ပြည်ပကုန်သွယ်မှုသတင်းများ

     အင်ဒိုနီးရှားနိုင်ငံပိုင် ရင်းနှီးမြှုပ်နှံမှုရန်ပုံငွေ Danantara Indonesia သည် အမေရိကန်နိုင်ငံ Texas ပြည်နယ်အခြေစိုက် ရေနံနှင့် သဘာဝဓာတ်ငွေ့ကုမ္ပဏီ HighPeak Energy, Inc. (NASDAQ: HPK) တွင် အမေရိကန်ဒေါ်လာ သန်း ၂၅၀ ရင်းနှီးမြှုပ်နှံမည်ဖြစ်ကြောင်း ကြေညာခဲ့သည်။ အဆိုပါရင်းနှီးမြှုပ်နှံမှုကို ၎င်း၏ ရင်းနှီးမြှုပ်နှံမှုလုပ်ငန်းခွဲ PT Danantara Investment Management (DIM) မှတစ်ဆင့် ဆောင်ရွက်မည်ဖြစ်‌ကြောင်း သိရသည်။

     HighPeak Energy သည် အမေရိကန်နိုင်ငံ၏ ရေနံစိမ်းအများဆုံးထုတ်လုပ်ရာ ဒေသဖြစ်သည့် Permian Basin တွင် ရေနံနှင့် သဘာဝဓာတ်ငွေ့လုပ်ကွက်များ ဝယ်ယူခြင်း၊ ဖွံ့ဖြိုးတိုးတက်အောင် ဆောင်ရွက်ခြင်းနှင့် ရှာဖွေတူးဖော်ခြင်းလုပ်ငန်းများ လုပ်ကိုင်လျက်ရှိသည်။ ယင်းရင်းနှီးမြှုပ်နှံမှုကို အဆင့်ဆင့်ခွဲဝေထုတ်ပေးမည့် ပြောင်းလဲနိုင်သော ဦးစားပေးရှယ်ယာများ ထုတ်ပေးခြင်းဖြင့် အကောင်အထည်ဖော်မည်ဖြစ်ကြောင်း သိရသည်။

        DIM ၏ အမှုဆောင်အရာရှိချုပ် Pandu Sjahrir က အဆိုပါရင်းနှီးမြှုပ်နှံမှုသည် ရေရှည်တည်တံ့သော အကျိုးအမြတ်များရရှိစေပြီး အင်ဒိုနီးရှားနိုင်ငံ၏ အမျိုးသားအကျိုးစီးပွားကို အထောက်အကူပြုနိုင်သည့် မဟာဗျူဟာမြောက်ကဏ္ဍများတွင် ရင်းနှီးမြှုပ်နှံရန် ချမှတ်ထားသော မိမိတို့၏ လုပ်ငန်းတာဝန်နှင့် ကိုက်ညီကြောင်း အောက်တိုဘာလ ၆ ရက်နေ့ထုတ်ပြန်သည့် ကြေညာချက်တွင် ပြောကြားခဲ့ကြောင်း သိရသည်။

       ထို့ပြင် ကမ္ဘာ့အဆင့်မြင့်ဆုံး ရေနံနှင့် သဘာဝဓာတ်ငွေ့ ထုတ်လုပ်ရေးဈေးကွက်များအနက် တစ်ခုဖြစ်သည့် အမေရိကန်နိုင်ငံ၏ အထက်ပိုင်းရေနံနှင့် သဘာဝဓာတ်ငွေ့လုပ်ငန်းကဏ္ဍတွင် HighPeak Energy ၏ မဟာဗျူဟာမြောက် ရပ်တည်ချက်သည် Danantara အနေဖြင့် ကမ္ဘာတစ်ဝန်းရှိ ဈေးကွက်များတွင် အမျိုးမျိုးခွဲဝေထားသော ရင်းနှီးမြှုပ်နှံမှုအစုစုကို တည်ဆောက်ရာ၌ အလားအလာကောင်းသည့် အခွင့်အလမ်းတစ်ရပ်ဖြစ်ကြောင်း ၎င်းက ပြောကြားခဲ့ကြောင်း သိရသည်။

      ယင်းပူးပေါင်းဆောင်ရွက်မှုမှတစ်ဆင့် နည်းပညာနှင့် အသိပညာများ လွှဲပြောင်းရယူနိုင်ပြီး အင်ဒိုနီးရှားနိုင်ငံ၏ စွမ်းအင်ကဏ္ဍ ဖွံ့ဖြိုးတိုးတက်ရေးကို အထောက်အကူပြုနိုင်မည်ဖြစ်သကဲ့သို့ အင်ဒိုနီးရှားနှင့် အမေရိကန်နိုင်ငံတို့အကြား ကာလရှည်ကြာတည်ရှိခဲ့သော စွမ်းအင်နှင့် စီးပွားရေးဆိုင်ရာ ဆက်ဆံရေးများကိုလည်း ပိုမိုခိုင်မာစေမည်ဟု မျှော်လင့်ကြောင်း Pandu Sjahrir က ဖြည့်စွက်ပြောကြားခဲ့ကြောင်း သိရသည်။

      HighPeak Energy ၏ ဥက္ကဋ္ဌနှင့် အမှုဆောင်အရာရှိချုပ် Michael Hollis ကလည်း DIM နှင့် ပူးပေါင်းဆောင်ရွက်မှုကြောင့် ရေရှည်အရင်းအနှီးများ ဆက်လက်ဖြည့်တင်းပေးနိုင်မည်ဖြစ်ပြီး တူးဖော်ရေးအစီအစဉ်များ တိုးချဲ့ဆောင်ရွက်ခြင်းအပါအဝင် လုပ်ငန်းပိုင်ဆိုင်မှုများ ဖွံ့ဖြိုးတိုးတက်ရေးကို အရှိန်မြှင့်တင်နိုင်မည်ဟု ယုံကြည်ကြောင်း ပြောကြားခဲ့ကြောင်း သိရသည်။

    HighPeak Energy သည် အဆိုပါရင်းနှီးမြှုပ်နှံမှုငွေကြေးကို ၎င်း၏ အရင်းအနှီးဖွဲ့စည်းပုံ ပိုမိုခိုင်မာစေရန်နှင့် ဘဏ္ဍာရေးဆိုင်ရာ လိုက်လျောညီထွေစွာ ဆောင်ရွက်နိုင်စွမ်း မြှင့်တင်ရန် အသုံးပြုမည်ဖြစ်သည်။ ထို့အပြင် အရည်အသွေးမြင့် လုပ်ငန်းပိုင်ဆိုင်မှုများကို ရေရှည်တည်တံ့စွာ ဖွံ့ဖြိုးတိုးတက်စေရန်နှင့် လုပ်ငန်းတိုးချဲ့နိုင်ရန်လည်း အထောက်အကူပြုမည်ဖြစ်ကြောင်း သိရသည်။

       Michael Hollis က အဆိုပါပူးပေါင်းဆောင်ရွက်မှုသည် ရေရှည်ရင်းနှီးမြှုပ်နှံမှုနှင့် တန်ဖိုးဖန်တီးမှုတို့အပေါ် တူညီသော ကတိကဝတ်ရှိသည့် ရင်းနှီးမြှုပ်နှံသူများကို ပေါင်းစည်းပေးခြင်းဖြစ်ကြောင်း ပြောကြားခဲ့ကြောင်း သိရသည်။

       အမေရိကန်နိုင်ငံ စွမ်းအင်သတင်းအချက်အလက်စီမံခန့်ခွဲရေးအဖွဲ့ (U.S. Energy Information Administration) ၏ အချက်အလက်များအရ Permian Basin ဒေသသည် ၂၀၂၅ ခုနှစ်အတွင်း အမေရိကန်နိုင်ငံ၏ ရေနံစိမ်းထုတ်လုပ်မှုစုစုပေါင်း၏ ၄၈ ရာခိုင်နှုန်းကို ထုတ်လုပ်ပေးခဲ့သည်။ ယင်းဒေသ၌ ၂၀၀၇ ခုနှစ်မှစတင်၍ ရေနံထုတ်လုပ်မှု တိုးတက်လာခြင်းမှာ အလျားလိုက်တူးဖော်သည့် နည်းပညာနှင့် ဖိအားမြင့်အရည်အသုံးပြု၍ ကျောက်လွှာများအတွင်းမှ ရေနံနှင့် သဘာဝဓာတ်ငွေ့ ထုတ်ယူသည့် Hydraulic Fracturing (Fracking) နည်းပညာတို့ကြောင့် အဓိကဖြစ်ကြောင်း သိရသည်။

      မြေအောက်သိုက်အခြေအနေများ သင့်လျော်ပါက အဆိုပါခေတ်မီထုတ်ယူရေးနည်းပညာများကို ကုန်းတွင်းရှိ သက်တမ်းရင့် ရေနံနှင့် သဘာဝဓာတ်ငွေ့လုပ်ကွက်များတွင်လည်း အသုံးပြုနိုင်ပြီး ရေတွင်းများ၏ ထုတ်လုပ်နိုင်စွမ်းကို မြှင့်တင်ပေးနိုင်သည်။ ယင်းနည်းလမ်းသည် ပြည်တွင်းရေနံထုတ်လုပ်မှု တိုးမြှင့်ရန် ကြိုးပမ်းနေသည့် အင်ဒိုနီးရှားနိုင်ငံအတွက် နမူနာယူနိုင်သည့် နည်းလမ်းတစ်ရပ်ဖြစ်လာနိုင်ကြောင်း သိရသည်။

       DIM သည် စည်းကမ်းတကျ ရင်းနှီးမြှုပ်နှံမှုများ ဆောင်ရွက်ခြင်းနှင့် အင်ဒိုနီးရှားနိုင်ငံ၏ ရေရှည်စီးပွားရေးတိုးတက်မှုအတွက် အဓိပ္ပာယ်ရှိသော ပံ့ပိုးမှုများ ပြုလုပ်ခြင်းတို့မှတစ်ဆင့် မိမိ၏ လုပ်ငန်းတာဝန်များကို ဆက်လက်အကောင်အထည်ဖော်သွားမည်ဖြစ်ကြောင်း ပြောကြားထားကြောင်း သိရသည်။

      ရင်းနှီးမြှုပ်နှံမှုသဘောတူညီချက်အရ DIM သည် ရင်းနှီးမြှုပ်နှံမှုတန်ဖိုး ကျဆင်းလာပါက အကာအကွယ်ရရှိနိုင်မည့် အခွင့်အရေးများနှင့်အတူ အနာဂတ်တွင် ရှယ်ယာတန်ဖိုးမြင့် တက်လာပါက အကျိုးအမြတ်ရရှိနိုင်မည့် အခွင့်အလမ်းကိုလည်း ရရှိမည်ဖြစ်သည်။ ယင်းအတွက် DIM သည် မိမိပိုင်ရှယ်ယာများကို သာမန်ရှယ်ယာများအဖြစ် ပြောင်းလဲနိုင်မည်ဖြစ်ကြောင်း သိရသည်။

        ထို့အပြင် HighPeak Energy က အနာဂတ်တွင် ပုဂ္ဂလိကနေရာချထားမှုစနစ်ဖြင့် ထပ်မံထုတ်ဝေမည့် ရှယ်ယာများတွင် ပါဝင်ရင်းနှီးမြှုပ်နှံခွင့်ကိုလည်း DIM က ရရှိမည်ဖြစ်သည်။ ယင်းအပြင် HighPeak Energy ၏ ဒါရိုက်တာအဖွဲ့တွင် DIM ကိုယ်စားလှယ်တစ်ဦး ခန့်အပ်ခွင့်လည်း ရရှိမည်ဖြစ်ကြောင်း သိရသည်။

        အဆိုပါရင်းနှီးမြှုပ်နှံမှုလုပ်ငန်းစဉ် ပြီးစီးသည့်အခါ HighPeak Energy သည် အင်ဒိုနီးရှားလုပ်သားများ၏ လုပ်ငန်းစွမ်းရည်နှင့် နည်းပညာကျွမ်းကျင်မှု တိုးတက်စေရန် လေ့ကျင့်ရေးအစီအစဉ်များနှင့် ကုမ္ပဏီအချင်းချင်း ဝန်ထမ်းအပြန်အလှန် စေလွှတ်တာဝန်ထမ်း ဆောင်စေသည့် အစီအစဉ်များကို ဖော်ဆောင်သွားမည်ဖြစ်ကြောင်း သိရှိရပါသည်။

Antara News                                                                             

DOCA (ရန်ကုန်)

        အင်ဒိုနီးရှားနိုင်ငံတွင် ပြည်တွင်း၌ ထုတ်လုပ်နိုင်ပြီးဖြစ်သည့် ကုန်ပစ္စည်းများ၏ တင်သွင်းမှုကို ရွေးချယ်ကန့်သတ်ခြင်းဖြင့် ပြည်တွင်းစက်မှုလုပ်ငန်းများအတွက် အခွင့်အလမ်းများ ပိုမိုရရှိလာစေပြီး ယှဉ်ပြိုင်နိုင်စွမ်းကို မြှင့်တင်ပေးနိုင်မည်ဖြစ်ကြောင်း Indonesian Chamber of Commerce and Industry (Kadin) က ပြောကြားကြောင်း သိရသည်။

         Kadin ၏ စက်မှုလုပ်ငန်းဆိုင်ရာ ဒုဥက္ကဋ္ဌ Saleh Husin က တင်သွင်းမှု ထိန်းချုပ်ရေးနှင့် အတူ ရင်းနှီးမြှုပ်နှံမှုဆိုင်ရာ အတားအဆီးများကို ဖယ်ရှားပေးရန် လိုအပ်ပြီး ယင်းမှတစ်ဆင့် ပြည်တွင်းထုတ်လုပ်မှုစွမ်းရည် တိုးချဲ့ကာ ဈေးကွက်လိုအပ်ချက်ကို ဖြည့်ဆည်းပေးနိုင်မည်ဖြစ်ကြောင်း ပြောကြားသည်။

          ပြည်တွင်း၌ ထုတ်လုပ်ပြီးဖြစ်သည့် ကုန်ပစ္စည်းများအပါအဝင် သွင်းကုန်ပမာဏ မြင့်မားနေခြင်းသည် အမျိုးသားစက်မှုလုပ်ငန်းများ၏ ခံနိုင်ရည်အား မြှင့်တင်ရေး ကြိုးပမ်းမှုများကို ထိခိုက်စေနိုင်သဖြင့် စက်မှုကဏ္ဍတစ်ရပ်ချင်းစီ၏ အခြေအနေအလိုက် ကာကွယ်ရေးအစီအမံများ ချမှတ်သင့်ကြောင်း Saleh Husin က ဆိုသည်။

      ပြည်တွင်းစက်မှုလုပ်ငန်းများကို ကာကွယ်ရေးအစီအမံများ ပိုမိုခိုင်မာစွာ ဆောင်ရွက်ရန်လိုအပ်သော်လည်း တိကျစွာတိုင်းတာနိုင်ပြီး ရွေးချယ်မှုရှိကာ အချက်အလက်အပေါ် အခြေခံသည့် မူဝါဒဖြစ်ရန် လိုအပ်ကြောင်း၊ ပြည်တွင်းစက်မှုလုပ်ငန်းများက အရည်အသွေးနှင့် ပမာဏ လုံလောက်စွာ ထုတ်လုပ်ပေးနိုင်သည့် ကုန်ပစ္စည်းများကိုသာ အဓိကထား ကာကွယ်သင့်ကြောင်း ၎င်းက ပြောကြားခဲ့ကြောင်း သိရသည်။

     ထို့ပြင် ဈေးကွက်တစ်ခုတည်းတွင် ပြည်တွင်းထုတ်ကုန်များနှင့် ပြည်ပမှတင်သွင်းသည့် ထုတ်ကုန်များအကြား ယှဉ်ပြိုင်မှုကို အစိုးရအနေဖြင့် အလေးထားသင့်ပြီး ပြည်တွင်းစက်မှုလုပ်ငန်းများ ဖွံ့ဖြိုးတိုးတက်ကာ ပြည်ပထုတ်ကုန်များနှင့် ယှဉ်ပြိုင်နိုင်ရန် လုံလောက်သည့် အခွင့်အလမ်းများ ပေးသင့်ကြောင်း သိရသည်။

         သို့သော် စက်မှုကဏ္ဍများအလိုက် သွင်းကုန်လိုအပ်ချက်များ ကွဲပြားသဖြင့် တစ်ပြေးညီ သတ်မှတ်မထားသင့်ကြောင်း Saleh Husin က ဆိုသည်။ ထုတ်လုပ်မှုကဏ္ဍအချို့သည် ပြည်တွင်းပေးသွင်းသူများက လိုအပ်ချက်အားလုံးကို ဖြည့်ဆည်းပေးနိုင်ခြင်း မရှိသေးသဖြင့် ကုန်ကြမ်းနှင့် အရင်းအနှီးပစ္စည်းများအတွက် သွင်းကုန်များအပေါ် ဆက်လက်မှီခိုနေရကြောင်း ၎င်းက ရှင်းပြခဲ့ကြောင်း သိရသည်။

      ထို့ကြောင့် သွင်းကုန်စည်းမျဉ်းများကို စဉ်ဆက်မပြတ် ပြန်လည်သုံးသပ်ပြီး လိုအပ်ပါက မမျှတသည့် ယှဉ်ပြိုင်မှုများကို တားဆီးနိုင်ရန် ရွေးချယ်ကန့်သတ်မှုများ ပြုလုပ်သင့်သော်လည်း ပြည်တွင်း၌ မဖြည့်ဆည်းနိုင်သေးသည့် ကုန်ကြမ်း၊ အရင်းအနှီးပစ္စည်းများနှင့် ကုန်ပစ္စည်းများ တင်သွင်းမှုကို ထိခိုက်စေခြင်းမရှိစေရန် လိုအပ်ကြောင်း ၎င်းက ဆက်လက်ပြောကြားသည်။ ထို့အပြင် သွင်းကုန်ထိန်းချုပ်မှုသည် အမျိုးသားထုတ်လုပ်မှုစွမ်းရည် မြှင့်တင်ရေး အစီအစဉ်များ၏ တစ်စိတ်တစ်ပိုင်းအဖြစ် ဆောင်ရွက်သင့်ကြောင်း Saleh Husin က ပြောကြားခဲ့ကြောင်း သိရသည်။

        သွင်းကုန်ကန့်သတ်မှုတစ်ခုတည်းဖြင့် လုံလောက်မည်မဟုတ်ဘဲ စက်မှုလုပ်ငန်းထုတ်လုပ်မှုစွမ်းရည် မြှင့်တင်ခြင်းနှင့် စီးပွားရေးလုပ်ငန်းများအတွက် လုပ်ငန်းဆောင်ရွက်မှုဆိုင်ရာ သေချာမှုရှိစေရေးတို့ကိုလည်း တိုးမြှင့်ဆောင်ရွက်ရန် လိုအပ်ကြောင်း ၎င်းက ဆိုသည်။

        ရင်းနှီးမြှုပ်နှံမှုဆိုင်ရာ အတားအဆီးများကို ဖြေရှင်းခြင်းသည် စက်မှုလုပ်ငန်းကာကွယ်ရေး၏ အရေးပါသည့် အစိတ်အပိုင်းတစ်ရပ်ဖြစ်ပြီး လိုင်စင်ရယူမှုများ ရိုးရှင်းလွယ်ကူစေခြင်း၊ စီးပွားရေးလုပ်ငန်းများအတွက် မူဝါဒနှင့် လုပ်ငန်းဆောင်ရွက်မှုဆိုင်ရာ သေချာမှုရှိစေခြင်းနှင့် ထုတ်လုပ်မှုစွမ်းရည် တိုးချဲ့ရေးအတွက် အထောက်အပံ့ပေးခြင်းတို့သည် အင်ဒိုနီးရှားနိုင်ငံတွင် ရင်းနှီးမြှုပ်နှံမှုများ တိုးမြှင့်လာစေရန် အရေးကြီးကြောင်း သိရသည်။

     အမျိုးသားစက်မှုလုပ်ငန်းများ၏ ခံနိုင်ရည်အား ထိန်းသိမ်းရန် အစိုးရတွင် အမျိုးမျိုးသော မူဝါဒများရှိပြီး စက်မှုကဏ္ဍတစ်ခုချင်းစီ၏ အခြေအနေနှင့် လက္ခဏာများအပေါ်မူတည်၍ အသုံးပြုသင့်ကြောင်း Saleh Husin က ပြောကြားခဲ့ကြောင်း သိရသည်။

       ယင်းမူဝါဒကိရိယာများတွင် သွင်းကုန်ထိန်းချုပ်ခြင်း၊ ပြည်တွင်းအစိတ်အပိုင်းအသုံးပြုမှုအဆင့် (TKDN) မြှင့်တင်ခြင်း၊ ပြည်တွင်းစက်မှုလုပ်ငန်းများ ထိခိုက်နစ်နာမှုမှ ကာကွယ်ရေးအစီအမံများနှင့် မက်လုံးပေးမှုများ ပါဝင်နိုင်သော်လည်း ထုတ်ကုန်တစ်မျိုးချင်းစီ၏ သဘောသဘာဝနှင့် ကိုက်ညီအောင် အကောင်အထည်ဖော်ရန် လိုအပ်ကြောင်း ၎င်းက ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

          ကမ္ဘောဒီးယားနိုင်ငံ၏ ၂၀၂၆ ခုနှစ် ပထမကိုးလအတွင်း ပို့ကုန်သွင်းကုန် ကုန်သွယ်မှုပမာဏသည် အမေရိကန်ဒေါ်လာ ၅၈.၄၉ ဘီလီယံအထိ ရောက်ရှိခဲ့ပြီး ယမန်နှစ် အလားတူ ကာလထက် ၂၂.၁ ရာခိုင်နှုန်း မြင့်တက်လာကြောင်း ကုန်သွယ်ရေးဝန်ကြီးဌာန၏ အစီရင်ခံစာတွင် ဖော်ပြထားသည်။ ၂၀၂၆ ခုနှစ်၊ ဇန်နဝါရီလမှ စက်တင်ဘာလအထိ ကမ္ဘောဒီးယားနိုင်ငံ၏ ပို့ကုန် တန်ဖိုးမှာ အမေရိကန်ဒေါ်လာ ၂၇.၄၇ ဘီလီယံရှိခဲ့ပြီး ယမန်နှစ် အလားတူကာလထက် ၁၈ ရာခိုင်နှုန်း တိုးတက်ခဲ့သည်။ သွင်းကုန်တန်ဖိုးမှာလည်း ၂၆ ရာခိုင်နှုန်း မြင့်တက်ကာ ဒေါ်လာ ၃၁ ဘီလီယံအထိ ရှိလာခဲ့သည်။ ကုန်သွယ်မှုပမာဏ မြင့်တက်လာခြင်းသည် နိုင်ငံတကာဈေးကွက်များသို့ ဝင်ရောက်နိုင်မှု ပိုမိုကောင်းမွန်လာခြင်းနှင့် ဒေသတွင်း၊ နှစ်နိုင်ငံအကြား ကုန်သွယ်ရေး သဘောတူညီချက်များတွင် ကမ္ဘောဒီးယားနိုင်ငံ ပါဝင်ဆောင်ရွက်နေခြင်းတို့ကြောင့် ပို့ကုန် သွင်းကုန်လုပ်ငန်းများ ဆက်လက်တိုးချဲ့လာမှုကို ဖော်ပြနေကြောင်း အစီရင်ခံစာတွင် ဖော်ပြထားသည်။ ကုန်သွယ်ရေးဝန်ကြီးဌာနမှပြောရေးဆိုခွင့်ရှိသူ Penn Sovichea က အစိုးရအနေဖြင့် ပို့ကုန်ဈေးကွက်များကို ပိုမိုကျယ်ပြန့်စွာချဲ့ထွင်ရန်နှင့် ကုန်သွယ်မှုလုပ်ငန်းစဉ်များ ပိုမိုလွယ်ကူ ချောမွေ့စေရန် ဆောင်ရွက်နေကြောင်း ပြောကြားခဲ့သည်။ ကမ္ဘောဒီးယားထုတ်ကုန်များအပေါ် နိုင်ငံတကာဈေးကွက်၏ ယုံကြည်မှု၊ ကုန်သွယ်ရေးမိတ်ဖက်နိုင်ငံများနှင့် ပူးပေါင်းဆောင်ရွက်မှုများ၏ အကျိုးရလဒ်ကို ပို့ကုန်တိုးတက်မှုက ထင်ဟပ်နေကြောင်းလည်း ထပ်လောင်းပြောကြားခဲ့သည်။ ကမ္ဘောဒီးယား၏ အဓိကပို့ကုန်များတွင် အထည်ချုပ်ပစ္စည်းများ၊ ဖိနပ်များ၊ ခရီးသွားသုံး ပစ္စည်းများ၊ စက်ယန္တရားနှင့် လျှပ်စစ်ပစ္စည်းများ၊ စိုက်ပျိုးရေးထွက်ကုန်များ၊ စက်ဘီးများ၊ တာယာများ၊ ပရိဘောဂများနှင့် အခြားစက်မှုထုတ်ကုန်များ ပါဝင်သည်။ သွင်းကုန်များတွင်မူ ကုန်ထုတ်လုပ်မှုလုပ်ငန်းသုံး ကုန်ကြမ်းများ၊ ရေနံထွက်ပစ္စည်းများ၊ မော်တော်ယာဉ်များ၊ လျှပ်စစ်ပစ္စည်းများနှင့် လူသုံးကုန်၊ ထုတ်လုပ်မှုလုပ်ငန်းသုံးပစ္စည်းများ ပါဝင်ကြောင်း အစီရင်ခံစာ တွင်ဖော်ပြထားသည်။ အဓိကကုန်သွယ်ဖက်နိုင်ငံများမှာ တရုတ်၊ အမေရိကန်နှင့် ဗီယက်နမ်နိုင်ငံ တို့ဖြစ်ပြီး အဆိုပါနိုင်ငံများနှင့် ကုန်သွယ်မှုပမာဏမှာ ဒေါ်လာ ၁၇.၅၈ ဘီလီယံ၊ ၁၂.၄၆ ဘီလီယံ နှင့် ၆.၅၈ ဘီလီယံ အသီးသီးရှိခဲ့ကြောင်း သိရှိရပါသည်။

Source: Khmer Times                                                            

DOCA(ရန်ကုန်)

           ကမ္ဘောဒီးယားခရီးသွားလုပ်ငန်းဝန်ကြီး Huot Hak နှင့် ဆော်ဒီအာရေဗျနိုင်ငံ သံအမတ်ကြီး Thamer Mohammed A. Algosaibi  တို့ ၂၀၂၆ ခုနှစ်၊ အောက်တိုဘာ ၇ ရက်က တွေ့ဆုံခဲ့ပြီး နှစ်နိုင်ငံအကြား ခရီးသွားလုပ်ငန်း ပူးပေါင်းဆောင်ရွက်ရေး နားလည်မှုစာချွန်လွှာ (MoU) လက်မှတ်ရေးထိုးနိုင်ရေး အရှိန်မြှင့်ဆောင်ရွက်ရန် သဘောတူခဲ့ကြသည်။ အဆိုပါ MoU လက်မှတ်ရေးထိုးပြီးပါက နှစ်နိုင်ငံခရီးသွားလုပ်ငန်းရှင်များ နှင့် သတင်းမီဒီယာများ အပြန်အလှန် လေ့လာရေးခရီးစဉ်များ ပြုလုပ်နိုင်မည်ဖြစ်သည့်အပြင် ခရီးသွားလုပ်ငန်းရင်းနှီးမြှုပ်နှံမှု၊ ပူးတွဲ ဈေးကွက်မြှင့်တင်ရေးနှင့် ခရီးသွားလုပ်ငန်းဖွံ့ဖြိုးရေးတို့ကို ပူးပေါင်းဆောင်ရွက်နိုင်မည်ဖြစ်သည်။ ထို့အပြင် ဆော်ဒီအာရေဗျအမျိုးသားလေကြောင်းလိုင်း Saudia နှင့် ပူးပေါင်းကာ ကမ္ဘောဒီးယားနိုင်ငံနှင့် ဆော်ဒီအာရေဗျနိုင်ငံ မြို့တော် Riyadh အကြား တိုက်ရိုက်လေကြောင်း ခရီးစဉ် ပြေးဆွဲနိုင်ရေးကိုလည်း လေ့လာဆောင်ရွက်ရန်နှစ်ဖက်သဘောတူခဲ့ကြသည်။ အထူးသဖြင့် Techo အပြည်ပြည်ဆိုင်ရာလေဆိပ်မှတစ်ဆင့် လေကြောင်းဆက်သွယ်မှု တိုးမြှင့်ခြင်းသည် ခရီးသွားလုပ်ငန်း၊ ရင်းနှီးမြှုပ်နှံမှုနှင့် စီးပွားရေးဖလှယ်မှုများကို ပိုမိုလွယ်ကူစေမည် ဖြစ်သည်။ ဝန်ကြီး Huot Hak က ကမ္ဘောဒီးယားနိုင်ငံ၏ ခရီးသွားမြှင့်တင်ရေးအစီအစဉ်များမှ တစ်ဆင့် အရှေ့အလယ်ပိုင်းဒေသမှ နိုင်ငံခြားခရီးသွားများ ပိုမိုလာရောက်ရန် ဆွဲဆောင်နေကြောင်း ပြောကြားခဲ့သည်။ ကမ္ဘောဒီးယားနိုင်ငံနှင့် ဆော်ဒီအာရေဗျနိုင်ငံတို့သည် သံတမန် ဆက်ဆံရေး စတင်ခဲ့သည့် ၁၆ နှစ်တာကာလအတွင်း ကဏ္ဍအသီးသီး၌ ပူးပေါင်းဆောင်ရွက်မှုများ တိုးမြှင့်ခဲ့ကြပြီး ၂၀၂၅ ခုနှစ်အတွင်း အရှေ့အလယ်ပိုင်းဒေသမှ ကမ္ဘောဒီးယားသို့ လာရောက်သည့် ခရီးသွား ၆၀၀ ကျော်အနက် ဆော်ဒီအာရေဗျနိုင်ငံသား ၈၀ ဦး ပါဝင်ခဲ့ကြောင်း ခရီးသွား လုပ်ငန်းဝန်ကြီးဌာန၏ စာရင်းများအရ သိရှိရပါသည်။

Source: Khmer Times                                                           

DOCA(ရန်ကုန်)

         ဗီယက်နမ်နိုင်ငံတွင် ၂၀၂၆ ခုနှစ် ပထမ ၉ လအတွင်း မှတ်ပုံတင်ထားသည့် နိုင်ငံခြားတိုက် ရိုက်ရင်းနှီးမြှုပ်နှံမှု (FDI) စုစုပေါင်းတန်ဖိုးသည် အမေရိကန်ဒေါ်လာ ၅၀ ဒသမ ၃၆ ဘီလီယံအထိ ရောက်ရှိခဲ့ပြီး ယခင်နှစ် အလားတူကာလထက် ၇၆ ဒသမ ၄ ရာခိုင်နှုန်း မြင့်တက်ခဲ့သည်။ ထုတ်ပေးပြီး အကောင်အထည်ဖော်ခဲ့သည့် FDI ပမာဏမှာလည်း ၅ နှစ်အတွင်း ပထမ ၉ လအတွက် အမြင့်ဆုံးအဆင့်သို့ ရောက်ရှိခဲ့ကြောင်း သိရသည်။

         ဗီယက်နမ်ဘဏ္ဍာရေးဝန်ကြီးဌာနလက်အောက်ရှိ စာရင်းအင်းရုံး၏ အချက်အလက်များအရ စက်တင်ဘာ ၃၀ ရက်အထိ မှတ်ပုံတင်ထားသည့် FDI စုစုပေါင်းသည် ဒေါ်လာ ၅၀ ဒသမ ၃၆ ဘီလီယံရှိခဲ့သည်။ အဆိုပါပမာဏတွင် စီမံကိန်းအသစ်များအတွက် ရင်းနှီးမြှုပ်နှံမှု၊ ရှိပြီးသားစီမံကိန်းများတွင် ထပ်မံရင်းနှီးမြှုပ်နှံမှုနှင့် နိုင်ငံခြားရင်းနှီးမြှုပ်နှံသူများ၏ အရင်းအနှီးထည့်ဝင်ခြင်းနှင့် ရှယ်ယာဝယ်ယူခြင်းများ ပါဝင်ကြောင်း သိရသည်။

       ပထမ ၉ လအတွင်း စီမံကိန်းအသစ် ၃,၁၀၈ ခုကို ခွင့်ပြုပေးခဲ့ပြီး စုစုပေါင်းမှတ်ပုံတင်ထားသည့် ရင်းနှီးမြှုပ်နှံမှုတန်ဖိုးမှာ ဒေါ်လာ ၂၉ ဒသမ ၂၄ ဘီလီယံရှိခဲ့သည်။ စီမံကိန်းအရေအတွက်မှာ ယခင်နှစ်အလားတူကာလထက် ၆ ဒသမ ၂ ရာခိုင်နှုန်း မြင့်တက်ခဲ့ပြီး ရင်းနှီးမြှုပ်နှံမှုတန်ဖိုးမှာ ၂ ဒသမ ၄ ဆ မြင့်တက်ခဲ့ကြောင်း သိရသည်။

      ထုတ်လုပ်ရေးနှင့် ပြုပြင်ထုတ်လုပ်ရေးကဏ္ဍသည် နိုင်ငံခြားရင်းနှီးမြှုပ်နှံမှု အများဆုံးရရှိသည့် ကဏ္ဍအဖြစ် ဆက်လက်ရပ်တည်နေပြီး ဒေါ်လာ ၁၃ ဒသမ ၃၈ ဘီလီယံ ရရှိခဲ့ကာ စုစုပေါင်းအသစ် မှတ်ပုံတင် FDI ၏ ၄၅ ဒသမ ၈ ရာခိုင်နှုန်းရှိသည်။ သယ်ယူပို့ဆောင်ရေးနှင့် သိုလှောင်ရေးကဏ္ဍမှာ ဒေါ်လာ ၅ ဒသမ ၁၄ ဘီလီယံ၊ ၁၇ ဒသမ ၆ ရာခိုင်နှုန်း ရရှိခဲ့ပြီး အခြားကဏ္ဍများမှာ စုစုပေါင်း ဒေါ်လာ ၁၀ ဒသမ ၇၁ ဘီလီယံ ရရှိခဲ့သည်။

         ပထမ ၉ လအတွင်း ဗီယက်နမ်နိုင်ငံတွင် ရင်းနှီးမြှုပ်နှံမှုစီမံကိန်းအသစ်များ ခွင့်ပြုခဲ့သည့် နိုင်ငံနှင့်ဒေသ ၇၉ ခုအနက် စင်္ကာပူက အများဆုံးရင်းနှီးမြှုပ်နှံခဲ့ပြီး ဒေါ်လာ ၉ ဒသမ ၂၆ ဘီလီယံ ရှိကာ စုစုပေါင်းအသစ်မှတ်ပုံတင်ရင်းနှီးမြှုပ်နှံမှု၏ ၃၁ ဒသမ ၇ ရာခိုင်နှုန်းရှိသည်။ တောင်ကိုရီးယားက ဒေါ်လာ ၅ ဒသမ ၇ ဘီလီယံဖြင့် ဒုတိယ၊ လူဇင်ဘတ်က ဒေါ်လာ ၄ ဒသမ ၉၉ ဘီလီယံဖြင့် တတိယနေရာတွင်ရှိသည်။ ထို့နောက် တရုတ်နိုင်ငံ ဟောင်ကောင်အထူးအုပ်ချုပ်ခွင့်ရဒေသက ဒေါ်လာ ၃ ဒသမ ၀၁ ဘီလီယံ၊ တရုတ်နိုင်ငံက ဒေါ်လာ ၂ ဒသမ ၂၇ ဘီလီယံ၊ ဂျပန်က ဒေါ်လာ ၁ ဒသမ ၅၆ ဘီလီယံနှင့် နယ်သာလန်က ဒေါ်လာ ၄၃၈ ဒသမ ၅ သန်း ရင်းနှီးမြှုပ်နှံခဲ့ကြောင်း သိရသည်။

        ယခင်က ခွင့်ပြုထားပြီးသား စီမံကိန်း ၉၄၈ ခုသည် ရင်းနှီးမြှုပ်နှံမှုအရင်းအနှီး ထပ်မံတိုး မြှင့်ခဲ့ပြီး စုစုပေါင်း ဒေါ်လာ ၁၄ ဒသမ ၁၅ ဘီလီယံ ထပ်မံရင်းနှီးမြှုပ်နှံခဲ့သည်။ ယင်းပမာဏသည် ယခင်နှစ်အလားတူကာလထက် ၂၅ ဒသမ ၁ ရာခိုင်နှုန်း မြင့်တက်ခဲ့ကြောင်း သိရသည်။

       နိုင်ငံခြားရင်းနှီးမြှုပ်နှံမှုအေဂျင်စီ၏ ခန့်မှန်းချက်အရ ဗီယက်နမ်နိုင်ငံတွင် ပထမ ၉ လအတွင်း အကောင်အထည်ဖော်ပြီး ရင်းနှီးမြှုပ်နှံခဲ့သည့် FDI ပမာဏမှာ ဒေါ်လာ ၂၁ ဒသမ ၀၇ ဘီလီယံရှိပြီး ယခင်နှစ်အလားတူကာလထက် ၁၂ ဒသမ ၁ ရာခိုင်နှုန်း မြင့်တက်ခဲ့ကြောင်း သိရသည်။

        ယင်းပမာဏသည် လွန်ခဲ့သည့် ၅ နှစ်အတွင်း မည်သည့်နှစ်၏ ပထမ ၉ လနှင့်မဆို နှိုင်းယှဉ် ပါက FDI အကောင်အထည်ဖော်ရင်းနှီးမြှုပ်နှံမှု အမြင့်ဆုံးပမာဏလည်းဖြစ်သည်။ အကောင်အထည်ဖော်ပြီး ရင်းနှီးမြှုပ်နှံမှုများအနက် ထုတ်လုပ်ရေးနှင့် ပြုပြင်ထုတ်လုပ်ရေးကဏ္ဍက အများဆုံးဖြစ်ပြီး ဒေါ်လာ ၁၇ ဒသမ ၄၀ ဘီလီယံ၊ စုစုပေါင်း၏ ၈၂ ဒသမ ၆ ရာခိုင်နှုန်းရှိသည်။ အိမ်ခြံမြေကဏ္ဍတွင် ဒေါ်လာ ၁ ဒသမ ၅၉ ဘီလီယံ၊ ၇ ဒသမ ၅ ရာခိုင်နှုန်း ရင်းနှီးမြှုပ်နှံခဲ့ပြီး လျှပ်စစ်၊ ဓာတ်ငွေ့၊ ရေပူ၊ ရေနွေးငွေ့နှင့် လေအေးပေးစက် ထုတ်လုပ်ဖြန့်ဖြူးရေးကဏ္ဍတွင် ဒေါ်လာ ၇၂၃ ဒသမ ၄ သန်း၊ ၃ ဒသမ ၄ ရာခိုင်နှုန်း ရင်းနှီးမြှုပ်နှံခဲ့ကြောင်း သိရှိရပါသည်။

Source : Vietnamnet global                                                               

DOCA (ရန်ကုန်)