ပြည်ပကုန်သွယ်မှုသတင်းများ

           တရုတ်နိုင်ငံ၊ နန်နင်းမြို့၌ ၂၃ ကြိမ်မြောက် တရုတ်-အာဆီယံ ကုန်စည်ပြပွဲ (CAEXPO) ကို ၁၇-၉-၂၀၂၆ ရက်နေ့က စတင်ကျင်းပခဲ့ပြီး ဒေသတွင်းနိုင်ငံများမှ အစိုးရနှင့် စီးပွားရေးလုပ်ငန်းရှင် များ ပါဝင်တက်ရောက်ခဲ့ကြသည်။ ကမ္ဘောဒီးယားနိုင်ငံမှလည်း ပြည်တွင်းထုတ်ကုန်များအတွက် နိုင်ငံတကာဈေးကွက်များ ပိုမိုရရှိရေးရည်ရွယ်၍ ပါဝင်ပြသခဲ့သည်။ ယခုနှစ်ပြပွဲတွင် အာဆီယံ-တရုတ် လွတ်လပ်သောကုန်သွယ်မှုဒေသ (ACFTA) (3.0) အောက်ရှိ အခွင့်အလမ်းများအပြင် ကုန်သွယ်ရေးနှင့် ရင်းနှီးမြှုပ်နှံမှု၊ ဒစ်ဂျစ်တယ်နည်းပညာ၊ ဉာဏ်ရည်တု (AI)၊ စိမ်းလန်းဖွံ့ဖြိုးရေးနှင့် ဒေသတွင်းထောက်ပံ့ရေးကွင်းဆက်များကို အဓိကထားဆွေးနွေးခဲ့ကြသည်။ ဖွင့်ပွဲအခမ်းအနားသို့ ကမ္ဘောဒီးယားနိုင်ငံ၊ ကူးသန်းရောင်းဝယ်ရေးဝန်ကြီး Cham Nimul နှင့် တရုတ်နိုင်ငံ၊ ဒုတိယဝန်ကြီးချုပ် Ding Xuexiang တို့အပြင် အာဆီယံအဖွဲ့ဝင်နိုင်ငံများ၊ အာဆီယံအတွင်း ရေးမှူးချုပ်ရုံးနှင့် ပုဂ္ဂလိကကဏ္ဍမှ ကိုယ်စားလှယ်များ တက်ရောက်ခဲ့ကြသည်။ ဒုတိယဝန်ကြီးချုပ် Ding က CAEXPO နှင့် တရုတ်-အာဆီယံ စီးပွားရေးနှင့် ရင်းနှီးမြှုပ်နှံမှု ထိပ်သီးအစည်းအဝေး (CABIS) တို့သည် ဒေသတွင်းစီးပွားရေး ပူးပေါင်းဆောင်ရွက်မှုအတွက် အရေးပါသည့် ပလက်ဖောင်းများဖြစ်ကြောင်း ပြောကြားခဲ့သည်။ တရုတ်နိုင်ငံအနေဖြင့် အဆိုပါ ပလက်ဖောင်းများကို ထိရောက်စွာအသုံးချကာ ကုန်သွယ်ရေး၊ ရင်းနှီးမြှုပ်နှံမှု၊ ပေါ်ထွန်းလာသည့် စက်မှုလုပ်ငန်းများနှင့် ချိတ်ဆက်မှုကဏ္ဍများတွင် အာဆီယံနိုင်ငံများနှင့် ပူးပေါင်းဆောင်ရွက်မှု တိုးမြှင့်သွားမည်ဟု ထပ်လောင်းပြောကြားခဲ့သည်။ အာဆီယံအတွင်းရေးမှူးချုပ် Kao Kim Hourn ကလည်း ACFTA 3.0 မှ ရရှိလာမည့် အကျိုးကျေးဇူးများကို စီးပွားရေးလုပ်ငန်းများ၊ အထူးသဖြင့် အသေးစားနှင့် အလတ်စားလုပ်ငန်းများက လက်တွေ့ခံစားနိုင်ရန် အရေးကြီးကြောင်း ပြောကြားခဲ့သည်။ ကမ္ဘောဒီးယားနိုင်ငံသည် အမျိုးသားပြခန်းနှင့် စီးပွားရေးလုပ်ငန်းများ၏ ထုတ်ကုန်ပြခန်းများဖြင့် ပါဝင်ခဲ့ပြီး ပြပွဲတွင် ပါဝင်ခဲ့သည့် Kandal ပြည်နယ်အခြေစိုက် Ramaneth Gem and Souvenir Handcraft လုပ်ငန်းသည် ၂၀၁၀ ပြည့်နှစ်ကတည်းက လက်မှုပစ္စည်းများ၊ ငွေနှင့် ကျောက်မျက်ရတနာများဖြင့် ပြုလုပ်သည့် အမျိုးသမီးလက်ဝတ်ရတနာများကို ထုတ်လုပ်ရောင်းချနေပြီး ဒေသခံလက်မှုပညာရှင်များကိုလည်း အထောက်အပံ့ပေးလျက်ရှိသည်။ လုပ်ငန်းပိုင်ရှင် Heur Ramaneth က ယခုအကြိမ်သည် နန်နင်းကုန်စည်ပြပွဲသို့ လေးကြိမ်မြောက် ပါဝင်ခြင်းဖြစ်ပြီး ယခင်က တရုတ်၊ ဗီယက်နမ်နှင့် စင်ကာပူဈေးကွက်များသို့ ထုတ်ကုန်များ တင်ပို့ရောင်းချခဲ့ကြောင်း ပြောကြားခဲ့သည်။ ပြပွဲများတွင် ထပ်ခါတလဲလဲ ပါဝင်ခြင်းသည် ဖောက်သည်များ၏ လိုအပ်ချက်ကို နားလည်လာစေပြီး ဒေသတွင်းနှင့် နိုင်ငံတကာဈေးကွက်များအတွက် ထုတ်ကုန်များအားပိုမိုကောင်းမွန်အောင် ပြင်ဆင်နိုင်ခဲ့ကြောင်းလည်း ထပ်လောင်းပြောကြားခဲ့သည်။ ယခင်ပြပွဲများတွင် ထုတ်ကုန်များကို ပြသရန် အဓိကထားခဲ့သော်လည်း နောက်ပိုင်းတွင် စီးပွားရေးမိတ်ဖက်များနှင့် ဆက်သွယ်နိုင်ရန်အတွက်လည်း အခွင့်အလမ်းများ ရရှိလာကြောင်း Ramaneth က ပြောကြားခဲ့သည်။ ယခုနှစ် CAEXPO တွင် နိုင်ငံနှင့် ဒေသပေါင်း ၇၀ ကျော်မှ ကုမ္ပဏီ ၃,၄၀၀ ကျော် ပါဝင်ခဲ့ပြီး ယခင်အကြိမ်နှင့် နှိုင်းယှဉ်ပါက ပါဝင်မှု ၅.၃ ရာခိုင်နှုန်း မြင့်တက်လာခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)

           ကမ္ဘောဒီးယားနိုင်ငံသည် တောင်ကိုရီးယားကုမ္ပဏီများအတွက် စိုက်ပျိုးရေး၊ လယ်ယာထွက် ကုန်ပြုပြင်ထုတ်လုပ်ရေးနှင့် ဆည်မြောင်းကဏ္ဍများတွင် ရင်းနှီးမြှုပ်နှံနိုင်မည့် အခွင့်အလမ်းများကို မိတ်ဆက်ခဲ့ကြောင်း သိရသည်။ အဆိုပါအကြောင်းအရာကို အထက်လွှတ်တော် ယာယီအထက် လွှတ်တော်ဥက္ကဋ္ဌ Ouch Borith က တောင်ကိုရီးယား သံအမတ် Kim Chang Yong နှင့် စက်တင်ဘာ ၁၆ ရက်တွင် တွေ့ဆုံစဉ် ပြောကြားခဲ့ခြင်းဖြစ်သည်။ တွေ့ဆုံမှုတွင် ကမ္ဘောဒီးယား၏ စိုက်ပျိုးရေး၊ လယ်ယာထွက်ကုန်ပြုပြင် ထုတ်လုပ်ရေးနှင့် ဆည်မြောင်းကဏ္ဍများ၌ နှစ်နိုင်ငံ ပူးပေါင်းဆောင်ရွက်မှုနှင့် ရင်းနှီးမြှုပ်နှံမှုများ တိုးမြှင့်နိုင်ရေးဆွေးနွေးခဲ့ကြသည်။ တောင်ကိုရီးယား သံအမတ်က မကြာသေးမီက ကမ္ဘောဒီးယားသို့ လာရောက်လေ့လာခဲ့သည့် ကိုရီးယားကုမ္ပဏီများအနက် အချို့မှာ ရင်းနှီးမြှုပ်နှံမှုစီမံကိန်းများကို လက်တွေ့အကောင် အထည်ဖော်ရန် ဆောင်ရွက်နေပြီဖြစ်ကြောင်း ပြောကြားခဲ့သည်။ ထိုစီမံကိန်းများအနက် Kampong Thom ပြည်နယ်တွင် သီဟိုဠ်စေ့ ပြုပြင်ထုတ်လုပ်သည့်စက်ရုံ တည်ဆောက်မည့် စီမံကိန်းပါဝင်ပြီး ၂၀၂၇ ခုနှစ်တွင် ထုတ်ကုန်များ စတင်တင်ပို့ရန် မျှော်မှန်းထားကြောင်း ပြောကြားခဲ့သည်။ ထို့အပြင် တောင်ကိုရီးယား အစိုးရ၏ ပံ့ပိုးမှုဖြင့် ကမ္ဘောဒီးယားမြောက်ပိုင်းတွင် ဆောင်ရွက်နေသည့် ဆည်မြောင်းဖွံ့ ဖြိုးရေးစီမံကိန်းကို အနောက်ပိုင်းပြည်နယ်များသို့ တိုးချဲ့ရန်လည်း ဆွေးနွေးခဲ့ကြောင်း သိရှိရပါသည်။

Source: Khmer Times                                                           

DOCA(ရန်ကုန်)

          တရုတ်နိုင်ငံသည် စက်တင်ဘာလ ၁၆ ရက်နေ့တွင် Pinglu Canal ကို တရားဝင်ဖွင့်လှစ် လိုက်ပြီး ပင်လယ် ထွက်ပေါက်မရှိသည့် တရုတ်နိုင်ငံအနောက်တောင်ပိုင်းဒေသများမှ ကုန်ပစ္စည်း များကို ကမ်းရိုးတန်း နှင့် နိုင်ငံတကာဈေးကွက်များသို့ ပိုမိုတိုက်ရိုက်ပို့ဆောင်နိုင်မည့် လမ်းကြောင်း သစ်တစ်ခု ပေါ်ပေါက် လာခဲ့သည်။ အထူးသဖြင့် တရုတ်နိုင်ငံ၏ အကြီးဆုံးကုန်သွယ်ဖက်ဖြစ်သည့် ASEAN နိုင်ငံများနှင့် ကုန်သွယ်ရေးအတွက် အရေးပါလာမည်ဟု မျှော်လင့်ထားသည်။

ယွမ် ၇၂.၇ ဘီလီယံ (အမေရိကန်ဒေါ်လာ ၁၀.၇၅ ဘီလီယံခန့်) ကုန်ကျခဲ့သည့် အဆိုပါတူးမြောင်းသည် အရှည် ၁၃၄.၂ ကီလိုမီတာ ရှိပြီး တရုတ်နိုင်ငံတောင်ပိုင်း Guangxi Zhuang Autonomous Region ရှိ Hengzhou မြို့မှ Beibu Gulf သို့ ဆက်သွယ်ပေးထားသည်။ Beibu Gulf သည် တရုတ်နိုင်ငံအနောက်တောင်ပိုင်းဒေသများအတွက် အနီးဆုံးပင်လယ်ထွက်ပေါက်ဖြစ်သည်။

          Pinglu Canal သည် တရုတ်နိုင်ငံအတွင်းပိုင်းဒေသများကို ASEAN နှင့် ကမ္ဘာ့ဈေးကွက်များ သို့ ဆက်သွယ်ပေးသည့် New International Land-Sea Trade Corridor တစ်လျှောက် တည်ရှိသည်။ ၎င်းသည် ၁၉၄၉ ခုနှစ် တရုတ်ပြည်သူ့သမ္မတနိုင်ငံ တည်ထောင်ပြီးနောက် နိုင်ငံ အဆင့်ဖြင့် စီမံကိန်းရေးဆွဲကာ အကောင်အထည်ဖော်သည့် ပထမဆုံး မြစ်–ပင်လယ်တူးမြောင်း စီမံကိန်း ဖြစ်သည်။ တစ်တန် ၅,၀၀၀ အထိ အလေးချိန်ရှိသည့် သင်္ဘောများ ဖြတ်သန်းနိုင်ရန် ဒီဇိုင်း ပြုလုပ်ထားသည်။ ရိုးရာအတိုင်း Guangdong Province ရှိ ဆိပ်ကမ်းများကို ဖြတ်သန်းသွားရသည့် လမ်းကြောင်းနှင့်နှိုင်းယှဉ်ပါက တရုတ်နိုင်ငံအနောက်တောင်ပိုင်းမှ ကုန်ပစ္စည်းများ ပင်လယ်သို့ ရောက်ရန် လှေဖြင့်သွားရမည့် အကွာအဝေးကို ၅၆၀ ကီလိုမီတာကျော် လျှော့ချပေးနိုင်မည် ဖြစ်သည်။

           ထို့အပြင် စုစုပေါင်း ထောက်ပံ့ပို့ဆောင်ရေးကုန်ကျစရိတ်ကို ၁၈ ရာခိုင်နှုန်းမှ ၃၀ ရာခိုင်နှုန်းအထိ လျှော့ချနိုင်ပြီး နှစ်စဉ် သယ်ယူပို့ဆောင်ရေးကုန်ကျစရိတ် ယွမ် ၅ ဘီလီယံကျော် သက်သာစေမည်ဟု ခန့်မှန်းထားသည်။ Lu Xinning, Guangxi ဒေသအစိုးရ ဒုတိယဥက္ကဋ္ဌက ယင်းတူးမြောင်းသည် တရုတ်နိုင်ငံရှိ လူဦးရေ ၁.၄ ဘီလီယံ ခန့်ရှိသည့် ဈေးကွက်နှင့် ASEAN ဒေသရှိ စားသုံးသူ သန်း ၇၀၀ နီးပါး ကို ဆက်သွယ်ပေးသည့် လမ်းကြောင်းသစ်တစ်ခု ဖြစ်လာကြောင်း ပြောကြားခဲ့သည်။

       ထိုသက်ရောက်မှုသည် ကုန်ပစ္စည်းများ သယ်ယူပို့ဆောင်ရေးအပြင် နယ်စပ်ဖြတ်ကျော် ရင်းနှီးမြှုပ်နှံမှုများ တိုးမြင့်လာခြင်းနှင့် ဒေသတွင်း ထောက်ပံ့ရေးကွင်းဆက်များ ပိုမိုပေါင်းစည်းလာခြင်းကိုလည်း အထောက်အကူပြုနိုင်ကြောင်း ၎င်းကပြောကြားခဲ့သည်။      

   DOCA (ရန်ကုန်)

                                   ကမ္ဘောဒီးယားနှင့် ဂျပန်နိုင်ငံမှ ထုတ်လုပ်ရေးနည်းပညာကုမ္ပဏီ MinebeaMitsumi Inc. တို့သည် အဆင့်မြင့်ထုတ်လုပ်ရေး၊ ကျွမ်းကျင်လုပ်သားဖွံ့ဖြိုးရေးနှင့် သဘာဝပတ်ဝန်းကျင်နှင့် ကိုက်ညီသော ထုတ်လုပ်ရေးလုပ်ငန်းများတွင် ရင်းနှီးမြှုပ်နှံမှုနှင့် ပူးပေါင်းဆောင်ရွက်မှုများ တိုးချဲ့ရန် ဆွေးနွေးခဲ့ကြသည်။ ဂျပန်နိုင်ငံဆိုင်ရာ ကမ္ဘောဒီးယားသံအမတ်ကြီး Chum Sounry သည် ဂျပန်နိုင်ငံ၊ တိုကျိုမြို့ရှိ MinebeaMitsumi ရုံးချုပ်သို့ သွားရောက်ကာ ကုမ္ပဏီဥက္ကဋ္ဌနှင့် အမှုဆောင်အရာရှိချုပ် Yoshihisa Kainuma နှင့် တွေ့ဆုံဆွေးနွေးခဲ့ခြင်းဖြစ်ကြောင်း ဂျပန်နိုင်ငံ ဆိုင်ရာ ကမ္ဘောဒီးယားသံရုံးက ထုတ်ပြန်ထားသည်။ သံအမတ်ကြီးက ကမ္ဘောဒီးယားနိုင်ငံတွင် ရင်းနှီးမြှုပ်နှံထားသည့် MinebeaMitsumi ကို ကျေးဇူးတင်ရှိကြောင်း ပြောကြားပြီး အလုပ်အကိုင် အခွင့်အလမ်းများဖန်တီးပေးမှု၊ နည်းပညာလွှဲပြောင်းပေးမှုနှင့်ရေရှည်တည်တံ့သောထုတ်လုပ်ရေးကဏ္ဍဖွံ့ဖြိုးတိုးတက်ရေးအတွက်ကုမ္ပဏီ၏ပံ့ပိုးမှုကိုအသိအမှတ်ပြုကြောင်း ပြောကြားခဲ့ သည်။ ထို့အပြင် Pursat ပြည်နယ်အပါအဝင် ကမ္ဘောဒီးယားနိုင်ငံအတွင်း လုပ်ငန်းတိုးချဲ့နေမှုကို ကြိုဆိုခဲ့ပြီး မြို့တော်ပြင်ပဒေသများတွင် စက်မှုလုပ်ငန်းများ ဖွံ့ဖြိုးလာခြင်းက အလုပ်အကိုင်နှင့် ဒေသတွင်းစီးပွားရေးအခွင့်အလမ်းများ ပိုမိုဖန်တီးပေးနိုင်မည်ဟု ထပ်လောင်းပြောကြားခဲ့သည်။ နှစ်ဖက်စလုံးက အဆင့်မြင့်တိကျစွာထုတ်လုပ်ရေး၊ နည်းပညာ၊ လူ့စွမ်းအားအရင်းအမြစ် ဖွံ့ဖြိုးရေးနှင့် သဘာဝပတ်ဝန်းကျင်နှင့် လိုက်လျောညီထွေသော ထုတ်လုပ်ရေးကဏ္ဍများတွင် ပူးပေါင်းဆောင်ရွက်မှု တိုးမြှင့်ရန် အလားအလာများကို ဆွေးနွေးခဲ့ကြသည်။ ကမ္ဘောဒီးယားနိုင်ငံသည်တန်ဖိုးမြင့်ထုတ်လုပ်ရေးလုပ်ငန်းများဘက်သို့ ကူးပြောင်းရန် ရည်မှန်းထားသဖြင့် အင်ဂျင်နီယာများ၊ နည်းပညာကျွမ်းကျင်သူများနှင့် ကျွမ်းကျင်လုပ်သားများ မွေးထုတ်ပေးရန် လိုအပ်ကြောင်း သံအမတ်ကြီးက အလေးပေးပြောကြားခဲ့သည်။ ထို့အပြင် MinebeaMitsumi နှင့် ကမ္ဘောဒီးယားရှိ သက်ဆိုင်ရာအဖွဲ့အစည်းများအကြား အလုပ်သင်၊ ပညာသင်ဆု၊ နည်းပညာ သင်တန်းနှင့် ဝန်ထမ်းဖလှယ်ရေးအစီအစဉ်များ ပူးပေါင်းဆောင်ရွက်ရန်လည်း တိုက်တွန်းခဲ့သည်။ ကမ္ဘောဒီးယားနိုင်ငံရှိ MinebeaMitsumi လုပ်ငန်းများနှင့် ဆက်စပ်သည့် ပြန်လည်ပြည့်ဖြိုးမြဲ စွမ်းအင် အသုံးပြုရေးအစီအစဉ်များကိုလည်း ကြိုဆိုခဲ့ပြီး သဘာဝပတ်ဝန်းကျင်ထိန်းသိမ်းရေးနှင့် ရေရှည်တည်တံ့သော ထုတ်လုပ်ရေးကဏ္ဍတွင် ပူးပေါင်းဆောင်ရွက်မှု ပိုမိုခိုင်မာစေရန် ကမ္ဘောဒီးယားနိုင်ငံအနေဖြင့် စိတ်ဝင်စားကြောင်း ပြောကြားခဲ့သည်။ သံရုံး၏ ထုတ်ပြန်ချက်အရ အဆိုပါခရီးစဉ်သည် ကမ္ဘောဒီးယား-ဂျပန် စီးပွားရေးဆက်ဆံရေး ပိုမိုခိုင်မာစေရန်နှင့် စက်မှု ဖွံ့ဖြိုးရေး၊ လူ့စွမ်းအားအရင်းအမြစ် ဖွံ့ဖြိုးရေးနှင့် တန်ဖိုးမြင့်ထုတ်လုပ်ရေးကဏ္ဍများတွင် ပူးပေါင်း ဆောင်ရွက်နိုင်မည့် အခွင့်အလမ်းများ ရှာဖွေရန် နှစ်ဖက်စလုံး၏ စိတ်ဝင်စားမှုကို ဖော်ပြခဲ့သည်။

DOCA (ရန်ကုန်)

                   ကမ္ဘောဒီးယားနိုင်ငံ၏ ဖိလစ်ပိုင်နိုင်ငံသို့ ဆန်တင်ပို့မှုသည် ၂၀၂၆ ခုနှစ်အတွင်း တန်ချိန် ၂ သိန်းကျော် ရှိလာမည်ဟု ခန့်မှန်းထားပြီး ယခုနှစ်တွင် နိုင်ငံ၏ စုစုပေါင်းဆန်တင်ပို့မှု တန်ချိန် ၁ သန်းကျော် ရရှိရန် ရည်မှန်းချက်အတွက် အထောက်အကူဖြစ်လာမည်ဖြစ်သည်။ ကမ္ဘောဒီးယား ဆန်အဖွဲ့ချုပ် (CRF) ၏ အစီရင်ခံစာအရ ယခုနှစ် ဇန်နဝါရီမှ ဩဂုတ်လအထိ ဖိလစ်ပိုင်နိုင်ငံသို့ ဆန်တန်ချိန် ၁၂၂,၁၀၂ တန် တင်ပို့ထားပြီး အဆိုပါပမာဏသည် ထိုကာလအတွင်း ကမ္ဘောဒီးယား၏ စုစုပေါင်းဆန်တင်ပို့မှု တန်ချိန် ၇၉၂,၂၁၂ တန်၏ ၁၅.၄ ရာခိုင်နှုန်းကျော် ရှိသည်။ ထို့အပြင် စက်တင်ဘာမှ ဒီဇင်ဘာလအတွင်း ဖိလစ်ပိုင်သို့ တင်ပို့ရန် စာချုပ်ချုပ်ဆိုထားသည့် ဆန်ဝယ်ယူမှုများမှ တန်ချိန် ၈၇,၃၄၄ တန်ခန့် ထပ်မံတင်ပို့နိုင်မည်ဖြစ်သဖြင့် ယခုနှစ်အတွင်း ဖိလစ်ပိုင်ဈေးကွက်သို့ ဆန်တင်ပို့မှုပမာဏသည် စုစုပေါင်း တန်ချိန် ၂၀၉,၄၄၆ ခန့်အထိ ရောက်ရှိနိုင်ကြောင်း CRF က ခန့်မှန်းထားသည်။ ၁၄-၉-၂၀၂၆ ရက်နေ့က ကမ္ဘောဒီးယား ဆန်စက်နှင့် ဆန်တင်ပို့ရေးကုမ္ပဏီ City Rice Import Export Co Ltd သည် DILAI Trading Co Pte Ltd နှင့် ဖနွမ်းပင်မြို့တွင် ဆန်တန်ချိန် ၁၀,၀၀၀ ဝယ်ယူရန် သဘောတူစာချုပ် လက်မှတ်ရေးထိုးခဲ့ပြီး ဆန်များကို ဖိလစ်ပိုင်နိုင်ငံသို့ တင်ပို့သွားမည်ဖြစ်သည်။ အဆိုပါ သဘောတူညီချက်သည် ကမ္ဘောဒီးယားဆန်ကဏ္ဍအတွက် အရေးပါသည့် ခြေလှမ်းတစ်ရပ် ဖြစ်သကဲ့သို့ နှစ်နိုင်ငံကုန်သွယ်ရေးဆက်ဆံမှုကိုလည်း ပိုမိုခိုင်မာလာစေမည်ဟု CRF မှ ထုတ်ပြန် ထားသည်။ နိုင်ငံတကာဆန်ဝယ်လက်များအနေဖြင့် ကမ္ဘောဒီးယားဆန်၏ အရည်အသွေး၊ ဘေးကင်းလုံခြုံမှု၊ ဈေးကွက်ယှဉ်ပြိုင်နိုင်စွမ်းနှင့် လိုအပ်သည့်ပမာဏအတိုင်း ဖြည့်ဆည်းပေးနိုင်မှု တို့အပေါ် ယုံကြည်မှု ပိုမိုမြင့်တက်လာခြင်းကို ယခုသဘောတူညီချက်က ဖော်ပြနေကြောင်း CRF မှ ထုတ်ပြန်ထားသည်။ ထို့အပြင် ကမ္ဘောဒီးယားဆန်ကုမ္ပဏီများအနေဖြင့် ဆန်ကို စနစ်တကျကြိတ်ခွဲပြုပြင်ထုတ်လုပ်နိုင်ခြင်း၊ အရည်အသွေးစံနှုန်းများကို ထိန်းသိမ်းနိုင်ခြင်းနှင့် ပမာဏအများအပြားကို နိုင်ငံတကာဈေးကွက်များသို့ ထိရောက်စွာ တင်ပို့နိုင်ခြင်းတို့ကိုလည်း ပြသနိုင်ခဲ့ကြောင်း အဖွဲ့ချုပ်၏ ထုတ်ပြန်ချက်အရ သိရသည်။ 

DOCA (ရန်ကုန်)