ပြည်ပကုန်သွယ်မှုသတင်းများ

    ကမ္ဘောဒီးယားနိုင်ငံသည် ၂၀၂၄ ခုနှစ်၊ ပထမ (၇) လတွင် သဘာဝရော်ဘာစေး (Natural Rubber Latex) ၁၇၃၉၁၅ တန် တင်ပို့ခဲ့ပြီး ယခင်နှစ်ကာလတူ ပမာဏဖြစ်သည့် ၁၇၀၉၆၈ တန်နှင့် နှိုင်းယှဉ်ပါက ၁ ဒသမ ၇၂ ရာခိုင်နှုန်းဖြင့် ပမာဏအနည်းငယ် တိုးလာခဲ့ကြောင်း ကမ္ဘောဒီးယား ရော်ဘာအထွေထွေ ညွှန်ကြားမှု ဦးစီးဌာန၏ ၁၁-၈-၂၀၂၄ ရက်နေ့ အစီရင်ခံစာအရ သိရှိရသည်။

     ကမ္ဘောဒီးယားနိုင်ငံသည် ၂၀၂၄ခု နှစ်၊ ဇန်နဝါရီလမှ ဇူလိုင်လအတွင်း ရော်ဘာတင်ပို့မှုမှ ဝင်ငွေဒေါ်လာ ၂၆၉ သန်းရရှိခဲ့ပြီး ယခင်နှစ်ကာလတူ ပမာဏဖြစ်သည့် အမေရိကန်ဒေါ်လာ ၂၃၉ ဒသမ ၃ သန်းနှင့်နှိုင်းယှဉ်ပါက ၁၂ ဒသမ ၄ ရာခိုင်နှုန်း တိုးတက်လာကြောင်း အစီရင်ခံစာတွင် ဖော်ပြထားသည်။

   ၂၀၂၄ ခုနှစ်၊ ပထမ (၇) လတွင် ရော်ဘာစေး တစ်တန်လျှင် ပျမ်းမျှဈေးနှုန်းမှာ ၁၅၄၇ ဒေါ်လာဖြစ်ပြီး ယခင်နှစ်ကာလတူထက် ၁၄၇ ဒေါ်လာခန့် ပိုမိုကြောင်း ရော်ဘာ အထွေထွေ ညွှန်ကြားမှုဦးစီးဌာနမှ ခေတ္တညွှန်ကြားရေးမှူးချုပ် Khun Kakada က အစီရင်ခံစာတွင် ပြောကြားထားချက်အရ သိရှိရသည်။

   ကမ္ဘောဒီးယားနိုင်ငံမှ ရော်ဘာကို မလေးရှား၊ ဗီယက်နမ်၊ စင်ကာပူနှင့် တရုတ်နိုင်ငံများသို့ အဓိကတင်ပို့လျက်ရှိကြောင်း၊ ရော်ဘာစိုက် ဧရိယာသည် ၄၀၇၁၇၂ ဟက်တာရှိပြီး ၎င်းအနက် ၃၂၀၁၈၄ ဟက်တာ သို့မဟုတ် ၇၈  ဒသမ ၆ ရာခိုင်နှုန်းရှိသော ရော်ဘာပင်များသည် ရော်ဘာအစေးခြစ်ရန် အရွယ်ရောက်သောအပင်များဖြစ်ကြောင်း သိရှိရသည်။

Source: Khmer Times, 12 August, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   အိန္ဒိယနိုင်ငံတွင် မုတ်သုံရာသီဥတုအခြေအနေ ကောင်းမွန်ခြင်းက ပြည်တွင်းစိုက်ပျိုးထုတ် လုပ်မှု မြင့်မားပြီး လက်လီဈေးနှုန်းများ နိမ့်ကျမှု ဖြစ်စေနိုင်သဖြင့် ပဲမျိုးစုံတင်သွင်းမှုမှာ ယခင်နှစ်၌ တင်သွင်းခဲ့သော တန်ချိန် ၄၇ ဒသမ ၃၈ သိန်းမှ လျော့ကျလျက် လက်ရှိ ၂၀၂၄-၂၅ ဘဏ္ဍာနှစ်တွင် တန်ချိန် သိန်း ၄၀ မှ ၄၅ သိန်းအတွင်းသာ တင်သွင်းရဖွယ်ရှိကြောင်း အိန္ဒိယ ပဲမျိုးစုံနှင့် ကောက်ပဲ သီးနှံအသင်း (IPGA) ၏ ဥက္ကဋ္ဌ Bimal Kothari က ဩဂုတ်လ ၉ ရက်နေ့၌ ပြောကြားခဲ့သည်။

    မူဝါဒများအား မကြာခဏပြောင်းလဲခြင်းသည် ပဲမျိုးစုံလုပ်ငန်းကဏ္ဍ၌ ပါဝင်လုပ်ကိုင်နေသူအားလုံး၏ အကျိုးစီးပွားကို ထိခိုက်စေသဖြင့် အစိုးရအနေဖြင့် ရူပီးငွေ ကုဋေ ၂ ဒသမ ၅ သိန်း ရှိသော ပဲမျိုးစုံဈေးကွက်အတွက် ကာလရှည် မူဝါဒတစ်ရပ်ကို မူဘောင်ချမှတ်သင့်ကြောင်း IPGA ကုန်သည်အသင်းက တောင်းဆိုထားသည်။

     ယခင်ဘဏ္ဍာနှစ်၌ ပဲမျိုးစုံတင်သွင်းမှု မြင့်မားခဲ့ခြင်း၊ ၂၀၂၄-၂၅ သီးနှံရာသီကာလ၌ စိုက်ပျိုး ထုတ်လုပ်မှု တိုးတက်ဖွယ်ရှိခြင်းတို့ကြောင့် ယခုနှစ် ပဲမျိုးစုံတင်သွင်းမှုမှာ တန်ချိန် သိန်း ၄၀ မှ ၄၅ အတွင်းရှိမည်ဟု ခန့်မှန်းခြင်းဖြစ်ကြောင်း၊ အိန္ဒိယ၏ ပဲနီလေးတင်သွင်းရန် လိုအပ်ချက်မှာ တန်ချိန် ၁၀ သိန်းခန့်သာရှိသော်လည်း ယခင်ဘဏ္ဍာနှစ်တွင် တန်ချိန် ၁၆ သိန်းအထိ တင်သွင်းခဲ့ကြောင်း၊ ၂၀၂၃-၂၄ ခုနှစ်၌ တင်သွင်းခဲ့မှုနှင့် နှိုင်းယှဉ်ပါက ယခုနှစ်တွင် စားတော်တင်သွင်းမှုသည်လည်း ကျဆင်းဖွယ်ရှိကြောင်း၊ ယခုနှစ် မုတ်သုံရာသီ၌ မိုးရွာသွန်းမှု ကောင်းမွန်မှုရှိရာ မိုးသီးနှံပဲမျိုးစုံ စိုက် ဧကများ တိုးတက်လာခဲ့ပြီး အထွက်ပမာဏသည်လည်း တိုးတက်လာမည်ဟု ခန့်မှန်းရကြောင်း ဖြင့် နယူးဒေလီမြို့တွင် ကျင်းပသည့် အိန္ဒိယပဲမျိုးစုံဆိုင်ရာ ဆွေးနွေးပွဲ ၂၀၂၄ (Bharat Dalhan Seminar 2024) ၌ Mr. Kothari က ပြောဆိုခဲ့သည်။

    လက်ကားဈေးကွက်တွင် ပဲမျိုးစုံဈေးနှုန်းများသည် လွန်ခဲ့သောတစ်လခန့်မှစ၍ ကျဆင်း လာခဲ့ပြီး ဆက်လက်၍လည်း ကျဆင်းမည်ဟု ခန့်မှန်းရကြောင်း၊ တစ်လတာအတွင်း ပဲစင်းငုံ လက်ကားဈေးနှုန်းသည် တစ်ကီလိုဂရမ်ပေါ်တွင် ရူပီးငွေ ၂၀ ခန့် လျော့ကျခဲ့ကြောင်း၊ ယခုနှစ်၌ ပဲမျိုးစုံ ဈေးနှုန်းများ မြင့်တက်လိမ့်မည်မဟုတ်ကြောင်း ၎င်းက ဆက်လက်ပြောကြားခဲ့သည်။

    အိန္ဒိယနိုင်ငံအနေဖြင့် ပြည်တွင်းဈေးကွက်ဝယ်လိုအားကို ဖြည့်ဆည်းနိုင်ရန်အတွက် နှစ်စဉ် တင်သွင်းမှုပမာဏအပေါ် ၉၀ ရာခိုင်နှုန်း မြင့်တက်လျက် ၂၀၂၃-၂၄ ခုနှစ်၌ ပဲမျိုးစုံတန်ချိန် ၄၇ ဒသမ ၃၈ သိန်းအထိ တင်သွင်းခဲ့ရခြင်းဖြစ်သည်ဟု အစိုးရက လွှတ်တော်သို့ ယခင်လ၌ တင်ပြခဲ့ သည်။

    ဘဏ္ဍာနှစ်အလိုက် အိန္ဒိယ၏ ပဲမျိုးစုံတင်သွင်းမှုမှာ ၂၀၂၀-၂၁ ခုနှစ်တွင် တန်ချိန် ၂၄ ဒသမ ၆၆ သိန်း၊ ၂၀၂၁-၂၂ ခုနှစ်၌ တန်ချိန် ၂၆ ဒသမ ၉၉ သိန်းနှင့် ၂၀၂၂-၂၃ ခုနှစ်တွင် တန်ချိန် ၂၄ ဒသမ ၉၆ သိန်း အသီးသီးရှိခဲ့သည်။ လက်ရှိဘဏ္ဍာနှစ်တွင် ဧပြီလနှင့် မေလအတွင်း ပဲမျိုးစုံ တန်ချိန် ၁၁ ဒသမ ၃၂ သိန်းကို တင်သွင်းထားပြီးဖြစ်သည်။

    အိန္ဒိယနိုင်ငံ၌ ပဲမျိုးစုံ စိုက်ပျိုးထုတ်လုပ်မှုမှာ တိုးတက်လျက်ရှိပြီး ၂၀၁၅-၁၆ ခုနှစ်တွင် တန်ချိန် ၁၆၃ ဒသမ ၂၃ သိန်းရှိရာမှ ၂၀၂၃-၂၄ ခုနှစ်၌ တန်ချိန် ၂၄၄ ဒသမ ၉၃ သိန်းသို့ မြင့်တက်ခဲ့ ကြောင်း အစိုးရ၏ တတိယအကြိမ်ခန့်မှန်းချက် ထုတ်ပြန်မှုအရ သိရှိရသည်။

Source: Economic Times, 9 Aug 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

       ဗီယက်နမ်နိုင်ငံဒုတိယဝန်ကြီးချုပ် Tran Luu Queng က ဗီယက်နမ်နိုင်ငံနှင့် တရုတ်နိုင်ငံ၏ ဟောင်ကောင်တို့သည် အဓိကဧရိယာများဖြစ်သည့် စီးပွားရေးကုန်သွယ်မှု၊ ခရီးသွားကဏ္ဍ၊ ပညာရေး၊ သိပ္ပံနည်းပညာ၊ ဥပဒေစိုးမိုးရေးနှင့် ပြည်သူလူထုကာကွယ်ရေးတို့တွင် ၎င်းတို့၏ပူးပေါင်းဆောင်ရွက်မှုကိုပိုမိုနက်ရှိုင်းပြီး အရည်အသွေးတိုးတက်စေရေးအတွက် ဇူလိုင်လ ၃၁ရက်နေ့မှ ဩဂုတ်လ ၂ရက်နေ့အထိ အလည်အပတ်ခရီးလာရောက်ခဲ့သည့် ဟောင်ကောင်ကိုယ်ပိုင်အုပ်ချုပ်ခွင့်ရဒေသအကြီးအကဲ John Lee Ka-chiu နှင့်ဆွေးနွေးမှုတွင် Quang က Lee ၏ခရီးစဉ်သည် အပြန်အလှန်ပူးပေါင်း‌ဆောင်ရွက်မှုကိုအရှိန်မြှင့်တင်ရန် အရေးပါသည့်မှတ်တိုင်တစ်ခုဖြစ်လာရန် ၎င်း၏မျှော်လင့်ချက်ကိုဖော်ပြခဲ့ပါသည်။

        Quang က ဗီယက်နမ်အုပ်စုများနှင့်လုပ်ငန်းများ ဗီယက်နမ်ဈေးကွက်အတွင်း ဝင်ရောက်ရန်ဖိတ်ခေါ်ခဲ့ပြီး အရည်အသွေးမြင့်စီမံကိန်းများလာရောက်ရန်နှင့် ဗီယက်နမ်ကုန်ပစ္စည်းအများတင်သွင်းမှုမြှင့်တင်ရန် ပြောကြားခဲ့ပါသည်။ ထို့ပြင် Quang ဘက်ပေါင်းစုံပါဝင်သောယန္တရားများ၊ ဖိုရမ်များတွင် နှစ်ဖက်စလုံးက ပူးပေါင်းဆောင်ရွက်မှုမြှင့်တင်ရန်အကြံပြုခဲ့ပြီး ဗီယက်နမ်နိုင်ငံက အိမ်ရှင်အဖြစ်လက်ခံကျင်းပမည့် APEC 2027 တွင် ဟောင်ကောင်ကပံ့ပိုးပေးပြီး အနီးကပ်ပူးပေါင်းဆောင်ရွက်ပေးရန်တောင်းဆိုခဲ့ပါသည်။

          Lee ကလည်း ဟောင်ကောင်ကိုယ်ပိုင်အုပ်ချုပ်ခွင့်ရဒေသအနေနှင့် ဗီယက်နမ်နိုင်ငံနှင့်ပူးပေါင်းဆောင်ရွက်မှုတိုးမြှင့်ရန် အဆင်သင့်ဖြစ်နေကြောင်းနှင့် နှစ်ဖက်စလုံးရှိ ပြည်သူလူထုနှင့် စီးပွားရေးအဖွဲ့အစည်းများအတွက် ထိရောက်စွာ အကျိုးအမြတ်ရရှိမှုကိုသယ်ဆောင်လာမည်ဖြစ်ကြောင်းပြောကြားခဲ့ပါသည်။ ဆွေးနွေးပွဲတွင် နှစ်ဖက်စလုံးသည် ဗီယက်နမ်-ဟောင်ကောင်၏ စီးပွားရေးကုန်သွယ်မှု၊ ရင်းနှီးမြှုပ်နှံမှုနှင့် ခရီးသွားကဏ္ဍတို့တွင် အပေါင်းလက္ခဏာထောင်သည့် ရလဒ်နှင့် ဖွံ့ဖြိုးတိုးတက်မှုတို့အတွက် ၎င်းတို့၏ စိတ်ကျေနပ်မှုကိုဖော်ပြခဲ့ကြောင်းသိရပါသည်။

        ဗီယက်နမ်သည် လတ်တလောတွင် ဟောင်ကောင်၏ အာဆီယံ၌ ဒုတိယအကြီးဆုံးကုန်သွယ်ရေးမိတ်ဖက်ဖြစ်ပြီး နိုင်ငံတကာတွင် ခုနှစ်နိုင်ငံမြောက်အကြီးမားဆုံးဖြစ်ပါသည်။ ထိုအချိန်တွင် ဟောင်ကောင်သည် ဗီယက်နမ်၏ ခုနှစ်နိုင်ငံမြောက် အကြီးမားဆုံးကုန်သွယ်ရေးမိတ်ဖက်ဖြစ်ကြောင်းသိရပါသည်။

         Lee သည် ဘဏ္ဍာရေး၊ ကုန်သွယ်ရေး၊ ရင်းနှီးမြှုပ်နှံမှု၊ သယ်ယူပို့ဆောင်ရေး ဝန်ဆောင်မှု၊ ဒစ်ဂျစ်တယ်နှင့် အစိမ်းရောင်စီးပွားရေးနှင့် သိပ္ပံနည်းပညာတို့တွင် ပူးပေါင်းဆောင်ရွက်ရေးအတွက် ဆွေးနွေးမှုများကိုတိုးမြှင့်ရန်အကြံပြုခဲ့ပါသည်။ ဆွေးနွေးပွဲအပြီးတွင် ဗီယက်နမ်ဒုတိယဝန်ကြီးချုပ်နှင့် ဟောင်ကောင်ကိုယ်ပိုင်အုပ်ချုပ်ခွင့်ရဒေသအကြီးအကဲတို့သည် နှစ်ဖက်စလုံးမှအေဂျင်စီများနှင့် လုပ်ငန်းများအကြား ဘဏ္ဍာရေး၊ ကုန်သွယ်ရေး၊ ရင်းနှီးမြှုပ်နှံမှုနှင့်   လေယာဉ်လုပ်ငန်းနယ်ပယ်တို့တွင် အပြန်အလှန်ပူးပေါင်းဆောင်ရွက်ကြရန် သက်သေပြုခဲ့ကြောင်းသိရပါသည်။

Source : VietnamPlus

DOCA(ရန်ကုန်)

      ဗီယက်နမ်သစ်သီးအမျိုးအစားများစွာသည် အရှေ့မြောက်အာရှဈေးကွက်တွင် ဝယ်လိုအားမြင့်တက်လျက်ရှိပြီး ၂၀၂၄ခုနှစ်အတွက် ရည်မှန်းချက်ဖြစ်သည့်သစ်သီးနှင့် ဟင်းသီးဟင်းရွက်တင်ပို့မှုမှတစ်ဆင့် အမေရိကန်ဒေါ်လာ ၇ဘီလီယံရရှိစေရေးအတွက် ပံ့ပိုးကူညီပေးလျက်ရှိကြောင်းသိရပါသည်။ ဗီယက်နမ်နိုင်ငံသစ်သီးနှင့်ဟင်းသီးဟင်းရွက်အသင်း၏ အတွင်းရေးမှူးချုပ်ဖြစ်သူ Deng Phue Nguyen ၏ပြောကြားချက်အရ ဇူလိုင်လကုန်တွင် သစ်သီးနှင့် ဟင်းသီးဟင်းရွက်တင်ပို့မှုမှတစ်ဆင့် အမေရိကန်ဒေါ်လာ ၃.၈ဘီလီယံရရှိခဲ့ပြီး အဆိုပါပမာဏအနက် ၄၀% သည် ဒူးရင်းသီးတင်ပို့မှုမှတစ်ဆင့် ရရှိခဲ့ခြင်းဖြစ်ကြောင်းသိရပါသည်။ အဆိုပါအောင်မြင်မှုသည် ဗီယက်နမ်စိုက်ပျိုးရေးထုတ်ကုန်များအတွက် အကောက်ခွန်လျှော့ချပေးပြီး ဈေးကွက်ဖွင့်လှစ်ပေးနိုင်ခဲ့သည့် လွတ်လပ်စွာကုန်သွယ်ရေးသဘောတူညီချက်များ (FTAs) ကို အကောင်အထည်ဖော်နိုင်ခဲ့မှုကြောင့်လည်းပါဝင်ကြောင်းသိရပါသည်။ တရုတ်၊ တောင်ကိုရီးယားနှင့် ဂျပန်နိုင်ငံတို့သို့တင်ပို့မှုမှာ ထင်ထင်ရှားရှားကြီးထွားခဲ့ပြီး ဗီယက်နမ်သစ်သီးနှင့် ဟင်းသီးဟင်းရွက်တင်ပို့မှုစုစုပေါင်းတန်ဖိုး၏ ၈၀% မှာ အဆိုပါဈေးကွက်များသို့ ပေးပို့ခဲ့ခြင်းဖြစ်ကြောင်းသိရပါသည်။ Nguyen က တရုတ်နိုင်ငံသည် ကြီးမားသည့်လူဦးရေနှင့် သစ်သီးနှင့်ဟင်းသီးဟင်းရွက်များအတွက် ဝယ်လိုအားမြင့်မားမှုကြောင့် ဗီယက်နမ် သစ်သီးများအတွက် ရိုးရာဈေးကွက်တစ်ခုဖြစ်နေကြောင်းနှင့်  ဂျပန်နှင့် တောင်ကိုရီးယားတို့၌လည်း လူဦးရေများပြားပြီး အရည်အသွေးကောင်းသော စိုက်ပျိုးရေးထုတ်ကုန်များအတွက် မြင့်မားသည့်ဝင်ငွေနှင့် မြင့်မားသည့်ဝယ်လိုအားရှိကြောင်းပြောကြားခဲ့ပါသည်။ ဂျပန်နှင့် တောင်ကိုရီးယားနိုင်ငံတို့မှာ ဒေသတွင်း စဉ်ဆက်မပြတ်စီးပွားရေးပူးပေါင်းဆောင်ရွက်မှု (RCEP) အဖွဲ့ဝင်များဖြစ်သည့်အတွက် ဗီယက်နမ်၏ အဆိုပါဈေးကွက်နှစ်ခုသို့တင်ပို့မှုမှာ အကောက်ခွန်လျှော့ချမှု၊ သယ်ယူပို့ဆောင်ရေးနှင့် ထောက်ပံ့ရေးအတွက် ကုန်ကျစရိတ်နည်းပါးခြင်း စသည့် အကျိုးကျေးဇူးများကိုခံစားရကြောင်းသိရပါသည်။ ဗီယက်နမ်နိုင်ငံအပင်ကာကွယ်ရေးဦးစီးဌာနမှ Luong Ngoc Quang ၏အဆိုအရ တရုတ်နိုင်ငံသည် နဂါးမောက်သီး၊ တောကြက်မောက်သီး၊ လိုင်ချီးသီး၊ သရက်သီး၊ ဒူးရင်းသီးနှင့် အခြားအမျိုးအစားများပါဝင်သော ဗီယက်နမ်စိုက်ပျိုးရေးထုတ်ကုန် ၁၂ခုကိုတင်သွင်းခွင့်ပြုထားကြောင်းပြောကြားခဲ့ပါသည်။ ဂျပန်နိုင်ငံသည် နဂါးမောက်သီး၊ သရက်သီး၊ လိုင်ချီးသီးနှင့် တောကြက်မောက်သီးတို့ကိုတင်သွင်းလျက်ရှိပြီး တောင်ကိုရီးယားနိုင်ငံသည် လက်တလောတွင် ဗီယက်နမ်ထံမှ လတ်ဆတ်သော စပျစ်သီးတင်သွင်းရန် ခွင့်ပြုထားကြောင်းသိရပါသည်။ သို့သော် ဈေးကွက်ရရှိရန်အတွက် ဆွေးနွေးညှိနှိုင်းမှုများမှာ ရှုပ်ထွေးပြီး အချိန်ကုန်ကြောင်းနှင့် တချို့ဆွေးနွေးမှုများသည် ၃နှစ်မှ ၅နှစ်အထိကြာမြင့်ကြောင်းသိရပါသည်။ ခွင့်ပြုချက်တစ်ခုရရှိပါက တင်သွင်းသည့်နိုင်ငံ၏ စံနှုန်းကိုလိုက်နာပြီး အနှောက်အယှက်ဖြစ်စေမည့်အရာများကိုရှောင်ရှားရန် အရေးပါကြောင်းသိရပါသည်။ ထုတ်လုပ်သူတစ်ဦး သို့မဟုတ် တင်ပို့မှုတစ်ခုက ချိုးဖောက်မှုတစ်ခုပြုလုပ်မိခဲ့လျှင် နယ်ပယ်တစ်ခုလုံးကိုသက်ရောက်မှုရှိပြီး သတိပေးခံရခြင်း သို့မဟုတ် တင်ပို့မှုပိတ်ပင်ခံရခြင်းကို ဦးတည်စေနိုင်သည်ဟုသိရပါသည်။ တောင်ပိုင်းဒေသ သစ်သီးဝလံသုတေသနအသင်း၏ ဒုတိယညွှန်ကြားရေးမှူးဖြစ်သူ Nguyen Thenh Hieu က ဗီယက်နမ်သစ်သီးများသည် ဈေးကွက်များစွာတွင် အရည်အသွေးမြင့်မားမှုနှင့်အတူ လူကြိုက်များလျက်ရှိကြောင်းပြောကြားခဲ့ပါသည်။ တင်ပို့သူအများစုသည်လည်း အပင်ရောဂါထိန်းချုပ်ခြင်းနှင့် အစားအစာလုံခြုံရေးအပေါ် ဈေးကွက်စည်းမျဉ်းများနှင့်ပတ်သက်၍ နောက်ဆုံးအခြေအနေကိုရှင်းလင်းပြောကြားလျက်ရှိကြောင်းသိရပါသည်။ သို့သော် စိုက်ပျိုးရေးတန်ဖိုးကွင်းဆက်၏ စတင်ရာဖြစ်သည့် လယ်သမားများသည် စည်းမျဉ်းအပြောင်းအလဲများနှင့်ပတ်သက်၍  သတင်းအရင်းအမြစ်ရရှိမှု မကြာခဏပြတ်လပ်လျက်ရှိကြောင်းသိရပါသည်။ ထို့ကြောင့် ဒေသအာဏာပိုင်များ၊ စီးပွားရေးလုပ်ငန်းများသည် လယ်သမားများအား ၎င်းတို့၏ထုတ်လုပ်မှုစံနှုန်းများ၊ ထုပ်ပိုးမှုပုံစံများ၊၊ ကုန်အမှတ်တံဆိပ်မြင့်တက်ခြင်းတို့တိုးတက်လာစေရန် ပံ့ပိုးမှုပေးသင့်ကြောင်းနှင့် သို့မှသာ ကမ္ဘာလုံးဆိုင်ရာဈေးကွက်တွင် ဗီယက်နမ်သစ်သီးများ၏ ဂုဏ်သတင်းတိုးမြှင့်နိုင်မည်ဖြစ်သည်ဟုသိရပါသည်။

Vietnam Plus

DOCA(ရန်ကုန်)        

     တရုတ်နိုင်ငံ၏ လျှပ်စစ်ကားထုတ်လုပ်သည့် BYD သည် ဗီယက်နမ်နိုင်ငံအား ၎င်းတို့၏ အရှေ့တောင်အာရှတွင် ဖွံ့ဖြိုးတိုးတက်မှုအတွက် အဓိကဈေးကွက်တစ်ခုအဖြစ်ရွေးချယ်ထားကြောင်း BYD Auto Vietnem ၏ CEO ဖြစ်သူ Vo Minh Luc ကပြောကြားခဲ့ပါသည်။ ကမ္ဘာ့အကြီးမားဆုံးလျှပ်စစ်ကား ထုတ်လုပ်သူသည် ဗီယက်နမ်နိုင်ငံတွင် ၎င်းတို့၏ အဆင့်မြင့် လျှပ်စစ်ကားမော်ဒယ်များကို တရားဝင် မိတ်ဆက်ခဲ့ပြီး ဈေးကွက်အတွင်း ၎င်းတို့၏ မဟာဗျူဟာကို ကြေညာခဲ့သည်။ ဗီယက်နမ်သတင်းအေဂျင်စီနှင့် ပြုလုပ်ခဲ့သော အင်တာဗျူးတွင် Luc က ကမ္ဘာ့အကြီးမားဆုံးစွမ်းအင်သစ်မော်တော်ယာဉ်ထုတ်လုပ်သူ BYD သည် ကျယ်ပြန့် သည့် နည်းပညာများကို ပိုင်ဆိုင်ထားပြီး နိုင်ငံနှင့် နယ်ပယ် ၈၀ ကျော်တွင် စီးပွားရေးလုပ်ငန်းများ အကောင်အထည်ဖော်ခဲ့ပြီးဖြစ်ကြောင်းနှင့် အဆိုပါ အရေအတွက်သည် အနာဂတ်တွင် ဆက်လက်မြင့်တက်ရန် မျှော်လင့်ကြောင်း ပြောကြားခဲ့ပါသည်။ ထို့ပြင် Luc က BYD သည် ဗီယက်နမ်ကို ဒေသအတွင်း အဓိကဈေးကွက်နှင့် နောက်ဆုံးဈေးကွက်ဟု ယူဆ လျက်ရှိကြောင်း လူဦးရေသန်း ၁၀၀ ကျော်ရှိသည့်အတွက် ခိုင်မာသည့် ဈေးကွက် တစ်ခုဖြစ်ကြောင်း တည်ငြိမ်မှုရှိသည့် မြင့်မားသော GDP ကြီးထွားမှုရှိကြောင်းနှင့် အခြေခံ အဆောက်အအုံတိုးတက်မှုအတွက် စဉ်ဆက်မပြတ် ရင်းနှီးမြှုပ်နှံမှု ပြုလုပ်ခဲ့ကြောင်း ပြောကြား ခဲ့ပါသည်။ Luc ၏ အဆိုအရ ဗီယက်နမ်ဈေးကွက်သည် အလွန်အရှိန်အဟုန်မြင့်ပြီး ကြီးမားသည့်အလားအလာရှိကြောင်းသိရပါသည်။ Luc က BYD သည် ထုတ်ကုန်သစ်များကို သုံးစွဲသူများထံ ဆက်လက်မိတ်ဆက်ပေးပြီး ရွေးချယ်စရာများပြားအောင် ပံ့ပိုးပေးမည်ဖြစ်ပြီး အစိမ်းရောင်နှင့် စံပြပြောင်းလဲမှု၊ စွမ်းအင်ချွေတာရေး ရည်မှန်းချက်ပြည့်မီစေရေးနှင့် ဗီယက်နမ်တွင် ကာဗွန်ထုတ်လွှင့်မှုလျှော့ချခြင်းတို့တွင် ပံ့ပိုးမြှင့်တင်သွားမည်ဟု ပြောကြားခဲ့ပါသည်။ ဇူလိုင်လ ၁၈ ရက်တွင် BYD DOLPHIN ၊ BYD ATTO 3 နှင့် BYD SEAl ဟု အမည်ရသည့် အမျိုးအစားသုံးမျိုးကို မိတ်ဆက်ခဲ့ပြီး ဈေးနှုန်းများမှ အမေရိကန်ဒေါ်လာ ၂၆၀၇ မှ စတင်ကြောင်း သိရပါသည်။ BYD အာရှပစိဖိတ်ကားအရောင်းဌာန၏ အထွေထွေမန်နေဂျာဖြစ်သူ Lue Xueliang က BYD အနေနှင့် ဗီယက်နမ်တွင် တရားဝင်ကားအရောင်းပြခန်း ၁၀ ခု ဖွင့်လှစ်ရန် စီစဉ်ထားပြီး ၃ နှစ်အတွင်း တစ်နိုင်ငံလုံးအတိုင်းအတာအနေနှင့် အခု ၁၀၀ ဖွင့်လှစ်သွားမည်ဖြစ်ကြောင်း ပြောကြားခဲ့ပါသည်။ ထို့ပြင် BYD သုံးစွဲသူများအား အထူးမက်လုံးပေးရန်နှင့် ချေးငွေပံ့ပိုးသည့် အစီအစဉ်‌ဆောင်ရွက်ရန်အတွက် ဘဏ် ၃ ခုနှင့် အာမခံကုမ္ပဏီ ၄ ခုတို့နှင့် ပူးပေါင်းဆောင်ရွက်ရေးသဘောတူညီချက် လက်မှတ်ရေးထိုးထားကြောင်း သိရပါသည်။ ဘက်ထရီအားသွင်းသည့် လုပ်ငန်း ၁၀ ခုနှင့်လည်း ဗီယက်နမ်တွင် ပူးပေါင်းဆောင်ရွက်ရန် သဘောတူညီ ထားပြီး မိတ်ဖက်အသစ်များကို တက်ကြွစွာ ရှာဖွေလျက်ရှိကာ ဗီယက်နမ်တွင် စွမ်းအင်သစ်လုပ်ငန်းနယ်ပယ်မြှင့်တင်ကြေညာခြင်းနှင့် နိုင်ငံ၏ အစိမ်းရောင်းစီးပွားရေးတို့တွင် ပူးပေါင်းပါဝင်ရန် ရည်ရွယ်လျက်ရှိကြောင်းသိရပါသည်။

Source : VietnamPlus

DOCA(ရန်ကုန်)