ကုန်သွယ်ရေးကဏ္ဍ မြှင့်တင်ရန် အင်ဒိုနီးရှားနှင့် ဥဇဘက်ကစ္စတန်တို့ FTA ဆွေးနွေးပွဲများ စတင်ကျင်းပ
အင်ဒိုနီးရှား ကုန်သွယ်ရေးဝန်ကြီး Budi Santoso နှင့် ဥဇဘက်ကစ္စတန် ရင်းနှီးမြှုပ်နှံမှု၊ စက်မှုနှင့် ကုန်သွယ်ရေးဝန်ကြီး Laziz Kudratov တို့သည် မတ်လ ၂ ရက်နေ့တွင် နှစ်နိုင်ငံအကြား လွတ်လပ်သောကုန်သွယ်မှုသဘောတူညီချက် (FTA) အတွက် ဆွေးနွေးမှုများကို စတင်ခဲ့သည်။ ရေးသားထုတ်ပြန်ချက်တစ်ခုအရ အဆိုပါဆွေးနွေးမှုအစပြုခြင်းကို ဗီဒီယိုကွန်ဖရင့်မှတစ်ဆင့် နှစ်ဖက်ကိုယ်စားလှယ်များက ပူးတွဲကြေညာချက် လက်မှတ်ရေးထိုးခြင်းဖြင့် အမှတ်အသားပြုခဲ့သည်။ ထို့အပြင် နှစ်ဖက်စလုံးက ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေးဆိုင်ရာ သဘောတူညီချက်ကိုလည်း လက်မှတ်ရေးထိုးခဲ့ကြသည်။ အဆိုပါ လုပ်ဆောင်ချက်သည် ပြောင်းလဲနေသော ကမ္ဘာ့စီးပွားရေးအခြေအနေများအကြား ပိုမိုနီးကပ်၊ ပွင့်လင်းပြီး ရေရှည်တည်တံ့သော စီးပွားရေးမိတ်ဖက်ဆက်ဆံရေးကို တည်ဆောက်လိုသည့် နှစ်နိုင်ငံလုံး၏ ရည်မှန်းချက်ကို ထင်ဟပ်စေသည်။ အင်ဒိုနီးရှား-ဥဇဘက်ကစ္စတန် FTA သည် နှစ်နိုင်ငံစလုံး၏ ထိပ်တန်း ထုတ်ကုန်များအတွက် ဈေးကွက်ချဲ့ထွင်နိုင်ရေး၊ တန်ဖိုးကွင်းဆက်များ ခိုင်မာစေရေးနှင့် အဏု၊ အသေးစားနှင့် အလတ်စား စီးပွားရေးလုပ်ငန်းများ (MSMEs) အပါအဝင် လုပ်ငန်းရှင်များအတွက် လက်တွေ့ကျသော အခွင့်အလမ်းများ ဖန်တီးပေးနိုင်လိမ့်မည်ဟု ဝန်ကြီးက မျှော်လင့်ကြောင်း ပြောကြားခဲ့သည်။ ဥဇဘက်ကစ္စတန်သည် အင်ဒိုနီးရှား၏ ဒေသတွင်းနှင့် ကမ္ဘာလုံးဆိုင်ရာ ကုန်သွယ်မှုဆက်သွယ်ချိတ်ဆက်မှုကို မြှင့်တင်ရန်အတွက် အလယ်အာရှရှိ မဟာဗျူဟာမြောက် မိတ်ဖက်နိုင်ငံတစ်ခုဖြစ်သည်။ ၎င်း၏ မဟာဗျူဟာမြောက် ပထဝီဝင်အနေအထားသည် အင်ဒိုနီးရှားထုတ်ကုန်များအတွက် ပိုမိုကျယ်ပြန့်သော ဒေသတွင်းဈေးကွက်သို့ ဝင်ရောက်နိုင်သည့် တံခါးပေါက်တစ်ခု ဖြစ်လာနိုင်သည်။ အင်ဒိုနီးရှားညှိနှိုင်းရေးအဖွဲ့အနေဖြင့် နိုင်ငံ၏အကျိုးစီးပွားကိုကာကွယ်ရင်း သတ်မှတ်အချိန်အတွင်း ဆွေးနွေးမှုများကို အောင်မြင်စွာ အဆုံးသတ်နိုင်ရန် အကောင်းဆုံးနှင့် အပြုသဘောဆောင်၍ လုပ်ဆောင်သွားမည်ဖြစ်ကြောင်း Santoso က အလေးပေးပြောကြားခဲ့သည်။ ထို့အပြင် ခိုင်မာသော မိတ်ဖက်ဆက်ဆံရေး အခြေခံအုတ်မြစ်ဖြင့် နှစ်နိုင်ငံပူးပေါင်းဆောင်ရွက်မှုကို မြှင့်တင်ပေးသည့်အတွက် Kudratov အား ၎င်းက ကျေးဇူးတင်စကား ပြောကြားခဲ့သည်။ တစ်ဖက်တွင်လည်း Kudratov က အင်ဒိုနီးရှားနှင့် နှစ်နိုင်ငံပူးပေါင်း ဆောင်ရွက်မှုကို ပိုမိုနက်ရှိုင်းစေရန်အတွက် ဥဇဘက်ကစ္စတန်၏ ခိုင်မာသောဆုံးဖြတ်ချက်ကို အတည်ပြုပြောကြားခဲ့သည်။ FTA စတင်သည့်အပြင် ဝန်ကြီးနှစ်ဦးသည် ပူးတွဲလုပ်ငန်းအဖွဲ့ တစ်ခုကို တည်ထောင်ခြင်းအပါအဝင် ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်ရေးဆိုင်ရာ သဘောတူညီချက်ကိုလည်း လက်မှတ်ရေးထိုးခဲ့ကြသည်။ အဆိုပါ လုပ်ငန်းအဖွဲ့သည် အချက်အလက်များ၊ ဗဟုသုတများနှင့် နည်းပညာပိုင်းဆိုင်ရာ ကျွမ်းကျင်မှုများကို အပြန်အလှန် ဖလှယ်ခြင်း၊ အကျိုးအမြတ်ရှိမည့် စီမံကိန်းများကို ဖော်ထုတ်အကောင်အထည်ဖော်ခြင်း၊ ပူးတွဲလေ့ကျင့်ရေးအစီအစဉ်များ၊ အစည်းအဝေးများနှင့် ဆွေးနွေးပွဲများကို ကျင်းပသွားမည်ဖြစ်သည်။ ၂၀၂၅ ခုနှစ်တွင် အင်ဒိုနီးရှားနှင့် ဥဇဘက်ကစ္စတန်ကြား စုစုပေါင်းကုန် သွယ်မှုသည် အမေရိကန် ဒေါ်လာ ၁၈၁.၄ သန်းအထိ ရှိခဲ့ပြီး၊ ယင်းမှာ လွန်ခဲ့သည့် ငါးနှစ်အတွင်း (၂၀၂၁-၂၀၂၅) ၄၈.၉ ရာခိုင်နှုန်း တိုးတက်လာခြင်းဖြစ်သည်။ ဤတိုးတက်မှုသည် နှစ်နိုင်ငံရှိ စီးပွားရေးအသိုင်းအဝိုင်းများအကြား ယုံကြည်မှုမြင့်တက်လာခြင်းကို ပြသနေပြီး လက်ရှိဖြစ်ပေါ်နေသော အလားအလာများကို အမြင့်ဆုံးအသုံးချနိုင်ရန် ပိုမိုဖွဲ့စည်းမှုရှိသော မူဘောင်တစ်ခု လိုအပ်နေကြောင်း မီးမောင်းထိုးပြနေကြောင်း သိရှိရပါသည်။
Source : Antara
DOCA(ရန်ကုန်)
