ဂျပန်နိုင်ငံ၌ အစိုးရသည် အရေးပေါ်အခြေအနေများအတွက် သိမ်းဆည်းထားသော ဆန် များအနက်မှ တန်ချိန် ၂၁၀၀၀၀ ခန့်ကို ဈေးကွက်အတွင်းသို့ ထုတ်ပေးရန် ဆုံးဖြတ်ခဲ့သည်ဟု စိုက်ပျိုးရေး၊ သစ်တောနှင့် ရေလုပ်ငန်းဝန်ကြီး Taku Eto က ၁၄-၂-၂၀၂၅ ရက်နေ့တွင် ထုတ်ဖော် ကြေညာခဲ့သည်။ ဆန်ဈေးကွက်တည်ငြိမ်မှုအပေါ် မူတည်၍ ကျန်ရှိနေသေးသော အရန်ဆန်များ ကို မည်သည့်အချိန်တွင် မည်မျှထပ်မံထုတ်ပေးမည်ကို နောက်ပိုင်း၌ ဆုံးဖြတ်မည်ဖြစ်ကြောင်း သိရှိရသည်။
၂၀၂၄ ခုနှစ်၌ စိုက်ပျိုးထွက်ရှိသော ဆန်တန်ချိန် ၁၀၀၀၀၀ နှင့် ၂၀၂၃ ခုနှစ်တွင် စိုက်ပျိုး ထုတ်လုပ်ခဲ့သော ဆန်တန်ချိန် ၅၀၀၀၀ တို့ကို ပထမအကြိမ်အဖြစ် စိုက်ပျိုးရေးဝန်ကြီးဌာနက ထုတ်ပေးမည်ဖြစ်ပြီး ၂၀၂၅ ခုနှစ်၊ မတ်လအတွင်း ဂျပန်နိုင်ငံစိုက်ပျိုးရေးသမဝါယမအသင်းချုပ် (Zen-Noh) ကဲ့သို့သော အဓိကအဖွဲ့အစည်းများထံသို့ ကန့်သတ်တင်ဒါခေါ်ယူ၍ ရောင်းချသွား မည်ဖြစ်ကြောင်း သိရှိရသည်။
ဖြန့်ဖြူးပေးမည့် ဆန်များသည် မတ်လကုန် သို့မဟုတ် ယင်းကာလနောက်ပိုင်းတွင် စတိုး ဆိုင်များသို့ ရောက်ရှိမည်ဖြစ်ပြီး ၎င်းကဲ့သို့ ဆန်ထုတ်ပေးမှုသည် ဆန်ဈေးကွက်ကို တည်ငြိမ်စေပြီး ဆန်ဈေးနှုန်းများ ကျဆင်းလာစေရန် မျှော်လင့်ထားကြောင်း သိရှိရသည်။
ဝန်ကြီးဌာနအနေဖြင့် ယခင်က အဓိကသီးနှံပျက်စီးမှုများ သို့မဟုတ် သဘာဝဘေး အန္တရာယ်ကျရောက်မှုများကဲ့သို့သော အရေးပေါ်အခြေအနေများတွင်သာ သိုလှောင်ဆန်များကို ထုတ်ပေးခဲ့ကြောင်း၊ သို့သော်လည်း ယခင်နှစ် နွေရာသီမှစ၍ ဆန်ဈေးနှုန်းများ မြင့်တက်နေမှု ကြောင့် ယခုနှစ် ဇန်နဝါရီလကုန်ပိုင်းတွင် ဆန်သိုလှောင်မှုဆိုင်ရာ မူဝါဒကို ပြင်ဆင်ခဲ့ကြောင်း၊ ၂၀၂၄ ခုနှစ်၌ စိုက်ပျိုးထုတ်လုပ်ရှိသော ဆန်များ ဈေးကွက်သို့ ဝင်ရောက်လာသော်လည်း ဆန် ဈေးနှုန်းများ ဆက်လက်မြင့်တက်နေလျက်ရှိသဖြင့် အရန်ဆန်များ ထုတ်ပေးရန် ဆုံးဖြတ်ချက်ချ ခဲ့ခြင်းဖြစ်ကြောင်း၊ အရန်ရိက္ခာ သိုလှောင်ထားသည့် ဆန်များကို ဈေးကွက်တည်ငြိမ်စေရန် ရည်ရွယ်ချက်ဖြင့် ထုတ်ပေးခြင်းမှာ ပထမဆုံးအကြိမ်ဖြစ်ကြောင်း သိရှိရသည်။
လက်ရှိကာလ၌ ဆန်ဖြန့်ဖြူးမှု ရပ်တန့်နေသည့် အခြေအနေကို တိုးတက်ကောင်းမွန်စေလို ကြောင်း ဝန်ကြီး Eto က ၁၄-၂-၂၀၂၅ရက်နေ့တွင် ကျင်းပသော အစိုးရအဖွဲ့၏ အစည်းအဝေးအပြီး သတင်းစာရှင်းလင်းပွဲတွင် ပြောကြားခဲ့သည်။
၂၀၂၄ ခုနှစ်တွင် စုစုပေါင်းဆန်တန်ချိန် ၆.၇၉ သန်း ထုတ်လုပ်ခဲ့ပြီး ၂၀၂၃ ခုနှစ်ကထက် တန်ချိန် ၁၈၀၀၀၀ ပိုမိုသည်ဟု ဂျပန်စိုက်ပျိုးရေးဝန်ကြီးဌာနက ဖော်ပြထားသည်။ သို့သော်လည်း Zen-Noh နှင့် အခြားအဖွဲ့အစည်းများအနေဖြင့် ယခင်နှစ် ဒီဇင်ဘာလကုန်အထိ ယခင်နှစ်ထက် ဆန်တန်ချိန် ၂၁၀၀၀၀ လျော့နည်းစုဆောင်းခဲ့ကြောင်း၊ အစိုးရ၏ သိုလှောင်ထားသည့်ဆန် တန် ချိန် ၁ သန်း အနက် ၂၀% ခန့်ကို ထုတ်ပေးမည်ဖြစ်ကြောင်း သိရှိရသည်။
ပြင်ဆင်ထားသောမူဝါဒအရ ဂျပန်အစိုးရသည် ဆန်ဈေးကွက် မတည်ငြိမ်သည့်အချိန်နှင့် စိုက်ပျိုးရေးဝန်ကြီးက လိုအပ်သည်ဟု ယူဆသည့်အချိန်တို့တွင် အရန်ဆန်များကို ထုတ်ပေးခွင့်ရှိ မည်ဖြစ်ပြီး အစိုးရသည် တစ်နှစ်အတွင်း အရည်အသွေးတူညီသော ပြည်တွင်းထုတ်ဆန်များကို ညီမျှသော ပမာဏဖြင့် ဝယ်ယူရမည်ဖြစ်သည်။ တစ်နှစ်လျှင် ဆန်တန်ချိန် ၅၀၀၀ ထက် ပိုမို ကိုင်တွယ်ရောင်းဝယ်သော လုပ်ငန်းများသည် ထုတ်ပေးမည့် ဆန်များအတွက် လေလံတင်ပွဲတွင် ပါဝင်ခွင့်ရှိမည်ဖြစ်ပြီး လေလံအောင်မြင်သူများ အနေဖြင့် ဆန်ရောင်းချမှုများကို နှစ်ပတ်လျှင် တစ်ကြိမ် စိုက်ပျိုးရေးဝန်ကြီးဌာနသို့ အစီရင်ခံစာတင်ပြရန် လိုအပ်မည်ဖြစ်သည်။
ဂျပန်နိုင်ငံ၌ ၁၉၉၃ ခုနှစ်တွင် ဆန်စပါးထွက်ရှိမှု အလွန်အမင်း ကျဆင်းခဲ့အပြီး ၁၉၉၅ ခုနှစ် တွင် အရေးပေါ်အခြေအနေများအတွက် ဆန်သိုလှောင်ထားရှိသည့်စနစ်ကို စတင်တည်ထောင်ခဲ့ ကြောင်း၊ ၂၀၁၁ ခုနှစ်တွင် ဂျပန်နိုင်ငံ အရှေ့ပိုင်း ငလျင်ကြီးနှင့် တွေ့ကြုံခဲ့ရအပြီး၌ လည်းကောင်း၊ ၂၀၁၆ ခုနှစ်တွင် ဖြစ်ပွားခဲ့သော ကူမာမိုတိုငလျင် အပြီးတွင်လည်းကောင်း အရန်ဆန်များကို ထုတ် ပေးမှု ရှိခဲ့ကြောင်း သိရှိရသည်။
Source: Yomiuri Shimbun, 14 February, 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)
