Main menu

ပြည်ပကုန်သွယ်မှုသတင်းများ

Powered by Drupal

ကမ္ဘောဒီးယားနှင့် ဂျာမနီ စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှု မြှင့်တင်ရန် ဆွေးနွေး

ပြည်ပကုန်သွယ်မှုသတင်းများ

              ကမ္ဘောဒီးယားနှင့် ဂျာမနီနိုင်ငံတို့သည် စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်မှု ပိုမိုမြှင့်တင်ရန် ဆွေးနွေးခဲ့ကြပြီး ကမ္ဘောဒီးယားနိုင်ငံဆိုင်ရာ ဂျာမန်သံအမတ်အသစ် Silke Röfer က ဂျာမန်ကုမ္ပဏီများအား ကမ္ဘောဒီးယားတွင် လာရောက် ရင်းနှီးမြှုပ်နှံရန် တိုက်တွန်းအားပေးသွားမည်ဟု ပြောကြားခဲ့သည်။ အဆိုပါ ဆွေးနွေးမှုကို ၁၅-၉-၂၀၂၆ ရက်နေ့ မွန်းလွဲပိုင်းတွင် ယာယီနိုင်ငံတော်အကြီးအကဲ Hun Sen က ကမ္ဘောဒီးယားနိုင်ငံ ဆိုင်ရာ ဂျာမန်သံအမတ်အသစ် Silke Röfer ကို အထက်လွှတ်တော် Samakki Hall ၌ သံအမတ် ခန့်အပ်လွှာ လက်ခံရယူစဉ် ပြုလုပ်ခဲ့ခြင်းဖြစ်သည်။ တွေ့ဆုံမှုအပြီးတွင် အထက်လွှတ်တော် ပြောရေးဆိုခွင့်ရှိသူ Chea Thyrith က သံအမတ် Röfer ၏ ခန့်အပ်မှုသည် ကမ္ဘောဒီးယား-ဂျာမနီ နှစ်နိုင်ငံဆက်ဆံရေး ပိုမိုခိုင်မာလာစေရန် အရေးပါသည့် အခန်းကဏ္ဍမှ ပါဝင်မည်ဟု ပြောကြားခဲ့သည်။ သံအမတ် Röfer က ၎င်း၏တာဝန်ထမ်းဆောင်သည့်ကာလအတွင်း နှစ်နိုင်ငံ စီးပွားရေးနှင့် ကုန်သွယ်ရေး ပူးပေါင်းဆောင်ရွက်မှု မြှင့်တင်ရေးအတွက် ကြိုးပမ်းသွားမည်ဖြစ်ပြီး အထူးသဖြင့် ဂျာမန်စီးပွားရေးလုပ်ငန်းရှင်များ ကမ္ဘောဒီးယားတွင် လာရောက်ရင်းနှီးမြှုပ်နှံရန် ဆွဲဆောင်အားပေးသွားမည်ဟု ပြောကြားခဲ့ကြောင်း Thyrith က ထပ်လောင်းပြောကြားခဲ့သည်။ ဟွန်ဆန်ကလည်း သံအမတ် Röfer ၏ အဆိုပါကတိကဝတ်ကို ကြိုဆိုခဲ့ပြီး နှစ်နိုင်ငံအကြား စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှုဆက်ဆံရေး ပိုမိုတိုးမြှင့်ရန် အလေးထားကြောင်း ပြောကြားခဲ့သည်။ ကမ္ဘောဒီးယားနှင့် ဂျာမနီ နှစ်နိုင်ငံအကြား ကုန်သွယ်မှုပမာဏသည် အမေရိကန်ဒေါ်လာ ၃ ဘီလီယံခန့်အထိ ရှိလာပြီဖြစ်ပြီး ဆက်လက်တိုးတက်လာမည်ဟု မျှော်လင့်ထားကြောင်း Hun Sen က ပြောကြားခဲ့သည်။

DOCA (ရန်ကုန်)

 

 

ကမ္ဘောဒီးယားနှင့် တောင်ကိုရီးယား ကုန်သွယ်ရေးပူးပေါင်းဆောင်ရွက်မှု တိုးမြှင့်မည်

ပြည်ပကုန်သွယ်မှုသတင်းများ

               ကမ္ဘောဒီးယားနှင့် တောင်ကိုရီးယားနိုင်ငံတို့သည် နှစ်နိုင်ငံအကြား ကုန်သွယ်ရေး ဆက်ဆံမှုများ ပိုမိုတိုးမြှင့်ရန် ကတိပြုခဲ့ကြပြီး ကုန်သွယ်မှု လွယ်ကူချောမွေ့စေရေးနှင့် အစိုးရဝန်ဆောင်မှုများ ခေတ်မီတိုးတက်ရေးတို့ကို အဓိကထား ပူးပေါင်းဆောင်ရွက်သွားမည်ဖြစ်သည်။ ကမ္ဘောဒီးယား ကုန်သွယ်ရေးဝန်ကြီး Cham Nimul နှင့် ကမ္ဘောဒီးယားနိုင်ငံဆိုင်ရာ တောင်ကိုရီးယား သံအမတ်ကြီး Kim Chang Yong တို့သည် ၁၄-၉-၂၀၂၆ ရက်နေ့က ကုန်သွယ်ရေးဝန်ကြီးဌာန၌ တွေ့ဆုံကာ နှစ်နိုင်ငံစီးပွားရေးနှင့် ကုန်သွယ်ရေးဆိုင်ရာ ပူးပေါင်း ဆောင်ရွက်မှုများကို ဆွေးနွေးခဲ့ကြသည်။ တွေ့ဆုံစဉ် ဝန်ကြီး Cham Nimul က သံအမတ်ကြီး Kim Chang Yong အား ကြိုဆိုခဲ့ပြီး ၎င်း၏ တာဝန်သစ်အတွက် ဂုဏ်ပြုစကား ပြောကြားခဲ့သည်။ ထို့အပြင် နှစ်နိုင်ငံအကြား ကာလရှည်ကြာ ခိုင်မာသည့် ချစ်ကြည်ရင်းနှီးမှုနှင့် ဆက်လက်တိုးတက်နေသည့် နှစ်နိုင်ငံကုန်သွယ်ရေးအခြေအနေကိုလည်း နှစ်ဖက်စလုံးက အလေးထားဖော်ပြခဲ့ကြသည်။ သံအမတ်ကြီး Kim Chang Yong က ကုန်သွယ်မှု လွယ်ကူချောမွေ့ စေရန် အစိုးရဝန်ဆောင်မှုများကို ခေတ်မီတိုးတက်အောင် ဆောင်ရွက်နေသည့် ကမ္ဘောဒီးယား ကုန်သွယ်ရေးဝန်ကြီးဌာန၏ ကြိုးပမ်းမှုများကို အသိအမှတ်ပြု ကျေးဇူးတင်ကြောင်း ပြောကြား ခဲ့သည်။ နှစ်နိုင်ငံအနေဖြင့် လက်ရှိပူးပေါင်းဆောင်ရွက်မှုများကို ဆက်လက်ခိုင်မာအောင် ဆောင်ရွက်ပြီး ကုန်သွယ်ရေးနှင့် စီးပွားရေးဆက်ဆံမှုများကို ပိုမိုတိုးချဲ့သွားရန် သဘောတူခဲ့ကြသည်။

DOCA (ရန်ကုန်)

 

ကမ္ဘောဒီးယား-မလေးရှား ကုန်သွယ်ရေးနှင့် ရင်းနှီးမြှုပ်နှံမှု တိုးမြှင့်ရန် ဆွေးနွေး

ပြည်ပကုန်သွယ်မှုသတင်းများ

                                   ကမ္ဘောဒီးယား ကုန်သည်များနှင့် စက်မှုလက်မှုလုပ်ငန်းရှင်များအသင်း (CCC) ဥက္ကဋ္ဌ Kith Meng နှင့် ကမ္ဘောဒီးယားနိုင်ငံဆိုင်ရာ မလေးရှားသံအမတ်ကြီး Shaharuddin Onn တို့ ၁၄-၉-၂၀၂၆ ရက်နေ့ကတွေ့ဆုံ၍ နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်း ဆောင်ရွက်မှုများ တိုးမြှင့်ရေး ဆွေးနွေးခဲ့ကြသည်။  Kith Meng က မလေးရှားစီးပွားရေး လုပ်ငန်းရှင်များအနေဖြင့် ကမ္ဘောဒီးယား၏ အလားအလာကောင်းသည့် ကဏ္ဍများတွင် ရင်းနှီး မြှုပ်နှံရန်တိုက်တွန်းခဲ့ပြီး ကမ္ဘောဒီးယားတွင်ရင်းနှီးမြှုပ်နှံမှုအတွက် အဆင်ပြေသည့် ပတ်ဝန်းကျင် ရှိကြောင်း ပြောကြားခဲ့သည်။ ထို့အပြင် CCC နှင့် အဂတိလိုက်စားမှုတိုက်ဖျက်ရေးဌာန (ACU) တို့အကြား လက်မှတ်ရေးထိုးထားသည့် MoU သည် ပုဂ္ဂလိကကဏ္ဍ ပွင့်လင်းမြင်သာမှုနှင့် ရင်းနှီးမြှုပ်နှံမှုပတ်ဝန်းကျင်ကောင်းမွန်မှုကို ပြသကြောင်း ၎င်းက ဆိုသည်။ သံအမတ်ကြီးကကမ္ဘောဒီးယား၏ပုဂ္ဂလိကကဏ္ဍတိုးတက်လာမှုသည်မလေးရှားရင်းနှီးမြှုပ်နှံသူများအတွက် အလားအလာကောင်းတစ်ရပ်ဖြစ်ကြောင်း ပြောကြားခဲ့သည်။  မလေးရှားနိုင်ငံ၊ နိုင်ငံခြားရေး ဝန်ကြီးဌာန ၏ ထုတ်ပြန်ချက်အရ ၂၀၂၅ ခုနှစ်တွင် နှစ်နိုင်ငံကုန်သွယ်မှုပမာဏသည် အမေရိကန်ဒေါ်လာ ၁.၁၇ ဘီလီယံရှိပြီး ယခင်နှစ်ထက် ၂၇.၄ ရာခိုင်နှုန်း တိုးတက်ခဲ့သည်။ ၂၀၂၄ ခုနှစ်အထိ ကမ္ဘောဒီးယားတွင် မလေးရှား၏ စုစုပေါင်းရင်းနှီးမြှုပ်နှံမှုမှာ အမေရိကန်ဒေါ်လာ ၃.၂ ဘီလီယံခန့် ရှိခဲ့သည်။ ထို့အပြင် Kith Meng က ကမ္ဘောဒီးယား-ထိုင်း နယ်စပ်အရေးအခင်းအတွင်း မလေးရှား၏ ကြားဝင်ညှိနှိုင်းပေးမှုကို ကျေးဇူးတင်ကြောင်း ပြောကြားခဲ့သည်။  

DOCA (ရန်ကုန်)

ငါးဖြန့်ဖြူးရေးကွန်ရက်များနှင့် ငါးဖမ်းကျေးရွာများကိုချိတ်ဆက်ပေးမည့်အင်ဒိုနီးရှား

ပြည်ပကုန်သွယ်မှုသတင်းများ

                            အင်ဒိုနီးရှားပင်လယ်ရေကြောင်းနှင့် ငါးလုပ်ငန်းဝန်ကြီးဌာနသည် အနီရောင်နှင့် အဖြူ ရောင် ငါးဖမ်းကျေးရွာများ (KNMP) အစီအစဉ်အောက်ရှိကျေးရွာများကို ဒေသအချင်းချင်း ငါးဖြန့်ဖြူးရေးကွန်ရက်၏ အဓိကအချက်အချာနေရာများအဖြစ်ဖော်ဆောင်ကာ ငါးဖမ်းလုပ်သား များအတွက် ဈေးကွက်ချဲ့ထွင်နိုင်ရေးဆောင်ရွက်သွားမည်ဖြစ်ကြောင်း သိရပါသည်။ ဒုတိယ ဝန်ကြီး Didit Herdiawan Ashad က ယခုနှစ်အတွင်း နိုင်ငံတော်ဦးစားပေးအစီအစဉ်ဖြင့် ငါးဖမ်းကျေးရွာ ၁၂၆၉ ရွာကို အဆင့်မြှင့်တင်ပေးသွားမည်ဖြစ်ပြီး ကမ်းရိုးတန်းဒေသခံများ၊ အထူးသဖြင့် သွားလာရန်ခက်ခဲသည့်ဒေသများရှိ လူထု၏ထုတ်လုပ်မှုနှင့် လူမှုစီးပွားဘဝ မြှင့်တင် ရေးကိုရည်ရွယ်ကြောင်း စက်တင်ဘာလ ၁၄ ရက်နေ့က ဂျကာတာမြို့၌ကျင်းပသည့် ဆင်းရဲ နွမ်းပါးသောအိမ်ရာရပ်ကွက်များ စီမံခန့်ခွဲရေးဆိုင်ရာဖိုရမ်တွင် ပြောကြားခဲ့ပါသည်။ KNMP ကျေးရွာများကို ဒေသတစ်ခုချင်းစီ၏အလားအလာနှင့် ငါးဖမ်းလုပ်သားအရေအတွက်အပေါ် မူတည်၍ဖော်ဆောင်မည်ဖြစ်ကြောင်း၎င်းကဆိုပါသည်။ငါးဖမ်းလုပ်သားအများအပြားရှိသည့်ကျေးရွာများကို အချက်အချာနေရာများအဖြစ်သတ်မှတ်မည်ဖြစ်ပြီး လူ့စွမ်းအားအရင်းအမြစ် နည်းပါးသည့်ကျေးရွာများက အဆိုပါအချက်အချာနေရာများသို့ ငါးနှင့် ငါးလုပ်ငန်းထွက်ကုန်များပံ့ပိုးပေးသည့်အထောက်အကူပြုဒေသများအဖြစ်ဆောင်ရွက်မည်ဖြစ်ကြောင်း သိရပါသည်။ ယင်းစနစ်ဖြင့် ကမ်းရိုးတန်းဒေသခံများသည် မိမိတို့ဒေသတွင်း၌သာမက အခြားဒေသများသို့ပါ ငါးလုပ်ငန်းထွက်ကုန်များ ဖြန့်ဖြူးရောင်းချနိုင်မည်ဖြစ်ပြီး နောက်ပိုင်းတွင် ပို့ကုန်ဈေးကွက်များ အထိဝင်ရောက်နိုင်ရန် အခွင့်အလမ်းရရှိမည်ဖြစ်ကြောင်း Ashad က ပြောကြားခဲ့ပါသည်။ KNMP အစီအစဉ်တွင် ထုတ်လုပ်မှုနှင့် လူမှုစီးပွားဘဝမြှင့်တင်နိုင်ရန်လိုအပ်သည့် အခြေခံအဆောက် အအုံနှင့် အထောက်အကူပြုစက်ကိရိယာများဖြစ်သည့် ရေခဲစက်ရုံ၊ သိုလှောင်ရုံ၊ ငါးဖမ်းလုပ်သား များအတွက် လောင်စာဆီဆိုင်၊ လှေဆိုက်ကပ်ရန်နေရာ၊ လှေပြုပြင်ရေးစခန်းနှင့် ဈေးကွက်တင် ရောင်းရေးစင်တာများ ထည့်သွင်းပေးမည်ဖြစ်ကြောင်း သိရပါသည်။ အဆိုပါအဆောက်အအုံများ သည် KNMP ကျေးရွာများမှထွက်ရှိသည့် ငါးနှင့် ငါးလုပ်ငန်းထွက်ကုန်များ၏ အရည်အသွေးနှင့် တန်ဖိုးမြှင့်တင်ရေးကိုလည်းအထောက်အကူပြုမည်ဖြစ်ကြောင်း ၎င်းကဆိုပါသည်။ ထို့ပြင် KNMP ကျေးရွာများတွင်လိုအပ်သည့် လူ့စွမ်းအားအရင်းအမြစ်များဖြည့်ဆည်းနိုင်ရန် အနီရောင်နှင့် အဖြူ ရောင်ကျေးရွာသမဝါယမအသင်းများအစီအစဉ်နှင့် ချိတ်ဆက်ဆောင်ရွက်ရန်လည်း ဝန်ကြီးဌာန က ရည်ရွယ်ထားကြောင်း သိရပါသည်။ အစိုးရအနေဖြင့် ၂၀၂၆ ခုနှစ်အတွင်း တစ်နိုင်ငံလုံးရှိ ငါးဖမ်းကျေးရွာ ၁၂၆၉ ရွာတွင် KNMP အစီအစဉ် အကောင်အထည်ဖော်ရန်ရည်မှန်းထားပြီး သမ္မတ Prabowo Subianto ၏ သမ္မတသက်တမ်းကုန်ဆုံးမည့် ၂၀၂၉ ခုနှစ်အတွင်း ငါးဖမ်း ကျေးရွာ ၅၀၀၀ အထိဖော်ဆောင်ရန်ရည်မှန်းထားကြောင်း သိရပါသည်။ ဒေသတစ်ခုချင်းစီ၏ အခြေအနေနှင့် အလားအလာများအလိုက် KNMP အစီအစဉ်ကို အကောင်အထည်ဖော်ရန် လိုအပ်ကြောင်း Ashad ကပြောကြားခဲ့ပါသည်။ ယင်းအစီအစဉ်သည် အခြေခံအဆောက်အအုံများ တည်ဆောက်ပေးခြင်းတစ်ခုတည်းကိုသာ အာရုံစိုက်ခြင်းမဟုတ်ကြောင်း ၎င်းကဆိုပါသည်။ထို့ကြောင့် အစီအစဉ်အောင်မြင်စွာအကောင်အထည်ဖော်နိုင်ရန်ထိရောက်သည့်စီမံခန့်ခွဲမှု၊ဈေးကွက်ဝင်ရောက်နိုင်ရေးဆောင်ရွက်မှု၊ အရည်အချင်းပြည့်ဝသည့် လူ့စွမ်းအားအရင်းအမြစ်များ နှင့် ဗဟိုအစိုးရ၊ ဒေသန္တရအုပ်ချုပ်ရေးအဖွဲ့များနှင့် ပြည်သူများအကြား ပူးပေါင်းညှိနှိုင်းဆောင်ရွက် မှုတို့လိုအပ်ကြောင်း ၎င်းကအလေးပေးပြောကြားခဲ့ပါသည်။

  DOCA (ရန်ကုန်)

Brebes ခရိုင်မှ ကြက်သွန်နီများကို ထိုင်းနိုင်ငံသို့တင်ပို့ခဲ့သည့် အင်ဒိုနီးရှား

ပြည်ပကုန်သွယ်မှုသတင်းများ

                              အင်ဒိုနီးရှားနိုင်ငံ အလယ်ပိုင်းဂျာဗားပြည်နယ် Brebes ခရိုင်မှ ကြက်သွန်နီများကို ထိုင်းနိုင်ငံသို့တင်ပို့နိုင်ခြင်းဖြင့် ပြည်တွင်းဝယ်လိုအားပြည့်မီပြီးနောက် တောင်သူများအတွက် ဈေးကွက်အခွင့်အလမ်းများ ပိုမိုကျယ်ပြန့်လာကြောင်း စားနပ်ရိက္ခာရေးရာ ပေါင်းစပ်ညှိနှိုင်းရေး ဝန်ကြီး Zulkifli Hasan က ပြောကြားခဲ့ပါသည်။ Brebes ခရိုင်ရှိ ထိန်းချုပ်လေထုသိုလှောင်ရုံ (CAS) မှ ထိုင်းနိုင်ငံသို့ ကြက်သွန်နီများတင်ပို့ရန်စီစဉ်မှုကို ကြည့်ရှုစစ်ဆေးစဉ် ဝန်ကြီး Hasan က ပြည်တွင်းလိုအပ်ချက်ကို ဖြည့်ဆည်းနိုင်ပြီဖြစ်သဖြင့် ထုတ်လုပ်မှုတိုးမြှင့်ကာ ဈေးကွက်ပိုမိုချဲ့ထွင် ရန်နှင့် တောင်သူများပိုမိုကောင်းမွန်သည့်ဈေးနှုန်းရရှိစေရန် ရည်ရွယ်ထားကြောင်းပြောကြား ခဲ့ပါသည်။ Brebes သည် အင်ဒိုနီးရှား၏ အဓိကကြက်သွန်နီထုတ်လုပ်ရာဒေသတစ်ခုဖြစ်ပြီး နိုင်ငံတစ်ဝန်းထုတ်လုပ်မှု၏ ၂၀ ရာခိုင်နှုန်းခန့်နှင့် အလယ်ပိုင်းဂျာဗားပြည်နယ်၏ထုတ်လုပ်မှု ၆၀ ရာခိုင်နှုန်းခန့်ကို ထုတ်လုပ်ပေးလျက်ရှိကြောင်း သိရပါသည်။ ဒေသအတွင်း နှစ်စဉ်ကြက်သွန်နီ စိုက်ဧကမှာ ဟက်တာ ၃၀,၀၀၀ မှ ၃၅,၀၀၀ အထိရှိပြီး တစ်နှစ်လျှင် တန်ချိန် ၃၀၀,၀၀၀ မှ ၃၅၀,၀၀၀ ခန့် ထုတ်လုပ်နိုင်ကြောင်း သိရပါသည်။။ Brebes ကြက်သွန်နီများကို ထိုင်းနိုင်ငံအပြင် ဗီယက်နမ်၊ မလေးရှားနှင့် စင်ကာပူနိုင်ငံများသို့လည်း တင်ပို့လျက်ရှိကြောင်း သိရပါသည်။ ပို့ကုန် ဈေးကွက်ချဲ့ထွင်ရာတွင် ပြည်တွင်းထောက်ပံ့မှုနှင့် ဈေးနှုန်းတည်ငြိမ်မှုကို ထည့်သွင်းစဉ်းစားရန် လိုကြောင်း ဝန်ကြီးက ပြောကြားခဲ့ပါသည်။ ထုတ်လုပ်မှုတိုးမြှင့်ပြီးနောက် ဈေးကွက်မရှိသည့် အခြေအနေမျိုးမဖြစ်ပေါ်စေရန် အစိုးရက ပြည်တွင်းနှင့် ပြည်ပဈေးကွက်များရရှိနိုင်ရေး ဆောင်ရွက် ပေးမည်ဖြစ်ကြောင်း ၎င်းကအလေးပေးပြောကြားခဲ့ပါသည်။ အမျိုးသားစားနပ်ရိက္ခာအေဂျင်စီ (Bapanas) ၏ စားနပ်ရိက္ခာဟန်ချက်ခန့်မှန်းချက်အရ ၂၀၂၆ ခုနှစ်တွင် အင်ဒိုနီးရှားနိုင်ငံ၏ ကြက်သွန်နီထုတ်လုပ်မှုမှာ တန်ချိန် ၁.၃၂ သန်းခန့် ရှိမည်ဟု ခန့်မှန်းထားပြီး ပြည်တွင်းစားသုံးမှု လိုအပ်ချက်မှာ တန်ချိန် ၁.၂၅ သန်းခန့်ဖြစ်ကြောင်း သိရပါသည်။ ၂၀၂၅ ခုနှစ်တွင် နိုင်ငံတစ်ဝန်း ကြက်သွန်နီထုတ်လုပ်မှု တန်ချိန် ၁.၄၃ သန်းရှိခဲ့ပြီး စားသုံးမှုမှာ တန်ချိန် ၁.၂၃ သန်းခန့်သာ ရှိသဖြင့် ပိုလျှံထွက်ရှိခဲ့ကြောင်း သိရပါသည်။ ထိုပိုလျှံမှုမှတစ်ဆင့် ကြက်သွန်နီတန်ချိန် ၁,၅၆၀ ကို နိုင်ငံတကာဈေးကွက်များသို့ တင်ပို့နိုင်ခဲ့ကြောင်း သိရပါသည်။ ထို့ပြင် အစိုးရသည် အမျိုးသား အာဟာရအေဂျင်စီ (BGN) မှ အကောင်အထည်ဖော်သည့် အခမဲ့အာဟာရပြည့်ဝအစားအစာ (MBG) အစီအစဉ်အတွက် တောင်သူများထံမှထွက်ရှိသည့်ကြက်သွန်နီများဝယ်ယူအသုံးပြုရေးဆောင်ရွက်လျက်ရှိရာပြည်တွင်းဈေးကွက်ခိုင်မာစေရန် အထောက် အကူပြုမည်ဖြစ်ကြောင်း သိရပါသည်။ ဈေးကွက်ချဲ့ထွင်ခြင်းအပြင် မျိုးစေ့အရည်အသွေး မြှင့်တင်ရေးနှင့် ကြက်သွန်နီအထွက် နှုန်းတိုးမြှင့်ရေးတို့ကိုလည်းဆောင်ရွက်နေပြီး ပြည်ပမှမျိုးစေ့တင်သွင်းအသုံးပြုရမှု လျှော့ချရေးကို အလေးထားဆောင်ရွက်လျက်ရှိကြောင်း သိရပါသည်။ အဆိုပါလုပ်ငန်းစဉ်များသည် ပြည်တွင်းနှင့် ပြည်ပဈေးကွက်များကသတ်မှတ်ထားသည့် အရည်အသွေးစံနှုန်းများနှင့် ကိုက်ညီသောကြက်သွန် နီများထုတ်လုပ်နိုင်ရေး အထောက်အကူပြုရန် ရည်ရွယ်ထားကြောင်း သိရပါသည်။

  DOCA (ရန်ကုန်)

BRICS အဖွဲ့ဝင်နိုင်ငံများအကြား ကုန်သွယ်ရေးအားကောင်းရန်အချက်သုံးရပ် အဆိုပြုလိုက်သည့် အင်ဒိုနီးရှား

ပြည်ပကုန်သွယ်မှုသတင်းများ

             BRICS အဖွဲ့ဝင်နိုင်ငံများအကြား ကုန်သွယ်ရေးနှင့် ဝန်ဆောင်မှုကဏ္ဍ ပိုမိုခိုင်မာစေရေးအတွက် အင်ဒိုနီးရှားကုန်သည်ကြီးများနှင့် စက်မှုလက်မှုလုပ်ငန်းရှင်များအသင်း (Kadin) ဥက္ကဋ္ဌ Anindya Novyan Bakrie က အချက်သုံးရပ်အဆိုပြုလိုက်ကြောင်း သိရပါသည်။ အဆိုပါအချက် များမှာ ကုမ္ပဏီများနှင့် ကျွမ်းကျင်လုပ်သားများ နယ်စပ်ဖြတ်ကျော်သွားလာလုပ်ကိုင်နိုင်ရေး လွယ်ကူချောမွေ့စေရန်၊ အဖွဲ့ဝင်နိုင်ငံများ၏ ငွေပေးချေမှုစနစ်များ အပြန်အလှန်ချိတ်ဆက် အသုံးပြုနိုင်ရေးမြှင့်တင်ရန်နှင့် ဝန်ဆောင်မှုကုန်သွယ်ရေးအတွက် လူ့စွမ်းအားအရင်းအမြစ်နှင့် အခြေခံအဆောက်အအုံများတွင် ရင်းနှီးမြှုပ်နှံမှုတိုးမြှင့်ရန်တို့ဖြစ်ကြောင်း သိရပါသည်။ Bakrie က အိန္ဒိယနိုင်ငံ နယူးဒေလီမြို့၌ စက်တင်ဘာ ၁၁ ရက်က ကျင်းပသည့် BRICS Business Forum 2026 တွင် ယင်းအဆိုပြုချက်များကိုတင်ပြခဲ့ခြင်းဖြစ်ကြောင်း သိရပါသည်။ ပထမအချက်အနေဖြင့် BRICS Business Council သည် စီးပွားရေးလုပ်ငန်းများရင်ဆိုင်နေရသည့် နယ်စပ်ဖြတ်ကျော် လုပ်ငန်းဆိုင်ရာအခက်အခဲများကိုဖော်ထုတ်၍ အစိုးရများထံ ဖြေရှင်းရေးအဆိုပြုချက်များ တင်ပြ သင့်ကြောင်း Bakrie က ပြောကြားခဲ့ပါသည်။ ကျွမ်းကျင်ပညာရှင်အရည်အချင်းများ အပြန်အလှန် အသိအမှတ်ပြုရေးနှင့် စီးပွားရေးခရီးသွားလာမှု လုပ်ထုံးလုပ်နည်းများ ရိုးရှင်းစေရေးအပြင် BRICS Business Travel Card စနစ်ထူထောင်ရေးကိုလည်း အဆိုပြုခဲ့ကြောင်း သိရပါသည်။ ဒုတိယ အချက်အနေဖြင့် အဖွဲ့ဝင်နိုင်ငံများအကြား ဒစ်ဂျစ်တယ်ငွေပေးချေမှုစနစ်များချိတ်ဆက်ပြီး နယ်စပ် ဖြတ်ကျော်ငွေပေးချေမှုများ မြန်ဆန်၊ ကုန်ကျစရိတ်သက်သာပြီး ထိရောက်စေရန် ဆောင်ရွက် သင့်ကြောင်း ၎င်းကဆိုပါသည်။ အိန္ဒိယ၊ ဘရာဇီးနှင့် တရုတ်တို့၏ အချိန်နှင့်တစ်ပြေးညီ ငွေပေးချေမှုစနစ်များကို အပြန်အလှန်ချိတ်ဆက်အသုံးပြုနိုင်ရေးနှင့် သင့်လျော်သည့်အခြေအနေတွင် ဒေသတွင်းငွေကြေးအသုံးပြုမှု တိုးမြှင့်ရေးတို့ကိုလည်း အလေးပေးပြောကြားခဲ့ပါသည်။ ဘဏ္ဍာရေးဆိုင်ရာအချုပ်အခြာအာဏာရှိခြင်းသည် ဘဏ္ဍာရေးအရသီးခြားခွဲထွက်နေခြင်းကို ဆိုလို ခြင်းမဖြစ်သင့်ကြောင်း Bakrie က ပြောကြားခဲ့ပါသည်။ တတိယအချက်အနေဖြင့် ဝန်ဆောင်မှု ကဏ္ဍဖွံ့ဖြိုးရေးအတွက် လုပ်သားကျွမ်းကျင်မှုမြှင့်တင်ရေး၊ တက္ကသိုလ်များနှင့် ပူးပေါင်း ဆောင်ရွက်ရေးနှင့် အသေးစား၊ အငယ်စားနှင့် အလတ်စား စီးပွားရေးလုပ်ငန်းများ (MSMEs) က ဉာဏ်ရည်တု (AI) နည်းပညာကို အသုံးချနိုင်ရေးတို့တွင် ရင်းနှီးမြှုပ်နှံမှုတိုးမြှင့်ရန်လိုအပ်ကြောင်း ၎င်းကပြောကြားခဲ့ပါသည်။ BRICS Business Council ၏ နိုင်ငံအလိုက်ဌာနခွဲများအနေဖြင့် လုပ်သားလေ့ကျင့်ပေးမှုအတွက် နှစ်စဉ်တိုင်းတာနိုင်သောရည်မှန်းချက်များ သတ်မှတ်သင့်ပြီး New Development Bank ကလည်း ဒစ်ဂျစ်တယ်ကွန်ရက်များနှင့် လေ့ကျင့်ရေးအစီအစဉ် များအတွက် ငွေကြေးထောက်ပံ့နိုင်ကြောင်း ၎င်းကဆိုပါသည်။ Bakrie ကအင်ဒိုနီးရှားကဲ့သို့ BRICS အဖွဲ့ဝင်အသစ်များအနေဖြင့် ယခင်အဖွဲ့ဝင်နိုင်ငံများ၏ ထုတ်ကုန်များနှင့် ကုမ္ပဏီများ အတွက် ဈေးကွက်အဖြစ်သာရပ်တည်မည့်အစား BRICS ၏ စီးပွားရေးအစီအစဉ်များကို ပုံဖော် ရာတွင် တက်ကြွစွာပါဝင်သင့်ကြောင်းနှင့် BRICS ၏ စစ်မှန်သော စီးပွားရေးပေါင်းစည်းမှုသည် အဖွဲ့ဝင်နိုင်ငံများရှိ အသေးစားနှင့် အငယ်စားစီးပွားရေးလုပ်ငန်းများအနေဖြင့် BRICS စီးပွားရေး ကွန်ရက်မှတစ်ဆင့် ဖောက်သည်များရှာဖွေခြင်း၊ ဝန်ဆောင်မှုပေးခြင်းနှင့် ငွေပေးချေမှုများ လက်ခံ နိုင်သည့် စီးပွားရေးစနစ်တစ်ရပ် ဖြစ်လာခြင်းဖြစ်ကြောင်း ပြောကြားခဲ့ပါသည်။

 DOCA (ရန်ကုန်)

BRICS အဖွဲ့ဝင်နိုင်ငံများအကြား ဒေသတွင်းငွေကြေးအသုံးပြုမှုမြှင့်တင်ရန် တိုက်တွန်းလိုက်သည့် အင်ဒိုနီးရှား

ပြည်ပကုန်သွယ်မှုသတင်းများ

             အင်ဒိုနီးရှားဗဟိုဘဏ် (BI) က ပထဝီနိုင်ငံရေးအန္တရာယ်များနှင့် ကမ္ဘာ့ဈေးကွက်များ အစိတ်စိတ်အမွှာမွှာဖြစ်လာမှုများမှ ဒေသတွင်းစီးပွားရေးများကို ကာကွယ်နိုင်ရန်အတွက် BRICS အဖွဲ့ဝင်နိုင်ငံများအနေဖြင့် ဒေသတွင်းငွေကြေးများအသုံးပြုသည့် ငွေပေးချေမှု (LCT) ကို အရှိန်မြှင့်ဆောင်ရွက်ပြီး နယ်စပ်ဖြတ်ကျော်ငွေပေးချေမှုစနစ်များချိတ်ဆက်မှုကို ပိုမိုမြှင့်တင်ရန် တိုက်တွန်းလိုက်ကြောင်း သိရပါသည်။ အိန္ဒိယနိုင်ငံ မွမ်ဘိုင်းမြို့တွင် စက်တင်ဘာ ၉ ရက်မှ ၁၀ ရက်အထိကျင်းပသည့် ဒုတိယအကြိမ် BRICS ဘဏ္ဍာရေးဝန်ကြီးများနှင့် ဗဟိုဘဏ်ဥက္ကဋ္ဌများ အစည်းအဝေး (BRICS FMCBG) တွင် အင်ဒိုနီးရှားဗဟိုဘဏ် အုပ်ချုပ်ရေးမှူး Destry Damayanti က ပထဝီနိုင်ငံရေးတင်းမာမှုများ မြင့်တက်လာနေသည့်အချိန်၌ စီးပွားရေးတည်ငြိမ်မှုကို ထိန်းသိမ်းရန်နှင့် တိုးတက်မှုအတွက်အရင်းအမြစ်အသစ်များဖော်ထုတ်ရန်လိုအပ်ကြောင်း ပြောကြား ခဲ့ပါသည်။ BRICS အနေဖြင့် စိန်ခေါ်မှုအမျိုးမျိုးကို အပြန်အလှန်ခံနိုင်ရည်ရှိမှုအဖြစ် ပြောင်းလဲ နိုင်ရန် မဟာဗျူဟာမြောက်အခွင့်အလမ်းရှိနေကြောင်းနှင့် ယင်းအတွက် နိုင်ငံတစ်နိုင်ငံချင်းစီ၏ ဖွံ့ဖြိုးတိုးတက်မှုအဆင့်နှင့် အမျိုးသားဦးစားပေးများကို ထည့်သွင်းစဉ်းစားလျက် ဒေသတွင်း ငွေကြေးအသုံးပြုသည့် ငွေပေးချေမှုနှင့် နယ်စပ်ဖြတ်ကျော်ငွေပေးချေမှုစနစ် ချိတ်ဆက်မှုတို့ အပါအဝင် လက်တွေ့ကျသောပူးပေါင်းဆောင်ရွက်မှုများကို ခိုင်မာစွာအားပေးရန်လိုကြောင်း Damayanti က စက်တင်ဘာလ ၁၁ ရက်နေ့တွင် ထုတ်ပြန်သည့်ကြေညာချက်၌ ပြောကြားခဲ့ ပါသည်။ အစည်းအဝေးပြင်ပတွင် Damayanti သည် အိန္ဒိယဗဟိုဘဏ် (RBI) အုပ်ချုပ်ရေးမှူး Sanjay Malhotra နှင့်တွေ့ဆုံ၍ အင်ဒိုနီးရှားနှင့် အိန္ဒိယအကြား ဘဏ္ဍာရေးပေါင်းစည်းမှုကို ပိုမိုမြန်ဆန်စေရေး ဆွေးနွေးခဲ့ကြောင်း သိရပါသည်။ နှစ်နိုင်ငံအကြား ဒေသတွင်းငွေကြေး အသုံးပြုသည့် ငွေပေးချေမှုမူဘောင်ကိုတိုးချဲ့ရန်၊ နှစ်နိုင်ငံကြား ဒေသတွင်းငွေကြေးအခြေပြု နှစ်နိုင်ငံငွေကြေးလဲလှယ်ရေးသဘောတူညီချက် (LCBSA) တည်ထောင်ရန်နှင့် နယ်စပ်ဖြတ်ကျော် QR ကုဒ်ငွေပေးချေမှုစနစ်များ ချိတ်ဆက်ရန်တို့ကို ဆွေးနွေးခဲ့ကြကြောင်း သိရပါသည်။
ယင်းနှစ်နိုင်ငံဆွေးနွေးမှုသည် BRICS အဖွဲ့၏ ကတိကဝတ်များကို လက်တွေ့ကျသော စီးပွားရေး နှင့် ဘဏ္ဍာရေးဆိုင်ရာချိတ်ဆက်မှုများအဖြစ် အကောင်အထည်ဖော်နိုင်ရေးအတွက် အရေးပါ သောခြေလှမ်းတစ်ရပ်ဖြစ်ကြောင်း အင်ဒိုနီးရှားဗဟိုဘဏ်က ပြောကြားခဲ့ပါသည်။ အင်ဒိုနီးရှား ဘက်မှ ဘဏ္ဍာရေးဝန်ကြီး ဒုတိယဝန်ကြီး Juda Agung ကလည်း Damayanti နှင့်အတူ အစည်းအဝေးသို့ တက်ရောက်ခဲ့ကြောင်း သိရပါသည်။ အဆိုပါအဆင့်မြင့်အစည်းအဝေးသို့ အင်ဒိုနီးရှား၊ ဘရာဇီး၊ ရုရှား၊ အိန္ဒိယ၊ တရုတ်၊ တောင်အာဖရိက၊ အီဂျစ်၊ အာရပ်စော်ဘွားများ ပြည်ထောင်စု၊ အီသီယိုးပီးယားနှင့် အီရန်တို့အပါအဝင် BRICS အဖွဲ့ဝင်နိုင်ငံများမှ ဗဟိုဘဏ် အုပ်ချုပ်ရေးမှူးများနှင့် ဘဏ္ဍာရေးဝန်ကြီးများ တက်ရောက်ခဲ့ကြကြောင်း သိရပါသည်။ အစည်းအဝေးအပြီးတွင် အဖွဲ့ဝင်နိုင်ငံများက ဒစ်ဂျစ်တယ်အသွင်ကူးပြောင်းရေး၊ ဉာဏ်ရည်တု (AI)၊ ဆိုက်ဘာလုံခြုံရေးခံနိုင်ရည်ရှိမှု၊ ရေရှည်တည်တံ့သောဘဏ္ဍာရေးစနစ်နှင့် ဒေသတွင်း ငွေကြေးအသုံးပြုမှုတို့တွင် မဟာဗျူဟာမြောက်ပူးပေါင်းဆောင်ရွက်၍ ကမ္ဘာ့စီးပွားရေးဆိုင်ရာ စိန်ခေါ်မှုများကိုဖြေရှင်းသွားရန် ဘုံကတိကဝတ်များပါဝင်သည့် ပူးတွဲကြေညာချက်တစ်ရပ်ကို အတည်ပြုခဲ့ကြကြောင်း သိရပါသည်။ ထို့ပြင် ဖွံ့ဖြိုးဆဲနိုင်ငံများ၏အသံနှင့် ကိုယ်စားပြုမှု ပိုမို ပါဝင်လာစေရေးအတွက် အပြည်ပြည်ဆိုင်ရာငွေကြေးရန်ပုံငွေအဖွဲ့ (IMF) ၏ အုပ်ချုပ်မှုစနစ် ပြုပြင်ပြောင်းလဲရေးအပါအဝင် ကမ္ဘာ့ဘဏ္ဍာရေးစနစ်ဖွဲ့စည်းပုံကို ပိုမိုကျယ်ပြန့်စွာပြုပြင် ပြောင်းလဲရန် BRICS အဖွဲ့က ထပ်မံအတည်ပြုခဲ့ကြောင်း သိရပါသည်။ ကမ္ဘာ့စီးပွားရေးနှင့် ဘဏ္ဍာရေးအခြေအနေများ ပိုမိုကွဲပြားလာနေသည့်အခြေအနေတွင် ဆွေးနွေးညှိနှိုင်းမှုများကို မြှင့်တင်ပြီး နိုင်ငံများအကြား ပူးပေါင်းဆောင်ရွက်မှုများအတွက် ပေါင်းကူးတံတားအဖြစ် ဆောင်ရွက်ရန်လိုအပ်ကြောင်း အင်ဒိုနီးရှားဗဟိုဘဏ်က အလေးပေးပြောကြားခဲ့ပါသည်။ အင်ဒိုနီးရှားအစိုးရနှင့် ဗဟိုဘဏ်တို့ပူးပေါင်း၍ နိုင်ငံတကာပူးပေါင်းဆောင်ရွက်ရေး အစီအစဉ် များတွင်ဆက်လက်ပါဝင်ကာ အမျိုးသားဦးစားပေးများနှင့်ကိုက်ညီပြီး ရေရှည်စီးပွားရေးနှင့် ဘဏ္ဍာရေးတည်ငြိမ်မှုကိုအားကောင်းစေမည့် အားလုံးပါဝင်နိုင်သော လက်တွေ့ကျသည့် ရလဒ် များရရှိစေရန် ဆောင်ရွက်သွားမည်ဖြစ်ကြောင်း သိရပါသည်။

  DOCA (ရန်ကုန်)

                                                                                          

အိန္ဒိယအစိုးရက စားသုံးဆီစျေးနှုန်းများလျော့ကျစေရန် စားအုန်းဆီနှင့် ပဲပုပ်ဆီတင်သွင်းခွန်များ လျှော့ချ

ပြည်ပကုန်သွယ်မှုသတင်းများ

   အိန္ဒိယအစိုးရသည် ပြည်တွင်းစျေးကွက်၌ စားသုံးဆီစျေးနှုန်းများလျော့ကျစေရန် နေကြာ ဆီ၊ စားအုန်းဆီနှင့် ပဲပုပ်ဆီများ၏ ကုန်ကြမ်းနှင့် သန့်စင်ပြီးဆီများအပေါ် သွင်းကုန်အခွန်နှုန်းထား များကို လျှော့ချခဲ့သည်။ ထိုသွင်းကုန်အခွန်နှုန်းများလျှော့ချခြင်းသည်  စက်တင်ဘာလ ၂၄ ရက်မှ စတင်၍ အကျိုးသက်ရောက်မည်ဖြစ်သည်။

    ပဲပုပ်ဆီကြမ်းနှင့် စားအုန်းဆီကြမ်းတို့အပေါ်ကောက်ခံသည့် အခြေခံအခွန်နှုန်းထား (BCD) များကို ၁၀ % မှ ၅ % ၊ သန့်စင်ပြီး ပဲပုပ်ဆီနှင့် စားအုန်းဆီတို့၏ အခြေခံအခွန်နှုန်းထားများကို ၃၂.၅ %  မှ ၂၇.၅ % သို့ လျှော့ချခဲ့သည်။ ထို့အပြင် နေကြာဆီကြမ်းအပေါ် ယခင်က ကောက်ခံခဲ့သည့် အခြေခံအခွန်နှုန်းထား ၁၀ % ကို ပယ်ဖျက်ခဲ့ပြီး သန့်စင်ပြီးနေကြာဆီ၏ အခွန်နှုန်းထားကို ၃၂.၅ % မှ ၂၂.၅ % သို့ လျှော့ချလိုက်ကြောင်း ဘဏ္ဍာရေးဝန်ကြီးဌာန၏ ထုတ်ပြန်ချက်အရ သိရသည်။

    အိန္ဒိယနိုင်ငံ၏ အစားအသောက်ဆိုင်ရာ စျေးနှုန်းညွှန်းကိန်း (CFPI) သည် ဇူလိုင်လတွင် ၅.၅၂ % ရှိခဲ့ရာမှ သြဂုတ်လတွင် ၅.၉၅ % အထိမြင့်တက်ခဲ့သည်။ ၎င်းအပြင် အစားအသောက် ကဏ္ဍတွင် သုံးစွဲမှုအများဆုံးဖြစ်သော စားသုံးဆီ(သန့်စင်ပြီး) ၏ လက်လီစျေးနှုန်းဖောင်းပွမှုသည် မတ်လတွင် ၇.၆၂ % ရှိခဲ့ပြီး ဧပြီလတွင် ၁၀.၂၅ % သို့ ရောက်ရှိခဲ့ကာ သြဂုတ်လတွင် ၁၄.၂၄ % အထိ မှတ်တမ်းတင်ခဲ့သည်။

    ထိုဆုံးဖြတ်ချက်သည် အရေးကြီးသော ဆုံးဖြတ်ချက်ဖြစ်ပြီး အထူးသဖြင့် ပွဲတော်ရာသီ မတိုင်မီ ချမှတ်ခဲ့ခြင်းဖြစ်ကြောင်း အိန္ဒိယနိုင်ငံ ဟင်းသီးဟင်းရွက်ဆီ ထုတ်လုပ်သူများအသင်း (IVPA) ၏ ဥက္ကဌ Sudhakar Desai က ပြောကြားခဲ့သည်။ သို့သော် အခွန်နှုန်းထားလျှော့ချမှု၏ အကျိုးသက်ရောက်မှုသည် အကောက်ခွန်ဆိုင်ရာ ကိစ္စရပ်များသာမက အပြည်ပြည်ဆိုင်ရာ ကုန်စည်စျေးနှုန်းများ၊ သယ်ယူပို့ဆောင်ရေးကုန်ကျစရိတ်များ၊ ငွေကြေးလဲလှယ်နှုန်း အပြောင်း အလဲများ၊ ပြည်တွင်းရရှိနိုင်မှုနှင့် သိုလှောင်နိုင်မှုအပါအဝင် များစွာသော အကြောင်းကိစ္စများ အပေါ်တွင် မူတည်နေကြောင်း ၎င်းက ပြောကြားခဲ့ပါသည်။

   သွင်းကုန်ခွန်လျှော့ချမှုသည် တင်သွင်းသော စားသုံးဆီများ၏ ကုန်ကျစရိတ်ကို လျော့ချနိုင်ပြီး သုံးစွဲသူများ၏ စျေးနှုန်းများကို အတိုင်းအတာတစ်ခုအထိ လျှော့ချနိုင်မည်ဖြစ်ကြောင်း၊ လာမည့် ပွဲတော်ရက်များအတွင်း နိုင်ငံတစ်ဝှမ်း စားသုံးဆီလုံလောက်မှုရှိစေရန်နှင့် ဝယ်လိုအား မြင့်တက် လာခြင်းကြောင့် အဆာပြေမုန့်များ၊ အစားအသောက်ဝန်ဆောင်မှုနှင့် HORECA အပိုင်းများ၏ လိုအပ်ချက်များ တိုးလာခြင်းကြောင့် ဦးစား‌ပေးဆောင်ရွက်ရမည့် ကဏ္ဍဖြစ်ကြောင်း Mr. Desai က ပြောကြားခဲ့သည်။

   အထူးသဖြင့် မြောက်ပိုင်းနှင့် အရှေ့မြောက်ပိုင်းဒေသများရှိ စားသုံးဆီလုပ်ငန်းများသည် နီပေါနိုင်ငံမှ အကောက်ခွန်ကင်းလွတ်ခွင့်ဖြင့် တင်သွင်းလာသည့် ကုန်ပစ္စည်းများကြောင့် ဖိအား များနှင့် ရင်ဆိုင်နေရပါသည်။ ယင်းမှာ အိန္ဒိယနိုင်ငံ၏ အကောက်ခွန်နှုန်းထားများနှင့် ကွာဟမှုကို အသုံးချ၍ အကောက်ခွန်အကျိုးအမြတ် ရရှိနိုင်ခြင်းကြောင့် ဖြစ်ပါသည်။ နီပေါနိုင်ငံ ထုတ်ကုန် များသည် ပြည်တွင်း၌ သန့်စင်ထုတ်လုပ်သည့် ဆီများထက် ဈေးနှုန်းအရ ပိုမိုယှဉ်ပြိုင်နိုင်စွမ်းရှိ နေမည်ဖြစ်သဖြင့် အဆိုပါအခြေအနေသည် ဆက်လက်ဖြစ်ပေါ်နေမည်ဖြစ်ပါသည်။ ထို့ကြောင့် IVPA သည် SAFTA နိုင်ငံများမှ အကောက်ခွန် ကင်းလွတ်ခွင့် အပေါ် တင်သွင်းခွင့်ပမာဏ (import quota) သတ်မှတ်ရန် တောင်းဆိုလျက်ရှိကြောင်း ၎င်းက ထပ်မံပြောကြားခဲ့သည်။

   အိန္ဒိယနိုင်ငံ Solvent Extractors’ အသင်း (SEA) သည် စက်တင်ဘာ ၂၁ ရက်၌ အစိုးရ အဆင့်မြင့်အရာရှိများနှင့် ပြုလုပ်ခဲ့သည့် တွေ့ဆုံဆွေးနွေးပွဲတွင် ကမ္ဘာ့စားသုံးဆီကဏ္ဍ၌ ဖြစ်ပေါ် လာနိုင်သည့် မတည်ငြိမ်မှုအလားအလာများကို မီးမောင်းထိုးပြခဲ့သည်။ အသင်းဝင်များထံ လစဉ် ပေးပို့သည့်စာတွင် လက်ရှိ စားသုံးဆီသိုလှောင်မှုနှင့် ထောက်ပံ့မှုအခြေအနေကို အစိုးရအား အသိ ပေးခဲ့ကြောင်း SEA ၏ ဥက္ကဋ္ဌ Sanjeev Asthana က ပြောကြားခဲ့သည်။

    လုပ်ငန်းကဏ္ဍအနေဖြင့် ရှေ့တွင်ဖြစ်ပေါ်နိုင်သည့် မတည်ငြိမ်မှုများကို ဖော်ပြရာတွင် အယ်လ်နီညို၏ ဖြစ်နိုင်ခြေရှိသော သက်ရောက်မှု၊ ရုရှား-ယူကရိန်း ပဋိပက္ခအကြား နေကြာဆီ ထောက်ပံ့မှုဆိုင်ရာ မသေချာမှုများ ဆက်လက်ရှိနေခြင်းနှင့် အင်ဒိုနီးရှား၏ B50 ဇီဝဒီဇယ်အစီအစဉ် တို့သည် ကမ္ဘာ့ဟင်းသီးဟင်းရွက်ဆီစျေးကွက်မျှတမှုကို ပြောင်းလဲစေနိုင်သည်ဟု ၎င်းက ဆိုသည်။ ယင်းအခြေအနေများကြောင့် လာမည့်လများတွင် ပဲပိစပ်နှင့် ပဲပုပ်ဆီ၏ မဟာဗျူဟာဆိုင်ရာ အရေးပါမှုကို မြှင့်တင်နိုင်သည်ဟု ၎င်းက ထည့်သွင်းပြောကြားခဲ့သည်။

    အိန္ဒိယနိုင်ငံ၏ စားသုံးဆီတင်သွင်းမှုသည် ၂၀၂၅-၂၀၂၆ ဘဏ္ဍာနှစ် (နိုဝင်ဘာ-အောက်တိုဘာ) ပထမ ၁၀ လအတွင်း ၄.၅၆ ရာခိုင်နှုန်း မြင့်တက်လာခဲ့ပြီး စားအုန်းဆီနှင့် ပဲပုပ်ဆီ တင်သွင်းမှုသည် အဓိကအခန်းကဏ္ဍမှ ပါဝင်ခဲ့သည်။

    SEA ၏ စုစည်းထားသည့် အချက်အလက်များအရ အိန္ဒိယနိုင်ငံသည် ၂၀၂၅-၂၀၂၆ ဘဏ္ဍာနှစ် အတွင်း စားသုံးဆီတန်ချိန် ၁၃၆.၁၉ သိန်း တင်သွင်းခဲ့ပြီး ယခင်နှစ်အလားတူကာလတွင် တန်ချိန် ၁၃၀.၂၄ သိန်းရှိခဲ့ရာမှ ယခုနှစ်တွင် မြင့်တက်လာခြင်းဖြစ်သည်။

   ၂၀၂၅-၂၀၂၆ ဘဏ္ဍာနှစ်၊ ပထမ ၁၀ လအတွင်း စားအုန်းဆီတင်သွင်းမှုသည် တန်ချိန် ၆၅.၃၄ သိန်းဖြစ်ပြီး ယခင်နှစ် အလားတူကာလတွင် တန်ချိန် ၆၁.၄၇ သိန်း ရှိခဲ့ရာမှ မြင့်တက်လာခဲ့ခြင်း ဖြစ်သည်။ အဆိုပါကာလအတွင်း ပဲပုပ်ဆီ တင်သွင်းမှုသည် တန်ချိန် ၄၄.၆၄ သိန်းမှ ၄၅.၆၁ သိန်း၊ နေကြာဆီ တင်သွင်းမှုသည် တန်ချိန် ၂၄ သိန်းမှ ၂၅.၁၅ သိန်း အထိ မြင့်တက်လာခဲ့ကြောင်း သိရှိ ရသည်။

Source: The Hindu Business Line, September 23, 2026 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အိန္ဒိယ၏ ပုစွန်တင်ပို့မှု တန်ချိန် ၈၀၀၀၀ ကျော်ဖြင့် ၁ ရာခိုင်နှုန်းမြင့်တက်

ပြည်ပကုန်သွယ်မှုသတင်းများ

    အိန္ဒိယ၏ ပုစွန်တင်ပို့မှုသည် မျှော်မှန်းတန်ချိန် ၈၀၀၀၀ ထက်ကျော်လွန်ကာ ဇူလိုင်လတွင် တန်ချိန် ၈၁၆၇၄ တင်ပို့နိုင်ခဲ့သည့်အတွက် ၇ လအတွင်း ၁ ရာခိုင်နှုန်း တိုးတက်ခဲ့ကြောင်း သိရ သည်။

   InCred Research ၏ အစီရင်ခံစာတွင် ပုစွန်တင်ပို့မှုသည် ပထမ ၇ လအတွင်း တန်ချိန် ၄၅၅,၄၈၉ ဖြင့် နှစ်စဉ် ၁ ရာခိုင်နှုန်းတိုးတက်လျက်ရှိကြောင်း၊ ယခုကဲ့သို့ တင်ပို့မှုတိုးတက်လာခြင်း သည် ပထမလဝက်တွင် အနည်းငယ်ကျဆင်းခဲ့မှုကို ပြန်လည်တည့်မတ်စေခဲ့ကြောင်း၊ အမေရိကန် ပြည်ထောင်စု၏ ဈေးကွက်လိုအပ်ချက်နှင့်အတူ အိန္ဒိယသည် ဗြိတိန်နှင့် ဥရောပသမဂ္ဂနိုင်ငံများမှ ဈေးကွက်ဝေစုကို ရရှိထားခြင်းကြောင့် တင်ပို့မှုပမာဏနှင့် တင်ပို့မှုတန်ဖိုးစံချိန်တင် မြင့်တက် လျက်ရှိကြောင်း ဖော်ပြထားပါသည်။

    ပထမလက်ဝက်တွင် တင်ပို့ခဲ့သည့် ပမာဏထက် ဇူလိုင်လတွင် တင်ပို့မှုမြင့်တက်ခဲ့ကြောင်း၊ နောက်ဆုံးရအချက်အလက်အရ အိန္ဒိယ၏ထုတ်လုပ်မှုကွင်းဆက်သည် ကျယ်ပြန့်လျက်ရှိရာ တင်ပို့မည့် ကုန်ပစ္စည်း၏ ရူပအနေအထားလည်း ကောင်းမွန်လျက်ရှိကြောင်း သိရသည်။

    အိန္ဒိယအနေဖြင့် ပုစွန်တင်ပို့မှု စံချိန်တင်မြင့်တက်လာမှုမှသည် လစဉ်မည်သည့်ပမာဏ ဖြင့် တိုးချဲ့တင်ပို့နိုင်မှုရှိခြင်းအထိ အဓိကစဉ်းစားရမည်ဖြစ်ကြောင်း၊ အထူးသဖြင့် အိန္ဒိယသည် ဗြိတိန်နှင့် အမေရိကန်ပြည်ထောင်စုတွင် ၎င်း၏ ဈေးကွက်ကို ဆက်လက်ထိန်းသိမ်းထားပြီး အမေရိကန်ပြည်ထောင်စုသို့ တိုးမြှင့်တင်ပို့လျက်ရှိကြောင်းသိရသည်။

    ပင်လယ်ရေထွက်ကုန်တင်ပို့သူများအသင်းအထွေထွေအတွင်းရေးမှူးချုပ် KN Raghavan က ပုစွန်တင်ပို့မှုကဏ္ဍတွင် စဉ်ဆက်မပြတ်တင်ပို့မှုမြင့်တက်လာခြင်းသည် ယင်းကဏ္ဍ၏ မြဲမြံမှုနှင့် ခံနိုင်ရည်ရှိမှုကို ပြသလျက်ရှိကြောင်း၊ ပို့ကုန်လုပ်ငန်းရှင်များအနေဖြင့် အမျိုးအစားတစ်ခု၊ ထုတ်ကုန် တစ်ခု၊ ဈေးကွက်တစ်ခုမှသည် အမျိုးအစားစုံ၊ ထုတ်ကုန်အစုံနှင့် ဈေးကွက်အမျိုးမျိုး ရရှိအောင် ရှာဖွေလျက်ရှိရာ အရှေ့အာရှနှင့် အရှေ့တောင်အာရှတွင် လူကြိုက်များသည့် ကျားပုစွန်အား တိုးမြှင့်တင်ပို့နိုင်ခဲ့ပြီး၊ ဥရောပ၊ ဗြိတိန်၊ ရုရှား၊ ဗီယက်နမ်နှင့်တရုတ်နိုင်ငံများသို့ ပစ်မှတ်ထား၍ တန်ဖိုးမြှင့်ထုတ်ကုန်များ ပိုမိုတိုးချဲ့တင်ပို့သွားမည်ဖြစ်ကြောင်းသိရသည်။

Source: The Hindu Businessline, September 23, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အိန္ဒိယနိုင်ငံတွင် မိုးသီးနှံစိုက်ဧရိယာ ဟက်တာ  ၈.၂၇ သန်းဖြင့် ယခင်နှစ်ထက် ၂ ရာခိုင်နှုန်း လျော့ကျလျက်ရှိ

ပြည်ပကုန်သွယ်မှုသတင်းများ

     အိန္ဒိယနိုင်ငံ ဂူဂျာရတ်ပြည်နယ်တွင် ၂၀၂၆ ခုနှစ်၊ စက်တင်ဘာလ ၂၁ ရက်နေ့အထိ မိုးသီးနှံ စိုက်ပျိုးပြီးစီးသည့် ဧရိယာမှာ ဟက်တာ  ၈.၂၇ သန်းဖြင့် ယခင်နှစ်ကာလတူ စိုက်ဧရိယာ ဟက်တာ ၈.၄ သန်းထက် ၂ ရာခိုင်နှုန်းကျဆင်းလျက်ရှိကြောင်း စိုက်ပျိုးရေးဦးစီးဌာန၏ အစီရင်ခံစာ၌ ဖော်ပြ ထားသည်။ အဆိုပါရာသီအတွက် ပြည်နယ်၏ ပုံမှန်စိုက်ဧရိယာမှာ ဟက်တာ ၈.၅၃ သန်းဖြစ်ပြီး လက်ရှိအချိန်တွင် ၉၇ ရာခိုင်နှုန်းခန့်သာ စိုက်ပျိုးပြီးစီးကြောင်း သိရသည်။ ပဲမျိုးစုံနှင့် ကောက်နှံ သီးနှံများ၏ စိုက်ဧရိယာများမှာ တိုးမြင့်လာခဲ့သော်လည်း ဆီထွက်သီးနှံစိုက်ဧက လျော့နည်းခဲ့ ကြောင်း သိရသည်။

    ပြည်နယ်အတွင်း စပါးစိုက်ဧရိယာသည် ယခင်နှစ်တွင် ဟက်တာ ၉၀၃,၃၄၉ ရှိရာမှ ယခုနှစ် တွင် ဟက်တာ ၉၂၅,၀၄၁ သို့ တိုးမြင့်ခဲ့ကြောင်း၊ jowar နှံစားပြောင်းမှာ ယခင်နှစ်တွင် ဟက်တာ ၁၁,၅၉၈ ရှိရာမှ ယခုနှစ်တွင် ဟက်တာ ၁၄,၀၀၄ သို့ တိုးမြင့်ခဲ့ကြောင်း၊ အစေ့ထုတ်ပြောင်းမှာ  ယခင်နှစ်တွင် ဟက်တာ ၂၈၀,၉၄၅ ရှိရာမှ ယခုနှစ်တွင် ဟက်တာ ၂၇၂,၀၁၇ သို့ လျော့ကျခဲ့ ကြောင်း၊ bajra နှံစားပြောင်းမှာ ယခင်နှစ်တွင် ဟက်တာ ၁၇၂,၅၈၀ ရှိရာမှ ယခုနှစ်တွင် ဟက်တာ ၁၆၂,၉၃၃ သို့ လျော့ကျခဲ့သည်။ နှံစားပြောင်းစုစုပေါင်းစိုက်ဧရိယာသည် ယခင်နှစ်တွင် ဟက်တာ ၁.၃၈ သန်းရှိရာမှ ယခုနှစ်တွင် ဟက်တာ ၁.၃၉ သန်းသို့ တိုးမြင့်ခဲ့ကြောင်း သိရသည်။

    ပဲမျိုးစုံ စုစုပေါင်း စိုက်ဧရိယာသည် ယခင်နှစ်ထက် ၄ ရာခိုင်နှုန်းတိုးမြင့်၍ ဟက်တာ ၄၆၉,၆၅၂ ရှိခဲ့ကြောင်း အစီရင်ခံစာ၌ ဖော်ပြထားသည်။ ပဲစင်းငုံစိုက်ဧရိယာမှာ ယခင်နှစ်တွင် ဟက်တာ ၂၉၇,၄၆၈ ရှိရာမှ ယခုနှစ်တွင် ဟက်တာ ၃၃၀,၄၇၁ သို့ မြင့်တက်ခဲ့ကြောင်း၊ မတ်ပဲစိုက် ဧရိယာမှာ ယခင်နှစ်တွင် ဟက်တာ ၈၃,၄၅၃ ရှိရာမှ ယခုနှစ်တွင် ဟက်တာ ၉၂,၆၈၀ သို့ မြင့်တက် ခဲ့ကြောင်း၊ ပဲတီစိမ်းစိုက်ဧရိယာ မှာ ယခင်နှစ်တွင် ဟက်တာ ၄၈,၄၃၅ ရှိရာမှ ယခုနှစ်တွင် ဟက်တာ ၃၁,၈၉၉ သို့ ‌လျော့နည်းခဲ့ကြောင်း သိရသည်။

    ဆီထွက်သီးနှံ စုစုပေါင်းစိုက်ဧရိယာသည် ယခင်နှစ်ထက် ၆ ရာခိုင်နှုန်းခန့်လျော့ကျခဲ့ပြီး ဟက်တာ ၃ သန်းအထိ ရှိခဲ့သည်။ မြေပဲစိုက်ဧရိယာသည် ယခင်နှစ်တွင် ဟက်တာ ၂.၂ သန်းမှ ယခုနှစ် တွင် ၂.၀၇ သန်း သို့ လျော့နည်းခဲ့သည်။ ပဲပုပ်စိုက်ဧရိယာမှာ ယခင်နှစ်တွင် ဟက်တာ ၂၇၇,၅၁၄ ရှိရာမှ ယခုနှစ်တွင် ဟက်တာ ၃၀၄,၄၈၈ သို့ မြင့်တက်ခဲ့သည်။

    ဝါစိုက်ဧရိယာသည် ယခင်နှစ်တွင် ဟက်တာ ၂.၀၈ သန်း ရှိရာမှ ယခုနှစ်တွင် ဟက်တာ ၂.၁၅ သန်းသို့ မြင့်တက်ခဲ့သည်။ ဟင်းသီးဟင်းရွက်စုစုပေါင်းစိုက်ဧရိယာသည် ယခင်နှစ်တွင် ဟက်တာ ၂၆၂,၇၀၃ ရှိရာမှ ယခုနှစ်တွင် ၂၆၄,၆၅၄ သို့ တိုးမြင့်ခဲ့ကြောင်း အစီရင်ခံစာ၌ ဖော်ပြ ထားသည်။

    မိုးသီးနှံများကို အနောက်တောင်မုတ်သုံလေရာသီချိန်ဖြစ်သည့် ဇွန်လဝန်းကျင်တွင် စတင် စိုက်ပျိုးပြီး အောက်တိုဘာလဝန်းကျင်တွင် ရိတ်သိမ်းကြသည်။ အိန္ဒိယမိုးလေဝသဦးစီးဌာန၏ အချက်အလက်များအရ ဇွန်လ ၁ ရက်နေ့မှ စက်တင်ဘာလ ၂၁ ရက်နေ့အထိ ဂူဂျာရတ်ပြည်နယ်တွင် မိုးရေချိန် ၆၃၅.၁ မီလီမီတာ ရရှိခဲ့ပြီး အဆိုပါကာလအတွက် ပုံမှန်မိုးရေချိန်ဖြစ်သည့် ၆၈၂.၉ မီလီမီတာအောက် ၇ ရာခိုင်နှုန်း လျော့ကျခဲ့ကြောင်း သိရှိရသည်။

Source: Informist, September 22, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

Pages

Subscribe to RSS - ပြည်ပကုန်သွယ်မှုသတင်းများ