ပြည်ပကုန်သွယ်မှုသတင်းများ

         မွန်ဂိုလီးယားခရီးသွားလုပ်ငန်းအဖွဲ့အစည်းက အောက်တိုဘာလ ၃၀ ရက်နေ့တွင် ထုတ်ပြန်ခဲ့သည့် တရားဝင်အချက်အလက်များအရ မွန်ဂိုလီးယားနိုင်ငံသည် ၂၀၂၅ ခုနှစ်အစောပိုင်းမှစ၍ နိုင်ငံခြားခရီးသွား စုစုပေါင်း ၇၅၁,၈၇၉ ဦးကို ဆွဲဆောင်နိုင်ခဲ့ကြောင်း သိရသည်။

         အဆိုပါကာလအတွင်း နိုင်ငံခြားခရီးသွားအများစုသည် တရုတ်၊ ရုရှားနှင့် တောင်ကိုရီးယား တို့မှဖြစ်ကြောင်း အချက်အလက်များအရ သိရှိရပါသည်။

          လက်ရှိတွင် မွန်ဂိုလီးယားနိုင်ငံ၏ စီးပွားရေးသည် သတ္တုတူးဖော်ရေးကဏ္ဍနှင့် သတ္တုအရင်းအမြစ်များ တင်ပို့မှုအပေါ် များစွာမှီခိုနေပါသည်။ ထို့ကြောင့် ကမ္ဘာလုံးဆိုင်ရာ ယှဉ်ပြိုင်မှုအခြေအနေတွင် နိုင်ငံ၏ စီးပွားရေးကို ကဏ္ဍစုံအောင်လုပ်ဆောင်ရန်နှင့် ခရီးသွားလုပ်ငန်း၏ ယှဉ်ပြိုင်နိုင်စွမ်းကို မြှင့်တင်ရန်အတွက် ရေရှည်တည်တံ့သော ခရီးသွားလုပ်ငန်း ဖွံ့ဖြိုးတိုးတက်ရေးသည် ဦးစားပေးလုပ်ငန်းတစ်ခုအဖြစ် သတ်မှတ်ထားကြောင်း သိရသည်။

          နိုင်ငံ၏ ယဉ်ကျေးမှု၊ အားကစား၊ ခရီးသွားလာရေးနှင့် လူငယ်ရေးရာဝန်ကြီးဌာန၏ အဆိုအရ မွန်ဂိုလီးယားအစိုးရသည် နိုင်ငံအတွင်း လေးရာသီခရီးသွားလုပ်ငန်း ဖွံ့ဖြိုးတိုးတက်စေရန်အတွက် “မွန်ဂိုလီးယားသို့ လည်ပတ်ရန်နှစ်များ” ခရီးသွားအစီအစဉ်ကို ၂၀၂၈ ခုနှစ်အထိ ဆက်လက်လုပ်ဆောင်ရန် ဆုံးဖြတ်ခဲ့ကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

             ဩစတေးလျနိုင်ငံဆိုင်ရာဗီယက်နမ်သံအမတ်ကြီး Pham Hung Tam သည် ဩစတေးလျနိုင်ငံ၏ အကြီးမားဆုံးဆန်ထုတ်လုပ်သူနှင့် ဖြန့်ဖြူးသူဖြစ်သည့် SunRice အုပ်စု၏ ဆက်သွယ်ရေး ဒါရိုက်တာ Anthony McFarlane နှင့် အောက်တိုဘာလ ၂၉ ရက်နေ့ကတွေ့ဆုံခဲ့ကြောင်း သိရပါသည်။ McFarlane က သံအမတ်ကြီးအား အုပ်စုသည် လွန်ခဲ့သည့်နှစ်များအတွင်း ဩစတေးလျ နိုင်ငံတကာစိုက်ပျိုးမွေးမြူရေးသုတေသနစင်တာ (ACIAR)နှင့် ပူးပေါင်း၍ ဗီယက်နမ်တွင် စိုက်ပျိုးမှုများသည့် ဆန်မျိုးကွဲများကို သုတေသနနှင့် ဖွံ့ဖြိုးတိုးတက်ရေးအတွက် ပူးပေါင်းဆောင်ရွက်ခဲ့ကြောင်း ပြောကြားခဲ့ပါသည်။ SunRice ၏ ACIAR နှင့် ပူးတွဲစီမံကိန်းက ဗီယက်နမ်နိုင်ငံမဲခေါင် ဒယ်တာဒေသရှိ အသေးစားစိုက်ပျိုးရေးသမားများအတွက် စဉ်ဆက်မပြတ်ဆန်တန်ဖိုးကွင်းဆက် တည်ဆောက်ရန်ဖြစ်ကြောင်း သိရပါသည်။ ထိုကနဦးဆောင်ရွက်မှုသည် မဲခေါင်ဒယ်တာဒေသတွင် အထွက်နှုန်းမြင့်မားရန်၊ စဉ်ဆက်မပြတ်ထွက်ရှိရန်နှင့် အရည်အသွေးမြင့်ဆန်တန်ဖိုး ကွင်းဆက်ရရှိရန်ရည်ရွယ်ပြီး ထိုမှတစ်ဆင့် ဒေသခံစိုက်ပျိုးရေးသမားများအကျိုးရှိပြီး SunRice ၏ ကမ္ဘာ့ဈေးကွက်စံနှုန်းများနှင့် ကိုက်ညီစေမည်ဖြစ်ကြောင်း သိရပါသည်။ McFarlane က စဉ်ဆက်မပြတ်ဆန်ထုတ်လုပ်ခြင်းနှင့် ထိရောက်သောတန်ဖိုးကွင်းဆက်စီမံခန့်ခွဲခြင်းသည် ဗီယက်နမ်တွင် အသေးစားဆန်စိုက်ပျိုးသူများအတွက် အလွန်အရေးပါကြောင်း မှတ်ချက်ပြုခဲ့ပါသည်။ Tam က SunRice ၏ ဗီယက်နမ်တွင် ထိရောက်စွာပူးပေါင်းဆောင်ရွက်မှုများကို အမွှမ်းတင်ပြောကြားခဲ့ပြီး အုပ်စုသည် နိုင်ငံတွင်စိုက်ပျိုးရေးသမားများကို ပံ့ပိုးပေးမည့် စီမံကိန်းများ ဆက်လက်အကောင် အထည်ဖော်ရန်မျှော်လင့်ကြောင်း ပြောကြားခဲ့ပါသည်။ တစ်ချိန်တည်းမှာပင် ဗီယက်နမ်သံအမတ်သည် ဩစတေးလျနိုင်ငံဆိုင်ရာ လာအိုသံအမတ်ကို မိတ်ဆက်ပေးခဲ့ပြီး နှစ်နိုင်ငံသည် ဟာလာ အသိအမှတ်ပြုကုန်ပစ္စည်းများ ထုတ်လုပ်ရာတွင် ပူးပေါင်းဆောင်ရွက်မှု အလားအလာများကို ရှာဖွေသွားမည်ဖြစ်ကြောင်း၊ လာအိုနှင့် SunRice ကြားမိတ်ဖက်ဖွဲ့မှုအရှိန်မြှင့်တင်မည်ဖြစ်ကြောင်းနှင့် နှစ်နိုင်ငံအကြား စိုက်ပျိုးမွေးမြူရေးတွင် ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့ပါသည်။

Vietnam Plus                                                                            

DOCA (ရန်ကုန်)

          ဗီယက်နမ်နိုင်ငံဒုတိယဝန်ကြီးချုပ် Nguyen Chi Dung သည် ဗီယက်နမ်-ဆော်ဒီအာရေဗီးယား ရင်းနှီးမြှုပ်နှံမှုစားပွဲဝိုင်း ဆွေးနွေးပွဲကို ၎င်း၏ဆော်ဒီအာရေဗီးယားသို့ အလုပ်သဘောခရီးစဉ်အတွင်း ရီယတ်မြို့တွင် အောက်တိုဘာလ ၂၇ ရက်နေ့ကကျင်းပပြုလုပ်ခဲ့ပါသည်။ ထိုအခမ်း အနားကို ဗီယက်နမ်နှင့် ဆော်ဒီအာရေဗီးယားမှ တာဝန်ရှိသူများ၊ ဗီယက်နမ်ကုမ္ပဏီဒါဇင်ပေါင်းများစွာမှ တာဝန်ရှိသူများနှင့် ဆော်ဒီလုပ်ငန်း ၃၀ နီးပါးမှ တာဝန်ရှိသူများတက်ရောက်ခဲ့ကြောင်း သိရပါသည်။ တက်ရောက်သူများသည် ပြည့်ဖြိုးမြဲစွမ်းအင်၊ ဘဏ္ဍာရေးနှင့် ဘဏ်စနစ်၊ အိမ်ရာမြေ၊ ကုန်သွယ်ရေး၊ ဝန်ဆောင်မှုများနှင့် နည်းပညာမြင့်စိုက်ပျိုးမွေးမြူရေးတို့ပါဝင်သည့် များစွာသောကဏ္ဍများမှဖြစ်ကြောင်း သိရပါသည်။ Dung က ဗီယက်နမ်သည် အားကောင်းသောဘက်ပေါင်းစုံ ပြန်လည်ဖွဲ့စည်းမှုကို ဆောင်ရွက်ခဲ့ပြီးဖြစ်ပြီး အရှေ့တောင်အာရှတွင် ဆွဲ‌ဆောင်မှုအားအကောင်း ဆုံးရင်းနှီးမြှုပ်နှံမှုဦးတည်ရာ တစ်ခုဖြစ်လာကြောင်း ပြောကြားခဲ့ပါသည်။ စီးပွားရေးနှင့်ပတ်သတ်၍ နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှုပူးပေါင်းဆောင်ရွက်ခြင်းသည် ၎င်းတို့၏ အားကောင်းသောနိုင်ငံရေးချိတ်ဆက်မှုနှင့်အတူ ဆော်ဒီရင်းနှီးမြှုပ်နှံသူများအတွက် အားကောင်းသောအလားအလာကိုပိုင်ဆိုင်ထားကြောင်း ပြောကြားခဲ့ပြီး နှစ်ဖက်စလုံးမှ စီးပွားရေးလုပ်ငန်းများအား အခွင့်အလမ်းသစ်များရှာဖွေရန်နှင့် မိတ်ဖက်ဖွဲ့မှုများတိုးချဲ့ရန် တိုက်တွန်းခဲ့ကြောင်း သိရပါသည်။ Dung ကဆော်ဒီအာရေဗီးယားအား ဗီယက်နမ်အတွက် အရှေ့တောင်အာရှသို့ဝင်ရောက်ရန် ဂိတ်ပေါက်တစ်ခုဖြစ်ပြီး ဗီယက်နမ်သည်လည်း ဆော်ဒီရင်းနှီးမြှုပ်နှံသူများ အာဆီယံဈေးကွက် သို့ဝင်ရောက်ရန် ပေါင်းကူးတံတားသဖွယ်ဆောင်ရွက်ပေးသွားမည်ဟု ပြောကြားခဲ့ပါသည်။ ပူးပေါင်းဆောင်ရွက်မှုနက်ရှိုင်းရန်အတွက် Dung က များစွာသောစီမံချက်များကို အဆိုပြုခဲ့ကြောင်း သိရပါသည်။ ပထမဆုံးအနေဖြင့် နှစ်ဖက်စလုံးသည် စီးပွားရေးချိတ်ဆက်မှုကို အရှိန်မြှင့်တင်ရန် အထူးသဖြင့် အဓိကစီးပွားရေးအချက်အချာများကိုချိတ်ဆက်ရန် တိုက်ရိုက်လေကြောင်းလိုင်းများတည် ထောင်ရန်ဖြစ်နိုင်ချေကိုလေ့လာရန်ဖြစ်ကြောင်း သိရပါသည်။ ဒုတိယ အချက်အနေဖြင့် ဗီယက်နမ်နှင့် ဆော်ဒီသည် အပြန်အလှန်ကုန်သွယ်မှုမြှင့်တင်ရန် အထူးသဖြင့် ဗီယက်နမ်၏စိုက်ပျိုးမွေးမြူရေးထုတ်ကုန်နှင့် ပင်လယ်စာတင်သွင်းမှုမြှင့်တင်ပေးရန်ဖြစ်ကြောင်း သိရပါသည်။ တတိယအချက်အနေဖြင့်နှစ်နိုင်ငံသည်ပြည်ဖြိုးမြဲစွမ်းအင်တွင် ပူးပေါင်းဆောင်ရွက် မှုမြှင့်တင်ရန်ဖြစ်ပြီး ဆော်ဒီလုပ်ငန်းများအား ဗီယက်နမ်ရှိ ဆိုလာ၊ လေ၊ အစိမ်းရောင်ဟိုက်ဒရိုဂျင်နှင့် စွမ်းအင်သိုလှောင်မှုစီမံကိန်းများတွင် ပါဝင်ရန်ဖြစ်ကြောင်း သိရပါသည်။ စတုတ္ထအချက်အနေဖြင့် Dung ကဆော်ဒီရင်းနှီးမြှုပ်နှံမှုလုပ်ငန်းများအား သိပ္ပံနှင့် နည်းပညာ၊ ဆန်းသစ်တီထွင်မှု၊ ဒစ်ဂျစ်တယ်စီးပွားရေး၊ စမတ်မြို့တော်များနှင့် ဘဏ္ဍာရေးစင်တာများနှင့် လွတ်လပ်သော ကုန်သွယ်ရေးဇုန်များပါဝင်သော စီးပွားရေးမော်ဒယ်သစ်များ အစရှိသည့် ၂ ဖက်စလုံးကအားသာချက်ရှိသည့် ကဏ္ဍများတွင် ရင်းနှီးမြှုပ်နှံမှုတိုးချဲ့ရန် တိုက်တွန်းခဲ့ကြောင်း သိရပါသည်။ ပဉ္စမ အချက်အနေဖြင့် ဗီယက်နမ်တွင် ရင်းနှီးမြှုပ်နှံမှုပြုလုပ်ပြီးဖြစ်သည့် ဆော်ဒီလုပ်ငန်းများအား ကျယ်ပြန့်သောစီးပွားရေးပူးပေါင်းဆောင်ရွက်မှုများအတွက် ပေါင်းကူးတံတားသဖွယ် ဆောင်ရွက်ရန်ဖြစ်ကြောင်း သိရပါသည်။ နှစ်နိုင်ငံအကြား စီးပွားရေးနှင့် ကုန်သွယ်ရေးချိတ်ဆက်မှုများမှာ လတ်တလောနှစ်များအတွင်း သိသာစွာတိုးတက်ခဲ့ကြောင်း သိရပါသည်။ ၂၀၂၄ ခုနှစ်တွင် နှစ်နိုင်ငံ အကြားအပြန်အလှန်ကုန်သွယ်မှုတန်ဖိုးမှာ အမေရိကန်ဒေါ်လာ ၃.၁ ဘီလီယံထိရောက်ရှိခဲ့ပြီး ၂၀၂၃ ခုနှစ်ကထက် ၁၄.၅ ရာခိုင်နှုန်းမြင့်တက်ခဲ့ကြောင်း သိရပါသည်။ ၂၀၂၄ ခုနှစ်တွင် နှစ်နိုင်ငံသည် စီးပွားရေးနှင့် ကုန်သွယ်ရေးပူးပေါင်းဆောင်ရွက်မှုအတွက် MoU လက်မှတ်ရေးထိုးခဲ့ကြောင်း သိရှိရပါသည်။

Vietnam Plus                                                                            

DOCA (ရန်ကုန်)

           လွန်ခဲ့သည့်နှစ်တွင် ဈေးနှုန်းသိသာစွာမြင့်တက်ခဲ့သော်လည်း ရောင်းလိုအားနည်းပါးမှုနှင့် မြင့်မားသည့်ထောက်ပံ့ပို့ဆောင်ရေးကုန်ကျစရိတ်များကြောင့် ဗီယက်နမ်၏ ငရုတ်ကောင်းကဏ္ဍသည် ၎င်းတို့၏ကမ္ဘာ့ထိပ်တန်းနေရာတွင် တည်ရှိမှုကို ဆက်လက်ထိန်းသိမ်းနိုင်ခဲ့ကြောင်း သိရပါသည်။ ၂၀၂၅ ခုနှစ်၏ ပထမ ၉ လတွင် ဗီယက်နမ်သည် အမေရိကန်ဒေါ်လာ ၁.၂၇ ဘီလီယံတန်ဖိုးရှိသောငရုတ်ကောင်းတန်ချိန် ၁၈၈၀၀၀ တန် တင်ပို့ခဲ့ပြီး ၂၀၂၄ ခုနှစ်တူညီသည့်ကာလနှင့်နှိုင်းယှဉ်ပါက ပမာဏတွင် ၆.၃ ရာခိုင်နှုန်း ကျဆင်းခဲ့သော်လည်း တန်ဖိုးတွင် ၂၈.၇ ရာခိုင်နှုန်းမြင့်တက်ခဲ့ကြောင်း ဗီယက်နမ်စက်မှုနှင့် ကုန်သွယ်ရေးဝန်ကြီးဌာန၏အဆိုအရ သိရပါသည်။ ပျမ်းမျှတင်ပို့သည့်ဈေးနှုန်းမှာ တစ်တန်လျှင် ၆၇၇၄ အမေရိကန်ဒေါ်လာရှိပြီး ၂၀၂၄ ခုနှစ်ကထက် ၃၇ ရာခိုင်နှုန်းမြင့်တက်ခဲ့ကြောင်း သိရပါသည်။ ဗီယက်နမ်ငရုတ်ကောင်းနှင့် ဟင်းခတ်အမွှေး အကြိုင်အသင်းက ဗီယက်နမ်၊ ဘရာဇီး၊ အိန္ဒိယနှင့် အင်ဒိုနီးရှားကဲ့သို့သောအဓိက ထုတ်လုပ်သူများသည် ပြင်းထန်သောရာသီဥတုကြောင့်အထွက်နှုန်း ၁၀ ရာခိုင်နှုန်းမှ ၂၀ ရာခိုင်နှုန်းထိလျှော့ကျခဲ့ခြင်းကြောင့် ကမ္ဘာလုံးဆိုင်ရာရောင်းလိုအားကို နည်းပါးစေခဲ့ခြင်းက ၂၀၂၅ ခုနှစ်၏ပထမ ၆ လတွင် ပျမ်းမျှဈေးနှုန်းများကို ၇၀ ရာခိုင်နှုန်းမြင့်တက်စေခဲ့ကြောင်း ပြောကြားခဲ့ပါသည်။ ပင်လယ်နီနှင့် ဆူးအတ်တူးမြောင်းတွင် မတည်ငြိမ်ခြင်းက ထောက်ပံ့ပို့ဆောင်ရေး ကုန်ကျစရိတ်များကို မြင့်တက်စေခဲ့ပြီး ကမ္ဘာလုံးဆိုင်ရာစားသုံးနှုန်းမှာ နှစ်စဉ် ၃ ရာခိုင်နှုန်းမှ ၄ ရာခိုင်နှုန်းကြီးထွား‌နေကြောင်း သိရပါသည်။ ၂၀၂၅ ခုနှစ်တွင် စုစုပေါင်းထုတ်လုပ်မှုမှာ အယ်နီနိုသက်ရောက်မှုကြောင့် တန်ချိန် ၁၈၀၀၀၀ ထိကျဆင်းရန်ခန့်မှန်းရကြောင်း သိရပါသည်။ ဈေးနှုန်းမြင့်တက်စေသည့် အခြားအချက်တစ်ခုမှာ တတိယနိုင်ငံမှတစ်ဆင့်တင်ပို့သည့် ကုန်ပစ္စည်းများအပေါ် အကောက်ခွန် ၄၀ ရာခိုင်နှုန်းကောက်ခံမည့် အမေရိကန်၏ ကုန်သွယ်ရေးမူဝါဒကြောင့်ဖြစ်ပြီး ဗီယက်နမ်ပို့ကုန်လုပ်ငန်းရှင်များမှာ ဘရာဇီးထံမှငရုတ်ကောင်းကုန်ကြမ်း တင်သွင်းမှုကိုလျှော့ချကာ ပြည်တွင်းစိုက်ပျိုးရေးသမားထံမှ ပိုမိုဝယ်ယူရလျက်ရှိကြောင်း သိရပါသည်။ ကျွမ်းကျင်သူများက လတ်တလောကာလဈေးနှုန်း မြင့်တက်ခြင်းသည် ဗီယက်နမ်ငရုတ်ကောင်းကဏ္ဍအား ပြုပြင်ထုတ်လုပ်မှုအဆင့်မြှင့်တင် ရန်၊ ပို့ကုန်ဈေးကွက်များကွဲပြားရန်နှင့် ရေရှည်ကြီးထွားရေးအတွက် အားကောင်းသော နိုင်ငံတော်အမှတ်တံဆိပ်တည်ဆောက်ရန် အခွင့်အလမ်းကို ပေးစွမ်းနိုင်ကြောင်း ပြောကြားခဲ့ကြောင်း သိရှိရပါသည်။

Vietnam Plus                                                                          

DOCA (ရန်ကုန်)

          ဘရာဇီးသမ္မတ Luiz Inacio Lala da Silva က ဘရာဇီးနှင့် အင်ဒိုနီးရှားကြား စီးပွားရေးချိတ်ဆက်မှုသည် လတ်တလောကုန်သွယ်ရေးပမာဏဖြစ်သည့် အမေရိကန်ဒေါ်လာ ၆ ဘီလီယံ ထိကြီးထွားနိုင်ရန် သိသာထင်ရှား‌သော အလားအလာရှိကြောင်း ‌အောက်တိုဘာလ ၂၃ ရက်နေ့ က ပြောကြားခဲ့ပါသည်။ Lula က ၎င်းသည် အင်ဒိုနီးရှားသမ္မတ Prabowo Subianto အား အဘယ်ကြောင့် လူဦးရေသန်း ၅၀၀ နီးပါးရှိသည့် ဘရာဇီးနှင့် အင်ဒိုနီးရှားကဲ့သို့သော နိုင်ငံကြီး ၂ ခု၏ ကုန်သွယ်မှုတန်ဖိုးမှာ အမေရိကန်ဒေါ်လာ ၆ ဘီလီယံသာလျှင်ရှိသနည်းဟုမေးမြန်းခဲ့ကြောင်းနှင့် ထိုကိန်းဂဏန်းပမာဏသည် နှစ်နိုင်ငံစလုံးအတွက်အလွန်သေးငယ်ကြောင်း ပြောကြားခဲ့ပါသည်။ ၂၀၂၄ ခုနှစ်တွင် အင်ဒိုနီးရှားသည် ဘရာဇီးစိုက်ပျိုးမွေးမြူရေးထုတ်ကုန်တင်ပို့မှု၏ ၅ ခုမြောက် အကြီးမားဆုံးဈေးကွက်ဖြစ်ကြောင်း သိရပါသည်။  Lula က ဇူလိုင်လတွင် Prabowo ၏ ဘရာဇီး နိုင်ငံသို့အလည်အပတ်ခရီးအတွင်း ဘရာဇီးပို့ကုန်များ အင်ဒိုနီးရှားသို့ ဈေးကွက်လမ်းကြောင်း တိုးတက်ခြင်းပါဝင်သော ပူးပေါင်းဆောင်ရွက်မှုများတိုးချဲ့ခဲ့ကြောင်းနှင့် စိုက်ပျိုးမွေးမြူရေးကို ကျော်လွန်၍ တန်ဖိုးမြှင့်ကုန်ပစ္စည်းများတွင် ကုန်သွယ်မှုအခွင့်အလမ်းများရှိနေကြောင်း ပြောကြားခဲ့ပါသည်။ စွမ်းအင်ကဏ္ဍတွင် နှစ်နိုင်ငံသည် သန့်စင်သောစွမ်းအင်အသွင်ကူးပြောင်းမှု အတွက်အရေးပါသော အရေးကြီးသတ္တုများစီမံခန့်ခွဲခြင်းတွင် ပူးပေါင်းဆောင်ရွက်ရန် ဆွေးနွေးခဲ့ကြကြောင်း သိရပါသည်။ သတ္တုတူးဖော်ရာတွင်ပူးပေါင်းဆောင်ရွက်ခြင်းသည် စွမ်းအင်ဝန်ကြီးဌာန ၂ ခုအကြား လတ်တလောလက်မှတ်ရေးထိုးခဲ့သည့် MoU မှတစ်ဆင့် အားကောင်းနိုင်ကြောင်း သိရပါသည်။ နှစ်နိုင်ငံခေါင်းဆောင်များသည် Preferential Trade Agreement (PTA) ညှိနှိုင်း ဆွေးနွေးမှုများကို ဘရာဇီးသမ္မတ ဒီဇင်ဘာလတွင်သက်တမ်း မကုန်မီအပြီးသတ်နိုင်ရန်အတွက် အရှိန်မြှင့်ဆောင်ရွက်နေကြောင်း သိရပါသည်။ Lula ၏ အောက်တိုဘာလ ၂၂ မှ ၂၄ ရက်နေ့အထိ အလည်အပတ်ခရီးစဉ်သည် ၎င်း၏ အရှေ့တောင်အာရှခရီးစဉ်၏ တစ်စိတ်တစ်ပိုင်းဖြစ်ပြီး ၂၀၀၈ ခုနှစ်မှစ၍ အင်ဒိုနီးရှားသို့ ၎င်း၏ ဒုတိယအကြိမ်မြောက်အလည်အပတ်ခရီးစဉ်ဖြစ်ကြောင်း သိရှိရ ပါသည်။

Antara News                                                                             

DOCA (ရန်ကုန်)