ပြည်ပကုန်သွယ်မှုသတင်းများ

           ဗီယက်နမ်နိုင်ငံနှင့် ကနေဒါနိုင်ငံတို့သည် လာမည့်သုံးနှစ်မှ ငါးနှစ်အတွင်း နှစ်နိုင်ငံကုန်သွယ်ရေးကို ၁.၅ ဆ အထိ တိုးမြှင့်ရန်ကြိုးပမ်းသွားမည်ဟု သဘောတူညီခဲ့ကြောင်း ဒေသတွင်းသတင်း စာ VnEconomy က အောက်တိုဘာလ ၂၈ ရက်နေ့တွင် ထုတ်ပြန်ခဲ့ကြောင်း သိရသည်။

          အဆိုပါသဘောတူညီချက်ကို မလေးရှားနိုင်ငံ၌ ကျင်းပခဲ့သော (၄၇) ကြိမ်မြောက် အာဆီယံ ထိပ်သီးအစည်းအဝေးတွင် ဗီယက်နမ်စက်မှုနှင့် ကုန်သွယ်ရေးဝန်ကြီးဖြစ်သော Nguyen Hong Dien နှင့် ကနေဒါ နိုင်ငံတကာ ကုန်သွယ်ရေးဝန်ကြီး Maninder Sidhu တို့တက်ရောက်ခဲ့ပြီး အစည်း အဝေးပြင်ပတွင် အောက်တိုဘာ ၂၇ ရက်နေ့က သီးခြားတွေ့ဆုံစဉ် သဘောတူညီမှုရရှိခဲ့ခြင်းဖြစ်ကြောင်း သိရသည်။

          နှစ်နိုင်ငံသည် ၂၀၂၆ ခုနှစ်တွင် အာဆီယံ-ကနေဒါ လွတ်လပ်သော ကုန်သွယ်ရေးသဘောတူညီချက် စာချုပ်ကို အပြီးသတ်လက်မှတ်ရေးထိုးရန် ကတိပြခဲ့ပြီး ၎င်းသည် ဒေသတွင်း စီးပွားရေးကို ခိုင်မာစေရန်နှင့် ဈေးကွက်ဝင်ရောက်ခွင့်ကို လွယ်ကူချောမွေ့စေရန် အရေးပါသော ခြေလှမ်းဖြစ်ကြောင်း ပြောကြားခဲ့ကြောင်း သိရသည်။

          ဝန်ကြီးနှစ်ဦးသည် စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှုများကို ဆွေးနွေးခဲ့ကြပြီး စွမ်းအင်၊ အာကာသနှင့် နည်းပညာကဏ္ဍတို့တွင် မိတ်ဖက်ပူးပေါင်းဆောင်ရွက်မှုများကို ထပ်မံတိုးချဲ့ရန် သဘောတူညီခဲ့ကျကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

          ၂၀၂၄-၂၀၂၅ ကောက်ရိတ်သိမ်းရာသီတွင် ဗီယက်နမ်သည် ကော်ဖီတင်ပို့မှုမှတစ်ဆင့် စံချိန်တင် အမေရိကန်ဒေါ်လာ ၈.၄ ဘီလီယံရရှိခဲ့ပြီး ယခင်ကောက်ရိတ်သိမ်းရာသီထက် ၆၀ ရာခိုင်နှုန်း မြင့်တက်ခဲ့ကြောင်း သိရပါသည်။ အောက်တိုဘာလအစောပိုင်းမှစ၍ နိုင်ငံသည် ၂၀၂၅-၂၀၂၆ ကောက်ရိတ်သိမ်းရာသီသို့ ဝင်ရောက်ခဲ့ပြီး ကော်ဖီဈေးနှုန်းများမှာ တစ်ကီလိုဂရမ်လျှင် ဗီယက်နမ် ဒေါင် ၁၁၅၀၀၀ ပတ်လည်ရှိကာ ယခင်ရာသီထက် ဗီယက်နမ်ဒေါင် ၅၀၀၀ ခန့်မြင့်တက်ခဲ့ကြောင်း သိရပါသည်။ ကမ္ဘာ့ဈေးကွက်တွင် နိုင်ငံ၏အဓိကပို့ကုန်ဖြစ်သည့် robusta ကော်ဖီမှာ တစ်တန်လျှင် အမေရိကန်ဒေါ်လာ ၄၅၀၀-၄၆၀၀ ကြားတွင်ရှိပြီး arabica ကော်ဖီမှာ တစ်တန်လျှင် အမေရိကန်ဒေါ်လာ ၉၀၀၀ နီးပါးထိမြင့်တက်ခဲ့ကြောင်း သိရပါသည်။  Eatu Fair Trade Agricultural Cooperative ၏ ဒါရိုက်တာဖြစ်သူ Tran Dinh Trang ကယခုရာသီတွင် တည်ငြိမ်သောဈေးနှုန်းများနှင့် အတူ စိုက်ပျိုးရေးသမားများ၏ဝင်ငွေနှင့် အကျိုးအမြတ်ရရှိမှု သိသာစွာမြင့်တက်ခဲ့ကြောင်း ပြောကြားခဲ့ပါသည်။ Nga Thanh Trading Co,ltd ၏ ဒါရိုက်တာဖြစ်သူ Nguyen Duc Dat က များစွာသောစိုက်ပျိုးရေးသမားများသည် ကုန်လက်ကျန်များထားရှိပြီး မြင့်မားသောဈေးနှုန်းကို စောင့်ဆိုင်းနေကြောင်း ပြောကြားခဲ့ပါသည်။ လတ်တလောနှစ်များအတွင် ကော်ဖီ၊ ဒူးရင်းနှင့် ငရုတ်ကောင်းတို့ထံမှ ဝင်ငွေရရှိမှုမြင့်တက်ခဲ့ခြင်းကြောင့် ဘဏ္ဍာရေးတည်ငြိမ်နေခြင်းက စိုက်ပျိုးရေးသမားများအား ရောင်းချရာတွင် ပိုမိုဗျူဟာမြောက်ချည်းကပ်နိုင်စေကြောင်း သိရပါသည်။ ဗီယက်နမ်ကော်ဖီနှင့် ကိုကိုးအသင်း (VICOFA) ၏အဆိုအရ ဗီယက်နမ်သည် ၂၀၂၄-၂၀၂၅ ရာသီ တွင် ကော်ဖီတန်ချိန် ၁.၅ သန်းတင်ပို့ခဲ့ပြီး ၂၀၂၃-၂၀၂၄ ရာသီထက် ၆ ရာခိုင်နှုန်းမြင့်တက်ခဲ့ကြောင်း သိရပါသည်။ VICOFA ၏ ဥက္ကဌ Nguyen Nam Hai က ၂၀၂၅-၂၀၂၆ ရာသီကော်ဖီ အထွက်နှုန်းမှာ ယခုရာသီထက် ၁၀ ရာခိုင်နှုန်း မြင့်တက်ရန်ခန့်မှန်းရပြီး ဘရာဇီးနှင့် ကိုလံဘီယာ တို့မှ arabica ကော်ဖီဈေးနှုန်းများ မြင့်တက်လာခြင်းက ဗီယက်နမ် robusta ကော်ဖီဈေးနှုန်းများနှင့် ဝယ်လိုအားမြင့်တက်ရန် မျှော်လင့်ရကြောင်း ပြောကြားခဲ့ပါသည်။ ဗီယက်နမ်သည် ကမ္ဘာ့ဒုတိယအကြီးမားဆုံး ကော်ဖီတင်ပို့သူနှင့် robusta ကော်ဖီထိပ်တန်းရောင်းချသူဖြစ်သော်လည်း တင်ပို့မှု၏ ၈၅ ရာခိုင်နှုန်းမှာ ကုန်ကြမ်းများဖြစ်ကြောင်း သိရပါသည်။ Hai က တင်ပို့မှုရည်မှန်းချက် အမေရိကန်ဒေါ်လာ ၁၀ ဘီလီယံရောက်ရှိရန်အတွက် ဗီယက်နမ်သည် ပြုပြင်ထုတ်လုပ်ခြင်း၊ အရည်အသွေးတိုးတက်ခြင်းနှင့် အမှတ်တံဆိပ်ပုံရိပ်တည်ထောင်ခြင်းတို့တွင် အဓိကထားသင့်ကြောင်း ပြောကြားခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

          ဗီယက်နမ်စိုက်ပျိုးမွေးမြူရေးနှင့် သဘာဝပတ်ဝန်းကျင်ဝန်ကြီးဌာနသည် ဂျပန်၏ စိုက်ပျိုးမွေးမြူ‌ရေး၊ သစ်တောနှင့် ငါးလုပ်ငန်းဝန်ကြီးဌာန MAFF) နှင့် ဂျပန်နိုင်ငံဆိုင်ရာ ဗီယက်နမ်သံရုံး  တို့နှင့်ပူးပေါင်း၍ မဲခေါင်ဒယ်တာဒေသတွင် နည်းပညာမြင့်မားပြီးကာဗွန်ထုတ်လွှင့်မှုနည်းပါးသော အစိမ်းရောင်ဆန်ထုတ်လုပ်ခြင်းတွင် ရင်းနှီးမြှုပ်နှံမှုအရှိန်မြှင့်တင်ရန်အတွက် အလုပ်ရုံဆွေးနွေးပွဲကို အောက်တိုဘာလ ၂၁ ရက်နေ့က တိုကျိုမြို့တွင် ကျင်းပပြုလုပ်ခဲ့ပါသည်။ ဗီယက်နမ် စိုက်ပျိုးမွေးမြူရေးနှင့် သဘာဝပတ်ဝန်းကျင် ဒုတိယဝန်ကြီး Tran Thanh Nam၊ MAFF ဒုတိယဝန်ကြီး Yoichi Watanabe နှင့် ဂျပန်နိုင်ငံဆိုင်ရာ ဗီယက်နမ်သံအမတ် Pham Quang Hieu တို့ပူးတွဲ ကြီးမှူးကျင်းပသည့် ထိုဆွေးနွေးပွဲသည် နှစ်နိုင်ငံစလုံးမှ အစိုးရအေဂျင်စီများ၊ အသင်းများ၊ သမဝါယမအသင်းအဖွဲ့များနှင့် စီးပွားရေးလုပ်ငန်းများမှ တာဝန်ရှိသူ ၁၅၀ ကျော်ကို ဆွဲဆောင်နိုင်ခဲ့ပြီး ဂျပန်ကုမ္ပဏီ ၇၀ ကျော်က အစိမ်းရောင်စိုက်ပျိုးရေးတွင် ရင်းနှီးမြှုပ်နှံရန် စိတ်ဝင်စားမှုကို ပြသခဲ့ကြောင်း သိရပါသည်။ Hieu က ဘဏ္ဍာရေးအရင်းအမြစ်များ၊ အဆင့်မြင့်နည်းပညာ၊ စဉ်ဆက်မပြတ်ဖွံ့ဖြိုးတိုးတက်ရေး၊ အရည်အသွေးစံနှုန်းများနှင့် သဘာဝပတ်ဝန်းကျင်ကို တာဝန်ယူမှုတို့တွင် ပံ့ပိုးပေးသည့် ဂျပန်၏အခန်းကဏ္ဍကို အသားပေးပြောကြားခဲ့ကြောင်း သိရပါသည်။ အောင်မြင်သည့်ပူးပေါင်းဆောင်ရွက်မှုပုံစံများတွင် Lam Dong တွင် နည်းပညာမြင့်စိုက်ပျိုးရေး၊ မဲခေါင်ဒယ်တာဒေသတွင် စိုက်ပျိုးရေးထုတ်ကုန်ပြုပြင်ထုတ်လုပ်မှုတွင် မိတ်ဖက်ဖွဲ့မှုနှင့် စိုက်ပျိုးရေးလုပ်သားများအား ကျွမ်းကျင်မှုမြင့်မားစေရန် လေ့ကျင့်ပေးမှုတို့ပါဝင်ကြောင်း သိရပါသည်။ Hieu က အရှေ့တောင်အာရှဒေသတွင် အကြီးမားဆုံး ဆန်စိုက်ပျိုးသည့် ဒေသဖြစ်သည့် မဲခေါင် ဒယ်တာဒေသသည် ရာသီဥတုပြောင်းလဲမှု၊ ဆားငံရေဝင်ရောက်လာမှုနှင့် မြေအောက်ရေထုတ်ယူ သုံးစွဲမှုများခြင်းကြောင့် မြေနိမ့်ကျခြင်းတို့ကြောင့် ပြင်းထန်သောစိန်ခေါ်မှုများနှင့်ရင်ဆိုင်နေရပြီး စိမ်းလန်းပြီးစမတ်ဖြစ်ကာ စဉ်ဆက်မပြတ်ဖွံ့ဖြိုးတိုးတက်မှုပုံစံကို အရေးပေါ်လိုအပ်နေကြောင်း ပြောကြားခဲ့ပါသည်။ ဗီယက်နမ်ကစတင်ဆောင်ရွက်မည့် အရည်အသွေးမြင့်ပြီး ကာဗွန်ထုတ်လွှင့်မှုကို လျှော့ချပေးမည့် ဆန်စိုက်ခင်း ဟတ်တာ ၁ သန်းတည်ထောင်မည့်စီမံကိန်းသည် ဖန်လုံအိမ် ဓာတ်ငွေ့ထုတ်လွှင့်မှုကို ၁၅ ရာခိုင်နှုန်းမှ ၂၀ ရာခိုင်နှုန်းကိုလျှော့ချပေးပြီး စိုက်ပျိုးရေး သမားများ၏ ဝင်ငွေကို ၁၀ ရာခိုင်နှုန်းမှ ၁၅ ရာခိုင်နှုန်းထိ မြှင့်တင်ပေးရန် ရည်ရွယ်ကြောင်း သိရပါသည်။ သံအမတ်ကြီးက ထိုစီမံကိန်းအောင်မြင်မှုရရှိရန်အတွက် ဂျပန်နိုင်ငံထံမှ အမြော်အမြင်ရှိသော မိတ်ဖက်များလိုအပ်ကြောင်း ပြောကြားခဲ့ပါသည်။ ထို့ပြင် သံအမတ်ကြီးက ဆွေးနွေးပွဲအတွင်း လက်မှတ်ရေးထိုးခဲ့သည့် ပူးပေါင်းဆောင်ရွက်မှုသဘောတူညီချက်များနှင့် MoU များသည်  မဲခေါင်ဒယ်တာဒေသ တစ်လျှောက်ရှိဒေသများတွင် လက်တွေ့ရင်းနှီးမြှုပ်နှံမှု ပြုလုပ်ရန်အတွက် သုတေသနနှင့် နည်းပညာလွှဲပြောင်းမှုတို့မှသည် ဘက်ပေါင်းစုံ ပူး‌ပေါင်းဆောင်ရွက်မှုများကို အရှိန်မြှင့်တင်ပေးနိုင်မည်ဟု ယုံကြည်ချက်ရှိကြောင်း ပြောကြားခဲ့ပါသည်။ ဆွေးနွေးပွဲအတွင်း နှစ်နိုင်ငံ စလုံးမှအေဂျင်စီများနှင့် စီးပွားရေးလုပ်ငန်းများသည် ပူးပေါင်းဆောင်ရွက်မှု၏အဓိကအချက်များကို သဘောတူညီခဲ့ကြပြီး ဗီယက်နမ်-ဂျပန်ရင်းနှီးမြှုပ်နှံမှုနှင့် နည်းပညာလွှဲပြောင်းမှုတို့တွင် ရှေ့ဆက်ရန် ခိုင်မာသောခြေလှမ်းတစ်ရပ်ဖန်တီးနိုင်ခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

        ၂၀၂၆ ခုနှစ်တွင် အစိုးရအသုံးစရိတ်အတွက် ကမ္ဘောဒီးယားအစိုးရအသုံးစရိတ် ကျပ် ၄၀,၉၁၃ ဘီလီယံ (အမေရိကန်ဒေါ်လာ ၁၀.၁၆ ဘီလီယံ) ကို ကမ္ဘောဒီးယားအစိုးရက သောကြာနေ့တွင် အတည်ပြုခဲ့ပြီး ၂၀၂၅ ခုနှစ်အသုံးစရိတ်နှင့် နှိုင်းယှဉ်ပါက ၇.၈ ရာခိုင်နှုန်း တိုးလာ ကြောင်း သိရသည်။

       ဝန်ကြီးချုပ် ဟွန်မာနက် ဦးဆောင်သည့် အပတ်စဉ် အစိုးရအဖွဲ့ အစည်းအဝေးတွင် အတည်ပြုချက် ရယူခဲ့ကြောင်း အစည်းအဝေးအပြီး သတင်းထုတ်ပြန်ချက်တွင် ဖော်ပြထားသည်။ လာမည့်နှစ်ဘတ်ဂျက်သည် နိုင်ငံ၏ ပြည်တွင်းအသားတင်ထုတ်ကုန် (GDP) ၏ ၁၈.၈၅ ရာခိုင်နှုန်းနှင့် ညီမျှသည်ဟုဆိုကြောင်း သိရသည်။

         "ခန့်မှန်းချက်အရ၊ ကမ္ဘောဒီးယားနိုင်ငံ၏စီးပွားရေးသည် ၂၀၂၅ ခုနှစ်တွင် ၅.၂ ရာခိုင်နှုန်း ခန့်နှင့် ၂၀၂၆ ခုနှစ်တွင် ၅ ရာခိုင်နှုန်းခန့် တိုးတက်နိုင်လိမ့်မည်" ဟု ထုတ်ပြန်ချက်တွင် ဖော်ပြထားသည်။ တစ်ဦးချင်း GDP သည် ၂၀၂၆ ခုနှစ်တွင် အမေရိကန်ဒေါ်လာ ၃၀၂၀ သို့ရောက်ရှိရန် ခန့်မှန်းထားပြီး ၂၀၂၅ ခုနှစ်တွင် အမေရိကန်ဒေါ်လာ ၂၈၅၈ မှ တိုးတက်လာမည်ဟု ခန့်မှန်းထားကြောင်း သိရသည်။

        လာမည့်နှစ်တွင် ကမ္ဘောဒီးယားနိုင်ငံ၏ တိုးတက်မှုသည် အထည်ချုပ်၊ ဖိနပ်နှင့် ခရီးသွား ကုန်ပစ္စည်းများတင်ပို့မှု၊ ခရီးသွားလုပ်ငန်း၊ စိုက်ပျိုးရေး၊ ဆောက်လုပ်ရေးနှင့် အိမ်ခြံမြေကဏ္ဍတို့မှ တွန်းအားပေးမည်ဖြစ်သည်။ ၂၀၂၆ ခုနှစ်အတွက် ဘတ်ဂျက်ဥပဒေကြမ်းကို အမျိုးသားလွှတ်တော်က အတည်ပြုပြီး နောက်ဆုံးတွင် ဘုရင် Norodom Sihamoni ထံ တင်သွင်းခြင်းမပြုမီ အထက်လွှတ်တော်က ပြန်လည်သုံးသပ်ရန် လိုအပ်နေသေးကြောင်း သိရှိရပါသည်။

Source: Xinhua                                                                              

DOCA (ရန်ကုန်)

            ကြာသပတေးနေ့တွင် Intel Corporation သည် ၂၀၂၅ ခုနှစ် တတိယသုံးလပတ်အတွက် တစ်နှစ်ထက်တစ်နှစ် ဝင်ငွေ ၃ ရာခိုင်နှုန်း တိုးလာကြောင်း အစီရင်ခံတင်ပြခဲ့ပြီး စုစုပေါင်း ရောင်းအားမှာ အမေရိကန် ဒေါ်လာ ၁၃.၇ ဘီလီယံအထိ ရှိခဲ့ကြောင်း သိရသည်။ ၎င်း၏ဘဏ္ဍာရေးအစီရင်ခံစာအရ Intel ၏အသားတင်ဝင်ငွေသည် တတိယသုံးလပတ်တွင် ဒေါ်လာ ၄.၁ ဘီလီယံအထိ တိုးလာပြီး လွန်ခဲ့သည့် တစ်နှစ်တွင် ၁၆.၆ ဘီလီယံဒေါ်လာ ဆုံးရှုံးမှုနှင့် ပြောင်းပြန်ဖြစ်သည်။ "တတိယလပတ်ရလဒ်များသည် ၎င်းတို့၏ မဟာဗျူဟာမြောက် ဦးစားပေးမှုများအပေါ် ပိုမိုကောင်းမွန်သော ဆောင်ရွက်မှုများနှင့် တည်ငြိမ်သောတိုးတက်မှုများကို ထင်ဟပ်စေကြောင်း Intel CEO Lip-Bu Tan မှ ပြောကြားခဲ့သည်။ AI သည် ၎င်းတို့၏ core x86 ပလပ်ဖောင်းများ၊ ရည်ရွယ်ချက်ဖြင့်တည်ဆောက်ထားသော ASICs နှင့် accelerators များနှင့် foundry ဝန်ဆောင်မှုများအပါအဝင် ဆွဲဆောင်မှုရှိသော အခွင့်အလမ်းများကို ဖန်တီးပေးနေပြီး AI ကဏ္ဍအား အရှိန်မြှင့်လုပ်ဆောင်လျက်ရှိသည်။ Intel နှင့် US အုပ်ချုပ်ရေးတို့သည် အမေရိကန်အစိုးရထံမှ ရန်ပုံငွေ ဒေါ်လာ ၈.၉ ဘီလီယံဖြင့် အမေရိကန်နည်းပညာနှင့် ကုန်ထုတ်လုပ်မှု ဦးဆောင်မှုကို ဆက်လက်ချဲ့ထွင်ရန် သဘောတူညီခဲ့ကြပြီး သုံးလပတ်အတွင်း Intel သည် အမေရိကန် အစိုးရထံမှ ဒေါ်လာ ၅.၇ ဘီလီယံ ရရှိခဲ့ကြောင်း အစီရင်ခံစာတွင် ဖော်ပြထားသည်။ သုံးလပတ် အတွင်းတွင်၊ Intel နှင့် Nvidia တို့သည် hyperscale၊ လုပ်ငန်းနှင့် စားသုံးသူစျေးကွက်များ တစ်လျှောက် စိတ်ကြိုက်ဒေတာစင်တာနှင့် PC ထုတ်ကုန်များ၏ မျိုးဆက်များစွာကို ပူးပေါင်းဖန်တီးရန် ပူးပေါင်းဆောင်ရွက်ခဲ့ကြောင်း ကြေညာခဲ့သည်။ Nvidia သည် Intel ၏ဘုံစတော့ ရှယ်ယာ တွင်ဒေါ်လာ ၅ ဘီလီယံရင်းနှီးမြှုပ်နှံရန်သဘောတူခဲ့သည်။ ၎င်း၏ စတုတ္ထသုံးလပတ် လမ်းညွှန်ချက်တွင် Intel သည် ဝင်ငွေ ၁၂.၈ ဘီလီယံမှ ၁၃.၈ ဘီလီယံဒေါ်လာအထိ မျှော်မှန်းထားကြောင်း သိရှိရပါသည်။ 

Source: Xinhua                                                                              

DOCA (ရန်ကုန်)