ပြည်ပကုန်သွယ်မှုသတင်းများ

           ဗီယက်နမ်နိုင်ငံသည် ၂၀၂၆ ခုနှစ် ဇန်နဝါရီလတွင် စိုက်ပျိုးရေးထွက်ကုန်များ၏ ပို့ကုန်တန်ဖိုးမှာ အမေရိကန်ဒေါ်လာ ၃.၆ ဘီလီယံ၊ မွေးမြူရေးထွက်ကုန်များသည် အမေရိကန်ဒေါ်လာ ၄၇.၅ သန်း၊ ပင်လယ်စာတင်ပို့မှုမှာ အမေရိကန်ဒေါ်လာ ၉၄၀ သန်းနှင့် သစ်တောထွက်ကုန် တင်ပို့မှုမှာ အမေရိကန်ဒေါ်လာ ၁.၇၂ ဘီလီယံအထိ ရောက်ရှိခဲ့သည်။

            စိုက်ပျိုးရေးနှင့် ပတ်ဝန်းကျင်ဝန်ကြီးဌာန၏ အဆိုအရ ၂၀၂၆ ခုနှစ် ဇန်နဝါရီလတွင် ဗီယက်နမ်၏ စိုက်ပျိုးရေး၊ သစ်တောနှင့် ရေထွက်ပစ္စည်းများ တင်ပို့မှုဝင်ငွေသည် အမေရိကန် ဒေါ်လာ ၆.၅၁ ဘီလီယံနီးပါး  ရောက်ရှိရန် ခန့်မှန်းထားသည်။

           ပထဝီဝင်အနေအထားအရ အာရှသည် ဗီယက်နမ်၏ စိုက်ပျိုးရေး၊ သစ်တောနှင့် ရေထွက်ပစ္စည်းများအတွက် အကြီးဆုံးပို့ကုန်ဈေးကွက်ဖြစ်ပြီး ဈေးကွက်ဝေစု၏ ၄၅.၃% ရှိသည်။ နောက်ထပ်အကြီးဆုံးဈေးကွက်နှစ်ခုမှာ အမေရိကနှင့် ဥရောပတို့ဖြစ်ပြီး ဈေးကွက်ဝေစုမှာ ၂၂.၇% နှင့် ၁၃.၄% အသီးသီးရှိသည်။ အာဖရိကနှင့် ပစိဖိတ်သမုဒ္ဒရာဒေသအတွင်းရှိနိုင်ငံများ၏ ဈေးကွက်ဝေစုမှာ ၂.၆% နှင့် ၁.၄% အသီးသီးရှိသည်။

           ယခင်နှစ် ကာလတူနှင့် နှိုင်းယှဉ်ပါက ၂၀၂၆ ခုနှစ် ဇန်နဝါရီလတွင် အောက်ပါဒေသများသို့ ဗီယက်နမ်၏ စိုက်ပျိုးရေး၊ သစ်တောနှင့် ရေထွက်ကုန် တင်ပို့မှု ခန့်မှန်းတန်ဖိုးမှာ ၄၁.၁%၊ အမေရိ က တိုက်သို့ ၂၂.၄%၊ ဥရောပသို့ ၁၁.၂%၊ အာဖရိကသို့ ၂၁.၆% နှင့် ပစိဖိတ်သမုဒ္ဒရာ ဒေသအတွင်းရှိ နိုင်ငံများသို့ ၃၂.၃% မြင့်တက်ခဲ့သည်။

          ဗီယက်နမ် စိုက်ပျိုးရေး၊ သစ်တောနှင့် ရေထွက်ပစ္စည်းများအတွက် ဈေးကွက်ဝေစု ၂၂.၆% ရှိသော တရုတ်နိုင်ငံ၊ အမေရိကန်ပြည်ထောင်စုသည် ဈေးကွက်ဝေစု ၂၀.၄% နှင့် ဂျပန်သည် ဈေးကွက်ဝေစု ၇% ဖြင့် အကြီးဆုံး ပို့ကုန်ဈေးကွက်သုံးခုဖြစ်သည်။ ယခင်နှစ်ကာလတူနှင့် နှိုင်းယှဉ်ပါက ၂၀၂၆ ခုနှစ် ဇန်နဝါရီလတွင် တရုတ်နိုင်ငံသို့ ဗီယက်နမ်၏ စိုက်ပျိုးရေး၊ သစ်တော နှင့် ရေထွက်ပစ္စည်းများ တင်ပို့မှု ခန့်မှန်းတန်ဖိုးမှာ ၆၆.၁%၊ အမေရိကန်ပြည်ထောင်စုသို့ ၂၁.၆% နှင့် ဂျပန်သို့ ၁၉.၆% မြင့်တက်ခဲ့သည်။

           ၂၀၂၆ ခုနှစ် ဇန်နဝါရီလတွင် ကော်ဖီ၊ ရာဘာ၊ လက်ဖက်၊ ဆန်၊ သစ်သီးဝလံနှင့် ဟင်းသီးဟင်းရွက်များ၊ သီဟိုဠ်စေ့နှင့် ငရုတ်ကောင်းတို့ အပါအဝင် ပို့ကုန်ပစ္စည်းများသည် ခိုင်မာသော တိုးတက်မှုကို ပြသခဲ့ပြီး ယခင်နှစ် ကာလတူနှင့် နှိုင်းယှဉ်ပါက ပမာဏနှင့် တန်ဖိုးနှစ်မျိုးလုံး တိုးတက်လာခဲ့သည်။ ကော်ဖီနှင့် ရာဘာသည် ထိပ်ဆုံးမှ တိုးတက်ပါဝင်နေသည်။

            စိုက်ပျိုးရေးနှင့် ပတ်ဝန်းကျင်ဝန်ကြီးဌာန၏ အစီရင်ခံစာအရ ကော်ဖီတင်ပို့မှုမှာ တန်ချိန် ၁၈၀,၀၀၀ ခန့်ရှိပြီး အမေရိကန်ဒေါ်လာ ၉၈၁ သန်းတန်ဖိုးရှိပြီး ရော်ဘာတင်ပို့မှုမှာ တန်ချိန် ၂၂၀,၀၀၀ ရှိကာ အမေရိကန်ဒေါ်လာ ၄၁၆ သန်းတန်ဖိုးရှိပြီး ယခင်နှစ်ကာလတူနှင့် နှိုင်းယှဉ်ပါက သိသိသာသာ မြင့်တက်လာခဲ့သည်။ ဤကုန်စည်နှစ်မျိုး၏ ပျမ်းမျှပို့ကုန်ဈေးနှုန်းများမှာ တည်ငြိမ်နေပြီး အဓိကစားသုံးမှုဈေးကွက်များမှာ ဥရောပနှင့် အာရှတို့တွင် တည်ရှိနေသည်။

            လက်ဖက်နှင့် ဆန်တင်ပို့မှုသည် ပမာဏနှင့် တန်ဖိုးနှစ်မျိုးလုံးတွင် သိသာထင်ရှားသော တိုးတက်မှုများကို မှတ်တမ်းတင်ထားသည်။ လက်ဖက်တင်ပို့မှုသည် တန်ချိန် ၁၄၀၀၀ ခန့်အထိ ရောက်ရှိခဲ့ပြီး အမေရိကန်ဒေါ်လာ ၂၃ သန်းတန်ဖိုးရှိကာ ဆန်တင်ပို့မှုသည် တန်ချိန် ၆၀၀၀၀၀ ခန့်အထိ ရောက်ရှိခဲ့ပြီး အမေရိကန်ဒေါ်လာ ၃၇၀ သန်းတန်ဖိုးရှိသည်။ လက်ဖက်တင်ပို့မှု ဈေးနှုန်းများ အနည်းငယ်ကျဆင်းသွားသော်လည်း ထုတ်လုပ်မှုတိုးတက်လာခြင်းကြောင့် တင်ပို့မှုတန်ဖိုးမှာ ဆက်လက်မြင့်တက်နေဆဲဖြစ်သည်။ ဆန်တင်ပို့မှုဈေးနှုန်းများသည် ၄% ခန့် မြင့်တက်ခဲ့ပြီး တစ်တန်ပျမ်းမျှ အမေရိကန်ဒေါ်လာ ၆၁၆.၆ ရှိသည်။

         စိုက်ပျိုးရေးနှင့် ပတ်ဝန်းကျင်ထိန်းသိမ်းရေးဝန်ကြီးဌာနသည် ထိရောက်သော ထုတ်လုပ်မှုပုံစံများနှင့် စီးပွားရေးအဖွဲ့အစည်းပုံစံများဖွံ့ဖြိုးတိုးတက်ရေး၊ ပုံစံသစ် စိုက်ပျိုးရေးလုပ်ငန်းများ၊ သမဝါယမများ၏ ဂေဟစနစ်တစ်ခု တည်ဆောက်ရေး၊ ထုတ်လုပ်မှုအား ကာကွယ်ရန်နှင့် ဈေးကွက်တည်ငြိမ်စေရန်အတွက် သီးနှံများ၊ မွေးမြူရေးနှင့် ရေထွက်ပစ္စည်းများအတွက် ရောဂါကာကွယ်ရေးနှင့် ထိန်းချုပ်ရေးတို့ကို အားကောင်းစေရန် အလေးထား‌ ဆောင်ရွက်လျက်ရှိကြောင်း သိရှိရပါသည်။

Source : Vietnamplus                                                                        

DOCA (ရန်ကုန်)

         ဖိလစ်ပိုင် စာရင်းအင်းအာဏာပိုင်အဖွဲ့ (PSA) ၏ ကနဦး အချက်အလက်များအရ ၂၀၂၅ ခုနှစ် ဒီဇင်ဘာလ လယ်ယာထွက်ကုန် ကုန်သွယ်မှုလိုငွေပြမှုသည် ၂၆.၉ ရာခိုင်နှုန်း ကျဆင်းသွားပြီး အမေရိကန်ဒေါ်လာ ၆၆၈.၃၅ သန်းသာရှိခဲ့ကြောင်း သိရသည်။ ယခင်နှစ် အလားတူကာလက လိုငွေပြမှု ဒေါ်လာ ၉၁၃.၉၇ သန်း ရှိခဲ့ရာမှ ယခုကဲ့သို့ လျော့ကျသွားခြင်းဖြစ်သည်ဟု PSA က ဆိုသည်။ ဒီဇင်ဘာလအတွင်း လယ်ယာပို့ကုန်သည် ယခင်နှစ်ကာလတူထက် ၁၉.၃ ရာခိုင်နှုန်း မြင့်တက်လာပြီး ဒေါ်လာ ၈၈၄.၇၇ သန်း ရရှိခဲ့ရာ နိုင်ငံ၏ စုစုပေါင်း ပို့ကုန်ပမာဏ၏ ၁၂.၇ ရာခိုင် နှုန်းရှိခဲ့သည်။ လယ်ယာထွက်ကုန် ကုန်သွယ်မှုပမာဏ (သွင်း ကုန်နှင့် ပို့ကုန်ပေါင်း) စုစုပေါင်း ဒေါ်လာ ၂.၄၄ ဘီလီယံတွင် ပို့ကုန်ကဏ္ဍက ၃၆.၂၉ ရာခိုင်နှုန်း ပါဝင်နေသည်။ လယ်ယာထွက် ကုန် သွင်းကုန်ပမာဏမှာမူ ယခင်နှစ်ထက် ၆.၂ ရာခိုင်နှုန်း ကျဆင်းပြီး ဒေါ်လာ ၁.၅၅ ဘီလီယံ ရှိ ခဲ့ကာ စုစုပေါင်း သွင်းကုန်ပမာဏ၏ ၁၄.၈ ရာခိုင်နှုန်း ရှိသည်။ ခြုံငုံကြည့်လျှင် ဒီဇင်ဘာလ လယ်ယာကဏ္ဍ ကုန်သွယ်မှုပမာဏ (ပို့ကုန်/သွင်းကုန် စုစုပေါင်း) သည် ယခင်နှစ်ကာလတူနှင့် နှိုင်းယှဉ်ပါက ၁.၇ ရာခိုင်နှုန်း တိုးတက်လာခဲ့သည်။ ၂၀၂၅ ခုနှစ် ဒုတိယနှစ်ဝက်အတွင်း လယ်ယာပို့ကုန်များ အားကောင်းလာခြင်းနှင့် သွင်းကုန်ကျဆင်းခြင်းတို့ကြောင့် တစ်နှစ်တာ ကုန်သွယ်မှု လိုငွေပြမှုကို ၅.၆ ရာခိုင်နှုန်း (အမေရိကန် ဒေါ်လာ ၁၁.၀၆ ဘီလီယံ) အထိ လျှော့ချနိုင်ခဲ့သည်။ ထိုသို့ သွင်းကုန်ကျဆင်းရခြင်းမှာ ၂၀၂၅ ခုနှစ် နှစ်ကုန်ပိုင်းတွင် အသက်ဝင်ခဲ့သော ဆန်တင်သွင်းမှု ရပ်ဆိုင်းထားသည့် အစီအစဉ်၏ အကျိုးသက်ရောက်မှုကို ထင်ဟပ်စေသည်။ ဒီဇင်ဘာလအတွင်း စားသုံးသီးနှံနှင့် အခွံမာသီးများ (ရှောက်/သံပုရာမျိုးဝင် အသီးများနှင့် ဖရဲသီးခွံများ အပါ အဝင်) တင်ပို့မှုသည် ယခင်နှစ် ကာလတူထက် ၇၇.၂ ရာခိုင်နှုန်း မြင့်တက်ခဲ့ပြီး ဒေါ်လာ ၃၂၉.၇၂ သန်း ရရှိခဲ့ကြောင်း၊ ယင်း ပမာဏသည် လယ်ယာပို့ကုန် စုစုပေါင်း၏ ၃၇.၂ ရာခိုင်နှုန်း ဖြစ်ကြောင်း PSA က ဆိုသည်။ တိရစ္ဆာန်၊ ဟင်းသီးဟင်းရွက် (သို့မဟုတ်) အဏုဇီဝ အဆီများနှင့် ဆီထွက်ပစ္စည်းများ၊ ပြုပြင်ပြီး စားသုံးဆီများနှင့် ဖယောင်းများ တင်ပို့မှုမှာမူ ဒီဇင်ဘာလတွင် ၈.၉ ရာခိုင်နှုန်း ကျဆင်းခဲ့ပြီး ဒေါ်လာ ၂၇၀.၀၇ သန်းသာ ရှိခဲ့သည်။ ယင်းသည် လယ်ယာပို့ကုန် စုစုပေါင်း၏ ၃၀.၅ ရာခိုင်နှုန်း ဖြစ်သည်။ အာဆီယံဒေသတွင်းသို့ လယ်ယာထွက်ကုန် တင်ပို့မှုသည် ဒီဇင်ဘာလတွင် ဒေါ်လာ ၉၇.၀၅ သန်း ရှိခဲ့ရာ၌ မလေးရှားနိုင်ငံက ဒေါ်လာ ၅၈.၀၉ သန်း (စုစုပေါင်း၏ ၆၀ ရာခိုင်နှုန်း) ဖြင့် အများဆုံးဝယ်ယူသည့် နိုင်ငံဖြစ်ခဲ့သည်။ ဥရောပ သမဂ္ဂ (EU) ဒေသတွင်း ဖိလစ်ပိုင်၏ အဓိက လယ်ယာထွက်ကုန် ပို့ကုန်ဈေးကွက်ဖြစ်သော နယ်သာလန်နိုင်ငံသို့ တင်ပို့မှုမှာ ဒေါ်လာ ၁၅၄.၄၁ သန်း ရှိခဲ့ပြီး ၎င်းသည် ဒေသတွင်းသို့ တင်ပို့မှု စုစုပေါင်း၏ ၇၀.၀၆ ရာခိုင်နှုန်းရှိကြောင်း သိရသည်။ အဓိကကုန်စည်အုပ်စုများအနက် ဒီဇင်ဘာလအတွင်း လယ်ယာထွက်ကုန် သွင်းကုန်၏ အများဆုံးဝေစုမှာ ကောက်ပဲသီးနှံများ (Cereals) ဖြစ်ပြီး စုစုပေါင်း ဒေါ်လာ ၂၃၄.၁၈ သန်း (သို့မဟုတ် ၁၅.၁ ရာခိုင်နှုန်း) ရှိခဲ့သည်။ စက်တင်ဘာလတွင် စတင်ခဲ့သည့် ၄ လကြာ ဆန်တင်သွင်းမှု ပိတ်ပင်ချက်ကြောင့် ယင်းလအတွင်း ကောက်ပဲသီးနှံ တင်ပို့မှုတန်ဖိုးမှာ ၃၄.၀ ရာခိုင်နှုန်းအထိ လျော့ကျခဲ့သည်။ အာဆီယံဒေသတွင်းတွင် အင်ဒိုနီး ရှားနိုင်ငံသည် ဖိလစ်ပိုင်သို့ လယ်ယာထွက်ကုန် အများဆုံး တင်ပို့သည့် နိုင်ငံဖြစ်ပြီး ဒေသတွင်းမှ စုစုပေါင်း သွင်းကုန်ပမာဏ၏ ၃၀.၄ ရာခိုင်နှုန်း (ဒေါ်လာ ၁၄၆.၆၁ သန်း) ရှိခဲ့ကြောင်း သိရသည်။ အာဆီယံနိုင်ငံများမှ အများဆုံး တင်သွင်းခဲ့သည့် လယ်ယာကုန်စည်များမှာ တိရစ္ဆာန်၊ ဟင်းသီးဟင်းရွက် (သို့မဟုတ်) အဏုဇီဝ အဆီများနှင့် ဆီထွက်ပစ္စည်းများ၊ ပြုပြင်ပြီး စားသုံးဆီများနှင့် တိရစ္ဆာန်/ဟင်းသီးဟင်းရွက် ဖယောင်းများ ဖြစ်ကြသည်။ ဥရောပသမဂ္ဂ အတွင်း၌မူ စပိန်နိုင်ငံသည် ဖိလစ်ပိုင်သို့ လယ်ယာထွက်ကုန်အများဆုံး တင်ပို့သူဖြစ်ပြီး တင်သွင်းမှုတန်ဖိုး ဒေါ်လာ ၂၄.၉၇ သန်း ရှိခဲ့ရာ ၎င်းမှာ ဥရောပဒေသမှ စုစုပေါင်း တင်ပို့မှု၏ ၁၉.၅၇ ရာခိုင်နှုန်း ဖြစ်ကြောင်း သိရှိရပါသည်။

Source : bworldonline                                                                 

DOOCA(ရန်ကုန်)

         ဖိလစ်ပိုင်နိုင်ငံ၏ ငါးလုပ်ငန်းထွက်ကုန် စုစုပေါင်း၏ ထက်ဝက်ကျော်ကို ကိုယ်စားပြုနေသည့် ရေသတ္တဝါမွေးမြူရေးကဏ္ဍသည် ငါးသားပေါက်ထုတ်လုပ်မှု တိုးတက်လာခြင်းကြောင့် ပိုမိုအားကောင်းလာမည်ဖြစ်ကြောင်း ငါးလုပ်ငန်းနှင့် ရေသယံဇာတဦးစီးဌာန (BFAR) ၏ ပြောကြားချက်အရ သိရပါသည်။

          BFAR မှ ထုတ်ပြန်သော ထုတ်ပြန်ချက်များအရ ဖိလစ်ပိုင်နိုင်ငံ၏ ရေသတ္တဝါမွေးမြူရေး နည်းပညာစင်တာများမှ ငါးမှုန်နှင့် ငါးသန် (Fry and Fingerlings) ထုတ်လုပ်မှုမှာ ၂၀၂၅ ခုနှစ်တွင် ငါးအကောင်ရေ ၃၃၅.၃ သန်းခန့်ရှိခဲ့ပြီး ၎င်းသည် ၂၀၂၄ခုနှစ်က ထွက်ရှိခဲ့သည့် ၃၂၅.၉ သန်း ထက် ၃ ရာခိုင်နှုန်းနီးပါး တိုးတက်လာခြင်းဖြစ်ကြောင်း သိရပါသည်။ ယခုကဲ့သို့ ထုတ်လုပ်မှု တိုးတက်လာခြင်းမှာ ရေရှည်တည်တံ့သော မွေးမြူရေးနည်းပညာများကို အထိရောက်ဆုံး အသုံးချခြင်းနှင့် အမျိုးသားမျိုးငါးဖွံ့ဖြိုးရေး အစီအစဉ်အောက်တွင် မျိုးငါး (Broodstocks) များကို စနစ်တကျ ထိန်းသိမ်းစောင့်ရှောက်နိုင်ခြင်းတို့ကြောင့်ဖြစ်သည်ဟု BFAR ၏ သုံးသပ်ချက်အရ သိရပါသည်။

        အဆိုပါလုပ်ဆောင်ချက်သည် တစ်နိုင်ငံလုံးအတိုင်းအတာဖြင့် အရည်အသွေးမြင့် မျိုးငါးသားပေါက်များကို ပိုမိုလွယ်ကူစွာ ရရှိနိုင်စေရန်နှင့် မွေးမြူရေးကဏ္ဍ၏ ထုတ်လုပ်မှုစွမ်းအားကို မြှင့်တင်ပေးနိုင်ရန်ဖြစ်ကြောင်း သိရပါသည်။ အဆိုပါငါးသားပေါက်မွေးမြူထုတ်လုပ်ခြင်း တိုးတက်မှုများကို ရေရှည်ထိန်းသိမ်းထားနိုင်ရန်အတွက် ဒေသအလိုက် အဓိကငါးအမယ်များကို ဦးစားပေးဖော်ထုတ်ရန်နှင့် ကွင်းဆင်းစစ်ဆေးမှုများ ပိုမိုတိုးမြှင့်လုပ်ဆောင်ရန် ဒေသဆိုင်ရာ ရုံးများနှင့် နည်းပညာစင်တာများကို ညွှန်ကြားထားကြောင်း အရာရှိဖြစ်သူ Salilig က ပြောကြားခဲ့ပါသည်။ ထို့အပြင် ဒေသခံငါးမွေးမြူရေးလုပ်ငန်းများကို ပိုမိုပံ့ပိုးကူညီနိုင်ရန်အတွက် ဥပဒေအရ သတ်မှတ်ထားသော လူထုအခြေပြု သားဖောက်စခန်းများ၏ လုပ်ငန်းလည်ပတ်မှုများကိုလည်း အရှိန်အဟုန်မြှင့် လုပ်ဆောင်သွားမည်ဖြစ်ကြောင်း သိရပါသည်။

           ဖိလစ်ပိုင်စာရင်းအင်းအာဏာပိုင်အဖွဲ့ (PSA) မှ ထုတ်ပြန်သောအချက်အလက်များအရ ၂၀၂၅ ခုနှစ်တွင် ငါးထုတ်လုပ်မှု စုစုပေါင်းမှာ ၂.၅ ရာခိုင်နှုန်းခန့် ကျဆင်းခဲ့ကြောင်း သိရပါသည်။ PSA ၏ဖော်ပြချက်များအရ ဖိလစ်ပိုင်နိုင်ငံ၏ ငါးထုတ်လုပ်မှုသည် ၂၀၂၂ ခုနှစ်မှစတင်၍ ဆက်တိုက် ကျဆင်းမှုများရှိခဲ့ပြီး ၂၀၀၄ ခုနှစ်နောက်ပိုင်းကာလများမှစတင်၍ စုစုပေါင်း ထုတ်လုပ်မှုပမာဏမှာ မက်ထရစ်တန် ၃ သန်းဝန်းကျင်အထိ ပထမဆုံးအကြိမ် ရောက်ရှိသွားခြင်းဖြစ်ကြောင်း သိရပါသည်။

          ၂၀၂၄ ခုနှစ်အတွင်း ဖိလစ်ပိုင်နိုင်ငံရေသတ္တဝါမွေးမြူရေးကဏ္ဍမှ ထွက်ကုန် မက်ထရစ် တန် ၂.၁၈ သန်း ရရှိခဲ့ပြီး ၁.၉ ရာခိုင်နှုန်း ကျဆင်းခဲ့သော်လည်း စုစုပေါင်းဈေးကွက်ဝေစု၏ ၅၅.၁ ရာခိုင်နှုန်းကို ရယူထားနိုင်ဆဲဖြစ်ကြောင်း သိရပါသည်။ စီးပွားဖြစ်ငါးဖမ်းလုပ်ငန်းမှာမူ ၂.၂ ရာခိုင် နှုန်း ကျဆင်းခဲ့ပြီး စုစုပေါင်းထုတ်လုပ်မှု၏ ၂၁.၅ ရာခိုင်နှုန်းရှိခဲ့ကြောင်းသိရပါသည်။ ပင်လယ်ပြင် ဒေသန္တရငါးဖမ်းလုပ်ငန်းမှာ ၆.၇ ရာခိုင်နှုန်းအထိ ကျဆင်းခဲ့သော်လည်း ကုန်းတွင်းပိုင်း ငါးဖမ်းလုပ်ငန်းမှာမူ ၇.၇ ရာခိုင်နှုန်း တိုးတက်လာခဲ့ကြောင်း သိရပါသည်။

Source: Inquirer Net                                                                  

DOCA (ရန်ကုန်)

    မြန်မာနိုင်ငံ၏စီးပွားရေးမောင်းနှင်အားတွင် ပို့ကုန်သွင်းကုန်ကဏ္ဍသည် အဓိကအခန်းကဏ္ဍ မှပါဝင်နေပြီး ယခုအခါပြည်ပပို့ကုန်ကဏ္ဍတွင် လယ်ယာထွက်ကုန်နှင့်ရေထွက်ပစ္စည်းများကို ပိုမို ဦးစားပေးတင်ပို့လျက်ရှိသည်။ ဆန်၊ ပဲမျိုးစုံ၊ ပြောင်းနှင့်ရော်ဘာကဲ့သို့သောထုတ်ကုန်များကို အိမ်နီးချင်းနိုင်ငံများနှင့်နိုင်ငံတကာဈေးကွက်သို့ တိုးမြှင့်တင်ပို့နိုင်ရန်ကြိုးပမ်းလာကြသည်။ ပြည်တွင်းထုတ်လုပ်မှုအားကောင်းလာသည်နှင့်အမျှ ကုန်ကြမ်းတင်ပို့နိုင်မှုများကြောင့် နိုင်ငံခြား ဝင်ငွေပိုမိုရရှိစေရုံတင်မက ပြည်တွင်းလုပ်ငန်းရှင်များအတွက် အကျိုးအမြတ်ပိုမိုရရှိစေမည့် အလားအလာကောင်းများဖြစ်ပေါ်နေပါသည်။

    သွင်းကုန်ကဏ္ဍတွင်မူ ပြည်တွင်းကုန်ထုတ်လုပ်မှုနှင့် လူနေမှုဘဝအတွက် မရှိမဖြစ်လိုအပ် သည့် စက်သုံးဆီ၊ လုပ်ငန်းသုံးစက်ပစ္စည်းများ၊ လျှပ်စစ်ပစ္စည်းများနှင့်ဆေးဝါးများကို အဓိကထား တင်သွင်းလျက်ရှိသည်။ လက်ရှိတွင် သွင်းကုန်မူဝါဒများကို ပြည်တွင်းလိုအပ်ချက်အပေါ် မူတည်၍ စနစ်တကျ ထိန်းညှိဆောင်ရွက်လျက်ရှိပြီး အခြေခံစားသောက်ကုန်နှင့်ဆေးဝါးများ ပြတ်လပ်မှုမရှိ စေရန် ကုန်သွယ်မှုကဏ္ဍကိုအဆင်ပြေချောမွေ့အောင်ဖော်ဆောင်ပေးနေပါသည်။

     ပို့ကုန်သွင်းကုန်ကဏ္ဍသည် ဒစ်ဂျစ်တယ်စနစ်ဖြင့် ကုန်သွယ်မှုပြုလုပ်ခြင်းနှင့် နယ်စပ်ကုန်သွယ်ရေးစခန်းများ ပိုမိုသွက်လက်လာခြင်းတို့ကြောင့် အလားအလာကောင်းများဆက်လက်ရှိနေပါသည်။ ကုန်သွယ်မှုလုပ်ငန်းစဉ်များ ပိုမိုမြန်ဆန်ချောမွေ့စေရန်အတွက် ပို့ကုန်အရည်အသွေးကို နိုင်ငံတကာ စံချိန်စံညွှန်းမီအောင် ထိန်းသိမ်းနိုင်မည်ဆိုပါက မြန်မာ့ပိုကုန်ကဏ္ဍသည် ကမ္ဘာ့ဈေးကွက်အတွင်း ယခုထက်ပိုမိုခိုင်မာစွာနေရာယူလာနိုင်မည်ဖြစ်လာပါသည်။

DOCA(ပဲခူး)

    ရုရှားနိုင်ငံသည် ဇန်နဝါရီလတွင် ခရီးသည်တင်ကားအသစ် ၈၀,၆၀၄ စီး ရောင်းချခဲ့ပြီး ယခင်နှစ်ထက် ၉.၅ ရာခိုင်နှုန်း ကျဆင်းခဲ့ကြောင်း ဇန်နဝါရီလ ၄ ရက်နေ့တွင် ထုတ်ပြန်ခဲ့သော စက်မှုလုပ်ငန်းဒေတာများအရ သိရသည်။

   ပြည်တွင်းအမှတ်တံဆိပ် Lada သည် တစ်လအတွင်း စုစုပေါင်း ၁၉၆၄၄ ယူနစ် ရောင်းချ ခဲ့ရသဖြင့် ဈေးကွက်ဦးဆောင်သူအဖြစ် ဆက်လက်တည်ရှိနေကြောင်း ရုရှားမော်တော်ကား အေဂျင်စီ Autostat ၏ ဒါရိုက်တာ Sergey Tselikov က ပြောကြားခဲ့သည်။တရုတ်ကားထုတ်လုပ်သူ Haval သည် ကားအစီးရေ ၁၀,၇၂၆ စီး ရောင်းချခဲ့ရဖြင့် ဒုတိယ နေရာနှင့် နိုင်ငံခြားအမှတ်တံဆိပ်များကို ဦးဆောင်နေပြီး ရုရှား၏ အမှတ်တံဆိပ်အသစ် Tenet သည် ရောင်းအား ၈,၉၄၉ စီးအထိ ရောက်ရှိကာ တတိယနေရာတွင် ရပ်တည်ခဲ့သည်။ရုရှားခရီးသည်တင်ကားဈေးကွက်၏ ဇန်နဝါရီလစွမ်းဆောင်ရည်သည် အားနည်းသော် လည်း ကျဆင်းမှုသည် ၁၀ ရာခိုင်နှုန်း အတိုင်းအတာအတွင်းတွင် ရှိနေကြောင်း Tselikov က ပြောကြားခဲ့သည်။ ပြန်လည်အသုံးပြုခြင်းဆိုင်ရာ အခကြေးငွေများ မြင့်တက်လာခြင်းနှင့် တန်ဖိုးမြှင့်အခွန် မြင့်တက်လာသဖြင့် ဈေးနှုန်းမြင့်တက်လာမည့် ခန့်မှန်းချက်များကြောင့် စားသုံးသူများသည် မော်တော်ယာဉ်များကို အလျင်အမြန်ဝယ်ယူခဲ့ကြသဖြင့် ၂၀၂၅ ခုနှစ် ဆောင်းဦးရာသီတွင် ဝယ်လိုအား သိသိသာသာ မြင့်တက်လာခဲ့ကြောင်း သိရပါသည်။

  DOCA (ရန်ကုန်)