အင်ဒိုနီးရှားအစိုးရသည် သတ်မှတ်ချက်နှင့်ကိုက်ညီသည့် သတ္တုတူးဖော်ရေးကုမ္ပဏီများ အတွက် သဘာဝသယံဇာတပို့ကုန်မှ ရရှိသည့်ဝင်ငွေများကို သုံးလကြာကာလအတွင်း အနည်းဆုံး ၃၀ ရာခိုင်နှုန်း ထိန်းသိမ်းထားနိုင်ရန် စည်းမျဉ်းသစ်တစ်ရပ်ဖြင့် ဖြေလျှော့ပေးလိုက်ကြောင်း သိရ ပါသည်။ အစိုးရစည်းမျဉ်းအမှတ် ၂၁/၂၀၂၆ ၏ ပုဒ်မ ၁၈A အရ သတ်မှတ်ချက်ပြည့်မီသည့် သတ္တုတူးဖော်ရေးပို့ကုန်လုပ်ငန်းရှင်များသည် သဘာဝသယံဇာတပို့ကုန်ဝင်ငွေ၏ အနည်းဆုံး ၃၀ ရာခိုင်နှုန်းကို သုံးလကြာထားရှိနိုင်မည်ဖြစ်ကြောင်း သိရပါသည်။ ယင်းသည် ယေဘုယျစည်းမျဉ်း အရ ပို့ကုန်ဝင်ငွေ၏ ၁၀၀ ရာခိုင်နှုန်းကို ၁၂ လကြာ ထားရှိရသည့် သတ်မှတ်ချက်နှင့် ကွာခြား ကြောင်း သိရပါသည်။ စီးပွားရေးရာပူးပေါင်းညှိနှိုင်းရေးဝန်ကြီးဌာန အတွင်းဝန် Susiwijono က ယင်းမူဝါဒ၏ အဓိကရည်ရွယ်ချက်သုံးရပ်မှာ မက်ခရိုစီးပွားရေးတည်ငြိမ်မှုနှင့် ပြည်တွင်းဘဏ္ဍာ ရေးဈေးကွက်များကိုခိုင်မာစေရန်၊ တန်ဖိုးမြှင့်ထုတ်လုပ်ရေးလုပ်ငန်းများ ဖွံ့ဖြိုးတိုးတက်ရေး အတွက် ရင်းနှီးမြှုပ်နှံမှုနှင့် လည်ပတ်ငွေကြေးကိုပံ့ပိုးပေးရန်နှင့် ရင်းနှီးမြှုပ်နှံမှုနှင့် ပို့ကုန်များ တိုးမြှင့်ရန်ဖြစ်ကြောင်း ဩဂုတ် ၃၀ ရက်က ပြောကြားခဲ့ပါသည်။ အကောက်ခွန်နှင့် ယစ်မျိုးဦးစီး ဌာန၏ ပို့ကုန်အကောက်ခွန်ကြေညာစာတမ်းများကိုအခြေခံ၍ ၂၀၂၅ ခုနှစ် မတ်လမှ ၂၀၂၆ ခုနှစ် ဇူလိုင်လအထိကာလအတွင်း အစိုးရက သတ္တုတူးဖော်ရေးပို့ကုန်လုပ်ငန်းရှင်များနှင့် သက်ဆိုင် သည့် အခွန်ထမ်းမှတ်ပုံတင်အမှတ် ၅၃၇ ခုကို ဖော်ထုတ်ခဲ့ကြောင်း သိရပါသည်။ ယင်းအချက် အလက်များကို အထွေထွေဥပဒေစီမံခန့်ခွဲရေးဦးစီးဌာန၏ အချက်အလက်များနှင့် တိုက်ဆိုင် စစ်ဆေးပြီးနောက် အခွန်ထမ်းမှတ်ပုံတင်အမှတ် ၆၄ ခုသည် ပုဒ်မ ၁၈A ပါ အကျိုးခံစားခွင့် အတွက် သတ်မှတ်ချက်များနှင့် ကိုက်ညီသည်ဟု တွေ့ရှိခဲ့ကြောင်း သိရပါသည်။ ယင်းသည် စုစုပေါင်း၏ ၁၂ ရာခိုင်နှုန်းခန့် ဖြစ်ကြောင်း သိရပါသည်။ အဆိုပါ အကျိုးခံစားခွင့်သည် မဖြစ်မနေ အသုံးပြုရမည့်အစီအစဉ်မဟုတ်ဘဲ ဆန္ဒအလျောက် အသုံးပြုနိုင်မည်ဖြစ်ကြောင်း သိရပါသည်။ သတ်မှတ်ချက်နှင့်ကိုက်ညီသည့် မိတ်ဖက်နိုင်ငံတစ်နိုင်ငံမှ အစုရှယ်ယာရှင်တစ်ဦးက အနည်းဆုံး အစုရှယ်ယာ ၁၀ ရာခိုင်နှုန်း ပိုင်ဆိုင်ထားသည့် ကန့်သတ်တာဝန်ယူမှုရှိသောကုမ္ပဏီများအဖြစ် ဖွဲ့စည်းထားသည့် သတ္တုတူးဖော်ရေးပို့ကုန်လုပ်ငန်းရှင်များသည် ယင်းအစီအစဉ်ကို အသုံးပြု နိုင်မည်ဖြစ်ကြောင်း သိရပါသည်။ အစိုးရက မိတ်ဖက်နိုင်ငံများအဖြစ် အမေရိကန်ပြည်ထောင်စု၊ တရုတ်နိုင်ငံ၊ ဟောင်ကောင်၊ ဩစတြေးလျနှင့် ကနေဒါနိုင်ငံတို့ကို သတ်မှတ်ထားကြောင်း Susiwijono က ပြောကြားခဲ့ပါသည်။ အဆိုပါနိုင်ငံများသည် အင်ဒိုနီးရှားနိုင်ငံ၏ သတ္တုတူးဖော် ရေးကဏ္ဍတွင် ရင်းနှီးမြှုပ်နှံမှုအများဆုံးပြုလုပ်ထားသည့် နိုင်ငံများဖြစ်သည့်အပြင် အင်ဒိုနီးရှားနှင့် နှစ်နိုင်ငံကုန်သွယ်ရေး သဘောတူညီချက်များ သို့မဟုတ် အခြားကုန်သွယ်ရေးဆိုင်ရာ နားလည်မှု များရှိသည့်နိုင်ငံများဖြစ်ကြောင်း ၎င်းကဆိုပါသည်။ သတ်မှတ်ထားသည့်ပမာဏနှင့် ထားရှိရမည့် ကာလကို ဖြေလျှော့ပေးခြင်းအပြင် သတ်မှတ်ချက်ပြည့်မီသည့် ပို့ကုန်လုပ်ငန်းရှင်များသည် သဘာဝသယံဇာတပို့ကုန်ဝင်ငွေများကို နိုင်ငံခြားငွေဘဏ်များ၌လည်း ထားရှိနိုင်မည်ဖြစ်ကြောင်း သိရပါသည်။ ယင်းအစီအစဉ်အတွက် အထူးအကောင့်များဖွင့်လှစ်နိုင်ရန် နိုင်ငံခြားငွေဝန်ဆောင် မှုပေးသည့် ဘဏ် ၁၅ ခုကို အစိုးရက သတ်မှတ်ထားပြီး နိုင်ငံပိုင်ဘဏ် ငါးခုနှင့် ပုဂ္ဂလိကဘဏ် ၁၀ ခု ပါဝင်ကြောင်း သိရပါသည်။ သဘာဝသယံဇာတပို့ကုန်ဝင်ငွေ အထူးထားရှိရေးအစီအစဉ် သည် ၂၀၂၆ ခုနှစ် စက်တင်ဘာ ၁ ရက်မှ စတင်အသက်ဝင်မည်ဖြစ်ကြောင်း သိရပါသည်။ သတ်မှတ်ချက်နှင့် ကိုက်ညီသော်လည်း ယင်းအစီအစဉ်ကို အသုံးမပြုလိုသည့် ပို့ကုန်လုပ်ငန်းရှင် များအနေဖြင့် ပို့ကုန်လုပ်ငန်းရှင်စာရင်း ထုတ်ပြန်ပြီးနောက် အလုပ်လုပ်ရက် ငါးရက်အတွင်း အင်ဒိုနီးရှား ဗဟိုဘဏ်သို့ အကြောင်းကြားစာတင်ပြ၍ အစီအစဉ်မှ နုတ်ထွက်နိုင်မည်ဖြစ်ကြောင်း သိရပါသည်။ အဆိုပါအကြောင်းကြားစာကို တင်ပြခြင်းမရှိသည့် ပို့ကုန်လုပ်ငန်းရှင်များသည် အထူးအစီအစဉ်ကို အသုံးပြုရန် ရွေးချယ်ထားပြီးဖြစ်သည်ဟု အလိုအလျောက် သတ်မှတ်ခံရမည် ဖြစ်ကြောင်း သိရပါသည်။ အထူးအစီအစဉ်ကိုအသုံးမပြုသည့် ပို့ကုန်လုပ်ငန်းရှင်များသည် အစိုးရစည်းမျဉ်း အမှတ် ၂/၂၀၂၆ အရ ယေဘုယျစည်းမျဉ်းများကို ဆက်လက်လိုက်နာရမည်ဖြစ်ကြောင်း သိရပါ သည်။ ရေနံနှင့် သဘာဝဓာတ်ငွေ့မဟုတ်သည့် သတ္တုတူးဖော်ရေးပို့ကုန်လုပ်ငန်းရှင်များသည် ပို့ကုန်ဝင်ငွေ၏ ၁၀၀ ရာခိုင်နှုန်းကို ၁၂ လကြာ ထားရှိရမည်ဖြစ်ပြီး ရေနံနှင့် သဘာဝဓာတ်ငွေ့ပို့ကုန်လုပ်ငန်းရှင်များမှာမူ အနည်းဆုံး ၃၀ ရာခိုင်နှုန်းကို သုံးလကြာ ထားရှိရမည် ဖြစ်ကြောင်း သိရပါသည်။
DOCA (ရန်ကုန်)