ပြည်ပကုန်သွယ်မှုသတင်းများ

          ကမ္ဘောဒီးယားနိုင်ငံသည် တရုတ်နိုင်ငံသို့ စိုက်ပျိုးရေးထွက်ကုန်များ ပိုမိုတင်ပို့နိုင်ရန်အတွက် စိုက်ပျိုးရေးထွက်ကုန် ပြုပြင်ထုတ်လုပ်ရေး၊ သိုလှောင်ရုံများနှင့် အအေးခန်းသယ်ယူ ပို့ဆောင်ရေးစနစ် (Cold Chain) များတွင် ရင်းနှီးမြှုပ်နှံမှုများ တိုးမြှင့်ဖော်ဆောင်ရန် အာရုံစိုက် နေကြောင်း သိရသည်။ တရုတ်နိုင်ငံသည် နှစ်နိုင်ငံအကြား သဘောတူညီထားသည့် စည်းမျဉ်းစည်းကမ်းများအရ ကမ္ဘောဒီးယား၏ စိုက်ပျိုးရေးထွက်ကုန် အမျိုးအစား ၁၉ မျိုးကို တင်သွင်းခွင့် ပြုထားသည်။ ၂၀၂၆ ခုနှစ်၊ စက်တင်ဘာ ၂၂ ရက်မှ ၂၄ ရက်အထိ တရုတ်နိုင်ငံ ဟီနန်ပြည်နယ်ရှိ Zhumadian International Convention and Exhibition Center တွင် ကျင်းပသည့် ၂၈ ကြိမ်မြောက် China Agricultural Products Processing Industry Investment and Trade Fair တွင် ကမ္ဘောဒီးယား စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန (MAFF) ဒုတိယ အမြဲတမ်းအတွင်းဝန် Ky Chanromdoul က ပြောကြားခဲ့ခြင်းဖြစ်သည်။ အဆိုပါပွဲသည် အလားအလာရှိသော ကမ္ဘောဒီးယား စိုက်ပျိုးရေးထွက်ကုန်များနှင့် စိုက်ပျိုးရေးအခြေခံ အစားအသောက်ထုတ်ကုန်များ တရုတ်နိုင်ငံသို့ တင်ပို့မှုမြှင့်တင်ရန် ရည်ရွယ်ကျင်းပခြင်း ဖြစ်ကြောင်း MAFF မှ ထုတ်ပြန်ထားသည်။ Chanromdoul က ၂၀၂၆ ခုနှစ်အထိ ကမ္ဘောဒီးယား စိုက်ပျိုးရေးဝန်ကြီးဌာနနှင့် တရုတ် အကောက်ခွန် အထွေထွေအုပ်ချုပ်ရေးအဖွဲ့တို့အကြား စိုက်ပျိုးရေးထွက်ကုန် တင်ပို့ရေးဆိုင်ရာ စည်းမျဉ်းစည်းကမ်း ၁၉ ခု လက်မှတ်ရေးထိုးထားပြီး ဖြစ်ကြောင်း ပြောကြားသည်။ ယင်းထုတ်ကုန်များတွင် ဆန်၊ ငှက်ပျော၊ လေရူသီး၊ သရက်၊ ဒူးရင်း၊ ပီလောပီနံ၊ သီဟိုဠ်စေ့၊ ငရုတ်ကောင်း၊ ငှက်သိုက်နှင့် ရေလုပ်ငန်းထွက်ကုန်များအပြင် အခြားအလားအလာရှိသော စိုက်ပျိုးရေးထွက်ကုန်များ ပါဝင်ကြောင်း သိရှိရပါသည်။

Source: Khmer Times                

DOCA(ရန်ကုန်)

           ကမ္ဘောဒီးယားနိုင်ငံ၏ Stock Exchange (စတော့အိတ်ချိန်း) စာရင်းဝင် ဖနွမ်းပင် ကိုယ်ပိုင်အုပ်ချုပ်ခွင့်ရဆိပ်ကမ်း (PPAP) သည် ၂၀၂၆ ခုနှစ် ပထမ ၈ လအတွင်း စုစုပေါင်းဝင်ငွေ အမေရိကန်ဒေါ်လာ ၃၉.၉၃ သန်း ရရှိခဲ့ပြီး ယမန်နှစ် အလားတူကာလထက် ၂၃ ရာခိုင်နှုန်း တိုးမြင့်ခဲ့ကြောင်း သိရသည်။ ဝင်ငွေတိုးတက်လာခြင်းမှာ ဆိပ်ကမ်းများမှ ကုန်စည်ကိုင်တွယ်မှုနှင့် ကွန်တိန်နာ ဖြတ်သန်းသယ်ယူမှု ပိုမိုမြင့်တက်လာခြင်းကြောင့်ဖြစ်သည်။ အဆိုပါကာလအတွင်း ဆိပ်ကမ်းမှ ကွန်တိန်နာယူနစ် စုစုပေါင်း ၄၈၄,၁၇၆ TEUs ကို ကိုင်တွယ်ခဲ့ပြီး ယမန်နှစ် အလားတူ ကာလထက် ၂၃.၉ ရာခိုင်နှုန်း တိုးတက်ခဲ့သည်။ ယင်းရလဒ်သည် ကမ္ဘောဒီးယား၏ ကုန်သွယ်ရေးကဏ္ဍ တည်ငြိမ်မှုနှင့် ပြည်ပပို့ကုန်၊ သွင်းကုန်ပမာဏများ ဆက်လက်မြင့်တက်နေမှုကို ဖော်ပြနေသည်။ ပြည်သူ့လုပ်ငန်းနှင့် ပို့ဆောင်ရေးဝန်ကြီးဌာနက ဆိပ်ကမ်းအခြေခံအဆောက်အအုံများ ခေတ်မီတိုးတက်ရေး၊ သယ်ယူပို့ဆောင်ရေးကွန်ရက်များ ချိတ်ဆက်မှုကောင်းမွန်ရေးနှင့် ထောက်ပံ့ပို့ဆောင်ရေးကဏ္ဍ ယှဉ်ပြိုင်နိုင်စွမ်း မြှင့်တင်ရေးတို့ကို ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ထားသည်။ ထို့အပြင် PPAP သည် မဲခေါင်(Mekong)နှင့် Tonle Sap မြစ်တစ်လျှောက် အထောက်အကူပြုဆိပ်ကမ်းများနှင့် ဘက်စုံသုံး မြစ်ဆိပ်ကမ်းများ တိုးချဲ့တည်ဆောက်လျက်ရှိပြီး ပြည်တွင်းရေကြောင်း သယ်ယူပို့ဆောင်ရေး တိုးတက်စေရန်နှင့် သယ်ယူပို့ဆောင်ရေးကုန်ကျစရိတ်လျှော့ချရန် ရည်ရွယ်ထားကြောင်း သိရှိရပါသည်။

Source: Khmer Times                                                           

DOCA(ရန်ကုန်)

          ဂျပန်နိုင်ငံနှင့် အရှေ့တောင်အာရှနိုင်ငံများအသင်း (အာဆီယံ) တို့သည် စီးပွားရေး ပူးပေါင်းဆောင်ရွက်မှု သဘောတူညီချက်ကို ပိုမိုခိုင်မာစေရန် ဆောင်ရွက်သွားမည်ဟု စက်တင်ဘာ လ ၂၀ ရက်နေ့တွင် ကျင်းပသည့် စက်မှုနှင့် ကုန်သွယ်ရေးဝန်ကြီးများ အစည်းအဝေး၌ သဘောတူ ညီခဲ့ကြောင်း ဂျပန်အစိုးရအရာရှိတစ်ဦးက ပြောကြားသည်။

        အဆိုပါသဘောတူညီချက်ကို ပြန်လည်သုံးသပ်ရာတွင် ကုန်စည်ထောက်ပံ့ရေးကွင်းဆက်များ ပြတ်တောက်နိုင်ခြေများနှင့် ဉာဏ်ရည်တုနည်းပညာ (AI) ၏ အခန်းကဏ္ဍ ပိုမိုကြီးမားလာမှုတို့ကို ထည့်သွင်းစဉ်းစားသွားမည်ဖြစ်ကြောင်း အဆိုပါအရာရှိက ဆိုသည်။ မနီလာမြို့၌ ကျင်းပသည့် အစည်းအဝေးတွင် နှစ်ဖက်အနေဖြင့် အရှေ့အလယ်ပိုင်း ပဋိပက္ခကြောင့် စွမ်းအင်ထောက်ပံ့မှုများအပေါ် သက်ရောက်နိုင်သည့် အခြေအနေများနှင့်စပ်လျဉ်း၍ ရေနံထောက်ပံ့မှုများ သေချာစေရန် ဆောင်ရွက်မည့် နည်းလမ်းများကိုလည်း ဆွေးနွေးခဲ့ကြသည်။ ဂျပန်နိုင်ငံက အာဆီယံအဖွဲ့ဝင်နိုင်ငံများတွင် ရေနံအရန်သိုလှောင်ထားရှိရေးကို ဆက်လက်ထောက်ခံကြောင်း ထပ်မံအတည်ပြုခဲ့ကြောင်း သိရသည်။

       ကမ္ဘာ့မရေရာမှုများ ပိုမိုမြင့်တက်လာနေချိန်တွင် “စိန်ခေါ်မှုများကို အခွင့်အလမ်းများအဖြစ် ပြောင်းလဲနိုင်ရန် အာဆီယံနှင့် ဂျပန်တို့ ပူးပေါင်းဆောင်ရွက်ရမည့် အချိန်ကာလဖြစ်သည်” ဟု ဂျပန်နိုင်ငံ စီးပွားရေး၊ ကုန်သွယ်ရေးနှင့် စက်မှုဝန်ကြီး Ryosei Akazawa က အစည်းအဝေးဖွင့်ပွဲတွင် ပြောကြားခဲ့သည်။

       ဂျပန်နှင့် အာဆီယံတို့အကြား စီးပွားရေးပူးပေါင်းဆောင်ရွက်မှု သဘောတူညီချက်ကို ၂၀၀၈ ခုနှစ်တွင် စတင်အသက်ဝင်ခဲ့သည်။ ထို့နောက် နှစ်ဖက်သည် ၂၀၁၉ ခုနှစ်တွင် ဝန်ဆောင်မှု ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ ပြဋ္ဌာန်းချက်များကို ပြန်လည်ပြင်ဆင်ခဲ့ကြသည်။ လက်ရှိကာလတွင် ပူးပေါင်းဆောင်ရွက်မှုသည် ပိုမိုအရေးပါလာကြောင်း ဖိလစ်ပိုင်နိုင်ငံ ကုန်သွယ် ရေးဝန်ကြီး Maria Cristina Roque က ပြောကြားခဲ့သည်။

           ဖိလစ်ပိုင်သမ္မတ Ferdinand Marcos Jr. နှင့် ဂျပန်ဝန်ကြီးချုပ် Sanae Takaichi တို့သည် ၂၀၂၆ ခုနှစ် မေလတွင် သဘောတူညီချက်ကို ပိုမိုချဲ့ထွင်နိုင်ရန် ရည်ရွယ်သည့် ပြင်ဆင်မှုများကို စဉ်းစားသုံးသပ်သွားရန် သဘောတူခဲ့ကြောင်း သိရှိရပါသည်။

Source : BangKok Post                                                                          

DOCA (ရန်ကုန်)

          မလေးရှားနိုင်ငံ၏ ၂၀၂၆ ခုနှစ် ပထမ ၈ လအတွင်း ပို့ကုန်တန်ဖိုးသည် ယခင်နှစ် အလားတူကာလထက် ၃၁.၂ ရာခိုင်နှုန်း မြင့်တက်ကာ မလေးရှားရင်းဂစ် ၁.၃၆ ထရီလီယံ (အမေရိကန် ဒေါ်လာ ၃၃၀ ဘီလီယံခန့်) အထိ ရောက်ရှိခဲ့ကြောင်း စက်တင်ဘာလ ၁၈ ရက်နေ့ ထုတ်ပြန်သည့် တရားဝင်အချက်အလက်များအရ သိရသည်။

         အဆိုပါ ပို့ကုန်တန်ဖိုးသည် ၂၀၂၅ ခုနှစ် တစ်နှစ်လုံး၏ ပို့ကုန်တန်ဖိုးကိုပင် ကျော်လွန်နိုင်သည့် အခြေအနေသို့ ရောက်ရှိနေပြီး လျှပ်စစ်နှင့် အီလက်ထရွန်နစ်ပစ္စည်းများ တင်ပို့မှုအားကောင်းလာခြင်းကလည်း ပို့ကုန်တိုးတက်မှုကို အထောက်အကူပြုခဲ့သည်။ အဆိုပါကာလအတွင်း မလေးရှား၏ စုစုပေါင်းကုန်သွယ်မှုပမာဏမှာ ၂၇ ရာခိုင်နှုန်း မြင့်တက်ကာ ရင်းဂစ် ၂.၅၁ ထရီလီယံ ရှိခဲ့သည်။ သွင်းကုန်မှာလည်း ၂၂.၄ ရာခိုင်နှုန်း မြင့်တက်ပြီး ရင်းဂစ် ၁.၁၆ ထရီလီယံ ရှိခဲ့သည်။ ထို့အပြင် ကုန်သွယ်မှုပိုငွေမှာ ရင်းဂစ် ၁၉၈.၆၆ ဘီလီယံ ရှိခဲ့ပြီး ယခင်နှစ် အလားတူ ကာလတွင် ရရှိခဲ့သည့် ကုန်သွယ်မှုပိုငွေထက် နှစ်ဆကျော် မြင့်တက်ခဲ့ကြောင်း သိရသည်။

        မလေးရှား ရင်းနှီးမြှုပ်နှံမှု၊ ကုန်သွယ်ရေးနှင့် စက်မှုဝန်ကြီးဌာနက မလေးရှားနိုင်ငံအနေဖြင့် နိုင်ငံတကာဈေးကွက်များတွင် ဈေးကွက်ဝေစု ပိုမိုတိုးချဲ့ရန်၊ မဟာဗျူဟာမြောက် စက်မှုလုပ်ငန်းများကို ပိုမိုခိုင်မာစေရန်နှင့် ပြည်ပတင်ပို့သူများအနေဖြင့် ကမ္ဘာ့ဈေးကွက်များမှ အခွင့်အလမ်းများကို ပိုမိုအသုံးချနိုင်ရန် ဆက်လက်ကြိုးပမ်းသွားမည်ဟု ပြောကြားခဲ့သည်။

           ဝန်ကြီးဌာနက လွတ်လပ်သောကုန်သွယ်ရေး သဘောတူညီချက်များ (FTA) ကို ပိုမိုအသုံးချခြင်းနှင့် လက်ရှိဈေးကွက်များအပြင် ထွန်းသစ်စဈေးကွက်များနှင့် ဆက်ဆံရေး ပိုမိုနက်ရှိုင်းစေခြင်းတို့မှတစ်ဆင့် ပို့ကုန်တိုးချဲ့ရန် အခွင့်အလမ်းများ ပိုမိုရရှိလာမည်ဟု ပြောကြားခဲ့သည်။ ထို့အပြင် တန်ဖိုးမြင့်ထုတ်လုပ်မှုလုပ်ငန်းများဘက်သို့ ရွှေ့ပြောင်းလုပ်ကိုင်ခြင်းက မလေးရှား၏ ပို့ကုန်အခြေခံနှင့် ရေရှည်ကုန်သွယ်ရေးအနေအထားကို ပိုမိုခိုင်မာစေမည်ဟုလည်း ပြောကြားခဲ့သည်။

            ဩဂုတ်လတစ်လတည်းတွင် မလေးရှား၏ စုစုပေါင်းကုန်သွယ်မှုသည် ယခင်နှစ် အလားတူ လထက် ၄၃.၄ ရာခိုင်နှုန်း မြင့်တက်ကာ ရင်းဂစ် ၃၅၄.၀၁ ဘီလီယံ ရှိခဲ့သည်။ ထိုလအတွင်း ပို့ကုန်သည် ၄၅.၅ ရာခိုင်နှုန်း မြင့်တက်ပြီး ရင်းဂစ် ၁၉၁.၀၅ ဘီလီယံ ရှိခဲ့သလို သွင်းကုန်မှာ ၄၁.၁ ရာခိုင်နှုန်း မြင့်တက်ကာ ရင်းဂစ် ၁၆၂.၉၆ ဘီလီယံ ရှိခဲ့ကြောင်း သိရှိရပါသည်။

Source : Xinhua                                                                                  

DOCA (ရန်ကုန်)

          တရုတ်နိုင်ငံသည် စက်တင်ဘာလ ၁၇ ရက်နေ့က အိန္ဒိယနိုင်ငံမှ ဆန်တင်ပို့သူ သုံးဦး၏ ပို့ကုန်မှတ်ပုံတင်ခြင်းများကို ထပ်မံရုတ်သိမ်းလိုက်ရာ တရုတ်ဈေးကွက်သို့ ဆန်တင်ပို့ခွင့် ပိတ်ပင်ခံထားရသည့် စုစုပေါင်း အိန္ဒိယကုမ္ပဏီအရေအတွက် ဆယ်ခုအထိ ရောက်ရှိလာခဲ့ပြီး ၎င်းတို့၏ ဆန်များတွင် မျိုးရိုးဗီဇပြောင်းလဲပြင်ဆင်ထားသော (Genetically Modified Organisms-GMO) ပစ္စည်းများပါရှိ သည်ဟူသော စွပ်စွဲချက်ကြောင့် ယခုကဲ့သို့ ပိတ်ပင်ခံရခြင်းဖြစ်ပြီး ထိုအချက်အလက်များကို အိန္ဒိယအာဏာပိုင်များနှင့် တင်ပို့သူများက ဆက်လက်ငြင်းဆန်လျက်ရှိကြောင်း သိရှိရသည်။

          အိန္ဒိယဘဏ္ဍာရေးဆိုင်ရာ နေ့စဉ်သတင်းစာတစ်စောင်၏ အတည်ပြုဖော်ပြချက်အရ အသစ်ပါဝင်သော ကုမ္ပဏီများမှာ Andhra Pradesh ပြည်နယ်၊ Kakinada မြို့အခြေစိုက် Sarla Foods, Pattabhi Agro Foods နှင့် New Delhi မြို့အခြေစိုက် Om India Trading Limited တို့ဖြစ်ကြပြီး ၎င်းတို့သည် ဧပြီလတွင် လိုင်စင်များ ပထမဆုံးအကြိမ် ရုပ်သိမ်းခံခဲ့ရသည့် Nagpur မှ Shriram Food Industry, Raipur မှ Spone Enterprises နှင့် Haryana မှ NM Foodimpex စသည့် ပထမအသုတ် တင်ပို့သူများနှင့် အတူ ပူးပေါင်းပါဝင်လာခြင်းဖြစ်ပြီး တရုတ်အကောက်ခွန် အာဏာပိုင်များက အိန္ဒိယ ဆန်တင်ပို့မှုများကို စစ်ဆေးမှုများ တိုးချဲ့လုပ်ဆောင်လာသည်နှင့်အမျှ ပိတ်ပင်ခံရသည့် ကုမ္ပဏီ စာရင်းများမှာ တစ်နှစ်တာအတွင်း တစ်စထက်တစ်စ တိုးပွားလာကြောင်း သိရှိရသည်။

          ဆက်လက်၍ တရုတ်နိုင်ငံ၏ တရားဝင်ပြသသော အကြောင်းပြချက်မှာ စမ်းသပ်စစ်ဆေးခဲ့သည့် ကုန်သေတ္တာများအတွင်း မျိုးရိုးဗီဇပြောင်းလဲထားသော သက်ရှိများ(GMOs) ကို တွေ့ရှိရခြင်းကြောင့်ဖြစ်ပြီး အိန္ဒိယ၏ စားသောက်ကုန်ဘေးကင်းလုံခြုံရေး အာဏာပိုင်များက ငြင်းပယ်ခံရသည့် ပို့ကုန်များကို စစ်ဆေးကြည့်ရာတွင် GMO ပါဝင်မှု လုံးဝမတွေ့ရှိရကြောင်းနှင့် အဆိုပါငြင်းပယ်ခံရသော ဆန်အုပ်စုများကို အခြားသော နိုင်ငံများသို့ ရောင်းချရာတွင် အရည်အသွေးစစ်ဆေးမှုများကို ပြဿနာတစ်စုံတစ်ရာမရှိဘဲ အောင်မြင်ကျော်ဖြတ်ခဲ့ကြကြောင်း တင်ပို့သူများကဆိုပြီး ထိုကွဲလွဲချက်ကြောင့်ပင် New Delhiမြို့ရှိ တာဝန်ရှိသူများအကြား ယခုကဲ့သို့ ငြင်းပယ်မှုများသည် စားသောက်ကုန် ဘေးကင်းရေးထက် ကုန်သွယ်ရေးမဟာဗျူဟာနှင့် ပိုမိုသက်ဆိုင်နေသည်ဟူသော သံသယများကို ဖြစ်ပေါ်စေခဲ့ကြောင်း သိရှိရသည်။

          ယခုကဲ့သို့ အကျပ်အတည်းမှာ နွေဦးရာသီကတည်းက အဆင့်ဆင့် မြင့်တက်လာခဲ့ခြင်းဖြစ်ပြီး မေလနှောင်းပိုင်းအထိ တရုတ်နိုင်ငံသည် ဆန်တင်ပို့မှု ကုန်သေတ္တာ ၇၀ ကျော်ကို ငြင်းပယ်ခဲ့ပြီး မှတ်ပုံတင်ခွင့် ရုတ်သိမ်းခံရသည့် တင်ပို့သူအရေအတွက်မှာလည်း ဩဂုတ်လတွင် သုံးဦးမှ ခုနှစ်ဦး အထိ မြင့်တက်ခဲ့ရာမှ ယခုလတွင် ဆယ်ဦးအထိရောက်ရှိလာခဲ့ပြီး တရုတ်နိုင်ငံသည် ဗီယက်နမ်၊ မြန်မာနှင့် ပါကစ္စတန်တို့မှ ဆန်တင်ပို့မှုများသည် အလားတူ တင်းကျပ်သည့် စစ်ဆေးမှုများနှင့် ရင်ဆိုင်ရခြင်းမရှိကြောင်း ထောက်ပြကြပြီး တင်ပို့သူအသင်းအဖွဲ့များ အပါအဝင် စက်မှုလုပ်ငန်း ဆိုင်ရာ အဖွဲ့အစည်းများက တရုတ်နိုင်ငံသည် GMO စစ်ဆေးမှုကို မျှတမှုမရှိပဲ ကျင်းသုံးနေကြောင်း ကုန်သည်များကထိုလုပ်ရပ်ကို စစ်မှန်သော ဇီဝလုံခြုံရေးဆိုင်ရာ စိုးရိမ်မှုတစ်ခုထက် ကုန်သွယ်မှု ဆိုင်ရာ အကောက်ခွန်မဟုတ်သော အတားအဆီးတစ်ခုအဖြစ်ဖော်ပြကြပြီး အချို့သောလုပ်ငန်း လေ့လာသူများကမူ Beijing အစိုးရအနေဖြင့် ၎င်းတို့၏ ပြည်တွင်းဆန်လက်ကျန်များကို ထိန်းချုပ်ရန်အတွက် ထိုဆန်ငြင်းပယ်မှုများကို အသုံးပြုနေဖွယ်ရှိသည်ဟု သုံးသပ်ကြသော်လည်း ထိုအချက်မှာ အတည်ပြုထားသော ရည်ရွယ်ချက်တစ်ခုထက် ခန့်မှန်းချက်မျှသာဖြစ်နေဆဲဖြစ်ကြောင်းသိရှိရသည်။

          ထို့ပြင် အိန္ဒိယကုန်သွယ်ရေးသတင်းစာများတွင် ဖော်ပြထားသော စက်မှုလုပ်ငန်းဆိုင်ရာ ကိန်းဂဏန်းများအရ တရုတ်နိုင်ငံမှ ငြင်းပယ်ခံရသော ဆန်ကုန်သေတ္တာ တစ်သေတ္တာကို အိန္ဒိယသို့ ပြန်လည်သယ်ယူရသည့် ကုန်ကျစရိတ်မှာ အမေရိကန်ဒေါ်လာ ၂၅၀၀ မှ ၄၅၀၀ အထိရှိပြီး မူလတင်ပို့ စဉ်ကကုန်ကျစရိတ်မှာ ဒေါ်လာ ၂၅၀ ခန့်သာရှိရာ ကုန်ကျစရိတ်ကွာဟချက်ကြီးမားမှုက ပုံမှန်ကုန်သွယ်ရေး ငြင်းပယ်ခံရမှုကို အလတ်စားတင်ပို့သည့် ကုမ္ပဏီတစ်ခုအတွက် ပြင်းထန်သော ငွေကြေးဆုံးရှုံးမှုကြီးတစ်ခုအဖြစ်သို့ ပြောင်းလဲသွားစေနိုင်ကြောင်း သိရှိရပါသည်။

Source : Global Agriculture                                                                    

DOCA(ရန်ကုန်)