အိန္ဒိယနိုင်ငံ၏ ထိပ်တန်းကုန်စည်စတော့အိတ်ချိန်းဖြစ်သည့်် NCDEX သည် အိန္ဒိယနိုင်ငံ ဝါဂွမ်းအသင်း(CAI) နှင့် ငါးနှစ်သက်တမ်းရှိ မဟာဗျူဟာမြောက် ပူးပေါင်းဆောင်ရွက်ရေး သဘော တူညီချက်တစ်ရပ်ကို လက်မှတ်ရေးထိုးခဲ့သည်။ အဆိုပါပူးပေါင်းဆောင်ရွက်မှု၏ ရည်ရွယ်ချက်မှာ ဝါဂွမ်းကြိုပွိုင့် အရောင်းအဝယ်တွင် ပါဝင်မှုကို ပိုမိုမြှင့်တင်နိုင်ရန်၊ ဝါကဏ္ဍအတွက် ဈေးနှုန်း ရှာဖွေ သတ်မှတ်မှု ပိုမိုပွင့်လင်းမြင်သာစေရန်နှင့် ဈေးနှုန်းအန္တရာယ်စီမံခန့်ခွဲမှု ပိုမိုကောင်းမွန်စေရန်တို့ အတွက် ဆောင်ရွက် ခြင်းဖြစ်သည်။

   အိန္ဒိယနိုင်ငံသည် ကမ္ဘာ့ဝါထုတ်လုပ်မှုတွင် ၂၀-၂၃ ရာခိုင်နှုန်းခန့်နှင့် ကမ္ဘာ့ဝါစိုက်ပျိုးဧရိယာ တွင် ၃၈ ရာခိုင်နှုန်းခန့်ပါဝင်နေသော်လည်း ကမ္ဘာ့ဝါဈေးကွက်သတ်မှတ်ဖော်ဆောင်မှုတွင် အခန်း ကဏ္ဍနည်းပါးနေသည့်အခြေအနေဖြစ်ပေါ်နေခြင်းကြောင့် အဆိုပါသဘောတူညီချက်ကို လက်မှတ် ရေးထိုးခဲ့ခြင်းဖြစ်သည်။

    တရားဝင်ထုတ်ပြန်ချက်အရ အဆိုပါသဘောတူညီချက်ကို NCDEX မှ မန်နေဂျင်းဒါရိုက်တာ နှင့် CEO ဖြစ်သူ Vika Goel နှင့် ဝါဂွမ်းအသင်းဥက္ကဋ္ဌ Vinay Kotak တို့က မွန်ဘိုင်းမြို့တွင် လက်မှတ် ရေးထိုးခဲ့ပြီး အဆိုပါအခမ်းအနားသို့ အိန္ဒိယနိုင်ငံဝါဂွမ်းလုပ်ငန်းကော်ပိုရေးရှင်း (CCI) ၏  ဥက္ကဋ္ဌနှင့် စီမံခန့်ခွဲမှုဒါရိုက်တာဖြစ်သည့် Lalit Kumar Gupta လည်း တက်ရောက်ခဲ့ကြောင်း သိရသည်။

    အဆိုပါပူးပေါင်းဆောင်ရွက်မှုသည် လက်ရှိတွင် ဝါကုန်ကြမ်း၊ ဝါစေ့ဖတ်နှင့် သန့်စင်ပြီး ဝါစေ့ ဆီတို့အတွက် စာချုပ်များပါဝင်သည့် NCDEX ၏ ဝါကုန်စည်ကြိုပွိုင့် ဈေးကွက်ပလက်ဖောင်းကို ပိုမိုခိုင်မာစေရန် ရည်ရွယ်သည်။ ထို့အပြင် လယ်သမားများ၊ ဝါကြိတ်စက်လုပ်ငန်းရှင်များ၊ ချည်မျှင် ထုတ်လုပ်သူများ၊ တင်ပို့သူများနှင့် ကုန်သည်များအတွက် ကြိုပွိုင့်‌ရောင်းဝယ်ခြင်းကို ပွင့်လင်း မြင်သာသည့် ဈေးနှုန်းစီမံခန့်ခွဲရေးတစ်ရပ်အဖြစ် အသုံးပြုနိုင်ရန်လည်း မြှင့်တင်သွားမည်ဖြစ်သည်။

    ဝါသီးနှံသည် အိန္ဒိယ၏ စိုက်ပျိုးစီးပွားရေးအတွက် အလွန်အရေးပါသော်လည်း ကြိုပွိုင့် ဈေးကွက်သည် အိန္ဒိယနိုင်ငံ၏ ဝါထုတ်လုပ်မှုပမာဏနှင့် ကိုက်ညီအောင် အပြည့်အဝ ဖော်ပြနိုင် ခြင်း မရှိသေးကြောင်း သိရသည်။ ယခုပူးပေါင်းဆောင်ရွက်မှုသည် ယုံကြည်စိတ်ချရသော အခြေခံ ဈေးနှုန်း တစ်ရပ်ဖော်ဆောင်ရန်နှင့် ဝါထုတ်လုပ်မှုမှစတင်၍ နောက်ဆုံးဈေးကွက်အထိ ပါဝင်သည့် တန်ဖိုးကွင်းဆက်တစ်လျှောက် ဈေးနှုန်းအန္တရာယ်စီမံခန့်ခွဲမှု ပိုမိုကောင်းမွန်လာစေရန် ရည်ရွယ် သည့် အရေးကြီးသော ခြေလှမ်းတစ်ရပ်ဖြစ်ကြောင်း NCDEX ၏ မန်နေဂျင်းဒါရိုက်တာနှင့် CEO ဖြစ်သူ Vika Goel က ပြောကြားခဲ့သည်။

   ဤအစီအစဉ်သည် ထုတ်ကုန်ဒီဇိုင်းများကို ပိုမိုကောင်းမွန်အောင် ပြုလုပ်ခြင်းနှင့် အသိပညာ ပေးမှုများ တိုးမြှင့်ခြင်းမှတစ်ဆင့် အိန္ဒိယနိုင်ငံ၏ ဝါကုန်သွယ်မှုကဏ္ဍတွင် လက်ရှိအားနည်းနေသည့် ဈေးနှုန်းအန္တရာယ်ကို ကြိုတင်ကာကွယ်စီမံသည့် အလေ့အထကို ဖြေရှင်းပေးနိုင်လိမ့်မည်ဖြစ် ကြောင်း  ဝါဂွမ်းအသင်းဥက္ကဋ္ဌ Vinay Kotak ကလည်း ပြောကြားခဲ့သည်။

    အဆိုပါပူးပေါင်းဆောင်ရွက်မှုအောက်တွင် အသိပညာပေးခြင်းနှင့် ကြိုပွိုင့်ဈေးကွက်အသုံး ပြုမှု တိုးမြှင့်ရေးအစီအစဉ်များအတွက် ဝါအဓိကထုတ်လုပ်သည့် ဒေသများဖြစ်သည့် မဟာရဋ္ဌ၊ ဂူဂျာရတ်၊ ပန်ဂျပ်၊ အဒ္ဒရာပရာဒေ့ရှ်နှင့် တယ်လန်ဂါနာပြည်နယ်များကို အဓိကထားဆောင်ရွက် သွားမည်ဖြစ်ကြောင်း သိရသည်။

Source: Business Standard, September 02, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    အိန္ဒိယနိုင်ငံရှိ ဆီစက်များသည် ပွဲတော်ရာသီမတိုင်မီ ဆီလက်ကျန်များ ကြိုတင်စုဆောင်း ထားရန်အတွက် ဩဂုတ်လတွင် ပဲပုပ်ဆီကို စံချိန်တင်ပမာဏအထိ တင်သွင်းခဲ့ပြီး စားအုန်းဆီ တင်သွင်းမှုမှာလည်း ၆ လအတွင်း အမြင့်ဆုံးပမာဏသို့ ရောက်ရှိခဲ့ကြောင်းသိရသည်။

    ကမ္ဘာ့အကြီးဆုံး စားသုံးဆီတင်သွင်းသူဖြစ်သည့် အိန္ဒိယနိုင်ငံက စားအုန်းဆီနှင့် ပဲပုပ်ဆီ ဝယ်ယူမှုများ မြင့်တက်လာခြင်းသည် အင်ဒိုနီးရှား၊ မလေးရှားနှင့် အာဂျင်တီးနားတို့တွင် ဆီလက်ကျန် များ လျော့ကျစေရန် အထောက်အကူပြုနိုင်ပြီး စားအုန်းဆီနှင့် ပဲပုပ်ဆီ၏ အနာဂါတ်ဈေးကွက် အတွက် အထောက်အပံ့ဖြစ်စေနိုင်သည်။

    အိန္ဒိယ၏ စားအုန်းဆီတင်သွင်းမှုသည် ယခင်လထက် ၇% မြင့်တက်ပြီး ဩဂုတ်လတွင် မက်ထရစ်တန်ချိန် ၇၈၀,၀၀၀ ရှိခဲ့သည်ဟု ပျမ်းမျှခန့်မှန်းချက်များအရ သိရသည်။ ပဲပုပ်ဆီ တင်သွင်း မှုသည် ယခင်လထက် ၂၁% မြင့်တက်ကာ စံချိန်တင် မက်ထရစ်တန်ချိန် ၆၀၁,၀၀၀ ရှိခဲ့သည်။ တစ်ချိန်တည်းတွင် နေကြာဆီတင်သွင်းမှုသည် ၃၈% ကျဆင်းပြီး ၆ လအတွင်း အနိမ့်ဆုံး ဖြစ်သည့် တန်ချိန် ၁၅၇,၀၀၀ သို့ ရောက်ရှိခဲ့သည်။ စားသုံးဆီ တင်သွင်းမှုစုစုပေါင်းမှာ ၄% မြင့်တက်ပြီး ၁၁ လ အတွင်း အမြင့်ဆုံးဖြစ်သည့် မက်ထရစ်တန်ချိန် ၁.၅၄ သန်း ရှိခဲ့ရာ အဆိုပါ မြင့်တက်မှုမှာ စားအုန်း ဆီနှင့် ပဲပုပ်ဆီ တင်သွင်းမှုမြင့်တက်လာခြင်းကြောင့်ဖြစ်သည်။ ဩဂုတ်လအတွင်း နီပေါနိုင်ငံမှ စားသုံးဆီတန်ချိန် ၁၀၀,၀၀၀ ခန့် တင်သွင်းခဲ့ပြီး ယင်းအနက် ပဲပုပ်ဆီတန်ချိန် ၉၀,၀၀၀ ပါဝင်သည်။

    အိန္ဒိယနိုင်ငံ၏ Solvent Extractors' Association သည် ဩဂုတ်လအတွက် ဆီတင်သွင်း မှုဆိုင်ရာ အချက်အလက်များကို စက်တင်ဘာလလယ်ခန့်တွင် ထုတ်ပြန်မည်ဖြစ်သည်။ အိန္ဒိယ နိုင်ငံတွင် ဩဂုတ်လမှ နိုဝင်ဘာလအတွင်း ပွဲတော်များ ဆက်တိုက်ကျင်းပလေ့ရှိပြီး ထိုကာလ အတွင်း စားသုံးဆီဝယ်လိုအားသည် ပုံမှန်အားဖြင့် အမြင့်ဆုံးသို့ ရောက်ရှိတတ်ပြီး Rajkot မြို့၊ Gujarat ပြည်နယ်ရှိ GGN Research ကုမ္ပဏီ၏ ပြောကြားချက်အရ ဆီစက်များသည် ပွဲတော်ရာသီ၏ ဝယ်လိုအားကို ဖြည့်ဆည်းရန်အတွက် နောက်ကာလထက် ယခုလက်ရှိကာလအတွင်းက ဈေးနှုန်း ပိုမို သက်သာသောကြောင့် ဝယ်ယူမှုများ တိုးမြှင့်ခဲ့ကြသည်။

     Mumbai အခြေစိုက် စားသုံးဆီအကျိုးဆောင်ကုမ္ပဏီ Sunvin Group ၏ CEO က ပဲပုပ်ဆီ တင်သွင်းမှု မြင့်တက်လာခြင်းမှာ ပဲပုပ်မျိုးစေ့၏ ဈေးနှုန်းသည် ဆီအုန်းထက် ပိုမိုယှဉ်ပြိုင်နိုင်သော ကြောင့် ဖြစ်ကြောင်းပြောကြားသည်။ ထို့အပြင် Black Sea ဒေသမှ နေကြာဆီတင်ပို့မှုများမှာ ရုရှား–ယူကရိန်းစစ်ပွဲ ပြင်းထန်လာမှုကြောင့် အနှောင့်အယှက်များဖြစ်ပေါ်ခဲ့သည်။ အိန္ဒိယနိုင်ငံ သည် စားအုန်းဆီအများစုကို အင်ဒိုနီးရှားနှင့် မလေးရှားနိုင်ငံတို့မှ တင်သွင်းပြီး ပဲပုပ်ဆီနှင့် နေကြာ ဆီတို့ကို အာဂျင်တီးနား၊ ဘရာဇီး၊ ရုရှားနှင့် ယူကရိန်းနိုင်ငံတို့မှ အဓိကတင်သွင်းခြင်း ဖြစ်သည်။ အိန္ဒိယ၏ ပဲပုပ်ဆီနှင့် စားအုန်းဆီ တင်သွင်းမှုများသည် စက်တင်ဘာလအတွင်းတွင်လည်း မြင့်တက် နေမည်ဟု ခန့်မှန်းထားကြောင်း သိရသည်။

Source : The Economic Time News, Sept 3, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    အင်ဒိုနီးရှား စာရင်းအင်းဗျူရို (BPS) ၏ စာရင်းများအရ ၂၀၂၆ ခုနှစ် ဩဂုတ်လအတွင်း အလတ်စားဆန်နှင့် အဆင့်မြင့်ဆန် (Medium and Premium Rice) နှစ်မျိုးလုံး၏ ဈေးနှုန်းများ တစ်ပြိုင်နက်တည်း မြင့်တက်ခဲ့ကြောင်း သိရသည်။

  ၂၀၂၆ ခုနှစ် စက်တင်ဘာလ ၁ ရက် (အင်္ဂါနေ့) က ဂျာကာတာမြို့၌ ပြုလုပ်ခဲ့သည့် သတင်း စာရှင်းလင်းပွဲတွင် BPS ၏ စာရင်းအင်း ဖြန့်ဖြူးရေးနှင့် ဝန်ဆောင်မှုဆိုင်ရာ ဒုတိယညွှန်ကြားရေးမှူး Ateng Hartono က ဆန်စက်အဆင့်၊ လက်ကားအဆင့်နှင့် လက်လီအဆင့်များအားလုံးတွင် ပျမ်းမျှ ဆန်ဈေးနှုန်းများ မြင့်တက်ခဲ့ကြောင်း Antara သတင်းဌာန၏ ဖော်ပြချက်အရ ပြောကြားခဲ့သည်။ ဆန်စက်အဆင့်တွင် ပျမ်းမျှ ဈေးနှုန်းများသည် ပြီးခဲ့သည့် လထက် ၁.၃၂ ရာခိုင်နှုန်းနှင့် ယခင်နှစ် ကာလတူထက် ၅.၅၂ ရာခိုင်နှုန်း  မြင့်တက်ခဲ့သည်။

    ဆန်စက်အဆင့်တွင် အရည်အသွေးအလိုက် ခွဲခြားကြည့်ပါက အဆင့်မြင့်ဆန် (Premium Rice) ဈေးနှုန်းများသည် ပြီးခဲ့သည့်လထက် ၁.၂၂ ရာခိုင်နှုန်းနှင့် ယခင်နှစ် ကာလတူထက် ၁၀.၀၇ ရာခိုင်နှုန်း မြင့်တက်ခဲ့သည်။ ထို့အတူ အလတ်စားဆန် (Medium Rice) ဈေးနှုန်းများသည်လည်း ပြီးခဲ့သည့်လထက် ၁.၄၈ ရာခိုင်နှုန်းနှင့် ယခင်နှစ် ကာလတူထက် ၄.၀၃ ရာခိုင်နှုန်း မြင့်တက်ခဲ့ သည်။ နှစ်အလိုက် နှိုင်းယှဉ်ချက်အရ အဆင့်မြင့်ဆန်၏ ဈေးနှုန်းမြင့်တက်မှုသည် အလယ်အလတ် ဆန်ထက် ပိုမိုမြင့်မားသည် ဟု Ateng က မှတ်ချက်ပြုခဲ့သည်။

    အလယ်အလတ်နှင့် အဆင့်မြင့်ဆန် အမျိုးအစားနှစ်ခုလုံး၏ ဈေးနှုန်းမြင့်တက်မှုသည် ၂၀၂၆ ခုနှစ်၊ ဖေဖော်ဝါရီလကတည်းက မြင့်တက်နေခဲ့ခြင်း ဖြစ်သည်။ ၂၀၂၆ ခုနှစ် ဩဂုတ်လ အတွင်း လက်ကားနှင့် လက်လီအဆင့် ဈေးနှုန်းအလားအလာများနှင့် ပတ်သက်၍ လက်ကားကုန်ဈေးနှုန်း မြင့်တက်မှု (Wholesale Inflation) မှာ ယခင်လထက် ၀.၈၀ ရာခိုင်နှုန်းနှင့် ယခင်နှစ်ကာလတူ ထက် ၄.၂၈ ရာခိုင်နှုန်းရှိခဲ့သည်။ တစ်ချိန်တည်းမှာပင် လက်လီဆန်ဈေးနှုန်းမြင့်တက်မှု (Retail Rice Inflation) သည် ယခင်လထက် ၀.၄၂ ရာခိုင်နှုန်းနှင့် ယခင်နှစ်ကာလတူထက် ၂.၇၇ ရာခိုင်နှုန်း မြင့်တက်ခဲ့ခြင်းဖြစ်သည်။

    ဆန်ဈေးနှုန်းများသည် အင်ဒိုနီးရှားတစ်နိုင်ငံလုံးရှိ အရည်အသွေးပေါင်းစုံ၏ ပျမ်းမျှဈေးနှုန်း များ ဖြစ်ကြောင်း Ateng က ပြောကြားခဲ့သည်။ တစ်ချိန်တည်းမှာပင် ၂၀၂၆ ခုနှစ် ဩဂုတ်လ၌ တောင်သူလယ်သမားများ၏ ကုန်သွယ်မှုအခြေအနေပြအညွှန်းကိန်း (Farmers' Terms of Trade - NTP) သည် ၁၂၉.၁၉ သို့ ရောက်ရှိခဲ့ပြီး ၂၀၂၆ ခုနှစ် ဇူလိုင်လထက် ၁.၀၅ ရာခိုင်နှုန်း မြင့်တက်လာခဲ့သည်။ အဆိုပါ အညွှန်းကိန်း မြင့်တက် လာမှုမှာ တောင်သူများ ဝယ်ယူသုံးစွဲရသည့် စရိတ်အညွှန်းကိန်း ၀.၀၉ ရာခိုင်နှုန်း တိုးတက်၍ ၁၂၈.၂၄ ရှိလာမှုထက် တောင်သူများ ရရှိသည့် ရောင်းဈေးအညွှန်းကိန်း ၁.၁၄ ရာခိုင်နှုန်း ပိုမိုမြင့်တက်ကာ ၁၆၅.၆၆ သို့ ရောက်ရှိလာခြင်းကြောင့် ဖြစ်သည်။

    တောင်သူများ၏ ရောင်းဈေး အညွှန်းကိန်းကို စပါး၊ ဆီအုန်း၊ ရာဘာနှင့် အသားတိုးကြက် တို့က မြင့်တက်စေခဲ့ပြီး၊ ဝယ်ယူစရိတ် အညွှန်းကိန်းကိုမူ ကြက်သား၊ ဆန်၊ ပဲတောင့်ရှည်နှင့် ပဲတီစိမ်း တို့က အဓိက ရိုက်ခတ်မှု ရှိခဲ့ကြောင်း သိရသည်။

Source: TEMPO (PT Tempo Inti Media Tbk), Sept 1, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      အင်ဒိုနီးရှားနိုင်ငံ၌ စားအုန်းဆီ အချိုးအစား ၆၀ % ပါဝင်သည့် ဇီဝဒီဇယ်ဆီ (B60)  မူဝါဒ ကို ၂၀၂၇ ခုနှစ်တွင် စတင်ကျင့်သုံးရန် အစီအစဉ်ချမှတ်ထားရှိမှုနှင့်စပ်လျဉ်း၍ စွမ်းအင်နှင့် သယံဇာတ အရင်းအမြစ်ဆိုင်ရာ ဝန်ကြီးဌာနက စားအုန်းဆီကြမ်းထောက်ပံ့ပေးနိုင်မှုနှင့် ဇီဝဒီဇယ်ဆီထုတ်လုပ် နိုင်စွမ်းအားတို့ကို ဆန်းစစ်လေ့လာလျက်ရှိကြောင်း Antara Indonesia News Agency က စက်တင် ဘာလ ၂ ရက်‌နေ့တွင် ဖော်ပြထားရှိပါသည်။

       အင်ဒိုနီးရှားအစိုးရအနေဖြင့် စားအုန်းဆီကြမ်း (CPO) ထောက်ပံ့မှုကို စုစည်းပေါင်းစပ် ဆောင်ရွက်ရန်လိုအပ်ပြီး၊ ထိုသို့ဆောင်ရွက်ရာတွင် စားအုန်းဆီစိုက်ခင်းဧရိယာ တိုးချဲ့စိုက်ပျိုးခြင်း သို့မဟုတ် ထုတ်လုပ်မှုစွမ်းအား မြှင့်တင်ခြင်းဆိုင်ရာ အစီအမံများ လိုအပ်ခြင်းရှိ/မရှိ ဆန်းစစ်လေ့လာ ခြင်းတို့ ပါဝင်ကြောင်း Mr. Tanjung က ပြောကြားခဲ့သည်။

      ထို့ပြင် ဇီဝဒီဇယ်ဆီ (biodiesel) အရောအနှောများတွင် အဓိကပါဝင်သည့် ဇီဝလောင်စာ အစိတ်အပိုင်းတစ်ခုဖြစ်သော မီသိုင်းလ် အက်စတာ အဆီအက်စစ် (Fatty Acid Methyl Ester- FAME) လုပ်ငန်းကဏ္ဍကိုလည်း အင်ဒိုနီးရှားနိုင်ငံအနေဖြင့်တိုးချဲ့လုပ်ဆောင်ရန်လိုအပ်နေသည်။

       FAME လုပ်ငန်းကဏ္ဍကို တိုးချဲ့လုပ်ဆောင်ခြင်းအားဖြင့် B60 ဇီဝဒီဇယ်ဆီကို အစိုးရ အထောက်အပံ့ပြုထားသည့် လုပ်ငန်းများ (PSO) နှင့် အစိုးအရ အထောက်အပံ့မပြုသော လုပ်ငန်း ကဏ္ဍများတွင် အကောင်အထည်ဖော်ရာ၌ အထောက်အကူဖြစ်စေမည်ဖြစ်ကြောင်း Mr. Tanjung က ဆိုသည်။

      ဝန်ကြီးဌာန၏ စွမ်းအင်သစ်၊ ပြန်လည်ပြည့်ဖြိုးမြဲစွမ်းအင်နှင့် စွမ်းအင်ချွေတာရေးဆိုင်ရာ ဌာနမှ ညွှန်ကြားရေးမှူးချုပ် Ms. Eniya Listiani Dewi က B60 အတွက် သတ်မှတ်မည့် FAME စံချိန်စံညွှန်းများနှင့်ပတ်သက်၍လည်း ထပ်မံဆန်းစစ်လေ့လာရန် လိုအပ်နေသေးကြောင်း ပြောကြား ခဲ့သည်။

       အင်ဒိုနီးရှားနိုင်ငံသည် ၂၀၂၆ ခုနှစ်၊ ဇူလိုင်လမှစ၍ အကောင်အထည်ဖော်ဆောင်ရွက်ခဲ့သော စားအုန်းဆီအချိုးအစား ၅၀  % ပါဝင်သည့် ဇီဝဒီဇယ်ဆီ (B50) ထုတ်လုပ်ခြင်းအတွက် နောက်ဆုံး ပေါ် FAME အမျိုးအစားကို အသုံးပြုခဲ့ပြီး၊ လက်ရှိတွင် B60 အရောအနှော၌ Hydrotreated Vegetable Oil (HVO) ဆီ ၁၀ ရာခိုင်နှုန်း ထပ်မံထည့်သွင်းသင့်၊ မသင့်ကို တာဝန်ရှိသူများက သုံးသပ် လျက်ရှိကြောင်း သိရှိရပါသည်။

      HVO ၏ ကုန်ကျစရိတ်သည် FAME ထက် ၁.၅ ဆမှ ၂ ဆခန့်ထိ ပိုမိုများပြားသဖြင့် အဆိုပြု ထားသော ဤအရောအနှော (blend) နှင့်ပတ်သက်သည့် စမ်းသပ်မှုများကို ကနဦးအဆင့် လုပ်ငန်းစဉ် တစ်ခုအဖြစ်သာ ဆောင်ရွက်နေရသည်ဟု Ms. Dewi က ပြောကြားခဲ့သည်။

       Dewi က BPDPKS ဟု လူသိများသော အင်ဒိုနီးရှားနိုင်ငံ၊ ဆီအုန်းစိုက်ခင်းကဏ္ဍ ရန်ပုံငွေ စီမံခန့်ခွဲရေးအင်ဂျင်စီအား B60 အတွက်လိုအပ်မည့် FAME ပမာဏနှင့် စံသတ်မှတ်ချက်များကို လေ့လာ ဆန်းစစ်ပေးရန် တောင်းဆိုထားပြီး ၂၀၂၆ ခုနှစ် ဒီဇင်ဘာလတွင် ရလဒ်များရရှိနိုင်ရန် ရည်မှန်းထားသည်။

        အင်ဒိုနီးရှားနိုင်ငံသည် ဤနယ်ပယ်တွင်ရှေ့ဆောင်နိုင်ငံတစ်ခုဖြစ်သည့်အတွက်နည်းပညာ ဖွံ့ဖြိုးတိုးတက်ရေးတွင် ပါဝင်ဆောင်ရွက်နေသော သုတေသီများအနေဖြင့် သင့်လျော်သော B60 အရောအနှောအချိုးအစားကို သတ်မှတ်ဆုံးဖြတ်ပေးရန် လိုအပ်သည်ဟု Dewi က ဆိုသည်။

       အင်ဒိုနီးရှားအစိုးရအနေဖြင့် B60 အရောအနှော အချိုးအစားကို တိကျစွာ ထုတ်ပြန်ကြေညာ ထားခြင်း မရှိသေးသဖြင့် ၂၀၂၇ ခုနှစ်တွင် စတင်အကောင်အထည်ဖော်ရန် စီစဉ်ထားသည့် မတိုင်မီ ကာလအတွင်း လက်ရှိဆောင်ရွက်နေသော နည်းပညာဆိုင်ရာလေ့လာမှုသည် အရေးပါလျက်ရှိသည် ကို ဖော်ပြထားကြောင်း သိရှိရသည်။

Source: Antara Indonesia News Agency, Sept 2, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

       ကမ္ဘောဒီးယားနိုင်ငံ၏ ငှက်ပျောစိုက်ပျိုးရေးလုပ်ငန်းသည် ခေတ်မီတင်ပို့ရေးစနစ်အဖြစ် ပြောင်းလဲလျက်ရှိပြီး ကုန်သွယ်မှုအရှိန်အဟုန်သည် ထိုင်းနယ်စပ်အနီးတွင် တည်ရှိသော ကမ္ဘော ဒီးယားနိုင်ငံ၊ Oddar Meanchey ပြည်နယ်ရှိ ကျေးလက်ဒေသခံများ၏ အသက်မွေးဝမ်းကျောင်းမှု ကို တိုက်ရိုက်အကျိုးပြုလျက်ရှိသည်။

       Anlong Veng ခရိုင်ရှိ Longfruiter Anlong Veng Oddar Meanchey Agriculture Park ကုမ္ပဏီလီမိတက်မှ စီမံခန့်ခွဲသည့် ဟက်တာ ၅၃၀ ကျယ်ဝန်းသော စိုက်ခင်းတွင် ဒေသခံ ၈၀၀ ကျော် သည် Cavendish ငှက်ပျောသီးများ ဆေးကြောခြင်း၊ ထုပ်ပိုးခြင်းနှင့် စိုက်ပျိုးခြင်းလုပ်ငန်းများတွင် တစ်နှစ်ပတ်လုံး တည်ငြိမ်သော အလုပ်အကိုင်များ ရရှိကြကြောင်း၊ အလုပ်သမားများအတွက် ပုံမှန်လုပ်ခလစာသည် ငွေကြေးလုံခြုံမှု၊ မြေယာပိုင်ဆိုင်မှုနှင့် မိသားစုထောက်ပံ့မှု စိတ်ချရမှုတို့ကို အထောက်အကူပြုလျက်ရှိကြောင်း သိရှိရသည်။

       ထုတ်လုပ်မှုအချက်အလက်များသည် အဆိုပါကဏ္ဍ၏ လျင်မြန်သော တိုးချဲ့မှုကို ထင်ဟပ် စေကြောင်း၊ အဆိုပါစက်ရုံမှ တရုတ်နိုင်ငံသို့ ငှက်ပျောသီးတင်ပို့မှုကို ၂၀၂၄ ခုနှစ်တွင် တန်ချိန် ၂၄,၀၀၀ မှ ၂၀၂၅ ခုနှစ်တွင် တန်ချိန် ၃၄,၀၀၀ ကျော်သို့ မြှင့်တင်နိုင်ခဲ့ပြီး ၂၀၂၆ ခုနှစ် ပထမနှစ်ဝက် အတွင်း ခန့်မှန်းခြေတန်ချိန် ၂၂,၀၀၀ ခန့် တင်ပို့နိုင်ခြင်းဖြင့် တင်ပို့မှုအရှိန်အဟုန်ကို ဆက်လက် ထိန်းသိမ်းထားသည်။

      တရုတ်နိုင်ငံက ၂၀၁၉ ခုနှစ်တွင် တိုက်ရိုက်တင်သွင်းခွင့်ပြုပြီးနောက် ဈေးကွက်သည် သိသိ သာသာချဲ့ထွင်လာခဲ့ကြောင်း၊ ကမ္ဘောဒီးယားနည်းပညာနှင့်သိပ္ပံတက္ကသိုလ်မှ တရုတ်-အာဆီယံ လေ့လာရေးစင်တာ၏ ဒုတိယညွှန်ကြားရေးမှူး Thong Mengdavid၏ အဆိုအရ တရုတ်နိုင်ငံသည် ယခုအခါ ကမ္ဘောဒီးယား၏ လတ်ဆတ်သော ငှက်ပျောသီးတင်ပို့မှု၏ ၉၅ ရာခိုင်နှုန်းခန့်ကို တင်သွင်း လျက်ရှိသည်။

      အဆိုပါတင်ပို့မှုလမ်းကြောင်းသည် စိုက်ပျိုးရေးကုန်သွယ်မှုထက် ကျော်လွန်ကာ နည်းပညာ လွှဲပြောင်းမှုများကို အားပေးမြှင့်တင်ခြင်း၊ ဒေသခံအခြေခံအဆောက်အအုံများ မြှင့်တင်ခြင်းနှင့် ကျေးလက်စီးပွားရေးများကို အခြေခံအုတ်မြစ်ချပေးခြင်းတို့ကိုလည်း ဆောင်ရွက်ပေးကြောင်း၊ ငှက်ပျောသီးသည် သရက်သီး၊ Pailin ပြည်နယ်ထွက် လောင်ဂန်သီး၊ အုန်းသီးနှင့် ဒူးရင်းသီးတို့နှင့် အတူ တရုတ်ဈေးကွက်သို့ တိုက်ရိုက်၀င်ရောက်ခွင့်ရသည့် ကမ္ဘောဒီးယား၏ အဓိကသစ်သီးဝလံ အသစ်များထဲတွင် ပါဝင်လာကြောင်း သိရှိရသည်။

Source: Khmer Times, Sept 1, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)