အင်ဒိုနီးရှားနိုင်ငံ အနောက်ဂျာဗားပြည်နယ် West Bandung ခရိုင် အစိုးရအဖွဲ့သည် Lembang ခရိုင်ခွဲမှထွက်ရှိသည့် ခခကို ဆော်ဒီအာရေဗျ နိုင်ငံသို့ ပထမဆုံးအကြိမ်တင်ပို့နိုင်ရေး အောင်မြင်စွာကူညီဆောင်ရွက်ပေးခဲ့ကြောင်း သိရပါ သည်။ အဆိုပါဒေသထွက်ကော်ဖီမျိုး ဖွံ့ဖြိုးတိုးတက်လာရေးအတွက် ဒေသအစိုးရ၊ ဒေသခံ အသေးစား၊ အငယ်စားနှင့် အလတ်စား စီးပွားရေးလုပ်ငန်း (MSME)၊ ကော်ဖီစိုက်တောင်သူများ၊ အင်ဒိုနီးရှားဗဟိုဘဏ် (Bank Indonesia)၊ ဒေသခံအကောက်ခွန်ရုံးနှင့် အနောက်ဂျာဗား ပြည်နယ်အစိုးရတို့ ပူးပေါင်းဆောင်ရွက်ခဲ့ကြကြောင်း သိရပါသည်။ West Bandung ခရိုင် ဒုတိယ အကြီးအကဲ Asep Ismail က အဆိုပါကော်ဖီကို Arjuna တောင်သူအဖွဲ့က Tona’s Coffee အမှတ်တံဆိပ်ဖြင့် စိုက်ပျိုးထုတ်လုပ်ခဲ့ခြင်းဖြစ်ကြောင်း ဩဂုတ်လ ၃၁ ရက်နေ့တွင် ပြောကြား ခဲ့ပါသည်။ ယခုအောင်မြင်မှုသည် West Bandung ဒေသထွက်ကော်ဖီများ ကမ္ဘာ့ဈေးကွက်သို့ တိုးချဲ့ဝင်ရောက်နိုင်ရန် ပထမခြေလှမ်းဖြစ်ကြောင်း ၎င်းကဆိုပါသည်။ လာမည့်နှစ်တွင် ဂျပန် နိုင်ငံကိုလည်း စတင်တင်ပို့ရန် ရည်ရွယ်ထားကြောင်း Ismail က ဆက်လက်ပြောကြားခဲ့ပါသည်။
Tona’s Coffee ၏ မန်နေဂျာဖြစ်သူနှင့် ဒေသခံလူငယ်ကော်ဖီစိုက်တောင်သူ Dikdik Ramdaniansyah က ၎င်းတို့အဖွဲ့သည် ကော်ဖီပြုပြင်ထုတ်လုပ်မှု နည်းလမ်းအမျိုးမျိုးဖြင့် ပြုလုပ် ထားသည့် နမူနာကော်ဖီငါးမျိုးကိုပေးပို့ခဲ့ပြီးနောက် ရီယာဒ်မြို့ရှိဝယ်ယူသူများ၏ စိတ်ဝင်စားမှုကို Tankuban Parahu အာရေဗီကာကော်ဖီကရရှိခဲ့ကြောင်း ပြောကြားခဲ့ပါသည်။ အစပိုင်းတွင် အချဉ်ဖောက်ထားသည့် ကော်ဖီနမူနာငါးမျိုးပေးပို့ခဲ့ပြီး နောက်ဆုံးတွင် ဝယ်ယူသူများက နာနတ် သီးနှင့်အချဉ်ဖောက်ထားသည့် ကော်ဖီကိုရွေးချယ်ခဲ့ကြောင်း ၎င်းကရှင်းပြခဲ့ပါသည်။ ပထမဆုံး တင်ပို့သည့်ကော်ဖီမှာ နာနတ်သီးဖြင့်အချဉ်ဖောက်ထားသည့် ကော်ဖီစေ့ကြမ်း (Green Coffee Beans) လေးတန်ဖြစ်ပြီး အရောင်းအဝယ်တန်ဖိုးမှာ ရူပီး သန်း ၈၀၀ ခန့် (အမေရိကန်ဒေါ်လာ ၄၅,၀၇၀ ခန့်) ရှိခဲ့ကြောင်း သိရပါသည်။ ဆော်ဒီအာရေဗျနိုင်ငံမှ ဝယ်ယူသူများ၏ ကနဦးမှာယူမှု မှာ ၂၅ တန်ဖြစ်သော်လည်း ထုတ်လုပ်မှုစွမ်းရည်နှင့် ကုန်ကြမ်းရရှိနိုင်မှု ကန့်သတ်ချက်များ ကြောင့် ပထမအကြိမ်တွင် လေးတန်သာတင်ပို့နိုင်ခဲ့ကြောင်း Ramdaniansyah က ပြောကြား ခဲ့ပါသည်။ ဆော်ဒီဈေးကွက်မှ ဝယ်လိုအားမြင့်တက်လာခြင်းသည် Lembang ဒေသရှိ ကော်ဖီစိုက် တောင်သူများအနေဖြင့် ထုတ်လုပ်မှုတိုးချဲ့ရန် အခွင့်အလမ်းကောင်းတစ်ရပ် ဖြစ်လာကြောင်း ၎င်းကအလေးပေးပြောကြားခဲ့ပါသည်။ လက်ရှိတွင် Tona’s Coffee သည် Cibodas ကျေးရွာရှိ ကော်ဖီစိုက်တောင်သူများထံမှ ကော်ဖီတန်ချိန် ၅၀ ခန့် ဝယ်ယူရရှိနေသော်လည်း ပို့ကုန်ဝယ်လို အား ဆက်လက်မြင့်တက်လာပါက အဆိုပါပမာဏဖြင့် လုံလောက်မည်မဟုတ်ကြောင်း သိရပါ သည်။ ထုတ်လုပ်မှုလုပ်ငန်းစဉ်တွင် အဓိကအခက်အခဲမှာ ကုန်ကြမ်းရရှိနိုင်မှုဖြစ်ပြီး အထူးသဖြင့် ကော်ဖီသီးရရှိရန် အခက်အခဲရှိကြောင်း Ramdaniansyah က ပြောကြားခဲ့ပါသည်။ ယင်းအခက် အခဲကိုဖြေရှင်းနိုင်ရန် Tona’s Coffee အနေဖြင့် ထုတ်လုပ်မှုစွမ်းရည်ကို လက်ရှိထက် နှစ်ဆ သို့မဟုတ် သုံးဆအထိတိုးမြှင့်ရန်ရည်ရွယ်ထားပြီး ထိုသို့တိုးမြှင့်ထုတ်လုပ်ပါက လိုအပ်မည့် ကုန်ကြမ်းပမာဏမှာ တန်ချိန် ၁၀၀ ကျော်အထိ ရှိလာမည်ဟု ခန့်မှန်းထားကြောင်း သိရပါသည်။
Tona’s Coffee ၏ B2B အထူးကျွမ်းကျင်သူ Adil Wijayakusumah က နိုင်ငံတကာစံချိန် စံညွှန်းများနှင့်ကိုက်ညီစေရန် သုံးနှစ်ကြာအားထုတ်ကြိုးပမ်းခဲ့ပြီးနောက် ကိုယ်ပိုင်ပို့ကုန်လုပ်ငန်း ကို လွတ်လပ်စွာဆောင်ရွက်နိုင်ခဲ့ခြင်းဖြစ်ကြောင်း ပြောကြားခဲ့ပါသည်။
DOCA (ရန်ကုန်)