စုစုပေါင်းအမေရိကန်ဒေါ်လာခုနှစ်ဘီလီယံတန်ဖိုးရှိသောရင်းနှီးမြှုပ်နှံမှုများရရှိထားသည့် ဗီယက်နမ်၏ Quang Ninh ပြည်နယ်
ဗီယက်နမ်နိုင်ငံ Quang Ninh ပြည်နယ်သည် ဩဂုတ်လကုန်အထိ နိုင်ငံပိုင်မဟုတ်သော အရင်းအမြစ်များမှ ပြည်တွင်းရင်းနှီးမြှုပ်နှံမှု စုစုပေါင်း ဗီယက်နမ်ဒေါင် ၁၈၂ ဒသမ ၇ ထရီလီယံ (အမေရိကန်ဒေါ်လာ ခုနစ်ဘီလီယံ) ရရှိထားကြောင်း သိရပါသည်။ ယင်းအချက်သည် စက်တင်ဘာလ ၁ ရက်တွင် ပြည်ထောင်စုဗဟိုအစိုးရအုပ်ချုပ်သည့်မြို့အဖြစ် ပြောင်းလဲမည့် Quang Ninh ၏ ရင်းနှီးမြှုပ်နှံမှုဆိုင်ရာ ဆွဲဆောင်မှုအားကောင်းနေမှုကို ထင်ဟပ်စေကြောင်း သိရပါသည်။ Quang Ninh ပြည်နယ် ဘဏ္ဍာရေးဌာန ညွှန်ကြားရေးမှူး Pham Hong Bien ၏ ပြောကြားချက်အရ ဩဂုတ်လတစ်လတည်းတွင် နိုင်ငံပိုင်မဟုတ်သော အရင်းအမြစ်များမှ ပြည်တွင်းရင်းနှီးမြှုပ်နှံမှုမှာ ဗီယက်နမ်ဒေါင် ၃၉.၀၈၂ ထရီလီယံ ရရှိခဲ့ကြောင်း သိရပါသည်။ ထိုကာလအတွင်း စီမံကိန်းအသစ် ၁၂ ခုအတွက် ရင်းနှီးမြှုပ်နှံမှုလက်မှတ်များ ထုတ်ပေးခဲ့ပြီး လက်ရှိစီမံကိန်းတစ်ခုအတွက် ရင်းနှီးမြှုပ်နှံမှုမတည်ငွေ တိုးမြှင့်ခွင့်ပြုခဲ့ကြောင်း သိရပါသည်။ ၂၀၂၆ ခုနှစ် ပထမရှစ်လအတွင်း Quang Ninh ပြည်နယ်သည် စီမံကိန်းအသစ် ၆၇ ခုကို ရင်းနှီးမြှုပ်နှံခွင့်ပြုခဲ့ပြီး လက်ရှိစီမံကိန်းကိုးခုအတွက် ရင်းနှီးမြှုပ်နှံမှုမတည်ငွေတိုးမြှင့်ရန်လည်း ခွင့်ပြုခဲ့ကြောင်း သိရပါသည်။ ထို့ပြင် ပြည်နယ်၏ စီးပွားရေးနှင့် လူမှုရေးကဏ္ဍများတွင်လည်း ကောင်းမွန်သောရလဒ်များရရှိခဲ့ပြီး ယခုနှစ်အတွက်သတ်မှတ်ထားသည့် အဓိကရည်မှန်းချက် ၁၉ ခုအနက် ၁၅ ခုကို ပြည့်မီအောင်ဆောင်ရွက်နိုင်ခဲ့ကြောင်း သိရပါသည်။ ပထမရှစ်လအတွင်း နိုင်ငံတော်ဘတ်ဂျက်ဝင်ငွေမှာ ဗီယက်နမ်ဒေါင် ၇၃ ထရီလီယံ ရရှိခဲ့ပြီး ကိုးလတာအတွက် သတ်မှတ်ထားသည့်ရည်မှန်းချက်ထက် ဗီယက်နမ်ဒေါင် ၁.၂၅ ထရီလီယံ ကျော်လွန်ခဲ့ကြောင်း သိရပါသည်။ မြေယာအသုံးပြုခမှရရှိသည့်ဝင်ငွေတစ်ခုတည်းဖြင့်ပင် တစ်နှစ်တာရည်မှန်းချက်ကို ပြည့်မီပြီးဖြစ်ကြောင်း သိရပါသည်။ စက်မှုထုတ်လုပ်မှုကဏ္ဍမှာလည်း သိသိသာသာတိုးတက်ခဲ့ပြီး စက်မှုထုတ်လုပ်မှုညွှန်းကိန်း (IIP) သည် ယမန်နှစ် အလားတူကာလထက် ၁၆.၂၄ ရာခိုင်နှုန်း မြင့်တက်ခဲ့ကြောင်း သိရပါသည်။ ထုတ်လုပ်ရေးနှင့် ကုန်ထုတ်လုပ်မှုကဏ္ဍသည် အဓိကမောင်းနှင် အားဖြစ်ပြီး ၃၁.၇၇ ရာခိုင်နှုန်း တိုးတက်ခဲ့ကြောင်း သိရပါသည်။ ဝန်ဆောင်မှုနှင့် ခရီးသွား လုပ်ငန်းကဏ္ဍတွင်လည်း တိုးတက်မှုမြင့်မားမှုကို ဆက်လက်ထိန်းသိမ်းနိုင်ခဲ့ပြီး ခရီးသွား ဧည့်သည် ၁၇ သန်းကျော်ကိုဆွဲဆောင်နိုင်ခဲ့ကာ ဝင်ငွေ ဗီယက်နမ်ဒေါင် ၅၁ ထရီလီယံ ရရှိခဲ့ ကြောင်း သိရပါသည်။ Quang Ninh ပြည်နယ် ပြည်သူ့ကော်မတီ ဥက္ကဋ္ဌ Bui Van Khang က စက်တင်ဘာလသည် တတိယသုံးလပတ်၏ နောက်ဆုံးလဖြစ်သည့်အပြင် ပြည်ထောင်စုဗဟို အစိုးရအုပ်ချုပ်သည့်မြို့ပုံစံစနစ်သစ်ဖြင့် စတင်လည်ပတ်မည့်ကာလဖြစ်သောကြောင့် အထူး အရေးကြီးသည့်လဖြစ်ကြောင်း ပြောကြားခဲ့ပါသည်။ အုပ်ချုပ်ရေးအဖွဲ့အစည်းများနှင့် ဒေသ ဆိုင်ရာအာဏာပိုင်များအနေဖြင့် အုပ်ချုပ်ရေးစနစ်သစ်ကို ချောမွေ့စွာနှင့် အဆက်မပြတ် လည်ပတ်နိုင်စေရန်၊ ပြည်သူများနှင့် စီးပွားရေးလုပ်ငန်းများအတွက် ဝန်ဆောင်မှုပေးမှုများ မပြတ် တောက်စေရေးဆောင်ရွက်ကြရန် ၎င်းကညွှန်ကြားခဲ့ပါသည်။ ထို့ပြင် အဓိကစီမံကိန်းများအတွက် မြေနေရာရှင်းလင်းရေးလုပ်ငန်းများကို အရှိန်မြှင့်ဆောင်ရွက်ပြီး စက်တင်ဘာ ၃၀ ရက်အမီ ပြီးစီးအောင်ဆောင်ရွက်ရန် ဒေသဆိုင်ရာအာဏာပိုင်များအား ညွှန်ကြားခဲ့ပါသည်။ ယင်းလုပ်ငန်း များတွင် ဟနွိုင်း- Quang Ninh အမြန်ရထားလမ်း၊ စက်မှုဇုန်များနှင့် စက်မှုအစုအဖွဲ့များအပြင် ဆက်သွယ်ရေးလမ်းပန်းဆက်သွယ်မှု အခြေခံအဆောက်အအုံများကို ဦးစားပေးဆောင်ရွက်ရန် သတ်မှတ်ထားကြောင်း သိရပါသည်။ Quang Ninh ပြည်နယ်အနေဖြင့် ၂၀၂၆ ခုနှစ်အတွက် စီးပွားရေးနှင့် လူမှုရေးရည်မှန်းချက်များကို ဖြစ်နိုင်သမျှ အမြင့်ဆုံးအဆင့်အထိ အောင်မြင်အောင် ဆောင်ရွက်ပြီး အုပ်ချုပ်ရေးစနစ်သစ်အောက်တွင် လျင်မြန်ပြီး ရေရှည်တည်တံ့သော ဖွံ့ဖြိုး တိုးတက်မှုအတွက် အရှိန်အဟုန်သစ်များ ဖော်ဆောင်သွားရန် ရည်မှန်းထားကြောင်း သိရပါသည်။
DOCA (ရန်ကုန်)
