုဥတု၏ သက်ရောက်မှုခံရနိုင်ကြောင်း ကြေညာခဲ့ပါသည်။ အသင်းအနေဖြင့် CAC အဖွဲ့ဝင်များနှင့် စိုက်ပျိုးရေးသမားများကို ကောင်းမွန်သော ကောက်ရိတ်သိမ်းမှုကို ထိန်းထားနိုင်ရေးအတွက် ပြင်ဆင်နိုင်ရန် လမ်းညွှန်ချက်အချို့ ထုတ်ပြန်ခဲ့ကြောင်း သိရပါသည်။ ကမ္ဘာ့အကြီးဆုံး သီဟိုဠ်စေ့အစိမ်း ထုတ်လုပ်သူသည် အိုင်ဗရီကိုစ့်နိုင်ငံဖြစ်ပြီး ကမ္ဘောဒီးယားသည် အိန္ဒိယနိုင်ငံကို ကျော်ဖြတ်ကာ ဒုတိယအကြီးဆုံးဖြစ်လာခဲ့ကြောင်း သိရပါသည်။ အိန္ဒိယသည် ရာသီဥတုပြောင်းလဲမှုများကြောင့် တတိယနေရာသို့ ကျဆင်းခဲ့ခြင်းဖြစ်ကြောင်း သိရပါသည်။ Silot က သတင်းအချက်အလက်သည် ပြည်ပရင်းနှီး မြှုပ်နှံသူများကို ပိုမိုဆွဲဆောင်ရန် အရေးပါကြောင်း ပြောကြားခဲ့ပါသည်။ CAC ပြည်တွင်း၌ ပြုပြင်ထုတ်လုပ်ခြင်းအတွက် ရင်းနှီးမြှုပ်နှံမှုများ ပိုမိုဆွဲဆောင်နိုင်ရန် အလိုရှိနေပြီး သို့မှသာ ကမ္ဘောဒီးယားနိုင်ငံ၏ “ သီဟိုဠ်စေ့မူဝါဒ ၂၀၂၂-၂၀၂၇” သည် ပိုမိုကြီးမာသော အောင်မြင်မှုရလဒ်ကိုရရှိမည်ဟု သိရပါသည်။ Silot က ၎င်းသည် CACနှင့် အခြားအဖွဲ့များ အမြဲအိပ်မက်မက်နေသော အရာဖြစ်ကြောင်း၊ အဘယ်ကြောင့်ဆိုသော် စက်ရုံများများရှိလေ အလုပ်အကိုင်ခွင့်အလမ်းများ ဖန်တီးနိုင်ခြင်း၊ ရွှေ့ပြောင်းအလုပ်သမားများ လျှော့ချနိုင်ခြင်းနှင့် စိုက်ပျိုးရေးသမားများအတွက် ထပ်ပေါင်းတန်ဖိုးထုတ်ကုန်များရရှိရန် ပံ့ပိုးနိုင်မည်ဖြစ်ကာ သင့်တင့်သော ဈေးနှုန်းရရှိရန် ကူညီပေးနိုင်မည်ဟု ပြောကြားခဲ့ပါသည်။ ကမ္ဘောဒီးယားနိုင်ငံ သီဟိုဠ်စေ့လုပ်ငန်းနယ်ပယ်သည် နိုင်ငံတော်၏ သီဟိုဠ်စေ့မူဝါဒ ၂၀၂၂-၂၀၂၇ ကို အကောင်အထည်ဖော်နိုင်ရန် အခြေခံအဆောက်အဦများ ဖွံ့ဖြိုးတိုးတက်ရန်အတွက် ထပ်တိုးရင်းနှီးမြှပ်နှံမှု အမေရိကန်ဒေါ်လာ ၃၂၉သန်း ခန့် လိုအပ်နေကြောင်း သိရပါသည်။

Source: Khmer Times

DOCA(ရန်ကုန်)

   အမေရိကန်နှင့် တရုတ်နိုင်ငံတို့ကြား ကုန်သွယ်ရေးစစ်ပွဲကြောင့် တရုတ်နိုင်ငံ၏ အမေရိကန်သို့ တင်ပို့မှုလျော့ကျပါက ထိုင်းနိုင်ငံသည် အမေရိကန်သို့ ပိုမိုမြင့်မားစွာ တင်ပို့နိုင်ပြီး အကျိုးကျေးဇူးရရှိနိုင်ကြောင်း စက်မှုလုပ်ငန်းစီးပွားရေးရုံး(OIE) ၏ ပြောကြားချက်အရ သိရ ပါသည်။ OIE၏ ညွှန်ကြားရေးမှူး ချုပ်ဖြစ်သူ Warawan Chitaroon က ထိုင်းနိုင်ငံသည် အာဆီယံတွင် အဓိကကုန်ထုတ်လုပ်ရသည့်နိုင်ငံဖြစ်ပြီး နိုင်ငံများစွာသို့ ကုန်ပစ္စည်းများ တင်ပို့လျှက် ရှိကြောင်းနှင့် ကုန်သွယ်ရေးစစ်ပွဲသည် ထိုင်းကုန်ထုတ်လုပ်သူများနှင့် တင်ပို့သူများ ကို အခွင့်အလမ်းသစ် ပံ့ပို့ပေးနိုင်ကြောင်း ပြောကြားခဲ့ပါသည်။ ထို့ပြင် အမေရိကန်သို့ ကုန်ပစ္စည်းများ တင်ပို့သူ တရုတ်စွန့်ဦးတီထွင်သူများကို အစားထိုးရန်အလို့ငှာ ပြည်တွင်းကုမ္ပဏီများသည် ထုတ်ကုန်တိုးတက်မှုနှင့် စီးပွားရေးအစီအစဉ်များကို လေ့လာသင်ယူမှု ဆောင်ရွက်သင့်ကြောင်း ၎င်းက အကြံပြုခဲ့ပါသည်။ OIE သည်လည်း ထိုင်းကုမ္ပဏီများ အမေရိကန်သို့ တင်ပို့မည့် ထုတ်ကုန်များကို တိုးတက်လာရန်နှင့် မြင့်တက်လာရန်အတွက် ကူညီရန် စီးပွားရေးကဏ္ဍများနှင့်အတူ လုပ်ကိုင်သွားမည်ဟု သိရပါသည်။ ထိုင်းနိုင်ငံသည် လျှပ်စစ်မော်တော်ယာဉ်များ၊ Lithium-ion ဘတ်ထရီများ၊ ဆိုလာပြားများနှင့် ဆောက်လုပ်ရေးပစ္စည်းများနှင့် ဆက်စပ်သည့် ပြည်ပကုမ္ပဏီများနှင့် ရင်းနှီးမြှုပ်နှံသူများအား နိုင်ငံ၌ ရင်းနှီးမြှုပ်နှံမှုပြုရန် သိမ်းသွင်းစည်းရုံးနိုင်စွမ်း  ရှိကြောင်း သိရပါသည်။ ယခုနှစ်အစောပိုင်းတွင် အမေရိကန်သည် တရုတ်နိုင်ငံ၏ လျှပ်စစ် မော်တော်ယာဉ်များကို ၁၀၀% ထားအထိ လေးဆ၊ ဆိုလာဆဲလ်များနှင့် ဆီမီးကွန်ဒတ်ကာများကို ၅၀% ထားဖြင့် ၂ဆ၊ စတီးလ်နှင့် အလူမီနီယမ်ကို ၂၅%ဖြင့် ၃ဆအထိ မြှင့်တင်ခဲ့ကြောင်း သိရပါသည်။ Mrs. Warwan က ထိုင်းနိုင်ငံစက်မှုဝန်ကြီးဌာနသည် ကုန်သွယ်ရေးစစ်ပွဲကြောင့် ထိုင်းနိုင်ငံတွင် ရင်းနှီးမြှုပ်နှံထားသည့် တရုတ်ကုမ္ပဏီများ၏ သက်ရောက်မှုကို လေ့လာလျက်ရှိကြောင်း အဘယ်ကြောင့်ဆိုသော် ထိုင်းနိုင်ငံမှတင်ပို့သည့် ထုတ်ကုန်များကို အချို့ဝယ်ယူသူများက ထိုင်းနိုင်ငံတွင် ထုတ်လုပ်သည့် တရုတ်ကုန်ပစ္စည်းများဟု ရှုမြင်နိုင်၍ဖြစ်ကြောင်းနှင့် ထိုင်းအစိုးရသည်လည်း အဆိုပါကိစ္စကို စိတ်ပူလျက်ရှိပြီး OIE ကလည်း အဆိုပါအခြေအနေကို စောင့်ကြည့်လျက်ရှိကြောင်း ပြောကြားခဲ့ပါသည်။

Source: Bangkok Post

DOCA(ရန်ကုန်)

     အာရှနှင့် ပစိဖိတ်အတွက် အာဂျင်တီနားကုန်သည်များအသင်း (ACCAP)၏ ဥက္ကဌဖြစ်သူ Rallys Pliauzer က နယ်ပယ်စုံတွင် အာဂျင်တီးနားနှင့် ဗီယက်နမ်အကြားဆက်ဆံရေးသည် စဉ်ဆက်ဖွံ့ဖြိုုးတိုးတက်လျက်ရှိကြောင်း ပြောကြားခဲ့ပြီး အထူးသဖြင့် ကုန်သွယ်ရေးတွင် နှစ်နိုင်ငံကြားပူးပေါင်းဆောင်ရွက်ရေး အလားအလာသည် ဆက်လက်အားကောင်းနေကြောင်း ပြောကြားခဲ့ပါသည်။ Pliavzer သည် အဆိုပါစကားကို ဩဂုတ်လ ၁၄ ရက်နေ့က ၎င်း၏ အေဂျင်စီက အိမ်ရှင်အဖြစ် လက်ခံကျင်းပသည့် ဗီယက်နမ်တွင် ရင်းနှီးမြှပ်နှံမှုနှင့် ကုန်သွယ်ရေး ဈေးကွက်များ ဖွံ့ဖြိုးတိုးတက်မှုအလားအလာအတွက် ဆွေးနွေးပွဲတွင် အခိုင်အမာပြောကြားခဲ့ခြင်း ဖြစ်ကြောင်း သိရပါသည်။ ထိုအချိန်တွင် ACCAP ၏ စီနီယာအကြံပေးဖြစ်သူ Mario Schuffm လတ်တလောနှစ်များအတွင်း ဗီယက်နမ်နိုင်ငံ၏ စီးပွားရေးအောင်မြင်မှုများအတွက် ချီးမွမ်း ပြော ကြားခဲ့ပြီး ကုန်သွယ်မှုမြှင့်တင်ရန်အတွက် နှစ်နိုင်ငံလုံးမှ စီးပွားရေးလုပ်ငန်းများ အားထုတ်မှုကြောင့် လွန်ခဲ့သည့်နှစ်တွင် နှစ်နိုင်ငံအပြန်အလှန်ကုန်သွယမှုမှာ အမေရိကန်ဒေါ်လာ ၃.၅ ဘီလီယံ ကျော်ရှိခဲ့ကြောင်း ပြောကြားခဲ့ပါသည်။ ထို့ပြင် အာဂျင်တီးနား စီးပွားရေးလုပ်ငန်းများသည် ဗီယက်နမ်၏ ကုန်သွယ်ရေးနှင့် ရင်းနှီးမြှပ်နှံမှုဈေးကွက်တွင် အလွန်စိတ်ဝင်စားနေကြောင်း သိရပါသည်။ ထိုအချိန်တွင် အာဂျင်တီးနားနိုင်ငံဆိုင်ရာ ဗီယက်နမ်သံအမတ်ကြီး Ngo Minh Nguyet က လတ်တလော ဆယ်စုနှစ်များတွင် ဗီယက်နမ်၏ လူမှုစီးပွားအောင်မြင်မှုအပေါ် နောက်ဆုံးအခြေအေနေများနှင့် အထူးသဖြင့် ၂၀၂၃ ခုနှစ်တွင် ဗီယက်နမ်၏ စီးပွားရေးသည် ပြည်တွင်းအသားတင် ကုန်ထုတ်လုပ်မှု (GDP) ကြီးထွားမှုနှုန်း ၅.၀၅% ဖြင့် တစ်ကမ္ဘာလုံးတွင် အဆင့် ၃၄ နေရာတွင် ရှိကြောင်း ပြောကြားခဲ့ပါသည်။ ယခုနှစ်၏ ပထမသုံးလပတ်တာကာလတွင် GDP ကြီးထွားနှုန်း ၅.၆၆% ရှိခဲ့သည့်အတွက် ယခုနှစ် ပထမနှစ်ဝက်တွင် ဗီယက်နမ်၏ GDP သည် ခန့်မှန်း ၄၂% ထိ တိုးချဲ့နိုင်ခဲ့ကြောင်း သိရပါသည်။ သံအမတ်ကြီး၏ အဆိုအရ ဗီယက်နမ်သည် ပြည်ပရင်းနှီးမြှပ်နှံသူများအတွက် ဦးစားပေး နေရာတစ်ခုအဖြစ်ရှိနေပြီး ယခုနှစ်၏ ပထမနှစ်ဝက်တွင် ပြည်ပတိုက်ရိုက်ရင်းနှီးမြှပ်နှံမှု (FDI) ပမာဏ အမေရိကန်ဒေါ်လာ ၁၅.၂ ဘီလီယံရှိခဲ့ပြီး လွန်ခဲ့သည့်နှစ် တူညီသည့်ကာလထက် ၁၃.၁% မြင့်တက်ခဲ့ကြောင်း သိရပါသည်။ အဆိုပါ ရလဒ်သည် ကမ္ဘာလုံးဆိုင်ရာ ထောက်ပံ့မှုကွင်းဆက် ပြောင်းလဲမှု၏ မောင်းနှင်အားကြောင့် နိုင်ငံ၏ ကြီးထွားမှုအလားအလာနှင့် ဗီယက်နမ်နိုင်ငံတွင် ရရှိမည့်အခွင့်အရေးများအပေါ် ရင်းနှီးမြှပ်နှံသူများက ယုံကြည်မှုကို ပြသနေကြောင်း သိရပါသည်။ သံအမတ်ကြီးက ဗီယက်နမ်သည် ပြည်ပစီးပွားရေးလုပ်ငန်းများအတွက် တံခါးဖွင့်ထားကြောင့်နှင့် ဗီယက်နမ်အစိုးရသည်လည်း စီးပွားရေး ကြီးထွားမှုကိုမြှင့်တင်ရန် အတားအဆီးများနှင့် အခက်အခဲများကို ဖြေရှင်းခြင်းနှင့် အဖွဲ့အစည်း ဖွဲ့စည်းမှုကို ပြည့်စုံစေရန် ဆက်လက်ကြိုးပမ်းသွားမည်ဟု ပြောကြားခဲ့ပါသည်။ ၂၀၂၄ ခုနှစ်၏ ပထမ ၆လတွင် ဗီယက်နမ်၏ အပြန်အလှန် တင်သွင်းမှု တင်ပို့မှုပမာဏမှာ အမေရိကန်‌ဒေါ်လာ ၃၆၈.၅ ဘီလီယံရှိခဲ့ပြီး ကုန်သွယ်ရေးပိုငွေ ၁၁.၆၃ ဘီလီယံရရှိခဲ့ကြောင်း သိရပါသည်။

Source: Vietnam Plus

DOCA(ရန်ကုန်)