ပြည်ပကုန်သွယ်မှုသတင်းများ

             ဖိလစ်ပိုင်နိုင်ငံ၏ အကြီးဆုံးသံမဏိထုတ်ကုန်ထုတ်လုပ်သည့် Steel Asia Manufacturing Corporation သည် ၅-၁၁-၂၀၂၄ (အင်္ဂါနေ့) တွင် ကနေဒါသို့ ပီဆို ၅၁၁.၂၄ သန်း (အမေရိကန် ဒေါ်လာ ၈.၈ သန်း) တန်ဖိုးရှိသံမဏိတုံးများကိုတင်ပို့ခဲ့ပြီး ၎င်း၏ကမ္ဘာ့ဈေးကွက်သို့ သတ္တမမြောက်တင်ပို့မှုအဖြစ်အမှတ်အသားပြုခဲ့သည်။ လွန်ခဲ့သည့်ရက်အနည်းငယ်ကတင်ပို့ခဲ့သော သင်္ဘောသည် Davao ရှိ၎င်းတို့၏ သံမဏိစက်ရုံမှထုတ်လုပ်သောသံမဏိများဖြစ်ကြောင်း သံမဏိထုတ်လုပ်ရေးကုမ္ပဏီမှ ထုတ်ပြန်ချက်တွင်ဖော်ပြထားသည်။ ယခင်တင်ပို့မှုခြောက်ခုမှာ Bantangas ရှိ သံမဏိစက်ရုံဖြစ်ပြီး စုစုပေါင်းမတ်ထရစ်တန်ချိန် ၄၁၄၀၀ ကျော်ရှိကာ ပီဆို ၁.၅၈ ဘီလီယံတန်ဖိုးရှိသည်။ Steel Asia အမှုဆောင်အရာရှိက ပြန်လည်ဖွံ့ဖြိုးမြဲစွမ်းအင်နှင့် ပြန်လည်အသုံးပြုသည့်ရေကိုအသုံးပြုကာ ကမ္ဘာပေါ်တွင်အသန့်စင်ဆုံးသောသံမဏိ ကုမ္ပဏီများထဲတွင် ပါဝင်ကြောင်းအမွှမ်းတင်ခဲ့သည်။ ဇူလိုင်လအစောပိုင်းတွင် ကုမ္ပဏီသည် ပီဆို ၈၂ ဘီလီယံ တိုးချဲ့မှုအစီအစဉ်ဖြင့်၎င်း၏ ရှိပြီးသားစက်ရုံများကိုနှစ်ဆတိုးပြီးနောက် လေးနှစ်အတွင်းတွင် နိုင်ငံ၌နောက်ထပ်စက်ရုံ ၅ ရုံကိုထပ်မံတည်ဆောက်ရန်စီစဉ်နေသည်ဟု ကုမ္ပဏီမှပြောကြားခဲ့သည်။ စီစဉ်ထားသောစက်ရုံ ၅ ရုံမှာ Lemery၊ Bantangas ရှိ ပီဆို ၁၈ ဘီလီယံ စက်ရုံ၊ Canadelaria၊ Quezan ရှိ ပီဆို ၃၀ ဘီလီယံစက်ရုံနှင့် Davao မြို့ရှိ ၈ ဘီလီယံ စက်ရုံတို့ပါဝင်ပြီးကျန်စက်ရုံနှစ်ရုံမှာConception Tarlas တွင်ရှိမည်ဖြစ်ပြီး ပီဆို ၁၂ ဘီလီယံကုန်ကျကာ ၂၀၂၇ ခုနှစ်တွင် ဆောက်လုပ်ပြီးစီးမည်ဟုခန့်မှန်းထားကြသည်၊၊ Steel Asia စီးပွားရေးဖွံ့ဖြိုးတိုးတက်မှုဆိုင်ရာ ဒုတိယဥက္ကဋ္ဌ Rafael Hidalgo က၎င်းတို့၏ ထုတ်ကုန်ကမ်းလှမ်းမှုများကို စူးစမ်းလေ့လာလိုကြောင်း မေလအတွင်းပြောကြားခဲ့ကြောင်းသိရှိရပါသည်။

Source:Business.inquirer

DOCA(ရန်ကုန်)

               ၂၀၂၄ ခုနှစ်၏ ပထမဆယ်လတာကာလတွင် ဗီယက်နမ်၏ငရုတ်ကောင်းတင်ပို့မှုသည် ပမာဏတွင် ၁.၉% ကျဆင်းခဲ့သော်လည်း စျေးနှုန်းမြင့်တက်မှု၏ကျေးဇူးကြောင့် တန်ဖိုးတွင်၄၈% သိသာစွာမြင့်တက်ခဲ့ကြောင်း ဗီယက်နမ်နိုင်ငံ ငရုတ်ကောင်းနှင့် ဟင်းခတ်အမွှေးအကြိုင်အသင်း (VPSA) ၏ ပြောကြားချက်အရသိရပါသည်။ ထိုကာလတွင် ဗီယက်နမ်နိုင်ငံသည် ငရုတ်ကောင်းတန်ချိန် ၂၁၉၃၈၇ တန်တင်ပို့ရာမှဝင်ငွေ အမေရိကန် ဒေါ်လာ ၁.၁ ဘီလီယံရရှိခဲ့ကြောင်းသိရပါသည်။ အနက်ရောင်ငရုတ်ကောင်းတစ်တန်၏ ပျမ်းမျှတင်ပို့စျေးနှုန်းမှာ တစ်တန်ကို ၄၉၇၁ အမေရိကန်ဒေါ်လာ ရှိပြီးလွန်ခဲ့သည့်နှစ်တူညီသည့်ကာလထက် ၁၅၂၈ အမေရိကန်ဒေါ်လာ မြင့်တက်ခဲ့ကာ အဖြူရောင်ငရုတ်ကောင်းတစ်တန်မှာ အမေရိကန်ဒေါ်လာ ၆၆၂၆ ဒေါ်လာရှိကာ လွန်ခဲ့သည့်နှစ် တူညီသည့်ကာလထက်၁၆၇၁ အမေရိကန်ဒေါ်လာမြင့်တက်ခဲ့ကြောင်းသိရပါသည်။ အောက်တိုဘာလတစ်လတည်းတွင် ဗီယက်နမ်သည် ငရုတ်ကောင်း တန်ချိန် ၁၈၄၉၃ တန်တင်ပို့ခဲ့ပြီး ဝင်‌ငွေအမေရိကန်ဒေါ်လာ သန်း၁၂၀ ရရှိခဲ့ကြောင်းသိရပါ သည်။ ထိုကာလအတွင်း အမေရိကန်သည် တန်ချိန် ၆၂၅၅၃ တန်ဖြင့် ဗီယက်နမ်၏ အကြီးမားဆုံး ငရုတ်ကောင်းတင်ပို့ရာစျေးကွက်ဖြစ်ပြီး လွန်ခဲ့သည့်နှစ်တူညီသည့်ကာလထက် ၄၇% မြင့်တက်ခဲ့ပြီး စုစုပေါင်းတင်ပို့မှုပမာဏ၏ ၂၈.၅% ရှိကြောင်းသိရပါသည်။ အခြားအဓိကတင်ပို့ရာစျေးကွက်များတွင် ယူအေအီး၊ ဂျာမနီ၊ အိန္ဒိယနှင့် နယ်သာလန်နိုင်ငံတို့ ပါဝင်ကြောင်း သိရပါသည်။ ပြည်တွင်းထုတ်လုပ်မှုအပြင် ဗီယက်နမ်သည် ငရုတ်ကောင်းကို ပြုပြင်ထုတ်လုပ် တင်ပို့ရန်အတွက်အခြားနိုင်ငံများထံမှ တင်သွင်းကြောင်းသိရပါသည်။ အောက်တိုဘာလတစ်လ တည်းတွင်ဗီယက်နမ်သည်အမေရိကန်ဒေါ်လာ ၂၉.၃သန်း တန်ဖိုးရှိသော ငရုတ်ကောင်းတန်ချိန် ၄၈၁၈ တန်ကို အဓိကအားဖြင့် အင်ဒိုနီးရှားနှင့်ဘရာဇီးထံမှတင်သွင်းပြီး စက်တင်ဘာလကထက် ၉၈ % မြင့်တက်ခဲ့ကြောင်း သိရှိရပါသည်။ ဆယ်လတာအတွက်ဆိုပါက အမေရိကန်ဒေါ်လာ ၁၃၁.၃ သန်းတန်ဖိုးရှိသော ငရုတ်ကောင်းတန်ချိန် ၂၈၅၉၆ တန်ကိုတင်သွင်းခဲ့ကြောင်းသိရပါသည်။ ထို့ပြင် ဗီယက်နမ်သည် ထိုဆယ်လတာကာလအတွင်း အမေရိကန်ဒေါ်လာ ၂၂၀.၅ သန်းတန်ဖိုးရှိသော သစ်ကြံပိုးခေါက် တန်ချိန် ၇၉၅၁၆ တန်ကို ပြည်ပသို့တင်ပို့ခဲ့ပြီး လွန်ခဲ့သည့်နှစ် တူညီသည့်ကာလထက် ပမာဏတွင် ၆.၄ % မြင့်တက်ခဲ့ကြောင်းသိရပါသည်။ အိန္ဒိယ၊ အမေရိကန်နှင့်ဘင်္ဂလားဒေ့ရှ်တို့မှာ ဗီယက်နမ်သစ်ကြံပိုးခေါက် အဓိကတင်ပို့ရာ စျေးကွက်သုံးခု ဖြစ်ကြောင်းသိရပါသည်။ တစ်ချိန်တည်းမှာပင် ဗီယက်နမ်သည်အမေရိကန်ဒေါ်လာ ၉ သန်း တန်ဖိုးရှိသည့် သစ်ကြံပိုးခေါက်တန်ချိန် ၃၇၁၃ တန်ကို ပြုပြင်ထုတ်လုပ်ရန်အတွက် တင်သွင်းခဲ့ကြောင်းသိရှိရပါသည်။

Vietnamplus

DOCA(ရန်ကုန်)

               အိန္ဒိယ၏ဆန်သိုလှောင်မှုစာရင်းသည်နိုဝင်ဘာလတွင် မတ်ထရစ်တန်ချိန် ၂၉.၇ သန်းအထိ မြင့်တက်လာခဲ့ကြောင်းလွန်ခဲ့သည့် ၂ နှစ်အတွင်း ပို့ကုန်ကန့်သတ်ချက်များကြောင်း ပြည်တွင်းထောက်ပံ့မှုများတိုးမြင့်လာကာအစိုးရမှလျာထားသည်ထက် သုံးဆနီးပါးမြင့်တက်လာခဲ့သည်ဟု သတင်းရင်းမြစ်များကဆိုသည်။ ဆန်လက်ကျန်များစွာထားရှိခြင်းဖြင့် အိန္ဒိယနိုင်ငံသည် ပြည်တွင်းဆန်ထောက်ပံ့မှုကို စိုးရိမ်စရာမလိုဘဲပြည်ပသို့တင်ပို့မှုကိုမြှင့်တင်နိုင်မည်ဖြစ်သည်။ နိုင်ငံပိုင်စပါးကျီများတွင် အရန်ဆန်သည် ယခုကာလအစတွင်တန်ချိ်န ၂၉.၇ သန်းရှိပြီးလွန်ခဲ့သည့်နှစ်ထက် ၄၈.၅ ရာခိုင်နှုန်းတိုးလာကြောင်းသိရသည်။ အိန္ဒိယလယ်သမားများသည် ယခုနှစ်နွေရာသီမှ စံချိန်တင်စပါးတန်ချိန်သန်း ၁၂၀ ကို စုဆောင်ခဲ့ပြီး ဆန်ထွက်ရှိမှု စုစုပေါင်း၏ ၈၅ ရာခိုင်နှုန်းနီးပါးရှိသည်။ Food Corporation of India (FCI) သည် (၂၀၁၃-၂၀၂၄) တွင် တောင်သူလယ်သမားများထံမှ ဝယ်ယူသောတန်ချိန် ၄၆.၃ သန်းမှ အောက်တိုဘာလ ၁ ရက်နေ့မှစတင်သည့် ဈေးကွက်ဝင်နှစ်တွင် နွေစပါးသစ်တန်ချိန် ၄၈.၅ သန်းဝယ်ယူရန်မျှော်မှန်းထားသော်လည်း မုတ်သုံမိုးသည်းထန်စွာရွာသွန်းမှုကြောင့် အိန္ဒိယနိုင်ငံသည် ပို့ကုန်ကန့်သတ်ချက်များကို ယမန်နှစ်ကချမှတ်ခဲ့သည်။ သို့သော်နယူးဒေလီသည်ယခုနှစ်တွင်ဆန်ကွဲ ၁၀၀ ရာခိုင်နှုန်းမှလွဲ၍ ကျန်ရှိသောဆန်အမျိုးအစားအားလုံးအားခွင့်ပြုခဲ့သည်။ ပို့ကုန်ကန့်သတ်ချက်မျာကိုဖယ်ရှားခြင်းသည် လာမည်လများအတွင်းပို့ကုန်တင်ပို့မှုကိုအရှိန်မြှင့်နိုင်မည်ဖြစ်ကြောင်း ပို့ကုန်လုပ်ငန်းရှင် BV Krishana Rao ကပြောသည်။ အိန္ဒိယနိုင်ငံ၏ ပန်ဂျပ်နှင့် ဟာယာနာပြည်နယ်များမှ လယ်သမားများသည် သိုလှောင်မှုပြဿနာများကြောင့် FCI ရာသီသစ်သီးနှံများဝယ်ယူမှုနှေးကွေးခဲ့သည်ဟု တိုင်ကြားခဲ့ကြောင်းသိရှိရပါသည်။

Source: Finance Yahoo

DOCA(ရန်ကုန်)

                တရုတ်စိုက်ပျိုးရေးကုမ္ပဏီဖြစ်သည့် Shandong (ကမ္ဘောဒီးယား) စီးပွားရေးနှင့် နည်းပညာဖွံ့ဖြိုးတိုးတက်ရေးဇုန်သည် ကမ္ဘောဒီးယား၌ ပီလောပီနံနှင့် သီဟိုဠ်ပြုပြင်ထုတ်လုပ်သည့် စက်ရုံများတွင် ရင်းနှီးမြှုပ်နှံမှုများတို့းချဲ့ရန်စိတ်ဝင်စားမှုကို ဖော်ပြခဲ့ကြောင်းသိရပါသည်။ Shandong ၏ ဥက္ကဋ္ဌဖြစ်သူ Wu Yu Jie က ကမ္ဘောဒီးယားဝန်ကြီးချုပ် Hun Manet နှင့် (၆.၁၁.၂၀၂၄) ရက်နေ့က တရုတ်နိုင်ငံ ကူမင်မြို့တွင်တွေ့ဆုံဆွေးနွေးခဲ့ကြောင်းသိရပါသည်။ အစည်းအဝေးတွင် Wu Yu Jie က များစွာသောကဏ္ဍများတွင် ကုမ္ပဏီ၏ ၂၀၁၂ ခုနှစ်ကစတင်ခဲ့သည့် ပီလောပီနံနှင့် သီဟိုဠ်တို့အပေါ် အဓိကထားသော စိုက်ပျိုးရေးကဏ္ဍတွင်ရင်းနှီးမြှုပ်နှံမှုဆောင်ရွက်ချက်များကို အကျဉ်းချုပ်ပြောကြားခဲ့ပါသည်။ ကုမ္ပဏီသည် ပီလောပီနံနှင့် သီဟိုဠ်ပြုပြင်ထုတ်လုပ်သည့် စက်ရုံတည်ဆောက်ရန် ဆန္ဒရှိကြောင်းသိရပါသည်။ ဝန်ကြီးချုပ်ကလည်း ကုမ္ပဏီ၏ရင်းနှီးမြှုပ်မှုများကို အသိအမှတ်ပြုခဲ့ပြီး စက်ရုံတည်ဆောက်မည့် အစီအစဉ်ကို ကြိုဆိုကြောင်းပြောကြားခဲ့ပါသည်။ ထို့ပြင် Hun Manet က ကမ္ဘောဒီးယားအစိုးရသည် စိုက်ပျိုးရေး၊ ပြုပြင်ထုတ်လုပ်ခြင်းနှင့် ကမ္ဘောဒီးယားမှ တရုတ်နှင့် ကမ္ဘာ့ဈေးကွက်များသို့ တိုက်ရိုက်တင်ပို့ရာတွင်ရင်းနှီးမြှုပ်နှံမည့် ကုမ္ပဏီများကို ပံ့ပိုးလျှက်ရှိကြောင်းနှင့် ကုမ္ပဏီကိုလည်း သက်ဆိုင်ရာဝန်ကြီးဌာနများ၊ အထူးသဖြင့် စိုက်ပျိုးရေး၊ သစ်တော၊ ငါးလုပ်ငန်းဝန်ကြီးဌာနနှင့် ကမ္ဘောဒီးယားနိုင်ငံဖွံဖြိုးတိုးတက်ရေးကောင်စီတို့နှင့် နီးကပ်လုပ်ဆောင်ရန်ပြောကြားခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

               စင်္ကာပူနိုင်ငံ Woodland စစ်ဆေးရေးဂိတ်တွင် နှစ်ရက်ကြာပူးပေါင်းဆောင်ရွက်မှုတွင် မလေးရှားနိုင်ငံမှ တရားမဝင်တင်သွင်းလာသော လက်ဆတ်သောပြုပြင်ပြီးသားထုတ်ကုန်တစ်တန်ခန့်အား စင်္ကာပူအာဏာပိုင်များကဖမ်းဆီးရမိခဲ့သည်။ နိုဝင်ဘာလ ၆ ရက်နှင့် ၇ ရက် စစ်ဆေးမှုများပြုလုပ်စဉ်အတွင်း လူဝင်မှုကြီးကြပ်ရေးနှင့် စစ်ဆေးရေးဂိတ်အာဏာပိုင် (ICA) မှ အရာရှိများသည် ကုန်တင်ကားနှစ်စီးရှိ ကုန်စည်ပို့ဆောင်မှုတွင် ကွဲလွဲမှုများအား သတိပြုမိခဲ့ပြီး ၎င်းတို့အားထပ်မံစစ်ဆေးရန်အတွက် စင်္ကာပူစားနပ်ရိက္ခာအေဂျင်စီ (SFA) သို့လွှဲပြောင်းပေးခဲ့သည်။ SFA သည် ခရမ်ချဉ်သီး၊ ကြက်သွန်နီ၊ ဆလတ်၊ လှီးဖြတ်ထားသော ဂေါ်ဖီနှင့် သံပုရာသီးခြမ်းများအား တင်သွင်းသူနှစ်ဦးထံမှ တရားမဝင်တင်သွင်းလာသောထုတ်ကုန်များအပါအဝင် မကြေညာရသေးသောကုန်ပစ္စည်းများကို SFA မှ‌ဖမ်းဆီးရမိခဲ့သည်။ စင်္ကာပူနိုင်ငံရှိ အစားအသောက်တင်သွင်းမှုအားလုံးသည် SFA စည်းမျဉ်းကိုလိုက်နာရမည်ဖြစ်သည်။ လိုင်စင်ရ တင်သွင်းသူများမှသာလျှင်နိုင်ငံအတွင်းသို့ အစားအသောက်များသယ်ဆောင်လာနိုင်ပြီး ကုန်စည်ပို့ဆောင်မှုတိုင်းကိုတရားဝင်တင်သွင်းခွင့်ပါမစ်ဖြင့်ကြေညာပြီး လိုက်နာဆောင်ရွက်ရမည်ဖြစ်သည်။ လက်ဆတ်သောသစ်သီးဝလံနှင့် ဟင်းသီးဟင်းရွက်များအား တရားမဝင်တင်သွင်းသည့်ပြစ်မှုကျူးလွန်သူများသည် အမြင့်ဆုံးဒဏ်ငွေ စင်္ကာပူဒေါ်လာ ၁၀၀၀၀နှင့် သို့မဟုတ် ထောင်ဒဏ် သုံးနှစ်အထိချမှတ်ခံရမည်ဖြစ်သည်။ ပြုပြင်ပြီးသား သစ်သီးနှင့် ဟင်းသီးဟင်းရွက်တို့အား တရားမဝင်တင်သွင်းသူများသည် ဒဏ်ငွေ စင်္ကာပူဒေါ်လာ ၁၀၀၀ ပေးဆောင်ရမည်ဖြစ်ပြီးပြစ်မှု ထင်ရှားပါကဒဏ်ငွေစင်္ကာပူဒေါ်လာ ၂၀၀၀ အထိပေးဆောင်ရမည် ဖြစ်ကြောင်း သိရှိရပါသည်။

Source: thestars

DOCA(ရန်ကုန်)