ပြည်ပကုန်သွယ်မှုသတင်းများ

        တရုတ်နိုင်ငံသည် ၂၀၂၆ ခုနှစ် ပထမ ၈ လအတွင်း ဗီယက်နမ်နိုင်ငံမှ ဆန်တန်ချိန် ၁ သန်း ကျော် ဝယ်ယူခဲ့ပြီး အမေရိကန်ဒေါ်လာ ၅၀၅ သန်းနီးပါး သုံးစွဲခဲ့သဖြင့် ဖိလစ်ပိုင်ပြီးလျှင် ဗီယက်နမ် ၏ ဒုတိယအကြီးဆုံး ဆန်တင်ပို့မှုဈေးကွက် ဖြစ်လာခဲ့ကြောင်း သိရသည်။

      ဗီယက်နမ် စိုက်ပျိုးရေးနှင့် သဘာဝပတ်ဝန်းကျင်ဝန်ကြီးဌာန၏ နောက်ဆုံးထုတ်ပြန်ချက်အရ စက်တင်ဘာလအတွင်း ဗီယက်နမ်နိုင်ငံသည် ဆန်တန်ချိန် ၃၇၇,၄၀၀ တင်ပို့ခဲ့ပြီး တန်ဖိုး အမေရိကန်ဒေါ်လာ ၂၀၅.၆ သန်း ရရှိခဲ့ကြောင်း သိရသည်။

        ၂၀၂၆ ခုနှစ် ပထမ ၉ လအတွင်း ဗီယက်နမ်စီးပွားရေးလုပ်ငန်းများသည် ဆန်တန်ချိန် ၆.၄ သန်းခန့် တင်ပို့ခဲ့ပြီး တန်ဖိုး အမေရိကန်ဒေါ်လာ ၃.၁၁ ဘီလီယံ ရရှိခဲ့သည်။ ယခင်နှစ် အလားတူကာလနှင့် နှိုင်းယှဉ်ပါက တင်ပို့မှုပမာဏ ၆.၁ ရာခိုင်နှုန်း ကျဆင်းခဲ့ပြီး တင်ပို့မှုတန်ဖိုးမှာ ၁၀.၉ ရာခိုင်နှုန်း ကျဆင်းခဲ့ကြောင်း သိရသည်။

        အဆိုပါ ၉ လတာကာလအတွင်း ဆန်တင်ပို့မှု ပျမ်းမျှဈေးနှုန်းမှာ တစ်တန်လျှင် အမေရိကန် ဒေါ်လာ ၄၈၄.၈ ခန့်ရှိပြီး ယခင်နှစ် အလားတူကာလထက် ၅.၁ ရာခိုင်နှုန်း ကျဆင်းခဲ့သည်။ တင်ပို့မှုဈေးကွက်များအနက် ၂၀၂၆ ခုနှစ် ဩဂုတ်လကုန်အထိ အချက်အလက်များအရ ဖိလစ်ပိုင် နိုင်ငံသည် ဗီယက်နမ်ဆန်၏ အကြီးဆုံးဝယ်ယူသူအဖြစ် ဆက်လက်ရပ်တည်နေပြီး စုစုပေါင်းတင်ပို့မှု ၏ ၄၀.၉ ရာခိုင်နှုန်းကို ဝယ်ယူခဲ့သည်။ သို့သော် ဖိလစ်ပိုင်သို့ ဆန်တင်ပို့မှုပမာဏမှာ ၁၆.၈ ရာခိုင်နှုန်း ကျဆင်းခဲ့ကြောင်း သိရသည်။

        ထူးခြားချက်အနေဖြင့် တရုတ်နိုင်ငံသည် ၂၀၂၅ ခုနှစ် အလားတူကာလတွင် စတုတ္ထနေရာ၌ ရှိခဲ့ရာမှ ၂၀၂၆ ခုနှစ်တွင် ဗီယက်နမ်၏ ဒုတိယအကြီးဆုံး ဆန်တင်ပို့မှုဈေးကွက်အဖြစ် မြင့်တက်လာခဲ့သည်။ ပထမ ၈ လအတွင်း တရုတ်နိုင်ငံသို့ တင်ပို့မှုသည် ဗီယက်နမ်၏ စုစုပေါင်းဆန်တင်ပို့ မှု၏ ၁၇.၄ ရာခိုင်နှုန်း ရှိခဲ့ကြောင်း သိရသည်။

        တရုတ်နိုင်ငံသည် ယခုနှစ် ပထမ ၈ လအတွင်း ဗီယက်နမ်နိုင်ငံမှ ဆန်တန်ချိန် ၁.၀၃ သန်းခန့် ဝယ်ယူခဲ့ပြီး အမေရိကန်ဒေါ်လာ ၅၀၅ သန်းနီးပါး သုံးစွဲခဲ့သည်။ ယခင်နှစ် အလားတူကာလတွင်မူ ဆန်တန်ချိန် ၅၆၅,၀၀၀ ကျော်သာ တင်သွင်းခဲ့ပြီး တန်ဖိုးမှာ ဒေါ်လာ ၂၈၆.၇ သန်း ရှိခဲ့ကြောင်း သိရသည်။

       စိုက်ပျိုးရေးနှင့် သဘာဝပတ်ဝန်းကျင်ဝန်ကြီးဌာနက တရုတ်နိုင်ငံ၏ ဆန်ကွဲဝယ်လိုအား သိသိသာသာ မြင့်တက်လာခဲ့ပြီး အဓိကအားဖြင့် တိရစ္ဆာန်အစာ ထုတ်လုပ်ရာတွင် အသုံးပြုရန် ဖြစ်ကြောင်း ပြောကြားခဲ့ကြောင်း သိရသည်။

        ထို့အပြင် ၂၀၂၆ ခုနှစ် ပထမ ၈ လအတွင်း အီရတ်နိုင်ငံသို့ ဗီယက်နမ်ဆန်တင်ပို့မှုသည် ယခင် နှစ် အလားတူကာလထက် ၉၈.၉ ဆအထိ မြင့်တက်ခဲ့သည်။ သို့သော် တင်ပို့မှု သိသိသာသာ တိုးလာ ခဲ့သော်လည်း အီရတ်ဈေးကွက်သို့ တင်ပို့မှုတန်ဖိုးမှာ ဒေါ်လာ ၁၄ သန်းနီးပါးသာ ရှိသေးကြောင်း သိရသည်။

       ၂၀၂၆-၂၀၂၇ သီးနှံနှစ်အတွက် ဆန်ထောက်ပံ့မှု၊ ဝယ်လိုအား၊ ကုန်သွယ်မှုနှင့် ဈေးနှုန်းများကို သုံးသပ်ရာတွင် အီရတ်နိုင်ငံသို့ ဆန်တင်ပို့မှု ပြန်လည်မြင့်တက်လာခြင်းသည် ဈေးကွက်များကို ပိုမိုကွဲပြားစွာ ရှာဖွေနိုင်သည့် အခွင့်အလမ်းများ ရှိနေသေးကြောင်း ပြသနေသည်ဟု ဝန်ကြီးဌာနက ဆိုသည်။ ထို့ကြောင့် ယခုနှစ်နောက်ဆုံးလများအတွင်း ဈေးကွက်ကွဲပြားမှုကို ပိုမိုတက်ကြွပြီး ရေရှည်တည်တံ့စွာ ဆောင်ရွက်သင့်ကြောင်းလည်း ပြောကြားခဲ့ကြောင်း သိရသည်။

         တစ်ဖက်တွင် ဗီယက်နမ်၏ ဆန်တင်ပို့မှုသည် ဖိလစ်ပိုင်နှင့် တရုတ်ဈေးကွက်များအပေါ် ပိုမိုအာရုံစိုက်လာပြီး အဆိုပါဈေးကွက်နှစ်ခုသည် စုစုပေါင်းဆန်တင်ပို့မှု၏ ၆၄ ရာခိုင်နှုန်းကျော်ကို ရယူထားသည်။ ယင်းအခြေအနေသည် ရေတိုကာလတွင် အကျိုးရှိနိုင်သော်လည်း ဈေးကွက်အနည်း ငယ်အပေါ် မှီခိုနေရမှုအန္တရာယ်ကို မြင့်တက်စေကြောင်း ဝန်ကြီးဌာနက သတိပေးခဲ့သည်။ ထို့ကြောင့် ဗီယက်နမ်အနေဖြင့် ဆန်တင်ပို့မည့် နိုင်ငံများနှင့် ဈေးကွက်များကို တဖြည်းဖြည်း ချဲ့ထွင်ကွဲပြားသင့်ကြောင်း ဝန်ကြီးဌာနက ပြောကြားခဲ့ကြောင်း သိရသည်။

          ဗီယက်နမ်စားနပ်ရိက္ခာအသင်း၏ ခန့်မှန်းချက်အရ အောက်တိုဘာလတွင် ဆန်တန်ချိန် ၄၀၀,၀၀၀၊ နိုဝင်ဘာလတွင် တန်ချိန် ၂၂၀,၀၀၀ ခန့်နှင့် ဒီဇင်ဘာလတွင် တန်ချိန် ၂၆၈,၃၀၀ ခန့် တင်ပို့နိုင်မည်ဟု ခန့်မှန်းထားသည်။ ၂၀၂၆ ခုနှစ် တစ်နှစ်လုံးအတွက် ဗီယက်နမ်၏ ဆန်တင်ပို့မှု ပမာဏသည် တန်ချိန် ၇.၇၄ သန်းနီးပါးအထိ ရောက်ရှိနိုင်ပြီး တင်ပို့မှုဝင်ငွေမှာ အမေရိကန်ဒေါ်လာ ၃.၉၄ ဘီလီယံခန့် ရရှိနိုင်သည်ဟု ခန့်မှန်းထားသည်။ တင်ပို့မှုတန်ဖိုးမှာ ၂၀၂၅ ခုနှစ်ထက် ၄ ရာခိုင်နှုန်းခန့် ကျဆင်းနိုင်ပြီး ယခုနှစ်အစပိုင်းတွင် ဆန်တင်ပို့မှု ပျမ်းမျှဈေးနှုန်းများ နိမ့်ကျခဲ့ခြင်းကြောင့်ဖြစ်ကြောင်း သိရသည်။

         တင်ပို့မှု တန်ချိန် ၇.၇၄ သန်းနီးပါးအထိ ရောက်ရှိပါက ဗီယက်နမ်သည် တင်ပို့မှုပမာဏအရ အိန္ဒိယပြီးလျှင် ကမ္ဘာ့ဒုတိယအကြီးဆုံး ဆန်တင်ပို့သည့်နိုင်ငံအဖြစ် ဆက်လက်ရပ်တည် နိုင်မည်ဖြစ်သည်။ ယခုနှစ်နောက်ဆုံးလများအတွင်း ဆန်တင်ပို့ဈေးနှုန်းများ မြင့်တက်လာနိုင်ရန် အထောက် အကူပြုမည့် အချက်များလည်း ရှိနေသည်။ ၂၀၂၆-၂၀၂၇ သီးနှံနှစ်တွင် ကမ္ဘာ့ဆန်ထောက်ပံ့မှုနှင့် ဝယ်လိုအား အခြေအနေသည် လိုအပ်ချက်ပိုမိုများပြားသည့် အခြေအနေသို့ ရောက်ရှိနိုင်ပြီး ကမ္ဘာ့ဆန်ကုန်သွယ်မှုပမာဏမှာလည်း စံချိန်တင်အဆင့်သို့ ရောက်ရှိနိုင်သည်ဟု ခန့်မှန်းထားကြောင်း သိရသည်။

       ဖိလစ်ပိုင်နိုင်ငံကလည်း ၂၀၂၆ ခုနှစ်အတွင်း ဆန်တင်သွင်းမှုကို ရပ်ဆိုင်းမည်မဟုတ်ဘဲ နိုင်ငံ၏ ဆန်အရန်ပမာဏ တိုးမြှင့်ရန်အတွက် ဆက်လက်တင်သွင်းသွားမည်ဟု မကြာသေးမီက အတည်ပြုခဲ့သည်။ ယင်းသည် ဖိလစ်ပိုင်နိုင်ငံသို့ တင်သွင်းသည့်ဆန် အများစုကို လက်ရှိတွင် ဖြည့်ဆည်း ပေးနေသည့် ဗီယက်နမ်အတွက် အပြုသဘောဆောင်သည့် သတင်းဖြစ်သည်။

       တစ်ချိန်တည်းတွင် တရုတ်နိုင်ငံ၏ ဆန်တင်သွင်းမှုပမာဏလည်း သိသိသာသာ မြင့်တက်လာခဲ့ပြီး ဗီယက်နမ်ဆန်ကွဲ၊ ကုန်ကြမ်းအဖြစ် အသုံးပြုမည့်ဆန်နှင့် ကောက်ညှင်းဆန်များအတွက် အခွင့်အလမ်းများစွာ ပေါ်ပေါက်လာခဲ့သည်။ အရည်အသွေးမြင့်ဆန်ဈေးကွက်တွင် အရည်အသွေးကောင်းမွန်ပြီး ကာဗွန်ထုတ်လွှတ်မှုနည်းကြောင်း အသိအမှတ်ပြုထားသည့် ဗီယက်နမ်ဆန်များသည် ဂျပန်၊ ဥရောပသမဂ္ဂနှင့် သြစတြေးလျဈေးကွက်များတွင် တစ်တန်လျှင် ဒေါ်လာ ၁,၀၀၀ ကျော်အထိ ဈေးရရှိခဲ့သည်။ ယင်းအခြေအနေသည် ဗီယက်နမ်ဆန်၏ တန်ဖိုးမြှင့်တင်နိုင်မည့် အလားအလာကို ပြသနေကြောင်း သိရသည်။

        ကမ္ဘာ့ဆန်ထောက်ပံ့မှုအပေါ် အယ်လ်နီညိုရာသီဥတုဖြစ်စဉ်၊ အိန္ဒိယနိုင်ငံ၏ မုတ်သုံရာသီ အခြေအနေများနှင့် Kharif ဆန်စိုက်ဧကပမာဏတို့ကလည်း သက်ရောက်မှုရှိနိုင်သည်။ ထို့အပြင် အရှေ့အလယ်ပိုင်းဒေသ၏ ပထဝီနိုင်ငံရေးတင်းမာမှုများကြောင့် စွမ်းအင်နှင့်ရေကြောင်း ပို့ဆောင်ရေးကုန်ကျစရိတ်များ ထပ်မံမြင့်တက်လာနိုင်ကြောင်း သိရှိရပါသည်။

Source : Vietnamnet global                                                               

DOCA (ရန်ကုန်)

      အင်ဒိုနီးရှား-ကနေဒါ ဘက်စုံစီးပွားရေးမိတ်ဖက်သဘောတူညီချက် (ICA-CEPA) သည် အင်ဒိုနီးရှားနိုင်ငံ၏ အသေးစား၊ အလတ်စားနှင့် အသေးစားစီးပွားရေးလုပ်ငန်းများ (MSME) ကနေဒါဈေးကွက်သို့ ပို့ကုန်တိုးချဲ့နိုင်ရေးအတွက် အဓိကတွန်းအားတစ်ရပ် ဖြစ်လာနိုင်ကြောင်း အင်ဒိုနီးရှားကုန်သည်ကြီးများနှင့် စက်မှုလက်မှုလုပ်ငန်းရှင်များအသင်း (Kadin) က ပြောကြားခဲ့ကြောင်း သိရသည်။

     Kadin Indonesia Institute နှင့် Canada ၏ Asia Pacific Foundation တို့ ပူးပေါင်းကျင်းပသည့် အွန်လိုင်းဆွေးနွေးပွဲတွင် Kadin Indonesia-Canada Bilateral Committee ဥက္ကဋ္ဌ Millie Lukito က အင်ဒိုနီးရှားနှင့် ကနေဒါအကြား ကုန်သွယ်ရေးလိုငွေပြမှု မြင့်တက်နေ သော်လည်း ကနေဒါဈေးကွက်သို့ အင်ဒိုနီးရှားပို့ကုန်များ တိုးချဲ့နိုင်မည့် အလားအလာများစွာ ရှိနေကြောင်း ပြောကြားခဲ့သည်။

       ၂၀၂၆ ခုနှစ် ဇန်နဝါရီလမှ ဩဂုတ်လအထိ နှစ်နိုင်ငံကုန်သွယ်မှုပမာဏသည် အမေရိကန်ဒေါ်လာ ၃ ဒသမ ၅ ဘီလီယံခန့်ရှိခဲ့ပြီး ၂၀၂၅ ခုနှစ် အလားတူကာလထက် ၁၅ ဒသမ ၅ ရာခိုင်နှုန်း မြင့်တက်ခဲ့ကြောင်း သိရသည်။

       သို့သော် ယင်းကုန်သွယ်မှုပမာဏတွင် အင်ဒိုနီးရှားနိုင်ငံ၏ ပို့ကုန်တန်ဖိုးမှာ အမေရိကန် ဒေါ်လာ ၁ ဒသမ ၁ ဘီလီယံသာရှိပြီး ကနေဒါနိုင်ငံမှ တင်သွင်းမှုတန်ဖိုးမှာ အမေရိကန်ဒေါ်လာ ၂ ဒသမ ၄ ဘီလီယံ ရှိခဲ့ကြောင်း သိရသည်။

    အင်ဒိုနီးရှား MSME များအနေဖြင့် ကနေဒါဈေးကွက်သို့ ဝင်ရောက်နိုင်ရေးတွင် လိုအပ်သည့် ဈေးကွက်ကွန်ရက်၊ ဈေးကွက်ဆိုင်ရာ အသိပညာနှင့် အခြေခံအဆောက်အအုံများ ရရှိရေးသည် အဓိကစိန်ခေါ်မှုများဖြစ်နေပြီး ICA-CEPA မှတစ်ဆင့် ယင်းအခက်အခဲများကို လက်တွေ့ကျကျ ဖြေရှင်းပေးနိုင်ရန် လိုအပ်ကြောင်း Millie Lukito က အလေးထားပြောကြားခဲ့ကြောင်း သိရသည်။

      အင်ဒိုနီးရှားနိုင်ငံတွင် အရည်အသွေးကောင်းမွန်သည့် ထုတ်ကုန်များနှင့် ထုတ်လုပ်နိုင်စွမ်းရှိသော တည်ထောင်ပြီးသား အသေးစားနှင့် အလတ်စားလုပ်ငန်းများ အများအပြားရှိသော်လည်း ကနေဒါဈေးကွက်သို့ ဝင်ရောက်နိုင်ရေးအတွက် လိုအပ်သည့် ကွန်ရက်နှင့် ဈေးကွက်အသိပညာများ အားနည်းနေကြောင်း သိရသည်။

       ICA-CEPA နှင့်ပတ်သက်၍ အင်ဒိုနီးရှားစီးပွားရေးလုပ်ငန်းများ၏ အသိပညာနည်းပါးမှုသည်လည်း အဓိကအတားအဆီးတစ်ရပ်ဖြစ်နေပြီး အင်ဒိုနီးရှားစီးပွားရေးလုပ်ငန်းများ၏ ၈၄ ဒသမ ၄ ရာခိုင်နှုန်းခန့်သည် အဆိုပါသဘောတူညီချက်ပါ အချက်အလက်များနှင့် စည်းကမ်းချက်များကို လက်ရှိအချိန်အထိ ကောင်းစွာမသိရှိကြကြောင်း သိရသည်။

        သို့သော် ကနေဒါနှင့် ကုန်သွယ်ရေးဆိုင်ရာ ပြည်တွင်းစီးပွားရေးလုပ်ငန်းများ၏ စိတ်ဝင်စားမှုမှာ မြင့်မားနေပြီး စစ်တမ်းကောက်ယူထားသည့် လုပ်ငန်းများ၏ သုံးပုံနှစ်ပုံနီးပါးသည် ပူးပေါင်းဆောင်ရွက်နိုင်မည့် သီးခြားကဏ္ဍများကို ရှာဖွေဖော်ထုတ်ထားပြီးဖြစ်ကြောင်း သိရသည်။

      ထို့ကြောင့် MSME များအတွက် လက်တွေ့အသုံးချနိုင်သည့် လမ်းညွှန်ချက်များကို ရှင်းလင်းစွာ ထုတ်ပြန်ပေးရန် လိုအပ်ပြီး ဈေးကွက်ဝယ်လိုအားမြင့်မားသည့် ထုတ်ကုန်အမျိုးအစားများ၊ Harmonized System (HS) ကုန်ပစ္စည်းကုဒ်များ၊ လိုက်နာရမည့် စံနှုန်းများ၊ ထုတ်ကုန်အသိအမှတ်ပြုလက်မှတ်များနှင့် ကနေဒါနိုင်ငံရှိ ဖြန့်ချိရေးလုပ်ငန်းများထံ တိုက်ရိုက်ချိတ်ဆက်နိုင်မည့် နည်းလမ်းများကို ထည့်သွင်းပေးရန် Kadin က တိုက်တွန်းထားကြောင်း သိရသည်။

     ထို့ပြင် ကနေဒါနိုင်ငံရှိ အင်ဒိုနီးရှားနိုင်ငံသားများ၏ စီးပွားရေးကွန်ရက်ကိုလည်း အသုံးချနိုင်ကြောင်း သိရသည်။ အဆိုပါကွန်ရက်တွင် ကုန်စည်သယ်ယူပို့ဆောင်ရေး၊ သိုလှောင်ရုံနှင့် ဒေသတွင်းဖြန့်ချိရေးဆိုင်ရာ အခြေခံစနစ်များ ရှိပြီးဖြစ်သဖြင့် ပြည်တွင်း MSME များအတွက် ကနေဒါဈေးကွက်သို့ ဝင်ရောက်ရာတွင် ပေါင်းကူးတံတားအဖြစ် အသုံးချနိုင်မည်ဖြစ်ကြောင်း သိရသည်။

        ICA-CEPA အကောင်အထည်ဖော်မှု၏ အောင်မြင်မှုကို အဆင့်မြင့် သံတမန်ရေးရာ ဆောင်ရွက်ချက်များ သို့မဟုတ် လက်မှတ်ရေးထိုးထားသည့် နားလည်မှုစာချွန်လွှာများဖြင့်သာ တိုင်းတာခြင်းမပြုဘဲ ကနဦးပို့ကုန်တင်ပို့မှုများ စတင်နိုင်ခြင်း၊ ထပ်မံပို့ကုန်အော်ဒါများ ရရှိလာခြင်းနှင့် ရေရှည်တည်တံ့သည့် နိုင်ငံခြားတိုက်ရိုက်ရင်းနှီးမြှုပ်နှံမှုများ ရရှိလာခြင်းစသည့် လက်တွေ့စီးပွားရေးရလဒ်များဖြင့် တိုင်းတာရန် Kadin က တိုက်တွန်းထားကြောင်း သိရှိရပါသည်။

Antara News                                                                             

DOCA (ရန်ကုန်)

          အင်ဒိုနီးရှားနိုင်ငံသည် စွမ်းအင်ကူးပြောင်းရေးကဏ္ဍတွင် ရင်းနှီးမြှုပ်နှံမှုများ ဆွဲဆောင်နိုင်မည့် အခွင့်အလမ်းကောင်းများ ပိုင်ဆိုင်ထားပြီး ၂၀၅၀ ပြည့်နှစ်အထိ ရင်းနှီးမြှုပ်နှံမှု အခွင့်အလမ်း တန်ဖိုး အမေရိကန်ဒေါ်လာ ၃ ဒသမ ၈ ထရီလီယံအထိ ရှိနိုင်ကြောင်း အင်ဒိုနီးရှားကုန်သည် ကြီးများနှင့် စက်မှုလက်မှုလုပ်ငန်းရှင်များအသင်း (Kadin) ဥက္ကဋ္ဌ Anindya Bakrie က ပြောကြားသည်။ စွမ်းအင်ကူးပြောင်းရေးသည် စီးပွားရေးယှဉ်ပြိုင်နိုင်စွမ်း၊ စွမ်းအင်လုံခြုံရေးနှင့် စက်မှုလုပ်ငန်းမဟာဗျူဟာတို့နှင့် ပိုမိုဆက်စပ်လာသည့် အစီအစဉ်တစ်ရပ်ဖြစ်လာပြီး အင်ဒိုနီးရှားနိုင်ငံအတွက် အလွန်အရေးကြီးသည့် ကဏ္ဍတစ်ရပ်ဖြစ်ကြောင်း Anindya Bakrie က အောက်တိုဘာလ ၅ ရက်နေ့ထုတ်ပြန်ချက်မှတစ်ဆင့် ပြောကြားခဲ့သည်။ ပထဝီနိုင်ငံရေး မရေရာမှု များ၊ ကုန်သွယ်ရေးပုံစံများ ပြောင်းလဲလာမှုနှင့် စွမ်းအင်လုံခြုံရေးအပေါ် အာရုံစိုက်မှု မြင့်တက် လာခြင်းတို့ကြားတွင် စွမ်းအင်ကူးပြောင်းရေးကဏ္ဍ၌ ရင်းနှီးမြှုပ်နှံမှု အခွင့်အလမ်းများ ဆက်လက်ရှိနေကြောင်း ၎င်းက ဆိုသည်။ ၂၀၂၅ ခုနှစ်တွင် ကမ္ဘာလုံးဆိုင်ရာ စွမ်းအင်ကူးပြောင်းရေး ရင်းနှီးမြှုပ်နှံမှုသည် စံချိန်တင် အမေရိကန်ဒေါ်လာ ၂ ဒသမ ၃ ထရီလီယံအထိ ရောက်ရှိခဲ့ပြီး အာရှ-ပစိဖိတ်ဒေသက ကမ္ဘာ့စုစုပေါင်း ရင်းနှီးမြှုပ်နှံမှု၏ ထက်ဝက်နီးပါး ပါဝင်ခဲ့သည်။ အင်ဒိုနီးရှားနိုင်ငံအတွက်လည်း ယင်းကဏ္ဍတွင် ရင်းနှီးမြှုပ်နှံမှု အခွင့်အလမ်းများ သိသိသာသာ ရှိနေသည်။ လေ့လာမှုတစ်ရပ်အရ အင်ဒိုနီးရှားနိုင်ငံ၏ ကာဗွန်ထုတ်လွှတ်မှု သုညအသားတင် (Net Zero) ရရှိရေး လမ်းကြောင်းသည် ၂၀၅၀ ပြည့်နှစ်အထိ အမေရိကန်ဒေါ်လာ ၃ ဒသမ ၈ ထရီလီယံအထိ ရင်းနှီးမြှုပ်နှံမှု အခွင့်အလမ်းများ ဖန်တီးပေးနိုင်မည်ဖြစ်သည်။ အဆိုပါအခွင့်အလမ်းကို အသုံးချနိုင် ရန် အင်ဒိုနီးရှားနိုင်ငံတွင် အရေးပါသည့် သတ္တုတွင်းထွက်များ ပေါကြွယ်ဝမှု၊ ပြန်လည်ပြည့်ဖြိုးမြဲ စွမ်းအင်အလားအလာကောင်းများ၊ ကြီးမားသည့် ပြည်တွင်းဈေးကွက်နှင့် လျှပ်စစ်မော်တော်ယာဉ်၊ ဘက်ထရီ၊ ဇီဝလောင်စာနှင့် မြေအောက်အပူစွမ်းအင်ကဏ္ဍများ ဖွံ့ဖြိုးတိုးတက်လာမှုတို့ကဲ့သို့ အားသာချက်များရှိနေကြောင်း Anindya Bakrie က ပြောကြားသည်။ ယင်းအခြေခံ အချက်များသည် အင်ဒိုနီးရှားနိုင်ငံအတွင်း ထုတ်ကုန်များ၏ တန်ဖိုးမြှင့်ထုတ်လုပ်မှု တိုးမြှင့်ရန်နှင့် ကာဗွန်ထုတ်လွှတ်မှု နည်းပါးသည့် တန်ဖိုးမြင့်စက်မှုလုပ်ငန်းများ တည်ဆောက်ရန် ခိုင်မာသည့် အခြေခံအုတ်မြစ်များဖြစ်ကြောင်း ၎င်းက ဆိုသည်။ စွမ်းအင်ကူးပြောင်းရေးကို အရှိန်မြှင့် ဆောင်ရွက်ရာတွင် အင်ဒိုနီးရှားနိုင်ငံအနေဖြင့် ဦးစားပေး အချက်သုံးရပ်ကို ခိုင်မာစေရန် လိုအပ်ကြောင်း ၎င်းက ဆက်လက်ပြောကြားသည်။ ပထမအချက်အနေဖြင့် စွမ်းအင်ကူးပြောင်းရေးသည် အမျိုးသားယှဉ်ပြိုင်နိုင်စွမ်းနှင့် စွမ်းအင်လုံခြုံရေးကို မြှင့်တင်ပေးနိုင်ရမည်ဖြစ်သည်။ ယင်းကူးပြောင်းမှုမှတစ်ဆင့် ယုံကြည်စိတ်ချရပြီး ဈေးနှုန်းသင့်တင့်ကာ ကာဗွန်ထုတ်လွှတ်မှု တဖြည်းဖြည်း လျော့နည်းလာသည့် စွမ်းအင်ကိုရရှိစေပြီး စက်မှုလုပ်ငန်းများ ဖွံ့ဖြိုးတိုးတက်ရေး၊ ရင်းနှီးမြှုပ်နှံမှု ဆွဲဆောင်ရေးနှင့် အလုပ်အကိုင်များ ဖန်တီးရေးတို့ကို အထောက်အကူပြုရန် လိုအပ်သည်။ ဒုတိယအချက်အနေဖြင့် အင်ဒိုနီးရှားနိုင်ငံသည် သန့်ရှင်းသောစွမ်းအင်စီးပွားရေးမှ ရရှိနိုင်သည့် တန်ဖိုးမြှင့်ထုတ်လုပ်မှုကို ပိုမိုရယူရန်လိုအပ်ပြီး ကုန်ကြမ်းပေးသွင်းသည့် နိုင်ငံအဖြစ်သာ ရပ်တည်နေခြင်းမှ အစိမ်းရောင်စက်မှုလုပ်ငန်း ဖွံ့ဖြိုးတိုးတက်ရေးဘက်သို့ ကူးပြောင်းရန် လိုအပ်သည်။ တတိယအချက်အနေဖြင့် ရင်းနှီးမြှုပ်နှံရန် အရင်းအနှီးများ ရှိနေသော်လည်း လက်တွေ့အကောင်အထည်ဖော်နိုင်ပြီး ဘဏ်များထံမှ ငွေကြေးရယူနိုင်သည့် စီမံကိန်းများ နည်းပါးနေသည့် ကွာဟချက်ကို ဖြည့်ဆည်းရန် လိုအပ်သည်။ ထိုသို့ဆောင်ရွက်ရာတွင် စည်းမျဉ်းစည်းကမ်းဆိုင်ရာ သေချာရှင်းလင်းမှု မြှင့်တင်ခြင်း၊ ယုံကြည်စိတ်ချရသည့် စီမံကိန်းများ ဖော်ဆောင်ခြင်း၊ အခြေခံအဆောက်အအုံများ ခိုင်မာစေခြင်းနှင့် ရေရှည်တည်တံ့သည့် ရင်းနှီးမြှုပ်နှံမှုများကို အတိုင်းအတာတစ်ခုအထိ အကောင်အထည်ဖော်နိုင်စေမည့် ငွေကြေးထောက်ပံ့မှု ယန္တရားများ ဖော်ဆောင်ခြင်းတို့ လိုအပ်ကြောင်း သိရသည်။ ထိုလုပ်ငန်းစဉ်တွင် အစိုးရနှင့် ပုဂ္ဂလိကကဏ္ဍအကြား ပူးပေါင်းဆောင်ရွက်မှုသည် အလွန်အရေးကြီးကြောင်း Anindya Bakrie က အလေးထားပြောကြားသည်။ ထို့ပြင် Kadin အနေဖြင့် အစိုးရ၊ နိုင်ငံပိုင်စီးပွားရေးလုပ်ငန်းများ (SOEs)၊ ပုဂ္ဂလိကကုမ္ပဏီများ၊ ရင်းနှီးမြှုပ်နှံသူများ၊ ဘဏ္ဍာရေးအဖွဲ့အစည်းများနှင့် နိုင်ငံတကာမိတ်ဖက်များကို စုစည်း၍ နိုင်ငံ၏ ဖွံ့ဖြိုးတိုးတက်ရေး ရည်မှန်းချက်များ အကောင်အထည်ဖော်ရာတွင် ပူးပေါင်းဆောင်ရွက်သည့် “Indonesia Incorporated” စိတ်ဓာတ်ကို ဆက်လက်မြှင့်တင်သွားမည်ဖြစ်ကြောင်း ၎င်းက ပြောကြားခဲ့ကြောင်း သိရှိရပါသည်။

Antara News                                                                             

DOCA (ရန်ကုန်)

        Indonesia နိုင်ငံပိုင်စားနပ်ရိက္ခာဝယ်ယူရေးကုမ္ပဏီ Bulog သည် အစားအစာထောက်ပံ့မှုနှင့် ဈေးနှုန်းတည်ငြိမ်ရေး (SPHP) အစီအစဉ်အရ နိုင်ငံတစ်ဝန်း ဆန်ဈေးနှုန်းများ တည်ငြိမ်စေရန် တစ်ရက်လျှင် ဆန်တန်ချိန် ၄၀၀၀ ခန့် ပုံမှန်ဖြန့်ဖြူးပေးလျက်ရှိကြောင်း သိရသည်။ Bulog ၏ President Director Ahmad Rizal Ramdhani က East Jakarta ရှိ Cipinang Central Rice Market (PIBC) တွင် သောကြာနေ့က ပြောကြားရာတွင် ဆန်များ ပုံမှန်ဖြန့်ဖြူးပေးခြင်းဖြင့် ဈေးကွက်အတွင်း ဆန်လုံလောက်စွာ ရရှိစေပြီး ဈေးနှုန်းတည်ငြိမ်မှုကို အထောက်အကူပြုကြောင်း ပြောကြားသည်။ ဆန်လိုအပ်ချက်ကို အကောင်းဆုံးဖြည့်ဆည်းပေးနိုင်ရန် အစိုးရနှင့် ပုဂ္ဂလိက ကဏ္ဍမှ လုပ်ငန်းများအနေဖြင့် ဆောင်ရွက်လျက်ရှိကြောင်း ၎င်းက ဆိုသည်။ အစားအစာဈေးနှုန်း တည်ငြိမ်ရေးအတွက် Bulog ၏ ဆန်ဖြန့်ဖြူးမှုအပြင် ပုဂ္ဂလိကကုမ္ပဏီများနှင့် ဆန်စက်များအကြား ပူးပေါင်းညှိနှိင်းဆောင်ရွက်ရန်လည်း လိုအပ်ကြောင်း Ahmad Rizal Ramdhani က ပြောကြားသည်။ ထိုအပြင် ဆန်များကို စားသုံးသူများထံ အချိန်မီရောက်ရှိစေရန် ဖြန့်ဖြူးမှု လုပ်ငန်းစဉ်ကို ပိုမိုမြန်ဆန်စေရန် အစိုးရအနေဖြင့် ဆောင်ရွက်ရန်လိုအပ်ကြောင်း ၎င်းက ဆိုသည်။ ဈေးကွက်အတွင်း ဆန်ရရှိနေပြီဖြစ်သော်လည်း လက်လီဆိုင်များနှင့် ကျေးရွာများရှိ အရောင်းဆိုင်များထံ ပိုမိုမြန်ဆန်စွာ ရောက်ရှိစေရန် အဓိကထားဆောင်ရွက်ရမည်ဖြစ်ကြောင်း ၎င်းက ပြောကြားသည်။ Bulog သည် စားသုံးသူများ၏ လိုအပ်ချက်ကို ဖြည့်ဆည်းရန် အရည်အသွေးမြင့် ဆန်များကိုလည်း ပြင်ဆင်ဖြန့်ဖြူးလျက်ရှိပြီး နိုင်ငံတစ်ဝန်း တစ်ရက်လျှင် ဆန်တန်ချိန် ၅၀၇ တန်ခန့် ဖြန့်ဖြူးပေးလျက်ရှိသည်။ အဆိုပါ ပမာဏသည် နိုင်ငံတစ်ဝန်း အရည်အသွေးမြင့်ဆန် လိုအပ်ချက်၏ ၁၀ ရာခိုင်နှုန်းခန့်သာရှိပြီး ကျန် ၉၀ ရာခိုင်နှုန်းကို ပုဂ္ဂလိကကုမ္ပဏီများက ဖြည့်ဆည်းပေးလျက်ရှိကြောင်း သိရသည်။ National Food Agency (Bapanas) ၏ ညွှန်ကြားချက်အရ ဆန်ဈေးနှုန်းအမြင့်ဆုံး လက်လီဈေးကို အလတ်စားဆန် တစ်ကီလိုဂရမ်လျှင် ရူပီး ၁၂,၅၀၀ (အမေရိကန်ဒေါ်လာ ၀ ဒသမ ၇၀) နှင့် အရည်အသွေးမြင့်ဆန် တစ်ကီလိုဂရမ်လျှင် ရူပီး ၁၄,၉၀၀ (အမေရိကန်ဒေါ်လာ ၀ ဒသမ ၈၃) သတ်မှတ်ထားကြောင်း သိရသည်။ အစိုးရသည် အလတ်စား ဆန်နှင့် အရည်အသွေးမြင့်ဆန်များ ရောင်းချနိုင်မည့် အရောင်းစခန်းများ တိုးချဲ့ဖွင့်လှစ်နိုင်ရန် Red and White Village Cooperatives များမှတစ်ဆင့် ဆန်ဖြန့်ဖြူးရေးကွန်ရက်ကို ပိုမိုခိုင်မာအောင် ဆောင်ရွက်သွားရန် စီစဉ်ထားကြောင်း သိရှိရပါသည်။

Antara News                                                                             

DOCA (ရန်ကုန်)

          ကမ္ဘောဒီးယားနိုင်ငံ၏ အထင်ကရ ခရီးသွားနေရာတစ်ခုဖြစ်သည့် အန်ကော ရှေးဟောင်းယဉ်ကျေးမှုနယ်မြေသို့ နိုင်ငံခြားခရီးသွားဝင်ရောက်မှုနှင့် ဝင်ကြေးရငွေတို့သည် ယခုနှစ် ပထမ (၉) လအတွင်း သိသိသာသာ ကျဆင်းခဲ့ကြောင်း နိုင်ငံပိုင် Angkor Enterprise က ထုတ်ပြန်သည့် အစီရင်ခံစာတွင် ဖော်ပြထားသည်။ ယခုနှစ် ဇန်နဝါရီမှ စက်တင်ဘာလအထိ အန်ကော ရှေးဟောင်းယဉ်ကျေးမှုနယ်မြေသို့ နိုင်ငံခြားခရီးသွား ၅၁၀,၅၂၈ ဦး ဝင်ရောက်ခဲ့ပြီး ယမန်နှစ် အလားတူကာလထက် ၂၇.၆၁ ရာခိုင်နှုန်း ကျဆင်းခဲ့သည်။ ခရီးသွားဝင်ရောက်မှု လျော့နည်း လာခြင်းကြောင့် ဝင်ကြေးလက်မှတ်ရောင်းချမှုမှ ရရှိသည့် ဝင်ငွေမှာလည်း အမေရိကန်ဒေါ်လာ ၂၄.၂၃ သန်းခန့်သာ ရရှိခဲ့ပြီး ၂၅.၉ ရာခိုင်နှုန်း လျော့နည်းခဲ့သည်။ နိုင်ငံတကာခရီးသွား ဝင်ရောက်မှုကျဆင်းရခြင်းမှာ ထိုင်း-ကမ္ဘောဒီးယား နယ်စပ်တင်းမာမှု၊ ကမ္ဘာ့စီးပွားရေး အခြေအနေ ပြောင်းလဲမှုများနှင့် ခရီးသွားလာရေးဆိုင်ရာ အခက်အခဲများကြောင့်ဖြစ်ကြောင်း ခရီးသွားလုပ်ငန်းဆိုင်ရာ တာဝန်ရှိသူများက ပြောကြားထားသည်။ Siem Reap ပြည်နယ် အန်ကောခရီးသွားလမ်းညွှန်အသင်းဥက္ကဋ္ဌ Khiev Thy ကလည်း နိုင်ငံတကာခရီးသွားများ၏ ခရီးစဉ်ဖျက်သိမ်းမှုနှင့် အခြားနေရာများသို့ ပြောင်းလဲသွားရောက်မှုများသည် ယမန်နှစ် နှောင်းပိုင်းမှစတင်ခဲ့သည့် နယ်စပ်ပဋိပက္ခနှင့် စီးပွားရေးအခက်အခဲများကြောင့် အဓိက ဖြစ်ပေါ်လာခြင်းဖြစ်ကြောင်း Khmer Times သို့ ပြောကြားခဲ့သည်။ ခရီးသွားလုပ်ငန်း ပြန်လည်တိုးတက်လာစေရန် ကမ္ဘောဒီးယားခရီးသွားလာရေးဝန်ကြီးဌာနသည် ခရီးသွားထုတ်ကုန်နှင့် ဝန်ဆောင်မှုများတိုးချဲ့ဖော်ဆောင်ခြင်း၊ နယ်စပ်ဖြတ်ကျော် ခရီးသွားမြှင့်တင်ရေးလုပ်ငန်းများ အားကောင်းစေခြင်းတို့ကို ဆောင်ရွက်လျက်ရှိသည်။ ခရီးသွားလာရေးဝန်ကြီး Hout Hak ကလည်း ရေရှည် တည်တံ့ပြီး အားလုံးပါဝင်နိုင်သည့် ခရီးသွားလုပ်ငန်း ဖွံ့ဖြိုးတိုးတက်ရေးအတွက် ဒေသခံလူထုကို ပံ့ပိုးပေးခြင်း၊ ရိုးရာလက်မှုပညာများ ဖော်ထုတ်မြှင့်တင်ခြင်း၊ သဘာဝပတ်ဝန်းကျင်နှင့် လိုက်လျောညီထွေသည့် ရင်းနှီးမြှုပ်နှံမှုများအားပေးခြင်းနှင့် ယဉ်ကျေးမှု၊ သဘာဝအမွေအနှစ်များ ထိန်းသိမ်းခြင်းတို့ကို အလေးထားဆောင်ရွက်ရန် တိုက်တွန်းခဲ့သည်။ အဆိုပါလုပ်ငန်းများသည် ၂၀၂၆ ခုနှစ် နှောင်းပိုင်းနှင့် ၂၀၂၇ ခုနှစ်အတွင်း နိုင်ငံတကာခရီးသွားများ ပိုမိုဝင်ရောက်လာစေရန် အထောက်အကူပြုမည်ဟု ၎င်းက ထပ်လောင်းပြောကြားခဲ့သည်။ သို့သော် စက်တင်ဘာလအတွင်း ခရီးသွားဝင်ရောက်မှုသည် ယမန်နှစ် အလားတူလထက် ၀.၃၂ ရာခိုင်နှုန်းသာ လျော့နည်းခဲ့ပြီး ဝင်ကြေးရငွေမှာမူ ၃.၁ ရာခိုင်နှုန်းမြင့်တက်ကာ အမေရိကန် ဒေါ်လာ ၁.၆၉ သန်း ရရှိခဲ့သည်။ ၂၀၂၅ ခုနှစ်တစ်နှစ်လုံးတွင် အန်ကောရှေးဟောင်းယဉ်ကျေးမှု နယ်မြေ ဝင်ကြေးလက်မှတ်ရောင်းချမှုမှ အမေရိကန်ဒေါ်လာ ၄၅ သန်းနီးပါး ရရှိခဲ့ပြီး ၂၀၂၄ ခုနှစ်ထက် ၆.၅၁ ရာခိုင်နှုန်း ကျဆင်းခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)