ပြည်ပကုန်သွယ်မှုသတင်းများ

      ရုရှား၏ (၄)ပတ်ကြာ ပင်လယ်ရေကြောင်းဆီတင်ပို့မှုသည် ဇူလုင်လ ၁၄ရက်နေ့အထိ တစ်ရက်လျှင် စည်ပေါင်း ၃.၁၁သန်းသို့ ပျမ်းမျှကျဆင်းသွားပြီး ဧပြီလတွင် မကြာသေးမီက စည်ပေါင်း ၆၀၀၀၀၀နီးပါး အမြင့်ဆုံး သို့မဟုတ် ၁၇ရာခိုင်နှုန်းကျဆင်းခဲ့ကြောင်း Bloomberg သတင်းဌာနက ဖော်ပြခဲ့သည်။ နိုင်ငံတွင်း ရေနံစိမ်းတင်ပို့မှုသည် ဇန်နဝါရီလနောက်ပိုင်း၌ အနိမ့်ဆုံးသို့ကျဆင်းသွားခဲ့ပြီး ပြည်တွင်းသန့်စင်မှုနှုန်းမှာ (၆)လအတွင်း ပြန်လည်ကောင်းမွန်လာသော်လည်း အနည်းဆုံး ဩဂုတ်လကုန်အထိ ယင်းပုံစံအတိုင်း ဆက်လက်ရှိနေမည်ဖြစ်သည်။ တရုတ်နှင့် အိန္ဒိယတို့သည် ရုရှားပင်လယ်တွင်း ကုန်စိမ်းရောင်းချမှု၏ ၈၀ရာခိုင်နှုန်းကျော်ကိုဝယ်ယူနေသောကြောင့် ပို့ကုန်ဖြတ်တောက်မှုကို အပြင်းအထန်ခံစားရဖွယ်ရှိသည်။ သို့သော်လည်း ‌ဈေးကွက်မှ ထုတ်ယူလိုက်သောစည်များသည် ၎င်းတို့စုစု‌ပေါင်းဝယ်ယူမှု၏ အနည်းငယ်မျှကိုသာကိုယ်စားပြုပြီး တရုတ်နှင့်အိန္ဒိယမှ ဝယ်ယူသူများသည် ၎င်းတို့ကို အခြား‌ဈေးကွက်များမှ ရေနံစိမ်းဖြင့် အလွယ်တကူအစားထိုးနိုင်သောကြောင့်ဖြစ်သည်။

       Rystad Energy မှ ရုရှား၏ပင်လယ်ရေကြောင်း ရေနံစိမ်းတင်ပို့ရောင်းဝယ်မှုသည် ဇူလိုင်လနှင့် ဩဂုတ်လတွင် တစ်ရက်လျှင် စည်ပေါင်း ၂.၇သန်းဆက်လက်တည်ရှိနေမည်ဟု ခန့်မှန်းထားသော်လည်း ရုရှားသန့်စင်စက်ရုံများသည် ၎င်းတို့၏ရိုးရာဆောင်းဦးရာသီ ပြုပြင်ထိန်းသိမ်းမှုစတင်မည့် စက်တင်ဘာလတွင် တစ်ရက်လျှင် စည်ပေါင်း ၂.၉သန်းသို့ ပြန်လည်ရောက်ရှိမည်ဟုခန့်မှန်းထားကြသည်။ ၎င်းသည် ဧပြီလနှင့်မေလတွင် မှတ်တမ်းတင်ထားသော တစ်ရက်လျှင် စည်ပေါင်း ၃.၆သန်းမှ ၃.၇ခန့်တင်ပို့နိုင်မှုထက် သိသိသာသာကျဆင်းသွားခြင်းဖြစ်ပြီး ယူကရိန်း၏ ‌‌‌မောင်းသူမဲ့လေယာဉ်ဖြင့် တိုက်ခိုက်မှုများကလည်း ရုရှားပြည်တွင်းရေနံသန့်စင်မှုကို အနှောင့်အယှက်ဖြစ်စေခဲ့သည်။

      ရုရှား၏ ပင်လယ်တွင်းရေနံစိမ်းထောက်ပံ့မှုသည် တစ်နှစ်လျှင် စည်ပေါင်း ၃သန်းနီးပါးရှိလာမည်ဟု ထောက်လှမ်းရေးကုမ္ပဏီ Kpler မှ အကြမ်းဖျင်းလေ့လာသုံးသပ်သူ Viktar Katona က Bloomberg သတင်းဌာနသို့ပြောကြားခဲ့သည်။ ထိုအတောအတွင်း ယူကရိန်းသည် ရုရှားပိုင်ရေနံနှင့်သဘာဝဓာတ်ငွေ့ကုမ္ပဏီကြီး Lukoil မှ စလိုဗားကီးယားနှင့် ဟန်ဂေရီသို့ ရေနံထောက်ပံ့မှုကိုဖြတ်တောက်ခဲ့သည်။ Lukoil သည် ဆိုဗီယက်တို့တည်ဆောက်ထားသော Druzhba ပိုက်လိုင်းမှတစ်ဆင့် ဥရောပသို့ ရုရှားရေနံများကိုထောက်ပံ့နေပြီး နောက်ဆုံးလုပ်ဆောင်နေသော ရုရှားရေနံထောက်ပံ့ရေးလမ်းကြောင်းအဖြစ်တည်ရှိနေခဲ့သည်။ သို့သော်လည်း ဥရောပနိုင်ငံများသည် အခြားသောရုရှားကုမ္ပဏီများထံမှ ရေနံကိုလက်ခံရရှိနေကြဆဲဖြစ်သည်။

Source: oilprice

DOCA(ရန်ကုန်)

      ဗီယက်နမ်လုပ်ငန်း ၈၀ကျော်သည် (၈)ကြိမ်မြောက် တရုတ်-တောင်အာရှ နိုင်ငံတကာကုန်စည်ပြပွဲနှင့် (၂၈)ကြိမ်မြောက် ကူမင်းပို့ကုန်သွင်းကုန်ပြပွဲကို တက်ရောက်ခဲ့ကြောင်းသိရပါ သည်။ ဇူလိုင်လ ၂၃ရက်နေ့မှ ၂၈ရက်နေ့အထိ ကျင်းပမည့်ပွဲတော်တွင် ကမ္ဘာတစ်ဝန်းရှိ နိုင်ငံပေါင်း ၈၂နိုင်ငံမှ လုပ်ငန်းပေါင်း ၂၀၀၀ခန့်ပါဝင်ပြသခဲ့ကြောင်းသိရပါသည်။ ဗီယက်နမ်လုပ်ငန်း များသည် နိုင်ငံ၏အဓိကထုတ်ကုန်များဖြစ်သည့် ပင်လယ်စာ၊ ကော်ဖီ၊ သီဟိုဠ်စေ့၊ ခြေအိတ်၊ သစ်ထုတ်ကုန်များနှင့် လက်မှုပစ္စည်းများပြသခဲ့ကြောင်းသိရပါသည်။ ပြပွဲတွင် ဗိသုကာပညာသိပ္ပံနှင့် နည်းပညာ၊ ကုန်ထုတ်လုပ်မှု၊ ရိုးရာဓလေ့၊ အားကစားနှင့် ခရီးသွားကဏ္ဍ၊ ကျန်းမာရေးစောင့်ရှောက်မှု၊ ကော်ဖီလုပ်ငန်း၊ ခေတ်မီစိုက်ပျိုးမွေးမြူရေး၊ အစားအသောက်နှင့် ဘဝနေထိုင်မှုပုံစံတို့ပါဝင်သည့် ခင်းကျင်းပြသမည့် ဧရိယာ ၁၅ခုပါဝင်ကြောင်းသိရပါသည်။ ယခုနှစ်တွင် ကော်ဖီပြခန်းသည် ပထမဆုံးအနေဖြင့်ပါဝင်ခဲ့ပြီး လုပ်ငန်းပေါင်း ၁၆၀ကျော်ပါဝင်ပြသခဲ့ကြောင်းသိရပါသည်။ ယခင်ကျင်းပခဲ့သည့် (၇)ကြိမ်တွင် ပြပွဲသည် ပြည်ပစီးပွားရေးလုပ်ငန်း ၁၀၀၀၀ကျော်ကိုစွဲဆောင်နိုင်ခဲ့ပြီး လာရောက်လည်ပတ်သူ ၄သန်းကျော်ရှိခဲ့ကာ အောင်မြင်သည့် ပြည်ပ အရောင်းအဝယ်ပြုလုပ်မှုမှ အမေရိကန်ဒေါ်လာ ၁၀၀ဘီလီယံကျော်ရှိခဲ့ကြောင်းသိရပါသည်။ ၎င်းပြပွဲသည် ကုန်သွယ်မှုပူး‌ပေါင်းရေး၊ ရင်းနှီးမြှုပ်နှံမှုမြှင့်တင်ရေး၊ ခရီးသွားကဏ္ဍပူးပေါင်းဆောင်ရွက်ရေးနှင့် ရိုးရာယဉ်ကျေးမှုဖလှယ်ရေးတို့တွင် ပူးပေါင်းဖလှယ်စေသည့် ပြပွဲကြီးတစ်ခုဖြစ်ပြီး တရုတ်နှင့်တောင်အာရှနိုင်ငံများအကြားတွင် ကုန်သွယ်ရေးပူးပေါင်းဆောင်ရွက်မှုတိုးချဲ့ရာ၌ အရေးပါသည့်နေရာ၌ ဆက်လက်တည်ရှိနေကြောင်းသိရပါသည်။

Source: Vietnam Plus

DOCA(ရန်ကုန်)

     ဗီယက်နမ်နိုင်ငံသည် ယခုတင်ပို့မှုနှုန်းထားကို ဆက်လက်ထိန်းထားနိုင်ပါက ယခုနှစ်တွင် ဆန်တင်ပို့မှုမှတစ်ဆင့် စံချိန်တင် အမေရိကန်ဒေါ်လာ ၅ဘီလီယံထိရရှိနိုင်ကြောင်း ဗီယက်နမ် နိုင်ငံမှ ဆန်တင်ပို့သည့် GLE ကုမ္ပဏီ၏ CEO ဖြစ်သူ Vu Tuan Anh ၏ အဆိုအရသိရပါသည်။ ဖိလစ်ပိုင်၊ အင်ဒိုနီးရှား၊ တရုတ်နှင့်အာဖရိက အစရှိသည့် အဓိကဆန်တင်သွင်းသူများ၏ ဝယ်လိုအားကြောင့် ဗီယက်နမ်ဆန်တင်ပို့မှုအတွက် ကြီးမားသည့်အခန်းကဏ္ဍရှိနေသေးကြောင်းသိရပါသည်။ ဗီယက်နမ်နိုင်ငံစိုက်ပျိုးမွေးမြူရေးနှင့် ကျေးလက်ဒေသဖွံ့ဖြိုးရေးဝန်ကြီးဌာန (MARD)၏အဆိုအရ အင်ဒိုနီးရှားနိုင်ငံသည် ၂၀၂၄ခုနှစ်၏ ပထမ(၅)လတွင် ဆန်တန်ချိန် ၂.၂သန်းတင်သွင်းခဲ့ပြီး ထပ်ဆောင်းတန်ချိန် ၂.၁သန်းကို ဇွန်လမှ ဒီဇင်ဘာလအတွင်း တင်သွင်းရန် စီစဉ်နေကြောင်းသိရပါသည်။ Anh က အင်ဒိုနီးရှားနိုင်ငံသည် အကယ်၍ အကြောင်းအမျိုးမျိုးကြောင့် သီးနှံအထွက်နှုန်းကျဆင်းခဲ့ပါက ၂၀၂၅ခုနှစ်တွင် ဆန်တန်ချိန် ၄.၃သန်းတင်သွင်းနိုင် သောကြောင့် ဗီယက်နမ်ဆန်တင်ပို့သူများအတွက် အခွင့်အလမ်းရရှိနိုင်ကြောင်းပြောကြားခဲ့ပါ သည်။ ထို့ပြင် ယခုနှစ်၏ ပထမ(၆)လတွင် ဗီယက်နမ်ထံမှ ဆန်တန်ချိန် ၁.၇သန်းကျော်တင်သွင်း ထားသည့် ဖိလစ်ပိုင်နိုင်ငံသို့ ဆန်တင်ပို့ရန် အခွင့်အလမ်းကောင်းများရှိနေသေးပြီး ယခုနှစ်၏ လက်ကျန်လများတွင် ဖိလစ်ပိုင်၏ဝယ်လိုအား ဆက်လက်တည်ငြိမ်နေမည်ဟုခန့်မှန်းရကြောင်း Anh က ပြောကြားခဲ့ပါသည်။ ဗီယက်နမ်နိုင်ငံ၊ အကောက်ခွန်ဦးစီးဌာန၏ အချက်အလက်များအရ ယခုနှစ်စမှ ဇူလိုင်လအထိ ဗီယက်နမ်သည် ဆန်တန်ချိန် ၄.၈သန်းတင်ပို့ခဲ့ပြီး ဝင်ငွေအမေရိကန်ဒေါ်လာ ၃.၁ဘီလီယံနီးပါးရရှိခဲ့ကြောင်းသိရပါသည်။ ဆန်တင်ပို့သည့် ပျမ်းမျှဈေးနှုန်းမှာ လွန်ခဲ့သည့်နှစ်၏ တူညီသည့်ကာလထက် ၁၂ရာခိုင်နှုန်းမြင့်တက်ခဲ့ပြီး တစ်တန်ကို ၆၁၂.၃အမေရိကန်ဒေါ်လာရှိကြောင်းသိရပါသည်။ ဗီယက်နမ်နိုင်ငံ၊ စားသောက်ကုန်အသင်းဥက္ကဋ္ဌ Nguyen Ngoc Nam က ဗီယက်နမ်ဆန်အဓိကတင်သွင်းသည့် တရုတ်၊ ဖိလစ်ပိုင်နှင့် အင်ဒိုနီးရှားကဲ့သို့သော ဈေးကွက်များနှင့်အတူ ကမ္ဘာပေါ်တွင် ဆန်ဝယ်လိုအားမြင့်တက်နေကြောင်းပြောကြားခဲ့ပါသည်။ အသင်းအနေဖြင့်လည်း အာဖရိကနှင့်အရှေ့အလယ်ပိုင်းကဲ့သို့သော ဈေးကွက်အသစ်များသို့ ဗီယက်နမ်ဆန်ကို တက်ကြွစွာမိတ်ဆက်လျက်ရှိကြောင်းသိရပါသည်။ MARD ကလည်း ၂၀၂၄ခုနှစ်တွင် ဗီယက်နမ်၏ အခွံမချွတ်ရသေးသည့်ဆန်ထွက်ရှိမှုသည် တန်ချိန် ၄၃သန်းကျော်ရောက်ရှိနိုင်ပြီး ပြည်တွင်းစားသုံးမှုဖူလုံကာ ပြည်ပသို့တင်ပို့မှုအတွက် လုံလောက်ကြောင်းပြောကြားခဲ့ပါသည်။

Source: Vietnam Plus

DOCA(ရန်ကုန်)

     အာဂျင်တီးနားနိုင်ငံခြားရေးဝန်ကြီး Diana Mondino က အာဂျင်တီးနားနိုင်ငံဆိုင်ရာ ဗီယက်နမ်သံအမတ်ကြီး Ngo Minh Nguyet ကို နိုင်ငံနှစ်နိုင်ငံအနေဖြင့် အပြန်အလှန်စီးပွားရေး ပူးပေါင်းဆောင်ရွက်မှုကိုတိုးချဲ့သင့်ကြောင်း ပြောကြားခဲ့သည်ဟုသိရပါသည်။ Mondino က အာဂျင်တီးနားနိုင်ငံသည် တောင်အမေရိကနိုင်ငံများနှင့်ဖွဲ့စည်းထားသည့် Southern Common Market(MERCOSUR)ကို ပြန်လည်ပြုပြင်ပြောင်းလဲရန် အရှိန်အဟုန်ဖြင့်လုပ်ဆောင်နေပြီး ဗီယက်နမ်အပါအဝင် အခြားနိုင်ငံများနှင့် လွတ်လပ်စွာကုန်သွယ်ရေးသဘောတူညီချက်များ (FTAS)ကို ဆွေးနွေးညှိနှိုင်းသွားမည်ဟုသိရပါသည်။ အာဂျင်တီးနားနိုင်ငံသည် ဗီယက်နမ်နိုင်ငံနှင့် အခွန်အကောက်ကို ၂ဆအထိ ကင်းလွတ်ခွင့်ပြုမည့် သဘောတူညီချက်လက်မှတ်ရေးထိုးနိုင်ရန် ဆွေးနွေးညှိနှိုင်းမှုများပြုလုပ်ရေး ကြိုးပမ်းသွားမည်ဟုသိရပါသည်။ Mondino က အာဂျင်တီးနားနိုင်ငံအနေဖြင့် ဗီယက်နမ်နှင့် နည်းပညာမြင့်စိုက်ပျိုးရေး(အထူးသဖြင့် ဆန်ထုတ်လုပ်ခြင်း)နှင့် တချို့အပင်အမျိုးအစားများစိုက်ပျိုးခြင်းနယ်ပယ်တို့တွင် အတွေ့အကြုံနှင့်နည်းပညာများကို အပြန်အလှန်ဝေမျှသွားမည်ဟု ပြောကြားခဲ့ပါသည်။ သံအမတ် Nguyet ကလည်း အာဂျင်တီးနားနိုင်ငံ၏ လတ်တလောစီးပွားရေးမူဝါဒအသစ်များကိုကြိုဆိုကြောင်းနှင့် စီးပွားရေးတိုးချဲ့မှုသည် နှစ်နိုင်ငံလုံးအတွက်အကျိုးရှိကြောင်း ပြောကြားခဲ့ပါသည်။ ထို့ပြင် နှစ်နိုင်ငံဆက်ဆံရေးတိုးချဲ့ရန်နှင့် ပိုမိုနက်ရှိုင်းရန်အတွက် ဗီယက်နမ်နိုင်ငံသည် အနာဂတ်တွင် နယ်ပယ်ပေါင်းစုံမှ အမြင့်ပိုင်းနှင့် အဆင့်ပေါင်းစုံရှိသူများ လည်ပတ်မှုဆက်လက်မြင့်တက်လိမ့်မည်ဟုပြောကြားခဲ့ပါသည်။ ဗီယက်နမ်ဝန်ကြီးချုပ် Pham Minh Chinh သည် ယခုနှစ်တွင် အာဂျင်တီးနားနိုင်ငံသို့ အလည်အပတ်သွားရန်စီစဉ်သည်ဟုသိရပြီး နှစ်နိုင်ငံအနေဖြင့် ပါတီ၊ ပါလီမန်အချင်းချင်း အပြန်အလှန်လည်ပတ်မှုများ၊ အစည်းအဝေးများပြုလုပ်သွားမည်ဟုသိရပါသည်။ Nguyet သည် ပါရာဂွေးနိုင်ငံတွင်ကျင်းပခဲ့သည့် FTA နှင့်ပတ်သက်၍ MERCOSUR အစည်းအဝေးတွင် အာဂျင်တီးနားနိုင်ငံက ဗီယက်နမ်နှင့် အင်ဒိုနီးရှားနိုင်ငံကိုထောက်ခံခဲ့ပြီး အပေါင်းလက္ခဏာဆောင်သည့်အချက်များပြုလုပ်နိုင်ခဲ့သည့်အတွက် ကျေးဇူးတင်စကားပြောကြားခဲ့ပါသည်။ ဗီယက်နမ်သည် အာဂျင်တီးနား၏ ဗျူဟာမြောက်ကုန်သွယ်ရေးမိတ်ဖက်ဖြစ်ပြီး လွန်ခဲ့သည့်နှစ်တွင် နှစ်နိုင်ငံအပြန်အလှန်ကုန်သွယ်မှုပမာဏမှာ အမေရိကန်ဒေါ်လာ ၃.၅ဘီလီယံရောက်ရှိခဲ့ကြောင်းသိရှိရပါသည်။   

Source: Vietnam Plus

DOCA(ရန်ကုန်)

        စီမံကိန်းနှင့်ရင်းနှီးမြှုပ်နှံမှုဝန်ကြီးဌာနအောက်ရှိ နိုင်ငံခြားရင်းနှီးမြှုပ်နှံမှုအေဂျင်စီ (FIA) ၏အဆိုအရ မကြာမီတွင် တောင်ကိုရီးယားမှ အားကောင်းသည့် ရင်းနှီးမြှုပ်နှံမှုလှိုင်းများဖြစ်ပေါ်လာစေရန် ဗီယက်နမ်နိုင်ငံက မျှော်လင့်ထားကြောင်းသိရသည်။

         အင်္ဂါနေ့က ဟိုချီမင်မြို့၌ကျင်းပခဲ့သော ၂၀၂၄ Vietnam-Korea Plus Partnership Week တွင် FIA ၏ဒါရိုက်တာ Do Nhat Hoang က တောင်ကိုရီးယားနိုင်ငံသည် ဗီယက်နမ် နိုင်ငံတွင် ရင်းနှီးမြှုပ်နှ့သော ထိပ်တန်းနိုင်ငံများအနက် တစ်နိုင်ငံအဖြစ်ပါဝင်ပြီး ဇွန်လအထိ ပရောဂျက်ပေါင်း ၁၀၀၀၀ကျော်တွင် အမေရိကန်ဒေါ်လာ ၈၇.၅ဘီလီယံနီးပါး ရင်းနှီးမြှုပ်နှံထားပြီး ထုတ်လုပ်မှုပမာဏ၏ ၇၅%နီးပါးရှိကြောင်းပြောကြားခဲ့သည်။

      တောင်ကိုရီးယားကုမ္ပဏီများသည် ၎င်းတို့၏ပရောဂျက်များကို အမြန်ဆုံးအကောင်အထည်ဖော်ခြင်း၊ အရည်အသွေးမြင့်နည်းပညာများ၊ ဝန်ထမ်းများအတွက် လူမှုတာဝန်ယူမှုနှင့် ဥပဒေနှင့်အညီ လိုက်နာမှုရှိခြင်းတို့ကြောင့် ကျေးဇူးတင်ရှိကြောင်း Do Nhat Hoang က ပြောကြားခဲ့သည်။

       တရားဝင်ဖွံ့ဖြိုးမှုအကူအညီ(ODA)အရ တောင်ကိုရီးယားသည် ကြီးမားသောပံ့ပိုးကူညီသူဖြစ်ပြီး ဗီယက်နမ်သည် ၎င်း၏ စုစုပေါင်း ODA ၏ ၂၀% ချေးငွေဖြင့် မြို့ပြသယ်ယူ ပို့ဆောင်ရေး၊ အခြေခံအဆောက်အအုံ၊ ပညာရေး၊ သဘာဝပတ်ဝန်းကျင်၊ သန့်ရှင်းသောစွမ်းအင်နှင့် သတင်းအချက်အလက်နည်းပညာကဏ္ဍတို့တွင် ရန်ပုံငွေပံ့ပိုးပေးလျက်ရှိကြောင်းသိရသည်။

        ဗီယက်နမ်သည် ယခုအခါ အရည်အသွေးထိရောက်မှုနှင့် ရေရှည်တည်တံ့မှုတို့ကို တိုးမြှင့်အာရုံစိုက်ခြင်းဖြင့် နိုင်ငံခြားတိုက်ရိုက်ရင်းနှီးမြှုပ်နှံမှု(FDI)အား ပိုမိုရွေးချယ်လာခဲ့ကြသည်။

        ယခုအခါ ဗီယက်နမ်နိုင်ငံသည် အီလက်ထရောနစ်၊ တစ်ပိုင်းလျှပ်ကူးပစ္စည်း၊ ပြန်လည်ဖွံ့ဖြိုးမြဲစွမ်းအင်၊ ဒစ်ဂျစ်တယ်အသွင်ပြောင်းမှု၊ နည်းပညာမြင့်စိုက်ပျိုးရေး၊ ဘဏ္ဍာရေးစင်တာများ၊ ဆန်းသစ်တီထွင်မှု၊ သုတေသနနှင့် ဖွံ့ဖြိုးတိုးတက်ရေးတို့တွင် ရင်းနှီးမြှုပ်နှံမှုများကို ဦးစားပေးဆောင်ရွက်လျက်ရှိသည်။

       အစိုးရဘက်မှလည်း ရင်းနှီးမြှုပ်နှံမည့်သူများ၏လိုအပ်ချက်ကို ဖြည့်ဆည်းပေးနိုင်ရန် မြေယာများကိုပြင်ဆင်ထားပြီး စက်မှုလုပ်ငန်းများကိုမြှင့်တင်ကာ ရင်းနှီးမြှုပ်နှံသူအသစ်များ အားပံ့ပိုးပေးနိုင်ရန် မူဝါဒများချမှတ်ထားသည်။

         နှစ်နိုင်ငံကုန်သွယ်မှုသည် ၁၉၉၂ခုနှစ်တွင် အမေရိကန်ဒေါ်လာ သန်း၄၉၀မှ ၂၀၂၃ခုနှစ်တွင် အမေရိကန်ဒေါ်လာ ၄၇၉.၄၂ဘီလီယံအထိဖြစ်၍ ၁၆၂ဆအထိတိုးလာခဲ့ကြောင်း ကိုရီးယားကုန်သွယ်မှုနှင့် ရင်းနှီးမြှုပ်နှံမှုမြှင့်တင်ရေးအေဂျင်စီ၏ နိုင်ငံတကာကုန်သွယ်မှုနှင့် စီးပွားရေးပူးပေါင်းဆောင်ရွက်ရေးဌာနခွဲအကြီးအကဲ Lee Ji Hyung က ပြောကြားခဲ့သည်။

Source : the star

DOCA(ရန်ကုန်)