၂၀၂၅ အာဖရိက နိုင်ငံတကာစိုက်ပျိုးရေးကုန်စည်ပြပွဲကို ကင်ညာနိုင်ငံ နိုင်ရိုဘီမြို့တွင် ခေတ်မှီစိုက်ပျိုးရေးကဏ္ဍတွင် တရုတ်-အာဖရိက ပူးပေါင်းဆောင်ရွက်မှုကိုမြှင့်တင်ရန်အတွက် “Increasing Agricultural Productivity in Africa through Inovation and Market Access” ဟူသော ဆောင်ပုဒ်ဖြင့် အောက်တိုဘာလ ၂၈ ရက်နေ့က ဖွင့်လှစ်ခဲ့သည်။ ပြပွဲသည် အာဖရိကအား စိုက်ပျိုးရေးတီထွင်ဆန်းသစ်မှုနှင့် ကုန်သွယ်မှုအတွက် ကမ္ဘာလုံးဆိုင်ရာ အချက်အချာဖြစ်လာစေရန် ကြိုးပမ်းလျက်ရှိကြောင်း၊ ပြပွဲတွင် တရုတ်နိုင်ငံမှပြခန်း ၁၀၀ အပါအဝင် ပြခန်းပေါင်း ၁၅၀ ကျော်ကို ပြသထားကြောင်း ကင်ညာနိုင်ငံစိုက်ပျိုးရေးဌာနမှ အဓိက အတွင်းဝန် Paul Kipronoh Ronoh က ပြောကြားခဲ့သည်။ အထူးသဖြင့် တရုတ်-အာဖရိက ပူးပေါင်းဆောင်ရွက်ရေးဖိုရမ်နှင့် အာဖရိကသမဂ္ဂ၏ ဘက်စုံအာဖရိက စိုက်ပျိုးရေးဖွံ့ဖြိုး တိုးတက်မှု အစီအစဉ်အောက်တွင် ဒေသတွင်းနှင့် ကမ္ဘာလုံးဆိုင်ရာ စိုက်ပျိုးရေးမိတ်ဖက်များအတွက် ကင်ညာ၏ ကတိကဝတ်ကို အားဖြည့်ပေးကြောင်း ၎င်းက မှတ်ချက်ပြုခဲ့သည်။ ကင်ညာနိုင်ငံဆိုင်ရာ တရုတ်သံအမတ်ကြီး Guo Haiyan က ကုန်စည်ပြပွဲတွင် မျိုးစေ့ထုတ်ခြင်းမှ အစားအစာပြုပြင်ခြင်းအထိ ကဏ္ဍတစ်ဝှမ်းကို လွှမ်းခြုံထားသော တရုတ်စိုက်ပျိုးရေးလုပ်ငန်း ၁၀၀ ကျော်ပါဝင်ကြောင်း ပြောကြားခဲ့သည်။ တီထွင်ဆန်းသစ်မှုများသည် အသေးစား တောင်သူလယ်သမားများ အထွက်နှုန်းတိုးစေခြင်း၊ ရိတ်သိမ်းပြီးနောက်ဆုံးရှုံးမှုများကို လျှော့ချရန်နှင့် ရာသီဥတုဒဏ်ခံနိုင်စေရန် လယ်ယာစိုက်ပျိုးရေးကဏ္ဍကို ကူညီနိုင်ကြောင်း Guo က ဆက်လက်ပြောကြားခဲ့သည်။ Agri-Africa Exhibition ၏ အမှုဆောင်အရာရှိချုပ် Tito Mutai က ကုန်စည်ပြပွဲအတွင်း နှစ်နိုင်ငံအကြား စိုက်ပျိုးရေးနယ်ပယ်တွင် ရင်းနှီးမြှုပ်နှံမှုနှင့် ကုန်သွယ်မှုမြှင့်တင်ရန် တရုတ်နှင့် ကင်ညာအဖွဲ့အစည်းများအကြား သဘောတူညီချက် ငါးခုကို လက်မှတ်ရေးထိုးခဲ့ကြောင်း၊ နှစ်နိုင်ငံလုံးသည် စိုက်ပျိုးရေးကို စားနပ်ရိက္ခာအရင်းအမြစ်အဖြစ်သို့ ပြောင်းလဲရာတွင် တူညီသောအမြင်ရှိကြပြီး အားလုံးပါဝင်နိုင်သော တိုးတက်မှုနှင့် အလုပ်အကိုင် ဖန်တီးရေးအတွက် တွန်းအားပေး ဆောင်ရွက်လျက်ရှိကြောင်း ပြောကြားခဲ့သည်။
Source : Xinhua
DOCA(ရန်ကုန်)