ပြည်ပကုန်သွယ်မှုသတင်းများ

    မလေးရှားစားအုန်းဆီဈေးကွက်၌ ကမ္ဘာ့ထိပ်တန်း ဝယ်လက်နိုင်ငံများ၏ ဝယ်လိုအား ကောင်းမွန်သည့်အတွက် ၂၀၂၄ ခုနှစ်တွင် အပေါင်းလက္ခဏာဆောင်မည့် ဈေးကွက်အခြေအနေ ဖြစ်ပေါ်နိုင်ကြောင်း၊ စားအုန်းဆီ တင်ပို့မှုဈေးကွက်ဝေစုတွင် အိန္ဒိယသည် ၁၇.၄%၊ တရုတ်သည် ၉.၁% နှင့် ဥရောပသမဂ္ဂ(EU)သည် ၇.၄% ပါဝင်နိုင်ကြောင်းဖြင့် မလေးရှား ဥယျာဉ်ခြံ စိုက်ခင်းနှင့် ကုန်စည်ရေးရာဝန်ကြီး Mr. Datuk Seri Johari Abdul Ghani က ပြောကြားခဲ့ပါသည်။

    စားနပ်ရိက္ခာဖူလုံမှုနှင့် စီးပွားရေး လုပ်ငန်းဆောင်ရွက်မှုများ အလုံးစုံအသက်ဝင်နိုင်မှု သေချာစေရန် ရည်ရွယ်ပြီး ဆီလက်ကျန်များ ပိုမိုများလာစေခြင်းဖြင့် ၀ယ်လိုအားကောင်းလာမှုကို အထောက်အပံ့ဖြစ်စေအောင် ဆောင်ရွက်လျက်ရှိကြောင်း၊  စားအုန်းဆီကြမ်း (CPO) ထုတ်လုပ်မှု မှာ ၂၀၂၃ ခုနှစ်တွင် တန်ချိန် ၁၈.၅၅ သန်း သာရှိခဲ့သော်လည်း ၂၀၂၄ ခုနှစ်တွင် တန်ချိန် ၁၈.၇၅ သန်းအထိ တိုးတက်လာမည်ဟု မလေးရှားစားအုန်းဆီဘုတ်အဖွဲ့ (MPOB) က ခန့်မှန်းထား ကြောင်း၊ ၂၀၂၃ ခုနှစ်နှင့် နှိုင်းယှဉ်ပါက ထုတ်လုပ်မှုသည် ၁% ခန့် တိုးတက်လာပြီး လုပ်သား စျေးကွက်အခြေအနေနှင့် ဆီအုန်းပင်များ၏ ရင့်ကျက်မှု အခြေအနေများအရ ပြောပလောက်သော ပမာဏအထိ တိုးတက်လာခြင်း မဟုတ်ပါကြောင်း စသည်ဖြင့် ၃၅ ကြိမ်မြောက် စားသုံးဆီ ဈေးနှုန်းအလားအလာဆိုင်ရာ ညီလာခံနှင့် ပြပွဲအခမ်းအနားတွင် ဝန်ကြီး Mr. Johari က မိန့်ခွန်း၌ ထည့်သွင်းပြောကြားခဲ့ကြောင်း သတင်းရရှိပါသည်။

    ၂၀၂၄ ခုနှစ်အတွင်း အပြုသဘောဆောင်သော ရည်မှန်းချက်များ အောင်မြင်စွာ အကောင် အထည်ဖော်နိုင်ရေးအတွက် စားအုန်းဆီကဏ္ဍအပေါ် အပျက်သဘောဆောင်သော တွေးဆ ပြော ဆိုချက်များကို ဖြေရှင်းဆောင်ရွက်ခြင်း၊ လုပ်ကွက်ငယ် စီးပွားရေးလုပ်ငန်းရှင်များ ကြုံတွေ့ရသည့် အခွင့်အလမ်းများစွာ ဆုံးရှုံးခြင်းပြဿနာ၊ လုပ်သား ရှားပါးမှုပြဿနာနှင့် ရာသီဥတု ဖောက်ပြန်မှု (အယ်နီညို) စသည့် အဓိကစိန်ခေါ်မှုများကို လျင်မြန်စွာ ကိုင်တွယ်ဖြေရှင်းနိုင်ရေးမှာ အရေးကြီး ကြောင်း၊  စားအုန်းဆီလုပ်ငန်းက မလေးရှားနိုင်ငံ အတွက် အခွင့်အလမ်းများစွာကို ပေးအပ်ထားပြီး တစ်ကမ္ဘာလုံးအတိုင်းအတာဖြင့် မြင့်မားသော စားအုန်းဆီ အရည်အသွေးကို သတ်မှတ်ပေးနိုင်မည့် အလားအလာရှိကြောင်း Mr. Johari က ဆက်လက်ပြောကြားခဲ့ပါသည်။

   အမှီအခိုကင်းပြီး စုစည်းလုပ်ဆောင်မှုရှိသည့်  လုပ်ငန်းငယ်ပေါင်း ၄၄၇၀၀၀ ကျော်နှင့် အတူ စားအုန်းဆီလုပ်ငန်းနယ်ပယ် အနေဖြင့် အရည်အသွေးမြင့်ပြီး အထွက်နှုန်းကောင်းသည့် ဆီအုန်း အသီးခိုင်များ စိုက်ပျိုးထုတ်လုပ်ရေးနှင့် စားအုန်းဆီကြမ်းများကို စဉ်ဆက်မပြတ် ထုတ်လုပ်နိုင်ရေး တို့ကို အနာဂတ်ကာလ၌ အာရုံစိုက် ဆောင်ရွက်ရမည်ဖြစ်ကြောင်း၊  အခြေအမြစ်မရှိသည့် စွပ်စွဲမှု များနှင့် အပျက်သဘောဆောင်သည့် ဝေဖန်တိုက်ခိုက်မှုများကို တုန့်ပြန်ရန် တစ်ခုတည်းသော နည်းလမ်းဖြစ်သည့် ဘက်ပေါင်းစုံ ထိတွေ့ဆက်ဆံမှုသည်  အရေးကြီးပါကြောင်း၊ ဆီအုန်း စိုက်ပျိုး ထုတ်လုပ်သူများ၊ ထုတ်လုပ်သူများ၊ သုတေသီများနှင့် ကုန်သည်များသည် မိမိတို့၏ စားအုန်းဆီ လုပ်ငန်းအပေါ် အပျက်သဘောဆောင်သော တိုက်ခိုက်ဝေဖန်မှုကို အတူတကွတိုက်ဖျက်ရန် လိုအပ်မှာဖြစ်ကြောင်း၊ စည်းလုံးညီညွတ်မှုရှိရမည်ဖြစ်ကြောင်းဖြင့် ဝန်ကြီး Mr. Johari က ထပ်မံ ပြောကြားကြောင်း သိရှိရပါသည်။

    တစ်ချိန်တည်းတွင် မလေးရှားစားအုန်းဆီ အသိအမှတ်ပြု‌ရေးကောင်စီ (Malaysian Palm Oil Certification Council-MPOCC) ကို ရေရှည်တည်တံ့ခိုင်မြဲသော မလေးရှားစားအုန်းဆီ အသိ အမှတ်ပြုရေးအဖွဲ့ (Malaysian Sustainable Palm Oil Certification-MSPO) အဖြစ် အမည်ပြောင်းလဲမည်ဖြစ်ပါကြောင်း၊ ထိုသို့ ဆောင်ရွက်ခြင်းက လက်ရှိဖွဲ့စည်းထားသည့် မလေးရှား စားအုန်းဆီကောင်စီ (MPOC) နှင့် မလေးရှားစားအုန်းဆီ အသိအမှတ်ပြု‌ရေးကောင်စီ (MPOCC) တို့ အမည်ရောထွေးမှုကို ရှင်းလင်းနိုင်မည်ဖြစ်ကြောင်း ဝန်ကြီး Mr. Johari က ကြေညာခဲ့သည်။

     ၂၀၂၃ ခုနှစ်၌ ကမ္ဘာ့စီးပွားရေး မသေချာမရေရာမှုများ ဖြစ်ပေါ်ခဲ့သော်လည်း စားအုန်းဆီ ဈေးကွက် ခိုင်မာအားကောင်းမှုရှိခဲ့သည့်အတွက် ခံနိုင်ရည်ရှိမှုကို ပြသနိုင်ခဲ့ကြောင်း၊ စားအုန်းဆီ လုပ်ငန်းသည် မလေးရှားစီးပွားရေး၏ အရေးပါသော အစိတ်အပိုင်းတစ်ခုအဖြစ် ဆက်လက်တည်ရှိ လျက် ယခင်နှစ်တွင် စုစုပေါင်းပြည်တွင်းထုတ်လုပ်မှုတန်ဖိုး၌ ၃% ခန့်ပံ့ပိုးပေးနိုင်ခဲ့ကြောင်း၊ စားအုန်းဆီကြမ်းဈေးနှုန်း သိသာစွာကျဆင်းနေသော်လည်း စားအုန်းဆီနှင့် စားအုန်းဆီအခြေခံ ထုတ်ကုန်များ တင်ပို့မှုတန်ဖိုးသည် မလေးရှားရင်းဂစ် ၁၀၀ ဘီလီယံကျော်အထိ ပမာဏ တိုးတက်ခဲ့ကြောင်း၊  အဓိကစားသုံးသောဒေသများမှ ဝယ်လိုအား များပြားလာခြင်းနှင့် ပြည်တွင်း စားအုန်းဆီ ထုတ်လုပ်မှု တိုးတက်လာခြင်းတို့က ‌စျေးကွက်တစ်ခုလုံး၏ စွမ်းဆောင်ရည်ကို ပံ့ပိုးပေးကြောင်း  မလေးရှား ဥယျာဉ်ခြံ စိုက်ခင်းနှင့် ကုန်စည်ရေးရာဝန်ကြီး Datuk Seri Johari Abdul Ghani ၏ ပြောကြားချက်များကို ရေးသားဖော်ပြလိုက်ရပါသည်။

Source: The Sun, 5 March 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

   ကမ္ဘာ့စီးပွားရေး ပြန်လည်ဦးမော့လာပြီး အရည်အသွေးမြင့်ဆန်ကို ဦးစားပေးမှုကြောင့် ယခုနှစ်တွင် အထူးသဖြင့် ငချိတ်ဆန်နှင့် ဆန်လုံးညိုတို့အား ဟောင်ကောင်နှင့် တရုတ်နိုင်ငံသို့ ဆန်တင်ပို့မှု တိုးလာမည်ဟု ထိုင်းနိုင်ငံအနေဖြင့် မျှော်လင့်ထားကြောင်း၊ ထိုင်းနိုင်ငံသည် တရုတ်နိုင်ငံ၊ ရှန်ကျင်းပြည်နယ်တွင် ဖြန့်ဖြူးရေးစင်တာတစ်ခု တည်ထောင်လိုကြောင်း သိရှိရသည်။

     ဟောင်ကောင် ဆန်ကုန်သည်များအသင်း၏ ဥက္ကဋ္ဌအဖြစ် တာဝန်ယူဆောင်ရွက်နေသော China Merchants Godown, Wharf & Transportation ကုမ္ပဏီ၏ အမှုဆောင်တစ်ဦးဖြစ်သူ Kenneth Chan နှင့် တွေ့ဆုံမှုအပြီးတွင် ထိုင်း ကူးသန်းရောင်းဝယ်ရေးဝန်ကြီး Phumtham Wechayachai က ထိုင်းနိုင်ငံသည် ဝယ်ယူသူအုပ်စု တစ်ခုချင်းစီ၏ လိုအပ်ချက်များနှင့်အညီ အံဝင်ခွင်ကျ ဖြစ်စေသည့် ဆန်အရည်အသွေးများ ဖွံ့ဖြိုးတိုးတက်စေရန် သုတေသနနှင့် ဖွံ့ဖြိုး တိုးတက်ရေးလုပ်ငန်း (R&D) မူဝါဒရှိကြောင်း၊ ထို့အပြင် ထိုင်းဆန်သည် ကမ္ဘာ့ဈေးကွက်တွင် ယှဉ်ပြိုင်နိုင်စေရန် စံချိန် စံညွှန်းများကို ထိန်းသိမ်းထားကြောင်း ပြောကြားခဲ့သည်။

    ယခင်နှစ်၌ ဟောင်ကောင်သည် ထိုင်းနိုင်ငံမှ ဆန်တန်ချိန် ၁၅၀၀၀၀ ခန့်တင်သွင်းခဲ့ရာမှ ယခုနှစ်တွင် ဆန်တန်ချိန် ၁၈၀၀၀၀ ခန့် ပိုမိုတင်သွင်းရန် မျှော်မှန်းထားပြီး အများစုမှာ ထိုင်း နိုင်ငံမှ စံပယ်ဆန်များဖြစ်ကြောင်း၊ မတ်လ ၈ ရက်မှ ၉ ရက်အတွင်း Mr. Phumtham သည် ထိုင်း စံပယ်ဆန် တင်သွင်းသူများနှင့် တွေ့ဆုံခဲ့ပြီး ရှန်ကျင်းပြည်နယ်တွင် ဖြန့်ဖြူးရေးစင်တာတစ်ခု တည်ထောင်ရန် စိတ်ဝင်စားကြောင်း ဖော်ပြခဲ့သည်။

   ထိုင်းစီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် မြေငှားခြင်းနှင့်စပ်လျဉ်း၍ တရုတ်အစိုးရနှင့် ညှိနှိုင်းဆွေးနွေးရာတွင် ပံ့ပိုးကူညီရန် အဆင်သင့်ရှိပြီး အစီအစဉ်ချထားသော စီမံကိန်းနှင့် ပတ်သက်၍ ဝန်ကြီးချုပ် Srettha Thavisin နှင့် ထပ်မံဆွေးနွေးရန်လည်း စီစဉ်ထား ကြောင်း၊ ဟောင်ကောင်သည် အမေရိကန်နှင့် တရုတ်ပြီးလျှင် ထိုင်းနိုင်ငံ၏ တတိယအကြီးဆုံး ထိုင်းစံပယ်ဆန်တင်ပို့သည့် ဈေးကွက်ဖြစ်ကြောင်း၊  ယခင်နှစ်တွင် ဟောင်ကောင်သည် စုစုပေါင်း ဆန်တန်ချိန် ၂၅၇၂၀၀ တင်သွင်းခဲ့ပြီး ထိုင်းမှ ဆန်တန်ချိန် ၁၄၈၅၀၀ (၅၇.၇%)၊ ဗီယက်နမ်မှ ဆန် တန်ချိန် ၆၀၁၀၀ (၂၃.၄%) နှင့် တရုတ်နိုင်ငံမှ ဆန်တန်ချိန် ၂၁၂၀၀ (၈.၂%) တို့ အသီးသီး တင်သွင်းခဲ့ကြောင်း သိရှိရသည်။

     ထိုင်းဆန်၏ အရည်အသွေးနှင့် စံချိန်စံညွှန်းများကို ယုံကြည်စိတ်ချသောကြောင့် ထိုင်း နိုင်ငံမှ ဆန်များအား ဆက်လက်တင်သွင်းမည်ဖြစ်ကြောင်း ဟောင်ကောင်ဆန်ကုန်သည်များ အသင်းက အတည်ပြုပြောကြားခဲ့သည်။ Mr. Phumtham သည် ဟောင်ကောင်ရှိ စံပယ်ဆန် သိုလှောင်ရုံသို့ သွားရောက်လေ့လာခဲ့ရာ အဆိုပါ သိုလှောင်ရုံသည် စံချိန်စံညွှန်းမြင့်မားပြီး ထိုင်း  ဆန်အရည်အသွေးအား ထိန်းသိမ်းနိုင်စွမ်းရှိသည်ကို တွေ့ရှိခဲ့သည်။

   ဆန်တင်သွင်းသူများအနေဖြင့် ဆန်သိုလှောင်ရာတွင် နေရာအကန့်အသတ်နှင့် စိုထိုင်းဆများသောကြောင့် ထိုင်းစံပယ်ဆန်၏ အရည်အသွေးနှင့် အနံ့ကို ထိန်းသိမ်းထားရန် အပူချိန်နှင့် စိုထိုင်းဆထိန်းချုပ်သည့် ဘက်စုံအသုံးပြုနိုင်သော ဆန်ဂိုဒေါင်ကို ငှားရမ်းရမည်ဖြစ်သည်။ ဆန် တင်သွင်းဖြန့်ဖြူးမှုကို စီမံခန့်ခွဲရန် ဟောင်ကောင်၌ ဟောင်ကောင်ဆန်ကုန်သည်များအသင်းကို ၁၉၁၉ ခုနှစ်တွင် တည်ထောင်ခဲ့ပြီး လက်ရှိအသင်းဝင် စုစုပေါင်း ၅၀ ရှိကြောင်း သိရှိရသည်။

   ဟောင်ကောင်ဆန် တင်သွင်းသူများအသင်းနှင့် ထိုင်းဆန်တင်ပို့သူများအကြား ဆက်ဆံ ရေး ခိုင်မာအားကောင်းစေသော နှစ်စဉ်ကုန်သွယ်မှုမစ်ရှင်များကြောင့် ယင်းအသင်းနှစ်ခုအကြား ဆက်ဆံရေးကောင်းမွန်ကြောင်း Mr. Chan က ပြောကြားခဲ့သည်။ ဆန်သည် ဟောင်ကောင်၏ အဓိကအစားအစာဖြစ်ပြီး အရန်ဆန်အဖြစ် စီစဉ်ထားရှိကာ အစိုးရမှသင့်လျော်သော စျေးနှုန်းနှင့် စားသုံးရန် လုံလောက်သော ထောက်ပံ့မှုရရှိစေရန် ဆန်ထိန်းချုပ်ရေးအစီအစဥ်ကို စီမံဆောင်ရွက်လျက်ရှိပါသည်။ ဟောင်ကောင်တွင် မှတ်ပုံတင်ထားသည့် ဆန်တင်သွင်းသူ ၂၃၈ ဦးနှင့် သိုလှောင် ရုံ ၁၄၂ လုံးရှိပြီး ထိုင်းအစိုးရသည် ဝယ်လိုအား ခိုင်မာမှုနှင့်အတူ ဆန်တန်ချိန် ၇.၅ သန်း တင်ပို့ရန် ရည်မှန်းထားသည်။

Source: Bangkok Post, March 13, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ထိုင်းနိုင်ငံ စီးပွားရေးနှင့်ကူးသန်းရောင်းဝယ်ရေးဝန်ကြီးဌာနသည် အရှေ့အလယ်ပိုင်းရှိ အကြီးဆုံး နိုင်ငံတကာ အစားအစာနှင့် အဖျော်ယမကာ ကုန်စည်ပြပွဲဖြစ်သည့် Gulfood 2024 ပြပွဲ၌ ထိုင်းဆန်အရောင်းမြှင့်တင်သည့်ပွဲကို စီစဉ်ကျင်းပခဲ့ကြောင်း ထိုင်းဝန်ကြီးချုပ်ရုံး၏ ပြော ရေးဆိုခွင့်ရှိသူ Chai Watcharong က မကြာသေးမီက ထုတ်ဖော်ပြောကြားခဲ့သည်။

အဆိုပါပွဲတွင် ထိုင်းဆန်၏ အရသာ၊ အရည်အသွေးတို့နှင့်ပတ်သက်၍ ဆန်တင်သွင်းသူ များနှင့် ဖြန့်ဖြူးသူများ၏ အကြီးအကျယ် စိတ်ဝင်စားမှုရရှိခဲ့ပြီး ချီးကျူးထောပနာပြုမှုများကို ရရှိခဲ့ ကြောင်း Chai Watcharong မှ ဆက်လက်ပြောကြားခဲ့သည်။ အဆိုပါအောင်မြင်သော ထိုင်းဆန် အရောင်းမြှင့်တင်မှုသည် ယင်းဒေသရှိ ထိုင်းဆန်ဈေးကွက်ကို ဆက်လက်ထိန်းထားရန်နှင့် ချဲ့ထွင် ရန် အဓိကသော့ချက်ဖြစ်ကြောင်း သိရှိရသည်။

      အာရပ်စော်ဘွားများပြည်ထောင်စု(ယူအေအီး)၊ ဒူဘိုင်းမြို့၌ ကျင်းပခဲ့သည့် ကုန်စည်ပြပွဲတွင် ထိုင်းနိုင်ငံပြခန်း၌ ထိုင်းဆန်ကုန်သည် ၂၄ ဦးတို့မှ အရောင်းမြှင့်တင်ရေးပွဲများ၌ ပါဝင်ခဲ့ပြီး ထိုင်းဟုန်မာလီဆန် (Thai Hom Mali) အသိအမှတ်ပြု အမှတ်တံဆိပ်ပါဝင်သော ထိုင်းဆန် မျိုးကွဲ မျိုးစုံကို ခင်းကျင်းပြသခဲ့သည်။

      အဆိုပါပြပွဲတွင် ထိုင်းနိုင်ငံမှ ဝင်ရောက်ပြသနိုင်ရန်အတွက် ထိုင်းနိုင်ငံ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ နိုင်ငံခြားကုန်သွယ်မှုဦးစီးဌာနမှ စီစဉ်ပေးခြင်းဖြစ်ကြောင်း၊ ထိုင်းကိုယ်စားလှယ်အဖွဲ့အနေဖြင့် ဆန်နမူနာများကို အရသာမြည်းစမ်းကြည့်ခဲ့ကြသော တင်သွင်း သူများ၊ ဖြန့်ဖြူးသူများနှင့် ပွဲတက်ရောက်သူဧည့်သည် ၁၀၀၀ ကျော်ထံမှ အပြုသဘောဆောင် သော အကြံပြုချက်များကို ရရှိခဲ့ကြောင်း သိရှိရသည်။

      အရှေ့အလယ်ပိုင်း၊ အရှေ့တောင်အာရှ၊ အာဖရိကနှင့် ဥရောပတို့မှ တက်ရောက်လာကြ သည့် ဧည့်သည်များသည် အထူးသဖြင့် ထိုင်းဆန်၏ ဝိသေသလက္ခဏာများ၊ အရည်အသွေး စံချိန် စံညွှန်းများနှင့် ဈေးနှုန်းများကို စိတ်ဝင်စားခဲ့ကြောင်း၊ ထိုင်းဆန်၏ အရသာ၊ အရည်အသွေးနှင့် စံချိန်စံညွှန်းများနှင့် စပ်လျဉ်း၍ သီးခြားအတည်ပြုချက် ရရှိခဲ့ကြောင်း သိရှိရသည်။

       ပြည်ပနိုင်ငံများတွင် စျေးကွက်သစ်များချဲ့ထွင်ပြီး လက်ရှိဈေးကွက်များကို ထိန်းသိမ်း ထားရန် မူဝါဒဖြင့် ထိုင်းအစိုးရသည် ပို့ကုန်နှင့် ဝန်ဆောင်မှုများကို မြှင့်တင်ရန် မဟာဗျူဟာကို ချ မှတ်ထားကြောင်း Chai Watcharong က ဆက်လက်ပြောကြားထားသည်။ အဆိုပါ မဟာဗျူဟာ သည် ယခုနှစ်အတွင်း ပြည်တွင်း၌သာမက နိုင်ငံတကာတွင်ပါ ကျင်းပခဲ့သည့် ပွဲပေါင်း ၃၀၀ ကျော် မှတစ်ဆင့် ထိုင်းနိုင်ငံ၏ အသေးစားနှင့်အငယ်စားလုပ်ငန်းများ၏ ပို့ကုန်များအား တိုးမြှင့်မှုအပေါ် အာရုံစိုက်ပြီး ထိုင်းထုတ်ကုန်အားလုံးအတွက် အခွင့်အလမ်းများ ဖန်တီးပေးကြောင်း ဝန်ကြီးဌာန ၏ ပြောကြားချက်အရ သိရှိရသည်။   ထို့အပြင် ထိုင်းနိုင်ငံ၏ ပို့ကုန်များ ကမ္ဘာ့ဈေးကွက်သို့ မြှင့် တင်နိုင်ရေးအတွက် ပြည်နယ်ကူးသန်းရောင်းဝယ်ရေးရုံးများနှင့် စီးပွားရေးသံမှူးများအကြား ချိတ် ဆက်၍ ညှိနှိုင်းဆောင်ရွက်လျက်ရှိပါသည်။

       ထိုင်းကုန်ပစ္စည်းများအတွက် အခွင့်အလမ်းများ ဖန်တီးပေးပြီး အလားအလာရှိသော စျေးကွက်သစ်များကို ဖွင့်လှစ်ပေးခဲ့သည့် ထိုင်းနိုင်ငံ၏ ထုတ်ကုန်များအား နိုင်ငံတကာတွင် အောင် မြင်စွာ မြှင့်တင်နိုင်ခဲ့သည့် သက်ဆိုင်ရာ အေဂျင်စီများ၏ တက်ကြွသော အားထုတ်မှုများကို ထိုင်း ဝန်ကြီးချုပ်မှ ချီးကျူးပြောဆိုခဲ့ကြောင်း၊ အစိုးရအနေဖြင့် ပို့ကုန်မြှင့်တင်ရေးအား တစ်နှစ်ပတ်လုံး ဖော်ဆောင်ရန် လိုလားကြောင်း၊ ဝန်ကြီးချုပ်အနေဖြင့် နိုင်ငံခြားဈေးကွက်ရှိ ထိုင်းထုတ်ကုန်များ၏ အရည်အသွေးနှင့် နာမည်ကောင်းတို့အပေါ် ယုံကြည်မှုရှိကြောင်း၊ ထိုင်းပို့ကုန်တန်ဖိုး တိုးမြှင့်ရာတွင် အစိုးရ၏ပံ့ပိုးကူညီမှုသည် အရေးပါသောအချက်ဖြစ်ကြောင်း၊ လက်ရှိစျေးကွက်များကို ထိန်း သိမ်းရုံသာမက ဖောက်သည်သစ်များထံ ဈေးကွက်ချဲ့ထွင်ခြင်းဖြင့် တိုင်းပြည်၏စီးပွားရေး ဖွံ့ဖြိုးတိုးတက်မှု၊ အလုပ်အကိုင်ဖန်တီးပေးခြင်းနှင့် ထိုင်းပြည်သူများအတွက် ဝင်ငွေများ ပံ့ပိုးပေးခြင်း စသည့် အထောက်အကူများ ပေးစွမ်းနိုင်မည်ဖြစ်ကြောင်း Chai က ပြောကြားခဲ့သည်။

Source: Nation Thailand, March 11, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

        ကမ္ဘာ့ရော်ဘာဈေးနှုန်းများ မြင့်တက်လျက်ရှိသော်လည်း အိန္ဒိယပြည်တွင်း၌ ဈေးနှုန်းများ လိုက်ပါပြောင်းလဲမှု ရပ်တန့်နေသဖြင့် ပြည်တွင်းဈေးကွက် ခိုင်မာအားကောင်းစေရေးအတွက် ပြည်ပတင်ပို့မှုကို မြှင့်တင်ဆောင်ရွက်ရန် အိန္ဒိယတောင်သူများက တောင်းဆိုလျက်ရှိကြောင်း သိရှိရသည်။

         နိုင်ငံတကာဈေးကွက်၌ သဘာဝရော်ဘာဈေးနှုန်းများမှာ ၁ ကီလိုဂရမ်လျှင် ရူပီးငွေ ၂၀၀ အထက်သို့ ကျော်လွန်လာခဲ့ရာ အိန္ဒိယပြည်တွင်းရှိ ရော်ဘာအဓိကထုတ်လုပ်ရာဒေသဖြစ်သော Kottayam ဈေးကွက်တွင်လည်း ၁၂-၃-၂၀၂၄ နေ့၌ ၁ ကီလိုဂရမ်လျှင် ၁၇၅ ရူပီးနှုန်းသို့ ရောက်ရှိခဲ့ သည်။ ပြည်တွင်းရော်ဘာဈေးနှုန်းများကို နိုင်ငံတကာဈေးနှုန်းများနှင့်အညီ လိုက်ပါချိန်ညှိရန် ဖိအားများ သက်ရောက်မှုနှင့်အတူ အိန္ဒိယရော်ဘာဘုတ်အဖွဲ့သည် ပြည်ပသို့ သဘာဝရော်ဘာ တင်ပို့ရေး လှုံ့ဆော်မှုများကို စတင်ဆောင်ရွက်လျက်ရှိကြောင်း၊ ၁၅-၃-၂၀၂၄ နေ့တွင် ရော်ဘာ ပို့ကုန်လုပ်ငန်းရှင်များနှင့် တွေ့ဆုံပြီး ပြည်တွင်းဈေးကွက် သုံးသပ်ခြင်းနှင့် ရော်ဘာအဆင့်အတန်း အမျိုးအစားအလိုက် ပြည်ပဈေးကွက် တင်ပို့နိုင်မည့် အလားအလာဖော်ထုတ်ခြင်းတို့ကို ဆွေးနွေး ရန် စီစဉ်ထားရှိကြောင်း The New Indian Express သတင်းဌာနက ဖော်ပြပါသည်။

       ပြည်တွင်းရော်ဘာဈေးနှုန်းများမှာ ကမ္ဘာ့ဈေးကွက်နှင့်အညီ တိုးတက်ပြောင်းလဲမှုမရှိပဲ ရပ်တန့်နေခြင်းသည် လော့ဆာဘလွှတ်တော်အတွက် ဆန္ဒမဲပေးပွဲများ ကျင်းပမှု မတိုင်မီကာလ၌ အဓိက ဆွေးနွေးအဖြေရှာရမည့် ကိစ္စတစ်ရပ်ဖြစ်လာခဲ့သည်။ နိုင်ငံတစ်ဝန်း၌ ရော်ဘာဈေးနှုန်းများ ကို ကြိုးကိုင်ချယ်လှယ်နိုင်ရန်အတွက် ပြည်တွင်းရှိ တာယာကုမ္ပဏီများအနေဖြင့် ရော်ဘာပို့ကုန်ဈေးကွက်အတွင်း ဝင်ရောက်မှုမပြုပဲ ရည်ရွယ်ချက်ရှိစွာ ရှောင်ခွာနေကြသည်ဟု တောင်သူများက ထင်မြင်လျက်ရှိသည်။ ထို့အပြင် ပြည်ပသို့ ရော်ဘာတင်ပို့ခြင်းကသာ အဆိုပါကုမ္ပဏီများအား တာယာထုတ်လုပ်သည့်လုပ်ငန်းအတွက် ပြည်တွင်းမှကုန်ကြမ်းကို အရင်းအမြစ်အဖြစ် ရယူစေရန် တောင်းဆိုနိုင်ပြီး ဈေးနှုန်းများကို မြင့်တက်စေနိုင်မည်ဟု ၎င်းတို့က ရှုမြင်ထားကြသည်။ သို့ဖြစ်ရာ ရော်ဘာဘုတ်အဖွဲ့၏ မည်သည့်ကြားဝင်ဆောင်ရွက်မှုမဆို အဆိုပါဒေသတွင်း၌ အရေးပါသည့် နိုင်ငံရေးဆိုင်ရာ တိုးတက်မှုတစ်ရပ်ကို ဖော်ဆောင်နိုင်မည်ဖြစ်သည်။

      ရော်ဘာထုတ်လုပ်သူများ၏ လူမှုရေးအသင်းများ အမျိုးသားအဆင့်ပူးပေါင်းအဖွဲ့ (NCRPS) မှ ကိုယ်စားလှယ်များသည် ၁၁-၃-၂၀၂၄ နေ့တွင် အိန္ဒိယရော်ဘာဘုတ်အဖွဲ့၏ ဥက္ကဋ္ဌနှင့် တွေ့ဆုံလျက် ရော်ဘာတင်ပို့နိုင်ရေး ကြားဝင်ဆောင်ရွက်ပေးရန် တောင်းဆိုခဲ့ကြသည်။ ထိုသို့ တွေ့ဆုံရာ၌ ရော်ဘာတင်ပို့မှုကို အမြဲမပြတ်ဆောင်ရွက်နိုင်ရေးအတွက် ရော်ဘာဘုတ်အဖွဲ့အောက်ရှိ ကုမ္ပဏီများနှင့် ရော်ဘာထုတ်လုပ်သည့် လူမှုရေးအသင်းများအကြား ပူးပေါင်းဆောင်ရွက်မည့် လုပ်ငန်း စီမံချက်တစ်ရပ်ကို ချမှတ်ထားပြီးဖြစ်သည်ဟု ရော်ဘာဘုတ်အဖွဲ့ ဥက္ကဋ္ဌက ပြောကြားခဲ့ကြောင်း၊ ရော်ဘာဝယ်ယူရေးလုပ်ငန်းများအတွက် ဖြစ်နိုင်ခြေရှိသော အထောက်အပံ့များ ပေးအပ်ရန် ၎င်းဘုတ်အဖွဲ့က စဉ်းစားလျက်ရှိကြောင်း၊ မိမိတို့အနေဖြင့် အပြုသဘောရလဒ်ထွက်ပေါ်မည်ဟု ရှုမြင် ထားကြောင်းဖြင့် NCRPS မှ အထွေထွေအတွင်းရေးမှူး Babu Joseph က ပြောဆိုခဲ့သည်။

    ၂၀၂၄ ခုနှစ် ဇန်နဝါရီလအတွင်း အိန္ဒိယရော်ဘာ၏ ဈေးနှုန်းများမှာ ထိုင်းနိုင်ငံ ဘန်ကောက်ဈေးကွက်၌ ဖြစ်ပေါ်သော ဈေးနှုန်းများ၏အောက်သို့ ကျဆင်းမှု ဖြစ်ပေါ်ခဲ့သည်။ အိန္ဒိယ ရော်ဘာဘုတ်အဖွဲ့၏ အချက်အလက်များအရ ၁၂-၂-၂၀၂၄ နေ့၌ မှိုင်းခံရော်ဘာအဆင့်-၄ (RSS-4) ဈေးနှုန်း သည် ၁ ကီလိုဂရမ်လျှင် ဘန်‌ကောက်ဈေးကွက်တွင် ၂၁၇.၄၃ ရူပီးနှုန်းခန့်ရှိပြီး အိန္ဒိယပြည်တွင်း၌ ၁၇၅ ရူပီးနှုန်းသာရှိကြောင်း တွေ့ရှိရသည်။

ရော်ဘာ အဓိကထုတ်လုပ်တင်ပို့သည့် ထိုင်း၊ အင်ဒိုနီးရှားနှင့် အိုင်ဗရီကို့စ် နိုင်ငံများတွင် ရောင်းလိုအား ပြတ်လပ်မှုဖြစ်ပေါ်ခြင်းကြောင့် ကမ္ဘာ့ရော်ဘာဈေးနှုန်းများ မြင့်တက်လာခဲ့ခြင်းဖြစ်သည်။ အရှေ့တောင်အာရှဒေသနိုင်ငံများတွင် ဆောင်းရာသီကာလ ကျရောက်မှုနှင့်အတူ နိုဝင်ဘာ - ဒီဇင်ဘာကာလများအတွင်း ရာသီဥတု ကောင်းမွန်မှုမရှိခြင်းက ရော်ဘာထုတ်လုပ်မှုကို ကျဆင်းစေခဲ့သည်။

 အိန္ဒိယနိုင်ငံ၌ ပြည်ပသို့ ရော်ဘာတင်ပို့ရန် ဆွဲဆောင်မှုအဖြစ် ပို့ကုန်အပေါ် အခွန်အခများ ပြန်လည်ထုတ်ပေးသည့် အစီအစဉ်အောက်တွင် သင်္ဘောပေါ်အရောက်တင်ပို့မှု FOB တန်ဖိုးအပေါ် ၁.၄% အကျိုးခံစားခွင့်ကို ဗဟိုအစိုးရက ခွင့်ပြုပေးလျက်ရှိသည်။ အိန္ဒိယရော်ဘာဘုတ်အဖွဲ့အနေဖြင့် အိန္ဒိယသဘာဝရော်ဘာ ဟူသော အမှတ်တံဆိပ်ဖြင့် အရည်အသွေးကောင်းမွန်သည့် ရော်ဘာများကို ပထမဆုံးအကြိမ်အဖြစ် အသိအမှတ်ပြုလက်မှတ်ထုတ်ပေးလျက် ပြည်ပတင်ပို့မှု တိုးမြှင့်နိုင်ရေး ဆောင်ရွက်လျက်ရှိကြောင်း သိရှိရသည်။

Source: The New Indian Express, 13 Mar 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ဗီယက်နမ်နိုင်ငံသည် ၂၀၂၃ ခုနှစ်အတွင်း ဆန်တန်ချိန် ၈.၁ သန်းအထိ စံချိန်တင် တင်ပို့နိုင် ခဲ့သော်လည်း ၂၀၂၄ ခုနှစ်တွင်မူ တန်ချိန် ၆.၅ သန်းမှ ၇ သန်း အတွင်းသာ လျော့နည်းတင်ပို့နိုင်ဖွယ်ရှိကြောင်း ဗီယက်နမ်စားနပ်ရိက္ခာအသင်း၏ အစီရင်ခံစာတစ်စောင်တွင် ဖော်ပြထားပါသည်။

   အိန္ဒိယနှင့် ထိုင်းတို့၏နောက်၌ ကမ္ဘာ့တတိယအကြီးဆုံး ဆန်တင်ပို့သူဖြစ်သော ဗီယက်နမ်နိုင်ငံသည် အစောပိုင်းကာလများကပင် ရာသီဥတုပြောင်းလဲမှုနှင့် လိုက်လျောညီထွေရှိစေရေးနှင့် ပြည်တွင်းစားနပ်ရိက္ခာ ဖူလုံမှုရှိစေရေးတို့ကို  ဖော်ဆောင်မှုနှင့်အတူ ၎င်း၏ဆန်တင်ပို့မှုကဏ္ဍ၌ အရေအတွက်ကို တဖြည်းဖြည်း လျှော့ချလျက် အရည်အသွေးမြင့်မားပြီး ဈေးကောင်းရသည့် ဆန်များတင်ပို့ခြင်းကိုသာ အလေးပေးဆောင်ရွက်သွားမည်ဖြစ်ကြောင်း ထုတ်ဖော်ပြောကြားထားသည်။

     မတ်လ ပထမရက်သတ္တပတ်အတွင်း ကျင်းပခဲ့သော နိုင်ငံတကာ ဆန်စပါးညီလာခံတစ်ခုတွင် တင်ပြခဲ့သော အဆိုပါ အစီရင်ခံစာကို ကြည့်ရှုခွင့်ရရှိခဲ့ရာ၌ ယခုနှစ် ဖေဖော်ဝါရီလ လလယ် အထိ ဗီယက်နမ်၏ ဆန်တင်ပို့မှုမှာ တန်ချိန် ၆၆၃၀၀၀ ရှိပြီး ယခင်နှစ် ကာလတူနှင့် နှိုင်းယှဉ်ပါက ၁၄.၄% မြင့်တက်ခဲ့ကြောင်း၊ အယ်လ်နီညိုဖြစ်စဉ်သည် ၂၀၂၄ ခုနှစ်၊ နှစ်လယ်ကာလတိုင် ဖြစ်ပေါ် နိုင်ကြောင်း ခန့်မှန်းချက်များအရ အင်ဒိုနီးရှား၊ ဖိလစ်ပိုင်၊ မလေးရှား၊ တရုတ်နှင့် အာဖရိကနိုင်ငံများမှ ဆန်ဝယ်လိုအား မြင့်တက်လာခဲ့ကြောင်း ရိုက်တာသတင်းဌာနက ဖော်ပြပါသည်။

     အစိုးရက ရေးဆွဲချမှတ်ထားသည့် ဆန်တင်ပို့မှု မဟာဗျူဟာအရ ၂၀၃၀ ပြည့်နှစ်တွင် ဆန် တင်ပို့မှု တန်ချိန် ၄ သန်းသို့ ရောက်ရှိအောင် နှစ်စဉ်လျှော့ချ တင်ပို့မည်ဖြစ်ကြောင်း၊ ထို့အပြင် ဆန်စပါး စိုက်ပျိုးထုတ်လုပ်မှုတွင် ပိုးသတ်ဆေး ကဲ့သို့သော အပင်ရောဂါပိုးမွှား ကာကွယ်နှိမ်နင်းသည့် ပစ္စည်းများ၏ ဓာတ်ကြွင်းများပါဝင်မှုကို လျှော့ချဖြတ်တောက်မည်ဖြစ်ပြီး အရည်အသွေးမြင့်ဆန်များ ဈေးကွက်ဖြန့်ကျက်တင်ပို့မှုကို ဆောင်ရွက်မည်ဖြစ်ကြောင်း ဗီယက်နမ်နိုင်ငံက ယခင်နှစ်တွင် ပြောကြားထားခဲ့သည်။

Source: NASDAQ, 7 March 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)